ياديرةٍ ضمّت كل الأحباب

Part 11

راحو يجلسون على طلعة شريفه للصاله ؛ صباح الخير
الكل ؛ صباح النور
عبير بضحك ؛ صايره كيس نوم ياشريفه وين اللي كانت تصحى من الفجر ؟
شريفه ضحكت وهي تجلس ؛ ييوه اسكتي والله طول حملي ماكنت انام من التعب الحين خليني انام عن ٩ شهور قدام
ضحكوا وقالت اروى ؛ وين تتوقعين بنروح العصر ؟؟
هاجر ؛ للممزرعه
اروى ضربتها بخفه ؛ يربي لازم تخربين انتي
شريفه ؛ صدق ؟
عبير ؛ اييه بتروحين ؟
شريفه بتفكير ؛ والله مدري برد على عنوده....
صح وين بنتي
ام عزام ضحكت ؛ مع امك بالحوش وعندها ابوك وعزام والعيال
شريفه ؛ دام امي مطلعتها بالحوش يعني مافيه برد اجل بروح من زمان عن المزرعه
عبير ؛ والله احس لو تجلسين احسن ارتاحي يمكن يجي مطر ولا يصير برد
شريفه ؛ قولي ماتبين اجي معكم زعلت
عبير ضحكت ؛ لا والله بس اخاف عليك اجلسي ازين
اروى ؛ ومن يجلس عندها ؟ لحالها ؟
عبير ؛ يوه نسيت بس لو تجلس وترتاح والله احسن ولا ياخاله ام عزام ؟
ام عزام ؛ والله مدري ، انا اقول تروح وننتبه لها كلنا ولو جلست مابنخليها لحالها
شريفه ضحكت ؛ درر ياعمه درر
ضحكوا وقامت عبير وهي تروح المطبخ ؛ يلا بحط لك الفطور واجي
ابتسمت شريفه وقامت اروى ورا عبير للمطبخ تجهز اغراض طلعتهم العصر
ودخلت ام راشد ؛ تجهزو العصر بنروح واذا ماجا مطر نجلس لوقت العشاء
عبير من المطبخ ؛ اروى واثقه تجهز بدون لاتقولين بنروح
الكل ؛ هههههههههههه
ام راشد ابتسمت وهي تجلس عند شريفه ؛ وانا امك بتروحين معنا ؟
شريفه ؛ ايه يمه تكفين من زمان ودي اروح المزرعه
ام راشد ؛ طيب بس بتجلسين بالخيمه ويمكن كلنا نجلس فيها لو برد الجو
ام عزام ضحكت ؛ اجل خلاص تروح وماتبرد دامها في الخيمه
وكملو يسولفون عن المزرعه ووش بيسوون وعبير واروى اللي كانو اكثر ثنتين متحمسين لروحتها رجعت اروى تكمل اغراضهم وهاجر وشموخ يساعدونها ودخلت منيره وهي تشوف حماسهم وتحمست معهم وهي تجهز فطاير وعبير اللي كملت معهم
..........••..........
المدينه
بيت ابو هادي
اللي قامت ام هادي من بعد الفطور وهي تجهز الاغراض اللي تقريباً خلصتها وكل شوي ينزلون شنط للسياره
بالصاله كان ابو هادي وهادي وحمد جالسين
وطلعت شهد اللي تو صحت ؛ صباح الخير
الكل ؛ صباح النور
ابو هادي ؛ الناس قريب الظهر يا شهد
شهد ضحكت ؛ وين امي ؟
ابو هادي ؛ من الصباح وهي تجهز الاغراض شوفيها بالغرفه
راحت شهد ودخلت للغرفه وهي تشوفها فاضيه من كل شي تقريباً ؛ يساتر
ام هادي ابتسمت ؛ ماشاءالله تو قمتي
شهد ضحكت ؛ ايه
ام هادي ؛ طيب افطري وجهزي اغراضك كلها وخلي شنطه وكم لبسه والاغراض اللي تحتاجينها هاليومين لأن كل الشنط بحطهم بالسياره
شهد ؛ طيب يمه اغراض البيت كللها بتاخذينها ؟
ام هادي ؛ ايه كل شي باخذه واغراض المطبخ ما ادري ماتوقع باخذهم الحين
شهد ؛ يعني بنرجع مره ثانيه ناخذ اغراض ؟
ام هادي ؛ مدري بس انا جهزت كل الملابس وهادي وحمد قلت لهم يجهزون اغراضهم وانتي كل الاغراض اللي بغرفتك شيليها " وضحكت " يعني لايبقى الا الأثاث
شهد ؛ يمه مايقول ابوي نرجع؟!
ام هادي ؛ الا بس بعدين مو على طول ماجهزتي اغراضك ؟
شهد ؛ الا بس بتصير كثيره الاغراض حنا بنروح على سيارة ابوي بس ولا حمد وهادي بعد ؟
ام هادي ؛ صح والله ماسألت ابوك تعالي
طلعت ام هادي وشهد للصاله وجلست ام هادي وهي تقول ؛ بنروح بسياره وحده ؟
ابو هادي التفت لحمد وهادي ؛ لا لا كل واحد ياخذ سيارته عشان ياخذ اغراضه معه ترا ماراح يرجع احد
شهد ؛ وشش يبه انت تقول بنرجع للمدينه!
ابو هادي ضحك ؛ اييه قلته بس مب من اول اسبوع عاد بنرجع انتوا بتاخذون كلل اغراضكم وسياره وحده ماتكفي وماني راجع اطق مشوار وارجع كل واحد منكم ياخذ سيارته بنروح مع بعض وكل واحد بسيارته اغراضه
شهد جلست وهي عجزت تفهم ؛ دقيقه الحين حنا بنروح كلنا مره وحده ؟
ابو هادي هز راسه بأيجاب
شهد ؛ وحمد بسيارته وهادي بسيارته ؟
ابو هادي ؛ وانا بسيارتي
شهد ؛ واغراضنا نقسمهم على السيارات ؟
ابو هادي ضحك على شرحها ؛ ايه
شهد وهي تأشر ع البيت ؛ وككللل الاغراض اللي فيه ناخذها !
ابو هادي ؛ الله الله كل شي تاخذونه
ام هادي ؛ واغراض المطبخ ؟؟
ابو هادي ؛ ييوه المطبخ ، وش الاغراض اللي تبينها منه؟
ام هادي ضحكت ؛ الأجهزه وصحوني
حمد ضحك ؛ يمه صحونك ماتطلعينها الا اذا جو الضيوف وبالديره اللي بنسكنها ماتعرفين احد يعني منتي مطلعتها
اخذت ام هادي سبحة ابو هادي وحذفتها عليه بخفيف وضحكوا وقالت شهد بضحك ؛ والله بس فيه بعض الأشياء نحتاجها ضروري
ابو هادي ؛ اجل جهزوها 3 سيارات ما شاء الله تكفي
ام هادي ؛ والله اني شلت هم ترتيبها من الحين
حمد بهمس لأمه ؛ لو تزوجت كان زوجتي تساعدك
الكل سمعه وانفجروا يضحكون وقال هادي وهو مبتسم ؛ خلاص برحمك وبتزوج اول مانسكن الديره
حمد ؛ والله انا ما انتظرك تتزوج لو علي تزوجت قبلك بسس ابببوي
ابو هادي ضحك ؛ مايصير تتزوج قبل اخوك ومنت متزوج وانت ماتوظفت حتى لو تزوج هادي
حمد طارت عيونه ؛ يببه مو انت تقول بشتغل معك بالمحل يعني توظفت
ابو هادي ؛ والله عاد ماشفت شغلك للحين
حمد بثقه ؛ بيعجبك
ابو هادي ضحك وقام ؛ يلا بس اجهزو ماباقي ع صلاة الجمعه شي بنلحق
قامو حمد وهادي يجهزون للصلاه وام هادي راحت تجهز الغداء وشهد لحقتها المطبخ وهي تو تفطر
بعد دقايق طلعو ابو هادي وهادي وحمد للصلاه
..........••..........
بيت ابو راشد نفس الوقت
في المطبخ مدت منيره المبخره لناصر وعبدالله اللي اخذ البخور وراحو للعيال بالدوانيه
وطلعت للصاله وهي تشوف بناتها جوري واميره ومناير مع ترف بنت عبير يلاعبون العنود بنت شريفه
وام عزام وام راشد يسولفون مع عبير اللي بحضنها ولدها خالد وجلست معهم تكمل السوالف
ام راشد ؛ راحو العيال يامنيره
منيره ؛ لا تو عطيت ناصر وعبدالله البخور راحو للدوانيه ، وين البنات ؟
عبير ؛ بالغرفه
ام راشد بخوف من شافت شريفه تحطها بحضن ترف ؛ شريفه انتبهي مايعرفون لها
عبير ؛ ترف ترف خليها بحضن امها كخه
شريفه شهقت ؛ لا ياللي ماني بقايله بنتي كخه ؟
ام راشد ضحكت ؛ ماتقصد يبنت بس عشان بنتها ماتعور بنتك
منيره ضحكت ؛ وانتي الله يصلحك فكيتي مهادها وشايلتها غلط
عبير ؛ عطينا عنوده بس خلعتي عضامها المسكينه
ضحكت شريفه وهي اللي فعلاً ماتعرف تمسك العنود
اخذتها ام عزام وهي تضحك وتمد رجولها وتحط مهاد العنود فوقهم وتمهدها بمنظر حنون يمثل الجدات صدق ومن خلصت وهي تنومها على جنب
ورجعو يندمجون بالسوالف
..........••..........
العصر في المدينه
واللي كان ابو هادي وعياله ينزلون الشنط بسياراتهم بعد ماجهزو اغراضهم
ودخلو وقال ابو هادي ؛ ها باقي اغراض ولا خلاص
ام هادي ؛ لا خلاص ماباقي الا اغراض نحتاجهم لليومين هذي
هادي بتعب ؛ خلاص والله تعبت لاتطلع اغراض اليومين اكثر من اللي شلنا
ام هادي ضحكت ؛ لا ماعليك كل واحد بقى له شنطه لأغراضه اللي يحتاجها
شهد ضحكت ؛ لا انا شنطتين
حمد ؛ تشيلينهم انتي انا تعبت
شهد ضربت كتفه بخفيف ؛ ترا لميت عفشك انا هذا رد جميل
ابو هادي ؛ خلصنا يعني
ام هادي ؛ ايه الحمدلله
شهد ؛ طيب يبه ليش استعجلنا وانت للحين ماعرفت وش بتبيع بالمحل
ابو هادي ؛ بالعكس ما استعجلنا لو بنروح بعد مانجهز المحل كان مامدانا نرتاح الا ورحنا نبيع
هادي ؛ اي صح اما لو رحنا الحين نسكن ونجهز كل شي وبعدها نفتح محلنا
شهد هزت راسها وجلست وهي تسمع سوالفهم عن المحل
..........••..........
في الرياض
عند بيت ابو راشد
اللي كانو من بداية العصر وهم يجهزون اغراضهم ومن خلصو طلعت ام راشد من المطبخ وكانو كلهم متجمعين بالصاله وقالت بضحك ؛ ها كيف نتقسم الحين
ام عزام ؛ ابد والله انا وشموخ وشريفه مع عزام
عبير ضحكت ؛ وانا وبزاريني مع سعد
منيره بضحك ؛ وانا وبزاريني مع راشد
اروى ؛ وانا وهاجر معك انتي وابوي ونايف بسيارته وتركي بسيارته يجيبون الاغراض
هاجر ؛ ولا نايف وتركي بسياره وحده مو كثيره اغراضنا
ام راشد ؛ اجل يلا بطلع انادي العيال ياخذونهم
طلعت للدوانيه ومالقتهم وراحت لبرا وهي تشوف ابو راشد والعيال عند سياراتهم
التفت ابو راشد ؛ ها يلا وين اغراضكم
ام راشد ؛ جاهزه بس تعال نايف انت وتركي خذوهم
دخلو نايف وتركي وهم ياخذون الاغراض اللي طلعوهم اروى وهاجر لهم وقالت ام راشد ؛ نايف حطهم بسيارتك ولا بسيارة تركي احسن عشان الحوض وروحوا مع بعض
وقالت له عن تقسيمهم وطلعو وجا تركي بيحطهم بسيارته وقال ابو راشد ؛ لا لا هاتهم بسيارتي
نايف ؛ بس يبه انا وتركي بنروح مع بعض وانت بتاخذ امي والبنات ، والعيال كل واحد بياخذ اهله
ابو راشد ؛ لا ياولد نحتاس وشوله زحمة السيارات
راشد ضحك وهو فاهم ابوه ؛ قل انك تخاف الناس تشوف زحمتنا
ابو راشد ابتسم وهو اللي كان يخاف يبين للناس كثرتهم ؛ والله لو علي نتحاشر بسياره وحده
ضحكو وفعلاً متعودين على ابو راشد كل اجازه يخاف يبين جمعتهم
سعد ؛ وكيف نتقسم
ابو راشد ؛ تركي ولا نايف واحد منكم يروح معي هو والبنات والثاني يركب مع سعد وعزام وتاخذون الورعان معكم وراشد ياخذ امه وزوجته وام عزام واخته" وناظر عزام بأبتسامه " ان كان سمحت
عزام ضحك ؛ ابد حسبة اخو
نايف وهو يعرف اذا راح مع ابوه بيكرفه ؛ تركي انت مع ابوي وانا بروح بسيارتي مع سعد وعزام وعيالهم
تركي فز وقرب لراشد وهو يهمس بكذب ؛ راشد تكفى خلنا نتبادل انت تروح مع ابوي وانا اخذ امي واللي معها
راشد ضحك وهو يفكر ان تركي مايبي يروح مع ابوه عشان مايشتغل ؛ لا لا يالحبيب توكل بس معك البنات يساعدونك و احسن منك بعد
تركي عض شفته بقهر وراح يحط الاغراض بسيارة ابوه وهو وده يسطر نايف وراشد
وبعد دقايق طلعت ام راشد وهي تقفل الباب والبنات وراها وقال ابو راشد ؛ ام راشد انتي وام عزام وبنتها مع راشد واهله والبنات معي ونايف مع سعد وعزام وعطوهم الورعان
ام راشد ؛ تكفي السياره ؟؟
ابو راشد ؛ ايه ايه ثلاث يكفون
ام راشد ؛ اجل يلا يابنات مع ابوكم
اروى همست لأمها ؛ يمه يمه تكفين خلي شموخ تجي معنا بالسياره
ام راشد ؛ بنشد ام عزام بس شوفي ابوك اذا وافق اعلمها
راحت اروى لأبوها وهي تبوس راسه ؛ مساء الخير يبه
ابو راشد ابتسم وهو يمسح على كتفها ؛ هلا مساء النور
اروى ؛ يبه تكفى خل شموخ تجي معنا
ابو راشد بأستغراب ؛ منهي شموخ ؟
تركي اللي كان يحط الاغراض بالدبه و التفت بسرعه من سمع ابوه ....

تفاعلوو لطفاً 🥺.
ودي لو اكتب كل يوم بارت ببس مافييييه تفاعل ابداً