ياديرةٍ ضمّت كل الأحباب

Part 14

°°
《 عند خيمة الحريم 》
اللي كانو يتقهوون والبنات بجمعتهم وحلاهم وفطايرهم اللي سووها في البيت
ام راشد ؛ يبنات حطو للعيال خلوني اخذ لهم
عبير اخذت الصحن وهي تحط لهم ؛ وقولي لهم اذا خلصو يجون نروح للزرع
منيره بضحك ؛ وودي اشوف الغنم
اروى ؛ لا الحين مو بس غنم فيه حمام ودجاج وارانب
شموخ ؛ الله يلا بالله بشوفهم
هاجر ؛ طيب يمه قولي لهم بنسبقهم وهم يجون بعدين
ام راشد ؛ لا خلونا نروح مع بعض والله اني اخاف نروح لحالنا
ضحكت ام عزام ؛ طلعتي خوافه يخيه
ضحكوا البنات و ام راشد وهي تقوم تودي لخيمة العيال حلا وفطاير ومن دخلت وهي تبتسم من اصواتهم وضحكهم ؛ السلام عليكم
الكل ؛ وعليكم السسلام
راشد ؛ ياهلا ومرحبا بأم راشد
تركي ضحك ؛ ياهلا بالحامل والمحمول
ام راشد ضحكت ؛ هلا هلا
نايف وسع لها مكان بينه وبين ابوه ؛ تعالي تعالي يابعد راسي عندي لك بشاره
تركي ؛ لا لا عندي يمه تعالي
نايف ؛ اقول اص خليه عنك يمه تراه يبي اللي معك عطيه وتعالي اجلسي
ضحكت ام راشد ومدت الصحن لتركي وهي تجلس عند نايف ؛ وش البشاره
نايف ؛ انقبلت بالوظيفه اللي قدمت عليها
ضحكت ام راشد بفرحه ؛ مبروك مبروك
نايف وهو يبوس كتفها ؛ الله يبارك بعمرك
تركي وهو ياكل حلا ؛ اووه هذا شكله بمناسبة قبول نايف
ام راشد ضحكت ؛ ايييه ايه
ضحك تركي وهو يوزع عليهم وقامت ام راشد وهي تقول ؛ عاد حنا بنروح بعد شوي نشوف الزرع ونشوف الغنم اذا خلصتو تعالو عشان نروح مع بعض
تركي بسرعه ؛ لا لا خلصنا يلا يلا نروح
راشد ؛ اهجد بس لا يمه شوي ونروح
ابو راشد ؛ اي خلوها شوي عشان مره وحده نسقيه
ام راشد ؛ خلاص اذا بتروحون ارسلو واحد من الصغار يعلمنا ونجي
وطلعت لخيمتهم والعيال كملوا يتقهوون
ومن دخلت وهي تلتفت لعبير اللي قالت ؛ ها يمه نروح الحين ؟
ام راشد جلست ؛ لا بيتقهوون ونروح مع بعض
هاجر وهي ماتبي تروح معهم ؛ ييمه خليهم يروحون لحالهم وحنا لحال تكففين
ام راشد ؛ ويين تروحين لحالك لامافيه
اروى ؛ الا عادي ناخذ راحتنا وبعدين سعد وعزام بيكونون معنا يعني لازم البس عبايتي
عبير بطفش ؛ ييوه نسيت عزام يمه يلا بس نروح لحالنا
هاجر بضحك ؛ اهب عليك حنا نبتلش وننكتم بعباياتنا بسبة سعيدان ويوم ذكرتي عزام هونتي
ضحكوا واروى قامت وسحبت معها شموخ ؛ يلا قومو قومو نسبقهم
ام راشد بضحك ؛ خلاص مشينا وان صار شي بسببك ياعبير
عبير ضحكت ؛ ماعليكم بوجهي بس يلا ، شوشو خلك هنا انتي وبنتك تأملي المزرعه من مكانك
شريفه ضحكت ؛ اصلاً مالي خلق اروح بس لاتنسون تجيبون لي من زرعها بشوفه
هاجر ؛ اببشري يلا مشينا قبل يجون العيال
اروى ؛ ايي بنرروح لحالنا قبلهم يلا
ام راشد ؛ يلا ام عزام يلا منيره تعالوا
قامو كلهم لبرا الخيمه ومن وقفو وهم يشوفون ناصر وعبدالله جو يركضون
ام راشد ؛ شوي شوي وش فيكم
عبدالله ؛ جده جدي يقول يلا مشينا للزرع
اروى ؛ لا قول راحو لحال..... قاطعتها ام راشد ؛ لا بنروح معهم دامهم ماشين ، خلاص قول جايين
رجعت اروى بطفش وهي تاخذ عبايتها وتتحلطم وشريفه تضحك عليها وطلعت وراحو لجهة خيمه العيال وهم يشوفونهم واقفين
ام راشد ؛ يلا مشينا
ابو راشد ؛ ايه يلا تعالو معنا بنروح النخل تشوفونه والزرع وان كانكم بتشوفون الغنم
ام راشد ضحكت ؛ ابد بنشوف كل شي
ومشو الرجال لجهة النخل والحريم وراهم
ومن دخلو وهم يمشون بالنص من بين النخل وهم يشوفونه عن يمينهم ويسارهم وبعدو الرجال للجهه اليسار والحريم دخلو يمين
ام راشد وهي تأشر على التمر ؛ ههذا هو قليل اللي مستوي بس طعمه حللو
ام عزام وهي تتلفت ؛ ماشاء الله ماشاء الله
منيره ؛ ماشاء الله ، عمه مين اللي يهتم فيه ؟
ام راشد؛ العمال هم اللي يسقونه ويطلعونه اذا استوى
عبير ؛ والعمال موجودين هنا ؟؟
ام راشد ؛ لا اليوم جمعه مافيه عمال
اروى ؛ طيب يلا يمه ابي عننب
ضحكت ام راشد وهي تمشي ؛ يلا الحين نشوفه
طلعو وراها وهم يشوفون العيال واقفين من بعيد جهة الشجر ومشو لهم
وقالت ام راشد بضحك ؛ خذونا للعنب في وحده تنتظر
ابو راشد فهمها وابتسم ؛ تبشر هذا هو تعالو شوفوه
بعدو العيال على جنب وقربو البنات اللي سحبتهم اروى بحماس توريهم
منيره ضحكت ؛ اوفف اروى جمعي لنا عشان نذوقه
اروى طلعت كيسها وهي تنتف ؛ اببد ماعليك
ام راشد ضحكت ؛ الظاهر حتى اللي ما استوى بتاخذينه
عبير بضحك ؛ الصغير خليه اجمعي المستوي
اروى وهي تناظر العنب ؛ ابك كله مهب مستوي مالقيت الا كم حبه
هاجر ؛ شوفي اللي وراها فيها
اروى ؛ ايه فيها تعالي انتي وشموخ اجمعوا
راحو هاجر وشموخ مع اروى للشجره الثانيه و ام راشد كملت مع ام عزام ومنيره وعبير يتفرجون على الزرعات الباقيه
والعيال في الجهه الثانيه يفتحون المويه عشان يسقون الزرع
اما اروى وهاجر وشموخ اللي كانو يجمعون عنب وفزت اروى من حست بالمويه برجولها ؛ للااا يلللعن بليسكم
هاجر ؛ يييققهروون مايشوفونا عند الزرع ليش يفتحون علينا الماء
شموخ وهي ترفع عبايتها ؛ ييوه غرقت ، العيال فاتحينه ؟؟
اروى ؛ ايي بمسك مواصير المويه هذي وبروشهم فيها
ضحكو وكملو يجمعون وهم يحاولون يبعدون عن المويه اللي تمر من تحتهم
اما العيال اللي من بعدو عشان يفتحون الموصل لأسلاك المويه الممدوده بين الزرايع ونسو البنات اللي واقفين عند الشجر وبعد وقت وقفت المويه وطلعو البنات واروى عبايتها تنقط مويه وشموخ تحاول تنفض جزماتها وشافتهم ام راشد اللي جو من الزرع وضحكت على اشكالهم ؛ وانتو بعد جاكم الماء
اروى وهي ترفع كيسها ؛ والله لو اغرق ماخليت عنباتي
الكل ؛ هههههههههههه
شموخ استندت على هاجر وهي ترفع رجلها وتفصخ جزماتها وشراباتها ( الله يكرمكم ) ؛ ييوه الحين كيف البسهم
هاجر ضحكت بخبث وهي تأشر لأروى من شافت العربيه وراهم وابتسمت اروى وهي تعطي عبير الكيس وراحو ام راشد واللي معها يحسبون البنات وراهم اما اللي بقو اروى هاجر وشموخ اللي مستنده على هاجر وتلبس وهي واقفه وماحست الا بشي صدم فيها من ورا وطاحت عليه وصرخت من شافت اروى تركض فيها وهي داخل العربيه وهاجر وراهم والتفتو الحريم بصدمه عليها من تعدت من جنبهم العربيه اللي فيها شموخ تصارخ والغبار وراهم واروى تركض ووراها هاجر اللي ميته ضحك
ام راشد تنادي ؛ ياببنت اروى اروى الحففرهه ل...
وقفت هاجر بخوف وهي تشوف العربيه مالت عن الحفره الصغيره واروى طاحت فيها وشموخ طاحت من العربيه ومابينها وبين الحفره اللي طاحت فيها اروى الا مسافه بسيطه
وقفت اروى وهي تضحك من طيحتها وتبكي من الم رجلها اللي تعثرت
هاجر بصدمه ؛ الله ياخذ عدوك ماقلت طيري فيها هاتي هاتي يدك ، شموخ صار لك شي ؟
تمسكت اروى بهاجر وهي تطلع من الحفره وانحاشت من شافت شموخ وقفت تلحقهم بنعولها وتحذفهم وهي تتحسب عليهم ؛ حسسبي الله على بليسكم كسرتوني والله لا اكسر راسك انتي وياها
ام راشد وام عزام ومنيره وعبير اللي ركضو لهم ووقفو بصدمه من شافو صراخهم وضحكهم وغبار عباياتهم وجزم شموخ اللي تتحذف عليهم
ام عزام وهي تنادي شموخ ؛ الله لا يبلانا اععنننبو بليسك شششموخ حافيه والارض شوك ماتتوبين
عبير ؛ اروى ياراس المصايب " ومسكتها من تعدت من عندها تركض " تعالي تعالي والله ماتروحين
اروى وهي تاخذ نفس ؛ شموخ تعوذي من الشيطان يبنت الحلال اصببري
هاجر مسكت شموخ من وراها ؛ هاتتي النعول يالقرده قطعتي كتفي
شموخ جلست ؛ ااااهخخ رجولي وجبهتي طحت عليها
منيره وهي منهاره من الضحك ؛ ييياربييي يا اروى
ام راشد ؛ ماتتوب رايحه تركض ، صار لك شي
شموخ ؛ اححسن خليها تتكسر كسرتني
اروى ؛ ااخ يويلي والله طحت على رجلي
هاجر ؛ اننخرشت احسب الحفره كبيره قلت الله يرحمها
ام راشد ؛ لا حافرينها لنخله وطاحت فيها اروى
عبير ؛ خوش نخله انتي وذا النقاب اللي كله تراب
ام عزام ؛ كلهم وشموخ مويه وتراب
هاجر ؛ انا اهونكم الحمدلله
اروى حذفتها ؛ انتتيي راس البلا محد جاب الفكره الا انتي
ام راشد ؛ انتوا من وين طلعتو العربيه كسرتو بعض
هاجر بضحك ؛ لقيتها عند الأحواض والله واشر للفطينه اروى وهي تلقطها ع الطاير
شموخ رمتها بالحجر ؛ طارت ضروسك انتي وياها وين فطينه الا طيرتني وتكسرنا
الكل ؛ هههههههههههههههههه
سندتها عبير تقوم وهي تضحك عليهم وهاجر اللي غبرة ملابسها تهون عند اروى وشموخ اللي حالتهم حاله من غبار وتراب ومويه ومشو وكل وحده تضرب الثانيه وتنتفض غبرتهم مع كل ضربه وطلعو قدامهم العيال ووقفو الحريم والبنات وراهم بصدمه .....

بارت صغير قد كده 👌🏻
كثر تفاعلكم 😂😂💔