🍇الوصية 🍇(مكتملة)

part24

🔱 الوصية 🔱
بقلمي الكاتبة هند المتقي
👈 الجزء 24

فالصباح فاقت مسخسخة وعظامها ضارينها .. لبسات حوايجها وبغات تخرج .. بلا ماتشوف حتى شي حد .. اتمشي للمعهد تبدل الجو وتحاول تنسى علاء والبوسة ديالو وحضنو وعطرو وكلشي فيه وتحاول تنسى سيف لي ظهر بعد اختفاء دام سنين ..
غير هبطات لقات علاء بأناقتو  المعهودة يمكن غادي للشركة شاف ف ساعتو .. وكيحقق فوجهها حتى ولات حمرا
قالت بصوت منخفض ..
ماريا : صباح النور
اومى بهدوء براسو
علاء : صباح الخير ..
سكت خلاها حتى زادت ..
علاء : غادية للمعهد ؟
مابغاتش تشد معه الضد
ماريا : ااه ..
علاء : سيري فطري .. تسناي نوصلك .. طريقي من تما
ماريا : واخا ..

ركبات حداه بعد مافطرات .. واخا ماكانش منين يدوز لها .. طول الطريق وهي ساهية .. علاء فسر ردة فعلها على اساس باقي حشمانة من التقارب لي وقع بيناتهم البارح مابغاش يزيد يهدر ..
جات نازلة عاد هضر ..
علاء : شمن ساعة خارجة ؟ ..
ماريا : امم  مع 12 ..
حرك راسو ب اه ..
علاء : غانجي عليك .. بلا ماتجي فالطاكسي ..
ماريا : بلاش .. نقدر نجي بوحدي .. مايحتاجش ..
بلا مايجاوبها شافتو زاد فالسرعة وخلاها ... مالقات مادير من غير تدخل تقرا ..
دازو ساعتين صافي ماقدراتش مازال تكمل طول الحصة وهي ساهية وكل تفكيرا شاغلو سيف .. لي كلما تفكراتو .. كتفكر ايامها معه فالميتم .. وعاوتاني بدون وعي كيرجع تفكيرها ل علاء وتصرفاتو وقسوتو معها وواخا هكاك كان عاجبها هاد التقرب ديالو منها..

يالاه خرجات برا حتى لقات نفس الاعين الرمادية  كيشوفو فيها ونفس الهيئة د البارح كتقرب منها .. باناقتو الملفتة للنظر .. و طوله الفارع ... كان ف الطولة ديال علاء ... و تقريبا حتى نفس البنية ... قلبها انتفض من مكانه و شداتها الخلعة
سيف : ماريا ..
بعدات عليه  بخوف وصوتها خرج فحال الغوات ..
ماريا : نتاا ؟؟ شنووو بغيتي مني ..
سيف : كثر من زوج سوايع وانا كنستناك تباني باغي غير نهضر معاك ا ماريا ونوضحو شحال من حاجة ..
كانت علاين تبكي ولكن مابكاتش .. تحكمات ف راسها و ف دموعها كيفما كادير من ديما ... اصلا ديك الوقاحة و الفضاضة ديالها ناتجة عن ضعفها ... و حساسيتها من اي حاجة تقدر تبكيها داكشي علاش اي واحد كاتخرج فيه عينيها و تجابه معاه المهم انها عمرها تهبط دموعها قدام شي حد... تلعتمات شوية ف الكلام  
ماريا :  م ..ماكاين مايتقال بيناتنا من نهار مشيتي ( سكتات شوية و طلعاتو من راسو ل رجليه ) الفلوس كيبدلو بنادم وكيخليوه ينسى وعودو ..
حس بيها شحال مجروحة .. وجرحها عميق من طرفو .. ماعارفاش  انه كلشي دارو  كان على قبلها ...
سيف : ماريا خليني غير نشرح ليك ... نتي مافاهمة والو .. انا عمري نسيتك وملي رجعت هاد الايام .. عيت مانقلب عليك ..
ملي حس بها كتسمعو وواخا ماباغاش .. ولكن كتزير على راسها ..
سيف : خلينا نمشيو غير لشي قهوة ونشرح لك ..
اشار لها ل طموبيلتو.. 
حركات راسها ب رفض
ماريا:  لاء ماغانركبش معك .. غانمشيو على رجلينا
هز راسه بايجاب وابتسم .. بعدا  على الاقل وافقات تسمع شنو بغا يقول لها ...
سيف  : واخا