ياديرةٍ ضمّت كل الأحباب

Part 24

قبل بدقايق عند تركي اللي طلع من المطبخ للدوانيه وهو مختبص ودخل وهو يمد لأبوه شماغه ؛ ييبه هذا حقك
ابو راشد ؛ علقه بالباب لايتعفس
علقه تركي وعلق ثوبه معه وهو يجي بيطلع
ابو راشد ؛ وين بتروح
تركي ؛ ااا للسياره شوي وجاي
وطلع مسرع وهو خلاص تأكد انه حبها من كل قلبه وركب السياره وهو مايدري وين يروح ووش يسوي كل اللي براسه الحين شكلها وسند راسه على الشباك وهو يسترجع شكلها وييتذكر لبسها كان قميص ابيض وصيفي ولنص ساقها ووجهها وهي تطالع المرايه شعرها اللي كان من طوله طالع من اطراف المنشفه وضحك من صدمتهم وشكلها وهي تركض وهو ماعاد يهمه لو الكل يدري لأنه قرر يخطبها ولا مهتم لشي الا لشكلها اللي مستحيل يروح عن باله
تنهد بحب ونزل يدخل للدوانيه ويسمع سوالفهم
..........••..........
بيت ابو هادي
اللي رغم تعبهم ماجاهم نوم وكلهم بالصاله على التلفزيون وشهد تكتب اغراض بورقه وام هادي عندها تعدد عليها
هادي ؛ يبه عماني وخوالي متى نروح لهم
ابو هادي ؛ هاليومين ان شاءالله لازم نسلم عليهم
ام هادي ؛ وش بعدها هالديره عنهم ؟
ابو هادي ؛ نص ساعه بجنبنا ماهي بعيده وحنا يعني بأول الديره لو سكنا بأخرها كان صارت تبعد ساعه
ام هادي بضحك ؛ اشوا ماهي بعيده واجد ، بس هالديره اكبر واحسن ولا والله كان ودي نسكن بديرتهم عشان نصير عند بعض
ابو هادي ضحك ؛ والله حتى انا بس مافيها شغل ولا محلات واجد ولا كان صرنا هناك دامهم بديره وحده
" اهل ابو هادي واهل ام هادي ساكنين بنفس الديره بجنبهم "
حمد ؛ يبه الحين بالعيد نعيّد هنا ولا نروح لهم
ابو هادي ضحك ؛ ييوه على خير ان شاء الله للحين مافكرت انت شكلك تفكر بهالديره واجد
حمد ؛ الصدق اي والله افكر با الأجواء فيها كيف ورمضان بعد
شهد ضحكت ؛ هييه تحمست
ابو هادي ؛ يالله العافيه باقي ، الحين شوفو الأجواء بالشتاء والبرد صدق
ام هادي ؛ اييه هذي بدايته
هادي ؛ ايييه واخيراً نشب نار والله من زماان ودي بشبة نار
حمد ؛ بالشتاء اللي فات جينا للديره وكل يوم شبه
" يقصد ديرة خواله واعمامه "
شهد ؛ ايييه وجمدنا وحنا نحسبه برد خفيف
ابو هادي ؛ هالمره الجمده صدق
والتفت لأم هادي ؛ والله اني صدعت مافيه قهوه ؟
ام هادي ؛ الا جبت من المدينه مع اغراض المطبخ بقوم اسوي
وقامت تسويها وحمد التفت لأبوه ؛ يبه وش رايكم بالعيد نسير عليهم بس يعني مانروح قبل العيد بكم يوم على آخر رمضان ولا ليلة العيد لا نروح يوم العيد الصباح ولا العصر وبالليل نرجع وهم بعد نفس الشي وان كانهم يبون ينامون عادي بس انا ابي احلل رمضان والعيد بهالديره
هادي ؛ الله يالدنيا اول ماتصدق نروح والحين جحدتهم
حمد ؛ يييوه والله محد يستانس اذا رحنا كثرك تسبقنا وحنا تو طلعنا من المدينه ويقعد ابوي ساعه يضرب بوري وراك واخر شي حنا نلحقك
ابو هادي ضحك ؛ عز الله انه صدق
هادي ابتسم وكمل ابو هادي ؛ خلاص حتى انا بشوف رمضان والعيد هنا وكيف جوه بس عسى الله يبلغنا رمضان والعيد على خير
الكل ؛ اميين
هادي ؛ يبه كم الساعه نروح لمساعد ؟
ابو هادي ؛ بعد صلاة المغرب
شهد ؛ امي بتروح ؟
ابو هادي ؛ ايه ايه لازم نروح كلنا
حمد وهو يشوف الوقت ؛ طيب الساعه تو جت 3 مانطلع مكان ؟
ابو هادي ؛ بنطلع نجيب اغراض للبيت واذا فيه وقت نتمشى
شهد ؛ يبه بروح معكم عشان بشوف السوبر ماركت حقهم وكل شي
ابو هادي ضحك ؛ ان شاءالله بس تراها بقاله صغيره قبل السوق بشوي اذا فيه وقت دخلنا للسوق
شهد هزت راسها وطلعت ام هادي بعد دقايق بالقهوه وصبت لهم وهم يتقهوون
وبعد ساعه تقهوو فيها وسولفوا عن الديره وحماسهم لها اذن العصر وقاموا يصلون وبعدها يروحون يجيبون اغراض البيت
وبعد الصلاه قام ابو هادي وهو يجلس بالصاله ؛بنروح الحين عشان نخلص بسرعه ، الساعه 4 ونص لازم قبل 6 نجي
ام هادي ؛ ايه يلا وانا بروح عشان اشوف الأغراض
ابو هادي ؛ يلا كلنا وبنروح مع بعض
وقاموا يجهزون وطلع ابو هادي لسيارته وهو يشغلها ويجلس ينتظرهم وطلعوا وام هادي وراهم قفلت الباب وركبت وهادي وحمد ورا وشهد بالنص
ابو هادي ؛ ها قفلتي باب البيت من داخل ؟
ام هادي ؛ ايه ايه وهذي المفاتيح
وحطتهم بدرج السياره وحركوا للبقاله وبأقل من ١٠ دقايق وصلوا وشهد تطالع ؛ ياصغرهاا يبه هذي ؟
ابو هادي ضحك ؛ اييه هذي والسوق هذا هو وراها اللي مانلقاه بالبقاله ناخذه من السوق داخل
ام هادي ؛ يلا اجل ننزل
ابو هادي وقف السياره ؛ يلا انزلوا
نزلوا كلهم ودخلوا والناس داخل البقاله ماعرفوهم بحكم ان كل اهل الديره يعرفون بعض
ابو هادي ؛ السلام عليكم
مرزوق ؛ وعلييكم السلام ، جايين من ديره ابو صالح ولا ساكنين هنا ؟
" ديرة ابو صالح ديره بجنبهم ونفسها ديرة اهل ابو هادي "
ابو هادي ابتسم ؛ لا والله تو سكنا هنا ونعرف بعد ناس من ديرة ابو صالح
مرزوق ؛ ايييه يالله حيهم ، امر
ابو هادي ؛ مايامرك عدو ابد جايين نقضي من عندك
ابتسم مرزوق وهز راسه وام هادي اخذت الاغراض اللي لقت وهي مبتسمه لأن رغم هالديره بجنب ديرتهم اللي حافظتها وحافظه اسواقها الا انها ابدا ماهي بجمال هالديره وبساطة اسواقها اللي ذكرتها بصغرها و بكل شي حلو
وشهد استانست من شافت حلويات واكلات قديمه كانت تاكلهم وهي صغيره ومن بعدها ماشافتهم وهي تشتري منهم وتتمنى ان نفس الطعم ماتغير مع الوقت
وحمد وهادي كلهم كانوا نفسها شافوا كل شي ذكرهم بطفولتهم واشتروهم وكأنهم ماكبروا عليها ولا بيكبرون اخذو اغراضهم وبقى اغراض مالقوها
ام هادي ؛ خلاص اخذت اللي لقيت باقي بهارات وكم شغله مو موجوده
ابو هادي ؛ نلقاهم بالسوق .. يلا ياولد خلصتوا ؟
هادي جا بكيسه ؛ ايه
حمد ؛ يبه تذكر هذا البسكوت
ابو هادي ابتسم ؛ اييه اذكره يومنكم صغار تحبونه
حمد ؛ للحين والله بس اختفى وهذا انا لقيته
شهد ؛ خلصت انا
وحطوا اغراضهم وحاسبوا وطلعوا وكل واحد معه اكثر من كيس وفتح ابو هادي شنطة السياره وهو يحط فيها الاغراض
ام هادي ؛ مايمدي ندخل هالسوق ؟
ابو هادي وهو يأشر لها مساحته ؛ هذا كلللله من ورا البقاله لجهة الشارع اللي هنااااك بتفرينه بساعه ؟
ام هادي ضحكت ؛ هو ماهو لازم اشوفه كله بس نصه ولا كم محل والله شكله حلو
شهد ؛ ايه يبه تكفى
هادي ؛ فيه وقت وانت قلت الساعه ٧ نروح لمساعد والساعه تو جت ٥ يعني معنا ساعه ونرجع
ابو هادي ابتسم وهو ماوده يرفض رغم انه مصدع بس مايبي حماسهم يروح ؛ خلاص ندخل ومانتأخر
استانسوا وهم يركبون وقربوا السياره ووقف ابو هادي عند الباب ؛ يلا
شهد وهي تشوف السيارات موقفه بعد ؛ مانقدر ندخل بالسياره ؟
حمد اشر لها ؛ انتي شوفي سقف السوق واضح بتفرين برجليك ماهو حق سيارات
ابو هادي ضحك ؛ مانقدر بالسياره مشي كله
ام هادي ؛ ماعليييكم بس حركوا دمكم بس جالسين انزلوا يلا تحركوا
ضحكوا وهم ينزلون ودخلوا للسوق ماكان هالوقت زحمه لأنه الزحمه صدق الصباح ، ويوم السبت الزحمممه صدق لأن كل البسطات تكون موجوده ليوم الأحد الظهر ، اما العصر يكون مزحوم شوي ومن المغرب تبدأ تخف الزحمه والأسواق بالليل تسكر
وقليله اللي تكون فاتحه .. ودخلوا للسوق وكلهم ماتوقعوا انه كذا رغم بساطته جماله كان ماينوصف اصوات الناس فيه والبياعين والدكاكين مختلف عن المدينه وهم من لما جو يلاحضون الفروق بين المدينه وهالديره لاكن الفرق احسن رغم بساطته دخلوا اول محل وقالت ام هادي ؛ هذي محمصه باخذ منها البهارات والقهوه ودخلوا وابو هادي عرف محل ابو راشد وهو جا لهالسوق مع مساعد قبل اسبوع وعرفه على كل المحلات بس مادخلها كلها من بعيد بس والبقاله كانت من ضمنهم شافها من برا ودخل ودخلوا معه وتسوقت ام هادي ولقت كل اللي ناقصها من بهارات وقهوه واعشاب ومكسرات وشهد اخذت حلاو هي وحمد وهادي اللي ينقون معها
شهد لفت لأبوها من تذكرت ؛ صح يببه وين محلك !
التفتوا كلهم وهم ناسين المحل وضحك ابو هادي ؛ بآخر السوق ماضنتي يمدي نروح له
ام هادي ضحكت ؛ نرجع له ماعليه
عبدالسلام كان يحط لها الاغراض ونواس يحاسب
" نواس عامل مزرعة ابو راشد ويتناوب هو وبعض عمال ابو راشد على المحل والمزرعه وابو راشد يكون مع واحد منهم الصباح ويجي عامل ثاني العصر "
ام هادي ؛ خلاص خلصت
ابو هادي التفت للعامل ؛ يلا حاسب خلاص
وحاسب لهم ودفع واخذو الأكياس وطلعوا يكملون مشي بالسوق دخلوا بعد محل ابو راشد 3 محلات للأواني وللملابس ... ويمر الوقت وهم ماحسوا فيه لحد ماشاف حمد ساعته وشهق ؛ يببه الساعه 6:45
ابو هادي التفت ؛ ياولد ! صادق ؟
ام هادي ؛ ييوه والله ما انتبهت مشينا مشينا
ابو هادي ؛ افففاااا هذا وحنا قايلين قبل 6 نكون بالبيت
شهد ؛ ومارتبنا اغراض البقاله ولا جهزنا
ابو هادي بضيق ؛ يلا اطلعوا والله تأخرنا
وطلعوا بسرعه للسياره وهم مايدرون شلون مر فيهم الوقت
هادي ؛ حنا لو خليناها وقت ثاني احسن كله من حمد
حمد ؛ وانا شدخلني لو ماعلمتكم كان ماطلعنا لين اذن
ام هادي ؛ والله كلنا التهينا ولا حسينا بالوقت بس ماعليكم يمدينا ان شاءالله
ابو هادي تنهد وهو ماشي للبيت ووصلوا وكل واحد شال كيس ودخلوا على طلعة ابو راشد اللي يشوفهم ينزلون اغراضهم ودخلوا كلهم
ابو راشد ؛ يلا ياعيال بنروح المسجد نصلي ونروح لمساعد
راشد ؛ بالسياره ولا مشي
تركي ؛ قرييب هذا هو المسجد وبيت مساعد وراه بشوي مشي احسن
ابو راشد ؛ وامك وام عزام ؟
عزام ؛ نايف شوي ويجي يمكن ياخذهم معه بسيارته
ابو راشد ؛ كلهم بيروحون ؟
تركي ؛ لا امي وام عزام بس ونايف بيجيبهم بيتقهوى تو قام
ابو راشد ؛ زين اجل يلا مشينا
وراحو للمسجد مشي ابو راشد وراشد وتركي وسعد وعزام ومعهم ناصر وعبدالله
•
•
داخل كان نايف بالدوانيه يتقهوى وام راشد داخل تجهز وطلعت من غرفتها للصاله والبنات كلهم فيها ؛ ها للحين محد رايح
عبير ؛ لا والله يمه مزكمه ومالي خلق
منيره ؛ وانا والله ماجهزت ولا فيني حيل
ام راشد ؛ اروى ؟ انتي ولا هاجر ؟ شموخ وانا امك ماودك تروحين ؟
اروى ؛ لا والله يمه المسلسل بدا والحلقه الاخيره اليوم
هاجر ؛ وانا بعد بتابع ودي والله اشوف اهل ابو هادي هذولا بس دامهم جيرانا نشوفهم بعدين
شموخ ابتسمت ؛ وانا معهم المره الجايه نشوفهم ان شاءالله
وطلعت ام عزام من الغرفه وهي ماسكه عبايتها ؛ يلا
ام راشد ؛ يلا هذا انا جاهزه بس نايف تو صحى وحطيت له القهوه يتقهوى ونروح
ام عزام ؛ اجل بصلي المغرب لين نروح
وصلوا وبعد دقايق طلع نايف شغل سيارته ورجع يدق باب الصاله الامامي
ام راشد قامت وهي تفتح ؛ ها وانا امك مشينا ؟
نايف ؛ اي يمه يلا تبون مشي ولا اخذكم بالسياره
ام راشد ؛ لا والله بالسياره ما احب امشي بهالليل
نايف ؛ اجل يلا انتظركم
وراح وام راشد التفتت ؛ ام عزام يلا مشينا
جت ام عزام وهي تعدل غطاها ؛ يلا توكلنا على الله
وطلعوا مع نايف لبيت مساعد
..........••..........
بيت ابو هادي
قبل بدقايق من دخلوا للبيت بسرعه وام هادي تحط الاكياس بالثلاجه وهي ماتدري وش حطت بس من العجله عشانهم تأخرو وحمد حذف كيس البهارات بالثلاجه وطلع ركض يلبس وهادي لحقه مستعجل وجهزوا وشهد بدلت وهي ماتدري وش اللبس اللي يناسب هالعزيمه بس لبست نفس لبسها بجمعاتهم بالمدينه فستان بُني ناعم ولمت شعرها بتسريحه بسيطه ومكياج خفيف واساور وتعطرت بسرعه واخر وحده جهزت وهي تلبس نعولها ولفت طرحتها بسرعه ؛ يلا مشينا
ابو هادي وهو يعدل عقاله ؛ يلا ياولدد تأخرنا اعجلوا
هادي ؛ يلا يممه مشينا
ام هادي طلعت ؛ يلا وين شهد
شهد ؛ هذا انا خلصت
حمد ؛ مع بعض ها ؟
ابو هادي ؛ ايه يلا
وطلعوا ركبو السياره وحركوا وماهي الا دقيقتين ووقفوا عند بيت مساعد
ام هادي ؛ باب الحريم وينه ؟
ابو هادي ؛ هذا هو لاتضيعون حنا هنا بالحوش هذا
ام هادي ؛ يلا شهد انزلي
ونزلوا كلهم ابو هادي وعياله للدوانيه وشهد وام هادي دخلوا وهم اول مره يجون بيت مساعد يعرفون زوجته ابتسام زارتهم في المدينه بس هم اول مره يجون لها
شهد ؛ شكله هذا السيب شوفي نعولهم عنده
ام هادي ضحكت ؛ ايه ايه
شهد ؛ يمه اطلع عبايتي ولا بس الطرحه ولا وش
ام هادي ؛ والله مدري طلعي طرحتك
شهد ؛ طيب يلا ندخل
ودخلوا للمجلس والحريم فيه وخوات زوجة مساعد يقهوون وزوجة مساعد واختها وامها بالمطبخ
ام هادي بأبتسامه ؛ السلام عليكم
فادية " اخت ابتسام زوجة مساعد " ؛ اهلييين ام هادي
ام هادي قربت تسلم عليها وهم يعرفون بعض وسلمت شهد ومن بعدها بدت ام هادي تسلم على الحريم اللي موجودين ام راشد وام عزام وام عبدالرحمن وهيلا وحرمتين من الديره
ام راشد ؛ ياهلااا بجارتنا
ام هادي ابتسمت ؛ هلا فييك ام راشد ؟
ام راشد ؛ ايه وهذي ام عزام
ام عزام سلمت عليها ؛ ياهلا يالله حيهم
وسلمت شهد على ام راشد وام عزام وام عبدالرحمن اللي قالت ؛ ما شاء الله من هالمزيونه
ام هادي ؛ بنتي شهد
ام عبدالرحمن ؛ اييه الله يخليها لتس
وطلعت ابتسام وامها واختها بدريه من المطبخ يسلمون على ام هادي واستقبلوها بحب وهم يقهوونها
وبعد دقايق وقفت شهد وهي تقرب لفاديه اللي واقفه تضيفهم ؛ وين الحمام ؟
فاديه اشرت لها ؛ هناك ياحبيبتي
وراحت شهد وترددت تنزل العبايه ولا لا لأن كلهم بعباياتهم بس قالت ؛ ععادي كلهم كبار بس اللي كبري مانزلتها " تقصد هيلا " اقوول عادي بس انزلها احسن
ونزلتها وهي لابسه فستانها الناااعم وعدلت شكلها وطلعت جلست عند امها وحطت العبايه عندها وتوترت من نظرات ام عبد الرحمن اللي قالت ؛ ماشاء الله الله يحفضتس قمر قمر
ابتسمت شهد بأرتباك وقالت ام هادي بأبتسامه ؛ تسلميين
ام راشد ابتسمت ؛ عندك بنات غيرها ؟
ام هادي ؛ لا هي واخوانها اثنين هادي وبعده حمد وشهد اصغر وحده
ام راشد ؛ الله يخليهم لك
ام هادي ؛ وانتي عندك بنات ؟
ام راشد ؛ ايه عندي ٤ بنات و٤ عيال
ام هادي ؛ ماشاء الله الله يحفظهم وهذي اختك ؟
ام راشد ابتسمت ؛ هذي ام عزام زوج بنتي وبحسبة اختي
ام هادي هزت راسها بأبتسامه وقالت ام عبدالرحمن ؛ انتوا لكم معارف هنا ؟
ام هادي ؛ لا والله بس بالديرة اللي جنبكم ديرة ابو صالح فيها اهلي واهل زوجي
ام عبدالرحمن ؛ ماشاء الله ، واهل مساعد من متى تعرفونهم ؟
ام هادي ضحكت ؛ نعرفهم من زمان مساعد صديق ابو هادي وسكن هنا وحنا سكنا بعد لأنه يمدح هالديره والشغل فيها
ام عبد الرحمن ؛ ايي والله هالديره كل شي فيها زين
ام هادي ؛ انتي تو سكنتيها ؟
ام عبدالرحمن ؛ لاوالله انا كبرت فيها بس الشهر اللي راح رحت للشرقيه عشان حرمة ولدي جابت ولد ورجعت
ام هادي ؛ ايييه ماشاء الله مبروك
ام عبد الرحمن ؛ الله يبارك فيتس
وكملت تسولف معها وهي تتعرف عليها وتعرفها على حريم الديره وكل من يجي طول ماهم قاعدين

<< الجهه الثانيه في مجلس الرجال >>

قبل بدقايق دخلوا ابو هادي وهادي وحمد وهم يسلمون على مساعد اللي واقف عند الباب يسلم عليهم ؛ ياهلاا وراكم تأخرتوا ؟
ابو هادي ضحك ؛ والله راح الوقت وحنا بالسوق
مساعد ضحك ؛ اييه دامه السوق ماتنلامون حياكم ادخلوا
ودخلوا وهم يسلمون على الرجال الموجودين وعلى ابو راشد وعياله
ابو راشد ؛ يامرحبا يا ابو هادي
ابو هادي ؛ ياهلا بأبو راشد وشلونك
ابو راشد ؛ بخيير والحمدلله
وسلموا على العيال وهم يجلسون ومساعد يقهويهم
ابو راشد ؛ متى وصلتوا
ابو هادي ؛ والله الظهر وقفنا
ابو راشد ابتسم ؛ والله مريت الظهر وقالوا عيالك نايم
ابو هادي ؛ اييه اا والله صدعت ونمت شوي من تعب الطريق ولا قصرت الله يعطيكم العافيه
ابو راشد ؛ الحمدلله على السلامه ، واجبنا الله يعافيك
ابو هادي ؛ الله يسلمك
وجلس مساعد يسولف لهم عن ابو هادي ويعرفهم عليه
..........••..........
بيت ابو راشد
عند البنات كانوا مجتمعين بالصاله على التلفزيون ومن انتهى المسلسل قالت اروى ؛ جوعانه وش نسوي عشاء
عبير ؛ والله مدري وش ودكم
شريفه ؛ عادي اي شي
هاجر ؛ حتى انا اي شي ينبلع ماتغديت مثل الناس وشبعت من ذا المكسرات
منيره ؛ اسوي مكرونه ؟
هاجر ؛ الله بشاميل تكفين
منيره ضحكت ؛ تمام وامسكوا البنات عني " بناتها "
اروى ؛ عندنا ماعليك
هاجر ؛ يلا وانا بساعدك
وقامت منيره وهاجر للمطبخ
شريفه ضحكت وهي تحرك يدها قدام شموخ اللي سرحانه ؛ شموخ فيك شي ؟
شموخ انتبهت وهي تلعب مع العنود اللي بحضنها ؛ لا
شريفه ؛ تعبتك العنود ؟ عطيني اشيلها عنك
شموخ ؛ لا لا عادي بلعب معها خليها
وسكتوا وهم يرجعون يتابعون وشموخ ناظرت اروى اللي اشرت بضيق بمعنى " خلاص عاد "
ابتسمت شموخ وهي تمد لسانها بعناد ورجعت تلعب مع العنود وهي تفكر بكلام اروى بس ماودها تبين لأروى شي هي خايفه يصير او نقول صار غصب عنها
هاجر طلعت من المطبخ وقالت وهي عند الباب ؛ كم صينيه ؟
عبير ؛ اتوقع كلهم بيجون شبعانين محد بياكل
شريفه ضحكت ؛ سوو واذا زاد مايضر
ضحكت هاجر وهي ترجع تكمل مع منيره