🔱 الوصية 🔱
بقلمي الكاتبة هند المتقي
👈 الجزء 13
فالصباح ..
كانت ناعسة ف بيتيها .. فلونه الأصفر البارد والرمادي .. كل مرة كتقلب من جهة .. حتى حسات بشي يد كتحيد لها الغطا ..
شافت ف ضحى والنعاس غالبها .. خرج صوتها ثقيل
ماريا : ضحححى ..
ضحى : ( بحماس) نوضي نوضي الكسولة السبعة ونص دابا ...
رجعات تكمشات ف الغطا كتغطى من البرد
ماريا : لا عفاااك مازال شوية ونووض ..
ضحى : لا لا نوضي علاء من الصباح وهو كيستنى غير مابغاش يجي بيدو ينوضك ..
غي سمعات سميتو .. فتحات عينيها ورجعات تطكشات ف بلاصتها ..
ماريا : لااااا صافي راه بصح مابقيتش بغيت نوض ..
ضحى : و عفاااااك ياك ... غانعطي ل علاء هوو يفيقك كيف كنتي صغيرة .. ادا مابغيتيش ..
غير سمعات هاد الجملة قلبها وقف ف بلاصتو .. عرفاتو ماغايقدرش يجي بنفسو لعندها والا غاتموت داك الساعة ..
تقلبات للجهة الاخرى يالاه غاتغرق فالنعاس حتى حسات عاود ب الباب تحل وتشد بالجهد
ماريا : ضحى ..
علاء : ماشي ضحى هادي ...
شافت فيه وعينيها الخضراوين فتحاتهم على وسعهم .. كتأكد من وجوده هنااااا فبيتيها .. وقدام فراشها ..
ماريا : نتاااا ؟ كيفااااش كتدخل وانا ناعسة ؟
علاء : (بلا مايديها ف كلامها) غاتنوضي دابا بلا تبرهيش ..
ماريا : (بعناد) مابغيتش ..
نتر عليها الغطا ..
علاء : تگعدي
ماريا جرات عليها الغطى مرة اخرى و خنزرات فيه.... علاء بغا الدخان يخرج من نيفو بالاعصاب
علاء : خمسة دقايق غانلقاك مبدلة حوايجك والا غانجي نبدلهم ليك بيدي .. وداك الساعة غانشوفو العناد ديالك
عاودت فتحات عينيها وانفاسها اضطربو .. و جملة "غانجي نبدلهم ليك بيدي " بقات كاتردد ف مسامعها... حناكها حساب بيهم ولاو سخونين و خيالها سرح بيها لشي حوايج شديدين الانحراف .... سمعات الباب لي زدحو بالجهد ..
ناضت كتجري وخدودها مازال فاللون الاحمر .. كتلبس بالزربة ودير روتينها الصباحي ..
حيت عارفاه الاا قال الكلمة ماكايتراجعش ... كيف قالت لها حياة عنيد وراسو صلب من الحجر
بعد عشرة الدقايق كانت جالسة على الطابلة د الفطور وباقي فيها النعاس .. غير شافتو توقضات .. فحال الاا تفكرات كلامو ولكن هو مابين لها حتى ردة فعل ....
ركبات بنرفزة معه .. وصاوبت السمطة لراسها ..
ماريا: كانت تقدر تجيني ضحى .. ماشي ملزوم نتا باش تجيبني ..
علاء : (بغضب)ضحى عندها شغلها .. ماشي غاتقابلك فالطريق ..
ماريا : ( ضحكات بغضب كتخرج فيه غلها ) ااه اكيد حيت نتا هو السيد ... دير لي بغيتي .. حتى من القانون د الدار ماكيمشيش عليك .. حتى فالغدا جيتي فالوسط وانا كتقول ليااا لا وهادشي تبرهيش ... والله ماكتحشم .. دابا شكون لي كيدير فالتبرهيش ..
سمعاتو ضحك بالجهد .. شافت فيه باستغرب .. ضحكتو كانت خارجة من قلبو ... فحال الا مابقاش معصب .
علاء : ملي تكوني نتي مولات الدار داك الساعة اجي امتى مابغيتي حتى نتي .
قالها ورجع سكت .. طلقات ودنيها كتأكد من نبرة صوتو الغامضة ..
أنت تقرأ
🍇الوصية 🍇(مكتملة)
Боевик🔱 #الوصية 🔱 اربطو الاحزمة ... بعد غياب طويل ها أنا عدت بقصة من قصصي .. قنبلتي الموقوتة ههه ، جامعة بين الرومانسية والدراما والتفرشيخ والكوميديا والخيال وبزاف د المفاجآت 😻 ✒ بقلمي أنا #الكاتبة_هند_المتقي ❌ أول حاجة ممنوع النشر الا بإذني ❌ تفاعلك...
