I'm Inlove With My Bodyguard (Completed)

CHAPTER 38

Pagdating pa lang ni Rocky sa eskinita nang lugar nila ay natanaw na niya si Uno na nakaabang sa labas. Nakahubad pa ito, katulad niya ay puro burda rin ang katawan nito. Halos lahat naman yata sila sa Dark Empire ay may mga tattoo sa katawan. Nagliwanag agad ang mukha ni Uno nang makita siya nito.

"Rocky!" pagtawag nito sa pangalan niya at agad na kumaway. Naninigarilyo din ito at itinapon na nito ang yosi nang lumapit sa kaniya.

"Kamusta? Nasaan sina Jerson?" Nakipagdikit siya ng kamao dito at inakbayan naman siya nito.

"Naroon sa looban. Doon sa bahay niya. Tara doon at naghihintay sila sayo pati na ang iba pa nating mga miyembro," sagot ni Uno. Magkapitbahay lang kasi sila ni Jerson dito sa Tondo. Sa totoo lang ay iskwater ang lugar at ito na ang nakalakihan niya. Hindi nga kasi siya mayaman.

Tumango siya kay Uno at sabay na silang naglakad sa mahabang eskinita patungo sa pinaka-looban ng lugar kung saan naroon ang bahay nila ni Jerson.

Maraming mga batang kalye ang nadadaanan niya. Mga naglalaro sa gilid gilid. May mga nagchichismisan din kahit na dapit hapon na. Walang mga magawa sa buhay at nagpapalipas ng oras sa pakikipagkwentuhan kaysa atupagin ang mga gawaing bahay. Ganito naman sa lugar nila, magulo at maingay.

Kaagad niyang natanaw ang umpukan ng mga kalalakihan sa labas ng maliit na bahay ni Jerson.

"Uy si Rocky!" sigaw ni Leandro. Katabi nito si Jerson na agad tumingin sa kaniya at kumaway.

"Pre!" Tumayo ito sa pagkakaupo at agad siyang nilapitan saka tinapik ang balikat niya.

"Kamusta mga brod?" tanong niya sa mga ito. Naroon din ang iba pa nilang miyembro na sina Lax, Kuzma, Fallon, at Jinro.

"Ayos lang. Parang kuminis ka ah, iba talaga kapag bigatin na, pumupusyaw na ang balat!" kantyaw sa kaniya ni Kuzma.

Naglabas naman ng alak si Jerson.

"Alak na naman?" tanong niya dito.

"Minsan ka na nga lang namin makasama par mukhang ayaw mo pa. Isa pa ay tayo-tayo lang naman ang andito ngayon. Busy ang ibang miyembro ng Dark Empire kaya sila Lax lang ang narito ngayon," sabi nito. Sa totoo lang ay madami kasi talaga ang miyembro nila. Hindi na niya matandaan ang saktong bilang since may bagong sali daw kailan lang na hindi na niya nakita noong nabinyagan. Isinend na lang sa kaniya ni Uno ang video ng initiation.

Naupo siya sa mahabang upuan kung saan katabi niya si Kuzma at Jerson. May lamesa din na siyang pinapatungan ng alak.

"Ano nga pala ang pag-uusapan natin at biglaan niyo akong pinatawag? Sa totoo lang ay may nais din ako sa inyo pero mauna na kayo," saad niya  Tiningnan siya ni Jerson. Parang nag-aalangan pa ang mukha nito.

"Par, hindi na ako magpapaligoy-ligoy pa. Sa totoo lang ay medyo kapos kami sa budget ngayon eh!" panimula nito. Tiningnan nito ang iba pang mga kasamahan nila pero parang nag-aalangan din naman at ayaw magkibuan.

"Oh, kailangan ng pera?" tanong niya. Kumamot sa batok si Jerson at nahihiyang tumango.

"Magkakasama kasi kami ngayon nila Uno at Leandro sa bahay. Pare-parehas pa kaming natanggal sa trabaho noong nabalitaan ng amo namin yung riot na kinasangkutan namin sa Las Piñas," paliwanag ni Jerson. Sa pagkakaalam niya ay pumasok bilang security guard si Uno at Jerson sa isang bangko sa Las Piñas, si Leandro naman ay sa factory din kagaya niya dati. Medyo nabigla siya sa nalaman dahil wala siyang kaalam-alam na napa-trouble na naman pala ang mga ito at nawalan ng trabaho.

"Ano ba ang nangyari? Bakit kayo napa-trouble. Ang ganda na ng trabaho niyo don, sayang naman," wika niya.

"Tinambangan kami ng ibang myembro ng Black Dragon."