ياديرةٍ ضمّت كل الأحباب

Part 1

..........••..........
بيت ابو راشد
بعد صلاة العشاء
بالصاله كانوا نايف وابو راشد عند التلفزيون وينتظرون العشاء
نايف وهو يمسح وجهه ؛ يلا يااييمه يلا تكفين وين راح العشاء
هاجر من المطبخ ؛ الحين نجيبه لا تنفخ
ام راشد مدت لها السفره ؛ يابنت خذي السفره بس وديها الله يصلحك
هاجر ؛ ييوه يمه خليني احط بلاستيك عجزانه اغسل هذي اذا توسخت
ام راشد ؛ اقول روحي تغسلها اروى وديها وانتي ساكته
اخذتها هاجر وراحت للصاله وهي تحذف السفره على نايف ؛ خذ يا ورع افرشها
نايف وهو منسدح ؛ الورع انتي ان جيت فرشتك مكانها
ابو راشد ؛ يولد اسكت خلنا نسمع زين!
وسكت نايف بقهر وهو يأشر لهاجر بتهديد وطلعت ام راشد بالعشاء ؛ وهذا العشاء سمو بالله وقربوا
ابو راشد ؛ وين تركي واروى روحي يا هاجر صوتي لهم
هاجر جلست وهي تنادي بصوت عالي ؛ اارووى تتركي تعااالو العشاء برد
نايف ضرب راسها بخفه ؛ اذني انفقعت يقولك روحي لهم مب تصارخين
هاجر تربعت ؛ والله مااروح جوعانه
ابو راشد وهو ينادي ؛ ولدد تركي اروى!
نايف وهو ماسك اذنه وهمس لهاجر ؛ وانا اقول من طالعه عليه
هاجر وهي تضحك ؛ فيك خير ارفع صوتك عشان ابوي يسمعك
دخل تركي من برا وهو ينزل شماغه ؛ السلام عليكم
الكل ؛ وعليكم السلام
نايف بهمس ؛ لا يالسربوت
هاجر همست ؛ هايت كالعاده
تركي وهو يجلس ؛ ماشاءالله حاطين العشاء ما احتريتوني
ام راشد ؛ والله عاد صوتنا وانت طالع نحسبك بالغرفه
تركي ؛ توني جيت ماكنت بالبيت ، وين اروى ؟
نايف ؛ ياليل البلشه والله ماني منتظر احد باكل وانتو صوتوا للي تبون
هاجر ؛ والله وانا جوعانه باكل وبنام صار لي ساعه اصوت
ام راشد جت بتقوم ؛ تعشوا انتو انا بروح اناديها
تركي وهو يقوم قبلها ؛ لا والله خلك يمه بقوم انا ومنها اغسل
وراح لجهة الغرف اللي كانت ممر داخل الصاله ودخل ينادي اروى اللي تغني وتسوي شعرها ؛ وينك يادرب المحبه وينك يادرب المحبه هل اقفلوك الحبايب هل اقفلوك الحب.... مامداها تكمل الا دخل تركي بضحكه ؛ لا ما اقفلوه يمديك تدخلين وينك عن الناس انتي ماتسمعينهم يصوتون!
اروى التفتت ؛ بسم الله علامك ماتعرف تطق الباب بعدين انتو صاحين تتعشون هالحزه ؟
تركي وهو يسحبها ؛ اي صاحين متى تبينا ناكل بنص الليل زيك كنك جني
اروى مشت وهي تضرب كتفه بخفه ؛ واللي يقوم ياكل معي وش يسمونه ، عفريت
ووقفت تغسل بنهاية السيب وتركي ينتظرها ومن خلصت رشت عليه وانحاشت وغسل تركي بسرعه ولحقها ومامداه من طلعت للصاله وتركي وراها يضحك
اروى ؛ سلام
الكل ؛ وعليكم السلام
ابو راشد ؛ وين انتي ماتردين ؟
اروى ؛ ااء اذاكر ماسمعت
ناظرها تركي ورفع حواجبه بصدمه واشرت له بتهديد يسكت وجلسوا يتعشون والمناقر بالخفى مايحلا لهم الا عليه
..........••..........
ببيت ابو هادي
دخل للبيت بعد هادي بدقايق ؛ السلام عليكم
شهد ؛ وعليكم السلام ، يبه جبت اغراضي ؟
ابو هادي وهو يعطيها ؛ اي هذي هي ، العشاء جاهز ؟
ام هادي طلعت وهي تحط الصحن ؛ ايه ننتظرك يلا تعالو العشاء ، ياهادي .. ياحمد
وطلعوا العيال وجلسوا وبعد دقايق التفت ابو هادي ؛ الا وش صار على اختباراتك يا حمد اخر ماده سقطت فيها عساك تعديتها
شهد كتمت ضحكتها ؛ والله يا يبه ماشفته ماسك الكتاب
تنحنح حمد اللي نشبت بحلقه اللقمه ؛ ااا.. لا والله يبه اني اذاكر بس انها صعبه شوي بكره اختبرها
ابو هادي ؛ وانتي يا شهد
شهد فزت ؛ وشو
حمد مسك ضحكته وهزت راسها ام هادي بأسى
ابو هادي ؛ اختباراتك وش صاير عليها
شهد؛ ان شاء الله سهله اذاكر والله
ام هادي ؛ والله الصدق انتي وياه ماتذاكرون يبيلكم جلد
ابو هادي ؛ اشوفهم والله لاكن الوعد اذا طلعت النتايج
كملو عشاهم وشهد وحمد قامطين وهادي مو معهم ياكل ...
..........••..........
من بكره في بيت ابو راشد
ابو راشد وه يمر على سيب الغرف طالع للصاله ؛ يلا يابنات صلوا وتعالوا افطرو عشان تداومون
قامو كلهم الا نايف لأن اليوم دور تركي يودي خواته دواماتهم وطلعوا للصاله
ابو راشد ؛ وينه نايف ماجا يفطر
هاجر ؛ رجع ينام اليوم دور تركي يبه هو يودينا
تركي وهو متكتف وفيه نوم ؛ ايه اذا مانمت زين يصير دوري واذا شبعان نوم ماتعرفوني
ابو راشد ؛ ازين عشان تعرف شلون تطلع بالليل وماتنام الا الفجر شفتك بعد العشاء يوم طلعت تسربت برا وبعدين صار منت جاي العشاء وش مهيتك مره ثانيه!
تركي صحصح ؛ اا ... هه
ابو راشد ؛ من قال هه سمع لاعاد اشوفك تطلع بعد العشاء مية مره وانا اعلمك مير ماتفهم
اروى وهاجر كتموا ضحكتهم على فهاوته اللي مستحيل يطلع بدون لحد يشوفه
وطلعت ام راشد بالفطور ؛ نايف وينه ؟
تركي ؛ رجع يخمد
ابو راشد ؛ اهم شي انه صلى مع المسلمين وهو قايم من نفسه مهب مثل واحد نسحبه تقل بهيمه لاصلاة ولا عباده
هالمره هاجر واروى انفجروا ضحك وهم يحاولون يفطرون بهدوء ويادوب خلصوا فطورهم وراحو مع تركي لدواماتهم
..........••..........
بيت ابو هادي
بعد كم ساعه
دخلت ام هادي لغرفة شهد وهي تصحيها ؛ شهد يلا قومي لاتتأخرين ... شهد ، بنت
شهد فزت ؛ هااهه يمه بس شوي قايمه قايمه
وطلعت ام هادي لغرفة حمد فتحت الباب وشافته صاحي وماسك الكتاب
ام هادي ؛ ماشاءالله قايم من نفسك ولا خايف من الاختبار ومانمت كالعاده ؟
حمد ؛ والله مواصل قعدت اذاكر ما ابي اخيس ترم ثاني بالجامعه هاللي عجزت اتخرج منها
ام هادي ؛ الله يوفقك ياحبيبي تعال افطر وبعدها تراجع شوي عشان تصحصح
وتنهد حمد وقام وام هادي رجعت لشهد من ماشافتها طلعت
ام هادي وهي تطفي المكيف وتشغل النور ؛ ماينفع معك الا كذا .. يابنت اختبارك بيبدا وانتي للحين نايمه! قومي ان رجعت مره ثالثه وانتي نايمه بعلم ابوك بسرعه خلصيني .. قومي ياشهد يكفي انك تقعدين ساعه تجهزين
مر ابو هادي من عند غرفتها وهو يشوف ام هادي تحاول تصحي شهد ونادى ؛ ياشهد
فزت شهد توقف وطلعت ام هادي وتأففت شهد بقهر وهي تجهز
خلصت ولبست وطلعت للصاله وهي تشوف حمد يفطر ؛ اخلص انت قم على كثر بلعك مايبين فيك
حمد ؛ اقول سدي فمك اكل من خيرك انا ، اهب
ام هادي تنهد ؛ يانفسية الصباح اللي فيكم ، اجلسي شهد افطري باقي وقت
شهد صبت لها كوب وهي واقفه وقالت بهمس قهر وهي تاخذ شنطتها ؛ باقي وقت اجل وللنوم مافيه وقت ... لايمه انا بروح بدري عشان اجلس اراجع ، ققم انت قم قم
ومسك حمد الفنجال بيحذفها فيه وانحاشت للباب
وكوبها معها وجلست تنتظره وطنشها حمد ورجع يكمل فطوره
افطر وخلص وطلع واخذ معه شهد يوصلها وبعد دقايق طلعوا ابو هادي وهادي افطروا وقال ابو هادي ؛ هادي استعجل عشان تسبقني للمحل انا شوي واجيكم " معرض سيارات لأبو هادي "
هادي ؛ ابشر يبه الحين اروح
وطلع بعد دقايق ولحقه ابو هادي والكل راحوا لأشغالهم ودواماتهم بدون احداث مهمه
•
العصر
كانوا ابو هادي وهادي بالصاله وجا حمد وجلس
ابو هادي ؛ حمد كيف اختبارك ماشفتك الظهر لا انت ولا شهد عسى خير
حمد ؛ خير ان شاء الله بس اني مانمت طول الليل وانا اذاكر ويوم جيت وانا مصدع
ابو هادي ؛ واختبارك عساه زين
حمد ؛ ايه الحمدلله زين و ان شاء الله اني انجح بهالماده
ابو هادي ؛ ان شاءالله وشهد وينها
شهد وهي طالعه من المطبخ ومعها القهوه ؛ هلا يبه هذا انا
ابو هادي ؛ كيف اختبارك
شهد وهي تصب له قهوه ؛ ناجحه ان شاء الله كله حليته
ابو هادي ؛ ماشاء الله الله يوفقكم يارب
..........••..........
نفس الوقت في بيت ابو راشد
كانو جالسين بالحوش بالدكه " جلسه جانبيه بسيطة من سقف سعف " على قهوه العصر ويسولفون عن راشد وجيته اليوم بما انه اخر يوم دوام
ام راشد ؛ والليله ان شاء الله بتجي شريفه وزوجها
ابو راشد ابتسم ؛ الله يحييهم
تركي ؛ يمه كم باقي لها شريفه وتلد
ام راشد ؛ دخلت شهرها وان شاءالله بعد ماتولد بتقعد النفاس عندي
نايف ؛ ماقالت وش بتجيب
هاجر بعبط ؛ ورع
نايف ؛ احلفي مادريت
ام راشد بضحكه ؛ بنت الله يقومها بالسلامه
الكل ؛ امين
اروى ؛ اكيد بتسميها على اسمي
هاجر ؛ لا يالطيبه انا اكبر بتسميها علي
ابو راشد ابتسم ؛ يمكن تسميها على اسم امكم العنود
نايف لهاجر واروى ؛ والله انه احلا من اسامي هذيلي ليتها تسميها العنود
ناظروه هاجر واروى بخز وضحكت ام راشد ودق الباب
اروى فزت تعدل جلالها وهي تقوم ؛ هه هذا راشد اكيد بقوم افتح
تركي فز ؛ اقول وخري بس انا افتح
وركضت اروى وهي تحط يدها ع الباب ؛ وخخرر سبقتك انا شوف يدي ع الباب قبلك
ابو راشد نادى ؛ ياتركي وخر خل اختك تفتح وانت سكره
تركي ؛ مايصير يبه انا ب.... " وصرخ يسحب يده من عضته " ياااوك ابك يدي
اروى وهي تبعد ؛ احسن عشان ثاني مره ماتلقف
فتحت الباب وكان راشد يضحك عليهم
اروى وهي تسلم عليه ؛ هلاا راشد اشتقناا لك مابغيت تجي
راشد وهو يحضنها بضحك ؛ وانا ما اجي الا القاكم تتهاوشون نخلص من هاجر ونايف تجين انتي وتريك
وسلم على تركي اللي كان يدلك مكان عضتها ؛ ياهلا ياهلا والله تعرفها جنيه
راشد ناظر عضتها وضحك والتفت لأهله ؛ سلام عليكم مسيهم بالخيير
الكل وهم يقومون ؛ وعليكم السلام ، مساء النور
ابو راشد وهو يسلم على راشد ؛ يامرحبا والله يالله حيه
راشد وهو يبوس راسه ؛ الله يبقيك يبوي وش اخبارك
ابو راشد ابتسم ؛ بخيير
وكمل سلامه على امه وهو يبوس يدها ومن بعدها هاجر ونايف
نايف ؛ ويين العيال ماجبتهم " عيال راشد "
ام راشد ؛ اي والله ليه ماجبت اهلك ياراشد
راشد؛ والله يايمه ام ناصر راحت تسلم على اهلها وان شاءالله تجي بكره ، تركي لاتسكر الباب هات الكرتون حطيته عنده
وجلس ومدت له اروى الفنجال ؛ سَم
اخذه راشد ؛ سمّ الله عدوك
ابو راشد ؛ وشلون شغلك وديرتك
راشد ؛ ابد والله بخيير الحمدلله
والتفت لتركي اللي حط الكرتون وجلس
راشد بضحك ؛ جبت ذاك التمر من القصيم ذهب ذهب على طول من النخل لعندكم ماجلس الا ٤ ساعات من الطريق
" راشد دوامه بالقصيم وكل اجازه يجي لأهله ويقضيها كلها عندهم بالديره وهم متعودين كل عطله يجتمعون "
ابو راشد ابتسم ؛ يازينه من تمر
راشد ؛ ويسلم عليكم خالي ياسر وهو اللي تنقى هالتميرات ، هه هاجر فزي انتي والعنقود اغسلوه
هاجر ؛ ابشر
واخذته وراحت ولحقتها اروى لداخل ؛ خالي ياسر لو يدري ان امي تقنع تركي ببنته دانه حط لنا تراب
هاجر ضحكت ؛ اي والله وواجد على هالهايت .. استغفرالله حرام حرام اخونا
وضحكت اروى وهي تحط مع هاجر
نرجع للحوش
ام راشد ؛ وشلون منيره والعيال ومدارسهم عساهم نجحوا
ابتسم راشد ؛ الحمدلله بخير جوري مستانسه خلصت اول ابتدائي وهذي هي نجحت وعاجبتها المدرسه
تركي ؛ ياعزي عنها وراها مشوار
نايف ضحك ؛ خلوها دامها مستانسه مادرت
الكل ؛ هههههههههه
راشد التفت لنايف وتركي بضحك وهو يهمس ؛ الا انتوا مافيه عنكم اخبار وظيفه ولا عرس منا ولا منا ؟
تركي اعتدل بطفش ؛ ياليييل انا اذا جيتنا وماجبت طاري الزواج اشك ان فيك شي
نايف وهو يخبط على كتف تركي ؛ انا والله مقدم على وظيفه والزواج عندكم تركي زوجوه
تركي ؛ فكني تكفى لاتحط السالفه براس ابوي ويسويها صدق
ابو راشد سمعهم والتفت ؛ وليه ما اسويها الا بزوجك انت وياه وبيوم واحد بعد
راشد ضحك ؛ وهو صادق شابت روسكم وانتوا ماتزوجتوا
ام راشد ؛ خلهم يوافقون ويصير خير
تركي ؛ خلاص ان شاءالله افكر
ضحكو وهم يدرون انه يتهرب من السالفه وبيسكتهم
راشد ؛ الا شلون شروف يمه والله اني ماكلمتها هي كم باقي لها وتولد ؟
ام راشد ؛ بخير يمك ماباقي لها شي دخلت شهرها وهذي هي بتجينا الليله هي وزوجها
راشد ؛ ماشاءالله الله يقومها بالسلامه
الكل ؛ اميين
وكملو سوالف وهم يسألون عن الحال واحوال بعض
..........••..........
بيت ابو هادي
اللي كان بالمعرض هو وهادي
وكانو شهد وحمد قاعدين بالصاله وامهم طلعت تزور جارتها
شهد ؛ حمدوه انزل شف الجرايد يمكن جابوها النتايج يمديها طلعت
التفت حمد اللي كان يطالع التلفزيون ؛ لا علمت الحارس ان جابوا يجيب لنا وحده
شهد تنهدت ؛ يارب اطلع ناجحه ومانحمل مواد والله اموت خلاص ابي اتخرج
حمد وهو يفصفص ؛ امين اجل انا وش تقولين اللي عفنت بالجامعه حفضو وجهي الدكاتره من كثر مارسبت وحملت مواد
شهد بجد ؛ تراك انت والله مهمل لو تشد حيلك تنجح
حمد اللي فعلاً كان مهمل ؛ ايه ماكنت اذاكر بس هالترم شديت حيلي وان شاءالله اني ناجح
ودخلت ام هادي ؛ سلام عليكم
حمد وشهد ؛ وعليكم السلام
ام هادي ؛ ماجا ابوكم وهادي
حمد ؛ لا للحين
شهد ؛ يمه تكفين اذا جا ابوي خليه يطلعنا نتمشى وربي طفشت وماصدقت اخلص اختبارات
ام هادي ؛ اي صح شفتوا نتايجكم
شهد وحمد ؛ لا ماطلعت
ام هادي بشك ؛ اكييد ؟
حمد ؛ اي والله مانزلت للحين
شهد ؛ ادعي لنا يمه تكفين والله ان نجحت اسوي اللي تبين
ام هادي وهي تضحك ؛ الله يوفقكم يااربب
..........••..........
عند ابو هادي بالمعرض
اللي كان جالس بمكتبه يشيك ع الفواتير والحسابات
ودخل هادي ؛ يبه فيه رجال برا يقول بكلم صاحب المعرض وش اقول له
ابو هادي ؛ دخله خلنا نشوف وش عنده
دخل الرجال
"ابو عبد العزيز " ؛ السلام عليكم
ابو هادي وهو يوقف ويأشر لهادي يطلع ؛ وعليكم السلام .. آمر
ابو عبدالعزيز ؛ معك يزيد بن متعب آل****
ابو هادي وهو يسمع عن هالرجال وله مكانه ؛ ونعم يالله حيه تفضل
ابو عبدالعزيز ؛ ماعليك زود الله يبقيك ، انا جايك بموضوع يخص هالمعرض وان شاءالله ماتردني
ابو هادي ؛ ابد ان قدرت ما اردك ان شاءالله
ابو عبد العزيز ؛ انا جايك وسمعت عن معرضك ماشاءالله ... وجاي اقولك اني ودي اشتريه منك بالسعر اللي تطلبه ، انا كنت ابي محل بهالمكان ومعرضك مناسب ماشاءالله وان كان ودك تبيعه انا بشتريه بالسعر اللي تبي
سكت ابو هادي اللي ماكان ناوي يبيع المعرض بس وده ينتقل من المدينه ويسكن بالرياض لاكن ماقدر بسبب شغله بس شاف ان ابو عبد العزيز يبي المعرض قرر يفكر انه يبيعه لأن مافيه الا هالحل عشان ينتقل من المدينه للرياض
ابو هادي تنحنح ؛ والله يبو عبدالعزيز انا ماكنت افكر ابيع المعرض لاكن ابي انقل للرياض ، ولا ادري وش اسوي بالمعرض لكن يوم جيت انت والله ان جيتك عزيزه وغاليه بس خلني افكر وارد لك خبر وان شاءالله خير
ابتسم ابو عبدالعزيز براحه وهو كان يتمنى يشتري هالمعرض ويوسع من عقاراته ماتوقع ان هالمعرض بيجيه بهالسهوله ؛ ابد خذ راحتك وفكر والله يكتب اللي فيه الخير ... وهذا رقمي رد لي خبر لاقررت
ابو هادي اخذ الكرت ؛ ان شاء الله
وطلع الرجال ودخل بعده هادي ؛ يبه وش يبي الرجال ماشاءالله واضح عليه الهيبه
ابو هادي ضحك ؛ ماعرفته ؟
هادي عقد حواجبه ؛ لا والله منهو!
ابو هادي ؛ هذا يزيد بن متعب آل****
هادي وهو يرجع يلتفت للباب ؛ ماشاءالله يزيد ابو عبدالعزيز التاجر اللي يقولون ؟
ابو هادي ؛ الله الله هو بنفسه
هادي وهو يضحك ؛ ووش يبي ؟ نصنع له سياره بأسمه
ابو هادي ابتسم ؛ لا لا مايبي سياره امش للبيت واعلمك وش يبي
وقام ولحقه هادي بأستغراب وطلعوا متوجهين للبيت
..........••..........
نرجع بيت ابو راشد
قبل المغرب بشوي
كانوا العيال وهاجر واروى عند الزرايع الجديده يورونها راشد وابو راشد وام راشد جالسين بالدكه
راشد وهو يشم الورق ؛ ااوووهه والله اني اشتقت للزرع تكفون شجرتي اللي زرعت ليكون ما اسقيتوها
نايف ؛ افا عليك اسقيها انا كل يوم شوفها هذيك هي
هاجر شهقت ؛ ياكذذابب انا اللي اسقيها هي والنخله اللي وراها
راشد عقد حواجبه وضحك ؛ اي نخله
تركي وهو يأشر على زرعه ؛ العود اليابس ذااااك اخذت لها زرعه صغيره من المزرعه توها طالعه نتفتها وهي تزرعها هنا وما اخذت يومين الا وماتت
الكل ؛ ههههههههههههههههههه
هاجر ؛ والله انك كذاب ماماتت فيها ورق واسقيها وتطلع
اروى ؛ وترجع تموت
هاجر ؛ لا ماماتت بس عشاني نسيت اسقيها مره ومن بعدها صرت اسقيها كل يوم
نايف ؛ هه شفتو بس تسقي زرعتها والزرع الباقي انا اسقيه
هاجر كانت بترد بس دق الباب وفزت اروى بتفتح ؛ تركي جرب تلقف عشان اختم جبهتك
الكل ؛ ههههههههههههههه
ام راشد ؛ اروى اصبري انا بقوم يمكن شريفه زوجها معها
اروى ؛ يووه ناسيه عزام اصبري بندخل
وركضت لداخل هي وهاجر
وفتحت الباب ام راشد وابو راشد والعيال وراها ؛ ياهلا ومرحبا تو مانور البيت
ابو راشد ؛ ياهلا ومرحبا يالله حيهم
شريفه وعزام " زوجها " ؛ ياهلا فيكم ، الله يبقيكم
سلمو على بعض وشريفه سلمت على راشد ؛ هلا راشد متى جيت من زمان عنك! .. وش اخبارك
راشد وهو يبوس جبينها ؛ ياحبيبتي والله جيت العصر وشلونك انتي
شريفه ؛ بخيير الحمدلله
ابو راشد التفت لتركي ونايف ؛ رح انت ونايف حطو القهوه بالدوانيه
وراحوا للدوانيه يحطون القهوه ويشبون البخور
ودخلت شريفه داخل وهي تشوف هاجر واروى يركضون لها يحضنونها
اروى وهي تسبق هاجر وتحضن شريفه ؛ شروفف اشتقت لك والله
شريفه وهي تحضنها ؛ ياعمرري وانا بعد
هاجر ؛ وخري وخري بسلم هلا شروف قسم بالله فاقدتك
شريفه ضحكت وحضنتها ؛ وانا وانا بعد والله
ام راشد بأبتسامه ؛ شوي شوي لاتعورون الصغيره
اروى وهاجر وهم يبعدون بعض ؛ اييه صح
ضحكت شريفه والتفتت ؛ وين منيره وعيالها ؟
ام راشد ؛ ماجت يقول راشد عند اهلها بتنام عندهم اليوم وبتجي بكره ان شاءالله
شريفه وهي تنزل عبايتها ؛ ياعمري .. يوووه والله اني اشتقت لكم
..........••.........
بيت ابو هادي
دخل هو وهادي للصاله ؛ السلام عليكم
الكل ؛ وعليكم السلام
ابو هادي رفع الجريده اللي معه ؛ عطاني اياها الحارس فيها النتايج دوروا اساميكم وبشرونا
شهد وحمد فزوا ياخذونها وكل واحد يسحبها من الثاني يدورون اساميهم وقال ابو هادي ؛ تراي اعرف ان قصيتوا ورقه ولا قلتوا مالقينا اسامينا كل اسامي الطلاب ونتايجهم فيها
حمد ؛ لا لا ماعليك ناجحين ان شاء الله
ابو هادي ؛ طيب يعني لانجحتو كلكم خلاص تخلصون جامعه ؟
شهد وهي تسحبها من حمد ؛ اذا لقيت اسمي اعطيك وخر .. ايه ايه يبه نخلص
ابو هادي ؛ اجل بعد العشاء ابيكم بموضوع
ام هادي ؛ عساه خير
ابو هادي ؛ اي ان شاء الله خير
هزت راسها شهد ومشت وحمد يلحقها وهمس ؛ شكله بيزوجك دامك خلصتي جامعه
شهد شهقت ؛ هه لا ان شاءالله هو قال الموضوع خير
ابتسم حمد بخبث ؛ وزواجك والفكه منك مو خير ؟
شهد ضربته بالجريده ؛ اقول اسكت بس ان شاءالله يزوجك انت وافتك من مناقرتك
حمد ؛ اقول عطيني بس ادور اسمي

...... لاتنسون التفاعل عشان أنزل كل يوم او يومين بارت ❤.