روايه بنت الاكابر

(الجزء السادس ) (الحلقه الثانيه ) ( هاله وسمر )

الجزء السادس )
(الحلقه الثانيه ) ( هاله وسمر ) <3
................
(في الحلقات السابقه )
سلمى : هو ده اللى حصل .. ومش عارفه اتصرف ولا اعمل ايه ؟
احمد : اوبااااا ! دى مشكله ثقه ودى من اخطر انواع المشاكل اللى ممكن تقابل اى بيزنس ف الدنيا .. بس ليها تصريفه ان شاء الله ... المهم ! انا عينت نفسي هنا نائب رئيس مجلس الاداره وأتمنى انى اتبسط معاكو .. ومش هكلفك راتب كبير يا ستى .انا هاخد راتبى بالبوس ... كل يوم ليا 5 بوسات .
سلمى : وانا موافقه ....
احمد : تعالى الاول نلف على اقسام الشركه
سلمى : تعالى
....................... ( الثانيه ) <3
سلمى : مساء الخير يا مستر عماد .. الاستاذ احمد يعتبر مكانى هنا ف الشركه . رأيه نافذ ع الكل . ياريت تطلعلى أمر ادارى بالكلام ده وتخطر بيه كل الاقسام
احمد : استنى بس ! هههههههههههه لا مؤاخذه يا استاذى . الموضوع مش محتاج امر ادارى ولا حاجه . انا هنا عشان نحاول كلنا نشوف حل للموضوع سوا وايدينا ف ايد بعض
عماد : تمام يا ابو حميد .. وان شاء الله نلاقى حل
احمد : تمام يا استاذنا .. من غير تكليف يعنى بعد اذن حضرتك عاوزين نقعد مع مديرين الاقسام كمان نص ساعه ف الميتينج روم .. الاداره الماليه ومعاها طبعا التسويق والمشتريات والمخازن ...
عماد : تمام اعتبره حصل .. عن اذنكو
احمد : اتفضل
..........
سلمى : انت عاوز تقعد مع الناس دى كلها ليه
احمد : بصى ! محدش ضامن حد اليومين دول .. لازم تعرفى مين معاك ومين خايف ومين قلقان ومين مش معاك
الخايف تطمنيه . والقلقان تحتويه واللى معاك تطلبى منه اكتر واللى مش معاك مالوش مكان حواليك عشان هيعطلك .. وده اللى انا هعرفه ف الاجتماع اللى جاى ..
سلمى : طب هتعرف ازاى ؟
احمد : عادى يا حبيبتى بتيجى لوحدها وف طريقة الكلام . زى منا كنت بفهم انتو عاوزين تقولوا ايه او بتعملوا ايه من غير ما تقولوا
سلمى : اه فكرتنى ... انت كنت بتعرف ازاى
احمد : وهو ده وقته يا بت انتى
سلمى : اه وقته ، عاوزه اعرف
احمد : طب منا كنت جاوبتك قبل كده ، انى بستبين من ردود افعالك ولغة جسمك وحركة عينك انتى عاوزه تقولى ايه
سلمى : ياسلام بجد ؟
احمد : اه والله بجد ، وبعدين انتى المفروض تلقطى الحاجات دى منى بقي
سلمى : اقولك حاجه
احمد : قولى
سلمى : وجودك جنبى دلوقتى وأد ايه حاسه انك شايل همى وانا مسؤوله منك احساس طعمه حلو اوى يا احمد .. حلو بجد وتقريبا مافيش بنت أو ست مش نفسها ف الاحساس ده .. ايه ده بجد ؟ انا جسمى بيقشعر وانت ماسكنى من ايدى كده وبتقولى تعالى نروح هنا ونروح هنا . ايه يا أخى ده ؟ ايه ده ياعم ، يخربيت كده ههههههههههههه اقسم بالله لاهاممنى اى حاجه ولا فلوس ولا اى حاجه غير السنده اللى انت ساندهالى دى
احمد : وانا يهمنى فلوسك وفلوس ابوك دلوقتى وواجبى احافظلك عليها ، باى طريقه وبأى شكل ،، بقولك يا سلمى . انتى تتوقعى مين يكون ورا الفيديو ده
سلمى : اممممممم مش عارفه . معرفش مين عنده درجه الكراهيه والقرف دى اللى يعمل كده . مش قادره اتخيل .. هو فيه واحد كان دايما يزهق بابا ف السوق بس كان دايما بابا بيديله على دماغه ويدخله الجحر بتاعه تاني .. وعمره ما عرف يعمل معاه حاجه .. بس ماظنش انه هو بالحقاره دى
احمد : يابنتى منا قولتلك ان البيزنس مافيهوش ثوابت . كله متغيرات ... تعرفى انى بدأت اشك ف حاجه كده ...
سلمى : حاجه ايه ؟
احمد : لا ماتشغليش بالك . حاجه وخلاص وهعرفها هعرفها ... وبتمنى من ربنا ان اللى ف دماغى يطلع صح
سلمى : فيه ايه يا حمو ماتقول طيب
احمد : هو ده وقت حمو ؟ حمو دى هناك واحنا بناكل بليله ف البيت . انما هنا اسمى الاستاذ احمد .
سلمى : لا حمو .. حموووووووووووووو
احمد : افضحى امى افضحيها . جاتك داهيه ف حلاوة أمك يا بعيده
سلمى : بقولك ايه ياض ! انا رئيس مجلس الاداره وانت حيالله النائب بتاعى وجايباك بمرتب كمان يعنى مش بلوشى يا بابا
احمد : اه صحيح فكرتينى . الا هو فين الراتب ماشوفتش حاجه منه يعنى لغاية دلوقتى
سلمى : اخر الشهر يابابا . احنا ايه هنحمرا ؟
احمد : نعم ياروح امك ؟ ايه اخر الشهر ده . انا متفق على 5 بوسات اخدهم يوميا . كل ساعه بوسه وبما انى بقالى ساعتين هنا يبقى ليا ف زمتك بوستين . اتفضلى .. اتفضلى يا هانم
سلمى : لا ياعم يفتح الله ... ف البيت
احمد : يعنى ايه يعنى ؟ يعنى اروح اكمل شغل الشركه ف البيت مثلا .. انا راجل بتعب وبشقى هنا يبقى اخد راتبى هنا .. اخلصى يابت
سلمى : يووووووه . حمو !
احمد : ماتتصعبنيش عليا وحياة امك عشان مابضعفش
سلمى : حموتى !
احمد : طب بس بس انسدى . بلا حموتى بلا بتاع بقي . يخربيت ضعفى وانا جنبك
سلمى : ضعفك معايا هو منتهى قوتى يا أحمد ، يعنى انت ماشاء الله سبع على الدنيا اهو ولما بلاقيك كده معايا ماتعرفش انا بحس بإيه ( بتكتفه وبتبوسه بوسه طوووووويله جدا)
احمد : ياخرابى يامه ، ايه البوسه دى
سلمى : ههههههههههه احم احم بقي خلاص اسكت . الاربع بوسات التانيين هبقى اديهملك واحنا ف البيت
احمد : لا دلوقتى
( الباب بيخبط )
احمد : ده مين الرزل ابن الرزله اللى بيخبط دلوقتى
منى : استاذه سلمى . فيه بنتين كانو بيسالو على حضرتك
احمد : اهلا يا منى . كنا لسا ف سيرتك بالخير دلوقتى
سلمى : ههههههههههههه بنتين مين دول ؟
منى : هما قالو انهم عاوزين حضرتك . انا دخلتهم استقبال مكتبك لغايه ما اقولك
سلمى : طيب كمان شويه يا منى وجاينلهم
احمد : لا لا يا منى احنا جايين وراك حالا ... قدميلهم حاجه بس واحنا طالعين
منى : تمام
............
سلمى : لما نخلص مشاويرنا يا عم نبقى نرجع
احمد : هو انتى هبله يابت ؟ بتقولك بنتين ومعرفهمش وعاوزين يشوفوك .. المفروض ان انتى ف ظرف استثنائي والمفروض تكونى متوقعه ان اى جديد هيحصل ف اللى احنا فيه
سلمى : معاك حق .. تعالى نروح
احمد : يلا
......................
احمد : مساء الخير !
سمر : مساء النور يا ابو حميد ازيك يا سلمى
سلمى : ايه ده ؟ مش المفروض انكو ف شرم دلوقتى وف اجازتكوا ... ؟
هاله : ده المفروض فعلا ... سلمى اسمعينا من فضلك دقايق
احمد : اقعدى يا سلمى .... اقعدو يا بنات .. واحكولى على كل حاجه تعرفوها ... وعلى فكره انا كنت عارف ان اكيد وراكو حاجه لان اصراركو على انكو تتعرفوا علينا ماكنش بالعها . لانك جيتى الاول تتعرفى عليا يا سمر وانا قولتلك اتعرفى على مراتى الاول وانتى ماتأخرتيش ف انك تتعرفى عليها ..... وده اللى قلقنى .
ف صدقينى احنا سامعينك ! اتفضلى
سمر : مستر عبد الحميد ! صاحب شركه المختار لأدوات التجميل وتقريبا ده المنافس الوحيد ليكو ف السوق .. واللى ياما عمل معاكو ومع والدك ربنا يقومه بالسلامه مشاكل كتير كتير
سلمى : ماله عبد الحميد
سمر : ده اللى ورا حكاية الفيديو بتاع النهارده ، وهو السبب الرئيسي ف ان الفيديو يتنشر ع اليوتيوب والفيسبوك بالسرعه دى ..
احمد : تمام .. كملى
هاله : رحلتنا لشرم اصلا كنا عشان نعرف انتو جايين وراجعين اسكندريه امتى ؟ المفروض اننا كنا هننقلهم كل تحركاتكو
لكن صدقونى والله العظيم تلاته ماكنا عارفين ان كل ده ممكن يحصل
وماكناش نتوقع لنا ولا سمر ان كل الخراب والقرف ده يحصل
بالعكس احنا لما اتعاملنا معاكو حسينا اننا شويه فيران جبانه مالهاش وزن جنبكو ...
سلمى : انا مش قادره اتخيل ان لسا فيه ناس كده ؟
احمد : استنى يا سلمى ! فيه حاجه تانيه يا هاله عاوزه تقوليها ؟
هاله : اه فيه ؟
احمد : مستر عبد الحميد مش لوحده ، معاه واحد تانى ... صح ؟
هاله : انت عرفت منين ؟
احمد : كملى كملى .. واسمه حاتم . صح ؟
( سمر وهاله بيبصوا لبعض )
هاله : بجد عرفت منين ؟ المفروض ان شراكتهم سوا محدش عارفها . . جبت انت الكلام ده منين
احمد : ماتشغليش بالك ... المهم انا متشكر جدا على كلامكو ده
والعيب مش اننا نغلط . العيب اننا نتمادى ف الغلط واحنا عارفين اننا بنغلط ... احييكو جدا على انكو رجعتو عن الطريق اللى كنتو فيه ...
سمر : مش بس كده .. اى حاجه تطلبوها مننا احنا ف الخدمه
احمد : صدقونى كفايه علينا جدا انكو قولتوا الكلمتين دول . ونعدى بس الازمه دى واكيد هيكون ليكو مكان جنبنا ومعانا
سمر : متشكرين يا جماعه .. نستأذن احنا بقي
احمد : اتفضلوا ...
.................
سلمى : انت ايه اللى عملته ده ؟
احمد : عملت ايه يا هبله
سلمى : انت كان ناقص تقوم تاخدهم بالحضن
احمد : ياعبيطه ده بيزنس بملايين ولازم تاخدى ف صفك اى حد بيحاول يقرب منك مش تيجى عليه . سلمى ! من دلوقتى اعتبرى نفسك ف حرب .. لاننا بجد دخلنا أوسخ حرب ممكن تتعرضى ليها ف حياتك لانها حرب وجودك انتى وفلوسك وعيلتك ... فهمتى ؟
سلمى : المهم انت جنبى ؟
احمد : امال انا بعمل ايه م الصبح هنا
سلمى : خلاص يبقى مش خايفه
احمد : انتى مش سامعه ان فيه احقر اسمين ممكن تقابليهم .. واوسخ شخصيات من البشر .. واحد منافس ليك ف شغلك بدل ما ينافسك بشرف ونزاهه بينافسك باسلوب قذر وواحد تانى عاوز ينتقم منى ومنك بأنه يخرب بيتك .... وده اللى انا استحاله هقبل بيه
سلمى : يا خرابى على حلاوة كلام أمك
احمد : طب بتتمايصى ليه دلوقتى ف الكلام . انشفى يابت احنا ف الشغل مش البيت يخربيتك
سلمى : ههههههههههه ربنا يحميك ليا .
....
عماد : الو ! سلمى ! المديرين ف المكتب مستنيينكو
احمد : تمام يا استاذى احنا خارجين حالا
............
( أوضة الاجتماعات )
احمد : مساء الخير يا جماعه
الكل : مساء النور يا ريس
سلمى : اتفضلو يا جماعه ... دلوقتى وبصفه مؤقته وبطلب منى ف انا بشكل ودى خولت الاستاذ احمد انه يكون نائب رئيس مجلس الاداره لحين انتهاء ازمتنا .. موافقين ؟
الجميع : اه طبعا مافيش مشكله . أخ عزيز واشتغل معانا فتره وكان خير الناس
احمد : متشكر يا جماعه . دلوقتى ندخل ف المهم
وليد : ياريت
احمد : قبل ما ابدا ف كلامى دلوقتى عاوز اعرف انتو كلكو معانا ولا لا ؟
الجميع : اكيد طبعا ...
احمد : طيب انا بشيل الحرج عنكو وعن اى حد . اللى مش حابب يكمل او شايف ان مش هيقدر يدى ياريت يعرفنا دلوقتى . لان الفتره اللى جايه صعبه جدا .. انا بكلمكو بالامانه عشان تكونو على درايه بكل حاجه
الجميع : معاك يا ريس
احمد : دلوقتى وباختصار شديد احنا بنضرب ف أهم جزء ف شغلنا . الثقه اللى انتو بقالكو اكتر من 20 سنه بتبنوها وبناءا عليها بقيتو رقم 1 ف السوق .. وعشان تقدرو تحطوا رجليكو تانى بقوه . لازم مش ترجعو الثقه بس لا دانتو المفروض ترجعوها باكتساح عشان اى هزه تانيه بعد كده محدش يصدق عنكو اى حاجه وطبعا فيه اساتذه كبار معانا هنا وانا اقل واحد فيهم اتكلم عن الكلام ده
لو سمحت يا مستر وليد . الفيديو اللى اتذاع النهارده مع حضرتك ؟
وليد : اه معايا ع اللاب .
احمد : طبعا كلكو شوفتو الفيديو ؟
الجميع : اه
احمد : طيب انت كزبون بتشترى المنتج ده .. ومتعود عليه من زمان .. وشوفت الفيديو ده بيتكلم بالطريقه البشعه دى . هتعمل ايه ؟
وائل ( مدير التسويق ) : هبطل اشتريه فورا وهدور على المنافس ليه واشتريه
احمد : بالظبط ... لعبك انت دلوقتى كشركه ف خطر انك تتكلم مع الزبون . تهز انت ثقته ف نفسه . تخليه يحس ان هو اللى خسران لو ماشتراش بضاعتك
وان المفروض مش مجرد فيديو اللى يخليه يجرى يغير منتج متعود عليه من شهور وسنين
وائل : ودى هنعملها ازاى ؟
احمد : قولى انت المفروض تعملها ازاى ؟
وائل : انا بقترح اننا نزود البضاعه بتاعتنا ف السوق ونخلى الموزعين عدد ساعات شغلهم اطول شويه بحيث يكون عندهم مساحه كافيه انهم يوزعوا اكبر كميه .. وبقترح كمان اننا ننزل الاسعار شويه . انا عارف انها هتبقى خساره بس الاهم من ده كله اننا نلحق الثقه دى
احمد : امممممممممم موافقين حضراتكو على الاقتراح ده
وليد : انا شايف انه اقتراح مناسب للمرحله اللى احنا فيها وشايف اننا ممكن نوزع اكبر كميه ف وقت قصير خصوصا لو الاسعار نزلت
احمد : طيب انا هسالكو سؤال
وليد : اتفضل
احمد : دلوقتى انا معايا عربيتى . وشوفت فيديو لواحد عربيته مولعه جنبه وبيقول انه حط بنزين 80 النهارده لعربيته ومشى بيها كم كيلو ولقا عربيته بتولع ... والضهر لقيت الحكومه بتقول ان بنزين 80 بدل ماهو بيتباع مثلا اللتر ب 4 جنيه . لا داحنا خليناه ب جنيه .. انت هتعمل ايه ؟
وليد : طبعا مش هحط بنزين 80 ده خالص وأوقف عربيتى لغاية ما اعرف الحكايه ايه ؟ ولا البنزين ماله وافهم الموضوع بالظبط
احمد : بالظبط .... انت كده بتحط الحجه للزبون انه مايشتريش . وبتقوله البضاعه بتاعتنا فيها مشكله تعالى انت اشترى بس وهديهالك ببلاش
وليد : طب والعمل
احمد :لازم الزبون يحس ان البضاعه عزيزه عليه ويفهم لوحده ان ناس هى اللى عاوزه توقع اسم الشركه ، الزبون ذكى جدا وبيفهم لوحده ، احنا عن نفسنا هنقوم باللى نقدر عليه وواجبنا اننا نصحح المعلومه ونرد ع الفيديو برد بين وساحق ومافيهوش ضعف ، هنرد بقوه ومش هنرحم حد ، اللى ييجى على قوتكو وقوت عيالكو ويشرد شباب زى الورد وناس قضت عمرها كله ف شركه زى دى مش هنرحمه ، همتكو معايا لان الوقت ده هو وقت اننا يا نرجع اقوى من الاول يإما كل حاجه هتروح
ركزوا معايا ...
اولا . الموزعين بتوعنا مايطلعوش بتحميل كامل . لا . انا عاوز كل موزع يطلع بنص الحموله اللى المفروض بيطلع بيها ..
ثانيا . الاسعار تزيد بنسبه 30 % او خلوهالى انا والاستاذه سلمى هقعد معاها ونشوف هنزود كل منتج بنسبه اد ايه ؟
وائل : والله يا استاذ احمد كلامك موزون جدا ... ويارب يكون على ايدك كل الخير
احمد : ربنا يخليك يا مستر وائل . المهم بعد اذنكو عاوز اقعد مع كل موزعين الشركه ومع مديرين الفروع بتاعتنا .. ياريت ف اقرب وقت . تقدر تحددلى معاد معاهم امتى يا مستر عماد ...
عماد : النهارده العصر لو أمكن
احمد : خلاص تمام . هكون ف انتظارهم
عماد : تمام ...
احمد : متشكر لحضراتكو .. وانشالله المجلس ف حالة انعقاد دائم لحين عبور الازمه دى ، ف اى وقت جهزوا نفسكو اننا هنستشيركو ف اى حاله طارئه
عماد : اتوكلنا على الله
....................
إلى اللقاء ف الحلقه القادمه