ياديرةٍ ضمّت كل الأحباب

Part 42

..........••..........
بيت ابو راشد
كانت عبير ومنيره والبزران بالحوش بحكم ان الجو كان غيم رغم انه هوا بارد وشريفه بالصاله هي وبنتها وام راشد راحت لغرفه تركي وهي تدخل وتشوفه نايم
ام راشد بأستغراب ؛ تركي للحين نايم ؟ ... تركي
تركي تحرك ؛ ها يمه
ام راشد ؛ الظهر بيأذن الحين يجي ابوك قم
تركي ؛ ككم الساعه ؟
ام راشد ؛ بتجي ١٢ يلا لايجي ويلقاك نايم
تركي تنهد وهو يمسك راسه وجلس وهو للحين ماشبع نوم وطلعت ام راشد وهي تسمع صوت القطوه بالحمام ' الله يكرمكم ' وقربت للباب وهي تلقاه مفتوح واروى وهاجر يسبحون القطوه وشهقت وهي تهاوشهم ؛ وجع وجع انتي وياها برد حسسبي الله
هاجر ؛ يمه عشان اذا وصخه تنضف
اروى ؛ المويه دافيه يمه اصبري الحين نطل.... قاطعتها ام راشد اللي حذفت عليها النعله ؛ اطلعي اطلعي انتي وياها وشوفي شسوي فيكم
وكملت تهاوشهم وهم يصبون المويه بسرعه وطلعت اروى وهي شايلتها وهاجر تسكر المويه
ام راشد مسكت اذن اروى ؛ انتي ماتخافين الله بتذبحينها بهالبرد !
اروى ؛ ااه يمه هاجر تقول اذا سبحناها نتأكد انها نظيفه
وطلعت هاجر وهي تسكر الباب ؛ يمه مافيه منشفه زايده
ام راشد قرصتها ؛ الا فيه حقتك والله ما انشفها الا فيها
هاجر مسكت يدها بألم ؛ ايي يمه
ودفتهم ام راشد وهي تهاوشهم ؛ اذلفي هاتي منشفه بسرعه
هاجر ؛ منيين
ام راشد بعصبيه ؛ بالمطبخ فيه على الدولاب هاتيها
ومشت وهي تسحب اروى معها وطلعوا للصاله وهاجر اللي ركضت تجيب المنشفه
شريفه شهقت ؛ هذي ليه كذا
اروى ؛ سبحناها عشان تنضف
ام راشد سحبت الدفايه وهي تاخذ المنشفه من هاجر اللي جت تركض
ام راشد ؛ حطيها على المنشفه حسابك عندي انتي وهالخبله
حطتها اروى بالأرض ع المنشفه عند ام راشد اللي جلست وهي تنشف القطوه قريب الدفايه وتهاوش اروى وهاجر اللي واقفين
شريفه ؛ حرام عليكم والله مالكم داعي بتذبحونها بالبرد
اروى ؛ هاجر قالت خلينا نسبحها بتصير نظيفه ونقدر نربيها
هاجر ؛ وانا الصادقه عشان مايلمسونها الورعان وتطلع وصخه كذا نتأكد نضفت
ام راشد وهي تمسح القطوه ؛ اقول والله انها انضف من وجهك انقلعي هاتي صندوقها اللي بالحوش
وتأففت هاجر بقهر وهي تروح للمطبخ وطلعت من الباب اللي ورا بحكم انه اقرب وتسمع اصوات البزارين بالحوش بالجهه الثانيه عند الدكه وناظرت للجو والغيوم اللي غطت الشمس لدرجة الجو كأنه المغرب مو الظهر ابتسمت وهي تاخذ كرتون القطوه اللي قريب سيب راشد وسمعت صوت سياره بس توقعت انها من الشارع والتفتت بصدمه لباب الحوش اللي فتح وماتقدر ترجع لباب المطبخ لأنه مقابل باب الشارع ركضت بخوف وهي تدخل لسيب راشد
•
قبل دقايق
برا وقفت سيارة نايف اللي حلف على مشاري يجي معه عشان يتغدون ويروحون للمزرعه لأنه خميس ويبي يطلع بسرعه
نايف ؛ يلا يلا خلنا نتغدى وننهج للمزرعه نقعد لليل
مشاري ضحك ؛ يخوي لو خليتني اروح البيت انام لي شوي والعصر خير
نايف وهو ينزل ؛ لاحق يبن الحلال على النوم خلنا نتونس بس ادخل ادخل
وفتح باب الشارع اللي كان مسكر نص تسكيره وهو يدخل هو ومشاري
نايف ؛ اقلط بالدوانيه بجي الحين حياك حياك
ابتسم مشاري ودخل للدوانيه ونايف دخل للمطبخ وهو ينادي ؛ يمه
ام راشد من الصاله ؛ ها هنا
ودخل نايف وهو مستعجل وناظر القطوه وضحك ؛ اوووه ام راشد صار عندها حفيده جديده تروشها وتنشفها
ام راشد ؛ لا والله الخبلات مروشينها بالبرد
نايف ناظر اروى ؛ منهم
اروى ؛ هاجر قالت خلينا نروشها عشان تنضف
ام راشد ؛ خبله ولعبت عليك وين راحت
نايف ؛ يمه ترا مشاري بالدوانيه بنتغدا ونروح المزرعه تركي وينه ؟
اروى شهقت ؛ هاجر
ام راشد ؛ نايف هاجر بالحوش ؟
نايف ؛ لا مافيه احد
شريفه ؛ الا ترا طلعت تجيب صندوق البسه
نايف ؛ بروح اشوفها بس تركي وينه
اروى ؛ نايم
ام راشد ؛ صحيته اروى روحي شوفيه وانت شف هاجر وين راحت
وراحت اروى تشوف تركي ونايف رجع يشوف هاجر
بالدوانيه قبل دقايق من لما دخل مشاري وجا بيجلس وهو يتذكر ان جواله بالسياره ورجع بيطلع يجيبه
هاجر كانت تناظر من طرف الجدار وشافت الرجال اللي دخل ونايف اللي راح للمطبخ وجت تركض بتدخل وطلع مشاري وهو يشوف البنت اللي قدامه وطرحتها اللي على طرف شعرها وشهقت ورجعت تركض لسيب راشد واختبص مشاري ورجع يدخل للدوانيه ومن الخبصه صفق الباب وراه ولأنه كان واقف عند باب الدوانيه سمع نايف اللي طلع ينادي بهمس ؛ هاجر ... هاجر
هاجر اللي طاح قلبها وهي ماقد شافت مشاري ولا تدري من هالرجال بس تأكدت انه شافها لأنها ناظرته وناظرها وفزت من سمعت نايف يناديها وهي تاخذ حجر صغير وحذفته والتفت نايف وركض لعند قسم راشد وناظر هاجر اللي معها الكرتون ووجها منقلب
نايف ؛ انتي وش جايبك !
هاجر ؛ سسمعت صوت رجال خفت يجي هنا
نايف ؛ ليه مادخلتي يوم سمعتيه
هاجر ؛ ممدري يشوفني
نايف ماشك لأنه صدّق انها خافت يجي ورجع ناظر الباب اللي مسكر استغرب بس تنهد وهو يلتفت لهاجر ؛ اركضي وراي اخلصي
ومشى نايف بسرعه وهاجر وراه وهي تدخل للمطبخ وترجف وتدعي انه مايقول لنايف والتفتت لنايف بخوف ؛ من الرجال
نايف استغرب وقال بصدمه ؛ شدخلك
هاجر ؛ اا لا بس يعني من بيجي الظهر
نايف ؛ مشاري ليه وش فيها ؟
هاجر سكتت بصدمه وهي تدري انه خوي نايف وتأكدت انه بيقول له وخافت وهي تركض للصاله وحطت الكرتون وقالت ام راشد ؛ انتي وين رحتي ؟
هاجر ؛ ييمه جا رجال واندسيت بسيب راشد وجا نايف وطلعت
ام راشد ؛ ليكون شافك ؟
هاجر ؛ للا لا
ومشت بسرعه وهي تدخل للغرفه ودخلت عبير ومنيره وبزرانهم وقال نايف ؛ يمه جهزوا الغداء تكفون بسرعه الجو يبيله المزرعه
طلع تركي وهو يتنحنح وشافه نايف وقال بأستغراب ؛ تركي توك تقوم ؟؟
تركي ؛ السلام عليكم
الكل ؛ وعليكم السلام
نايف ؛ مشاري بالدوانيه نبي نتغدا ونروح المزرعه تخاوينا
تركي تنهد بتعب ؛ والله بصلي الظهر وارجع انام
ام راشد ؛ صادق ؟؟ وش هالنوم
تركي ؛ والله مصدع وتعبان
نايف ؛ اجل يمكن يجي معنا ابوي والعيال لو تجي ازين توسع صدرك
تركي ؛ لا لا والله ابوي والعيال ماجو ؟
نايف ؛ لا الحين يجون بروح الدوانيه تعال
وطلع نايف مستعجل وجت اروى وقالت ام راشد ؛ اروى روحي شوفي الغدى انتي وهاجر .. وين راحت
عبير ؛ دخلت بروح انا
وراحت عبير للمطبخ وراحت معها منيره ومعهم اروى
تركي وهو يناظر القطوه بأستغراب ؛ مروشينها ؟
ام راشد بعصبيه ؛ ايه اروى وهاجر
ابتسم تركي وهز راسه ورجع للغرفه واخذ جواله وهو يشوف هادي مادق ورجع يدق عليه ولقى جواله مقفل بعد واستغرب وقام وهو يروح للدوانيه
بالدوانيه دخل نايف ؛ اووه يالبرد برد
مشاري ابتسم بأرتباك ؛ اييه ايه عشان كذا سكرت الباب
نايف هز راسه وتطمن وقرب وهو يشب النار ودخل تركي وهو يسلم على مشاري وبعد دقايق جا ابو راشد والعيال وهم يسلمون عليه وقال نايف انهم بيروحون للمزرعه وابو راشد والعيال قالو بيلحقونهم العصر
..........••..........
عمارة ابو هادي
وقف ابو هادي وهو يشوف سيارة المستأجر ونزل وهو يدخل للبيت
ام هادي كانت بالمطبخ وشهد تكنس الصاله ودخل ابو هادي ؛ السلام عليكم
شهد طفت المكنسه ؛ وعليكم السلام هلا يبه
ابو هادي ؛ وين امك ؟
شهد ؛ بالمطبخ
ابو هادي ؛ وهادي وحمد ؟
شهد ؛ هادي للحين نايم وحمد صاحي بغرفته
هز راسه ابو هادي وهو يروح للمطبخ ودخل وهو يشوف ام هادي تجهز الغدا والتفتت على ابو هادي اللي قال ؛ حمد كان نايم ؟
ام هادي ؛ والله لقيته نايم وانا اصحيه وهو يطلع ركض للرجال يقول كان برا واخذ المفتاح وراح شقته
ابو هادي ؛ وهادي ماصحيتيه ؟
ام هادي بضيق ؛ لا والله خله ينام بالله تراه من امس مانام
ابو هادي تنهد ؛ المهم بصلي واجي توه الغدى ؟
ام هادي ؛ لا خلاص الحين يستوي ترا زودته نحط لجيرانا
ابو هادي ؛ من جيرانا ؟
ام هادي ؛ اللي سكنوا ولا نحط لأهل ابو راشد ؟
ابو هادي ؛ والله مدري حطي للي سكنوا ابو راشد نروح لهم بكره وسوي لهم اللي تبين
ام هادي هزت راسها وراح ابو هادي يصلي وطلع حمد من شاف ابوه دخل الغرفه وهو يمشي بشويش ونادى بصوت خفيف ؛ شههد ، شهدوه
شهد التفتت بأستغراب وقربت لحمد اللي ورا باب غرفته ؛ وشو
حمد وهو فاتح نص الباب ؛ ابوي لايكون معصب
شهد ضحكت ؛ لا ماعليك دخل يصلي ويجي يتغدا
حمد ؛ اكييد ؟
شهد بضحك ؛ ايه يلا تعال
وراحت للمطبخ وحمد طلع للصاله وجلس وهو مستغرب هادي ماقام ولا احد صحاه وبعد دقايق طلع ابو هادي وتنحنح حمد وابتسم بوهقه ؛ هلا يبه
ابو هادي تنهد وهو يجلس ؛ هلا ، متى صحيت ؟
حمد تنحنح ؛ ١٠ وشوي
ابو هادي ؛ وش قال الرجال يوم طلعت له
حمد ؛ ماقال شي عطيته وقلت حياك الله وراح لشقته هو واهله
ابو هادي ؛ ماوصلته ؟
حمد ؛ لا والله يدلها ماعليه
ابو هادي ناظره بطرف عينه وقمط حمد وجت ام هادي وهي معها صحن ؛ حمد وده لشقة جارنا
حمد فز واخذه وهو يروح يوديه وام هادي راحت تجيب صحنهم
طلع حمد للسيب وهو يشوف الجو ؛ ايييه وش هالجو الزين
ومشى لعند الدرج وطلع للدور الثاني وهو يتلفت نسى اي باب حقهم وتذكر وهو يحط الصحن ودق الباب وطلع الرجال ؛ هلا
حمد ؛ مساء الخير وشلونك
ابو زياد ؛ مساء النور بخير عساك طيب
حمد ؛ والله الحمدلله ، اا ها ان شاءالله عجبتك
ابو زياد ؛ اي والله ماقصرتوا ، انت ولد ابو هادي بس مو هادي صح ؟
حمد ؛ ايه انا الثاني حمد
ابو زياد ابتسم ؛ ماشاءالله الله يحفظكم
حمد ابتسم ؛ تسلم ، هذا غداكم وبالعافيه
ابو زياد ؛ ليه الكلافه الله يسعدك والله ماتقصرون
حمد ؛ ابد حق وواجب عليكم بالعافيه
ابو زياد ابتسم ؛ الله يعافيك سلم لي على ابوك
حمد هز راسه ؛ يوصل
ونزل وهو يدخل للصاله اللي تجمعوا فيها يتغدون ؛ وديت له يبه يسلم عليك
ابو هادي ؛ الله يسلمه يلا قربوا بسم الله
•
بعد ماخلصوا قال ابو هادي وهو يقوم ؛ بروح لسوق الزل اليوم خلصنا المحل باقي الاغراض بطلع الرياض بكره الفجر ان شاء الله
حمد ؛ بروح معك بكره
ابو هادي ؛ واليوم ؟ ماتبي تروح معي لسوق الزل ؟
حمد ؛ يبه رحنا له وشفته وش رايك نروح الرياض الحين ؟
ابو هادي ؛ لا بروح له انا الرياض بكره
حمد ؛ اجل بجلس والله
ابو هادي ؛ بكيفك انا بروح الحين ، تبون شي ؟
ام هادي ؛ لا سلامتك بس يمكن مسكره المحلات
ابو هادي ؛ لا فاتحه يلا مع السلامه
وطلع والتفت حمد لأمه ؛ يمه ماسأل عن هادي ولا قال صحوه لو انا كان ماخليتوني
ام هادي ؛ الا سأل عنه ووالله عاد اخوك تعبان ولا نام امس انت شبعان نوم احمد ربك ماقال لك شي على النومه اللي اليوم
حمد ؛ ايه اشوا كنت احتريه يسطرني اذا جا
ضحكت شهد وهي تاخذ الاغراض مع امها للمطبخ وقام حمد وهو يروح للصاله الثانيه اللي فيها التلفزيون وهو طفشان يبي يتفرج وابتسم من تذكر شي وركض لأمه بالمطبخ
حمد ؛ يمه طلبتك
ام هادي ؛ ها وش تبي
حمد ؛ قولي تم تكفين
ام هادي ؛ والله اذا اقدر تم
حمد ؛ بفصل التلفزيون واشبك فيه السوني
شهد ؛ للا يمه تكفين ثم يخسر ويقعد يصايح ويدعي
حمد ؛ انطمي انتي اكلم امي ، يمه والله ماتسمعين صوتي بفصله ها
ام هادي ؛ مافيه كنب ولا فرشه تجلس ع البلاط يعني
حمد ؛ اجيب كرسي ولا احط مخده ها وش قلتي
ام هادي تنهدت ؛ خلاص رح لاتشغلني
وابتسم حمد وهو يناظر شهد ويقهرها وراح لغرفته واخذ السوني اللي بالشنطه وهو يطلعه ؛ اييه يازينك مبطين ها
وشاله وطلع للصاله وهو يحطه ويفك اسلاك التلفزيون ويشبك البلايستيشن ورجع للغرفه اخذ له بطانيه وحطها بالصاله على الارض وسكر الباب وهو يشغله ويقعد يلعب
..........••..........
بيت ابو راشد
العصر
ابو راشد والعيال راحوا للمزرعه اللي سبقوهم لها نايف ومشاري من الظهر وتركي اللي نام من ساعتين وام راشد والباقي بالصاله
ام راشد وهي تشوف ساعتها ؛ تركي مدري علامه بس نايم بقوم اشوفه عسى مو تعبان
عبير ؛ اتوقع مانام البارح
اروى ؛ ايه تلقينه يتمشى ومواصل الليل كله
ام راشد وهي تقوم ؛ مدري عنه بروح اشوفه
وراحت لغرفته والتفتت شريفه ؛ وين هاجر
اروى ؛ اتوقع نايمه بعد
شريفه ؛ ابيها تسوي رضاعه لعنودي ، خذي سوي لها بالله
اخذتها اروى وهي تقوم دخلت ام راشد لغرفة تركي وهي تلقاه نايم وقربت وهي تلمس جبينه وتحرك تركي وهو يناظرها وعقد حواجبه ؛ وشو يمه
ام راشد بعدت ؛ ياحبيبي نايم طول الوقت وانا احسب فيك شي ماشبعت نوم ؟
تركي تنحنح وهي يجلس ؛ ليه كم الساعه
ام راشد ؛ ٤ الا شوي قم صل وتقهوا عشان تصحصح ، مانمت امس ؟
تركي مسح وجهه وتنهد ؛ لا طلعت بالليل اتمشى
ام راشد هزت راسها ؛ الله يصلحك لو يدري ابوك بيهاوشك قم والمحل مارحت له ولا رحت معهم للمزرعه حتى
تركي ؛ يلا اقوم الحين جاي جاي
وطلعت ام راشد واخذ تركي جواله وهو يشوف الساعه وتذكر هادي وهو يدق عليه وتأفف بتوتر لما لقى جواله باقي مقفول وقام بدل وطلع
بالصاله جلست ام راشد وهي تتذكر ؛ جوالي بالشاحن هاتيه ياهاجر .. هاجر
عبير وهي تقوم ؛ بالغرفه هاجر انا اجيب جوالك وينه
ام راشد ؛ هذا هو بوصلة الدفايه
شريفه ؛ يمه وش فيه تركي
ام راشد ؛ مافيه شي يقول مانام امس ، بدق على ام عزام الصباح موعدها بشوف وش سوت
وجت اروى وهي تعطي شريفه رضاعة العنود وشافت ام راشد اللي تأشر لهم يسكتون واشرت اروى لعبير " بمعنى مين "
عبير بهمس ؛ بتكلم ام عزام
اروى فزت وهي تجلس قريب امها اللي قالت ؛ سلام عليكم
واروى تقرب تحاول تسمع وتأشر لأم راشد تسويه سبيكر وام راشد تأشر لها تسكت ولصقت اذنها على الجوال وام راشد تبعدها وتكلم ؛ وش اخبارك
وسمعت اروى ام عزام اللي قالت ؛ هلا هلا والله اني بخير يوم سمعت هالصوت
ام راشد ابتسمت ؛ يابعد قلبي انتي وش صار على موعدك اللي اليوم رحتي له ؟
ام عزام ؛ ايه ايه رحت والحمدلله مافيه شي بس غيروا لي العلاجات خففوها اشوا
ام راشد ؛ ياعوينتي الحمدلله واخباركم انتوا
والتفتوا على تركي اللي تنحنح ودخل وسكت وهو يشوف امه تكلم وجلس وهو يناظر اروى بأستغراب اللي لاصقه بأم راشد وام راشد تبعدها والباقين يضحكون ومدت له عبير الفنجال وهو ياخذه ويسمع معهم
ام راشد ؛ الحمدلله ، واخبار الجبيل واهلها
تركي اعتدل بتركيز وعرف من تكلم من ناظرته اروى وهي تبتسم بضحك
ام راشد ضحكت ؛ ياحبيبتي عطيني ياها
شمموخ بأبتسامه ؛ الو خالتي
اروى توسعت ابتسامتها واعتدلت وهي تأشر لأمها تكلمها
ام راشد ؛ هلا ياعيني انتي وش اخبارك
شموخ ؛ والله اني بخير الحمدلله وش اخبار شروف واروى والبنات
اروى ماتحملت وهي ترفع صوتها بضحك ؛ بخييير انا اشتقتت لك
ام راشد ضحكت وهي تشوف اروى بتاخذ الجوال ؛ خذي خذي خويتك بتكلمك
شموخ ابتسمت من قالت اروى وهي تقوم ؛ ششموخييي
شموخ ضحكت ؛ هلا عمريي
ودخلت اروى للغرف وهم يناظرونها والكل انتبه لتركي اللي صار وجهه احمر وهو يحاول يمسك ابتسامته وابتسم وهو يتنحنح
ام راشد استغربت وهي تغير الموضوع ؛ اقول تركي بتروح المزرعه ولا المحل
تركي ؛ والله مدري يمكن المحل
ام راشد هزت راسها وكمل تركي قهوته وابتسامته شاقه وجهه
بالغرفه دخلت اروى وهي تشوف هاجر جالسه وتفكر وقربت وهي تجلس عندها ؛ هذي هذي هاجر كلميها
هاجر فزت بأستغراب وهي تاخذ الجوال ؛ هلا
شموخ ؛ ياعمري هااجر
هاجر ابتسمت ؛ شمووخ هلا والله كييفك
شموخ ؛ والله بخير الحمدلله
هاجر ؛ وخالتي كيفها
ابتسمت ام عزام اللي كانت عند شموخ ؛ بخيير ياقلبي
هاجر بأبتسامه ؛ دوم يارب
اروى ؛ ششموخ دقي علي كل مافضيتي ترا مشتاققه لك
شموخ ابتسمت ؛ ان شاء الله
ام عزام ضحكت ؛ عطوني امكم بكلمها
ضحكت اروى وهي تقوم بالجوال وهاجر بقت بالغرفه وطلعت اروى للصاله وقام تركي ؛ يلا يمه بروح انا تبون شي
ام راشد وهي تاخذ الجوال ؛ لا ياحبيبي سلامتك ، ها ام عزام وش قالوا لك يوم رحتي لهم
ام عزام بدت تسولف لها عن موعدها وما انتبهت لشموخ اللي ابتسمت لاشعورياً من سمعت صوت تركي ولا فارقتها الأبتسامه حتى لما خلصت ام عزام من ام راشد وقفلت
ام راشد قفلت وهي تلتفت للبنات ؛ تسلم عليكم ام عزام
الكل ؛ الله يسلمها
ام راشد ناظرت اروى ؛ هاجر صاحيه ؟
اروى ؛ ايه بالغرفه
ام راشد ؛ وليه ماتجي
اروى قامت وهي تجلس عند القطوه اللي بالأرض وعندها البزران ؛ والله مدري عنها
وبعد دقايق طفشت وهي تقوم للغرفه ودخلت وهي تشوف هاجر سرحانه وللحين جالسه وقفت اروى عند المرايه وقالت وهي تعدل شعرها ؛ علامك ماتجين للصاله
والتفتت على هاجر بأستغراب ؛ هيه اكلمك
هاجر فزت ؛ هاا وششو مافيني شي صكني راسي وما ابي اروح عند صجة الورعان
اروى سكتت بأستغراب وهي تكمل تعديل شعرها ؛ اقول ودي اقص شعري
هاجر ؛ اموت واشوفه طويل كل شوي وانتي قاصته يختي خليه يوصل لكتفك لو مره
اروى وهي تلعب بشعرها ؛ والله القصير علي احلا متعوده عليه كذا انتي تخيلي شكلك بشعر اسود وقصير ؟
هاجر ؛ لا مستحيل اقصه انا احبه طويل وان شاء الله يصير مثل شعر هيلا
اروى ؛ ايه تعودتي عليه بالطويل والبني خلك ع الحنا انتي وهيلا انا بقصه
هاجر سكتت وهي تتنهد ولمت شعرها اروى وهي تقرب وتجلس بجنب هاجر ؛ ياحض العيال رايحين للمزرعه الجو يهبل
هاجر ارتبكت وهي تدري ان مشاري معهم وعلى اعصابها تخاف يقول لنايف ويدرون
اروى ناظرتها بشك وهي تشوف توترها وسرحانها ؛ انتي فيك شي؟
هاجر بخوف ؛ اروى اقول لك شي بس قولي والله ما اعلم احد
اروى حطت يدها على قلبها ؛ والله اني حاسه ، ما اعلم احد والله وش فيك ؟
هاجر قربت وهي تنحنح بتوتر ؛ والله انه بالغلط اليوم لما جا مشاري خوي نايف انا كنت بالحوش ونا.... قاطعتها اروى اللي شهقت ؛ شافك ؟؟
هاجر بخوف ؛ اصصص ايه نايف دخل للمطبخ وانا اندسيت بسيب راشد وشفت مشاري دخل الدوانيه وجيت بدخل المطبخ وطلع مدري وش طلعه
اروى وهي مصدومه ؛ ونايف درا
هاجر ؛ لاا اخاف يعلمه عاد هم بالمزرعه ثم يدرون الباقين
اروى ؛ الله يقلعه ان كانه علم .. لا لا مايقدر وياكل تبن قولي كذاب ماشفته ولا طلعت
هاجر ؛ والله مدري انا اخاف يقول له وشافني هو حتى ان عيني طاحت بعينه وانحشت
اروى سكتت وهي تتأفف بتوتر وهاجر تنهدت بخوف وقامت اروى بعد دقايق ؛ قومي نطلع خلي ذا الشغله مايقدر يقول لهم ماعليك
هاجر ؛ وين نطلع
اروى ؛ نروح البقاله ولا نطلع للحوش الجو يهبل يبنت اطلعي شوفيه
هاجر قامت وهي تفتح شباك الغرفه اللي على المسجد وبيوت الديره وتشوف الجو والتفتت لأروى ؛ لو نقول لأمي بنروح البقاله تخلينا ؟
اروى ؛ ايه اقنعها انا يلا
هاجر ؛ يلا اجل بنقول لها اذا وافقت نروح
وطلعوا للصاله وهم يجلسون عند ام راشد اللي بحضنها العنود
هاجر ؛ يمه تكفين بنروح انا واروى للبقاله
ام راشد ؛ لا برد ويمكن يجيكم مطر
اروى ؛ لا بسرعه ونرجع ناخذ شراشفنا
منيره ؛ عاد والله ودي اطلع حتى انا
عبير ضحكت ؛ نروح ؟
منيره ؛ تم عمه تروحين معنا ؟
ام راشد ؛ والله برد عليكم وان امطرت واصردكم المطر
عبير ؛ عاد ان جا مطر نمر على تركي بالمحل يرجعنا
ام راشد ؛ خلاص خلوا الورعان روحي انتي ومنيره وهاجر واروى بس
منيره ؛ خلاص نخليهم عندك انتي وشريفه وش نجيب لكم
شريفه ؛ بخاطري عصير مانجو
ام راشد ؛ وجيبوا للورعان حلاو
عبير ؛ ان شاء الله ، يلا قوموا البسوا
وفزوا هاجر واروى ومنيره طلعت غرفتها تاخذ عبايتها وعبير بعد واخذوا شالات عشان برودة الجو وطلعوا مع بعض للبقاله
وجلست ام راشد هي وشريفه مع البزران اللي مندمجين بالتلفزيون ولا انتبهوا لهم لما راحوا
..........••..........
بعد نص ساعه
بيت ابو هادي
ام هادي كانت بالصاله وحمد للحين يلعب بالصاله الثانيه
بغرفة شهد
كانت جالسه على الكرسي عند المرايه وتحط ماسك وتغني وهي تسمع صوت مطر وخلصت وهي تقوم وتفتح شباك غرفتها كان مكان شباكها من ورا عمارة ابو هادي ومافيه بيوت وناظرت السماء اللي امطرت والزرع والشجر وسكرت الشباك وهي تطلع للصاله ؛ يمه امطرت
ام هادي ؛ ماشاءالله .. وش خابصه بوجهك انتي
شهد ضحكت وهي تجلس ؛ حاطه ماسك احط لك ؟
ام هادي هزت راسها ؛ لا انا ان ماسويته بنفسي ما احط
شهد ؛ طيب ابوي متى يجي
ام هادي ؛ مدري والله ويقول بيروح للرياض بكره الفجر اخاف يتأخر وحنا العصر بنروح لجيرانا اهل ابو راشد
شهد ؛ اييه صح بكره نزورهم وش البس ؟
ام هادي ؛ اللي يريحك ماتجلسين بعبايتك ؟
شهد ؛ لا ما احب بنزلها بس بلبس شي ناعم مابيجيهم احد صح ؟
ام هادي ؛ لا ما اتوقع
شهد ؛ وانتي يمه وش بتلبسين
ام هادي ؛ جلابيتي وبعبايتي ماني مطلعتها
شهد ؛ لا ييمه يكفي بعشاء مساعد مانزلتيها نزليها بكره والبسي مخور والله يهبل عليك
ام هادي ؛ يصير خير اشوف
غرفة هادي
تحرك هادي وفتح عيونه بألم من ضغط على يده بالغلط وهو يشوف الأنوار طافيه وصوت مطر وهوا وتنهد وهو يجلس وماسك يده بضيق والمها زاد وعرف انه كان نايم عليها التفت يدور علاجه ولقى على الدرج جواله والمفتاح تنهد وهو يقوم وشغل النور واخذ جواله وهو يشوفه طافي حطه بالشاحن وجلس بضيق اخذ علاجه واكل حبه من كل مسكن لأنه ماقدر يتحمل الم يده وقام وهو يفتح الشباك ولفحه الهوا البارد وريحة المطر وصوته والأرض اللي امتلت بالمويه اخذ نفس وهو يستند على الشباك ويناظر الكرسي اللي حطه عند الجدار للحين بمكانه وغمض بضيق يتذكر تفاصيل امس اللي اصلاً مانساها لما راح لبيان وكلامها اللي قالته يتردد بمسامعه للحين ناظر المطر وهو يتذكر
قبل شهور ..
ثاني ايام العيد وقت المغرب كانوا بديرة ابو صالح اللي بيوتها على بعض والناس برا وكان هو والعيال رايحين للبقاله اللي مزحومه مو بس ببزارين الديره
الكل فيها ومعهم بيان اللي جت مع شهد وبنات عماتها جميله وحصه ولمحها تناظره وابتسم وهو يطلع وقف بجنب البقاله وطلعت ورا بعد دقايق وهي تبتسم ؛ ماعايدتك امس كل عام وانت بخير
هادي ابتسم ؛ وانتي الخيير كله وعاد عيدك والله كانوا العيال كلهم فيه حتى الحين بس اشوا انهم دخلوا
بيان بأبتسامه ؛ اي حتى انا امس ماطلعت من بيت جدي راجح انشغلت عماتي فيه والبنات عندي
هادي ناظر عيونها وهو مبتسم وضحكت بيان ؛ خلاص برجع لهم اخاف يشوفونا وانت ارجع واشوفك الليله عند بيت جدي اذا قدرت
هادي هز راسه ودخلت بيان للبقاله بسرعه وابتسم هادي وهو يتنهد ورجع دخل للبقاله.....
فتح عيونه وهو مو مستوعب ان كل مواقفهم مع بعض وسوالفهم كانت كذبه من بيان كان كله من ورا قلبها بس عجز يستوعب كلامها امس يحس انها تمزح معه او تضن انه مايبيها ولو اقنعها انه يحبها بترضى صعب انه ينسى مواقف كانت حلوه حتى لو كذب يضنها حقيقه عجز يصدق انها تكذب الا بكلامها امس يحس انه هو الكذب والباقي صدق اعتدل بصدمه من حس بدموعه على خده ومسحها بسرعه وهو يقول بهمس وضيق ؛ افا ياهادي وش يبكيك؟؟
وتنهد بتعب وهو يرفع راسه للسماء وهو يحس ان الغصه تحرق قلبه ؛ يارب اني وكلتك امري وتدري بضيقتي وسببها
التفت بأستغراب من سمع صرخة حمد وهو يسكر الشباك وفز من ماجا في باله الا ابوه وهو يفتح الباب بسرعه وطلع للصاله اللي قامت منها ام هادي وشهد وراها وركض وراهم ويسمع ام هادي اللي فتحت الباب بسرعه ؛ حمد وجع يوجع ضلوع العدو وش الصياح ذا
حمد بنرفزه وهو يحذف اليد ؛ ذبحني الله ياخ.... سكت بخوف وهو يشوف هادي اللي جا ووجهه معصب ومبين توه قايم
هادي ؛ وش فيك ؟
ام هادي وشهد التفتوا لهادي وناظر هادي وجه شهد ؛ وانتي وش ذا بعد
ام هادي تنهدت ؛ مافيه شي يلعب ويصايح مثل دايم
هادي سكت وهو يناظر حمد اللي عض اصبعه بورطه يحسب ان هادي قام بسبته
ومشى هادي بيرجع للغرفه وقالت ام هادي ؛ هادي الله يصلحك صحصح وصل الظهر والعصر بحط لك اكل يلا
هادي التفت بصدمه ؛ ليه كم الساعه ؟؟
ام هادي ؛ ٥ وشوي
هادي سكت بصدمه وهو يحسب الناس الصباح لأن الجو كأنه الفجر ورجع للغرفه وهو يشغل جواله ويشوف الساعه واسم تركي متصل اكثر من مره وجلس وهو يدق على تركي اللي رد على طول ؛ الوو هادي
هادي تنحنح ؛ هلا تركي
تركي تنهد ؛ نايم ؟
هادي ؛ تو صحيت
تركي ؛ يخوي خرشتني دقيت وجوالك مقفل من الصباح
هادي ؛ والله تو قمت واشوف الجو احسب الناس الصباح
تركي ؛ تمطر تبينا نطلع نتونس ؟
هادي بضيق ؛ اي والله تكفى ياتركي
تركي ؛ ياعيينه تبشر والله شوي واجيك
وودعه هادي وقفل وقام وهو يدخل للحمام 'الله يكرمكم'
طلع بعد دقايق ودخل غرفته وصلى الظهر والعصر وبدل ملابسه واخذ جواله ومفتاحه وطلع للصاله اللي تو جت ام هادي ؛ يلا تعال كل عشان تاخذ علاجك
هادي ؛ اخذته يمه ما ابي شي
ام هادي بصدمه ؛ اخذته ولا اكلت شي ؟؟
هادي وهو بيطلع ؛ مابيه يايمه مالي نفس
ام هادي بعصبيه ؛ هادي اكلمك انا وين طالع
هادي التفت بضيق ؛ سمي ؟
ام هادي تنهدت ؛ وين بتروح ؟
هادي ؛ بطلع اتمشى شوي
ام هادي ؛ طيب بس لقمتين عشان خاطري لاتروح وانت ما اكلت شي وترا ماتفيد علاجاتك وانت ما اكلت شي
هادي تنهد وجلس وهو يجبر نفسه ياكل وقام بعد دقايق ؛ شبعت الحمدلله
ام هادي بصدمه ؛ ياهادي وش اكلت !
هادي ؛ يمه تكفين والله اني مصدع خليني اطلع الله يطول لي بعمرك
ام هادي وهي تصب قهوه ؛ ططيب هالفنجال مايضر عشان يخف الصداع
هادي تنهد وهو يجلس وجلست ام هادي بجنبه ؛ وعااد التمر لازم مع القهوه
واخذ هادي وحده وخلص فنجاله وهو يقوم وشاف ام هادي بتصب له ثاني وقال قبل تتكلم ؛ يمه والله ماتصبين ما ابي يايمه تكفين
ام هادي تنهدت ؛ طيب تبي شي ؟
هادي قرب وهو يبوس راسها ؛ سلامتك تبين شي انتي ؟
ام هادي وهي تمسح على كتفه ؛ انتبه لنفسك
هادي هز راسه ؛ ابشري يلا مع السلامه
وطلع مستعجل وجت شهد من المطبخ وهي تلتفت للباب اللي سكر ؛ طلع ؟؟
ام هادي ؛ ايه الله يصلحه ولا اكل شي
وطلع حمد وهو يجلس عندهم ؛ هادي رجع ينام ؟
ام هادي بعصبيه ؛ رح رح العب اخوك طلع وانت تصايح انا وش قايله
حمد بقهر ؛ يمه انتي لو تشوفينه كان .... قاطعته ام هادي وهي تقوم ؛ كان صفقتك انت وياه وخر بطلع الحوش بس
وطلعت وراحت شهد لغرفتها وقام حمد بقهر ؛ والله لا اوريك عساني القاك بس
ودخل للصاله وهو يصفق الباب وجلس يلعب
•
قبل دقايق
برا طلع هادي وهو يركب سيارته ودق على تركي اللي قال ؛ هلا
هادي وهو يسمع صوت ازعاج عنده ؛ وينك ؟
تركي ؛ بالمحل بطلع من السوق الحين اجي
هادي ؛ لا لا بجيك انا انتظر
تركي ؛ يلا اجل بالمحل انا
وقفل وحرك هادي للسوق
..........••..........
بالسوق محل ابو راشد
كان تركي يحاسب لزبون وطلع ودخلت ام عبدالرحمن ؛ السلام عليكم
تركي والموجودين ؛ وعليكم السلام
ام عبدالرحمن ؛ وشلونك ياتركي عساك طيب
تركي ؛ والله بخير الحمدلله
ام عبدالرحمن ؛ عطني عطني باغه ، وش اخبار امك والله اني بمرها مير انشغلت عبدالرحمن واهله بيجون
تركي طلع كيس وهو يمده لها ؛ اييه والله بخير ماعليها
ام عبدالرحمن ؛ وام عزام هي عندكم ولا روحت
تركي ابتسم ؛ والله روحوا الله يسهل لهم
ام عبدالرحمن وهي تعطي نواس كيس ؛ دوك هالكيس حط من هذا نص
نواس اخذ الكيس وهو يحط لها ورجعت لتركي ؛ انت عيّنت ابو عايض يالوفي لوفاه عنه جيت من البقاله وصاير مايحيط شي
تركي ؛ الله يعينه كبر وشيب
ام عبدالرحمن وهي تناظر علب المكسرات ؛ اشوف عطني فذه من هذي
تركي طلع لها وهي تذوق منها ؛ لا لا ماهي زينه " والتفتت على العامل " ابك انت وين غديت
ومد لها نواس الكيس وهي تحطه على الطاوله ؛ حاسبه ياتركي
ودخل هادي والتفت تركي بأبتسامه ؛ يالله حييه
ابتسم هادي بخفه وهو يقرب لتركي اللي حضنه
هادي ؛ الظاهر اني اشغلتك
تركي ؛ افاا بس لا بحاسب لها ونطلع ولا نجلس هنا ؟
هادي ناظر ام عبدالرحمن ؛ لا ودي اطلع تقدر ولا مشغول ؟
تركي ؛ لا لا والله اجي الحين
هادي ؛ اجل بسيارتي انا عند الباب خلنا نروح مع بعض
تركي بهمس ؛ بنروح بسيارتي عشان لاتتعبك السواقه
هادي ؛ لا ماعليك انتظرك ها
تركي هز راسه وطلع هادي ومن قرب لباب السوق وهو يفز ويمسك يده بألم من صدمته هيلا اللي جت مستعجله
هيلا وهي تعدل غطاها ؛ ول انت ماتشو... ييوه والله مادريت عسى ما اوجعتك
هادي شد على اسنانه بقهر وهو ماسك يده ؛ ححصل خير حصل خير
وطلع مسرع للسياره ودخلت هيلا لمحل ابو راشد وهي توقف عند امها اللي كانت تقول ؛ هذا منهو علامه يعايني
تركي ضحك بخفه وهز راسه ؛ هادي ولد ابو هادي
ام عبدالرحمن ؛ ويده علامها وش يونس ؟
تركي تنهد وهو يحط اغراضها بالكيس ؛ مدري
هيلا ؛ يمه اللي يده منكسره هذا هادي ولد ابو هادي اللي تو جا
تركي كتم عصبيته ؛ يبنت الحلال ماهي منكسره الله لايقوله رضه ، هه اغراضك يأم عبدالرحمن
ام عبدالرحمن ؛ ايه انتي شفتيه .. كم حسابه
تركي تنهد ؛ ٣٠
هيلا ؛ ايه طلع مسرع يتهبد وصقعني بغى يقشني مافطنت له بغيت اهاوش يوم شفت يده خليته
تركي ؛ ابك عسى ماكسرتي يده يوم صقعتيه
هيلا ؛ لا اشوا " وناظرت امها اللي تعطيها الكيس " يويلي يا يمه تعبت تكفي اغراض البقاله اللي شلتها لحالي
ام عبدالرحمن وهي تحاسب تركي ؛ مايضرتس يلا الراح توخرنا مع السلامه ياتركي سلم على امك
وطلعت مسرعه وضحك تركي وهو يتنهد وحط الفلوس بالدرج ؛ عبدالسلام تعال مكاني بروح عندي شغل
وجا العامل وطلع تركي برا السوق وهو يشوف هادي ينتظره بالسياره وركب واعتدل هادي ؛ ارحب
تركي ؛ البقى ، ها تبي مكان ولا اختاره انا ؟
هادي ؛ والله ما اعرف مكان نطلع الرياض
تركي ؛ يااوك وش يودينا للرياض والله مانجي الا بكره من الزحمه عيّن خير
هادي ابتسم ؛ ها اجل
تركي ؛ ان طعتني خلني اخذك مزرعتنا عند العيال توسع صدرك وعند هالزرع والماء والجو الزين وان بغيت نجلس عند النخل انا وانت وتسولف لي
هادي ؛ ماشاء الله عندكم مزرعة هنا
تركي ؛ ايييه بس بآخر الديره نص ساعه كذا ونوصل
هادي ؛ بس ما ادلها تسوق انت ؟
تركي ؛ ابشر اسوق انزل يلا
ونزل هادي ركب مكان تركي وتركي بمكانه وهو يحرك ؛ امطرت قبل شوي الليله يجينا الخيير ان شاءالله
هادي تنهد ؛ ان شاء الله
تركي ؛ وشلون يدك
هادي ؛ والله يوم قمت قبل شوي احس انها بتطيح من ثقلها ذبحتني
تركي ؛ اكلت علاجاتك ؟
هادي ؛ ايه ايه اكلتها
تركي ضحك من تذكر ؛ شكلها زادت عليك من هاللي درعمت وهي تصدمك
هادي سكت لثواني بأستغراب والتفت لتركي ؛ وش دراك ، انت تقصد اللي بالسوق ؟؟
تركي بضحك ؛ اييه بنت المره اللي قبل شوي بالمحل
هادي ؛ والله شالت يدي لا وتقول عسى ما اوجعتك
تركي ضحك وابتسم هادي بخفه ؛ هي بنت اللي لابسه برقع عند الطاوله
تركي ضحك ؛ اييه ويوم طلعت تقول علامه يعاين
هادي ابتسم ؛ من اهلنا هي ؟
تركي بضحك ؛ ايه ومن الديره مير كل الديره من اهلنا
هز راسه هادي وهو يناظر الطريق وتركي اللي من شاف التعب بوجهه لما جا للمحل وهو يحاول يغير جوه لاكن مافيه فايده وتنحنح تركي ؛ وش قلت لعمي ابو هادي
هادي تنهد وبدا يقول له كل شي عن اللي صار ووش قال لأبوه واقنعه...
تركي تنهد ؛ اهم شي انه ماهو مكلم عمك ولا بيفتح الموضوع انت اقنعته واقتنع لاتفتح معه الموضوع
هادي سكت بتعب وهو يحس ان الضيق بيفجر صدره وناظره تركي وابتسم بقهر ؛ افا ياهادي تزعل عشان وحده ماحبتك ؟
هادي ؛ والله ياتركي اني قمت افكر ان كلامها امس كذب يمكن انحدت تكذب يمكن هي تحبني بس زعلت لأني ابطيت عليها
تركي شد على الدركسون من حس بالعبره بصوت هادي وكمل هادي بضيق ؛ وقبل شوي افكر بالأغنيه اللي ماتذكرني الا فيها واقول ليه ماكنت اسمع باقيها ليه كنت ما استوعب تكملتها ؟ اصلا ليه ماكنت استوعب بدايتها ولا نهايتها كنت يوم اشغلها انسى اسمع بدايتها وانتظر اسمها واذا سمعته اردده وانسى اسمع نهايتها ليه تتسكر مسامعي عن باقي الاغنيه وما اسمع الا اسمها ؟
تركي التفت له بأستغراب ؛ وش هالأغنيه !
هادي ناظر مسجل السياره وضغط زر ياما ضغطه وبدا تركي يسمع الأغنيه وهادي فيه غصة الدنيا من بدت ؛
ياصاحبي ماتهون وصاحبك مايهان
انا تراني على هقوتك واللي تبي