الفصل التسعون
زهور بنت سلسبيل.
منى عبدالعزيز
الجد: ارفع راسك أنت حفيد عبدالرحيم الغمراوي اللي عمره ما طاطا راسه لحد واسمعونى كلكم مهما حصل ودارت عليكم الدنيا اوعو تحنو راسكم غير لله عز وجل، متكبروش على حد ولا تنزلوا لحد كل اللى عليكم إعملوا بما يرضى الله
كلكم هنا احفادى مش ناقص غير سيسيليا كنت أتمنى تكون موجودة ما بينكم دلوقتي، تسمع الكلام اللي هقوله.
الحمدلله ان ربنا جمعنا النهاردة في المكان ده لحكمه عنده إمكن أنا لو كنت قاصد انها تترتب ما كنتش هنجح وعشان كده هقولكم كلمتين تحطوهم حلقة في ودنكم ، انتم الكل واحد عندى مافيش واحد أفضل من واحد عندى، زاهر زي زين هو هو حمزة وحازم غادير هي زهروان وسيسيليا حتى باقي أحفادى بما فيهم نيرة مفيش حد أغلى من حد لكن إنتم
الستة حاجه تانيه انتم عمدان العائلة فضلتم مع بعض ويد واحدة فأنتم بأمان والعائلة كلها بأمان إن واحد فيكم بعد أو قال نفسي كل العائلة ضاعت ما هو استحالة السقف هيفضل مكانه وفي عمود من اللي رفعه مال، أنا ان كنت إسيت عليكم وانتم صغيرين عشان تكونوا رجالة وتعرفوا تعيشوا في عالم القوى يأكل الضعيف حتى أقرب الناس ليه مش بيسم عليه وقت ما تديله قدرته انه يخلص عليه وشفتم بنفسكم نهال بنت أخويا اللي أنا ربتها زي ولادى وبسببها اتحرمت من ابني اول ما تفرعنت عملت ايه.
يسحب نفس عميق يحاول أن يجلى صوته: من الساعة دى مدوا ايديكم عهدوني كلكم تبقوا ايد وحده محدش يطمع في حق أخوه وعمتكم وبناتهم متجوش عليهم ولا على حقهم في يوم من الأيام، أنا والبنات هنرجع للقاهرة وأول ما الدنيا تهدى هترجعوا انتم كمان، بس ياريت حضراتكم تلتزموا بالبيت ومتخرجوش برة كتير وتحتكوا بالناس ، انتم دلوقتي تعتبروا شخصيات عامة وصوركم أكيد في السوشل ميديا و خصوصا البرامج إياها اللي بتعرض القضايا وبتجمع الرأي العام با لشو اللي بتعمله، الأمر ما يسلمش حد من البلد يتعرف عليكم يضيع كل اللي بنعمله
حافظوا على روحكم لحد ما الموضوع ينتهى والقضية تتحل، والكلام متوجه ليك يا دكتور زاهر يا جراح ياعظيم وانت يا باشمهندس زين يا مثقف تقدروا تقولولى معناه ايه اللي شفته وسمعته عنكم النهاردة واحد شغال دكتور بيطرى وواقف بيكشف على طيور ومواشى وياترى يا دكتور يا عظيم دى هواية ولا فراغ بتحاول تشغل نفسك بحاجه لحد مترجع وتسافر وسيادتك يا بشمهندس مش مكسوف من نفسك وايه حكاية الجنية اللي طيرت عقلك.
تخرج ضحكه من حازم وحمزه تلاها تعنيف من الجد لهم جميعا ليقف زاهر بعصبية يحدثهم بعصبيه.
الجد: انطق يا دكتور ايه اللي انا شفته ده معناه ايه.
زاهر: عجبكم اوى الكلام وبتضحكوا، مش كله منك يا سي زين انت والجنية بتاعتك واختها المجنونه.
الجد: زاهر كلمنى هنا وفهمنى زين دخله ايه بالموضوع.
زاهر بضيق يقص على الجد ما حدث من وقت قدومهم للبلدة وما حدث لحازم و المشادة بينه وبين الأختين ليفيقو اليوم التالى على تجمع لأهل القرية بطيورهم ومواشيهم امام المنزل وتلك الفتاة تشير لهم على زاهر وتخبرهم بأنه طبيب بيطرى.
زاهر: وطبعا كله بفضل زين باشا والعمدة اللي صدق على كلامها وقال انى دكتور بيطرى.
زين مقاطعة: ماهو ليه حق يا زاهر اللى انت عملته فيه مكنش يصح بردة نسيت كلامك واستهزائك بها وتقليلك منها.
زاهر بحده: زين بلاش انت تتكلم فى موضوع الشيطانه دى خالص، انت نفسك أهو منين ما بيروحوا انت وراهم معرفش عملولك ايه كأنهم سحرولك.
