🔱 الوصية 🔱
بقلمي الكاتبة هند المتقي
👈 الجزء 12
انتقلو للصالون .. دارت يديها ف الكاب الكحل لي لابسة مغددة .. كتشوف ف علاء بعيونها الخضراوين حاقدة .. شنو بغا منها ؟؟ وعلاءشهو رسمي ومعقد ومتعجرف حتى لهاد الدرجة ؟
مشاو بثلاثة هي وعلاء وحياة ...
حياة لي هدرات اللولة ..
حياة : الموضوع لي بغينا نهدرو فيه معك .. بما انه دابا غير فالنص د العام شفنا انك غاتكوني باغيا تقراي ... والمشكل دابا فوسط العام داكشي علاش علاء بغاك تقراي فواحد المعهد .. وعرفت انه كيعجبوك اللغات ..
شافت جهة علاء لي كيشوف فيها بتحدي .. على انه ماقادراش ترفض قراره
ماريا : ولكن انا مابغيتش نقرا دابا .. وماكرهتش نرتاح هاد النص د العام ..
علاء : ( ضحك باستهزاء) ولكن ماشي هادشي لي قلتي ل ضحى نهار جيتي ..
زفرات بغضب .. بغات تقول ليه ماشي شغلك ولكن شدات لسانها ..
حياة : (بحنان) غايعجبك الحال بلاصة.. وماتضيعيش هاد النص د العام .. وبزز باش قبلو يدخلوك غير بمعرفة علاء خصك تبداي معهم من اللول ودابا فاتو شحال من شهر على الدخول للمدرسي ..
شاف فيها بغضب مكبوت ..
علاء : انا سجلتك ف قسم اللغات .. غاتقراي الإنجليزية ..
رفعات حاجبيها بضد ..
ماريا : انا مابغيتش الإنجلزية بغيت الاسبانية .. ومابغيتش نقرا دابا
علاء : ( وقف بغضب) ولكن قلتي ل ضحى كتعجبك الإنجلزية ..
شافت فيه بتحدي .. و كملات ف خطتها لي قررات من قبل تمشي عليها و هي تشد معاه غير ضد لا قال هو اه اهي تقول لا قال هو لا تقرل هي ... تلعتمات ف الهضرة و نطقات
ماريا : ا . لا لا قلت الإسبانية .. ( قلبات وجهها) و مابغيتش الإنجلزية .. هي مابغيتهاش ..
زير على ييديه حتى بياضو مفاصله .. وعروق جبهته برزو .. ورفع اصبعه فوجهها ..
علاء : كتبغي تعاندي ...
ماريا : (ببراءة) لا ...
علاء : (بعصبية) واخا غانسجلك ف لي بغيتي ولكن من غدا غاتبداي ..
حياة : ولكن خليها غير حتى ل سيمانة الجاية ..
حرك راسه بنفي .. وعاود شاف ف ماريا بتهديد ..
علاء : غدا هي غدااا .. غانلقاك واجدة فالصباح باش نديك معايا .. وغانشوفو هاد اللغة ديالك .. وهاد المعاندة الخاوية .
زفرات بعيون مدمعين .. ناض منرفز ومعصب ... القميجة لي لابس عرقات عليه بالغضب ..
اما هي ضربات فالأرض بتمرد .. و ربعات يدها
ماريا : ولكن انا مابغيتش ..
حياة : (حطات يديها على شعرها الاحمر ) نتي فحال ضحى وبغينا ليك غير الخير .. وعلاء كل ما تعاندتي معه كلما تعاند معك اكثر .. راسو قصح من الحجر
دخل لبيته معصب .. كيحيد القميجة ديالو بغضب ... كتعصبو وتستفزو وتخرج أسوء مافيه ...
وهو ماباغيش هادشي .. غير داك الدموع لي فيعينيها كيخليواه تالف .. كلشي فيه زوين وبريء وكيوت وو... هنا وقفو افكاره باش مايزيدش اكثر .. كتخرج من داخلو واحد الانسان ماكانش عارف بوجودو .. ف الحقيقة لا ... غير هو كاتفكرو ف الماضي ... ماعارفاش هي اش دارت فيه باش كانت صغيرة .... خلقات ليه مشكل فحياته ... فنفسيته ... ف شخصيته ... حتى قال يمكن نسى من بعد هاد السنين كاملة راه غير كان كيهذي .. و غير سن الطيش .... لكن عمرو توقع انها غادي ترجع ... و غاتكون بهاد الجمال ... واخا مازال ماوصلات ل سن الرشد الا انها كاتبان بنت راشدة ف العشرينات ... ماتوقعش انه غاترجع تلعب ليه بعقلو مرة اخرى و يرجع مرة ثانية يفكر انه فعلا مريض و يفكر يتعالج مرة اخرى ...عمرو ظن انه غادي يكون هو الواصي عليها من بعد هاد السنين ...
فااتت ربع ساعة وقف قدام الشرجم لي فغرفتو كيطل لتحت حتى لمحها واقفة كتدور فالجردة .. ماعرفش علاش هاد المنظر فكرو فالنهار لي جات فيه .. وطاحت بين يديه فحضنه وقريبة منه .. حتى حس بارتجافها لي كيعادل ارتجاف قلبو وريحتها وكلشي فيها كان قريب منو لدرجة كتخلع ..
أنت تقرأ
🍇الوصية 🍇(مكتملة)
Action🔱 #الوصية 🔱 اربطو الاحزمة ... بعد غياب طويل ها أنا عدت بقصة من قصصي .. قنبلتي الموقوتة ههه ، جامعة بين الرومانسية والدراما والتفرشيخ والكوميديا والخيال وبزاف د المفاجآت 😻 ✒ بقلمي أنا #الكاتبة_هند_المتقي ❌ أول حاجة ممنوع النشر الا بإذني ❌ تفاعلك...
