🔱 الوصية 🔱
بقلمي الكاتبة هند المتقي
👈 الجزء 21
الحفلة كانت فالجردة ... خرجو هي وضحى بمشية انيقة .. وجمالهم كان لافت للانتباه ... خصوصا ان كل وحدة العكس د الاخرى ..
ماريا زادت فتحات عينيها بدهشة .. كانت كتوقع شي حفلة عادية ولكن غير من الزينة وكثرة الناس لي كاينين برا ... تعجبات وتذهلات .. وعرفات ان عائلة علاء ماشي مجرد ناس عادييين .. عائلة عندها وزنها فالبلاد .. وثرائهم فاحش ...
هادشي لاحضاتو اكثر فاش شراو الكساوي .. لي كان ثمنهم غالي ...
ردات البال للناس لي كانو كيشوفو فيها بإعجاب زادت تشجعات ...
شافت مروان لي قرب منهم ... وضحك ف وجه ماريا ..
مروان : اهلا الانسة الصغيرة ..
باس يديها بطريقة جنتل حسات بالفرشات كيلعبو فكرشها من هاد المعاملة ..
ماريا : مروان لباس ..
مروان : الحمد الله ...
سلم على ضحى حتى هي .. لي كانت كتحاول تتجاهل وحودو واخا قلبها كيضرب ف مية وتسعين ..
مروان : (شاف ف ضحى) صافا ؟
ضحى : (تمتمات بإحراج ) اامم الحمد الله ونتا ؟...
مراون : (دار يديه ف جيبه وابتسم) الحمد الله ..
ماريا كانت باقي مبهورة وبلا ماتحس كانت كتقلب على علاء بعينيها وحواسها مترقبين .. تشوف فين هو ... طلقات وذنيها بلا ماتحس فاش سمعات ضحى كتسول عليه ..
ضحى :فين علاء ؟
مروان : (بقا واقف جنبها) كيستقبل بعض الضيوف ..
وجه كلامو ل ماريا حتى خرجها من شرودها ...
مروان : كيف جاك الجو ..
ضحكات ...
ماريا : زوووين ... ( شافت كلشي كيرقص وبلا ماتحشم ) ماكرهتش تا انا نرقص ...
مد ليها يديه .. بلا مايرد البال ل ضحى لعينيها دمعو باغيا تنفجر ومالقات كيفاش ...
كايدير راسو مامهتمش بها حتى ملي رجع من السفر كانو كلماته باردين وهي لي توقعات ان علاقتهم غاتاخذ منحى اخر ...
ماريا :لا لا ماكنعرفش ..
مروان : ( قرب منها وجرها من يديها ) نتي غير ديري يديك على كتفي ... انا غانحركك ..
ابتسمت بخجل ..
ولكن غير حط يديه على ظهرها .. حسات بشي يد قوية جبداتها ... ريحة عطره دخلات مع حواسها عرفاتو غير من طريقتو الهمجية .. ماعرفاتش شنو وقع لها حتى لقات راسها مخشية ف صدر علاء ... وهي لي كيرقص معها بلاصة مروان ...
ماريا : شنو كادير طلق مني ..لاء طلق مني ...
علاء : ( هضر جنب وذنيها) هاد اللباس والحالة د المكياج غانتفاهمو عليهم من بعد .. وزايديها بالشطيح .. ( زير عليها من ظهرها بغضب ) عاجباك هاد الحالة لي دايرا فراسك .. هاد اللحم لي معرية وهاد الضهر لي كلو عريان ...
لفحوها انفاسو القاسكين وغضبو استشعراتو غير من صوتو .. كل مرة كيزيد يزير عليها كثر ..
يغات تغوت .. ولكن مابغاتش الشوهة لراسها .. والغريب فالامر انها كانت مستحلية حضنو الدافئ .. هادشي خلا قلبها يضرب فوذنيها ... والفرشات يلعبو فكرشها .. فحال الا عندها شي امتحان وخايفة منو ...
ماريا : ( فحال لا عاد فاقت) نلبس لي بغيت ماشي شغلك ... ماشي انا بوحدي لي معرية فهاد الحفلة ..
زاد قرب منها بطريقة كتخلع ... وهمس حدا اذنيها بحرارة
علاء :ولكن نتي بوحدك لي كتهميني فهاد الحفلة ...
وقف تنفسها وولات علاين تسخف .. من كلامو ونظراتو القاصحين ...
علاء : غاتطلعي دابا لبيتك ... مابغيتكش مازال هنا .. ولا غاتمشي تبدلي هاد الزبل بشي خاجة مستورة ...
ماريا : ( بمعارضة ) والله مانبدلو ...
كانو كيبانو فحال شي زوج كيبغيو بعضياتهم ف رقصتهم واخا الجو المشحون لي كان بينهم هلا كلشي يشوف فيهم بإعجاب ... لهاد الثنائي المميز ...
تنفسات بزز ملي طلق منها بلا مايهدر .. جرها بشوية باش مايسمعهوش الناس ...
علاء : غاتمشي تبدلي هادشي .!!
ماريا : لا هي لااااا نتا ماعندكش الحق تتحكم فيا ..
علاء : (زاد قرب منها) عندي الحق انا واصي عليك ومن هاد النهار غاتسمعي غير كلامي ...
خرجات عينيها .. العناد كان كيزيد يتغلعل فعقلها .. وكيعجبها تحاربو كتحس بالاستمتاع وهو معصب .. ومغدد ... هي بغات تبقى بشخصيتها حتى حد ماغايفرض عليها شي حاجة لي هي ماباغياهاش ..
ماريا : ( تمشات جيهة الحمامات وابتسمت باستفزاز ) لاااااااااا ...
مشات بالزربة .. شافت راسها فالمراية كانت حمرا وجها فحال حبة طماطم .. ماعرفاتش واش من الحماس الزايد ولا بسبب علاء راس المصايب ...
رجعات قادات راسها وصاوبت شعرها ...
غير خرجات لقاتو واقف .. قدام باب الحمام .. كيستناها ..
ماريا: ( عقدات بين حواجبها) ياكما كنتي كتسناني بصح نمشي لبيتي ...
علاء: (ضحك بغضب) انا عارف كيفاش غانخليك تحشمي حتى تخرجي ل برا ..
فنفس الوقت كان قرب حتى بلوكاها مع الحيط والممر كان خاوي ماقدراتش تغوت ...حتى ملي بغات تهدر وتقول ليه يطلق منها ... كان هبط بفمو ل فمها وباسها بوووسة طووويلة قطع فيها انفاسها وكلامها ودقات قلبها ...
برد فيها سم ونار الغيرة لي شاعلة بين قلبو هادي سنين وماقدراتش تطفى ..
أنت تقرأ
🍇الوصية 🍇(مكتملة)
Ação🔱 #الوصية 🔱 اربطو الاحزمة ... بعد غياب طويل ها أنا عدت بقصة من قصصي .. قنبلتي الموقوتة ههه ، جامعة بين الرومانسية والدراما والتفرشيخ والكوميديا والخيال وبزاف د المفاجآت 😻 ✒ بقلمي أنا #الكاتبة_هند_المتقي ❌ أول حاجة ممنوع النشر الا بإذني ❌ تفاعلك...
