I'm Inlove With My Bodyguard (Completed)

CHAPTER 31

Kinabukasan ay parang walang nangyari kay Penny. Nawala lahat ng masasakit na ala-ala niya kagabi noong nasa PROM siya at si Rocky ang dahilan kung bakit hindi na niya masyadong ininda ang nangyari sa pagtitipong iyon. Buong magdamag na laman ng isipan niya ang nangyari kagabi habang kasama niya si Rocky. Hindi siya makapaniwala na nagsayaw sila kagabi. Parang kanila lamang ang mundo. Ramdam na ramdam niya ang malakas na tibok ng kaniyang puso habang nakakapit siya sa balikat ni Rocky. Pati ang mga titig nito sa kaniya ay nakatatak pa rin sa utak niya.

Bumiling siya sa higaan habang napapangiti at yakap-yakap ang unan niya. Walang pasok ngayon kaya makakapagpahinga siya. Napakadami niyang oras na maialalaan sa sarili upang balikan ang mga naganap sa pagitan nila ni Rocky kagabi. Sinabi nito na maganda siya. Tila tumatalon ang puso niya sa tuwing sinasabi nito na maganda siya. Hindi naman kagabi ang unang beses na narinig niya rito ang mga katagang iyon pero hanggang ngayon ay hindi pa rin siya makapaniwala. Siguro ay dahil hindi niya iyon nakasanayan. Lumaki siyang puro panlalait lang tungkol sa katawan niya ang naririnig mula sa mga tao, pero si Rocky, iba ito sa lahat. Nakikita nito ang kagandahan niya kahit para sa kaniya ay wala naman.

Hindi tuloy maiwasang lumambot ng puso niya para sa binata. Nagbabago na ang lahat ng masamang pagtingin niya kay Rocky noong unang beses niya itong nakilala. Mabait pala ito. Totoo talaga na hindi mo pwedeng makilala ang isang tao dahil lang sa pisikal na itsura nito. Buong akala niya ay gago ito at masamang tao. Pero mali siya. Ramdam na niyang mabuting tao talaga si Rocky. Ilang beses na ba niyang nasaksihan ang kabutihan nito? Kahit na may pagka-maldito ito at makulit eh hindi maitatangging malinis ang kalooban ng puso nito.

Bumangon siya sa higaan upang lumabas at hanapin si Rocky. Sakto naman na naabutan niya itong kausap ang Daddy niya. Pinasadahan niya ng tingin si Rocky, nakatali ang buhok nito na medyo mahaba na. Mukhang di nito nahaharap na magpagupit or baka sinasadya lang nito na pahabain ang buhok. Kitang-kita tuloy niya ang maraming hikaw nito sa tainga. May kayas pa ang isang kilay nito. Nakasuot ito ng plain black t-shirt at gray na jersey short. Ngayon niya nare-realize na ang astig nitong tingnan. Kung dati ay naaasar siya sa itsura at ayos nito, ngayon habang patagal ng patagal ay nagiging gwapo na ito sa paningin niya. Nagiging cool na sa kaniya ang pormahan nito kahit pa ang simple lang naman ng suot nito. Nagiging iba na talaga ang epekto ni Rocky sa kaniya.

Hindi pa sana siya mapapansin ng mga ito kung hindi siya bahagyang tumikhim. Dahan-dahang bumaling ng tingin ang Daddy niya sa kaniya, si Rocky naman ay  bakas sa mga mata ang bahagyang pagkagulat pero ngumiti din naman agad pagkakita sa kaniya.

"Good morning Ma'am Penny!" pormal na wika nito sa kaniya at kumaway pa. Napanguso naman siya dito.

"Sus! Para namang hindi ako sanay na tawaging Penny lang," natatawa niyang saad. Nag-aalangan na napatingin si Rocky sa Daddy niya at parang medyo nahiya ito sabay kamot sa batok. Pasimple itong sumenyas sa kaniya ng "Shh!"
Mahina siyang napatawa at umiling.

"Good morning anak. May pinag-uusapan kami ni Rocky. Balak kong puntahan ang resort natin bukas sa Pangasinan. Doon ko na lang ice-celebrate ang birthday ko," sabi ng Daddy niya. Birthday na nga pala ng Daddy niya bukas.

"Ang yaman niyo pala talaga no? Imagine may sarili kayong resort," ani Rocky at sa kaniya ito nakatingin.

"Actually pinamana sa akin iyon ng Lolo ni Penny. Bale nagiging bahay bakasyunan namin iyon or madalas kapag gusto naming mag-dagat ay nagpupunta kami doon. Pribado naman kasi ang lugar at hindi ko pinapapuntahan ng ibang tao, liban na lang kapag may mga kamag-anak kami na gustong magbakasyon doon ay ipinapagamit ko," paliwanag ng Daddy niya.

"Ayos po pala sir. Mukhang makakapag dagat ako nito," parang bata na sabi ni Rocky. Natawa tuloy siya at napailing dahil kitang-kita niya ang excitement sa mga mata nito. Hindi lang naman siguro ito ang unang beses na makakapag dagat ito pero kung maka-react ay akala mo first time.