ياديرةٍ ضمّت كل الأحباب

Part 20

..........••..........
في الرياض
بيت ابو راشد الصباح
كانو كلهم قايمين وابو راشد بالمحل ومعه راشد وسعد وناصر وجوري وعبدالله
وتركي ونايف وعزام بالدوانيه
" داخل عند البنات "
اروى ؛ يمه متى نروح
ام راشد ؛ الحين بس انتظر نايف يروح دوامه عشان لاينسى شي
هاجر ؛ يمه روحي اسأليه اذا خلص نروح
ام راشد ؛ اصبري نص ساعه ونروح ، روحي روحي اجهزي
هاجر ؛ ججاهزين بس يلا
ضحكت ام راشد وهي تقوم ؛ خلاص بشوف نايف واجي ونروح البسوا
وراحو البنات ياخذون عباياتهم وام راشد طلعت للدوانيه وهي تضحك من شافتهم وشافت تركي يضبط شماغ نايف ؛ اخص عريس ماشاءالله
نايف ضحك ؛ بالله كيف
عزام وهو يرش له عطر ؛ اووه بس هه وهه وخلاص ماباقي الا البشت وتصير عريس صدق
ام راشد ضحكت وهي واقفه عند الباب ؛ ها يانايف
نايف التفت ؛ اررحبي ام نايف شرايك بالرسميه والحركات
ام راشد قربت وهي تضحك ؛ ماشاءالله عريس على قولة تركي
ضحكوا وقالت ام راشد ؛ يلا لاتتأخر الساعه 8 وشوي
نايف ؛ يلا يلا وين مفتاحي .. ادعي لي يمه ها
ام راشد ضحكت ؛ الله يوفقك
تركي ؛ كم الساعه تطلع ؟
نايف ؛ ١٢ بالضبط
عزام ؛ زين مهو طويل دوامك
نايف ؛ اييه اشوا بس ٣ ساعات يلا مع السلامه
وطلع وضحكوا وقال تركي ؛ عزتي له متوتر
عزام ؛ ايه ماعليه اول يوم عقبالك
تركي ؛ والله اذا بشتغل بتعلم مع ابوي
ام راشد ضحكت ؛ اجل رح تعلم تلقاه بالمحل مع سعد وراشد وحنا بنروح للسوق
تركي ؛ اييه يعني بتمرين علينا
ام راشد بضحك ؛ ايه اكيد ، عزام امك واختك معنا بنوريهم سوقنا
عزام ضحك ؛ اييه قالت لي امي ، تعب عليكم المشي ولا ؟
ام راشد ؛ لا والله نتونس بالطريق وتاخذنا السوالف لين نوصل
تركي اللي جت له الفرصه ؛ والله لين توصلون السوق بتتعبون انا اقول ناخذكم انا وعزام لأننا بنروح السوق اصلاً وانتو هناك تفترون براحتكم
ام راشد ؛ لا لا خلها بالرجعه نروح معكم عشان الشمس
عزام ضحك ؛ اهااا حاسبين حسابكم
ام راشد ضحكت وهي تطلع ؛ يلا يلا روحوا ونشوفكم بالسوق
ورجعت لداخل وتركي وعزام حركوا للمحل
ام عزام التفتت لأم راشد من دخلت ؛ ها يلا
ام راشد ؛ يلا ، هاتي عباتي ياهاجر
هاجر مدتها لها ؛ هذي هي يلا يلا بنااات
عبير ؛ يمه العيال وين
ام راشد وهي تلبس عبايتها ؛ نايف راح لدوامه وابوك والباقين بالمحل
عبير ؛ يعني سعد معهم زين عشان هناك احط خالد عنده هو وعبدالله
اروى ؛ يعزتي له يلا بس اهم شي نروح لو اشيل البزران انا
منيره ؛ صدق ، يلا خذي اميره
ضحكوا من انحاشت اروى للباب
منيره بضحك ؛ امزح لاتهجين بمسكهم انا
هاجر ؛ جوري مع راشد صح ؟
منيره ؛ اي هي وناصر شكلي بحط اميره ومناير معهم
عبير لبنتها ترف ؛ تروفه احطك عند بابا بالسوق وتلعبين مع جوري؟ ترف هزت راسها وعبير استانست وهي تمشيهم
ام راشد ضحكت وهي تدخل لغرفة شريفه شافتها نايمه هي وبنتها وطلعت ؛ يلا طلعنا
وطلعوا ام راشد وام عزام وعبير ومنيره وهاجر واروى وشموخ مشي للسوق اللي يبعد عنهم ١٥ دقيقه مشي...
..........••..........
في الطريق بسيارة ابو هادي
شهد نايمه وام هادي وابو هادي يسولفون والتفت ابو هادي على صوت جواله اللي كان مساعد يتصل ؛ هلا مساعد
مساعد ؛ اررحب ها وينكم
ابو هادي وهو يشوف اللوحه ؛ والله قريب بريده
مساعد ؛ ماشاءالله مشيتوا الفجر انتوا
ابو هادي ابتسم؛ اي والله مشينا ٤٥٠ كيلو
مساعد ؛ متشاء الله توصلون بالسلامه اجل اذا طلعتوا من المجمعه دق علي
ابو هادي ؛ ابشر ، مع السلامه
وقفل وهو يدق على حمد ووصله صوت حمد مع الشيلات اللي مشغلها ؛ ههلا ..." وقفل الشيله " هلا يبه
ابو هادي وهو يشوف سيارة حمد وراه ؛ هادي وراك ؟
حمد ناظر المرايه ؛ لا قبل شوي كان وراي
ابو هادي تنهد ؛ بوقف عن المحطه اللي قدام تعال انت وياه اشر له لايكمل ويضيعنا
وقفل ابو هادي وهو يوقف عند المحطه
وحمد ضحك وهو يخفف سرعته عشان يلحقه هادي واشر له يوقفون عند المحطه مع ابوهم
والتفت ابو هادي لشهد اللي صحت ؛ شهوده تبين البقاله ؟
شهد ؛ وصلنا ؟
ابو هادي ضحك ؛ لا باقي ببريده
شهد ؛ وكم الساعه وش كثر باقي على الرياض
ابو هادي وهو يشوف الساعه ؛ تو جت ٩ وباقي حول ٣٥٠ كيلو
شهد ؛ طيب بنزل معك للبقاله
ابو هادي ؛ يلا انزلي ، مريم وش اجيب لك ؟ ...
شهد اللي نزلت وجا وراها حمد وهو يدقها بيخوفها
وفزت شهد والتفتت ؛ بسم الله ، هلا حمد اشتقت لك
حمد ؛ ياكذابه لو بحلف انك على الجوال ولا تدرين وين حنا فيه
شهد ؛ لا والله الصدق كنت نايمه تو قمت يقولي ابوي باقي ماوصلنا... امسك امسك الشنطه بعدل نقابي
حمد اخذها ؛ شرايك تكملين الطريق معي طفشت
هادي جا ؛ ليه توقفون
حمد ضحك ؛ ابد نمتر المحطه وش تشوف يعني بنعبي السياره وناخذ من البقاله
هادي ضرب راس حمد بخفه وجا ابو هادي وهو يعدل شماغه ؛ يلا امشوا
هادي مشى وهو يتمغط ويتثاوب ؛ اووه يالتعب والله ان عظامي تيبست
حمد ضحك وهو يمشيه ؛ انا احس ان رجلي للحين تدعس بنزين
ضحكوا وهم يدخلون واخذو اغراضهم وقال حمد وهو عند باب البقاله ؛ يبه شهد بتروح معي نكمل للرياض
ابو هادي وهو يحاسب الاغراض ؛ ايه عشان نوصل للرياض وانتوا للحين بالقصيم
شهد ؛ لا يبه وراكم بنصير بس عشان نغير جو
ابو هادي ؛ لا لا اذا وصلنا الرياض تمشوا مع بعض وغيروا جو وانت ياهادي خلك ورانا على طول ، حمد لاشوفك متعدي من قدامي
حمد ضحك ؛ يبه انت مهدي مره والشمس احترت
هادي عفس ملامحه بضيق ؛ اووهوه يالشمس والله انها فقعت عيوني
ابو هادي ؛ ماعليه انتوا اذا صرتوا وراي على طول ١٢ بالضبط وحنا واصلين ان شاءالله
شهد ؛ اوف يعني باقي للرياض ٣ ساعات
هادي ؛ لا بعد قريب ال ٤٠٠ كيلو غير اللي مسكنا
ابو هادي ؛ لا لا اقل ماعليك .. خذوا اغراضكم هذا كيس من
هادي ؛ حقي
ابو هادي ؛ وهذا
حمد ؛ لي
ابو هادي ؛ شهد هذا حقك
شهد اخذته ؛ ايه
واخذ ابو هادي اغراضه وطلعوا من البقاله وقال ابو هادي ؛ يلا شهد معي خلي عنك حمد
ضحكت شهد وهي تركب وحركوا بعد ماعبوا البنزين مكملين للرياض
..........••..........
في الرياض
محاسن الصدف
دخلوا ام راشد واللي معها للسوق اللي كان مزحوم بالناس والمحلات مقابل بعض والناس تمشي من بينهم وتتسوق
ام راشد ؛ خلونا اول شي نمر محل ابو راشد
عبير ؛ يلا وعشان بشوفه
مشوا لمحل ابو راشد وشموخ اللي بالنص تمشي مع اروى وهاجر ؛ الله يبنااات هذا سوقكم وماتروحون له انا لو مكانكم ما اطلع منه
هاجر ؛ الا والله نروح بس اذا رجعنا تتكسر رجولنا اسبوع قدام
اروى ؛ شوفي الحين بندخل العطار حق ابوي وبعدها نفر السوق فر
ودخلوا لمحل ابو راشد اللي كان مزحوم شوي والأصوات اللي فيه كانت عباره عن ؛ كم كيلو ، لا الثاني ، مافيه مطحون ؟ ، كم سعره ، ابي مشكل.... وشموخ وام عزام ماتوقعوا جمال السوق رغم بساطته بس ما كأنه بالرياض ولا كأنهم بالدنيا اصلاً مجرد مادخلوه بس حسوا انهم رجعوا لسنين ورا ومن دخلوا وهم يشمون ريحة العطور والبخور مع القهوه والمكسرات والبهارات والأعشاب رغم انها روايح متلخبطه الا انها كانت تجنن وتفتح النفس!
ام راشد دخلت والبنات وراها ؛ السلام عليكم
ابو راشد التفت لها ؛ هلا وعليكم السلام يالله حيهم
راشد ؛ ماشاءالله منور السوق
ام راشد ضحكت ؛ منور بأهله هالمره جيناكم كلنا
ابو راشد شاف اللي وراها ؛ يامرحبا والله
شموخ لهاجر واروى ؛ ما شاء الله والله ما الوم عمي يوم يشتغل هو فيه
هاجر ؛ ايه ابوي يحب يبيع ومو معتمد الا على عامل واحد هذاك هو عبدالسلام وفيه غيره بس انهم بالمزرعه يجون اذا ابوي والعيال ماجو
اروى وهي تأشر ؛ هاجر شوفي هذا الحلاو اللي بالفواكه اللي اقولك جايبين منه وطعمه يهبل
هاجر التفتت هي وشموخ وهم يشوفون المكسرات والحلاو اللي بالعلب والعامل يحط للناس اللي يشترون بالكيلو
شموخ طاحت عينها على تركي اللي يحاسب ومتقروش وما انتبه لهم وضحكت وقربوا البنات عند ام راشد وام عزام وعبير ومنيره
عبير وهي تحط ترف وخالد ؛ سعد بالله خلهم معك واذا برجع اخذهم واذا طلعت قبلنا خذهم معك ، عبود حبيبي انتبه لأخوانك زين ؟
عبدالله وهو جالس هو وناصر بالكرسي ؛ طيب
سعد وهو يطلع فلوس من جيبه ؛ تعالي خذي عشان اذا بتشترين شي
عبير ؛ معي م.. قاطعها سعد وهو يحطهم بيدها ؛ خذيهم احتياط اذا احتجتي شي
ابتسمت عبير واخذتهم وهي ترجع تتفرج على المحل
راشد وهو يشيل اميره ؛ هلا هلا تعالي تعالي اجلسي عند جوجو
منيره وهي تمد له مناير من اشر لها تعطيه ؛ راشد شرايك تحطهم مع جوري وناصر لحد مانخلص واخذهم
راشد بضحك ؛ اخاف يصيحون
منيره ضحكت ؛ لا ماعليك اذا كانو معك انت وجوري وناصر مايخافون
راشد ؛ اجل ابشري ، شوفي شوفي هالحلاو ذوقيه وعطيني رايك
منيره ضحكت وهي تذوقه ؛ حلو حلو
راشد ؛ بالعافيه والله ، خذي هالفلوس اشتري لك انتي وجوري وخواتها
منيره ؛ ابشر ، تبي اشتري لك شي ؟
راشد ضحك ؛ لا سلامتك
ابتسمت منيره وراشد يوريها المحل ووش عندهم
ام راشد قربت عند تركي وهي تشوفه منشغل ؛ زيين شفناك مشغول
تركي فز يناظرها ؛ ارحببي متى جيتوا
ام راشد ضحكت ؛ قبل شوي دخلنا
تركي ضحك وهو يتلفت يدري ان شموخ معهم بس مالقاها من الزحمه
عزام ابتسم من شاف امه حابّه السوق وتمدحه
ام عزام ؛ والله اني احسبه مثل اسواق الجبيل حوسه وادوار وتعب طلع يهبل ومحلاته قبال بعض بمكان واحد
عزام ضحك ؛ اييه والله لو دريت كان جبتك للسوق من اول لاجينا
ام عزام ابتسمت ؛ لا وهذا حنا للحين ماشفنا المحلات الباقيه بس ماشاءالله محل ابو راشد زين
عزام ؛ اي والله ، شموخ وينها ؟
ام عزام التفتت ؛ هذي هي مع بنات ام راشد
عزام ؛ اجل خذي يمه اشتري لك انتي وشموخ ولشريفه بعد
ام عزام ضحكت ؛ ياحبيبي والله معي يكف.. عزام بسرعه ؛ والله ان تاخذينها ماعليه زيادة الخير خيرين
ام عزام ابتسمت واخذتهم وعزام كمل يوريها وش يبيعون
ابو راشد ؛ هذا البزر " بهار " جاي جديد بحط منه نجربه
ام راشد ؛ اشوف
وقربت وهي تذوق منه شوي ؛ حلو بس انه حار لاتكثر
ابو راشد ؛ وهذي قهوه حمسناها الفجر احط لكم مطحون ولا لا ؟
ام راشد ؛ ايه حط نص كيلو ، مافيه حنا ؟
ابو راشد ابتسم ؛ فيه تبين ورق ولا مطحون
ام راشد ضحكت ؛ مطحون
ابو راشد ؛ ابشري ، " وقال وهو يأشر لها على قسم المكسرات " شوفي هذا كله الفجر وصل ذوقي من الحلاو واللي يعجبك بحط لك منه
ام راشد ابتسمت وهي تتذوق منهم وابو راشد نسى البيع وقعد يذوق معها
اروى ؛ خلونا نروح لتركي بخليه يحط لي فستق
شموخ ؛ طيب وانا انتظركم هنا
هاجر ؛ ليش تعالي معنا
شموخ ؛ لا فشله
اروى سحبتها ؛ اقول بس فشله من تركي والعمال لا اعتبريه عامل وماتعرفينه
ضحكت هاجر ؛ اي وربي
شموخ مشت معهم وهي توقف وراهم وقالت اروى ؛ سلام ياتروك
تركي التفت على صوتها ؛ هلا بالأخت اروى
هاجر ضحكت ؛ نوع لنا فصفص ياصديق
تركي ضحك ؛ بالله
اروى تعمدت وهي تقرب شموخ تأشر لها ؛ شموخ وش احسن حب دوار الشمس ولا قرع ؟
شموخ وهي تحاول تبعد عن الطاوله اللي وراها تركي يحاول يستوعب ؛ ممدري
اروى ؛ وانتي ياهاجر
هاجر ؛ كلهم
اروى ؛ اجل حط لنا شوي من هذا وشوي من هذا
تركي تدارك نفسه وابتسم وهو ياخذ الكيس ويحط وتوهق اخر شي وهو ينادي عاملهم ؛ عبد السلام تعال سوي وزن هذا
اروى ضحكت ؛ افا ماتعرف توزن
تركي بضحك ؛ احاول اتعلم عشان لا الحق نايف
هاجر ؛ ياحليله نيوف وانا اقول وش ناقص السوق
تركي ؛ الله الله فقدتيه اشوف ، هاكم هذا كيلو مشكل
اروى ؛ كم حسابه
تركي ؛ حسابه قدام عند ابوي
اروى ؛ اجل مدفوع
ضحك تركي وهو ياخذ الكيس ويحاسبه ؛ مدفوع بس لازم نحسبه عشان لاينقص شي ... وهه دفعته
هاجر ؛ قصدك دفعه ابوي
تركي ضحك وهو يحذفها بالقلم وضحكوا وهم يوقفون عند باب المحل اما شموخ اللي تضحك عليهم وهي حبت مناقرتهم والتفتت لها اروى وضحكت ؛ وش فيك تضحكين علينا صح
شموخ بضحك ؛ يزيينكم استلمتوه طقطقه
اروى ضحكت ؛ نمزح ماعليه
هاجر ؛ الحين امي وش يطلعها
اروى ؛ شوفي شوفي تذوق وابوي ياكل معها
ضحكوا هاجر وشموخ وهم يشوفون ام راشد وابو راشد بجهه وام عزام وعزام بجهه وسعد وعبير ومنيره وراشد والتفتوا على صوت هيلا اللي قالت ؛ ارروى
اروى ضحكت ؛ هلا هيلا
هيلا ؛ شخبارتس ... ماشاءالله امتس هنيا
اروى ؛ اييه كلنا جايين اليوم ، انتي لحالك ؟
هيلا ؛ لا امي عند البسطه توها وانا اتمشى لين تخلص
هاجر ؛ ايييه ماشاءالله ، توكم جيتوا ؟
هيلا ؛ لا من الساعه 6 الصباح موجودين الحين بنروح بس اباخذ بهار قهوه .. وشلونتس .. " وسكتت وهي تتذكر " شموخ شموخ شلونتس
شموخ ؛ ببخير الحمدلله
هيلا ؛ ايه ؟ ووش بلاكم واقفين
هاجر ؛ ننتظرهم يطلعون
هيلا ؛ تعالوا ابسلم عليهم
ودخلت والبنات دخلوا وراها
هيلا وهي تقرب لأم راشد ؛ صبحتس الله بالخير ياخاله
ام راشد ؛ ياهلاااا صباح النور وشلونك ، وين امك
هيلا ؛ بخير الحمدلله ... عند سعديه الحين تلحقني باخذ لي بهار ، وشلونك ياعم ابو راشد
ابو راشد ؛ هلا يابنيتي بخير الله يسلمك
وقربت عند الطاوله وهي تقول ؛ سلام ياتركي شلونك
تركي ؛ هلا .... اوه بنت ام عبدالرحمن يالله حيهم
هيلا ؛ الله يحييك ، شكل لي ربع كيلو قرنفل وهيل مطحونات ابيهم بهار وشوي زعفران
تركي ضحك على طفاقتها وهو يحط لها
واروى وهاجر يناظرونها ويضحكون متعودين عليها وشموخ مصدومه وانصدمت اكثر من شافتهم يضحكون ؛ عادي تمون كذا ؟
هاجر بضحك ؛ ايييه هذي هي بس عادي كلنا كذا بس هي نص الناس تعرفها
اروى ضحكت ؛ لا و امها عند البسطه من فجر الله
شموخ ؛ تعالوا تعالوا خلونا ندخل بشوف امي والباقين
دخلت وراها هاجر واروى اللي حست انها فهمت بس تحاول تشغل نفسها
قربوا البنات عند الباقين وشموخ وقفت قريب الطاوله على اساس تتفرج على المكسرات
هيلا ؛ محل ابو فارس ليه سكره
تركي ؛ والله مدري يقولون باعه
هيلا ؛ عاد كبير خساره يقفل ، هذا كم الكيلو
تركي ؛ عبدالسلام كم كيلو هذا ....ب ٣٠ ريال
هيلا ؛ الحين انت ماتعرف اسعار محلكم ؟
تركي ضحك ؛ والله اتعلم ماعرفها كلها
هيلا ضحكت ؛ يي...قاطعتها شموخ ؛ بالله حط لي من هذا
تركي ناظرها يستوعب انها شموخ ؛ ااي واحد ؟
شموخ اشرت له ؛ هذا
تركي على طول سحب كيس جديد وهو ينسى حق هيلا وهو يحط ؛ كم كيلو
شموخ تنحنحت وهي ماتدري وش اشرت عليه ؛ ربع
تركي ؛ ابشري ... شي ثاني ؟
شموخ ؛ لا
هيلا ؛ تركي اعجل توخرت عشان كيس ... ياعبدالسلام تعال حاسب
جا راشد وهو يضحك ؛ الله يعينك ياعبدالسلام هاتي اغراضك .... حسابك ٢٥
حاسبته هيلا وهي تاخذ كيسها وطلعت لأنها تأخرت
راشد وهو ماعرف شموخ وقال بهمس لتركي وهو يضحك وشموخ سمعته ؛ والله ماغلط نايف يوم قال هيلا تصلح لك مثلك ماتمسكها ارض
تركي طنشهم وهو مو معهم ويحسب ان شموخ ماسمعت وهو يحاسب لها وجت ام عزام ؛ شموخ ، اصبري بحاسب معك
وحطت اغراضها ام عزام وشموخ مشت عند اروى وهي تشتم نفسها على حركتها وتقول بنفسها ؛ " الحين ليش اتنرفز من هيلا لما ضحكت عادي هم متعودين اننا شدخلنني يع يالفشيله والله اني ملقوفه وبعدين وش قصده راشد "
اروى ؛ يلا واخيراً خلصوا
هاجر وهي تشوف الساعه ؛ صار لهم ٢٠ دقيقه بس والله كنها ساعه
ابو راشد ؛ عبدالسلام حاسب وخلي الحساب عندي
عزام ؛ ماتقصر ياعم بس..
ابو راشد قاطعه ؛ والله محد يدفع شي افا يجون اول مره ويدفعون
ام عزام انحرجت وهي تحس ان اغراضها كثيره وبالعكس ما اخذت شي كثير وراشد وسعد ساكتين لأنهم متعودين عليه بيسفل فيهم لو ماخلوه يدفعهم
حاسبوا وقال ابو راشد ؛ اذا تبون نخلي اغراضكم هنا عشان لاتبلشون بالأكياس نجيبهم معنا
ام راشد ضحكت ؛ مايخالف اجل خلوهم معكم
ضحكوا وطلعوا البنات يكملون تمشيه
ام عزام ؛ تبارك الله ياسوقكم ومحلكم يأم راشد
ام راشد ابتسمت ؛ اصبري للحين باقي محلات
عند شموخ وهاجر واروى اللي وراهم التفتت اروى بأستغراب ؛ شموخ شفيك ساكته
شموخ ؛ ها لا مافيني شي ... ااء وين بقالة مرزوق
اروى ضحكت ؛ مو داخل السوق برا اذا طلعنا نمر عليها
هاجر وهي تشوفهم دخلوا محل ؛ وش ليه امي دخلت محل الحرير
اروى ؛ تبي تاخذ قماش يربيي انا اقول ننقسم ونتمشى انا وانتوا
هاجر ؛ اصبري خلينا ندخل نشوف
ودخلوا وراهم وام راشد توريهم القماشات
عبير ؛ شوفي هذا يهبل وهذا
ام راشد وهي تلمس القماش ؛ لا لا بارد والناس بدت تشتي
اروى ؛ ييمه كلكم تبون تنقون قماش ؟
ام راشد وهي تسألهم ؛ ايه انا وام عزام وعبير ومنيره خذوا انتوا عشان تفصلون معنا
هاجر ؛ لا يمه عندنا نبي نطلع نتمشى بالسوق لما تخلصون واذا خلصتوا تلقونا عند محل ابوي
ام عزام ؛ شموخ انتي معهم ؟
شموخ ؛ ايه يمه
ام عزام ؛ اخاف تضيعون
ام راشد ؛ لا ماعليك تدلهم اروى
اروى ؛ ايه يلا بنروح
ام راشد وهي تطلع فلوس ؛ طيب خذي عشان اذا بتشترون شي
ام عزام ضحكت وهي تعطي شموخ ؛ اييه ذكرتيني شموخ خذي اشتري لك واشتري لشريفه معك
ضحكت شموخ وهي تاخذهم وطلعوا
وام عزام وام راشد ومنيره وعبير بقوا بمحل القماش
اروى ؛ وين نروح
هاجر ؛ والله مدري نفتر لين نلقى محل حلو
شموخ وهي تناظر حرمه تبيع ؛ هذي وش تسوي
اروى ؛ ايييه هذي ام مصلح تمخض حليب وتبيعه مع سمن و اقط لاتشوفها امي بس
ضحكوا ودخلوا محل واروى تشوف الشنط ؛ وين احلا ذي ولا ذي
شموخ اشرت لها ؛ هذي
وكملت شموخ تشوف الساعات واخذت لها ولأمها ولشريفه
وبعد ماطلعوا من المحل قالت هاجر ؛ هيلا راحت ؟
اروى ؛ مدري قبل شوي تقول تأخرت شكلها بتمشي
شموخ ؛ الحين بسألكم
هاجر واروى ؛ وش
شموخ ؛ هي متزوجه ؟
هاجر ؛ لا ولا تلقينها عقلت
اروى ضحكت ؛ مع ان اشك ان حتى لو تزوجت ماتعقل
شموخ ؛ ااء قبل شوي تضحك وتسولف احس تمون بزياده
هاجر ؛ ععادي كلنا نمون متعودين عليها كأنها حركات تركي وطبعه بس تفتر
شموخ سكتت بقهر واروى مصدومه من استوعبت وهي تقول بنفسها وتضحك ؛ " والله اننني حاسه من لما شفتك رحتي عندهم واستقعدتي لها ... يا انك تحبينه يا انه يحبك ولو بحلف انهم كلهم بعد " 
قاطعتها هاجر ؛ بنت

انزل لكم بارت بكره ؟ ... ☆