ياديرةٍ ضمّت كل الأحباب

Part 46

☆

.. { لاحول ولا قوة الا بالله } ..

..........••..........
مزرعه ابو راشد
بعد ماصلوا فيها العشاء قام ابو راشد وهو يعدل فروته ؛ يلا ياعيال مشينا عن هالبرد ، تركي نايف متى يخلص دوامه ؟
تركي ؛ الساعه ٨ باقي له اقل من ساعه
ابو راشد ؛ اجل يلا مشينا
تركي ؛ يلا الحقكم انا
وركب ابو راشد سيارته ومعه سعد وناصر وعبدالله وحركوا راجعين للبيت وتركي مشى لجهة الممر اللي فيه انبوب المويه وهو يوقف بنص الممر وكان حاط شرشفه على كتفه وابتسم وهو يتخيل شموخ جايه وشد على شرشفه وهو يحتضنه بأبتسامه وسيييعه وتنهد ومشى راجع للخيمه والتفت يمينه وهو يشوف المده " مكان فاضي " اللي كانت مختلفه عن المزرعه وتربتها غير عن تراب المزرعه ومافيها زرايع ولا حجر وجربوا يزرعون فيها ولا طلع وخلوها فاضيه وكانت مربع صغير مترين مايناسب حتى للجلسه يادوب لشخصين مو اكثر ونايف يكتب فيها ومعتبرها لوحة احياناً يكتب بيتين شعر او اسمه ولاكن هالمره تركي شاف نايف كاتب فيها وابتسم وهو يمسح اللي كاتبه واخذ عود وهو يكتب على الرمل " ممر القمر " وتنهد وهو يوقف ويناظر الممر يساره ورجع كتب " غلاب يا هوى! "
ومشى لسيارته وهو ماقد حس بضياع كثر ماحس فيه هالليله
ركب وهو يحرك راجع للبيت وفتح درج السياره واخذ شريط وهو يحطه وبدت الأغنيه ؛
غلاب يا هوى ، غلاب! .. ذوبت قلوب الاحباب والناس علشانك غنت .. مواويل في خصام وعتاب غلاب يا هوى غلاب .. غلاب وغلبت ياما عشاق عشاق في الهوى لا تاهو .. ولا قالوا توبه
ولا ذاقوا يا عيني دوا ..
وسنين وايام يلفوا وراك ..
وبتلعب فيهم هنا وهناك ..
ولا عاشق كان في يوم يتحداك ..ولما نسيمك يعدي
فتح كل الأبواب .. والناس علشانك غنت
مواويل في خصام وعتاب .. غلاب يا هوى
غلاب غلاب ومالك كبير .. وعجيب امرك وخطير
تدخل في القلب بنظره .. تعشق من غير تفكير وساعتها يطير النوم .. من العين والراحه يا عيني
نجيبها منين ، عجيبه يا قلبي .. إننا راضيين!
نتعذب ونقول اهلا .. بألذ واحلى عذاب
كان يسمعها وهو يغني معها بخفوت ومن انتهت وهو يتنهد ؛ ونقول ياقلبي اهلاً وراضيين
وكمل طريقه للبيت ..
..........••..........
بيت ابو هادي
طلعت شهد وهي تشوف ام هادي تحط العشاء بالصاله ؛ الله وش هالريحه
ام هادي ؛ ودي اسوي شي يحبه هادي وسويت مكرونه
شهد تخصرت بضحكه ؛ الله حتى حنا نحبها ترا ، الا حمد طبعاً مايعجبه شي
ام هادي ضحكت ؛ هادي اكثر
شهد ؛ طيب ماجو من المسجد للحين ؟؟
ام هادي ؛ لا يجون شوي
وجلست شهد على دخلة ابو هادي والعيال ؛ السلام عليكم
ام هادي وشهد ؛ وعليكم السلام
ابو هادي ؛ الله الله وش هالريحة الطيبه واصله لبرا
ام هادي ؛ اكله يحبها هادي
شهد ؛ مكرونه ونحبها انا وابوي بعد يايمه
حمد ؛ وانا يمه علامي اغلى عيالك ماسويتي له شي يحبه
ام هادي ضحكت ؛ والله اغلى عيالي يحب المكرونه
حمد شهق وضحك ابو هادي ؛ خل عنك الدلع بس ذقها هالمره من ريحتها واضح انها بالمخ
حمد بقهر وهو يروح المطبخ ؛ ماني آكل انا اضبط لي طبخه احبها
ام هادي ضحكت وهي تجلس ؛ لاتحرقنا بس جربها وتكلم
وضحكوا وابتسم هادي ؛ سلم يدينك يمه
ام هادي ابتسمت وهي تحط له ؛ بالعاافيه ياحبيبي
حمد من المطبخ ؛ وع ، الملاعق وين بس
ام هادي ضحكت ؛ بالدرج اللي بالنص
وجلسوا يتعشون وبعد دقايق طلع حمد وهو ياكل ؛ الصامولي والجبن زين عشان الواحد ينام خفيف
ابو هادي ؛ من ثقلك وانا ابوك والله باقي شوي وتختفي تعال كل بس
شهد ؛ والله حلوه جربها
حمد ؛ خلوا حبيبكم يدبها انا مابيها
وابتسم هادي وهو مطنشه وقام بعد دقايق ؛ فاتتك ياحمد
حمد بصدمه ؛ وانت وش اكلت عشان يفوتني
ام هادي ؛ وشو خلصت ؟!
هادي ؛ الحمدلله والله يمه اني شبعت
ابو هادي ؛ اجلس يولد ماكلت شي
هادي وهو يروح يغسل ؛ بس والله
وسكتوا بأستغراب وكملوا عشاهم وهم كل شوي يقنعون حمد يجربها وهو مايحبها من وهو صغير
..........••..........
بيت ابو راشد
وقفت سيارة تركي ونزل والتفت لسيارة راشد اللي جايه ووقف وهو ينزل هو ومنيره وقال تركي ؛ سلامات يأم ناصر ماتشوفين شر
منيره تنحنحت ؛ الله يسلمك مانشوفه فيك
ودخل تركي وهو يروح للصاله وراشد راح مع منيره لقسمه
بالصاله
دخل تركي وهو يناظر الصاله اللي كلها العاب وحوسه ؛ يهييب ابك الرثعه هذي وش
وفز وهو يلف من اللعبه اللي حذفها خالد ؛ ورع
وناظر اميره اللي بجنبه وهي تاخذ اللعبه ؛ حقتي
ومشى عند امه وشريفه وعبير اللي بنص الصاله عبير ضحكت ؛ طلعوا العابهم بالصاله وحاسونا
تركي ؛ والبسه وينها تشغلهم
عبير ؛ بالسيب مع جوري
تركي ؛ اييه ترا ام ناصر جت
شريفه ؛ عاد زين ماحسوا اميره ومناير ولا عادي جوري تدري
تركي هز راسه وهو يناظر امه اللي ساكته وتنحنح وطلعت اروى ؛ يمه العشاء اس... ماشاء الله تركي هااا
تركي ناظرها ؛ هاه
اروى وهي تمشي له ؛ هوى يا عدوي ليش تمسطني بالشماغ العصر وش سويت ؟؟
تركي ضحك وهو يمسح راسه بوهقه ؛ اعلمك بعدين
اروى ضربت كتفه بخفه ؛ العشاء استوى قم خذه
وطلعت هاجر ؛ تركي نايف ماجا ؟
تركي ؛ لا تلقينه جاي بالطريق حطيتوا عشاكم ؟
اروى هزت راسها ب " لا " وقالت ام راشد ؛ اجل اصبري الين يجي ونح..
ناظرت هاجر اللي فزت ؛ بسسم الله ليتنا قايلين مليون
نايف عدل جاكيته بضحكة غرور ؛ جاك اللي يسوى مليون ، تسولفون عني ؟
تركي ؛ ارحححب اي والله تسوى ملايين
نايف ابتسم وهو يقرب ويجلس عنده ؛ البقى ياتريك شلونك
تركي وهو يحب خشمه ؛ كنت متضايق ويوم شفتك استبشرت
نايف ابتسم وقالت عبير ؛ سلامات وش مضيقك
تركي ناظر امه ؛ يقولون الأم تعرف وش في خاطر ولدها
شريفه كتمت ضحكتها وتنحنحت ام راشد ؛ ايه صدق تعرف وتعرف ان كانه يكذب ولا صادق
تركي ؛ اروى وين العشاء حطوه حطوه
وفز وهو يسحب نايف معه ووقفه نايف ؛ اصصبر يخوي بغير ملابسي واجي انتظرني
وراح لغرفته وتركي لحقه وقالت عبير ؛ علامهم ؟
ام راشد ؛ مدري عنهم ، ارروى ساعدي هاجر
ورجعت اروى اللي كانت واقفه للمطبخ وهي تحط العشاء مع هاجر
بغرفة نايف دخل وهو يناظر تركي اللي جا وراه ؛وش تبي
تركي ؛ هيه بقولك سالفه ان علمت عيسى يويلك
نايف وهو ينزل شماغه ؛ وش انت مسوي
تركي سكت لثواني وقال بتوتر ؛ قلت لأمي اني احب شموخ
نايف فز ورجع يطلع راسه من ثوبه اللي كان بينزله ؛ ابك ، يويلك انت صادق!
تركي ؛ والله اني حمار لاكن وش اسوي ان احتريت خطبتهم ماخطبت
نايف نزل ثوبه وهو يناظر تركي بصدمه ؛ وش قالت
تركي ؛ قالت اكلمهم الله يستر المشكله اني كذبت عليها وقلت سألت عزام
نايف ؛ وش سألته عنه !
تركي ؛ قلت اا .. انا قلت زايد بالغلط قالت وش دراك عن اسمه قلت سألت عزام وانا ماسألته وقلت هو كان يسولف بالمزرعه وقال زايد خطيب اختي
نايف سكت لثواني يستوعب وهو ياخذ ثوبه الثاني ويلبسه ؛ لا ماعليك ماتسأل ومن تسأل اصلاً ان كانها سألت اجحد ولا اذا كنت عندك بقول ايه قاله وبعدين يومنك تكذب ليه اهب هباك الله
تركي اخذ نفس بأرتباك ونايف لاحظ توتره ؛ يخوي خلاص ماعليك انا اضبطك خلنا نتعشى بس تراي جويع
تركي تأفف بتوتر وهو يطلع وتنهد نايف وهو يطلع وراه واخذوا العشاء وطلعوا للدوانيه ؛ السلام عليكم
ابو راشد وسعد ؛ وعليكم السلام
ابو راشد ؛ راشد ماجا ؟
نايف ؛ الا بروح اشوفه
وطلع من الدوانيه ليسار آخر الممر بقسم راشد وهو يدق الباب ؛ راشد ، راشد
راشد ؛ هلاا
نايف ؛ يلا العشاء تعال
راشد ؛ تعشوا اجي اجي
ورجع نايف للدوانيه وبعد دقايق طلع راشد وراح للدوانيه ومنيره دخلت وهي تشوف اروى وهاجر بالمطبخ وسكرت الباب وهي تنزل غطاها بتعب ؛ السلام
اروى وهاجر ؛ وعليكم السلام
هاجر ؛ منّو وش قالوا علامك ؟
منيره بضيق ؛ يختي كتمه تخف تخف
ودخلت للصاله وهي تسلم وجلست ونطت مناير تحضنها ؛ ماما
منيره ؛ هلا ياماما اجلسي اجلسي
ام راشد ؛ الحمدلله ع السلامه وش قالوا لك ؟
منيره تنهدت ؛ الله يسلمك اخذوا تحاليل تطلع بكره
عبير ؛ طيب وش فيك ؟
منيره ؛ كتتمه الله لايوريك اختنقت قسم بالله والغرفه مدري وش العطر اللي فيها غثتني ريحته
ام راشد وهي تلمس جبينها ؛ مافيك حراره يمكن ريحة العطر قويه تعبتك
منيره ؛ والله مدري لميت كل شي له ريحه عطور وكريمات وللحين باقيه
ام راشد ؛ ماعليك شر ان شاء الله كتبوا لك ادويه ؟
منيره ؛ لا لحد ماتطلع النتيجه ، وين جوري ؟
شريفه ؛ داخل تلعب مع البسه
بعد دقايق جو هاجر واروى بالعشاء وتجمعوا يتعشون
بعد العشاء دخل نايف للمطبخ وهو يحط الصحن وتنحنح وهو يدخل ؛ يمه
ام راشد ؛ هلا نايف
نايف ؛ ابوي نام وانا بدخل غرفتي انام بعد عشان الصباح اداوم ومصصدع وترا تركي والعيال بالدكه يبون شاهي
ام راشد ؛ خلاص نسوي رح نام وانا امك تصبح على خير
نايف وهو يروح لغرفته ؛ وانتي من اهله
وقامت عبير وهي تروح للمطبخ ؛ انا بسويه
بعد دقايق لحقوها اروى وهاجر بعد مالموا العشاء وراحوا للمطبخ وشريفه راحت غرفتها
ودخل راشد من باب الصاله ؛ السلام عليكم
ام راشد ومنيره ؛ وعليكم السلام
وجا راشد بيجلس وقامت منيره ؛ بروح اشوف البنات بالغرفه
وراحت للداخل وقالت ام راشد ؛ ياعمري يامنيره حتى ماتعشت زين ، ليه ماعطوها علاج ؟
راشد ؛ والله مدري قالوا الين ماتطلع نتيجة تحليلها ، نايف وينه ؟
ام راشد ؛ بغرفته راح ينام
وطلعت عبير بالشاهي وهي تشوف راشد ؛ هلا راشد شلونك
راشد ابتسم ؛ بخيير عساك طيبه
عبير وهي تمد له الصينيه ؛ والله بخير الحمدلله هذا الشاهي
اخذه راشد وهو يطلع وجت اروى بصينيتهم وقالت عبير ؛ وين شريفه ومنيره لايكون ناموا ؟
ام راشد ؛ والله شريفه الظاهر بس منيره دخلت تشوف بناتها
اروى ؛ يمه صحيني الفجر اذا قام ابوي وقبل لايروح بوصيه اغراض
ام راشد ؛ وش تبين ؟
اروى وهي تمد لها بياله ؛ اكتبهم واقولك ، سمي
وطلعت هاجر وهي جايبه حبّ وهي تجلس بالأرض وتغير القناه ؛ اروى الحين يبدا المسلسل صبي لي شاهي
وصبت لها اروى وهي تاخذ لها ولهاجر وهي تقوم وتجلس جنبها وتفصفص
وطلعت منيره وهي تجلس عندهم وصبت لها عبير شاي وكملت تتفرج معهم
بعد نص ساعه طلعت جوري وهي تنادي امها ؛ ماما اميره نامت
منيره ؛ وين
جوري ؛ لقيتها بغرفة جوجو واروى نايمه على الأرض
منيره تنهدت وقالت ام راشد ؛ اروى قومي شيليها ولا غطيها لاتبرد
منيره ؛ لا لا خلاص بننام جوري يلا انتي ومناير
ام راشد ؛ اجل توصلها اروى قومي يلا وخذي جلالك
اروى قامت ودخلت للغرف وجوري دخلت تجيب مناير ومنيره تاخذ اغراضهم وطلعت اروى وهي شايله اميره وجوري ومناير جو معها وقالت ام راشد ؛ اطلعوا من باب المطبخ عشان العيال بالدكه
منيره ؛ ابشري يلا تصبحون على خير
ام راشد وعبير وهاجر ؛ وانتي من اهله
وطلعت منيره وبناتها ومعها اروى ومشت لغرفتها وهي تفتح الباب وعقدت حواجبها بضيق ؛ اروى تكفين ريحة العطر خايسه ولا انا اشمها كذا الله يقلعه مدري وش ذا العطر
اروى ؛ بالعكس ريحة بخور تجنن
منيره حاولت تبقى بالغرفه شوي وحطت اروى اميره بفراشها وهي تلتفت لمنيره ؛ يلا ت... منييره شفيك ؟
وتأففت منيره وهي بتبكي ؛ بطلع والله كتمه جاني غثيان
ووقفت تهوي على نفسها وهي تطلع واروى ساكته بأستغراب ورجعت شالت اميره وهي تنادي جوري وجت معها هي ومناير وطلعت اروى وهي تسكر الباب ؛ خلاص تعالي نرجع
ودخلوا من باب المطبخ للصاله وناظروهم بأستغراب
ام راشد ؛ علامكم رجعتوا فيه احد ؟
اروى وهي تحط اميره على الكنب ؛ منيره تقول ريحة عطر مب زينه وعادي انا اشم بخور بس مدري
ناظروا بمنيره اللي ملامحها باكيه وفزت عبير ؛ منيره ؟؟
وجلست وهاجر جابت لها مويه وقالت ام راشد من شكت ؛ انتي تحسين بغثيان ؟
منيره هزت راسها بالأيجاب وهي تشرب مويه وابتسمت ام راشد بصدمه ؛ حامل ؟
منيره سكتت وهي تستوعب وضحكت عبير ؛ شششكلك والله
وهاجر واروى ضحكوا بصدمه وقالت منيره ؛ مدري المستشفى قالوا تطلع نتيجتك بكره!
ام راشد بأبتسامه ؛ شكلك حامل ياعمري عشان كذا كارهه ريحة العطر ، خلاص وش رايك تنامين هنا ؟
منيره ؛ ايه لأن الريحه من العصر عيت تروح
ام راشد ؛ اجل قومي ياهاجر جهزي لها الفرش ولا تحطين عطر
وضحكوا وقامت هاجر تجهز الغرفه لمنيره وبعد دقايق دخل راشد وهو يحط الصينيه وشاف اميره ؛ اووه نامت يلا يلا اجل
ام راشد ؛ بينامون هنا الغرفه تقول منيره كتمه خلها الليله تنام بالغرفه اللي داخل
راشد ناظر منيره بضحك ؛ والله يايمه من اليوم وهي تقول كتمه وريحة خايسه ومدري وش ، يبنت الحلال مافيه بالعكس عطر زين
ام راشد ضحكت ؛ لا ماعليه خلها الليله هنا وهي بعد تعبانه ناخذ البنات عنها
راشد ناظر منيره ورفعت كفها وهي مالها خلق تكلمه ؛ والله اقولك ريحه خايسه اذا راحت انام فيها بكره
راشد ضحك ؛ كيفك ، اجل بننام انا ونويصر بالدوانيه مع العيال
منيره وهي ماتناظره ؛ ايه طيب
وطلع راشد وضحكت عبير وهي ملاحظه اسلوب منيره وجت هاجر ؛ خلاص يمه جهزتها
ام راشد ؛ يمال العافيه ، يلا ياحبيبتي نامي وارتاحي والبنات عندي
هاجر واروى مع بعض ؛ وعندنا
وابتسمت منيره وهي تقوم وراحت للغرفه وقالت هاجر ؛ يمه نايف بغرفته اقومه يطس الدوانيه
ام راشد ؛ والله مدري .. لا خليه تدري منيره انه هنا وهو يقوم الفجر ويطلع
وابتسمت اروى ؛ يعني صدق حامل !
ام راشد ابتسمت ؛ ان شاء الله والله على نفسيتها والغثيان شكلها
عبير ضحكت ؛ نفسيتها صدق شكلها متوحمه على راشد تكلمه بدون نفس
وضحكوا وقامت ام راشد ؛ خليني انوم البنات ويلا اروى شيلي الصينيه انتي وهاجر واغسلوها وناموا
اروى ؛ طيب بس لاتنسيين تصحيني الفجر تكفين
ام راشد وهي تدخل للممر الغرف ؛ طيب يلا
وقامت عبير وراها وهاجر واروى راحوا للمطبخ
وبعد دقايق خلصوا وناظرت اروى من شباك المطبخ العيال اللي دخلوا الدوانيه وقفلوا اللمبات والتفتت لهاجر ؛ خلاص ناموا ماراح يبون شي انا بروح انام
هاجر ؛ حتى انا
وطلعوا لغرفتهم والكل نام وام راشد نومت عندها بنات منيره اللي نامت بغرفه لحالها
..........••..........
بيت ابو هادي
ابو هادي وام هادي ناموا وهادي بالصاله منسدح على الكنب وحمد بالمجلس يلعب وطلعت شهد من غرفتها وهي تناظر هادي ؛ هادي نايم ؟
هادي التفت ؛ ها لا صاحي ليه مانمتي ؟
شهد ؛ مافيني نوم حمد وينه ؟
هادي ؛ يلعب بالمجلس
وهزت راسها شهد وهي تروح للمجلس ودخلت وهي تشوف حمد مندمج باللعب وهي تجلس وتأشر له ؛ هيه حميّد
حمد وهو يناظر التلفزيون ؛ هاه
شهد ؛ بالله فيه ماسك للشعر سويته وبحطه عليك اذا فاد احطه بكره
حمد ؛ انقلعي برد ماني غاسله
شهد ؛ لا هو تغطيه وبكره تغسله يلا تكفى خلني احط لك
حمد ؛ والله تحوسيني ماني فاضي
شهد ؛ يلييل حمد انت العب وانا احط لك يلاااا
حمد ؛ طيب جيبي لي شاهي وهاتي حوستك وتعالي ومهو تقولين لف ولا نزل راسك من الحين اعلمك بكمل لعب
شهد فزت ؛ ابششر
وطلعت للصاله وصبت له كوب شاي وودته له ورجعت غرفتها تاخذ الماسك اللي جهزت وطلعت وناظرها هادي بأستغراب وهو يشوفها معديه للمجلس وبعدها طلعت للمطبخ ورجعت تركض وجلس وصب له شاي واخذ جواله
بالمجلس دخلت شهد وهي تحط السفره على كتف حمد وتعدلها ؛ هه وعشان لاتقول حستيني
حمد ؛ طيب اص
وضحكت شهد وهي تمشط شعره ؛ ماحلق ابوي معكم ليه ؟
حمد وهو للحين يلعب ؛ ماراح معنا رحت انا وهادي وعيال ابو راشد
شهد ؛ وليش قصيت شعرك كذا لو خليتني اقصه
حمد ؛ كله من نايف اشغلني طويل وطويل
شهد ؛ بالعكس اول احسن
حمد ؛ والله عاد قصيته ، ابك اذني وش جاها
شهد ضحكت وهي تمسحها ؛ ييوه طاح عليها شسوي اذنك كبيره كنها اذن فيل
حمد ؛ بالله ؟ اذلفي اذلفي مافيه
شهد ؛ امزح امزح والله بالغلط طاح عليك اسفه
حمد ؛ ناموا الباقين ؟
شهد ؛ اي بس هادي بالصاله منسدح
حمد ؛ وش يسوي
شهد ؛ مايسوي شي
حمد ؛ ليه ماحطيتي عليه وانتي مشغلتني
شهد ؛ ياخي تصدق اخاف منه هادي اخاف يصفقني اذا قلت له بحط لك ماسك اما انت متعود
حمد ؛ انا حمار اصلا على انك حرقتي وجهي السنه اللي راحت قبل العيد ومسلمك راسي الحين
شهد ؛ يلييل عاد ماكان حرق بس صار احمر شوي والحمدلله اني ماحطيت بس كان هذا الشي الوحيد اللي نكبتك فيه من بعدها صرت تمام
حمد ؛ طيب وشو هذا الماسك وش يسوي
شهد ؛ مدري انا خلطت مكونات تفيد الشعر وبشوف نتيجته
حمد ؛ اهب انتي وخلطك ، وراك وراك يمال الحول
شهد ضحكت وهي تشوفه يهاوش ويلعب وكملت تحط على شعره ومن خلصت وهي تغطيه وضربت راسه بخفه ؛ خلصنا ياحمّود والله انك اخو مافيه مثلك
حمد ؛ كم ساعه اخليه
شهد تنحنحت ؛ شف انا اقول ترا مالي دخل لو نتف شعرك لأنك بتخليه ليله كامله والخلطات اللي حطيتها بعضها ماتبقى اكثر من ٤ ساعات انا اقول احسن شي ساعتين وتغسله وعادي بمويه دافيه وانشفه لك بسرعه
حمد التفت لها ؛ حسسبي على عدوك انا ادري انك نكبه تبينها تجيني جلطه واموت بالبرد
شهد ؛ لا بسم الله عليك بس مويه دافييه يبن الحلال وانشفه على طول
حمد ؛ كم اخليه طيب ؟
شهد ؛ ساعتين واغسله
حمد ؛ وكم الساعه الحين
شهد وهي تشوف ساعتها ؛ جت ١٠ الساعه ١٢ بالضبط تغسله
حمد ؛ وان خمدتي ياويلك عشان تنشفينه ولا ترا بحطه على شوشتك وانتي نايمه وانتفها
شهد ضحكت وهي تلم اغراضها ؛ لا لا ماعليك برتب دولابي الين تجي ١٢
وطلعت وحمد للحين يلعب ومكمل ..
بغرفة هادي
اللي دخل من شاف مساعد يدق عليه وهو يسكر الباب ورد ؛ هلا مساعد
مساعد ابتسم ؛ هلا ومسهلا صاحي ؟
هادي ؛ ايه والله صاحي وش اخبارك
مساعد ؛ بخيير الحمدلله وينك قطعت
هادي وهو يسند ظهره ع السرير ؛ والله موجود انت اللي مختفي
مساعد ؛ لا والله بس اني هالأسبوع بنشغل مع اهل عمي بس اني ادق لو ماشفتك
هادي ؛ معذور وانا اخوك وانا اخاف ادق عليك وتطلع مشغول
مساعد ضحك ؛ لا ماعليك ، المهم كلمت مسفر قبل شوي يقول فهد ولد ابو سلطان خطب وهادي ماخطب للحين ؟ وطريت علي قلت ادق عليه واشوفه
هادي ؛ الله يتمم له على خير ، خل مسفر يتزوج بعدين يسأل عني بس مادق علي
مساعد ؛ منشغل والله بداومه انا اللي دقيت عليه ويقول ان شاء الله يخطب قريب المهم انت هذا انت جيت للديره ورا ماتخطبها ؟
هادي سكت لثواني بقهر وهو يتنهد ؛ هونت
مساعد بصدمه ؛ تتمزح ! وين اللي مشغلنا من شهور يقول ابيها وابيها ، " وكمل بضحك " ولا لقيت احسن منها
هادي ؛ لا هي لقت
مساعد سكت بأستغراب وبعد صمت لثواني قال هادي ؛ لقت احسن مني يامساعد وانخطبت ووافقت عليه
مساعد بذهول ؛ وششو !!! تستهبل ! وخليتها كذا خلاص !
هادي ؛ ماخليتها يوم دريت كلمتها وسألتها ليه وليتني ماسألتها يامساعد وليتني مادريت انها انخطبت اصلاً
مساعد وهو يحاول يستوعب ؛ ولد ! متى دريت وش صار علمني السالفه من اولها
هادي تنهد ؛ يوم الأربعاء بالليل ..... وكمل يقول له السالفه كلها من لما درا من امه لحد مارجع الفجر
ومساعد ماسك راسه بصدمه ومن قال له هادي وهو يتنحنح ؛ وهذي السالفه وانا ماهمتني خلها معه غيرها عشر !
مساعد ؛ لا لا والله مستحيل والله انك تمزح ! سلامات انت ماتقول تحبني واحبها كيف تروح كذا وتخليها ليه ماقلت لحاتم بخطبها وهي تشوف مهو سبب مقنع ياهادي يا انك تستهبل يا انها تكذب وقالت لك كذا من زعلها عليك اما انك تستسلم خلاص انخطبت تخليها ليه وين اللي كان يسولف عنها ويتغنى بأسمها وهي لو تكرهك ماكلمتك اصلاً انت تذكر اول يوم تشوفها وتكلمها وتجيني والأبتسامه شاقه وجهك ومسفهل وخاطرك مستبشر من كثر ماتحبها انا متأكد ان فيه شي حدها تسوي كذا ويدك صار فيها كذا من قهرك وانا ناسي اسألك بس صدقني انها ماسوت كذا من عبث كلمها مره ثانيه لاتروح منك والله اني ادري انك تحبها لا تظلم نفسك وتظلمها
هادي بقهر ؛ والله كلمتها وكل اللي راح قالت لي انساه ماصار شي كانت تكذب وتقول اني مابيك من اول الا عشان ... وسكت وهو ياخذ نفس بقهر وقال مساعد ؛ عشان وش !
هادي ؛ عشان فلوس والله يامساعد اني ماصدقتها لاكن هذا الصدق ووافقت على واحد ضابط
مساعد ؛ مسستحيل ! ياهادي يمكن .. يمكن خافت انك نسيتها وتبي تخوفك ت.... قاطعه هادي ؛ لا صدق ووافقت عليه خلها يامساعد خلاص والله اني كرهتها
مساعد ؛ هادي انت تحبها ووالله اني متأكد انك تحبها ولا نسيتها وهي ب.. هادي بقهر وهو تحشرج صوته من فرط قهره ؛ لا مو هي بعد !! انا كنت احبها كنت يامساعد وهي لا ماتحبني وانا نسيتها ولا همتني
مساعد بهدوء ؛ اسمعني بس انا قول نكلمهم انا وابوك وماعليك انا متأكد انها بتوافق بس صدقني هي خايفه انك نسيتها
هادي ؛ والله واللي رفع سبع اني بعد كلامها ذيك الليله ما اخذها لو تحلف على المصحف انها تمزح
مساعد ؛ وبتخليها تتزوج وتروح ؟ هادي !! انت تحبها
هادي تنهد ؛ مساعد كنت الحين ما اشيل لها بقلبي الا الكره ولا باقي من حبها شي اللي اصلاً ماكان
مساعد تردد بس قال ؛ اسوارتها ؟ والاغاني والعيد ؟ هادي تذكر يوم تدق تقول كلمتها وعايدتها وصوتك والله ياذاك اليوم اني مانسيت رجفة فرحته اذكر وجهك شلون مستبشر ومبتسم وسوالفك اللي ماينمل منها اذكر ضحكتك يوم تروق لاكن يوم شفتك الجمعه وشفت وجهك ذاابل ياهادي مافيه لون قلت من تعب يده وقلت من وش يده لاكن والله ماقدرت ادق الا الحين ويطلع كل هذا صاير ؟ ليه ماقلت لي لو دقيت علي ليلتها وقلت لي اروح معك كان ماقالت كلامها كان اقنعتها انا لو تبي تركي صح انه ماسوى شي لاكن درى على اني اعرفه والنعم فيه بس المفروض ماتقول له السالفه تركي ان ماقال لنايف بيقول لعيسى انا اعرفهم كل شي يقولونه لبعض واعرف انهم قريبين لبعض يمكن يقول لهم ياهادي !
هادي ؛ لا تركي واثق فيه على اني تو عرفته لاكن يحفظ السر ولا هو بقايل لحد لا نايف ولا عيسى ولا راشد ولا ابوه ولا اي احد ماعليك
مساعد ؛ المهم موضوعنا بنت عمك هادي انا ادري انك تحبها لاتخليها اخطبها ولو رفضت حزتها نتأكد
هادي بعصبيه ؛ وش نتأكد منه !! تأكدنا يامساعد واللي ابي اعرفه عرفته اول تقول انها تحبني والحين قالت كله كذب حتى بالعيد كذب والأغاني وكملناها واسوارتها ورجعت لها وماعاد باقي لها عندي شي لا حب ولا غيره
مساعد ؛ اجل دامه كذا وهي تكرهك انا اقول نقلبها عليها وتقهرها مثل ماقهرتك
هادي سكت لثواني ؛ شلو.... لا لا يامساعد ماني مثلها والله ول....قاطعه مساعد ؛ اسمعني ، قبل لاتتزوج هي تزوج انت وبتنساها مره وحده
هادي ؛ وشش ! لا والله ماطرا انا كرهت الحب وساعته وطاريه تبيني ابلي عمري
مساعد بقهر ؛ انت بتضيع عمرك ان ماتزوجت ماراح تنساها وهي بتنساك وانت للحين متندم على الساعه اللي حبيتها فيها
هادي ؛ لا ماضاع من عمري شي انا بكمله وبعيش حياتي مثل اول لاتغير شي ولا راح شي
مساعد ؛ تعيش حياتك مثل اول ؟ ماكنت اول تقول عايش على صوتها وطاريها و... قاطعه هادي اللي هالمره صرخ بقهر ؛ لاتذكرني ! انا ناسي يامساعد لاتذكرني اقولك نسيتها لاتذكرني تكفى
مساعد سكت وهو يسمع دق الباب عند هادي اللي قام وهو يحطه كتم وفتح الباب وكانت شهد واقفه بخوف ؛ هادي فيك شي !
هادي اخذ نفس بتنهيده ؛ لا لا روحي نامي مافيني شي
ناظرته شهد لثواني وهي تشوف عيونه فوق ماهي ناعسه مرتخيه اكثر بتعب ووجه احمر وتنحنح بهدوء ؛ روحي نامي خلاص!
شهد هزت راسها بخوف وهي ترجع غرفتها وسكر هادي الباب وهو يرجع يكلم مساعد ؛ تسمعني !
مساعد تنهد ؛ اسمعك
هادي ؛ طاريها ماعاد بجيبه لا انا ولا انت وبنساها وبنسى اهلها بس لاتطريها يامساعد خلاص
مساعد ؛ طيب بس صدقني لو تزوجت حزتها بتاخذ حقك منها وتوريها انك نسيتها صدق !
هادي ؛ مهو لازم اوريها اني نسيتها انا بقنع نفسي والباقي مايهم
مساعد ؛ شفت ! بتقنع نفسك يعني انت للحين تبيها هادي اذا انت ماتبيها ابد تزوج وبتنساها صدق
هادي تنهد وهو يسمعه يقنعه ويعيد عليه الموضوع ومالقى حل الا انه يماشيه ؛ طيب بفكر واشوف
مساعد ابتسم ؛ ايه هذا هادي فكر وصدقني انه احسن حل لاتخلي عمرك يروح وان شاء الله تتزوج انت وفهد قريب ومسفر نقنعه
هادي ؛ ان شاء الله طيب
مساعد ؛ يلا اجل بقفل وان قدرت بمركم بكره ان شاء الله
هادي ؛ ان شاء الله
مساعد ؛ وانتبه لنفسك ولاتتعبها يلا تصبح على خير
هادي ؛ وانت من اهله
وقفل مساعد وهادي حذف جواله على طرف وهو يوقف وياخذ نفس وناظر المرايه وهو يشوف وجهه اللي باهت ومسحه بضيق وهو يفرش سجادته وصلى ركعتين وهو يدعي بكل اللي بقلبه لحد ماحس ان ضيقته خفّت ومن خلص وهو يسلم وطفى النور وانسدح ينام ..
بعد دقايق طلعت شهد من غرفتها وهي للحين خايفه على هادي وتحس ان فيه شي من وجهه ودخلت للمجلس وهي تشوف حمد باقي
شهد بصدمه ؛ حمد سلامات ٣ ساعات عليه ماتعبت !
حمد ؛ الحين بقوم كم الساعه
شهد ؛ جت ١٢ قم اغسله يلا بنام
حمد وهو يحط يد السوني ؛ ان احترق شعري يويلك
شهد ؛ يلييل منك من زينه قم
حمد قام وهو يطلع ؛ هين هين
وضحكت شهد وهي تطلع للصاله وجلست تتفرج على جوالها لحد مايخلص حمد
بعد ربع ساعه ..
طلع حمد وهو ينشف شعره وفزت شهد ؛ هاا اشووف
حمد وهو يدخل غرفته ؛ الله يستر
وضحكت شهد وهي تدخل وراه وجلس حمد قدام المرايه وهو يبعد المنشفه عن شعره ويمسحه وشهقت شهد ؛ الله !
حمد وهو يخلل شعر بيده ويناظره بالمرايه ؛ صار ناعم كأني هندي .. اخص ويلمع بعد
شهد وهي تلف حواليه وتشوف شعره ؛ ورربي يهبل !! لمعته تجنن وصار ناعم بروح احط
حمد ؛ نشفيه اول شي راسي ثلج
شهد ضحكت وهي تركض لغرفتها وجابت الأستشوار ورجعت وهي تسكر الباب وحمد يمشط شعره ؛ وشو اللي حاطه
شهد وهي تشبك الأستشوار ؛ كريمات وزيوت للشعر خلطتهم وقلت اجرب بس طلع شي شييي
وكملت تشوف شعر حمد وهي منهاره على لمعته وكيف صار ناعم وبدت تنشفه وهي مبتسمه بصدمه ومن خلصت وهي تلعب بشعره بضحك ؛ والله خلاص بعتمد هاللخلطه واسويها
حمد ؛ وسويلي معك ... يلا يلا بخمد شكراً ماقصرتي
شهد ضحكت ؛ يلا تصبح على خير
وابتسم حمد وسكرت شهد الباب ونط حمد على سرير وهو يغط بنووومه
اما شهد راحت وحطت خلطتها بالثلاجه بعد ماغطتها وهي تشوف السوني شغال بالمجلس وجلست تحاول تلعب لدقايق وماعرفت وهي تطفيه وراحت لغرفتها تنام
..........••..........
من بكره الفجر
في بيت ابو راشد
بالدوانيه كانوا العيال صاحين ويجهزون عشان يروحون المسجد وداخل ام راشد اللي صحت اروى وهي تجهز لهم الفطور ودخلت اروى وهي تساعدها وبعد دقايق دخل راشد ؛ السلام عليكم
ام راشد واروى ؛ وعليكم السلام
راشد قرب وهو يبوس راس امه ؛ صباح الخير ، شلونك يمه
ام راشد ابتسمت ؛ صباح النور ياهلا بخير الحمدلله
اروى ضحكت ؛ وانا طيب مافيه شلونك !
راشد ضحك ؛ شلونها ام لسانين
اروى وهي تمثل الزعل ؛ افاا خلاص زعلت
راشد بضحك ؛ لا لا خلاص شلونها اصغر العنقود
اروى بأبتسامه ؛ ايه كذا ، بخير الحمدلله .. بسألك بتروح الرياض مع ابوي بعد شوي ؟
راشد ؛ والله مدري لازم نروح المستشفى الساعه ٩ عشان نشوف تحاليل منيره بس يمكن اخليه العصر واروح مع ابوي وسعد بس تركي بيخليه ابوي يمسك المحل
ام راشد ؛ لا لا وانا امك رح للمستشفى عشان يصرفون لمنيره علاج ماعطوها امس وهي تعبانه يكفي سعد ولا خل تركي يروح وانت رح المحل بعد ماتجي انت ومنيره
راشد تنهد ؛ والله مدري هي وينها نايمه ؟
ام راشد ؛ ايه خلها ترتاح وانت قل لأبوك ياخذ تركي
راشد ؛ ان شاء الله اشوف توها القهوه ؟
ام راشد وهي تحطها بالصينيه ؛ لا خلاص جهزت ، اروى هاتي التمريه
وجابتها اروى وهي تحطها واخذ راشد القهوه وراح الدوانيه
بعد دقايق طلعت اروى للصاله وهي تاخذ ورقه وتكتب وصحت عبير وجت وهي تشوف اروى بالصاله ؛ صباح الخير
اروى ؛ صباح النور
عبير جلست وهي تناظر الورقه ؛ وش تكتبين ؟
اروى ناظرتها ؛ اسمعي راشد ما اتوقع يروح مع ابوي الرياض بيودي منيره المستشفى وتركي بيمسك المحل ونايف بدوامه
عبير تربعت وهي تحط الوساده بحضنها ؛ والمطلوب ؟
اروى ؛ المطلوب اكل للقطوه بكتبه بالورقه واعطيها ابوي مايعرف له بس انتي قولي لسعد يدله على المكان اللي يبيعونه عاد مدري وين يلقاه
عبير ضحكت ؛ يييوه والله انك فاضيه خلاص اقول له امي بالمطبخ ؟
اروى هزت راسها وهي تكمل تكتب وقالت عبير ؛ ماقاموا الباقين ؟
اروى ؛ الا ابوي والعيال بس البنات للحين
هزت راسها عبير وهي تقوم وتروح للمطبخ تساعد امها وماهي الا دقايق ولحقتها اروى وعلى دخلتها سمعت عبير اللي قالت ؛ عاد يقول نروح اليوم ولا بكره
اروى شهقت ؛ من من ؟ من اللي بيروح !
عبير التفتت بضحكه وقالت ام راشد ؛ علامك رجالها عنده شغل ماهم فاضين الناس وعشان لارجعوا بالتمايم تجي معهم حصه " ام سعد " وابو سعد
اروى بقهر ؛ سلامات عبير انثبري هنا الين التمايم وهو يروح لشغله واذا رجع يجون معه
عبير ؛ يبنت مقدر فيه اغراض ابيها واللبس اللي بلبسه بالتمايم بالبيت
اروى ؛ يجيبهم معه
عبير ؛ والله قش وش كثره اذا رجعت اقعد عندكم شهر واخليه يرجع تبوك
ام راشد ؛ اخسريها هذي ماتسكت
اروى بصدمه ؛ ييمه
ام راشد بقروشه ؛ تعالي ساعدينا بس ولا صحي هاجر
اروى بزعل وهي تطلع ؛ ماراح اصحيها وبرجع انام
وراحت وضحكت عبير ؛ ياعمري بس عاد وش اسوي لازم اروح
ام راشد ؛ بس هي تطفش لارحتوا ماعليها تصيح شوي وتسكت مثلها يوم راحو شموخ وام عزام
وهزت عبير راسها بضحك وكملوا يجهزون الفطور ..
بعد نص ساعه راحوا فيها ابو راشد والعيال من المسجد ورجعوا دخلوا تركي ونايف ياخذون فطورهم وكانت هاجر والصغار صاحين واخذ تركي الصينيه وقال بأستغراب ؛ اروى نايمه ؟
هاجر ؛ لا بالغرفه
وهز راسه وطلع ورا نايف وهاجر طلعت للصاله وجلست تفطر مع ام راشد وعبير والصغار
ام راشد ؛ عطيتيهم الفطور ؟
هاجر ؛ ايه اخذوه
ام راشد ؛ اروى نايمه ولا وين راحت
هاجر ؛ منفسه قومتني وهي تهاوش وانسدحت
عبير ضحكت وهي تقوم ؛ بروح اشوفها ابوي بيروح وهي تبي توصيه
وراحت للغرف وهي تدخل الغرفه وشافت اروى جالسه على الأرض وتلعب مع قطوتها اللي عندها
عبير كتمت ضحكتها وهي تشوف اروى تصد بزعل ؛ تعالي افطري
اروى ؛ مابيه
عبير ؛ ترا ابوي راح
اروى شهقت وضحكت عبير ؛ امزح قومي بيروح الحقي عليه
اروى ؛ ايه زين روحي
عبير ؛ يابنت عاد فكيها وش ذا الزعل عشان قلت بروح " وضحكت بغرور وهي تبعد شعرها " اف لهدرجه تحبيني
اروى صدت بأبتسامه تخفيها وضحكت عبير ؛ شفتك شفتك تضحكين ويعنني زعلانه ها اقول قومي بس
اروى تأففت وهي تقوم وطلعت ولحقتها عبير وهي تضحك وطلعوا للصاله وكملوا فطورهم
بعد دقايق قامت اروى وقالت ام راشد ؛ افطري
اروى ؛ شوي بشوف ابوي راح ولا لا
ام راشد ؛ ماهو رايح ماعليك شوي واصلاً بيدخل ياخذ اغراضه
اروى وهي تروح المطبخ ؛ بشوف
ودخلت وهي تناظر مع الشباك للدوانيه وبابها وشافت انه موجود وشافت تركي اللي طلع وجاي للمطبخ وهي توقف تنتظره ودخل وهو يغني بخفوت ؛
والله إني في محيا وجهك الطاهر اماري
وكل زين يمرني عقبك اصده و اتعدا
في محطات العمر ما كنت من ضمن إختياري
القدر جابك وأنا ممنون للأقدار جدا
ياحبيبي واغل...
فز وهو يناظر اروى اللي ضحكت وهي تشوفه منشغل بكم ثوبه ويغني ولا انتبه له وكملت تغني معه وهي تطق بخفه ع الدولاب ؛
واغلب العشاق من بايع وشاري
يوم انا من كثر ماني واثقٍ فيك اتحدا
تركي ضحك بفشله ؛ وش تبين انتي !
اروى بضحك ؛ بغني معك وش هالمشاعر اللي مع ذا الصباح
تركي بضحك ؛ والله عاد تعرفينها ، كم الثوب احترق بسوي النار واحرقه الجمر
اروى ضحكت ؛ ايه منت مع النار والجمر تغني
تركي ابتسم وقالت اروى ؛ تكفى قل لأبوي انك بتروح معه الرياض بوصيك
تركي ؛ ايه بروح معه اصلاً ليه وش تبين ؟
اروى ابتسمت وهي تدق كتفه بخفه ؛ عششت والله ياتروك اسمع هات اكل للبسه حرام مدري وش اعطيها
تركي استند على الرف ؛ اما عاد لها اكل خاص بعد
اروى ؛ ايه ولاتاخذ لها اكبر من ٦ شهور لأنها اصغر
تركي ؛ بعد ؟ اقول بدخل اغير ثوبي فيه احد
اروى بقهر ؛ تركي تكفى والله صادقه
تركي ؛ خلاص يبنت الحلال اجيب ابدخل
ومشت اروى وهي تطلع للصاله ؛ يمه تركي بيدخل
ام راشد ؛ شوفي منيره اذا بالغرفه خليه يدخل
وراحت اروى للغرف وتركي دخل للصاله ؛ صبحهم بالخيير
الكل ؛ صباح النور
ام راشد ؛ متى يروح ابوك
تركي ؛ شويات وبروح معه
ام راشد ؛ وراشد ؟
تركي ؛ لا يقول ام ناصر عندها موعد مدري وشو وقال ابوي رح معي اجل انت وسعد
ام راشد هزت راسها وطلعت اروى ؛ خلاص تركي ادخل
وراح تركي لغرفته يبدل وبعد دقايق دخل ابو راشد واخذ اغراضه وطلع هو وتركي وسعد وركبوا مع ابو راشد بسيارته وحركوا للرياض
ودخل راشد للصاله ومعه ناصر وعبدالله وجلس راشد وهو يتلفت ؛ منيره نايمه للحين ؟
ام راشد ؛ ايه خلها تريح ، نايف وينه ؟
راشد وهو يصب له شاي ؛ بالدوانيه يشيل الفطور
ورجع يستند على الكنب وهو يتفرج على التلفزيون مع الصغار اللي كانوا متسدحين حوله
بعد دقايق دخل نايف للمطبخ وفيه هاجر تغسل صحون ؛ هه غسلي هذي بعد
هاجر ؛ والله عاد هذي تاخذها اروى ماني غاسلتها
نايف خبط كتفها بخفه ؛ والله مايغسلها الا انتي
وتنحنح وهو يدخل للصاله ؛ راشد
راشد ؛ هاا تعال
نايف وقف عنده وهو يشد على فروته ؛ بتروح للمحل اليوم ؟
راشد ؛ والله مدري لا يمكن
ام راشد ؛ العمال فيه وابوكم والعيال يجون قبل الظهر ان شاء الله مايحتاج خلو العمال يستلمونه
نايف جلس ؛ اجل يمديني اروح المزرعه باقي ساعتين على الدوام
راشد ؛ ايييه طفشان انت اجل خذ ناصر وعبدالله معك
نايف ضحك ؛ لا هونت ان مشيت من المزرعه بروح الدوام على طول ماني فاضي ارجعهم خلنا قاعدين بس
وضحك راشد وجلس نايف وهو يتقهوى معه ..
بعد ساعتين قضوها عند التلفزيون والدفايه والسوالف والقهوه راح نايف لدوامه وراشد بسيارته ينتظر منيره اللي كانت بالصاله ووقفت وهي تعدل طرحتها ؛ عمه تكفين انتبهي لهم مانتأخر ان شاء الله
ام راشد ؛ عندي ياحبيبتي ماعليك روحي
وطلعت منيره وركبت السياره وحركوا للمستشفى
وعيالها بقوا عند ام راشد والبنات وكانوا هاجر واروى يلعبون مع ناصر وعبدالله والصغار
جوري ؛ انا بعد وانتوا اندسوا
عبدالله ؛ لا انتي تغشين انا وناصر بنعد
اروى ؛ خليهم يعدون وحنا بنندس بمكان مايلقونا فيه يلا يلا
وراحوا ناصر وعبدالله يعدون والباقين كلهم توزعوا يتخبون وعبير كانت بغرفتها ومافيه بالصاله الا ام راشد وشريفه والتفتت ام راشد ؛ بتدقين على عزام الحين ؟
شريفه ؛ ييوه ناسيته يلا بدق
ام راشد ؛ قومي قومي الغرفه عن صجة الورعان
وقامت شريفه وراحت مع امها لغرفتها وهي تسكر الباب وحطت العنود وهي تلتفت لأمها ؛ وش اقوله
ام راشد ؛ اسألي بس بدون لاتشككينه يعني اول شي قولي وش اخبار شموخ ووش صار على خطبتها اي شي بس انه لايشك
شريفه وهي تدق ؛ يلا عسى مو نايم ولا بدوامه
ام راشد ؛ لا ان شاء الله وارفعي الصوت
شريفه تنحنحت ؛ ها لا اذا كلمته عن شموخ احطه سبيكر اول شي اصبري
ام راشد ؛ ابك ليه ماعليك ح... اشرت لها شريفه انه رد وسكتت ام راشد وقالت شريفه ؛ الو السلام
ام راشد اشرت لها تحطه سبيكر وشريفه كاتمه ضحكتها وتأشر لها شوي ؛ ... صباح النور اخبارك ؟ ... الحمدلله زينه
وحطته سبيكر وهي بتنفجر من الضحك من قرصتها ام راشد وهي تسمع عزام يقول ؛ وحبيبة ابوها وش اخبارها
شريفه ابتسمت ؛ بخير الحمدلله اا اخبار عمتي ان شاء الله طيبه
عزام ؛ والله بخيير مشتاقين لك انتي وعنوده
شريفه ابتسمت ؛ اييه .. وشموخه كيفها والله اشتقت لها
عزام ؛ شموخه بخير حتى هي مشتاقه لك وكل شوي متى نروح الديره ونبي نروح الديره
ام راشد ابتسمت بصدمه وهي ماتذكرت الا كلمة تركي اللي تتردد عليها لما قال " لأنها هي بعد تحبني "
شريفه ضحكت ؛ ياعمريي شكلها حبتها
عزام ؛ اوووه الا حبتها وزود مغير تسولف عن السوق والجو والناس
شريفه ابتسمت ؛ ياحبيبتي ، الا بسألك وش صار على خطبتها ؟
عزام ؛ ابد والله
شريفه ؛ ماكلموكم ولا رديتوا لهم خبر ؟
عزام ؛ لا ولا طقيت لهم بعد خلهم يبونها يجون يقولون مايحترون اكلمهم اقول تعالوا املكوا على اختي
شريفه ؛ وبتخلونهم كذا
عزام ؛ والله عاد يبونها يجون يقولون نبيها ويخطبون ويملكون مثل الاوادم ماني حاذف شموخ ولا داق على عمي اقول خذها لولدك
شريفه ؛ وشموخ وش تقول ؟ وعمتي ؟
عزام ؛ ماقالوا شي بس والله اني افكر اكلمهم بس ماودي اضيق خاطر شموخ وهي ماتداني طاريهم ، اقولك شي ؟
ام راشد تسمع بصدمه وقالت شريفه بأستغراب ؛ وش ؟
عزام ؛ واحد من اخوياي كلمني يبي يخطب وانا والله اني اشوفه ابرك من زايد لو اكلم شموخ واشاورها فيه
ام راشد اشرت بتوتر وهي ماتدري ليش خافت تروح شموخ وشريفه تلعثمت وهي تتنحنح ؛ لا لا انا اقول هي دام ماتداني طاريهم اكيد لو قلت لها عن خويك بتوافق عشان لاتاخذ زايد حتى لو ماتدري عن الرجال واقول تسألها هي تبي زايد ولا لا وانت عاد رد لهم خبر بأيه ولا لا وانت اكيد ماترضى شموخ تاخذه غصب
عزام ؛ يعقب لو علي والله ماعطيته بس مدري عن شموخ بشوفها واكلمها ماعليك انتي بس سولفي لي
اخبارك انتي وعنوده عساها ماهي متعبه عمتي ولا متعبتك
شريفه ضحكت ؛ والله تزعج شوي بس عسل
عزام ؛ ياحبيبتي ، المهم انا بقفل وصلت الدوام وسلمي لي على عمتي وعمي
شريفه ؛ ان شاء الله يوصل
وودعها عزام وقفلت وهي تلتفت لأم راشد ؛ ها يمه وش بتسوين ؟
ام راشد صفقت كف بكف ؛ والله ماخذت لاحق ولا باطل لاقال وافقنا ولا قال رفضنا وش تبيني اسوي
شريفه ؛ اخاف ياخذها خويه
ام راشد ؛ لا ان شاء الله انتي ارجعي كلميه بعد بكره وشوفي اذا كلمهم وافقوا ولا لا
شريفه ؛ لا عاد والله خليه هو يدق
ام راشد وهي تضرب كتفها بخفه ؛ والله ان تدقين ماتموتين ان دقيتي ماله دخل يدق وادق وثقل
شريفه ؛ الا يدق ليه عادي ولا انتي دقي على عمتي
ام راشد ؛ لا والله ؟ وش اقول رفضتوا وش دخلني ؟
شريفه تنهدت ؛ ييوه نسيت اسأله هو بشقتنا ولا ببيت عمتي تلقينه حايس الدنيا اذا هو ببيتنا
ام راشد ؛ اسأليه بعد بكره
شريفه ضحكت ؛ لا والله ؟
ام راشد وهي تقوم ؛ ايه يلا بقوم اشوف الورعان عاد لاخليتهم مع اروى وهاجر الله يستر
ضحكت شريفه وهي تقوم وطلعت ام راشد للصاله وشريفه مشت لغرفة عبير وهي تدخل ؛ عبيروه
عبير وهي ترتب اغراضها ؛ همم
شريفه ؛ بتروحين اليوم ولا بكره ؟
عبير ؛ والله مدري بس يمكن بكره
شريفه وهي تجلس على سريرها وتحط العنود عندها ؛ لو تبوك قريبه كان قلت لك تعالي قبل التمايم
عبير ؛ اي والله وش نسوي انا يالله اجي على التمايم وسعد يبيه عمي يساعده بالسوق وعمال واوراق وشغل وش كثره مايقدر يوديني ويرجعني ويرجع
شريفه ؛ عاد انا بعد التمايم ارجع الجبيل مع عزام وعمتي وشموخ يعني ماش مقدر اجلس معك
عبير ضحكت ؛ ناقعتن عندك لي اسبوعين يمديك طفشتي مني
شريفه ابتسمت ؛ لا والله يازينها معك
عبير بأبتسامه ؛ يازينك انتي ، الا وش بتسوين بالتمايم وش بتلبسين
وجلست شريفه تسولف لها وعبير تسمعها وترتب ...
بالصاله كانوا يتراكضون وام راشد بالنص على الكنب ويحومون حولها وقالت بعصبيه ؛ بس بس اجلسوا صدعتوني الله يصلحكم اجلسوا ، ام لسانين تعالي حطي لهم شي يتابعونه
اروى جت وهي تضحك وتاخذ نفس ؛ شدخلني يمه هم يبون ، تعالوا شوفو شوفو وش جا
وتجمعوا البزارين عند التلفزيون ووقفت هاجر وهي تعدل شعرها وقالت ام راشد ؛ دام فيك نشاط انتي وياها روحوا اغسلوا الأسياب حقات الحوش وصخه ومغبره والعيال ماهم فيه ماعندكم عذر
هاجر تنهدت بتعب ؛ لا يمه نظيفه تكفين
ام راشد ؛ والله انها وصخه وغبار وتراب اخلصوا اشطفوها ماتاخذ منكم نص ساعه والجو غيم يلا اعجلوا
اروى ؛ امشي هاجر نخلص بسرعه انا فيني طاقه
هاجر جلست ؛ فيك طاقه اغسليها لحالك
ام راشد بحده ؛ اقول فزي معها بسرعه
وقامت هاجر بسرعه وهي تدخل للمطبخ ولحقتها اروى وهي تضحك ورجعت نادت ام راشد ؛ تعالي تعالي
هاجر واروى التفتوا وقالت ام راشد ؛ وحده تجي تدق على سعود ولد اختي فهده الله يرحمها
وجت هاجر ولحقتها اروى ؛ ييوه يمه هم وين راحوا
ام راشد ؛ ماراحو بسم الله عليهم بس عند ابوهم بالدمام خليني اكلمهم اشوف اخبارهم مبطيه عنهم
وجلست هاجر تدور اسمه واروى واقفه عندها وقالت ام راشد ؛ روحي انتي تلحقك هاجر
اروى ؛ اا بس شوي الحين يمكن ماتلقى رقمه
وتنهدت ام راشد وقالت هاجر ؛ هذا هو سعود
ودقت عليه وحطت اروى سبيكر قبل تمد هاجر الجوال لأمها ورد ؛ هلا ومرحبا
ام راشد اشرت لهاجر واروى بتهديد عشانهم حطوه سبيكر وتأشر لهم يقفلونه وهي ماتعرف وابتسمت ؛ ههلا فيك يامرحبا صبحك الله بالخير
سعود " ولد اختها فهده اللي توفت عنده اخو بس وساكنين بالدمام عند ابوهم اللي تزوج بعد ماتوفت امهم وعمره ٣٨ واخوه مشعل ٣٦ " ؛ ياصباح النور والسرور ياخاله وش علومك طيبه ؟
ام راشد بأبتسامه وهي تقرص هاجر واروى على حركتهم وهم يتسمعون ؛ والله بخيير وش اخبارك وش اخبار مشعل وعيالكم عساكم بخير
ومشت لغرفتها وهي تصفق الباب بوجه هاجر واروى اللي لحقوها وجلست بغرفتها وهي تكلمه وقالت اروى ؛ ياعمري هم من يوم ماتوفت خالتي ماعاد جو
هاجر ؛ عند ابوهم وكل واحد متزوج ماعليهم امشي اخلصي بنخلص اخاف يجي ابوي والعيال الحين
ومشت اروى معها وقالت بتنهيده ؛ يليل ان كان تركي مالقى اكل لبسبوسه
هاجر ؛ الا الرياض كل شي فيها اخلصي يلا
واخذو الأغراض وطلعوا من باب المطبخ لممر الدوانيه ومشت هاجر بتقفل باب الشارع اللي عند الدوانيه ؛ لايدرعم علينا احد بعد ماني ناقصه
اروى ضحكت ؛ درعموا وخلصوا
هاجر ماسمعتها وهي تحط طرف جلالها على وجهها من ناظرت عمارة ابو هادي ؛ الرجال هذاك من
اروى قربت وهي توقف وراها ؛ شكله ساكن عندهم
هاجر سكرت الباب ؛ يمكن ، اول مره اشوفه
ولفت وهي تنزل جلالها وعلقته على الجدار واخذت السطل وهي تحذفه لجهة اروى ؛ هه عبيه انا بكنس وانتي اشطفي
اروى اخذته ومن قربت للمغسله اللي بالسيب حق حمام الدوانيه وهي تقلبه وترقى عليه وتناظر مع الجدران ؛ جويد ماعاد يمر بعربيته هو وين طس
هاجر وهي تاخذ المكنسه ؛ وجع انزلي والله لو يشوفك احد يفضحنا
اروى شهقت ؛ تعيني مرضي يمشي هو وكرشه وين هو طاس " مرضي شايب معروف عندهم "
هاجر ركضت لها وهي تبعدها ؛ يويله وخري وخري اشوف
اروى نزلت وصعدت هاجر وهي تناظره كان يمشي جهة المسجد ؛ يالوووفي لوفاه يكسر الخاطر
اروى طلعت طرحتها وهي تعلقها على شباك المطبخ ؛ مايضيع خليه انزلي بعبي السطل لا اشوته ثم تهبدين على ظهرك
هاجر نزلت ؛ عشان اهبده على راسك اخلصي اخلصي
وتأففت اروى وهي توقف عند المغسله وتعبي السطل وهاجر تكنس والتفتت اروى بأستيعاب وهي عاقده حواجبها ؛ الحين انتي تبيني انثر الماء والسيب مغبر يارفلا!
هاجر ؛ هاه .. نسيت اجل اكنسي معي ونشطف اذا خلصنا
اروى ؛ واللي عند الدكه وسيب راشد نشطفهم ولا مب لازم ؟
هاجر ؛ امي قالت الأسياب ولا السيب ؟
اروى ؛ الأسياب
هاجر ؛ اجل يعني كلهم اعجلي
اروى قفلت المويه وهي تاخذ المكنسه الثانيه وراحت جهة سيب راشد وهي تكنسه وشافت القطوه بمكانها وارسلت لها بوسه بالهواء وكملت تكنس هي وهاجر
..........••..........
عمارة ابو هادي
قبل ساعه
طلعت شهد من غرفتها وهي اللي صحت من دقايق وتلفتت ماشافت احد بالصاله وهي تروح لغرفة امها وشافتها مشغوله بأغراضها ؛ يمه وين ابوي وهادي وحمد ؟
ام هادي التفتت ؛ صح النوم .. هادي جاه مساعد وراح معه وابوك وحمد راحو للمحل
شهد تكتفت بتنهيده ؛ يعني اليوم مشغولين بعد
ام هادي ؛ اي والله ، تبين فطور شوفيه خليت لك انا بروح اتروش
شهد هزت راسها ودخلت ام هادي للحمام " الله يكرمكم " ومشت شهد للمطبخ وهي تصب لها كوب شاي وفتحت الثلاجه وهي تطلع خلطتها وابتسمت من تذكرت حمد امس وحطتها ع الدولاب وهي تمشي للمجلس ولقت التلفزيون للحين طافي وتأففت بقهر وهي ماتعرف تشغله ولا تلعب بالسوني ووقفت عند الشباك اللي كان على ممر العماره وهي تفتحه وتناظر الجو لدقايق وكان غيم ودافي وابتسمت من جت لها فكره وهي تدري ان امها بتتأخر وابوها والعيال مو بالبيت وطلعت بسرعه وهي تحط الكوب ع الطاوله بالصاله ودخلت غرفتها لبست عبايتها وطرحتها وعدلت نقابها واخذت جوالها وطلعت للصاله اخذت كوبها ومشت وهي تفتح الباب بشويش وطلعت وهي تسكره من برا وشافت باب العماره اللي كان مفتوح واستغربت وهي تمشي بتسكره وانتبهت للرجال اللي ينزل اغراض من سيارته وعرفت انه المستأجر اللي ساكن عندهم وركضت لباب الدرج قبل يشوفها وهي تطلع للدور الثالث ووصلت وهي تاخذ نفس وفتحت باب السطح وابتسمت وهي تدخل وتثبت الباب لأنه لو سكر ماراح يفتح الا من برا ومشت وحطت كوبها ع الجدار وهي تضحك ؛ والله لازم اسوي لي جلسه هنا ليتني جبت معاي كرسي
واستندت ع الجدار وحطت جوالها عندها وناظرت بيت ابو راشد ماكان فيه احد برا وعند بيتهم مافيه الا سيارتين اللي هم سيارة تركي وسعد بس ماتعرف لمين وباب الودانيه مفتوح وتنهدت وهي تشرب الشاي وتتفرج على الديره
شافت رجال كبير بالعمر يتمشى ومعه عصاه يجلس شوي وبعدها يكمل واستغربت وهي من الطفش جلست تشوف وش يسوي ووين بيروح ولفت من سمعت صوت باب وهي تشهق بأبتسامه من شافت هاجر واروى طالعين وهاجر تسكر باب الدوانيه وابتسمت شهد وهي تحط يدها على خدها وتناظرهم ؛ يازييينكم بس مابغيتوا
وبقت تتفرج عليهم وهي تشوفهم يتكلمون وضحكت من شافت اروى تعدي وتناظر بالديره وبعدها جت هاجر وهي تبعدها وتعدي وشهد تناظرهم وتضحك وناظرت الديره وهي تشوف الشايب رايح للمسجد ورجعت ناظرتهم وهي تشوف اروى تاخذ السطل ودخلت وماعاد شافت وين راحت وهاجر بقت تكنس وكأنها تكلم احد وشهد تحاول تشوف اروى وين دخلت وشوي الا طلعت اروى وهي تاخذ مكنسه وراحت للجهه الثانيه وتكنس وكملت شهد تتفرج على هاجر اللي تكنس الممر حق الدوانيه وعلى اروى اللي وراها ع اليمين تكنس ممر قسم راشد وضحكت وهي تشوفهم شوي يلعبون ويرقصون وشوي ينظفون بهدوء وبجديه ورجعت شهد تضحك
وهي تشوف اروى شالت القطوه ولحقت هاجر فيها وهاجر تأشر لها بالمكنسه بعصبيه وبعدها انحاشت بالقطوه وهاجر تلحقها بالعصى وكانوا يركضون بسيب راشد لحد ماطلعت ام راشد وهي توقف عند باب المطبخ وضحكت شهد ؛ ياوييلكم
وسمعت صوت ام راشد اللي كانت تنادي بصوت عالي بس ماسمعت شهد الا صوت خفيف وشافتهم تفرقعوا وهم يركضون لها ووقفوا عندها وهي تتكلم وعرفت انها تهاوشهم وضحكت وبعدها رجعت دخلت ام راشد وراحت اروى وهي تجيب مويه وتكبه ورجعت تشطف مع هاجر وشهد تشوفهم يضحكون وكانت تتفرج عليهم وهي مبتسمه وعقدت حواجبها بضيق من شافت هاجر اخذت الأغراض وراحت للجهه اللي ع البيت من ورا واللي كانت ورا ممر قسم راشد ع اليمين وماتقدر شهد تشوفها وبعد دقايق لحقتها اروى بسطل المويه وتأففت شهد بقهر وهي ترجع تناظر الديره اللي هاديه حتى لو شافت احد بتلقاه يمشي عادي وكملت تتفرج وتناظر بالبيوت وبعد دقايق شافت السياره اللي وقفت عند بيت ابو راشد قدام باب الحوش ونزل منها واحد وماعرفته الا لما نزلت وحده عرفت انها منيره ودرت انه راشد ومشوا وهو يدق الباب وتسمع صوته ينادي ؛ ياهييه
والتفت لهاجر واروى اللي جو يركضون وهاجر تاخذ جلالها واروى طرحتها وزحلقت وانفجرت شهد تضحك وهي تكتم ضحكتها وتحس انهم بيسمعونها وشافت اروى تركض ورى هاجر ليسار الممر ولباب الحوش وفتحت هاجر ودخل راشد ومنيره وسكرت الباب وكانت تشوفهم يتكلمون لدقايق بعدها ابتسمت بأستغراب من شافتهم فزوا وهاجر حضنت منيره واروى حضنت راشد ومن بعدها العكس وهم يدخلون للصاله وتأففت بقهر ؛ ياربيي انا كيف اشوف الجهه هذي
وتنهدت وهي تدري انهم حتى لو جلسوا بالدكه وطلعوا للحوش ماراح تقدر تشوفهم وودها تشوفهم وتشوف الجهه الثانيه من الممر وش فيها بس جدران بيت ابو راشد كانت اكبر من جدار الحوش وانتظرت لدقايق ولا طلعوا ولا شافت احد وشافت الساعه وهي تشهق بصدمه من شافت ان لها قريب الساعه وهي بالسطح وخافت ان امها طلعت وهي ترجع تناظر الديره بسرعه واخذت كوبها ومشت وهي تفتح الباب وطلعت وسكرته وراها ونزلت تحت وهي تشوف الباب حق ممر العماره مسكر ومشت للبيت وهي تدخل وجت للصاله وهي تنزل عبايتها بسرعه وشالتها بيدها وركضت للغرفه عشان لو كانت امها بالغرفه وفاتحه الباب بتشوفها بعبايتها وحطتها بغرفتها وهي تطلع وشافت امها مو بغرفتها وعرفت انها ماطلعت وتنهدت براحه وهي ترجع للمطبخ اخذت الماسك حقها وهي ترجع لغرفتها
..........••..........
بيت ابو راشد
قبل دقايق
كانوا اروى وهاجر يشطفون والتفتت اروى على صوت الطق وسمعت راشد ينادي ؛ جو جو
هاجر ركضت ؛ بفتح انا
اروى وهي تلحقها ؛ لا والله انا
ولقطت هاجر جلالها ولبسته وهي تركض واروى تعدل طرحتها وزلقت وهي تتمسك بالجدار وكملت ركض وهي تفتحه مع هاجر ودخل راشد وهو يضحك وقالت اروى ؛ ها وش قالوا
منيره ضحكت وهي تهز راسها ؛ مثل ماقالت عمتي
هاجر صرخت وهي تحضنها ؛ احلفيي
ونطت اروى وهي تحضن راشد ؛ مبروك الله يبلغكم فيه
راشد ابتسم وهو يحضنها ؛ اميين امين
وحضنته هاجر واروى حضنت منيره وهي تبارك لهم وركضت اروى وهي تضحك ؛ بروح اقول لهم
هاجر ركضت وراها ومشوا راشد ومنيره وعلى دخلتهم كانوا الكل بالصاله ام راشد والبنات
وقالت اروى بحماس ؛ منيره حامل !
ام راشد فزت ؛ صدق ؟
هاجر ؛ والله والله هذا هم جو
ودخل راشد بضحك ؛ السلام عليكم ، طلع كلامك صدق يايمه تقول منيره انك شكيتي
ام راشد ضحكت وهي تقوم وتسلم عليه وعلى منيره
ام راشد ؛ ياعمري اي والله اني حسيت مبروك مبروك ياعيني عسى الله يتمم لك على خير
منيره وراشد بأبتسامه ؛ امين الله يبارك فيك
عبير وشريفه سلموا عليهم وهم يباركون لهم وقالت عبير بأبتسامه ؛ الله يقومك بالسلامه يارب
الكل ؛ امين
شريفه بضحك ؛ ويعينك ع الوحام وغثاه
راشد ضحك ؛ هي من الحين توحمت وكرهت كل شي
منيره تنهدت ؛ الله يعين هذا ولي شهر وماتوقعت انه وحام
ام راشد ؛ ماعليك ياحبيبتي يهون اهم شي لاتتعبين نفسك وارتاحي
والتفتت هاجر على ناصر وجوري ؛ ماما حامل يعني بتجيب لكم اخو ولا اخت !
وضحكوا بصدمه وابتسمت ام راشد وبعد دقايق من توصيات ام راشد ابتسم راشد وهو يقوم ؛ اجل انا بروح المحل ابوي والعيال جو وينزلون الاغراض هناك ببشرهم
ام راشد ابتسمت ؛ رح وانا امك ماتشوف شر
وراح راشد وجلست منيره تقول لهم وش قالوا لها وكيف درت

•

تفاعلوا ع البارت🥹