ياديرةٍ ضمّت كل الأحباب

Part 32

☆

قراءه ممتعه ❤

..........••..........
بيت ابو هادي نفس الوقت
نزل ابو هادي من سيارته وهو يشوف تركي يطلع من البيت مستعجل استغرب وهو يقول ؛ صباح الخير ياتركي
تركي ماسمعه وركب سيارته بسرعه وهو يحرك
وقال ابو هادي ؛ علامه مستعجل ، الله يستر
ودخل للبيت وهو يحط الأغراض بالصاله ونادى ؛ مريم
ام هادي طلعت من المطبخ ؛ هلا ، ها متى نروح؟
ابو هادي ؛ يلا شوي تو جت ٩ ، خذي هالأغراض لنا واغراض ابوي وعمي بالسياره
ام هادي ؛ طيب جاهزين خلنا نروح الحين
ابو هادي ؛ اجل يلا ، ياهاادي ، حمد .. ياشهد يلا مشينا
هادي من الغرفه ؛ سم يببه يلا جاي جاي
واخذ عقاله وباس الأسواره اللي كانت معه وحطها بجيبه وطلع من الغرفه وهو يلقى حمد جاي بشماغه وعقاله وقال وهو يمدهم لهادي بسرعه ؛ افزع تكفى عيا يضبط
هادي ضحك وهو يحط عقاله على راسه واخذ شماغ وعقال حمد وقال وهو يسويهم له ؛ ماعرفت تسويه على كثر ما انجلدت ؟
حمد ؛ وانا متى عمري سويته ما انجلد الا بالديره
هادي ضحك ؛ هذي المشكله
وكمل يسويه لحمد اللي مايلبسهم الا بالديره حتى الثوب اللي اذا لبسه بالمدينه يلبسه بدون الشماغ
وطلعت شهد وهي تعدل طرحتها وضحكت وهي تمر من عندهم وراحت للصاله ؛ يلا يبه
ام هادي ؛ طيب تعالي حطي الفواكه هذي بالثلاجه بودي هذولي
وطلعت للمطبخ وهي تنادي ؛ هادي تعال انت وحمد
وجو وقالت ام هادي ؛ خذوا السلتين هذولي للسياره
حمد بقهر ؛ يمه تتو مضبط الشماغ الحين يخرب وابتلش فيه ثم يكفخني ابوي
ام هادي ضحكت ؛ تستاهل خذهم يلا مايخرب ماعليك
ضحك هادي وحمد اخذهم وهو حاط يده على راسه وماسك شماغه لايخرب ويبتلش فيه وطلع وقال ؛ يبه نروح معك ؟
ابو هادي ؛ لا معي اغراض رح انت وهادي ولا كل واحد لحاله
حمد هز راسه وطلع ورا هادي للسياره
وقال وهو يناظر الجو ؛ ييييبووي ياحلو الجو والغيم
وشاف هادي يحط السله بسيارة ابوه ؛ هييه اسمع يقول معه اغراض ويقول روحو مع بعض ولا كل واحد لحاله
هادي سكر الباب ؛ ايه اشوف الكراتين وشهد معهم ؟
حمد ؛ مدري لها مكان ؟
هادي ؛ مدري بس امش رح بسيارتك انا بروح لحالي حرك هاللي سافطه مدري كم لها
حمد ؛ وانت اللي يشوفك يقول تو وقفتها ، اقول بس امس بالليل طلعنا انا وشهد وساقت طلعت تعرف الخبله
هادي فتح سيارته ؛ خبله ولقت لها خبل لو انقلبتوا محد درا عنكم وبعدين معلمها ابوي بالمدينه اشغلتنا
حمد ؛ مالخبل الا انت وخر لا افقع راسك بدلال امي
هادي ؛ عشان تفقع عينك وافقع لك الثانيه
حمد ضحك وهو يشغل سيارته وحط السله تحت بالكرسي اللي بجنبه
وسكر السياره وهو يرجع يدخل ولقى شهد تلبس طرحتها فالسيب ؛ ها يلا ؟
شهد ؛ خلاص امي تلبس عباتها وتجي
حمد وهو يناظر وجهها ؛ وش خابصه انتي
شهد جت بتعدل النقاب وهي تنزله ؛ ميكب حلو ؟
حمد ؛ كنك موميا
شهد شهقت وهي تضربه بالشنطه ؛ الموميا انت وذا الشماغ المعفس
حمد ؛ صح بهذي صدقتي ، بس وش ذي الألوان فوق عيونك كلهم خالطتهم
شهد وهي تلبس نقابها ؛ ماتعرف للحركات ذي هذا فن فن
حمد ؛ صادقه ووجهك لوحه
شهد ؛ لوحه فنيه خَلق وحِسن صح ؟
حمد ؛ يعني ، بما انك اخت حمد يمكن نقول حلوه
شهد ؛ اختك بس ما اشبهك الحمدلله
حمد ؛ حاصلك تشبهيني اقول اص انتي وراسك ذا المنتفخ كنه نمله
شهد ؛ استشورت شعري ورفعته عشان لايصير كشه مثل شوشتك اللي حتى العقال ماهجدها
حمد ؛ والله شعري ناعم خلقه بسم الله علي
شهد ؛ ايه ايه امش بس
ابو هادي طلع ؛ يلا ، شهد تروحين معنا ولا مع هادي وحمد
حمد ؛ انا بروح بسيارتي وهادي بسيارته
شهد ؛ مدري ... اروح معك انت ولا هادي ؟
حمد بهمس ؛ امس معي طسي مع اللي برا
شهد ؛ اجل يبه بروح مع حمد
حمد ناظرها بصدمه وهز راسه ابو هادي وطلع وام هادي وراه
حمد ؛ عناد هو ؟
شهد وهي تمشي قدامه ؛ ايه اخلص تأخرنا
مشى حمد وهو يسكر وراه الباب وشاف هادي بسيارته وموقفها قريب الطريق ونادى ابو هادي وهو يركب ؛ وراي وراي خلك
حمد ؛ ترا طريق جديد هذا لاتضيع مهو مثل اللي قبل
هادي مع الشباك ؛ ادري يلا
وركبوا كلهم ابو هادي وام هادي مع بعض وهادي وراهم بسيارته وحمد وشهد بعدهم ومشوا لديرة ابو صالح اللي بجنبهم بس تبعد عنهم نص ساعه
..........••..........
قبل دقايق
عند تركي اللي من لما ركب سيارته وهو مسرع يخاف يكونون راجعين او مايصدفهم وهدأ سرعته من شاف ثنتين يمشون جنب الطريق وعرف اروى وعرف شموخ ووقف وهو ينتظرهم يدخلون البقاله ومن دخلوها وهو يجي وراهم وسفط سيارته قريب البقاله ونزل ركض
•
اروى وشموخ دخلوا للبقاله واروى ودها تدخل للسوق ووقفت عند شموخ وهي تقول ؛ خلينا اذا خلصنا ندخل السوق لو بس محلنا ودي اشوفه
شموخ ؛ بس نتأخر ... اا خلاص تمام نروح له
اروى هزت راسها والتفتت بسرعه من سمعت صوت تركي اللي دخل وهو يقول ؛ سلام عليكم
مرزوق ؛ وعليكم السلام يامرحبا
تركي ؛ وشلونك ياعم عساك طيب
ووقف عند الطاوله يسولف مع العم مرزوق وماكان بالبقاله احد
وشموخ ناظرته وتنحت وقالت اروى ؛ ااء شموخ
شموخ وهي للحين تناظر تركي ؛ هاه
اروى ؛ ققولي له تكفين
شموخ استوعبت وهي تلتفتت ؛ وشو منهو !!
اروى حطت اغراضها وسحبت يد شموخ وهي تقربها اروى ؛ قولي له واذا تبين انا بقوله الحين اخلصي ياشموخ تكفين
شموخ بصدمه ؛ وش بتسوين وشش اقول !
اروى ؛ شموخ انتي بتروحين بكره ترا مامعك الا اليوم لو مادرى بترجعين وهو خاطب ترا يبيك قولي له نصيحه
شموخ سكتت بصدمه واستغراب وشلون اخته وعادي ؟ وناظرتها بتوتر ؛ انتي تقولين له بعدين انا مالي دخل ماراح اقول شي
اروى ؛ اجل ترا قلت له سالفتك
شموخ شهقت ؛ كيف ! متى قلتي له وشلون
اروى بسرعه ؛ امس لما رحت البقاله مريت على تركي بالمحل وطلعنا برا وقلت له كل شي وانك مابتوافقين على ولد عمك
شموخ ؛ للييه ماقلتي لي
اروى وهي ترجع تاخذ اغراضها ؛ قلت لك قولي تم وقلتي
شموخ بتوتر ؛ بس ماكنت ادري انك... قاطعتها اروى وهي تشوف تركي جا ؛ هذا هو هذا هو قولي له
واشرت اروى لتركي وهي تبعد للرف الثاني وشموخ جت بتلحقها وقطع طريقها تركي اللي وقف جنبها وصدت تناظر الرف اللي قدامها وهو يناظر الرف اللي عنده وقال تركي وهو يتفرج على الأغراض ؛ بكره تروحون ؟
شموخ تلفتت تدور اروى اللي كانت بعيده وقالت بتوتر ؛ اا ايه
تركي ابتسم من قلب قلبه وهو اللي كان ماسك جواله على اساس يكلم عشان لو زعلت او عصبت يطنشها ويكمل بالجوال ولا يتفشل ، ونزل جواله وهو يحطه بجيبه وتنحنح يخفي ابتسامته وضاع منه كل الكلام وقال وهو مبتسم بخفه ؛ استودعتك الله ، وترا دريت عن سالفة خطبتك
شموخ انصفق وجهها ؛ ككيف يعني ؟
تركي يحاول يمسك ابتسامته مو مستوعب انه يكلمها ؛ دريت انك مخطوبه لولد عمك بس ماراح توافقين عليه صح ؟ ترا انا بخطبك اذا رفضتي بس الحين مقدر وانتي مخطوبه لولد عمك
شموخ تنهدت بخوف وهي فهمت انه بيودعها من عرف انها مخطوبه وابتسمت بخفه ؛ مماراح اوافق عليه انا ، وقالت بنفسها بفشله ؛ "ياخفيفه" اا وبفكر
تركي بهدوء ؛ لو بتختارين بيني وبين ولد عمك من توافقين عليه ؟
شموخ توترت ؛ بففكر مدري
تركي ؛ بس انتي قلتي لو بتختارين بيني وبين هذا زايد بتختاريني ولا انا غلطان ؟
شموخ غمضت بقهر وهي تقول بنفسها ؛ "حسبي على ذا الجنيه " ايه ببس مدري
تركي تنهد ؛ يشهد الله مايبيك كثري لو هو ولد عمك انا اللي ابيك لاتاخذينه ولا توافقين عليه وتنسيني
شموخ كأن احد كب عليها مويه بارده ماتدري وش تقول بس تذكرت ورقتها اللي كتبت ؛ اننا كنت كاتبه لك بورقه وبعطيك الورقه الحين لأن ما ادري وش بقولك لاكن كتبت اللي اقدر عليه بورقه
وطلعتها من الشنطه وهي تحطها تحت كرتون البسكوت وبعدت شوي وجا تركي وابتسم وهو ياخذ الورقه وحطها بجيبه وتذكر الشريط اللي بسيارته ؛ للا تطلعون دقيقه وجاي
وطلع ركض للسياره وشموخ ناظرت اروى اللي جت تركض ؛ وشش يقول
شموخ وهي للحين ماستوعبت ؛ تكلمنا
اروى ضحكت ؛ وش ققال
شموخ ضربتها بخفه ؛ تنكبيني كذا ليه ؟
اروى ؛ يبنت مافيه الا اليوم لو ماكلمتيه ماكنت بقدر اساعدك ولو مادرى مابياخذك تبين كذا انتي ؟
شموخ تنهدت ؛ لا بس احس مايصير مدري مدري
اروى ؛ اسكتي بس بعد ماكلمتيه حسيتي وين راح هو
شموخ ؛ مدري قال لاتطلعون دقيقه وجاي
اروى ؛ اخاف يجي احد ولا راشد
شموخ تذكرت ؛ ععزامم هنا بالسوق ماراح ندخل له
اروى ضحكت ؛ اييه ترا قلت بندخل السوق عشان تركي بس خلاص جا
شموخ ؛ يعني كنتي بتجيبين العيد لو شافنا عزام ولا احد والناس كلها بالسوق
اروى ؛ جا جا اسكتي
تركي اللي رجع لسيارته واخذ الشريط وكان بيكتب بورقه بس طار كل الكلام مايدري وش يكتب اخذ الشريط وحط بمكانه ورقه شموخ وسكر الدرج ورجع للبقاله وهو حاطه بجيبه وشاف اروى اللي واقفه عند شموخ وجا وهو يقول ؛ خخلاص خلصتوا ؟
اروى ؛ اا مدري ، خلصتي انتي ؟
شموخ ؛ ايه ايه
تركي وهو يشوف مامعهم شي ؛ وش اخذتوا !
اروى ؛ خخلاص رح ونشتري تبي شي ؟
تركي ؛ ها اا لا اجل بسولف مع مرزوق شوي
اروى حست انه بيقول شي بس خلاص تخاف يجي احد او يلاحظ مرزوق وهو يعرفها بس مايعرف شموخ وتخاف يفكر ان تركي واقف عندها وهو مايعرفها او يشك فيه والتفتت لشموخ ؛ شموخ اشتري بسرعه وبنطلع
شموخ ؛ باخذ شي بارد يبنت نشف حلقي
ضحكت اروى ؛ يلا هذي الثلاجه ، ياعم مافيه بسكوت سفاري ؟
مرزوق التفت ؛ لا والله خلص
شموخ ؛ اروى وش ناخذ لهم عصيرات
اروى ؛ والله مدري ، راني اهلاً اي شي
شموخ ؛ يلا بجيب كيس واجي
ومشت لجهة الطاوله وقالت ؛ عمي عطني كيس
مرزوق طلع وهو يمده لها
شموخ ؛ وواحد بعد
وعطاها ثاني وراحت لعند اروى
وتركي صد للباب مايبي مرزوق يشوفه مبتسم لأنه بيفضحه ومسح وجهه وهي يتنحنح وجت شموخ واروى بكيسهم ووقفوا يحاسبون وقال تركي ؛ سجله حساب ها
مرزوق ؛ ابشر
شموخ بهمس لأروى ؛ لا فشله بدفع انا تكفين
وجت بتطلع الفلوس ومسكتها اروى ؛ لا وربي خليهم
وخلص مرزوق واخذ تركي الاكياس واروى بجنبه ووراها شموخ وطلع تركي ووقف عند الباب ؛ يلا ، اروى وين كيسك
اروى اشرت له ؛ ذا
تركي مده لها وهمست شموخ لأروى ؛ لايكون بيرجعنا هو ترا مقدر امي مابترض.. قاطعها تركي اللي قال ؛ يلا اركبوا
اروى وهي تحس انها ضغطت على شموخ وكأن تركي زودها شوي ؛ لا بنرجع مشي
تركي ناظرها وكأنه يترجاها ؛ انا بوصلكم
اروى استلطفت نظرته وحست انه كسر خاطرها ؛ ااء لا يمكن خالتي ام عزام ماودها ش.. بنتها تجي مع احد غريب
تركي رفع حاجبه ؛ انتي معنا محد غريب
اروى ؛ تركيي
تركي ؛ اركبوا .. اا ماعليكم ترا للبيت وبرجع ماني خاطفكم
شموخ ماتدري وش تقول بس كانت تناظر كيسها اللي نساه معه وكتمت ضحكتها
اروى لفت تناظرها ؛ ها ؟
شموخ هزت راسها وقالت اروى وهي تمشي للسياره ؛ يلا اركب
تركي ابتسم وهو كان صاد ومنزل راسه تحت ماناظرها حتى لما كلمها داخل البقاله كان يناظر الرف
وركبت اروى قدام ووراها بالكرسي شموخ وتركي قبل لايركب بحركه سريعه طلع الشريط من جيبه وحطه بكيس شموخ وركب وهو يمد الكيس لورا واخذته شموخ وهي خايفه لاتلمس يده بالغلط وحطته عندها وانتبهت لشي غريب وناظرته كان مربع ابيض استغربت وهي ماخذت الا عصيرات وكم بسكوت ودققت بالكيس وهي تنتبه للشريط اللي مكتوب عليه عنوان اغنية وابتسمت بصدمه وعرفت انه من تركي وهي تحمد ربها انها شافته قبل لاتنزل فيه للبيت ويشوفونه واخذته وحطته بشنطتها وناظر تركي المرايه وشافها تحطه بالشنطه وابتسم وتنحنحت اروى وهي تضحك وتقول بنفسها ؛ " كنك زودتها شوي اخذت راحتك تراني موجوده " اا الا تركي متأخر عن المحل
تركي ؛ اييه عادي استلمه العصر الحين كلهم فيه يكفون
وكان تركي مهدي سرعته مررره لو جايين مشي وصلوا بس ماوده تنزل وده يرجع يناظر المرايه ولا يشيل عيونه بس يخاف تبكي او تزعل نفس المره اللي طافت وتعقد من هالسالفه
شموخ كانت تناظره لثواني وبعدها تشيل عيونها وترجع تناظره وتناظر كتوفه واطراف شعره الأسود الخشن اللي كان طالع من شماغه اللي لافه على راسه عصبه بدون العقال ووجهه على جنب ودقنه كله شافته وهي تنزل عيونها وترجع تطالع بس هالمره انتبه لها وطالع المرايه وما استوعبت ولا شالت عيونها بسرعه ناظرت عيونه لثواني ونزلتها وهي تستوعب وهو يحسب انه ماسك ابتسامته واصلا هي شاقه وجهه من ناظر عيونها السود ورموشها واروى منتبهه له بس ماتشوف شموخ وهي خايفه اذا رجعت للبيت تهاوشها وقالت بنفسها ؛ " هي وافقت اننا نروح معه مالي دخل ، بس يويلي انحشت وخليتها تكلمه والله بتكفخني لين اعض سابع ارض .. لا لا ماتسوي شي اكيد انها تحبه الا اكيد " اقول تركي تأخرنا وراك تمشي على بيض ؟
تركي ناظرها بأبتسامه وهو يرفع حواجبه ؛ الهداوه زينه
اروى ضحكت وهي فاهمته وشموخ ابتسمت بتوتر وهي تحس انها جابت العيد لين قالت بس ووصلوا للبيت ووقف تركي قدام الباب وتنهد ؛ يلا
اروى ؛ بترجع المحل ؟
تركي ؛ ماودي والله يمكن اشوف المزرعه والمحل لاحق عليه العصر
اروى طلعت عصير من اللي جابت ؛ اجل خذ برد على قلبك
ضحك تركي وشموخ نزلت وهي تمشي بتدخل البيت
وقالت اروى ؛ تركي لو احد درى يويلك ترا بجحدك ذيك الجحده اللي ماصارت
تركي ابتسم وهو يمسح راسه ؛ اخخييه يا اروى والله ما انسى معروفك
اروى ؛ يخي لو تنساه ازين انسى اني ساعدتك انا ماسويت شي لاتعلم احد
تركي ضحك ؛ ابشري محد بيدري فيه بس قولي لها لاتتركني
اروى ضحكت بتوتر ؛ هيه عاد زودتها عيب اعقل
تركي ؛ وانا صادق اقنعيها لاتاخذ ولد عمها
اروى ؛ ططيب اقول لها روح شوف شغلك الحين يلا مع السلامه
تركي ؛ مع السلامه
وسكرت الباب اروى وراحت للبيت وتركي تنهد وحرك للمزرعه ....