ياديرةٍ ضمّت كل الأحباب

Part 43

..........••..........
من بكره الفجر
في بيت ابو هادي
اللي صحى وهو يشوف الوقت لسى بدري وباقي ع الآذان نص ساعه وقام وهو يدخل يتوضى وطلع بعد دقايق وشاف النور من باب غرفة هادي اللي كان مسكر نص تسكيره وقرب وهو يدخل وشاف هادي نايم وكفه اليمين على كتف يده اليسار المصابه وعاقد حواجبه بألم وعلاجاته و المسكنات حوله وماقدر يصحيه ولا كان بيسأله اذا بيروح معه للرياض ولا لا ، بس من حس انه تعبان تركه وتنهد وهو يطفي النور وطلع وسكر وراه الباب
ومشى لغرفة حمد وهو يدخل ويشوف النور طافي وحمد نايم
ابو هادي ؛ حمد .. ياحمد
حمد بنوم ؛ ههاا
ابو هادي ؛ بتروح معي نطلع الرياض ؟
حمد اعتدل وهو يتنحنح ؛ اييه ايه بروح
ابو هادي ؛ طيب قم نصلي ونمشي يلا
وجلس حمد وهو يتمغط وشاف الساعه وهو يقوم
وبعد دقايق قامت ام هادي وجهزت القهوه وطلعت فيها للصاله وهي تسمع الآذان وطلع ابو هادي وحمد ومدت لهم ام هادي القهوه
ابو هادي وهو ياخذ الفنجال ؛ هادي ماصحيته شكله تعبان شوفيه
ام هادي هزت راسها ؛ يلا بشوفه ، صلوا وتعالوا افطروا وبعدها تروحون
ابو هادي هز راسه وبعد دقايق طلع هو وحمد للمسجد
..........••..........
مسجد الديره
دخلوا ابو هادي وحمد وابو هادي يسلم وردوا السلام الرجال ومن بينهم ابو راشد اللي ابتسم من شافه ؛ صبحه بالخيير
ابو هادي ابتسم ؛ صباح النور شلونك عساك طيب
ابو راشد ؛ والله بخيير الحمدلله ، ها اليوم نحتريك ان شاءالله انت واهلك
ابو هادي ابتسم ؛ ان شاءالله العصر وحنا عندكم بس بطلع الرياض بعد شوي
ابو راشد ؛ ان شاءالله .. عاد الله يعينك على زحمة الرياض
ابو هادي ضحك ؛ اي والله زحمه لكن نخلص ان شاء الله من اغراض المحل
ابو راشد ابتسم ؛ ماشاءالله تقضي للمحل ؟
ابو هادي هز راسه بأبتسامه ؛ اي والله وبيني وبينك بخليه محل اثاث
ابو راشد ؛ اووه ماشاءالله الله يبارك لك والله خير ما اخترت مافيه محل اثاث بسوقنا وفيه واحد برا الديره ورا ديرة ابو صالح طريق ساعه وشوي
ابو هادي ؛ اييه شفته سوق الزل رحت له امس العصر
ابو راشد هز راسه ؛ عشان كذا ماجيت مع هادي امس
ابو هادي ؛ اي والله ما جيت الا بعد صلاة العشاء
ودخلوا تركي ونايف وهم يسلمون على حمد اللي جالس بالطرف والتفت تركي بأستغراب ؛ وين هادي ؟
حمد تنحنح ؛ ماجا والله تعبان ونايم
نايف رفع حواجبه بأستغراب وهو يهمس لتركي ؛ ومخليه ابوه ماشاءالله حنا لو بيموت يسحبه
تركي دق كتف نايف يسكته وهز راسه وبعد كم دقيقه كبر الأمام واصطفوا يصلون ....
بعد الصلاه طلعوا بعض الرجال ومن بينهم ابو هادي اللي وقف وهو يأشر لحمد والتفت لأبو راشد ؛ يلا انا بمشي تبي شي توصي شي من الرياض ؟
ابو راشد ابتسم ؛ سلامتك انتبه من الزحمه
ابو هادي ابتسم ؛ تسلم ابشر ، يلا فمان الله
وطلع هو وحمد للبيت وبعد دقايق طلعوا ابو راشد والعيال مشي والتفت ابو راشد للعيال ؛ اليوم ماحنا رايحين للمحل مايجي احد صباح الجمعه بخلي عبدالسلام يفتحه ساعه ولا ساعتين والعصر يروح معه نواس
راشد ؛ اجل نروح المزرعه بعد شوي صح ؟
ابو راشد هز راسه ؛ ايه ومعنا نواس وحكيم " عامل المزرعه اللي دايم فيها " بنطلع خضره ويودونها للبسطات ومحلات الخضره
تركي ابتسم ؛ بوديها معهم انا
نايف ؛ وانا معه
سعد ضحك وهو يشوفه مصحصح ومروق ؛ ماشاءالله يالنشاط اجازه ما الومك
ابو راشد ابتسم ؛ ايه من اول كل جمعه يجيهم نشاط
وصلوا للبيت ودخلوا للدوانيه وراشد وسعد بدوا يشبون النار وتركي ونايف دخلوا يجيبون الفطور
..........••..........
بيت ابو هادي
قبل دقايق من دخل ابو هادي وحمد كانت ام هادي بالمطبخ وشهد بالصاله تحط صينية الفطور
ابو هادي ؛ صباح الخير
شهد التفتت وهي تبتسم ؛ صباح النور هلا يبه
ابو هادي ؛ هادي ماصحيتوه ؟
شهد ؛ الا صلى ورجع نام يقول يده توجعه
ابو هادي ؛ وليه ما افطر واكل علاجه ؟
شهد رفعت كتوفها ؛ مدري والله يقول يبي ينام بس
ابو هادي هز راسه وجلس ورجعت شهد للمطبخ ولحقها حمد ؛ صباح الخير يمه "وناظر شهد بأبتسامة " بعض الناس صبّحت على ابوي وانا لا
ام هادي ضحكت ؛ صباح النور
شهد بضحك ؛ والله قلت صباح النور عليكم كلكم
حمد ؛ كذابه قلتي صباح النور هلا يبه ماقلتي هلا يبه وهلا ياحمد
شهد ضحكت وهي تضرب كتفه بخفه وضحك حمد ؛ امزح امزح هادي علامه ؟
ام هادي تنهدت ؛ والله ياعمري عليه يده متعبته
حمد هز راسه ؛ طيب بروح مع ابوي الرياض تبون شي ؟
ام هادي سكتت لثواني وتذكرت ؛ ايه ايه مروا محل حلويات جيبوا لجيرانا اهل ابو راشد اللي بنروح لهم اليوم دورت شهد بجوالها محل حلويات قريب مافيه
حمد تكى ع الدولاب ؛ اللي مخرب هالديره ان مافيها اسواق مثل المدينه ولا مولات ولا كوفي مغير خيمة سوقهم الشعبي
شهد ؛ والنت بعد مخيس
ام هادي ضحكت ؛ هذا همكم يلا بس خذ الشاهي ياحمد
وطلعت وشال حمد الصينيه وطلع وشهد وراه
بعد دقايق افطروا فيها قام ابو هادي وهو يمشي جهة الغرفه ؛ يلا حمد اجهز باخذ اغراضي واطلع
حمد ؛ يلا بسيارتي انا وراك
ابو هادي التفت بأستغراب ؛ وشو ؟ بسيارتك ؟
حمد ؛ ايه وراك
ابو هادي ضحك ؛ والله اني داري تبي تروح عشان تحوم ، معي بس لايكثر
ودخل لغرفته وناظر حمد امه بقهر ؛ الحين شسواه
ام هادي ضحكت ؛ سواة ربك والله مالومه ثم تلف طريق ثاني وتتمشى وهو قايل لك بيروح يجيب اغراض المحل
شهد ؛ ماعليك اذا خلص قول له بروح محل ولا شي بعدين انت وش تبي ؟
حمد ؛ مدري بتفرج على الاسواق
شهد ؛ خلاص ماعليك ادق واقول له يروح محل الحلويات وانت اذا لقيت محلات واسواق قريبه قل له بيمرها
حمد ؛ المشكله ان انلطعنا ساعتين عند المستودعات مدري المصانع
ام هادي ؛ عادي يمر فيكم الوقت ماعليك
حمد وهو يقوم بقهر ؛ وثم نخلص بعد مايسكرون لصلاة الجمعه وزين ان خلصنا بعد
ام هادي ضحكت وهي تهز راسها بأسى وطلع ابو هادي ؛ مانشوف هادي يمكن بيروح بدال حمد ؟
حمد بصدمه ؛ افا وانا قلت لا
ابو هادي ضحك ؛ لا امزح عليك يمكن بيروح معنا
ام هادي ؛ لا خله تعبان وين يروح معكم
حمد ؛ والله هو يحب الرياض اشوفه ؟
ابو هادي رفع كتوفه ؛ والله مدري رح شوفه لاتزعجه ان ماقام خله
هز راسه حمد وهو يدخل غرفة هادي ويشوف النور طافي وهادي نايم وقرب وهو يهمس ؛ هادي .. هادي ، ولد
هادي تحرك ؛ ههلا
حمد ؛ بنطلع انا وابوي للرياض تجي معنا ؟
هادي اعتدل ؛ لا بنام .. وش عندكم ؟
حمد ؛ ناخذ فرشات المحل واغراضه
هادي وهو يرجع يتغطى ؛ اييه ، لا والله تعبان وبنام
حمد ؛ طيب تبي شي ؟
هادي ؛ لا سكر الباب
حمد سكت لثواني وتنهد وهو يطلع وسكر الباب
ابو هادي التفت لحمد وقال وهو يسوي ساعته ؛ ها وش يقول
حمد ؛ مايبي يروح
ابو هادي هز راسه ؛ اجل يلا مشينا " والتفت لأم هادي وشهد " اجيب لكم شي ؟
ام هادي ؛ ايه قلت لحمد جيبوا معكم حلا ناخذه لجيرانا العصر
ابو هادي ؛ وغيره ؟
ام هادي ؛ بس
ابو هادي ؛ وانتي ياشهد
شهد ؛ سلامتك يبه " وضحكت " سلامتك انت وحمد
ضحكوا ام هادي وحمد وابتسم ابو هادي وهو مايدري شسالفه وطلع وحمد وراه ركب ابو هادي سيارته وركب معه حمد وطلعوا من المحاسن للرياض اللي تبعد عنهم اقل من ساعه
..........••..........
مزرعة ابو راشد
7:30 صباحاً ..
كان الجو غيم وبرد شوي ونزلوا العيال من السيارات ابو راشد بسيارته ومعه راشد وسعد وناصر وعبدالله
ونايف بسيارته ومعه تركي وفتح ابو راشد شنطة السياره ؛ تعالوا خذوا هالصناديق مالقيت غيرهم بالمخزن والله مدري تكفي ولا لا
تركي جا وهو يربط ثوبه ؛ فيه عند الوايت صناديق
ابو راشد ناظر جهة الوايت ؛ بالله ، وانا اقول وين ضيعتهم يلا يلا نزلوا هذي بعد يمكن نحتاجها
ولف نايف شماغه عصبه ورفع ثوبه وشال معهم وناصر وعبدالله ركضوا يلعبون قريب منهم
اخذوا الصناديق ومشوا لجهة الزرع اللي كانوا عنده العمال نواس وحكيم وعبدالسلام اللي للحين ماراح
ابو راشد ؛ صباح الخيير
العمال قربوا وهم ياخذون الصناديق ؛ صباح النور
ابو راشد ؛ يلا يلا طلعوا المستوي بشوف التمر
راشد ؛ الظاهر انتهى موسمه خلاص
سعد ؛ ايه مايطلع مع البرد
ابو راشد راح للنخل وهو يشوفه ؛ اي والله انتهى ماعليه تطلع بداله خضار وفواكه ان شاء الله
وتوزعوا العيال كل واحد راح لصف من نوع الخضار والفواكه ومعه صندوق وسكين ويعبي
ابو راشد ؛ قربوا الوانيت عشان نحط الصناديق بالحوض
وراح حكيم يقرب الوانيت الغماره اللي مخليه ابو راشد لكل اشغال المزرعه من الصناديق اللي يعبون فيها وللغنم اذا بيودونها يبيعونها او لأكل الغنم وللشراع حق المويه اذا بيعبونه وبعد للعمال يروحون فيها للمحل
نايف ؛ عبدالسلام مهو رايح للمحل ؟
ابو راشد ؛ اييه السياره .. اصبروا لاتحطون شي يانواس وصله المحل وارجع بالسياره وانت ياعبدالسلام الساعه ١١ ولا قبلها سكر المحل وتعال
تركي طلع مفتاحه ؛ خذ عبدالسلام ارجع بسيارتي عند باب السوق
عبدالسلام اخذ المفتاح وركب مع نواس وحركوا يوصله للسوق ويرجع
نايف ؛ يتأخر ساعه وشوي عشان يوديه ويرجع
ابو راشد ؛ بيجي وحنا ماخلصنا اعجلوا
وكملوا ينقون ويعبون الصناديق
..........••..........
في الرياض " العاصمة "
قبل ساعه
دخل ابو هادي وحمد اللي تلفت بصدمه ؛ الزحمه هذي وش حتى يوم الجمعه ماتخف لا اله الا الله
ابو هادي بتعجب ؛ والسرا هذا كله عند الأشاره والله زين ان خلص بربع ساعه
حمد رجع يفتح جواله ؛ بس اشوا الورشه قريبه بعد الأشاره يمين
وانتظروا ل10 دقايق لحد ماطلعوا من زحمة الطريق ومشوا لورشة الأثاث ووقف ابو هادي وهو يتنهد ؛ مابغينا يلا ان شاءالله نخلص منها
ونزل هو وحمد اللي دخل وهو يهمس ؛ اوب ماشاءالله طلعت كبيره !
ومشى مع ابوه اللي وقف يكلم الموظف ويسأله عن السجاد ونوعه ويوريهم الأثاث وابو هادي يختار والموظف عنده بالورقه يسجل اللي يبغاه ...
بعد ساعه ونص شافوا فيها الورشه كلها والاثاث كله تنهد حمد وهو يهمس ؛ يبه ماخلصنا ؟
ابو هادي وهو منشغل مع الموظف ؛ لا اصبر ... هذي ابي منها ٤٠ حبه
حمد التفت بصدمه ؛ وشي اربعينه !
ابو هادي ؛ زل زل حقات الاجار يحتاجونها بالعزايم
الموظف وهو يسجل ؛ بس هذي تدفعها يعني ممكن بعض الأثاث تقدر تدفع اول شي عربون واذا بعته تدفع حسابه ، لاكن لو مابعته صعب ترجعه لهنا مو كله يترجع
ابو هادي ؛ لا لا ان شاء الله اقدر ابيعه كله اللي يندفع ادفعه الحين والباقي بعد ما ابيعه
الموظف هز راسه ؛ تمام ، متى تبيه ؟
ابو هادي ؛ يومين ثلاثه مو اكثر ابيه بسرعه
الموظف ؛ حلو نوصله بكره الصباح ونقدر نجيبه بعد يومين متى ماتبي
ابو هادي ؛ زيين والله لا لا اجل بكره الصباح ولا ادق عليكم اذا كنت فاضي
الموظف ؛ تمام نقدر نوصله بكره الصباح من الساعه ٨ لحد ١٢ ، ومن العصر الى الساعه ١٠
حمد بعد وهو يهمس بتنهيده ؛ يكثر قرقرتك
ابو هادي ؛ خلاص اتصل الصباح او العصر
وهز راسه الموظف ومشى يسجل حساب ابو هادي واللي دفع والباقي وانجلط حمد من سعر اغراض المحل واخذ ابو هادي ورقه وطلع وحمد معه وركبوا وابو هادي ضحك وهو يشوف حمد مصدوم ؛ علامك؟
حمد التفت ؛ الحين اسعار بضاعة المحلات كذا ؟
ابو هادي ضحك وهو يحط الورقه بالدرج ويربط حزامه ؛ ايه كذا اجل وش تحسب ، الفرشه اللي 8 متر فوق الف ريال وحنا كم متر وفرشه شرينا ؟
حمد مسك راسه وهو يشغل المكيف ؛ يااوك حر حر والشمس صرعتنا
ابو هادي انفجر يضحك وهو اول مره يضحك كذا ؛ تشوفه غالي ! اجل لو اقولك المعرض اول اغلى منه
حمد ضحك ؛ المعرض سيارات يفرق .. ليه كم كان ؟
ابو هادي ضحك وهو يحرك ؛ توقع كم تعطيه ؟
حمد ؛ فوق ٢٠٠ الف ؟
ابو هادي ضحك ؛ وييين هذا ربعه واقل بعد
حمد سكت بصدمه وقال ابو هادي بضحك ؛ عشان كذا ابيك تتعلم عشان لاينلعب عليك مع ان دامك كذا عز الله بتكاسرهم لين تاخذ بالقيمه اللي انت تحسب
حمد ضحك بصدمه وهو اللي ماقد راح مع ابوه وهادي ولا يعرف الأسعار ولاهو خبره فيها مثلهم ووقفوا عن اشاره وقال ابو هادي ؛ الجو شمس الديره كذا يعني ؟
حمد ؛ وحر بعد لاوالله ماضنتي انها شمس اكيد انها براد ويمكن مطر بعد بس كيف كذا ليه مب مثل بعض ؟
ابو هادي رفع كتوفه ؛ مدري سبحان الله بس بعيدين شوي عن بعض حتى لو ساعه يختلف الجو
حمد ؛ طيب وين نروح الحين
ابو هادي ضحك ؛ اخر مستودع نشوفه عالسريع ونطلع ان لقينا شي اخذنا
وضحك وهو يشوف حمد ماسك راسه وحرك للمستودع ووصلوا وهو يوقف ؛ يلا انزل لاتصرعك الشمس هنا
حمد نزل ودخل هو وابوه وهم يشوفون الأثاث كان قليل ومالقى شي اعجبه وطلع ابو هادي ؛ مافيه شي نروح واحد ثاني ؟
حمد ؛ لا ياييبه والله يكفي اللي قبل شوي حلو
ابو هادي ؛ اي والله زين وكبير وكل شي فيه ماشاءالله
وركبوا وشاف ابو هادي الساعه ؛ الساعه ١٠ وشوي فيه فيه وقت ابشوف فيه ورشه ورا هذي
حمد تنهد وهز راسه ابو هادي بضحك ووقف عندها بعد دقايق ؛ يلا ننزل اخر وحده ماعليك
حمد ابتسم وهو ينزل ومشوا وتنهد ؛ ياساتر حر
ابو هادي ؛ اييه شوي
ودخلوا ولقى ابو هادي اثاث اعجبه والتفت لحمد ؛ باخذ طقمين كنب عشان يمكن مايشرونه يبون تفصيل
حمد ؛ والله حلو احسن من تفصيلهم خذ وبيشترونه صدقني
ابو هادي ؛ والله مدري ... الفرشه هذي ورا ماناخذها للصاله
حمد قرب وهو يشوفها ؛ حلوه اذا بتاخذها نسأل امي
ابو هادي ؛ والله زينه صورها صورها لها
وطلع حمد جواله وهو يصورها وارسلها وشهق بفرحه ؛ اوووه يالشبكه ماشاءالله
ابو هادي ضحك وهو يتفرج على باقي الاثاث وبعد دقايق جا حمد ؛ يبه تقول حلوه ناخذها ؟
ابو هادي ضحك ؛ ايه باخذ منها للصاله بس عشان تصير فرشه مافيه مثلها
ضحك حمد ونادى ابو هادي العامل وهو يسجل اغراضه نفس المحل الاول واتفقوا وبعد دقايق طلعوا وحمد عاقد حواجبه من الشمس اللي صدعت براسه وركب وهو يشوف الساعه ؛ يلا يبه تأخرنا نصلي الجمعه بالديره ؟
ابو هادي وهو يحرك ؛ ايه ايه بس معنا اقل من ساعتين الحين بنروح محل حلويات نجيب اغراضهم
حمد تنحنح ؛ اا يبه بمر سوق
ابو هادي ؛ وشو السوق ؟
حمد ؛ ملابس الحين برد وباخذ فروة وملابس شتويه
ابو هادي ؛ اييه والله بدا الجو يبرد خلاص نشوف محل هنا ، السوق هناك مافيه ؟
حمد ؛ لا مهي زينه ... يبه وقف وقف شف المحل هذا
ابو هادي التفت بأستغراب وهو يسفط قدام المحل وناظر لوحته وضحك ؛ هذا محل شهد اللي تحبه طلع فيه فرع هنا !
حمد ابتسم ؛ اييه كلنا والله نحبه خلنا ناخذ الحلا اللي يبون منه
ابو هادي وهو يطفي السياره ؛ يلا يلا نزلنا
ونزل هو وحمد ودخلوا ودق حمد على شهد اللي ردت بعد ثاني مكالمه ؛ ها حميّد
حمد ؛ تخيلي وش لقينا بالرياض
شهد وهي تحط الجوال على الدولاب ؛ وش
حمد ؛ محل الحلويات اللي ماناخذ الا منه بالمدينه
شهد حطت الكوب واخذت الجوال ؛ كذذاب !
حمد ضحك ؛ والله طلع فيه فرع
شهد ؛ صور صور لي اذا ما انرسلت قل لي وش عندهم
حمد ضحك ؛ لا زيينه الشبكه انتي تعلقي بالجدران عشان تجيك الصور
شهد ضحكت ؛ والله اهم شي تجي ، بسوي شاهي لهادي اسرع صور
حمد ضحك ؛ يلا بقفل واسألي هادي وش يبي شوي واكلمك
شهد ؛ تمام
وقفلت ومشى حمد لأبوه وضحك بخفه وهو يشوفه جالس يذوق من الحلا ؛ ها يبه سبقتني !
ابو هادي ضحك ؛ شف هذا والله زين ، ها وش تقول
حمد ؛ بصور لها الحين
وجلس يصور لشهد وينتظرها ترد وهو وابوه ينقون لهم
..........••..........
محاسن الصدف
نرجع لمزرعة ابو راشد
قبل ساعه خلصوا وهم يحطون الصناديق بالسياره وبقى اخر صندوق قال ابو راشد اللي كان متقروش ؛ هذا خلوه للبيت والصناديق هذي ودوها المحلات
نايف ؛ واذا زادت صناديق وش نسوي فيها
ابو راشد ؛ ابسط فيها
الكل ؛ ههههههههههههههه
راشد ضحك ؛ ماعليك مب واجد تخلص وان زادت منت خسران شي اسفط بآخر الديره وبيع
نايف وهو كاتم ضحكته من نفسية ابوه ؛ خلاص بنروح الحين ان شاءالله يمدينا قبل الصلاه
ابو راشد ؛ وحنا بنسبقكم البيت ان خلصتوا رجعوا السياره وتعال انت وتركي بسيارتك
نايف ؛ ابشر يلا ياتريك
وركبوا وحركوا للأسواق وابو راشد وراشد وسعد وناصر وعبدالله ركبوا مع بعض وحركوا للديره
..........••..........
بيت ابو هادي
قبل اقل من ساعه صحى هادي توضى وصلى وهو يطلع للصاله اللي فيها شهد تسوي اظافرها
هادي وهو يجلس ؛ صباح الخير
شهد اعتدلت وهي تبتسم ؛ هلا صباح النور كيفك
هادي ؛ بخيير وين امي؟
شهد ؛ بالغرفه شوي وتجي ، بحط لك فطور واجي
وقامت ووقفها هادي ؛ لا سوي لي شاي نعناع بس
وسكتت شهد وراحت تسوي له وجلس هادي يتفرج ع جواله لدقايق وطلعت له صورة خيل للبيع طنش الصوره وبثواني تذكر الكلام اللي امس قاله تركي ؛ " اووه ما شاء الله عليك ليه ماتشتري لك خيل وتدربه وتشارك بسباق "
رجع للصوره بتعجب وهو يناظر صورة الخيل ورقم صاحبه اللي يبي يبيعه وشاف مكانه اللي كان بالرياض وحس انها اشاره له وهو يسجل الرقم وارسل له
وجت شهد وهي تمد له كوب الشاي ؛ حمد يقول تبي شي من الرياض
هادي اخذ الكوب ؛ لا متى بيجون ؟
شهد رفعت كتوفها ؛ مدري تخيل لقوا محل **** فيه فرع منه بالرياض وحنا نحسب بالمدينه بس
هادي هز راسه وانشغل بجواله وراحت شهد لغرفه امها وهي تدخل ؛ يمه حمد بيرسل صور حلويات شوفيهم وش ياخذ
ام هادي اللي كانت عند الدولاب ؛ مدري اي شي ، تعالي شوفي البس هذا اليوم ؟
شهد صفرت وهي تحذف جوالها على السرير ؛ يهببل يممه لييه مالبستيه لما رحنا لجداني
ام هادي ضحكت ؛ كان مع الاغراض قبل ارتبهم والحين لقيته
شهد ؛ يهبل البسيه واحط لك مناكير عنابي يطلع يهبل صدق
ام هادي ضحكت وهي ترجع تعلقه ؛ زين اجل وانتي وش بتلبسين
شهد بقهر ؛ والله مدري اليوم برد وماعندي شي شتوي حلو
ام هادي ؛ الا الحين نلقى ياكثر قشك بس ماتدورين
ضحكت شهد والتفتت لصوت جوالها وهي تجلس ع السرير وشافت الصور اللي ارسلها حمد ؛ اششوا جت يمه تعالي شوفي وش ناخذ
وجلست عندها ام هادي وهي تشوف معها وتختار
وبعد دقايق قامت ؛ خلاص قولي له يغلفهم بصينيه بروح اشوف هادي للحين ماقام
شهد ؛ الا قام سويت له شاهي يقول مايبي فطور
ام هادي تنهدت وطلعت وشهد وراها راحت لغرفتها
ام هادي جت وهي تجلس عند هادي اللي مشغول بجواله ولا انتبه لها وتنحنحت ؛ السلام عليكم
هادي فز واعتدل ؛ هلا يمه وعليكم السلام
ام هادي ؛ كيفها يدك الحين ؟
هادي حط جواله ؛ والله شوي بس اذا حركتها ولا نمت عليها توجعني
ام هادي هزت راسها ؛ ماعليه تخف ان شاءالله اكلت علاجاتك ؟
هادي ؛ ايه اكلتها
ام هادي ؛ وافطرت ؟
هادي من هدوءها عرف انها زعلانه عليه ؛ يمه والله ما ابيه شربت شاهي والحمدلله
ام هادي وهي تقوم ؛ انا بحط لك شي تاكله واذا ما اكلته لاتكلمني
هادي سكت لأنه ماحب يزعلها اكثر واخذ جواله وهو يشوف صاحب الخيل رد بأن الخيل موجود للأن...
بعد دقايق جت ام هادي وهي تحط صحنه ؛ يلا سم بالله و كل بلا دلع
ابتسم هادي وتنهد وهو ياخذه وراحت ام هادي لغرفة شهد دقت الباب وهي تدخل وتشوفها عند المرايه وماسكه فستان وضحكت ام هادي ؛ بتلبسين هذا ؟
شهد حطته على السرير وتنهدت ؛ لا مو حلو
ام هادي ؛ حلو بس ماينفع هذا حق عزايم كبيره
شهد ؛ طيب مالقيت البس بدله عادي ؟
ام هادي ضحكت بصدمه ؛ للا والله ماتلبسين رايحه لصديقاتك انتي
شهد ضحكت ؛ مالقييت شي
ام هادي قربت وهي تشوف الدولاب وتدور لها لبس وضحكت ؛ والله كل الحلوات صيفي
شهد ؛ انا ليش مارحت مع ابوي وحمد وشريت فستان
ام هادي ؛ لو ابوك رايح تمشيه رحنا كلنا خليها المرات الجايه ان شاءالله نشتري لك
واخذت فستان وهي تمده لشهد ؛ هذذا حلو شتوي ويناسب عزيمة اليوم
شهد اخذته وهي توقف عند المرايه كان فستان شتوي صوف ولون بيج وجلست تتأمل بتفكير وقالت ام هادي ؛ والله انه حلو يدفي ومناسب شوفي حتى يدينه كم طويل وفيها نفخه محليتها
شهد رجعت تناظره ؛ احس حلو مع كعب بوت اسود وافك شعري والبس حلق واحس مايحتاج سلسال واساور
ام هادي ضحكت ؛ يبنت الحلال ماعندهم احد بس ام راشد وام عزام ويمكن ٣ ولا ٤ من بناتهم
شهد ؛ ويكفون بعدين بنروح لهم اول مره لازم نكشخ
ام هادي ابتسمت ؛ بكيفك اهم شي اقتنعتي
شهد ؛ كم الساعه نروح ؟
ام هادي ؛ مدري العصر .. بعد صلاة العصر
شهد ؛ ويين بدري ع الأقل المغرب
ام هادي وهي تطلع ؛ لا لا العصر عشان اتعرف عليهم لازم ماعرفنا بهالديره بعد مساعد واهله الا هم
وهزت راسها شهد وطلعت ام هادي وشهد رجعت تطلع اغراضها
..........••..........
بيت ابو راشد
الدوانيه
اللي من دخل هو والعيال قال سعد بضحك وهو يحط شماغه ؛ والله تغبرت بتروش قبل يأذن
ابو راشد ؛ اي والله كلنا امتلينا تراب بروح اتروش حتى انا ، راشد الكرتون نزلته ؟
راشد ؛ اووه لا والله نسيته بنزله الحين
ابو راشد وهو يطلع ؛ يلا يلا اعجل
وراح داخل وناصر وعبدالله راحوا وراه للصاله وقال راشد وهو يشوف الوقت ؛ يلا اجل يمديك باقي نص ساعه انا بدخل شوي
وهز راسه سعد وطلع راشد لسياره ابوه وهو ينزل الصندوق ودخل للمطبخ اللي فيه ام راشد وحطه وهو يبوس راسها ؛ صباح الخير يأمي شلونك
ام راشد ؛ ياهلا صباح النور بخيير شلون انت
راشد ؛ الحمدلله بخير ، هذي من خضرة المزرعه طلعنا منها للسوق وجبنا لكم منها
ام راشد ابتسمت ؛ ماشاء الله الله يعطيكم العافيه
راشد ؛ الله يعافيك
ودخل للصاله وهو يشوف البزارين كلهم عند التلفزيون وهاجر واروى عندهم وعبير وشريفه يسولفون
راشد ؛ السلام عليكم
الكل ؛ وعليكم السلام
راشد ؛ وين منيره ؟
عبير ؛ تو راحت للغرفه
راشد هز راسه ؛ زين ترا سعد ثوبه تغبر من المزرعه وبيتروش شوفي اذا عنده ثوب ولا يبي يغسل ثوبه
عبير وهي تقوم ؛ يلا الحين اروح له
راشد ؛ مافيه احد بس خذي جلالك احتياط
عبير هزت راسها وطلع راشد لقسمه
واخذت عبير جلالها وهي تلبس ووقفت عند باب المطبخ وهي تشوف امها مشغوله بالغداء والتفتت للبنات وهي تلبس نعولها ؛ هاجر قومي انتي واروى ساعدوا امي
ام راشد طلعت ؛ ايه تعالوا كملوه بجهز ملابس ابوكم
وراحت لغرفتها وقاموا هاجر واروى وعبير راحت للدوانيه
وبعد ربع ساعه جهزوا كلهم ودخل ابو راشد للدوانيه وهو يشوف عبير تبخر سعد وابتسم ؛ يلا يبو عبدالله مشينا
سعد ابتسم ؛ يلا وين ابو ناصر
ابو راشد وهو يطلع ؛ بشوفه واجي
ومشى وهو يطلع راشد ويعدل شماغه ؛ ها يبه
ابو راشد ؛ مشينا ماجو اخوانك ؟
راشد ؛ مدري والله رحت اتروش ماشفتهم داخل ؟
ابو راشد ؛ لا ماعليه يجون يجون ، ييلا ييبو عبدالله
وطلع سعد معهم ومشوا للمسجد وعبير دخلت داخل
..........••..........
في المسجد
دخل ابو راشد والعيال وهو يسلم على الموجودين وبدت خطبة الجمعه
اما برا وقفت سيارة ابو هادي ومعه حمد
ابو هادي ؛ اعججل زين لحقنا
حمد نزل وهو يدخل مع ابوه ومامروا البيت من جيتهم وقفوا عند المسجد على طول
ودخلوا وهو يشوف مساعد وجلسوا عنده
بعد دقايق دخل هادي وشافهم وقرب وهو يجلس عندهم وناظره مساعد بصدمه وقال بهمس ؛ شفيها !
ابو هادي اشر لهم يسكتون وتنهد هادي ومساعد سكت بأستغراب وخوف
ودخلوا تركي ونايف ومامداهم جلسوا الا كبر الأمام واصطفوا يصلون
بعد الصلاه اغلبهم اخذوا مصاحف وجلسوا على الطرف ومن بينهم ابو راشد وعياله وابو هادي وحمد وهادي اللي مسكه مساعد وقال بهمس ؛ هادي وش فيك ؟
هادي تنهد ؛ اقولك بعد شوي
وجلس وهو يقرا وجلس عنده مساعد وهو ياخذ مصحف
وبعد ربع ساعه بدوا يطلعون وقام هادي ولحقه مساعد والتفت هادي وهو ياخذ مساعد على طرف المسجد من برا ؛ ابوي لايشك اعلمك بعديين
مساعد ؛ وش فيك طيب يدك شبلاها ؟؟
هادي ؛ خفيفه من حديد صقعت فيه
مساعد سكت بأستغراب من اشر له هادي يسكت لما طلع ابو هادي وحمد
ابو هادي وهي يخبط على كتف مساعد ؛ وشلونه القاطع
مساعد ضحك ؛ والله ان شغلي لفوق راسي مافضيت الا اليوم
ابو هادي ابتسم ؛ الله يعينك انا والله هذي جيتي من الرياض انا وحمد نقضي للمحل
مساعد ابتسم ؛ ماشاءالله وعسى خلصتوا
حمد ضحك ؛ يارجال صرعتنا الشمس وابوي يقول اخر محل
ابو هادي ضحك ؛ مغير ٣ عاد هذا السوق وش نسوي
مساعد ضحك ؛ تتعود ياحمد ماعليك ، والسموحه ياحاتم والله اني انشغلت
ابو هادي ابتسم ؛ مسموح ، والحين تعال معنا البيت تغد... قاطعه مساعد بأبتسامه ؛ والله اني برجع البيت اهل عمي بيجون وبنتظرهم هناك ولاتقصر والله
ابو هادي ابتسم ؛ اجل فمان الله وسلم لنا عليهم
مساعد ؛ ابشر ابشر يوصل مع السلامه
ومشى لبيته والتفت ابو هادي لهادي ؛ وش يقول ؟
هادي ؛ يسأل عن يدي قلت خفيفه صقعت بحديد
ابو هادي تنهد وهز راسه ؛ اجل يلا اركب مشينا
حمد ضحك ؛ اركب اركب لاوصلنا البيت اوريك وش جبت لك
ضحك ابو هادي وهز راسه هادي وركبوا وحركوا للبيت
..........••..........
بيت ابو راشد
طلعت ام راشد من المجلس وهي تسكر الباب ؛ يبنات لحد يفتحه حطيت بخور
هاجر طلعت من المطبخ ؛ يمه استوى احطه الحين
ام راشد وهي تجلس ؛ ايه الحين يجون يلا
ورجعت هاجر عند اروى الي قالت ؛ هاجر وش البس اليوم
هاجر ؛ مدري والله انا للحين مالقيت شي حلو
اروى ؛ والله اخاف البس دراعه ثم يطلعون كاشخين واخاف اكشخ واصير لحالي كني خبله
هاجر ؛ ابك حتى انا احيانا اقول اغنياء وحركات وبعدين اقول لا مثلنا
اروى وهي تحط الصحن ؛ والله بلبس دراعه حلوه وخلصنا
هاجر ضحكت وهي تحط الغداء مع اروى
وبعد دقايق جو العيال ودخل نايف ؛ السلام عليكم
هاجر واروى ؛ وعليكم السلام
نايف ؛ ها جاهز الغداء ؟
وجا تركي وقالت هاجر ؛ اي جاهز بنحطه
تركي تنحنح وهو يدخل للصاله اللي فيها ام راشد وشريفه ونايف وراه ؛ السلام عليكم
ام راشد وشريفه ؛ وعليكم السلام
نايف جلس بالأرض عند القطوه وتركي بجنب امه اللي قالت ؛ عسى ماتأخرتوا يوم دخلتوا المسجد
تركي ؛ لا الحمدلله لحقنا على اخر الخطبه
شريفه ضحكت ؛ والله عاد على خبصتكم يوم دخلتوا تجهزون قلت بيدخلون المسجد والناس خلصت
ضحكوا وقالت ام راشد ؛ متى يفتح الخياط ؟
نايف ؛ نعمان " الخياط " يتغدا وينام مايفتح الا بعد العصر
ام راشد ؛ ييوه حاطه ثوبي عنده مدري خلص ولا لا وانا بلبسه العصر
تركي ؛ خلاص اكلمه اجل واخليه يطلعه
نايف ؛ متى يجون هم ؟
ام راشد ؛ العصر يمكن
نايف ؛ اجل ان كانه بيفتح بعد صلاة العصر اطير انا وتركي ونجيبه
هاجر طلعت من المطبخ ؛ نايف حطيته تعالوا خذوه
وقام هو وتركي اخذوه وطلعوا للدوانيه
وطلعت ترف بنت عبير وهي زعلانه وعبير وراها تضحك وقالت ام راشد من جلست عندها وهي بتبكي ؛ ليه ليه علامها الترفي ؟
عبير ضحكت ؛ سبحتها وهي ماتبي ويوم خلصت عيت تخليني امشط شعرها
ام راشد ضحكت وهي تاخذ المشط من ترف اللي مدته لها بزعل ؛ لا عااد الا تروفتنا لاتزعلونها تبين امشط شعرك انا ؟
ترف هزت راسها وضحكت ام راشد وهي تمشط شعرها وطلعت اروى بالصحن وهاجر معها ؛ منيره مهي جايه ؟
عبير ؛ راحت تبدل لبناتها ، بالله هاجر روحي جيبي خالد بالغرفه لايحوس
وراحت تجيبه هاجر ورجعت وهم يجلسون للغدا وبعد دقايق جت منيره وبناتها
..........••..........
بيت ابو هادي
قبل نص ساعه
وقف ابو هادي عند العماره وهو ينزل ؛ نزل الاغراض ياحمد لاتنسى شي
ونزل حمد اللي كان ورا ونزل هادي وهو يشوف حمد يطلع الأكياس ومبتلش وقرب وهو يوقف عنده ؛ عطني اشيل معك
حمد ؛ خذ خذ اكياس الحلا الله يستر لايكون ذاب
ابو هادي ؛ لا ماعليك براد مافيه شمس ، خذ المفتاح سكر السياره لاخلصت انا بدخل
وعطاه هادي ودخل وحمد اخذ الاكياس الباقيه وهو يسكر الباب برجله والتفت لهادي ؛ قفلها يلا دخلنا
وقفلها هادي ومشوا داخل
بالمطبخ كانت ام هادي وشهد بغرفتها ووقف ابو هادي عند باب المطبخ ؛ السلام علييكم
ام هادي ابتسمت ؛ ياهلاا وعليكم السلام ، ها عسى خلصتوا
ابو هادي ابتسم ؛ خلصنا الحمدلله ورحت انا وحمد للسوق
ام هادي ضحكت وهي تطلع معه للصاله اللي دخلوا هادي وحمد وهم يحطون الأكياس بالأرض وجلس حمد بتعب ؛ اخييه يمه والله شمس وحر ورجلي تكسرت
ام هادي بأستغراب ؛ برا حر وشمس ؟
حمد وهو يفتح الأكياس ؛ لا الرياض ياشههد ، وينها ؟
ام هادي وهي تجلس ؛ بغرفتها ، وش شريت ؟
وطلعت شهد وهي تشوف الاكياس والاغراض ؛ الله الله وش جبتوا لي ؟
حمد ؛ جبنا لك الشوكولاته بغيت اخذ لك فروه بس كلها رجاليه جبت لي انا وابوي وهادي
ابو هادي ضحك ؛ والله بغيت اتهاوش انا وياه على الفروه اللي بغى ياخذها
حمد ؛ يمه لقيت بأسامي بغيت احط اسمي قال تخلص بكره قلت خلها عندك عطني وحده بدون اسم
ضحكوا وطلع حمد الفروه ؛ هذذي تتوقعون حقت من ؟؟
شهد ؛ اتوقع لأبوي دايم ياخذ رمادي
ام هادي ؛ لا انا اقول لهادي
حمد ضحك ؛ صح على شهد افا يمه ماتعرفين ذوق زوجك !
ام هادي ضحكت واخذها ابو هادي وهو يلبسها ؛ والله زينه انتوا شوفو حقت حمد بس
هادي ؛ وينها بالله ورني
حمد طلع ثانيه ؛ اصبر اصبر ، هذي تتوقعون لمن ؟
ام هادي بضحك ؛ لهادي اكيد
حمد ؛ هالمره صح ، قم قم اشوفها
وقام هادي وهي يقلبها ؛ من اختياره ؟
ابو هادي ضحك ؛ من توقع ؟
هادي ابتسم بخفه ؛ حمد يجيب الوان مدري كيف جايه اما دامها اسود اختيارك
حمد ؛ حاصلك اختار لك والله بغيت اخذ لك حمراء وعطاني ابوي هذيك النظره
هادي ؛ الله يجزاه خير
ضحكوا وحمد حطها على كتف هادي عشان يقيسها وصرخ هادي بألم ؛ اصصبر !
ناظروه بقلق وبعدها حمد بخوف ؛ وشو !
هادي بضيق ؛ ياخي ثقيله بغت تطيح كتفي خلها خلاص
تنهد ابو هادي ؛ اجل اشوا شرينا جاكيتات بعد
حمد وهو يحط الفروه ؛ خفيفه كلها ، خلاص ماعليه انا تتوقعون وش لوونها ؟؟
شهد ؛ انا اتوقع وردي
ام هادي ؛ وانا اقول احمر
حمد خز شهد وهو يطلعها ؛ لا هذا ولا هذا شوفو بسس
وطلع فروته اللي كان لونها غريب مابين الأزرق والبنفسجي وعقد حواجبه هادي ؛ وش ذا اللون ؟
حمد وهو يلبسها ؛ زرنفسجي والله انها فخخمه
ضحكت ام هادي وشهد وقال ابو هادي ؛ ساعه يقنعني انها حلوه ويقول اخذتها عشان فيها قبوع تدفي
وطلع حمد جاكيت ؛ هذي عاد اختياري لهادي هو صح انها سودا والفروه سودا بعد بس فخمه
هادي اخذها ؛ اي والله زينه وانت وش لون حقتك
حمد ؛ يلييل تحسسوني ان ماعندي ذوق ، هه هه بيج لا تقول مهيب زينه ؟
شهد ؛ هييه هذي ابيهااا والله تجنن
ام هادي ؛ كنها طويله شوي ؟
حمد ؛ حريمتك والله ماتاخذينها لا لا زينه تنفع مع بنطلون وتيشيرت
ابو هادي ؛ اعقب والله ماتلبسها بالديره تفضحنا قلت لي بلبسها مع الثوب
حمد رجع يحطها بالكيس ؛ ايه ايه خلاص مع الثوب على طاري الثياب والله ياهادي اخذنا لك ٤ مدري هي مقاسك ولا لا
هادي ؛ وش قصدك ؟
حمد ؛ لا ابد هه شف مقاسك ؟
وحطه على هادي اللي ابتسم بخفه وهو يشوفه يقيسهم عليه
حمد ؛ لا لا زينات كل الثياب اختارها ابوي
ابو هادي ضحك ؛ والله لو تشوفون الثياب اللي بغى يختارها يااساتر بس قلت خلها انا اختارها
ام هادي ضحكت ؛ لا لا حلوات كلهم حتى الفروه ياحمد حلوه
حمد وهو يلمهم بالكيس ؛ والله يمي اني ادري ذويق ولدك
شهد ؛ والله زعلت يبه ماشريتوا لي شي انا وامي
ابو هادي ضحك ؛ والله مامرينا الا محل واحد حق ملابس العيال المرات الجايه اوديك لحالك تختارين اللي تبين انتي وامك
حمد وهو يقرب لها الكيس ؛ لا لا الشوكولاته تكفي محلها اللي تحبه بعد
ام هادي ؛ خلاص يعني هي تحبه انت لا
حمد ؛ والله لا اكل
ضحكوا وقامت ام هادي ؛ يلا يلا خذوا اغراضكم بحط الغداء
وقاموا كلهم واخذوا اغراضهم وشهد راحت معها
ورجعوا تجمعوا ع الغداء وابو هادي يسولف لهم وين راح هو وحمد
•
•
.......... ••..........
بيت ابو راشد
العصصر بعد الصلاة
وقف ابو راشد عند البيت وهو يدق بوري وناظره نايف اللي كان جالس عند الباب على جواله
ابو راشد ؛ تعال تعال شل اللحم معي
وجا نايف وهو يشيله ومشوا للمطبخ اللي فيه ام راشد ومنيره وعبير يجهزون القهوه وضيافتهم
ابو راشد فتح الباب ؛ العنود
ام راشد ؛ هلا هنا
وتنحنح نايف ودخل ابو راشد ؛ مسيهم بالخير
الكل ؛ مساء النوور
ابو راشد ؛ رحت للمزرعه وجبت ها الذبيحه اطبخوها الليله يستاهلون دامها اول جيه لازم نبيض الوجه
ام راشد ؛ اي والله يستاهلون وماتقصر
نايف ؛ يمه انا بروح للخياط انا وتركي يقول فاتح
ام راشد ؛ زيين يلا اعجل وانا امك مدري متى يجون
وطلع نايف وهو ينادي ؛ تركي
تركي من الدوانيه ؛ هااه
نايف وهو يطلع ؛ تعال مشينا السوق
وطلع تركي وهي يعدل شماغه وركب مع نايف وحركوا للخياط اللي كان داخل السوق
•
داخل
بغرفة هاجر واروى كانت عندهم شريفه اللي لبست وخلصت وهي تتفرج عليهم
شريفه ؛ اروى البسي ذا حلو
اروى ناظرت اللي تأشر عليه شريفه ؛ لا شوفي مو هذا احلا ؟
شريفه ضحكت ؛ لا سماوي انا لبست سماوي البسي هالأبيض والله حلو
اروى ؛ حتى امي تقوله بس مدري .. خلاص يبنت الحلال بلبسه والله انه حلو مافيه وقت انقي
هاجر خلصت شعرها ؛ خلاص بلبس انا اخلصي اروى
اروى خزتها ؛ ساعه تجهزين يوم خلصتي تبين تعجليني
ضحكت هاجر واخذت لبسها ؛ خلاص اطلعوا بلبس
اروى ؛ والله ما اطلع بسوي شعري
شريفه ضحكت ؛ روحي غرفتي حتى انا اخاف اقوم تصحى العنود تو زانت نومتها
تنهدت هاجر وراحت غرفة شريفه وقالت شريفه من شافت اروى تربط شعرها ؛ خلييه مفتوح مو من طوله تربطينه شوفي هاجر طويل وفكته احلا
اروى ؛ وشوله مب لازم بس
شريفه ؛ لا يبنت والله انعم خليه
وفكته اروى وهي تناظر لثواني وضحكت شريفه ؛ حلو ماعليك البسي هالأبيض والله يهبل
اروى قامت وهي تاخذ اللبس كان على تفصيل جسمها وابيض بخيوط ذهبي فخم وبنفس الوقت ناعم وجت هاجر وهي تناظر شكلها بالمرايه وقالت شريفه ؛ اوفف والله ححلو وخلي شعرك كذا على ورا
اروى ؛ اي والله لايق عليك اللون البني وعلى شعرك
هاجر ابتسمت ؛ اي والله اني قمر ادري
اروى ؛ ييوه بس اقول روحوا بلبس
هاجر وهي تقلد صوتها بأستهزاء ؛ والله ما اطلع بسوي شعري
اروى دقتها ؛ انتي خلصتي روحي بس ساعدي امي خلي عبير ومنيره يجهزون
شريفه وهي تقوم ؛ اي والله ياعمري حتى امي ثوبها عند الخياط امشي امشي اخلصي
واخذت هاجر طرحتها حطتها على كتوفها وطلعت مع شريفه واروى جلست تبدل
وبعد دقايق طلعت وهي تشوف عبير جايه للغرفه
عبير ابتسمت ؛ ياربي ياربي من ذي القمر
اروى ضحكت ؛ صدق عاد حلو ؟
عبير ؛ اي والله يهبل
ونادت وهي تدخل للغرفه ؛ ياترفف ، بالله روحي جيبيها ببدل لها
وراحت اروى للصاله اللي فيها ناصر وعبدالله عند التلفزيون وناظرت ترف وهي تشوفها تلعب مع القطوه وجلست عندها وهي تمسح عليها ؛ ونننهه ياربي وزينها .. قومي تروفه ماما تبغاك
وقامت معها وهي توديها لغرفة عبير ورجعت وهي تدخل للمطبخ اللي تو طلعت منه هاجر بالصينيه وراحت للمجلس وام راشد تجهز اللحم وشريفه واقفه وشايله العنود
اروى ؛ يمه شوفي لبسي حلو ؟
ام راشد ناظرتها ؛ ايه ايه ماشاءالله يهبل
شريفه ؛ قمر قمر ساعدي امي بروح المجلس
وطلعت واروى جلست عند ام راشد تساعدها وبعد دقايق جو تركي ونايف وهم يطقون الباب وفتحت اروى ودخلوا
تركي ابتسم ؛ اوخص هذي اروى
نايف ضحك ؛ اي والله اختنا
ضحكت اروى وقال نايف وهو يحط الكيس ؛ يمه هذا ثوبك خالص
ام راشد ؛ يمال العافيه ، اروى وديه للغرفه اجيه الحين
وطلعت اروى وتركي دخل هو ونايف اللي قال ؛ عسى عندي شماغ نظيف ، ياهااجر
هاجر من المجلس ؛ نععم
نايف ؛ تعالي سرعه سرعه
وطلعت وتركي جلس عند القطوه وهي يلعب معها
نايف ؛ شماغي اللي عطيتك الظهر غسلتيه ؟
هاجر ؛ ييوه والله نسيته
نايف شهق ؛ نعنبوا بليسك وش البس شماغ طلعي لي من تحت الارض ابك اسرعي
وراحت هاجر لغرفته وهو وراها وقالت وهي تشوف بملابسه ؛ يالييل مافيه يمدي اغسله الحين
نايف طلع الشماغ اللي عليه وهو يلسعها فيه ؛ هاك هذا غسيل وكوي مستعجل
هاجر حطت يدها على فخذها بألم ؛ حسببي الله ماراح اغسله
نايف ؛ والله ان تغسلينه وانا ماتشوفين الدرب ، يلا اطلعي بلبس واطلع والقاه خالص
ودفها وهو يسكر الباب وتأففت بقهر وهي تروح تغسله
بعد دقايق جا تركي وهو يشوفها بالسيب عند طاولة الكوي وضحك وهو يدخل بدل وطلع وطلع وراه نايف وناظر هاجر ؛ هاه ياورعه خلص
هاجر ؛ قسم بالله لا اكوي وجهك امسك بس خلص
نايف اخذه وهو يقلبه ؛ ايه شاطره هذا درس عشان لاتنسين ملابسي مره ثانيه
وطلع وراحت هاجر بقهر للمجلس ودخل نايف للمطبخ ؛ ها يمه وين قهوتنا
ام راشد وهي تطلع ؛ اخذها تركي للدوانيه هو والعيال " تقصد ناصر وعبدالله "
وراحت لغرفتها ونايف طلع للدوانيه
..........••..........
بيت ابو هادي
اللي كان جاهز هو وهادي وحمد وجالسين يتقهوون بالصاله وام هادي بغرفتها هي وشهد
ابو هادي وهو ينادي ؛ يلا ياهييه تأخرنا
وماردوا وقال حمد بضحك ؛ توهم والله مايخلصون ووراهم عزيمه
ابو هادي ابتسم وهز راسه سكت لدقايق وقال ؛ هادي عطني منديل
وما انتبه له هادي اللي كان مشغوله بجواله وناظره ابو هادي بأستغراب ؛ هادي
هادي ناظره ؛ هلا يبوي
ابو هادي اخذ المنديل من حمد اللي مده له ؛ اقول عطني المنديل ماسمعت
هادي اعتدل وهو يحط جواله ؛ لا والله ، ها وينهم تأخروا
ابو هادي ؛ ماخلصوا للحين
وسكت هادي لثواني وتنحنح ؛ يبه بقولك شي
حمد عض شفته بتوتر واعتدل ابو هادي ؛ قل
هادي ؛ الحين بهالديره مافيه نادي خيول ولا اسطبل صح ؟
حمد عقد حواجبه بأستغراب وقال ابو هادي ؛ والله مدري لا الظاهر
هادي ؛ مافيه مافيه ، وانا تعرف بالمدينه احب اروح للخيول واشوفها واليوم شفت واحد عارض خيل للبيع ودام ان مافيه خيول الا بالرياض وبعيده وزحمه انا قلت اشتريه لي وادربه
ابو هادي رفع حاجبه ؛ ويدك ؟
هادي ؛ ماعليك تطيب ان شاء الله وش قلت ؟
ابو هادي ؛ والله الصدق ماهيب شينه بس وين تحطه يعني يبيله اسطبل ولا مكان واسع
حمد اعتدل بحماس ؛ يبه فيه الحوش الحوش واسع نخليه قسم للجلسه ونصه للخيل
هادي ؛ لا خله علي انا اسوي له اسطبل ورا العماره وابني له مكان
والتفتوا على صوت الباب وقال ابو هادي ؛ خلاص نشوف افكر ، ها يامريم انتوا ماخلصتوا ؟
وجت شهد اللي تلبس نقابها ؛ خلصت يبه بشوف امي
ورجعت للغرفه وقاموا ابو هادي وهادي وحمد اللي وقف عند المرايه بثوبه الكحلي وهو يعدل غترته البيضاء واطرافها بالأزرق ويلفها عصبه وضبطت وهو يحط العقال على الكنب ؛ بخليها كذا
ابو هادي ابتسم وهو يوقف قدام المرايه وضبط شماغه وعقاله وهو لابس ثوبه البني الغامق وهادي اختار انه يلبس ثوب رمادي وغتره بيضاء وابتسم هادي ؛ تقلدني ياحمد
حمد ضحك ؛ والله انا لبست غتره قبلك
هادي ؛ بس انا لفيتها عصبه قبلك
ابو هادي ضحك ؛ ماعليه كلها زينه ، يللا
وطلعت ام هادي وهي تسوي طرحتها وشهد وراها
ام هادي ؛ حمد خذ كيس الحلا وانتي ياشهد خذي حقنا
حمد اللي كان بيتكلم بس سكت من قالت لشهد بعد وهو ياخذ حقهم ومشى ابو هادي ؛ يلا نروح مشي ؟
ام هادي ؛ لا لا تراه لو قريب بينا طريق
ابو هادي ؛ ماتعدي سيارات عادي
ام هادي ؛ لا لا على السياره احسن ومع بعض
ابو هادي ؛ يلا اجل معي
وطلعوا وقفلت ام هادي الباب وركبوا بسيارة ابو هادي وحركوا وبثواني وقفوا عند باب الدوانيه لأن ابو هادي يشوف سياراتهم عنده وهو يدق بوري
..........••..........
بيت ابو راشد
نفس الوقت كانوا العيال بالدوانيه وفز ابو راشد ؛ قم قم انت وياه جو
وطلعوا معه لبرا وابو هادي فاتح الشباك وضحك بوهقه ؛ يبو راشد الأهل من هالباب صح ؟
ابو راشد ابتسم وهو يأشر له ؛ الثاني الثاني
وحرك لجهة الباب الثاني وابو راشد دخل بسرعه من باب المطبخ ؛ اطلعوا اهل ابو هادي جو اطلعوا لهم
وقامت ام راشد وعبير ومنيره للحوش ورجع ابو راشد يطلع للدوانيه
برا عند الباب الكبير واللي هو باب الحوش وقفت سيارة ابو هادي وهو يلتفت لأم هادي ؛ يلا انزلوا من هالباب وحنا الظاهر عند الباب اللي تو
ام هادي وهي تنزل ؛ طيب يلا شهد
ونزلت هي وشهد ودخلوا وحرك ابو هادي ووقف عند الدوانيه ....