ياديرةٍ ضمّت كل الأحباب

Part 44

..........••..........
بيت ابو راشد
نفس الوقت كانوا العيال بالدوانيه وفز ابو راشد ؛ قم قم انت وياه جو
وطلعوا معه لبرا وابو هادي فاتح الشباك وضحك بوهقه ؛ يبو راشد الأهل من هالباب صح ؟
ابو راشد ابتسم وهو يأشر له ؛ الثاني الثاني
وحرك لجهة الباب الثاني وابو راشد دخل بسرعه من باب المطبخ ؛ اطلعوا اهل ابو هادي جو اطلعوا لهم
وقامت ام راشد وعبير ومنيره للحوش ورجع ابو راشد يطلع للدوانيه
برا عند الباب الكبير واللي هو باب الحوش وقفت سيارة ابو هادي وهو يلتفت لأم هادي ؛ يلا انزلوا من هالباب وحنا الظاهر عند الباب اللي تو
ام هادي وهي تنزل ؛ طيب يلا شهد
ونزلت هي وشهد ودخلوا وحرك ابو هادي ووقف عند الدوانيه
دخلت ام هادي وشهد وراها وابتسمت من شافت ام راشد اللي قالت ؛ يالله حيهم ياهلاا ومرحبا
وقربت ام هادي بأبتسامه وهي تسلم عليها ؛ الله يحييك ويسلمك
وسلمت ام راشد على شهد ؛ هلا بشهوده حياك الله
شهد ابتسمت ؛ تسلمين
والتفتت ام راشد لعبير ومنيره اللي قربوا يسلمون ؛ هذي عبير بنتي الكبيره ، وهذي منيره زوجة ولدي راشد
ام هادي ابتسمت وهي تسلم عليهم ؛ ماشاءالله ياهلا والله
عبير سلمت على شهد ومن بعدها منيره اللي قالت بأبتسامه ؛ ياهلا نورتونا
ام هادي ابتسمت ؛ نوركم
ام راشد ؛ حياكم الله تفضلوا زارتنا البركه
ودخلوا وشهد تتأمل زرايعهم اللي من اول لادخلت من باب الشارع للحوش وهي تشوفهم قدامها وسمعت صوت العيال على يسارها وهي تناظر وشافت بنهاية الجدار ممر على اليمين كانت اصواتهم منه وناظرت على يمينها وكانت الدكه وبرضوا حولها الزرايع ابتسمت وهي تمشي ورا امها ودخلت وهي تنزل كعبها عند الباب ومن دخلت وهي تشوف مقابلها كنب وطاولة تلفزيون خشبي كله بنص هالصاله الكبيره وقالت ام راشد وهي تدخل للمجلس ؛ حياكم حياكم
ودخلت شهد يمين الباب اللي هو المجلس ووراه باب حمام " اكرمكم الله " نزلت النقاب وارخت طرحتها على كتوفها ودخلوا للمجلس اللي فيه شريفه واقفه ببنتها وابتسمت ؛ ياهلا حياهم الله
ام هادي ابتسمت وهي تسلم عليها ؛ الله يحييك
ام راشد بأبتسامه ؛ وهذي بنتي الثانيه ام العنود شريفه وزوجة عزام ولد ام عزام
ام هادي ابتسمت وهي تبوس العنود ؛ ماشاءالله على اسمك
وسلمت شهد على شريفه وابتسمت شريفه ؛ انتي شهد ؟
شهد ابتسمت ؛ ايوه
وجلست ام هادي وشهد حطت الكيس عند القهوه بالأرض وقبل لا تجلس نزلت عبايتها وهي تحطها بجنبها وجلست عند امها وصبت لهم عبير قهوه وقالت ام راشد ؛ روحي نادي البنات ياعبير
وطلعت عبير وابتسمت ام راشد ؛ والله انها الساعه المباركه يوم جيتوا...
بالمطبخ
قبل دقايق
دخلوا اروى وهاجر من طلعت ام راشد لأن المفروض مايكونون كلهم بالمجلس وراحوا للمطبخ عشان اذا جو وجلسوا يدخلون يسلمون عليهم واروى طبعاً مافوتت انها توقف عند شباك المطبخ عشان تشوف ابو هادي وعياله وهاجر معها تنتظرهم يدخلون وشهقت اروى من دخلوا ؛ اريهم ارييهم
هاجر ناظرتهم وهي تنتبه ليد هادي ؛ يالوفي عنه ذا منهو يده شفيها
اروى ؛ يويلي الخكري ذا من ، كنه بنت بس والله انه مز اكيد ذا على شهد اذا هم مزايين اخصص والله انهم كشيخيين شكله لابس النظارات زينه وهذا اللي يده مدري علامها شوفي عيونه مسحوبه حتى اللي لابس نظاره عيونه حلوه مكحله صدقيني مزز اكيد على امهم مايشبهون ابوهم واجد
هاجر ؛ اي شوفي شوفي هذا اكيد ابو هادي والعيال ثنين اكيد ذا الكبير الا هادي تلقينه مبين اكبر من الولد الثاني الثاني ورع
اروى ؛ تلقينه حمد تقول امي واحد هادي وواحد حمد هذا يمكن اصغر من شهد بعد .. لا لا صح امي قالت حمد اكبر من شهد بس والله واضح اغنياء اوخص يبننت ابك فخمييين
هاجر ؛ اقول شرايك دام امهم واختهم ماشافونا نغير ملابسنا ونكشخ
اروى ؛ والله لاز... والتفتوا على عبير اللي
دخلت وهي مستعجله وهي تتمسك بهاجر وتمثل انها بتدوخ ؛ يمه امسكوني امسكوني
وناظرتها هاجر بأستغراب وقالت اروى ؛ وشو شفتيهم ؟؟
عبير وهي تمسح على وجهها ؛ يبنتت امهم امهم انا يوم شفتها قلت انا العجوز مامداني اصحصح من صدمتي الا تنزل شهد عباتها يويلي تعالوا شوفو تكفون
اروى ؛ كاشخين ؟!
هاجر ؛ وش لابسين كيف اشكالهم
عبير ؛ اببك هي كشخه وبس تعالوا شوفوا اخلصوا امي تقول ناديهم سرعه امششوا
هاجر ؛ ابك ابوهم لحاله فخم ك.... قاطعتها اروى اللي دقتها بقوه وشهقت عبير ؛ شفتووه ؟ وينه ؟
اروى ؛ مماشفناه بسرعه لمحناه من الدريشه ودخل
وقربت عبير وهي تناظر الشباك ومافيه احد كلهم داخلين والتفتت عليهم ؛ مافيه احد امشوا زوجها وعيالها بعدين نشوفهم الحين تعالوا شوفوها هي والله ماتدرون وين البنت ووين الأم
ومشوا اروى وهاجر بسرعه وهم يوقفون عند باب المجلس ودخلت عبير وهاجر وراها وبعدها اروى
اروى وهاجر ؛ السلام عل... عليكم
والتفتت ام راشد ؛ هذولي بناتي هاجر واروى
وابتسمت ام هادي اللي كانت واقفه تنزل عبايتها ونزلتها ونزلت نقابها وبقت بطرحتها وهي تسلم عليهم ؛ ياهلاا ماشاء الله ياحلوهم ، اخباركم
اروى وهي تناظرها بفهاوه ؛ بخير
وقربت هاجر وهي تسلم على شهد اللي ابتسمت من شافتهم وعرفت انهم بعمرها
شهد ابتسمت ؛ اهليين
وسلمت هاجر وهي تستوعب وابتسمت بأرتباك ؛ ههلا حياكم الله
اروى ابتسمت ؛ وش اخباركم
ام هادي وشهد ؛ بخير الحمدلله
ام هادي بأبتسامه ؛ ووين ام عزام
اروى حطت يدها على وجهها وهي تمسك صيحتها ودقتها هاجر وابتسمت ام راشد ؛ ييوه رجعوا للجبيل قبل امس الله يستر عليهم
ام هادي ابتسمت ؛ يااعمري الله يحفظهم
وناظرت عبير اللي مدت لها الضيافه وابتسمت ام هادي ؛ هذي عبير اول بناتك ؟
ام راشد ابتسمت ؛ ايه وهذي شريفه ولدت من اسبوعين وهذي بنتها العنود
ام هادي بأبتسامه ؛ اول بنت لها ؟
ام راشد هزت راسها ؛ ايه وهذولي هاجر واروى
ام هادي ابتسمت وهي تناظرهم ؛ كم اعمارهم ماشاء الله
هاجر بأبتسامه ؛ ٢٠
اروى ؛ وانا ١٩
شهد ضحكت بخفه وهي تناظر هاجر ؛ انتي نفس عمري انتي اسمك هاجر ؟
اروى همست بخقه ؛ انتي عمرنا والله
وابتسمت هاجر وهي تدقها ؛ ايه وهذي اروى
ام هادي ؛ عاد مبينين اصغر الله يحفظكم اروى اعطيها ١٦ ولا ١٧
ام راشد ابتسمت ؛ ايه اصغر من شكلها ، وهذي منيره ام ناصر زوجة ولدي راشد
ام هادي بأبتسامه ؛ ياعمري ماشاء الله ، انتي قلتي عندك ٤ عيال بس راشد متزوج ؟
ام راشد ابتسمت ؛ لا بعده عيسى له ٤ سنوات متزوج وعنده بنت
ام هادي ؛ وساكن هنا ؟
ام راشد ؛ لا مبتعث برا دكتور وبيجي قريب ان شاء الله
ام هادي ابتسمت ؛ ماشاء الله الله يوفقه
ام راشد ؛ اميين ، وبعده تركي وبعده نايف للحين ماتزوجوا
ام هادي ؛ الله يبلغك فيهم يارب
ام راشد ابتسمت ؛ وياك ان شاءالله
•
بالدوانيه
قبل دقايق
وقفت سيارة ابو هادي ونزل هو وهادي وحمد وقال ابو راشد ؛ يالله حييهم ياممرحبا
ابو هادي قرب وهو يصافحه بأبتسامه ؛ الله يبقييك
ابو راشد ؛ وش لونه ابو هادي عساك طيب
ابو هادي ابتسم وهو يسلم على الباقين ؛ والله بخير
وسلم على هادي وحمد وقرب تركي وهو يسلم على هادي وقال بهمس وهو يضحك ؛ يالله حييه ناعس العيين ، سميتك ناعس العين خلاص
هادي ابتسم ؛ الله يحييك وشلونك
تركي بأبتسامه ؛ بخيير يوم شفتك
ابو راشد ؛ تفضلوا يامرحبا زارتنا البركه
ودخلوا ابو هادي وابو راشد والعيال وراهم وجلسوا وحط حمد الحلا عند القهوه وهو ماسك ضحكته يحس ان شكله غلط مع ضيافتهم واخذ نايف القهوه وهو يصب لهم ومده لأبو هادي ؛ سَم ياعم
ابو هادي ابتسم وهو ياخذ الفنجال ؛ تسلم
وصب لأبوه ولهادي وحمد ومن بعدهم راشد وسعد وتركي اللي جالس بجنب هادي وبدت السوالف المعتاده بالسؤال عن الاحوال
•
بالحوش
دخلت ام عبدالرحمن وهيلا وقالت ام عبدالرحمن بأستغراب ؛ علامهم فاتحينه
وطقت وهي تنادي ؛ ياعرب .. ابك تعالي الظاهر عندهم احد
ومشت لداخل هي وهيلا اللي شايلة سلة قهوه وشاي ودخلت ام عبدالرحمن للصاله ؛ يأم راشد
ام راشد قامت وهي تطلع ؛ هلا يالله حيها
ام عبدالرحمن قربت وهي تسلم عليها ؛ عندكم احد ؟
ام راشد وهي تسلم على هيلا ؛ ياهلا .. ايه اهل ابو هادي تو جو ادخلي ادخلي
ام عبدالرحمن دخلت للمجلس ؛ مساء الخير
الكل وهم يسلمون عليها ؛ مساء النور ، ياهلا
وسلمت على الكل هي وهيلا وقالت ؛ ماشاء الله ، والله اني بغيت اسير عليكم زين انكم هنا
ام هادي ابتسمت ؛ حياك الله بأي وقت
وجلست ام عبدالرحمن وهيلا حطت القهوه وهي تجلس عندها
ام عبدالرحمن التفتت لأم راشد ؛ والله امس رحت للسوق ومريت على محلكم لقيت تركي يخيتي يقول عزام واهله مشوا علامهم ماقعدوا ؟
ام راشد وهي تمد لها القهوه ؛ ام عزام ياعيني والله عندها موعد وراحوا الأربعاء
ام عبدالرحمن ؛ ييوه عسى مافيها لون ؟ " شي "
ام راشد ؛ فيها سكر وتقول مواعيد للقلب
ام هادي ؛ ياحبيبتي الله يشفيها متى موعدها ؟
ام راشد ؛ امس وكلمتها تقول ماعليها خففوا لها العلاجات
ام عبدالرحمن ؛ الحمدلله .. عاد والله كنت بسير عليتس من ٤ ايام وانا كل يوم انشغل واليوم قلت بسير عليها وزين اني لقيت ام هادي
ام راشد ابتسمت ؛ حياك الله والله انه نور البيت يوم جيتي انتي وام هادي
ام هادي ابتسمت ؛ ياحبيبتي تسلمين منور بأهله
ام عبدالرحمن ؛ وقبيل رحت عند ابتسام جايين اهلها عقب راحوا ذاك اليوم هالمره ابو عايد وام عايد بس وخواتها راحن لبيوتهن رحت وقلت لهيلا بسلم واجي ونروح لم ام راشد ووالله زينت هالقهوه يوم رجعت وانا اخذها واجيكم
ام راشد ابتسمت ؛ الله يسلم يديها والله
ام هادي ؛ عندك بنت غيرها ؟
ام عبدالرحمن ؛ لا والله مغير هي واخوها عبدالرحمن
ام هادي بضحك ؛ من مسميها هيلا ؟
ام عبدالرحمن ؛ عساه للجنه ابو عبدالرحمن من هاك السنين يوم جبتها قال ابسميها الهيلا قلت يبن الحلال حنا من الهيلا مايحتاج تسميها قال لا والله غير اسميها قلت اجل خلها هيلا ازين
ضحكوا وقالت ام عبدالرحمن ؛ انتوا من وين يأم هادي ؟
ام هادي بضحك ؛ منكم كلنا من الهيلا
ام عبدالرحمن ؛ يخيتي انتي صادقه والله يوم شفتس قلت حضريه من المدينه
ام راشد ضحكت ؛ لا لا اشوا كل هالديره قبيلةٍ وحده
ام هادي بضحك ؛ وانتوا بعد ؟
ام راشد هزت راسها بالأيجاب وهي تضحك وقالت ام عبدالرحمن ؛ واهل رجالتس ؟
ام هادي ؛ بعد كلهم
ام عبدالرحمن ؛ هم بديرة ابو صالح من اول ؟
ام هادي ؛ ايه من يومنا صغار وحنا فيها
ام عبدالرحمن ؛ اعرف والله ناس منها وش يقالهم يمكن اعرفهم
ام هادي ؛ ابوي محسن ابو طلال وعمي ابو زوجي راجح ابو حاتم
ام عبدالرحمن بصدمه ؛ راجح رجال طرفه الله يرحمها ؟
ام هادي ضحكت بصدمه ؛ اييه طرفه عمتي ام حاتم ابو هادي
ام عبدالرحمن ضحكت ؛ يااوك والله اني اعرفها عساها للجنه بس ابو طلال والله معرفه
ام هادي ؛ من تعرفين غير عمتي طرفه الله يرحمها يمكن اعرفهم انا بعد
ام عبدالرحمن ؛ والله اعرف سعديه وحدةٍ تجي بالسوق وتبسط واعرف مزنه خوية طرفه الله يرحمها
ضحكت شهد وقالت ام هادي بضحك ؛ مزنه ام طلال هذي امي
ام عبدالرحمن ؛ يخيتي !! انتي بنتها ؟ ابك انا اسمعها تسولف لي عن بناتها بس ما اذكر اساميهم مغير روان شفتها مره جت معها
ام هادي ضحكت ؛ لا روان الثالثه انا مريم اكبر وحده وبعدي مرام وبعدها روان واخر وحده اميره وعندي اخوان جو بعدي طلال ومحمد
ام عبدالرحمن ضحكت ؛ والله طلعنا نعرف بعض وكل هالسنين ماشفتس ولا يمكن عشاني مبطيتن عنها
ام راشد ضحكت ؛ يا ماشاء الله عليك من متى تعرفين اهلها ؟
ام عبدالرحمن ؛ مبطي يوم اخذت زوجي الأول مدري وين طس الحين الله يرحمه ان كانه ميت الوكاد اني سكنت بديرته ديرة ابو صالح وكنا جيران وعرفتهم
ام هادي ؛ انتي متزوجه قبل ابو عبدالرحمن ولا بعده؟
ام عبدالرحمن ؛ لا قبله يومن عمري ١٩ كبر هيلا الحين ، تزوجت وقعدت معه ٥ سنين ولا جبت منه ورعان وتطلقت وبعدها يوم عمري ٢٥ وانا اخذ ابو عبدالرحمن عساه للجنه وجبت عبدالرحمن وهيلا يوم عمرها ٤ سنين مات الله يرحمه
الكل ؛ الله يرحمه
ام هادي ابتسمت ؛ اجل ان شاء الله تزورينا هناك انتي وام راشد وتشوفون اهلي
ام عبدالرحمن ؛ ان شاء الله والله مبطيه عنهم
ام هادي ؛ واهلك وين ساكنين ؟
ام عبدالرحمن ؛ ماعندي الا اختي بالشرقيه تصير ام نوف زوجة عبدالرحمن
ام هادي ابتسمت ؛ الله يخليها لك ، وانتي يأم راشد
ام راشد بأبتسامه ؛ والله انا وابو راشد انولدنا بهالديره وهو عنده ٣ خوات اصغر منه وحده بالطايف وثنتين بالقصيم ، وانا عندي اخو بالقصيم واختي بتبوك وانا اصغرهم
ام هادي ؛ وابوك وامك انتي وابو راشد ؟
ام راشد ؛ والله كلهم متوفين الله يرحمهم
ام هادي هزت راسها ؛ الله يرحمهم يارب
الكل ؛ امين
ام عبدالرحمن وهي تحط فنجالها ؛ اجل يلا بروح وسيروا علينا يأم هادي انتي وام راشد
وقبل تقوم حلفت ام راشد ؛ والله ماتروحين جيتينا ذيك المره ولا تعشيتي معنا الحين ماعندك عذر
ام عبدالرحمن ؛ والله يخيتي انا اسلم واروح ما احب ابطي عن بيتي
ام راشد ؛ لا لا والله ان تتعشين معنا ولا تروحين مبطين عنك خلينا نجلس مع بعض حنا وام هادي ونسولف لاحقه على بيتك
ام عبدالرحمن اعتدلت ؛ ماعليه اجل ماتقصرين
ونزلت عبايتها وهي تحطها على طرف وبقت بطرحتها وبرقعها وهي تلتفت لهيلا ؛ طلعي عباتس وانا امتس ماهنا غريب ... انا والله ماداني اقعد واجد بعباتي انكتم
ام راشد ضحكت ؛ خذي راحتك
وهيلا اللي قامت وهي تنزل عبايتها وبقت بطرحتها اللي تركتها على كتوفها وشعرها البني كانت مسويه له ظفيره على تحت وخصل بسيطه من شعرها مطلعتهم ولابسه فستان اخضر داكن ماسك على تفصيل جسمها واسوارتين وخلخال ذهب وابتسمت ام هادي وهي تتأملها ؛ وكل هالزين ماشاء الله مغطيته ياهيلا
هيلا ابتسمت وهي تجلس ؛ الله يسلمتس هذا شوي من زينتس
ابتسمت ام هادي وهاجر واروى ييسولفون مع شهد بس مايدرون وش يقولون وقامت هاجر وهي تبتسم ؛ شهد تجين معانا للصاله نسولف وخلينا نعرفك اكثر
شهد ابتسمت وهو تقوم وقامت اروى ؛ هيلا تعالي معنا
وقامت معهم وطلعوا للصاله وام راشد والباقين كملوا يسولفون عن بعض وعبير ومنيره وشريفه مستمعين
بالصاله
جلسوا البنات وابتسمت هاجر ؛ واخيراً ياشهد شفناك
اروى ؛ اي والله لكم كم يوم ساكنين مقابلنا وودنا نشوفكم
شهد بأبتسامه ؛ لا والله انا من اول ماجينا الديره شفت امكم وهيلا وامها بس انتوا ماجيتوا
اروى ؛ كان برد وجلسنا مع شموخ كانت هنا
شهد ؛ مين شموخ ؟
هاجر ؛ اخت زوج شريفه
هيلا ؛ شفتي ام عزام اللي جت مع خالتي ام راشد ذاك اليوم ؟
شهد هزت راسها وكملت هيلا ؛ شموخ تصير بنتها
شهد ؛ اهاا ساكنين بالديره هم ؟
اروى ؛ لا بالجبيل وجو لما ولدت شروف
شهد ضحكت ؛ سولفوا لي عنها ما اعرفها
اروى اعتدلت وهي تحط وسادة الكنب بحضنها ؛ شوفي حنا نعرفهم من قبل كان عزام زوج شريفه صديق اخوي راشد بس ماشفناهم الا لما خطب شريفه شفنا امه واخته شموخ وبالزواج يعني ماكنا نسولف معهم كثير لاكن من بعد الزواج تعرفنا على بعض اكثر ولما جو اخر مره صرنا صديقات
شهد ؛ كبرنا هي ولا متزوجه ؟
اروى ؛ لا وعمرها ٢٢ وتهبل نفسك
شهد ابتسمت ؛ حبيبتي والله
هاجر ؛ ايوه وسولفي لنا عنك وعن المدينه
شهد ابتسمت وهي ترفع كتوفها ؛ عن وش يعني
هاجر ؛ كل شي دراستك ووين انولدتي ومن تعرفين
شهد ؛ انا واخواني كلنا انولدنا بالرياض ورحنا للمدينه من لما كان عمري ٥ سنوات واخوي الكبير كمل دراسته هناك والثاني كمل من ثاني ابتدائي وكانت كل دراستنا بالمدينه
اروى ؛ يعني انتوا كلكم مولودين بالرياض ؟
شهد ؛ ايه بس كبرنا بالمدينه وعرفت صديقات بس غيرت مدرستي وبالمتوسطه بعد عرفت جدد وبرضوا نقلت وماشفتهم وبالثانوي عرفت صديقات واتواصل معهم للحين
هاجر ؛ وليش كنتي تنقلين ؟
شهد ؛ عشان ابوي لأن اساساً روحتنا للمدينه عشان شغله
هيلا ؛ وشهو شغله بالمدينه ؟
شهد ؛ بمعرض سيارات وغيره الحين عشان يبغى يرجع ديرة اهله بس بنفس الوقت يبغى يستمر بشغله ويعرف صديقه مساعد هذا اللي بالديره قال له ان هنا الشغل حلو ووافق ابوي لأنها قريبه عند ديرتنا
اروى ؛ وعلامه ماسوى معرض سيارات هنا ؟
شهد ضحكت ؛ تشوفين يناسب بديرة ابو صالح او هنا ؟
هاجر ضحكت ؛ لا والله محد بيشتري هذي سياراتنا من يوم ما انولدت
شهد ضحكت ؛ عشان كذا
هاجر ؛ طيب خلصتي جامعه صح ؟
شهد هزت راسها ؛ ايه الحمدالله ، وانتي ؟
هاجر ؛ لا باقي لي ترم ودي اكنسله لأني عارفه مافيه شي اسويه اذا تخرجت
هيلا ؛ ريحي راستس ماحاصل وظايف
شهد ضحكت ؛ انتي درستي جامعه ؟
هيلا ؛ لا والله وانا اختس مغير ثانويه وش لي بوجع الراس
اروى ؛ انا شكلي معك ياهيلا دام تخرجت بقعد وش ابي بالجامعه
شهد ؛ لا بالعكس انا اشوف تدرسون احسن ماتدرون بالمستقبل يمكن تحتاجون شهادات الجامعه بالذات اذا جبتوا معدل ممتاز
هاجر ؛ الصدق احياناً اقول كذا بس ماضنتي
شهد ابتسمت ؛ لا ان شاء الله بتنجحين وتتوظفين الوظيفه اللي تبينها
هيلا ؛ اخوي توظف بشهادة ثانويه تفيد تراها
اروى ؛ الصدق اي والله هذا اخوي نايف جايب العيد بمواد الجامعه والحين متوظف
شهد بضحك ؛ لا انا اخوي حمد حمل ٤ مواد وزين انه عارف مافيه وظيفه تقبله
هاجر ضحكت ؛ يساتر مايذاكر ذا
اروى ؛ عشان كذا ما ابي ادرس جامعه اخاف اجيب العيد صدق ، بعدين لحضه شوفي اختي شريفه ماحملت ولا ماده وكلهم ممتاز بس ماتوظفت وصراحه ما اشوف من الجامعه فايده
شهد ضحكت ؛ ييوه عاد لاتخلوني افقد الأمل ماعليك ياهاجر كملي دراستك عشان ماتندمين بعدين
هاجر ؛ ان شاء الله هانت باقي ترم ، اروى روحي جيبي لنا قهوه هنا
وقامت اروى للمجلس وسمعت شهد صوت بالغرف ؛ عندكم بزارين هنا ؟
هاجر ضحكت ؛ اييه عيال راشد وعبير يلعبون مع البسه بالغرفه
شهد ابتسمت ؛ الله عندكم بسه انا ودي اشتري وحده احبهم بس اخاف منهم
هاجر ضحكت ؛ لا هذي لقتها اروى بالحوش صغيره ماجت شهرين
هيلا ضحكت ؛ يوه اروى للحين تحبهم
وجت اروى وهي جايبه صينيه صغيره ؛ اسمع اسمي شتقولون عني
ضحكت هاجر وهي تاخذها من اروى وحطتها على الطاوله ؛ نسولف عن البسه
وصبت لهم قهوه وابتسمت شهد ؛ سولفوا لي عن الديره
هاجر ؛ ماقد جيتيها ؟
شهد هزت راسها ب " لا " وقالت اروى بضحك ؛ اول شي هذا الحلا مو من محلاتنا صح ؟
شهد ضحكت ؛ لا من محلات الرياض
اروى ضحكت وهي تحط لهم ؛ انا ادري والله .. شوفي الديره بصراحه تهبل وكل شي فيها حلو بس يعني للحين ماتطورت مافيه اسواق كبيره يعني بوقت العزايم الكبيره نروح للرياض عشان نشتري فساتين واحيانا نفصلها مع لبسنا يعني اغلبها نفصلها عند الخياط
هيلا ؛ والله ان هالديره تهبل وسوقها يهبل وكل شي فيها بس الأبراج لوني بدق على احد مايدق الا بطلعة الروح
شهد ؛ اييه صح والنت بعد مايشتغل فيها جوالي له كم يوم على شحنه ما استخدمته
هيلا عقدت حواجبها بأستغراب ؛ وشنهو ذا والنت
ضحكوا وقالت هاجر بضحك ؛ الشبكه الشبكه
هيلا ؛ اييه ، والله انتس صادقه
اروى ؛ وبس والباقي ماعليه كلام بصراحه انا احب الديره اكثر من الرياض واساساً مانروح لها كثير ومن زمان مارحنا لها
هاجر ؛ اي والله تجنن جوها ومحلاتها وكل شي فيها
شهد ابتسمت ؛ الصدق اي والله لما رحت السوق انصدمت يجنن حسيت اني رجعت بالزمن توقعت انه مكان تراثي شكل بس مادريت انه صدق تشترون منه بعد وكل شي والله والبقاله شفت اشياء والله اخر مره شفتها وانا صغغيره من بعدها مالقيتها الا بهالديره
هاجر ؛ هي نفسها الديره من زمان للحين ماتغير فيها شي من بقالات واسواق وبضاعه وكلنا متعودين عليها مانشوفه قديم
اروى ؛ وش شفتي بالديره غير السوق ؟
شهد ؛ اول مادخلنا شفته وشفت البيوت تهبل بسيطه واحس اهلها على بعض وجوها والناس مع اني احس انها كبيره بس الناس بكل مكان وصح ماشفت سيارات كثير اغلبهم مشي كل شي قريب
هيلا ؛ ايه انا وامي جايين مشي البيوت عند بعض وترا الديره مب كبيره واجد نصها مزارع والمزارع ماشاء الله هي مكبرتها
شهد تذكرت ؛ ايه صح امس اخوي يقول كان مع اخوكم تركي بالمزرعه انتوا عندكم مزرعه هنا ؟
اروى هزت راسها ؛ اييه بآخر الديره فيه ٤ مزارع بديرتنا هذي وحده لأبوي و٣ من ديرة ابو صالح يعني هالمزارع بيننا وبين ديرتهم
شهد ابتسمت ؛ ماشاء الله عاد مبين الديره هذي انواع الزرايع فيها وكلها خضراء
هاجر ؛ اي حتى شموخ تقوله راحت معنا يوم كانوا هنا وتمشينا فيها وقبلها شافتها هيلا رحنا معهم وان شاء الله المره الجايه معكم
شهد ابتسمت وهي تعتدل بحماس ؛ ابغى اشوف شموخ عندكم صوره لها ؟
هاجر ضحكت ؛ لا والله مانصور بس بتشوفينها بعد شهر او اقل
شهد ؛ اوف شهر كثيير
اروى ؛ اي والله كثير بس عاد وش نسوي ، عادي اوصف لك شكلها وانتي تخيليها لين يجون
شهد ضحكت ؛ تم كيف شكلها
اروى اعتدلت بضحك ؛ اول شي طولها نص ونص اقصر من هاجر بشوي وبعد مو سمينه ولا نحيفه نص ونص بس يمكن نحيفه شويه وبيضاء شعرها بني غامق تحت كتفها بشوي وعيونها كبار ورموشها كثيفه ولها خدود ياكثر ماغفصتهم وبس المهم انها تهبل كلها
شهد ضحكت ؛ ماعرف اتخيل من اقرب وحده تشبهها ؟
اروى ناظرتهم وهزت راسها ؛ مو قريبه لأحد
هاجر وهيلا مع بعض ؛ تشبهك انتي
شهد ضحكت واروى ابتسمت ؛ صدق ؟
هاجر بضحك ؛ اي والله احس فيها من وجهك
هيلا ؛ ايه تشبه عيونتس وانتي وجهتس بريء فيها منه
شهد ابتسمت ؛ والله الصدق انا اتوقع امي قالت لأروى مبينه اصغر عشان وجهها مرره طفولي تهبليين والشعر قصير ووجهك نتفه مره مبينه اصغر
اروى ضحكت وهي تلعب بشعرها بغرور مصطنع ؛ ادري يعني اني حلوه
ضحكت هاجر ؛ شدعوه بس اروى وانا وهيلا ؟
شهد ضحكت ؛ كلكم والله بس اروى نعطيها اصغر من عمرها وانتوا على اعماركم وتهبلون بعد
ضحكوا والتفتوا على البزارين اللي طلعوا ورا جوري اللي ماسكه القطوه وهي تحطها بالأرض ؛ اروى البسه جوعانه
وناظرت شهد بأبتسامة استغراب وقالت هاجر ؛ هذي شهد سلموا عليها وهيلا بعد جت
ومدت يدينها شهد بأبتسامه وقربت جوري وهي تسلم عليها وعلى هيلا اللي ضحكت وهي تجلسها بجنبها ؛ تعرفيني انا مانسيتيني
جوري ؛ ايه انتي هيلا
وسلمت شهد على الباقين وهي تشيل خالد ؛ وياربيي النتفه هذا ولد مين
اروى ابتسمت ؛ ولد اختي عبير
وشالتهم هاجر وهي تجلسهم على الكنبه وفزت شهد بخوف من نطت القطوه على الكنب عندها وضحكت بخوف ؛ اصبروا ترا ماعرف لها
اروى ضحكت وهي تقوم وشالت القطوه وهي تجلس بالأرض ؛ والله انها تهبل ماعليك انتي نفس هاجر اول شي خافت منها والحين عادي
ترف ضحكت ؛ لحقها خالي تركي فيها
الكل ؛ هههههههههههه
هاجر ضحكت بفشله ؛ اسكتي روحي روحي ماما وشوفي ام شهد هناك
وراحت ترف ومعها جوري واميره ومناير وخالد للمجلس وضحكت شهد وهي تجلس عند اروى ؛ وش سميتيها ؟
اروى ابتسمت ؛ ماسميتها مافكرت
هيلا ضحكت ؛ وويلي وصار البسه تنسمى ؟
هاجر ضحكت ؛ اييه لازم عشان نناديها فيها
شهد ابتسمت وهي تقوم ؛ اذا سميتيها علميني عشان اسمي قطوتي اذا شريت
اروى ضحكت وهي تحطها وتقوم ؛ تم ، تعالوا نرجع المجلس
هاجر وهي تقوم ؛ يلا
وقاموا كلهم وقبل يدخلون وقفت اروى عند المغسله تغسل وشهد وقفت عندها تعدل شكلها بالمرايه وابتسمت ودخلوا للمجلس وام هادي كانت حاطه بحضنها اميره وجلست شهد بجنب شريفه وهي تبتسم وتناظر العنود ؛ عادي اخذها بحضني ؟
شريفه ابتسمت ؛ اي ياعمري عادي اكييد
وشالتها وهي تحطها بحضن شهد اللي ابتسمت وهي تبوسها ؛ تجنن ماشاء الله !
شريفه ابتسمت وقالت ام عبدالرحمن بضحكه ؛ ليه ماجبتي لها اخت يأم هادي
ام هادي ضحكت ؛ خلاص يكفون ٣ اول اقول ٢ بس جبت ولدين وابي بنت والثالثه ثابته
ام راشد ضحكت ؛ والله ياليتك جبتي بنت ثانيه عشان تطلع قمر على امها واختها
ام هادي ابتسمت ؛ ياحبيبتي والله حتى انتي ماجبتي الا اللي اخذوا من حلاتك ، وام عبدالرحمن بعد الله يخلي لها هيلا قمر على امها
ام راشد وام عبدالرحمن ؛ تسلمين
وناظرت اميره وهي تبوس خدها ؛ وهالحلوه على امها تهبل هي وخواتها مناير وجوري
منيره ابتسمت ؛ ياعمري تسلمين
وكملت ام هادي تسولف مع الصغار وتلاعبهم
•
في الدوانيه
كانوا تركي وهادي عند بعض وابو هادي وابو راشد مقابلهم وراشد والباقين حولهم ويسمعون سوالفهم اللي كانت عن بعضهم وعن الديره وابتسم ابو هادي ؛ الا على طاري المواشي فيه احد عنده خيل بهالديره؟
ابو راشد ؛ لا ليه ؟
ابو هادي ابتسم وهو يناظر هادي اللي التفت بأستغراب ؛ هادي يبي يشتري له خيل ينفع له هنا ؟
ابو راشد ابتسم ؛ والله حقين ديرتنا مافيه احد يعرف للخيول ولا كان حط له ولو هادي يعرف له مايضر مير ازين مكان للخيل ديرتنا
تركي التفت لهادي بهمس ؛ بتربي لك خيل ؟
هادي ابتسم ؛ والله فكرت بكلامك امس قلت ليه لا
ابو هادي ؛ ونحط له اسطبل ورا العماره ولو بنسوي له ساحه ماتجي احسن من الديره ماشاء الله وسيعه
ابو راشد ؛ اي والله وين يلقى ازين من الديره يركض فيها لابيوت ضيقه ولا شوارع وسيارات
راشد ؛ تعرف للخيل ياهادي ؟
هز راسه هادي وقال ابو هادي بأبتسامه ؛ ايه يعرف طالع على ابوه
ضحكوا وابتسم ابو راشد ؛ وحمد ؟
حمد ضحك ؛ لا والله شوي
ابو هادي بضحك ؛ والله حتى انا ، بس رحنا مرتين مدري ثلاث مع هادي يوم كان يتعلم على الخيل وهو من اول يروح له بس عاد ماتعلمنا له واجد مثل هادي
ابو راشد ابتسم ؛ ماشاء الله عليه الله يخليه لك هو وحمد
ابو هادي ابتسم ؛ اميين ويخلي لك عيالك
ابتسم ابو راشد وصدع صوت المؤذن لصلاة المغرب والتفت لأبو هادي ؛ صلينا ؟
ابو هادي ؛ بنصلي بالمسجد شوي ونروح له
وبعد دقايق قاموا وطلعوا من باب الدوانيه للمسجد مشي
ابو هادي وابو راشد وراشد وسعد وعيالهم قدام هادي وتركي ونايف وحمد اللي وراهم ودخلوا داخل المصلى وبقوا العيال برا ينتظرون حمد وتركي اللي قالوا بيتوضون وهم مستندين على الجدار والتفت نايف لهادي ؛ سمعت ان فيه مسابقه بالرياض وش رايك تشارك فيها ؟
هادي التفت بأنتباه ؛ حقت وش ؟
نايف ؛ سباق خيول تكون من عندهم اذا فزت يعطونك خيل تو بدت شارك
هادي ابتسم بقهر ؛ لا الحين مقدر من يدي انا حتى لو بشتري خيل الحين ماراح اركبه لين يدي تطيب
نايف ابتسم ؛ ماعليها خيره اجل
وطلع تركي وهو ينشف وجهه ؛ انتوا هنا ؟
نايف ؛ اي نحتريكم وينه حمد
والتفت تركي وهو يشوف حمد جاي وينفض شماغه ؛ هادي لفه
نايف اعتدل بصدمه ؛ افا
تركي ناظره بأستغراب وابتسم هادي ؛ زروا عليك
حمد ضحك ؛ يخوي وش اسوي مهو كل مره يضبط
نايف بضحك ؛ افا على الشعر وانا اخوك ولا الشماغ يهون
حمد خلل اصابعه بشعره وهو يضحك ؛ ليه ؟
تركي ؛ غريبه محد قال لك قصه ولا حلقه
حمد ؛ الا والله قالوا بس عاجبني خله
نايف طلع شماغه وهو يوريه شعره ؛ شفت هذا استحي اطلعه قدام ابوي وانا ماحلقته
حمد ؛ والله طوله زين خله انا ان كاني بقصره بخليه مثلك
ضحك نايف وهو يلبس طاقيته ؛ عطني الحين اوريك شلون تلف شماغك
واخذ شماغ حمد وحط شماغه على كتفه وهو يضبط شماغ حمد ويعلمه ومن خلص وهو يعطيه شماغه ؛ ورني شلون تلف لي
حمد ضحك وهو يسوي شماغ نايف وضبطه وتركي يضحك عليهم وابتسم حمد ؛ والله ضبط
نايف ضحك ؛ ايه شفت سهالات بس بكره بسحبك معي للحلاق
ضحكوا ودخلوا للمصلى من كبر الأمام للأقامه
•
صلوا وخلصوا وجلسوا لدقايق وقاموا راجعين للبيت وهم ماشين التفت ناصر لعبدالله بضحك ؛ نتسابق !
راشد ؛ لاتطيحون بس
عبدالله وقف وهو يوقف عنده ناصر يعدون والتفت حمد لنايف بضحك بهمس ؛ نسبقهم !
نايف ضحك بصدمه ؛ والله ان يذبحني ابوي
حمد ؛ اصص ماعليك ننحاش وراهم وان وصلنا نقول نلعب معهم
نايف ضحك بحماس وهو يربط ثوبه ولقط نعوله بيده وهو يركض بسرعه هو وحمد ورا ناصر وعبدالله وتعدوهم والباقين مصدومين وبثواني انفجروا يضحكون ونايف اللي من سمع الضحك تطمن انه مابينجلد اما حمد واثق وحتى لو انجلد على الخفيف ويحاول يسبق نايف اللي وصل قبله وهو يضحك بصراخ ؛ فززت
ووصل حمد وهو يضحك ؛ هب متعافي
نايف خبطه بخفه وهو يلقط نفس ؛ اذكر ربك انت بنعول اكيد منت بسابقني
حمد ضحك ؛ ماشاء الله ماشاء الله
ودخلوا ناصر وعبدالله وهم يضحكون ؛ سبقتونا !
نايف ضحك وهو يأشر على حمد ؛ هذا اللي قال خلنا نسبقهم
حمد بضحك ؛ بس هو سبقكم
ودخل ابو راشد والباقين رغم انه مستغرب هبال نايف بس ضحك وهو يجلس ؛ شب شب النار بس
واخذ نايف الحطب وهو يشب النار وساعده راشد
وبطبيعة الحال مر فيهم الوقت بالسوالف اللي كانت كافيه انها تعرفهم على بعض بكل التفاصيل
•
وداخل برضوا كانت السوالف بينهم عن بعض وقامت ام راشد تشوف العشاء ولحقتها عبير
اما هاجر واروى كانوا ماخذين شهد وهيلا لغرفتهم عند الصغار اللي كانوا مع القطوه يلعبون معاها وهي بحضن اروى بالأرض وشهد وهيلا جالسين ع سريرها وهاجر واقفه وشايله العنود اللي اخذتها معهم
هيلا ؛ اروى ترا مهب زين تقربينها من وجهتس بتجيب لتس حساسيه
اروى ضحكت ؛ لا ماعليك وزينها مافيها شي
هاجر ؛ قومي طيب تعبت وانا واقفه خلونا نروح لنا ساعه هنا
اروى قامت ؛ تعالي جوجو بنخليها بالسيب
وطلعوا معها كلهم وهي تحطها في الممر حق الغرف ؛ انتبهوا لها لاتعورونها جوجو انتي الكبيره انتبهي لها زين ؟
جوري هزت راسها وهي تجلس ؛ طيب
وطلعت اروى ورا هاجر وشهد وهيلا اللي سبقوها للمجلس ودخلت اروى للمطبخ وهي تشوف امها وعبير ؛ يمه استوى ؟
ام راشد ؛ ايه بس بدري مابنحطه الحين
عبير شافت الساعه ؛ باقي شوي على اذان العشاء اذا صلوا نحطه
اروى ؛ طيب جاهز كل شي ؟
ام راشد وهي تطلع ؛ اي خالصين
وطلعوا وراها اروى وعبير للمجلس ...
" بعد صلاة العشاء بربع ساعه "
كانت ام راشد وهاجر واروى بالمطبخ والباقين كلهم بالمجلس الا الصغار بالصاله عند التلفزيون
وباب المطبخ اللي ع الصاله كان مسكر عشان العيال دخلوا
ابو راشد وهو يشوف اللحم ؛ لا ماشاء الله استوى حطوه بالصحن الكبير
ام راشد ؛ يعني صحن واحد ؟
ابو راشد ؛ ايه ايه اكبر واحد ، انا بروح للدوانيه هاتوه يعيال
وطلع وتركي ونايف بقوا يحطونه مع ام راشد والبنات
وجابت هاجر الصحن وهي تحطه ؛ هذا هو يمه
نايف ؛ ابك اغسليه يارفلا
هاجر ؛ نظيف
تركي ضحك وهو يدقها بخفه وياخذ الصحن ؛ بتموتين ان رشيتيه شوي
واخذه عند المغسله وفتح المويه وهو يبتسم والتفت للشباك وتنهد وهو يتنحنح ويقفل المويه ويحط الصحن وام راشد تحط العشاء واروى معها
هاجر وهي تعطي نايف ؛ خذ سفرتكم ، يمه بطلع اودي السفره اخذ شي معي ؟
ام راشد ؛ لا وسكري الباب
وطلعت هاجر ونايف فتح نص الباب اللي على الدوانيه وهو ينادي ؛ ناصر .. ناصر
وطلع ناصر من الدوانيه ونايف يعطيه السفره ؛ هاك ودها بنجيب العشاء
واخذها ناصر ورجع دخل ونايف سكر الباب وهو ينتظر امه واروى اللي جالسين يحطون العشاء وتركي معهم ومن خلصت وقف تركي ؛ نايف شل معي يلا يلا
وشاله نايف هو وتركي وفتحت اروى الباب وهي وراه وطلعوا وسكرته وهي تكمل مع امها صحنهم
ام راشد ؛ خلاص ودت هاجر السفره ؟
اروى مشت وهي تفتح الباب اللي على الصاله ؛ ايه ، يمه احط صحن الورعان بالصاله
ام راشد ؛ ايه وديه لهم فيها هم ؟
اروى هزت راسها بالأيجاب وهي تاخذه وطلعت للصاله وهي تحطه ؛ يلا حبايبي تعشوا وشوفوا التلفزيون
قبل تروح نادتها جوري ؛ اروى غيري مانبي هذي القناه
اروى اخذت الريموت وهي تغير لهم القناه ؛ هذي عليها سالي تبونها ؟
البزارين ؛ ايه
ترف هزت راسها بعناد ؛ لا انا ابي هايدي
اروى ؛ بعد هذي تجي تعشوا يلا
ورجعت اروى للمطبخ وام راشد طالعه بالصحن ؛ هاتي الصحن الثاني وتعالي
ودخلت اروى للمطبخ وشالته وطلعت ورا امها ودخلت للمجلس وهي تحطه وقالت ام راشد بأبتسامه ؛ يلا سموا الله يحييكم يأم هادي انتي وام عبدالرحمن
•
بالدوانيه
قبل دقايق
دخلوا نايف وتركي وهم يحطون العشاء وابتسم ابو راشد ؛ حياك الله على قل الكلافه يبو هادي وتستاهل اكثر
ابو هادي ابتسم بكلافه ؛ والله ماقصرت بيض الله وجهك ياعبدالله
ابو راشد ابتسم ؛ ابد حق وواجب ، يلا سموا الله يحييكم
وقربوا كلهم للعشاء ..
وبعد ماخلصوا كان ابو هادي واقف يسولف مع ابو راشد عند الباب وهادي ابتسم من نايف اللي قال ؛ لاتنسى ياحميد باخذك بكره نقص ذا الشوشه
حمد ضحك ؛ والله ماقصها الا ان كانه ع الخفيف ماعليه
تركي ناظر المرايه وهو يمسح دقنه ؛ حتى انا والله ودي اخفف من هنا شوي
نايف ؛ نروح العصر كلنا
تركي ضحك ؛ وهادي معنا حتى هادي ترا شعره مثل اخوه
نايف ضحك ؛ اشوفه بس اهون
ابتسم هادي ؛ خلاص افكك منه بكره
والتفتوا على جوال تركي اللي دق وهو يطلع برا ورد ؛ هلا يمه
ام راشد ؛ تركي ابيك توصل ام عبدالرحمن بيتها ماني مخليتها تروح بهالليل لحالها
تركي ؛ متى جت هذي ؟
ام راشد ؛ من العصر مسيره المره وشو متى جت يلا وصلها عند باب بيتها ارها بتطلع الحين
وقفلت ومشى تركي وهو يشوف هادي اللي طلع ؛ امش امش معي بنوصل جارتنا
هادي بأستغراب ؛ هاه ؟ وين توصلها
تركي ؛ ام عبدالرحمن وبنتها بنوصلها مشي هنا بيتها ورانا قريب يلا
هادي تنح لثواني وقال تركي ؛ تخاويني ولا اخذ نايف ؟
هادي تنحنح ؛ خلاص ايه معك
وقرب تركي عند باب الدوانيه وحمد ونايف بالممر ؛ نايف بروح شوي واجي
وقبل يرد نايف طلع هو وهادي من باب الدوانيه ومشوا لقدام باب البيت
هادي ؛ الحين توصلهم ليه ، مايروحون مع عيالهم ؟
تركي ؛ لا ام عبدالرحمن زوجها متوفي وولدها مهو هنا مغير هي وبنتها
هادي هز راسه وطلعت ام عبدالرحمن ؛ مساء الخير ياتركي .. ماشاء الله هذا هادي مساك الله بالخير
تركي وهادي ؛ مساء النور
هادي همس لتركي ؛ هذي اللي امس
تركي بهمس ؛ ايه واللي قشتك اللي وراها بنتها
هادي تنحنح وناظر هيلا اللي كانت تناظره وهي تنزل عيونها ومشى تركي وهادي معه وام عبدالرحمن وهيلا وراهم
ام عبدالرحمن ؛ والله اني قلت لأمك مايحتاج اروح انا قالت لا والله ماتروحين بهالليل اخليه يوصلتس
تركي اللي كان قدامهم وصاد ؛ ايه مالومها وين تمشين يمكن تلقين كلاب ولا شي
ام عبدالرحمن ؛ ييوه اي والله بسم الله ، هيلا امشي سرعه خلتس جنبي
هيلا ؛ وراتس انا يمه
وابتسم تركي بضحك وهو يمشي لحد ماوقفوا عند بيتها وقالت ام عبدالرحمن ؛ ماقصرتوا انتبهوا للطريق
تركي ؛ ان شاء الله ماسوينا الا الواجب
ودخلت ام عبدالرحمن وهيلا ومشوا تركي وهادي والتفت تركي بأستغراب ؛ علامك ساكت ؟
هادي رفع كتفه ؛ مدري مستغرب
تركي ؛ من وشو
هادي ؛ ياخي مدري يعني احس ماشاء الله اهل الديره يمونون على بعض
تركي ضحك ؛ عادي يبن الحلال حنا نعرف بعض من سنين اكيد نمون
ابتسم هادي بخفه وناظر بيت مساعد ؛ يوه يامساعد شاف يدي اليوم بالمسجد وانا ماعلمته عن اللي صار
تركي ؛ وش قال ؟
هادي ؛ سألني قدام ابوي وسكتته ويوم طلعنا قلت له بعدين اعلمك ورجع بيته وللحين ماعلمته يمكن اكلمه شوي
تركي ؛ هو اصلاً منشغل عمه واهله عندهم
هادي ناظره بأبتسامة صدمه ؛ ماشاءالله الظاهر كل شي بالديره يندرى عنه
تركي ضحك ؛ لاياخي شفناه العصر بالسوق قبل لاتجون بشوي بعدين ترا الديره على بعض كل شي ينعرف
هادي ابتسم ودخلوا للدوانيه وكان ابو هادي طالع هو وابو راشد والعيال ويتكلمون وناظر ابو هادي هادي ؛ يلا ياهادي مشينا
هادي ؛ يلا ، مع السلامه ياتروك اشوفك بكره ان شاء الله اذا رحت للسوق
تركي ابتسم ؛ ان شاء الله
وطلعوا وقال ابو هادي وهو عند سيارته ؛ اغناك الله يبو راشد ماقصرت
ابو راشد ابتسم ؛ حق وواجب عساه عافيه
ابتسم ابو هادي وهو يركب ؛ الله يعافيك ، يلا تصبحون على خير
الكل ؛ وانت من اهله ، تلقى خير
وحرك وهو يوقف عند باب البيت الكبير
ودخل ابو راشد والعيال للدوانيه وشال نايف صحن العشاء وتركي السفره وهم يروحون عند باب المطبخ ودق تركي الباب وهو يدخل وكانت اروى داخل وفزت ؛ بسسم الله
تركي ؛ علينا
نايف ؛ هاك الله يعينك انتي وهاجر على غسل الصحون
اروى ؛ حطوه بس لايكثر بروح اشوف الناس بيروحون
وطلعت بسرعه وهي تسكر وراها الباب وقال تركي بضحك ؛ مطيوره
نايف ضحك وطلع هو وتركي اللي سكر الباب وراه ورجعوا للدوانيه يلمون الاغراض اللي فيها
•
بالمجلس
كانت شهد تلبس عبايتها وام هادي تسلم على ام راشد وقالت بأبتسامه ؛ ماقصرتوا يأم راشد وتسلم يدينك
ام راشد ابتسمت ؛ بالعافيه بس هاا عاد سيروا علينا مره ثانيه تراكم قريب
ام هادي ابتسمت ؛ انتي المره الجايه اللي بتجين انتي والبنات
ام راشد ؛ ان شاء الله
ام هادي سلمت ع الباقين وهي تلتفت لشهد ؛ يلا شهد
وسلمت شهد عليهم وطلعوا وام راشد طلعت توصلهم للباب ومن طلعوا وهي تسكره ورجعت لداخل
بالصاله جلست هاجر بتعب ؛ يوه يربي ماداني كرف العزايم
عبير ضحكت ؛ اصبري اصبري باقي الصحون والقدر
منيره ضحكت ؛ ماعليك نقسمهم ونخلص بسرعه
شريفه قامت وهي تشيل بنتها وقالت بضحكة نذاله ؛ يوه يلا عنودي ننام ونريح
هاجر مسكت كرتون المنديل ؛ لو عنودي مب معك كان صمختك بهذا على راسك
الكل ؛ هههههههههههه
ام راشد دخلت بأبتسامه لضحكهم ؛ ها ضحكوني معكم
اروى ؛ هاجر يعننها ماتداني العزايم تحسب اننا بنقول خلي الشغل علينا
هاجر ناظرتها وهي تخزها ؛ اعنبوا ذا الراس والله اني كرفت اكثر منك بعدين انا ماداني كرف العزايم ولا المسايير يازينهم
عبير ؛ والله صراحه امي ماقصرت ضبطت العشاء
منيره ؛ اي والله ياعمه تسلم يدينك
ام راشد ابتسمت ؛ بالعافيه يلا اروى انتي وهاللي ماتداني كرف العزايم شيلوا الاغراض
وضحكوا وقامت هاجر واروى وهم يشيلون الصحون وقامت معهم منيره وعبير اما شريفه راحت لغرفتها وام راشد جلست بالصاله عند البسه والصغار ونادت ؛ اروى البسه حطيتي لها اكل ؟
اروى من المطبخ ؛ لا شوي واحط لها
وقامت ام راشد وهي تدخل للمطبخ واخذت صحن ؛ بحط لها من اللحم ان احتريتك ماحطيتي لها
اروى ؛ لا والله محد مهتم فيها كثري
وضحكت ام راشد وهي تحط بصحن صغير وطلعت وهي تحطه بالصاله وبدت القطوه تاكل وجلست ام راشد على الكنب والبزارين متسدحين على الأرض يتفرجون على التلفزيون
بالمطبخ
منيره ؛ شوفوا باخذ صياني القهوه والكاسات
عبير ؛ وانا باخذ الصحنين هذولي
هاجر ؛ وانا الصحن الثاني والصينيه ، اروى بقى لك القدر يكفي عنهم كلهم
اروى ؛ بنقعه واغسله بكره
هاجر ؛ يويلك خلني اشوفه بكره مهو على كيفك حنا بنغسل صحونا الحين انتي معنا
اروى بقهر ؛ يابس يحمار مثل وجهك بنقعه
هاجر لفت عليها ومسكتها عبير ؛ تعوذي من بليس خلاص اروى انقعيه لين نخلص وبعدها تغسلينه
هاجر ؛ وخلني اشوفه بوجهي الفجر ، تراها نذله تدري ان امي بتغسله ان شافته بس يعننها
ضحكوا منيره وعبير واروى خزتها وهي تعبي مويه وصبتها بالقدر وطلعت وكملت كل وحده تغسل اللي عليها
بالصاله
طلعت اروى وقالت ام راشد ؛ اروى تكنسين المجلس؟
اروى بوهقه ؛ الحين ؟
ام راشد ؛ ايه انحاس اكنسيه عشتي
اروى تنهدت ؛ ابشري
ودخلت لممر الغرف وهي تاخذ المكنسه ومشت فيها للمجلس وشافتها هاجر معديه والمكنسه معها ؛ اييه اكرفي يالمصروعه
اروى بقهر ؛ انطمي بس
ام راشد ؛ يلا بس خلوا عنكم الهواش الساعه ١١
وكملت هاجر غسيل واروى دخلت للمجلس وهي تشغل المكنسه وتكنسه وترتبه
بعد دقايق
بالمطبخ دقوا الباب العيال وفتحت عبير ودخل ابو راشد نايف ونايف وراشد وهم جايبين الصحون والأغراض الباقيه
ابو راشد ؛ يالله عاونهم وين ام راشد
هاجر ؛ بالصاله يبه
ودخل ابو راشد وحط نايف السفره وقالت هاجر بقهر ؛ فيه زباله ياا.. نايف الله يصلحك مب تحذفها بالأرض وتحوسنا
نايف ضحك ؛ حطيها انتي
ودخل للصاله ورا راشد اللي جلس عند امه وابوه اللي تو جلس ؛ مساء الخير يمي
ام راشد ابتسمت ؛ هلا مساء النور
وضحكت من باس يدها وهو يبتسم ؛ جعلها الجنه على هالعشاء ماذقت مثله
نايف ؛ ايييه والله انه طعمم اوه بسس
ابو راشد ؛ اي والله بيض الله وجهك
ام راشد ضحكت ؛ جعله عليكم بالعافيه
وطلعت اروى من المجلس وناظرها راشد ؛ ايه ايه عاشت السنعه وخيتي
هاجر من المطبخ ؛ وحنا
راشد ضحك ؛ وانتوا بعد سنعات الله يقويكم
اروى تعدت بالمكنسه وهي تكش على هاجر وردتها لها هاجر وضحكوا وهي تدخل للممر حطت المكنسه وطلعت وقام ابو راشد ؛ يلا خلوا الورعان ينامون وناموا لاتسهرون يلا ياعيال
وطلع هو ونايف وراشد للدوانيه والبنات كملوا الصحون وخلصت عبير وهي تحطهم بالدولاب ؛ يلا اروى اغسلي القدر انا بروح انام صدعت
وراحت وهي تاخذ خالد اللي نايم بحضن ام راشد والباقين للحين ع التلفزيون ؛ ترف يلا نوم شوفي خالد نام
ترف ؛ مابي هو ورع انا بتابع مغامرات سنان بتجي الحين
عبير ؛ قومي بس تتابعينها بكره الوقت تأخر
ترف بعناد ؛ مابي
عبير وهي تدخل لممر الغرف ؛ اخلصي بس لا اعصب
ام راشد ؛ خليها اجيبها انا
وطنشت ترف وهي تكمل تتفرج ودخلت عبير لغرفتها تنام وبعد دقايق طلعت منيره وهي تشوف بناتها صاحين ؛ يلا جوجو انتي وخواتك بننام
جوري ؛ بس شوي الحين اقوم
وشالت اميره وقالت وهي تطلع ؛ بودي خواتك واجي
وكملوا جوري وترف ومناير يتفرجون
وبعد دقايق جت وهي تاخذ مناير ؛ ياجوري يلا
جوري بقهر ؛ يماما بس شوي
ام راشد ؛ خلاص لازم تنامون انتي وترف الوقت تأخر
منيره ؛ يلا كلكم ناموا حتى ترف بتنام عشان تقوم بدري وتشوف براعم اذا فتحت
وتأففت جوري وهي تقوم وقالت منيره ؛ يلا عمه تصبحين ع خير
ام راشد ؛ وانتوا من اهله ياحبيبتي
وطلعت منيره وبناتها وام راشد عند ترف انتظرتها لدقايق وهي تقوم ؛ يلا تر... وابتسمت وهي تشوفها غفت وهي تشيلها بشويش وراحت لغرفة عبير وشافتها نايمه هي وخالد وحطت ترف عندهم وهي تطلع رجعت للصاله طفت التلفزيون ومشت للمجلس وهي تشوف اروى رتبته وطفت النور وهي تطلع وتسكر الباب ومشت للمطبخ وهي تشوف هاجر واروى للحين يغسلون ؛ يبنات لاتسهرون اذا خلصتوا ناموا
هاجر ؛ مافيني نوم بخلص الصحون وامسح البلاط
اروى ؛ وانا اذا خلصت بنام ماعليك
ام راشد ؛ اجل انا بروح انام
هاجر واروى ؛ نوم العافيه
ام راشد ابتسمت ؛ الله يعافيكم
وراحت لغرفتها واروى وهاجر كملوا ينظفون وبعد دقايق قالت اروى ؛ شفتي شهد ؟
هاجر ؛ اييه تهبل
اروى ؛ تدرين اني قررت اطول شعري احس انه يحلي صدق
هاجر ؛ ايه ومن بكره تقول بقصه
اروى ؛ يختي ماتعودت على الطويل بس يوم شفت شعرها قلت والله ماعاد اقصه
هاجر ؛ يليت شموخ هنا تشوفها كان الحين قعدنا نسولف فيها كلنا
اروى ناظرتها بتفكير ؛ ليه ماندق عليها ؟
هاجر ؛ لا يويلي كم الساعه
اروى شافت ساعتها ؛ ١٢ وشوي
هاجر ؛ لا لا تلقينها نايمه
اروى فزت وهي تطلع للصاله اخذت جوالها وهي ترجع ؛ بندق ونقفل بسرعه
هاجر وهي تنفض يدينها ؛ يلا يلا
ودقت اروى وهي تعد ؛ ١ ٢ ٣ ٤ ٥
وقفلت وقالت هاجر ؛ اكيد انها ناي.. وضحكت من فزت اروى بفرحه من دقت شموخ وردت اروى ؛ هللا والله
شموخ ضحكت ؛ قلبيي
هاجر ؛ نايمه ؟
شموخ ؛ لا ابشركم نومي خرب انام ٣ الفجر
اروى ضحكت ؛ لا حنا سهرانين على صحون العزيمه نغسلهم
هاجر ؛ جت شهد وامها تخيلي
شموخ ؛ امماا متى ؟
اروى ؛ الييوم جو الساعه ٤ العصر ومشوا الساعه ٩ ونص
هاجر وهي تكمل الصحون واروى واقفه عندها وماسكه الجوال ؛ جت ام هادي وشهد وابو هادي وولده هادي والثاني حمد
اروى ؛ شفناهم كلهم تخيلي يبنت حتى عيالها يهبلون وام هادي وشهد طلعوا عباياتهم وام هادي لابسه جلابيه بس يعني فخمه لونها اسود ومزينه بخيوط ذهبيه ولابسه اساور ذهب وخاتمين ناعمه والله اني خقيت عليه
هاجر ؛ وتخيلي عمرها ٤٨ ومبينه اصغر مب عجوز يبنت ومنزله نقابها ومتحجبه ووجها يهبل وحلوه ماحطت مكياج يمكن بس حمره وحاطه مناكير عنابي عاد هي بيضاء تهبلل
شموخ ضحكت ؛ يويلي ذي الام ماشاء الله
اروى ؛ ايييه وشههد تخيلي مطلعه عبايتها طرحتها ونقابها وفاكه شعرها يوصل لآخر ظهرها اسسود يبنت سواده يجنن انا شعري وانا احسبه اسود طلع شعرها اسود منه ولابسه فستان بيج صوف وماسك على جسمها وشنطتها بيج وكعبها اسود وحاطه مكياج خفيف ايلاينر ومسكره وروج
هاجر ؛ ومو سمينه ولا نحيفه جسمها يهبل وبياض على امها بس تخييلي بالوجه ماتشبه امها ابببد ولا تشبه ابوها ملامحها حاده وعيونها انا احسب حاطه شي وساحبتهم طلعت كذا تجنن عيونها
اروى ؛ ايييه شفتي ابوهم عادي بس مافيه شيب وتحسينه صحه ماشاء الله بس مايشبهونه كثير وهادي هو اللي يشبه شهد بعيونه حاده ومسحوبه والثاني حمد اول لاشفته قلت كنه بنت تخيلي مافيه دقن وشنبه خفيف وشعره طالع من اطراف غترته لابس غتره بيضاء ومحدده بكحلي ولابس ثوب كحلي ونظارات اتوقع انها زينه وعيونه مكحله ونحيف شوي والثاني لا اسمن منه بس يعني نص ونص ولابس غتره بعد وثوب رمادي وعنده عوارض وشنب مو مثل اخوه بس خفيفه
شموخ ؛ يويلي ماشاء الله لحقتوا تشوفونهم
اروى ؛ اببك اييه كنا عند دريشة المطبخ اول لاجو وبعدين رحنا نسلم على امهم ويوم بغوا يروحون بعد شفتهم تخيلي البيت وراهم وجايين بسياره وش ذا الدلع يمكن امهم وشهد يجيبهم ابوهم بس هادي وحمد لا راحوا معهم وركبوا ورا وهم يروحون عند باب الحوش وانا درعموا علي الجنون تركي ونايف وانحشت للصاله اشوف ام هادي وشهد
هاجر ؛ وسياراتهم فخمه ولا يجون عليها يجون مع ابوهم سيارته جيب ابيض وفيه سيارتين عند بيته وحده جيب رصاصي والثانيه صغيره سودا بس فخمه مب حنا جمس وغمارتين
اروى ؛ على ططاريي السيارات كان شغل ابوهم بالمدينه معرض له هو انا قلت انهم اغنياء ماشاء الله بس انهم خبول يوم جو هنا لو قعدوا على معرضهم ازين
هاجر ؛ وشهد سألت عنك تقول بشوفها عاد حنا سولفنا لها عنك
اروى ابتسمت بنذاله وهي تتنحنح ؛ اي صح وجت ام عبدالرحمن وهيلا بعد ووصلهم تركي لبيتهم لما كانوا بيرجعون
وقبل تتكلم شموخ قالت هاجر وهي تحط الصحون بالدولاب وبدت تمسح البلاط واروى وراها بالجوال ؛ وهيلا وامها بعد جو من العصر بس بعد ماجو اهل ابو هادي ومشوا قبلهم بعد العشاء وهيلا لابسه دراعه خضراء ماسكه يربي يهالبنت تجنن وشعرها صاير اطول ماشاء الله لازم اسألها وش السر
اروى ؛ والله ان شعر شهد احسن الاسود يهبل انا بخلي شعري يطول اذا قلت بقصه اصفقوني
هاجر ؛ شهد والله حلوه بس ماتشبه امها
اروى ؛ اي بملامح وجهها شوفي شموخ تخيلي عيونها حاده وناعسه بنفس الوقت مدري كيف وعيونها بني فاتح على عسليه قهر لو سود مثل شعرها كان طلعت تهبل المهم ورموشها كثثيفه مدري وش سر الشعور بعايلتهم ووجها لو تغطين عيونها كان قلتي وجه ورع تخيلي خدود وخشمها صغير وفمها ووجها كله بس عيونها تخلي ملامحها حاده
شموخ ؛ يربيي حمستوني اشوفها
اروى ؛ لا ويوم قلنا لها عنك قالت عندكم صوره لها طلعت تصور ورتنا صور لها ولصديقاتها تقول عرفتهم بالثانويه ومعها للحين وحده ريناد والثانيه يارا والثالثه منال
شموخ ؛ كان قلتوا بنصورك لشموخ
هاجر اخذت الجوال وهي تهبد اروى ؛ اروى يالجنيه اغسلي القدر اخلصي انا خلصت بمسكه وانتي غسلي ... لا فشله نقول لها من اول شي بعدين اذا جت مره ثانيه نشوف المهم شموخه انتي كيفك كيف خالتي
شموخ ؛ والله بخير كلنا وانتوا اخباركم
اروى وهي تغسل ؛ والله بخير ومشتاقين لكم متى بتجون ؟
شموخ ؛ بالتمايم لسى ، تخيلي انا من الطفش جهزت التوزيعات من الحين كل يوم تجي فكره واسويها
اروى ضحكت ؛ يختي تعالوا الناس اجازه ومافيه شي
شموخ ؛ لا عزام رجع لدوامه تخيلي قهرني ويقول ارجع اخذ اجازه اذا رحنا الديره
التفتوا هاجر واروى على باب المطبخ اللي فتح ودخل نايف وقالت هاجر ؛ بسم الله انا مسكرته جني انت ؟
نايف ؛ انتوا للحين ماخلصتوا
اروى ؛ انت وش تبي للحين مانمت
نايف ؛ نبي شاهي
هاجر ؛ من يبيه
نايف ؛ انا وتركي
اروى ؛ مافيه غسلنا الترامس
نايف انتبه للجوال اللي ماسكته هاجر وواقفه عند اروى ؛ من تكلمون ؟
هاجر ؛ خويتنا شتبي
نايف اشر لها بصدمه " الحين "
هاجر ؛ ايه
نايف بهمس ؛ من ؟
هاجر تنهدت ؛ بنت ام عزام اخلص
نايف هز راسه وطلع وقالت اروى ؛ والشاهي
هاجر ؛ مب لازم الحين يخمدون
شموخ ضحكت ؛ حرام سوو لهم
هاجر ؛ والله يختي تعبت مالي خلق ارجع اسوي .. اي تخيلي يوم جابوا صينية القهوه حقت الرجال طلعوا جايبين حلا وشوكولاته لا ومزينينها بصينيه واللي يضحك شكلها عند المعمول والتمر والاقط
اروى ضحكت ؛ ايييه وام هادي جايبه نفسها لنا وبقلاوه ويوم سألنا شهد تقول من محلات الرياض تخيلي نطق مشوار للرياض عشان حلا
شموخ ضحكت ؛ يزيينهم بالعكس واضح ذويقين
ودخل تركي وفزت اروى ؛ يلييل نعم تركي ؟
تركي ابتسم وهو يتنحنح ؛ ااء ليه ماتبون تسوون شاهي ؟
هاجر ؛ خلاص اسوي رح
تركي ؛ لا انا بسويه خلاص
وسكتوا وهو ياخذ الابريق ويسوي الشاي وناظرهم ساكتين ؛ وش تسوون
اروى ؛ نرقص
هاجر ؛ وش تشوف نغسل
تركي ؛ لا يقول نايف تكلمون خويتكم بنت ام عزام
اروى كتمت ضحكتها وهاجر خزته ؛ ايه طيب ؟
تركي ؛ لا ابد انتبهي للشاهي على النار شوي واجيه
وطلع وهو ميت ضحك وركض لنايف وشافه واقف وهو يركض ويضرب كفه بكف نايف بضحك ؛ كففو
نايف ضحك ؛ ها للحين يكلمونها ؟
تركي وهو مبتسم ؛ اييه بس ماسمعت صوتها ساكته
نايف ؛ ايه ماتكلمت مغير خواتك يبربرن
تركي ؛ لا وقعدت اسوي شاهي احتريها تنطق ولا تكلمت وطلعت
نايف ضحك وجلس عنده تركي وهو مبتسم
كانوا جالسين عند باب الحوش اللي ع البيوت والمسجد ومن قال تركي يبي شاهي راح نايف ولما عرف انهم يكلمون شموخ ركض لتركي وهو يقوله
بالمطبخ
هاجر ؛ شموخ انا والله نعست بروح انام
اروى ؛ خلاص روحي انا اسولف شموخ فيك نوم ؟
شموخ ؛ لا ماعليك
هاجر ؛ اجل بروح اروى اذا استوى الشاهي خليه ياخذه يلا تصبحون على خير
اروى وشموخ ؛ وانتي من اهله
وراحت هاجر للغرفه تنام وقالت شموخ ؛ راحت هاجر ؟
اروى ؛ ايه را.. قاطعتها شموخ ؛ يالنذله تقولين تركي وصل هيلا؟
اروى ضحكت ؛ اييه هي وامها بعد
شموخ ضحكت ؛ عادي اصلاً
اروى ؛ امي تناظر هيلا وشهد عاد انتي فكري فيها
شموخ ؛ الله يهنيهم
اروى شهقت ؛ لايكون ؟ ...
شموخ تنهدت ؛ وش ؟
اروى ؛ وش صار على زايد؟
شموخ ؛ ماصار شي
اروى ؛ رفضتي ولا وافقتي !
شموخ ؛ ماصاار شي قلت
اروى تنهدت ؛ خرشتيني طيب متى بترفضين ؟
شموخ ؛ يختي ماتكلموا محد جاب طاريه الله يشغله
اروى ؛ شموخ امانه انتي تكلمي مافيها شي قولي ما ابيه
شموخ ؛ شوفي انا اقول هالأسبوع اذا ماجابوا طاري بقول لهم ماني موافقه
اروى ؛ كل مره تقولين هالأسبوع وهالمره ومارفضتي
شموخ بقهر ؛ يختي والله محد تكلم وانا ماحب اقول
اروى وهي تطفي النار ؛ طيب اذا رفضتي علميني فيه ناس تنتظر لو سمحتي
شموخ ضحكت ؛ خلاص اقولك ماعليك المهم اخباركم انتوا
اروى وهي تحط كاسات ؛ والله ياقلبي بخير كلنا سلمي لي على خالتي وحاولي تقولين لها او تلمحين
شموخ ضحكت ؛ تمام وسلمي لي على خالتي ام راشد والبنات ووصلي بوسات لعنودتي
اروى ابتسمت ؛ ان شاء الله يوصل ، يلا بقفل وانام تصبحين على خير
شموخ بأبتسامه ؛ وانتي من اهله مع السلامه
وقفلت وحطت اروى الجوال وهي تاخذ الصينيه وطلعت وهي واقفه ورا الباب وانتظرت لدقايق وماجوا وهي تسكره وطلعت من المطبخ للصاله وهي تفتح الباب اللي ع الحوش وتشوفهم جالسين عند باب الشارع ونادت ؛ تركي
والتفت تركي وهو يقوم وجا وهو ياخذه ؛ عشتي والله
اروى ؛ بروح انام اذا خلصتوا حطوها بالمطبخ الباب الثاني مو مقفل ذا بسكره
تركي هز راسه وهو يروح وسكرت الباب اروى وهي تدخل تنام ....

•

حبايبي اللي تقرون بصمت ليه 🥹؟
نجمه صغيره على طرف اضغطوا عليها ماتدرون وش كثر تحمسني اكمل لاتخلوني افقد الشغف 🦦💔