ياديرةٍ ضمّت كل الأحباب

Part 39

تركي سكت وهو يخبط على كتف نايف ؛ لا ان شاء الله الحب مهو ضيق ودموع
نايف رفع كتوفه ومشى ورا تركي اللي دخل للمخزن ياخذون حطب وطلعوا للدوانيه وهم يشبون النار وجلسوا يكملون قهوتهم
•
عند البنات داخل
هاجر وعبير بالمطبخ وشريفه رجعت تنام وام راشد ومنيره والعنود بنت شريفه وعيال عبير ومنيره بالصاله واروى بالغرفه وطلعت عبير وبعدها هاجر وهم يجلسون بالصاله وتنهدت ام راشد وهي تقول ؛ يحليلها ام عزام
منيره ابتسمت ؛ اي والله الله يستر عليهم
عبير ؛ اتوقع محد زعل كثر اروى ، هي وين راحت ؟
ام راشد ؛ داخل الظاهر انها تبكي
هاجر ؛ الحين انا مدري انتوا حساسين بزياده ولا انا ماعندي مشاعر طيب تراهم بيجون بتمايم عنوده صح؟ يعني خلاص بنشوفهم ان شاءالله قريب
ام راشد ضحكت بخفه ؛ ان شاءالله ، والله ان ام عزام تذكرني بأختي فهده الله يرحمها نفس حركاتها وسوالفها
التفتوا لأم راشد اللي تغير صوتها من العبره وقالت عبير ؛ يممه حبيبتي انتي الله يرحمها
الكل ؛ اميين يارب
ام راشد ؛ هاجر روحي شوفي اختك نامت ولا وش سوت
وجت بتقوم هاجر ودق باب المطبخ
عبير ضحكت ؛ اكييد بيدخلون
هاجر راحت للمطبخ وهي تفتح الباب ودخل تركي ؛ سلام
هاجر ؛ وعليكم السلام
تركي بضحك ؛ خلاص خلو الباب مفتوح بصير ادخل واطلع براحتي
هاجر ؛ لايشيخ ومنيره ماتاخذ راحتها
تركي ؛ ايه صح ، عادي نتنحنح وندخل
هاجر تكتفت ؛ طيب وش تبي
تركي طنشها وهو يقرب لباب الصاله وتنحنح ؛ يمه
ام راشد ؛ ادخل يأمي
ودخل تركي ومنيره عدلت غطاها
تركي ؛ السلام عليكم
الكل ؛ وعليكم السلام
عبير ؛ وشلونك تروك
تركي ؛ بخير الحمدلله وين شروف
ام راشد ؛ نامت والله
تركي هز راسه وهو يدخل للغرف
عبير بضحك ؛ اووه الحين يمكن ينامون بغرفهم بعد
ضحكوا وجت هاجر وهي تجلس عندهم
تركي اللي قرب عند باب غرفته وقبل لايدخل شاف الغرفه اللي كانوا فيها ام عزام وشموخ يدري انهم فيها لأنها هي الغرفه الوحيده الزايده فالبيت وعرف انها لهم وشاف الباب مفتوح والنور شغال وقرب وهو يدخل ولقى اروى عند المرايه وتبكي
تركي عقد حواجبه بصدمه ؛ اروى ! وش فيك ؟
اروى التفتت وهي تمسح دموعها ؛ مافيني شي وش تسوي هنا ؟
تركي ؛ ممدري سمعت صوتك ، ليه تبكين
اروى ببكي ؛ ليه راحو ؟
تركي سكت وهو يقرب وتنحنح ؛ وانتي تبكين عشانهم راحو ؟
اروى هزت راسها ورجعت تبكي ؛ يويلك لو ماتاخذها ياتركي يويلك !
تركي ضحك بخفه وهو يشد على يده ؛ باخذها بس وشلون اعرف انها ماوافقت على خطبتها عشان اخطبها ؟
اروى ؛ انا اكلمها واسألها واذا رفضت تروح تخطبها
تركي ابتسم ؛ ان شاءالله ، بس عاد اقنعيها انتي
اروى هزت راسها وهي تمسح دموعها وقال تركي بهدوء ؛ زعلانه عشانهم راحو ؟
اروى ؛ ايه ، حتى شموخ ماكان ودها تروح وكانت بتبكي بعد
تركي تنهد وهو يقول بنفسه ؛ " اششوا يعني يوم تبكي زعلانه عشانها بتروح " طييب تكلمينها انتي ونشوفهم مره ثانيه ان شاءالله يعني ماهي اخر مره
اروى ؛ بيجون بتمايم العنود بعد شهر او اقل بس شهر كثيير
تركي ناظرها بأستغراب ؛ بيجون مره ثانيه ؟
اروى ؛ ايه شريفه تقول بتسوي تمايم العنود هنا وبعد شهر او اقل بيجون عليه
تركي ضحك براحه ؛ ييعني خلاص بيرجعون اشوا انا احسب نشوفهم بعد سنه واحاول اقنعك وانا ابي من يقنعني
اروى ضحكت ودقها تركي بضحك ؛ خلاص عاد ان جت المره الجايه ماتروح الا وهي خطيبتي ادعي تكفين
اروى تنهدت ؛ ان شاءالله
تركي ؛ يلا خلاص لاتبكين وروحي للصاله بجي اشوف عنوده الحلوه اللي بترجعهم
اروى ضحكت وهي تمسح دموعها وطلعت وتنهد تركي بفرحه وطلع وراها للصاله
ام راشد وهي تشوف اروى جت ووجهها للحين احمر ؛ خلاص وانا امك يجون مره ثانيه
هاجر وهي تصفق يدينها ببعض ؛ لا والمشكله شهر يناس شههرر مب سنه وترا شهر تك تك وهو مخلص
تركي طلع ؛ صح ، وهي صادقه كلموهم انتوا لين يخلص هالشهر
اروى ناظرته بطرف عينها وهو يجلس عند ام راشد ؛ عطوني عطوني حبيبة خالها مبطي عنها
ام راشد وهي تحطها بحضنه ؛ شوي شوي عليها وانا امك
واخذها تركي وهو يبوسها ويلعب معها
منيره ؛ عقبال ماتشيل عيالك ياتركي
تركي ابتسم ؛ امييين يأم ناصر الله يسمع منك
ام راشد ابتسمت بأستغراب ؛ وافق وابشر
تركي ؛ افكر افكر يأميمتي للحين
هاجر ؛ يمه اخطبي لنايف تركي مصروع
تركي ؛ ابشرك نايف مايبي
ام راشد ؛ الله يصلحك انت وياه
ودخل نايف وهو يتنحنح ومعه عبدالله وناصر
نايف ؛ صباح الخيير
الكل ؛ صباح النور
وجا بيجلس عند تركي وهو ينتبه لوجه اروى وناظرها بأستغراب ؛ هذي علامها !
هاجر ؛ المراهقه صعبه تصيح عشان خويتها راحت
اروى ؛ قسم بالله ان قمت لأعلمك الصياح
عبير ضحكت ؛ هيه هيه تهاوشوا بعد
نايف ؛ عشان اهل عزام ؟
هاجر ؛ ايه ياخي نقول لها بيجون بيجووون شهر ولا اقل بس ماتفهم
نايف ضحك وهو يجلس عند تركي اللي قال ؛ انتي ماعندك ضمير المفروض تصيحين ولا تبينين انك زعلانه لو تمثيل
هاجر ؛ زعلانه والله واشتقت لهم من الحين بس عاد شسوي خالتي عندها موعد وبنتها بتروح مع امها تخليها يعني
نايف ؛ خلاص عادي تشوفينهم بعد شهر الا هم عشان وشو بيجون بعد شهر ؟
عبير وهي تأشر على العنود ؛ تمايم عنوده
نايف اخذها من تركي ؛ ايييه بيخلونه هنا
ام راشد ؛ ناييف شوي شوي انتوا ليه ماتعرفون تمسكون الورعان !
نايف ضحك ؛ هذا انا ماسكها شوي شوي
ام راشد وهي تسوي راسها ؛ كذا كذا لاتعور رقبتها
تركي ؛ تعالي تعالي يا اروى ياعوينتي ماودك تروحين السوق
اروى قامت وهي تجلس عند تركي وخزتها هاجر ؛ يعنني
تركي ضحك وهو يسوي حركات بيده ويقهرها ؛ موتي غبنه
هاجر ؛ لا والله بسم الله علي محد منغبن الا انتوا
تركي ضحك وهو يهمس لأروى ؛ والله انها صادقه
ضحكت اروى وضحكوا الباقين رغم انهم مايدرون شسالفة اروى وتركي الا انهم ضحكوا من ضحكها ولا ودهم تزعل وحتى هاجر على كثر ماتتهاوش معها الا انها ضحكت وماودها تشوفها زعلانه وكملوا سوالفهم اللي كلها طقطقه وعناد ببعض
..........••..........
في طريق الجبيل
كانت ام عزام تسولف هي وعزام وشموخ سانده راسها وتتأمل الطريق وتنهدت وهي تفتح شنطتها وتناظر الشريط وتحاول تتذكر الراديو حقهم موجود ولا لا وتنحنحت وهي تقول ؛ يمه الراديو حقك موجود ببيتنا ؟
ام عزام بأستغراب ؛ وش جاب طاريه
شموخ ؛ اا شريت شريط لما رحنا للسوق وتو تذكرت الراديو حقك
ام عزام ؛ والله الظاهر انه خربان من زمان ماشغلته
عزام ؛ هاتي الشريط اشغله هنا اذا تبين
شموخ طلعته وهي تمده لعزام وهو يقلبه وابتسم وهو يقراه ؛ الله يرد خطاك اووه احسن شريط
وحطه بمسجل السياره وهو يشغله وبدت الأغنيه ورجعت شموخ وهي تستند وتسمع وطول ما الأغنيه شغاله وتسمعها كانت دموعها على خدها وودها لو تصيح الحين انهم يرجعون وكملت تسمع هالأغنيه اللي توصف شعور تركي لها ؛
الله يرد خطاك لدروب خلانك ..
لعيون ماتنساك لو طال هجرانك ..
الله يرد خطاك لدروب خلانك ..
لعيون ماتنساك لو طال هجرانك ..
دام الأمل موجود فالنفس خضاعه ..
حق العيون السود السمع والطاعه ..
السمع والطاعه .. السمع والطاعه ..
الله يردك لي يامطول غيابه ..
يامعذبِ هجرِ .. مدري وش اسبابه
الله يردك لي يامطول غيابه ..
يامعذبِ هجرِ .. مدري وش اسبابه
دام الامل موجود .. فالنفس خضاعه
حق العيون السود .. السمع والطاعه
السمع والطاعه .. السمع ، والطاعه
ياللي بعدك اليوم يبكي على باكر
صبري عليك يدوم مادمت انا فاكر
ياللي بعدك اليوم .. يبكي على باكر
صبري عليك يدوم .. مادمت انا فاكر
ان الأمل موجود .. والنفس خضاعه
حق العيون السود السمع والطاعه
السمع والطاعه .. السمع والطاعه
..........••..........
بيت ابو هادي
هادي وحمد وشهد نايمين وام هادي بالمطبخ وقالت وهي طالعه للصاله وتنادي ؛ ياعيال قوموا الساعه بتجي ٩ يلا
وجلست عند ابو هادي اللي كان بالصاله يتفرج على التلفزيون والتفت لها ؛ للحين نايمين ؟
ام هادي مدت له القهوه ؛ اي والله امس كانوا قايمين من الفجر وماناموا الا متأخر يوم جينا واليوم صلوا الفجر ورجعوا ينامون
ابو هادي ؛ وغريبه هادي ماقام للحين
ام هادي ؛ الفجر يقول مصدع اكل مسكن ونام وما افطر حتى
ابو هادي هز راسه وهو يتقهوى وبعد دقايق قال ؛بروح للسوق بعد شوي اشوف عمال
ام هادي ؛ اسأل اصحاب المحلات اسرع
ابو هادي ؛ ماعليه اشوفهم كلهم
التفتوا لصوت باب غرفه فتح وقالت ام هادي ؛ زين واحد منهم صحى لايخرب نومهم
ابو هادي ؛ زين ان كانه هادي عشان يروح معي ولا بشوف مساعد
ام هادي ؛ اول شي ليه ماتعبون المحل وبعدين عاد تشوف العمال
ابو هادي ؛ عشان يرتبونه وبعدها يبيعون
ام هادي ؛ طيب اسأل جارنا ابو راشد ماتقول عنده محل ؟ شف اذا يعرف عمال عشان يكلمهم لك
ابو هادي ؛ ايه ذكرتيني الجمعه ان شاء الله نسير عليهم
ام هادي ؛ بعد بكره ؟
ابو هادي هز راسه ؛ ايه امس بالعشاء يقول ننتظركم تسيرون علينا قلت اجل الجمعه
ام هادي ؛ يوه جاي امس ؟ اجل ليه ماجو اهله معه
ابو هادي ؛ والله مدري يمكن عشانهم مايعرفون اهلنا جا هو وعياله ونسايبه سعد وعزام "وتذكر " ايه ايه امس نايف عطاني ورقه فيها رقم واحد جا الظهر بيأجر ولا لقانا اريها بالغرفه على الدرج هاتيها بالله
ام هادي هزت راسها وهي تقوم وراحت للغرفه جابت الورقه ورجعت وهي تمدها له وهو ياخذ جواله ويسجل الرقم ودق واشر لأم هادي تقصر صوت التلفزيون ورد ؛ الو السلام عليكم ....... الأخو تركي بن مقبل ؟ ..... معك ابو هادي صاحب العماره اللي جيتها امس ...... ايه ايه ماكنت موجود والله لكن ان كانك تبي تجي اليوم موجود ..... فيه الدور الثاني والثالث ... عوائل ها ؟ ... تمام موجوده تجي وتشوفها ....... مهيب غاليه ابد انت تجي ونتكلم عن الأجار ... ان شاء الله ، فمان الله
وقفل وهو يلتفت لأم هادي اللي قالت ؛ ها وش يقول
ابو هادي حط جواله ؛ يقول بيجي العصر
ام هادي ؛ بأي دور يسكن ؟
ابو هادي ؛ والله مدري يمكن بياخذ الدور الثاني اذا هو يبي مفروشه
ام هادي ؛ الا الدور الثالث ليش مافرشه صاحب العماره اول
ابو هادي ؛ عشان يمكن بعضهم بيجلسون سنين فيها اكيد يبون يفرشونها مثل مايبون
ام هادي ؛ يعني للي يبي مفروشه عنده الدور الثاني واللي يبي يفرشها يروح للثالث
ابو هادي هز راسه بأيجاب وقالت ام هادي ؛ ايه صح الكنب هذا متى نحطه بالصاله الثانيه ؟
ابو هادي ؛ والله اني مدري الحين خلينا نخلص من المحل وبعدها نتفضى للعماره يبيلها شغل اصلاً ، والكنب عادي لو العيال بربع ساعه ينقلونه
ام هادي ؛ اجل خلاص بقول لهادي وحمد يشيلونه وبعدين نسوي الصاله هذي
ودخل حمد وهو يتمغط ؛ صبحهم بالخير
ام هادي وابو هادي ؛ صباح النور
حمد جلس ؛ كني سمعت اسمي ؟
ام هادي ؛ ايه ابيك انت وهادي تشيلون الكنب هذا للصاله الثانيه
حمد ؛ ليه نغير مكانهم ؟
ام هادي ؛ هذي بنخليها مجلس للضيوف والصاله ذيك لنا
حمد ؛ والتلفزيون ؟
ابو هادي ضحك ؛ نحطه هناك بعد يسوونه العمال
حمد ضحك وقالت ام هادي ؛ ماقاموا اخوانك ؟
حمد ؛ مدري والله ابي فطور
ام هادي ؛ قومهم واحطه مره وحده
حمد فز وهو يطلع للغرف وصدم بهادي اللي جا بيدخل
هادي خبط كتف حمد بخفه ؛ ماتشوف !
حمد ؛ جاي اصحيك ماقامت القرده ؟
هادي ؛ مدري وخر
ودخل هادي للصاله وراح حمد وهو يطق ؛ شههد
شهد من داخل الغرفه ؛ نعم
حمد ؛ قايمه ؟
شهد ؛ تو قمت وش تبي
حمد ؛ اخلصي امي بتحط الفطور قومي
شهد ؛ خلاص انقلع اجي
حمد مشى وقال وهو ماله خلق يهاوش ؛ ابوك يالنفسيات
ودخل للصاله وهو يجلس يتفرج معهم على التلفزيون وقامت شهد بعد دقايق وام هادي حطت لهم الفطور وافطروا وام هادي وابو هادي كملوا قهوتهم
..........••..........
بيت ابو راشد
نايف راح لدوامه وابو راشد وراشد وسعد بالمحل وتركي تحجج انه مصدع وهو ماله خلق يروح وقاعد بالصاله اللي فيها عبير وشريفه وهاجر واروى ويسولف معهم والصغار عندهم
هاجر ؛ اقول الزرع ترا بيموت محد سقاه لا امس ولا قبله ساحب عليه انت
تركي ؛ ومافيه الا انا ورا ماتسقينه انتي
اروى ؛ لا هاجر لاتسقي الزرع بتغرقه ثم تطفح النخله
ضحكوا وقال تركي بضحك ؛ اي والله انك صدقتي اجل بنسقيه انا وانتي بعد شوي
عبير ؛ يمكن يجي مطر اليوم الجو غيم
شريفه ؛ ايه وبررد ، قربي الدفايه انتي حاطتها عند كراعينك
هاجر لفت الدفايه لجهتهم ؛ يلييل جمدت وش اسوي
عبير ؛ اشربي حليب قبل يبرد
هاجر ؛ ما ابي ياخي طفشت ليتني رحت مع امي ومنيره
شريفه ؛ امي طفشت من اول ساعه راحوا فيها واخذت منيره وهي تروح لحميده " من جاراتهم "
اروى ؛ والله مالومهم ومنيره من كثر ماهي طفشانه خلت ورعانها وراحت
هاجر ؛ الا وين راحو الورعان
عبير ؛ بالغرفه يلعبون مع ترف وجوري
تركي باس العنود وهو يحطها بحضن شريفه ؛ بروح اسقي الزرع لو مات بيلحقني فيه ابوي
ضحكوا وطلع وقامت اروى معه للحوش
شريفه بضحك ؛ يزينه تركي
عبير ؛ اي والله وسيع صدر
هاجر ؛ حتى نيوف ياعمري مايصدق متى يجي الخميس قلت يلا ماعليه اليوم وبكره ونام يومين لو تبي
شريفه ؛ اي صح وشلونها وضيفته
هاجر ؛ مدري يقول طفش فيها
عبير ؛ يوه عاد بكره يغيرها مايثبت على شي
هاجر ؛ اهم شي يرتاح خلوه
شريفه ضحكت ؛ انتي على كثر ماتناقرينه اللي يشوفك الحين يقول شايلته عن الأرض
هاجر ضحكت ؛ عاد شسوي اللي احبه لازم اناقره
•
بالحوش كان تركي يرش الزرع واروى تنضف الأوراق اللي طايحه والشوك ووقفت وهي تتلفت بأستغراب ؛ تركي قفل المويه شوي
تركي التفت وهو يقفله ؛ وشو ؟
اروى وهي تحاول تسمع ؛ تسمع صوت ؟؟
تركي سكت شوي ورجع التفت ؛ صوت قطو
اروى ؛ ايييه وينه ؟
تركي ؛ مدري تلقينه بعيد
اروى ؛ لا والله قريبب شكله صغيير حرام لايكون طايح
تركي جا بيشغل المويه ؛ لا ماعليك
وقفته اروى ؛ للاا تكفى تعال بنشوففه
تنهد تركي ومشى لمكان الصوت واروى وراه ويحاولون يعرفون من وين جاي الصوت ومشوا يمين الدكه وبالحوش على البيت من ورا كان سيب طويل بآخره باب قسم راشد ومقابل قسمه كانت الدوانيه وقفوا بالنص وهو يلتفت لأروى ؛ هنا صوته
اروى ؛ اييه عند غرفة راشد
تركي رجع مع اروى وهم يقربون قدام باب قسم راشد اللي كان بآخر السيب بين باب الدوانيه وباب المطبخ اللي برا وهو يقرب للصوت والتفت لأروى اللي شهقت ؛ بسسسهه
تركي ناظر المكان اللي تأشر له اروى وهو يشوف قطوة بيضاء وصغييره وهو يقرب عندها وقالت اروى ؛ يعمرييي يزينها يزينها ابيها ياتركي تكفى
تركي ؛ اصبري يمكن امها حطتها وبترجع لها
اروى ؛ بسس برد عليها ويمكن يجي مطر وهي هنا حراام
تركي قرب للقطوه وهو يشيلها وقالت اروى ؛ شكلها تو انولدت
تركي ؛ لا يالخبله واضح لها شهر ونص كذا بس صغيره
اروى ؛ خلنا ناخذها اذا ماجت امها تككفى
تركي ضحك ؛ عاد تحبين البسس انتي ، خلاص نخليها هنا شوي اذا ماجت امها للظهر ناخذها
اروى ؛ طيب خلنا نحط لها كرتون وأكل عشان ماتبرد
تركي حطها ؛ يلا جيبي لها بسقي الزرع لين تجين
وركضت اروى لداخل وضحك تركي وهو يروح يكمل الزرع
بالصاله دخلت اروى للمطبخ وهي مستعجله واخذت كرتون كبير وهي تحط فيه صحن مويه وحليب وهي تشيله وطلعت
هاجر شافتها ؛ وش شايله انتي ؟
اروى وهي تطلع ؛ تعالي شوفي
وراحت اروى وقالت هاجر ؛ والله عجزانه خلوها
وطلعت اروى وهي تمشي لتركي ؛ يلا تععال
تركي قفل المويه وهو يمشي معها والتفت ؛ ليه تمشين شوي شوي
اروى ؛ الكرتون فيه صحن مويه وحليب اخاف احط اكل وتغص
تركي ضحك ؛ امي بتذبحك اخذتي صحونها
اروى ؛ لا ماعليك بلاستك
ومشت وهي توقف عند القطوه وتحط الكرتون ؛ ييعمري انا شكلها جوعانه
واخذ تركي الكرتون وهو يشيلها فيه ويقرب لها الصحن ؛ ارروى ماعرف للقطاوه شربيها
اروى ؛ اخاف تعضني
تركي ؛ والله مدري صغيره ماتعرف
وسكتت اروى وهي تشوف القطوه بدت تشرب ؛ وزيييينننههاا كبيره هذي شف تشرب بنفسها ، عوافيييي عواففيي يناسس
تركي ضحك وهو يناظرها واروى مبتسمه تتأملها واستوعب تركي بعد دقايق وقال بصدمه ؛ ارروى !!
اروى لفت بخوف ؛ بسم الله وش
تركي بعصبيه ؛ جلالك وينه منتي حاطه حتى طرحه !
اروى استوعبت ؛ يويليي وربي نسيت ماخذته عبالي بس بنسقي الزرع
تركي ؛ ادخلي ادخلي وباب الدوانيه مفتوح بعد لو مرت سياره وانتي هنا يويلك
وركضت اروى وهي تدخل من باب المطبخ اللي برا وتنهد تركي وجا بيمشي وهو يفز من قربت عنده القطوه
تركي بعد ؛ يبنت الحلال اثبري بكرتونك معرف لك
ورجع على ورا وهي تمشي معه واسرع بمشيه وهي تركض وراه وهج للحوش وهي معه وتركي مايعرف للقطاوه وابتلش فيها
تركي وهي يمشي ويناديها ؛ تعالي تعالي وراي ماعرف اشيلك
وفتح باب الصاله وهو يدخل وهي وراه وشهقت اروى ؛ جتتت
هاجر التفتت وهي تفز ؛ الله يقلع بليسك تركي هذي وش جابها
شريفه ؛ تركي تركي طلعهااا لاتجي العنوووود !
عبير ؛ امانه طلعها لاتحوس والله تذبحك امي
تركي وهي واقف عندها ؛ وش اسوي ماعرف لها اروى تعالي شيليها
هاجر ؛ يييمهه طلعها قربت قربتتتت
تركي ضحك وهو يشوف هاجر خايفه منها وهو يقرب ويشيل القطوه وركض بسرعه لهاجر اللي صرخت وهي تقوم وصقعت صينية الكاسات وحاست الدنيا وهي تركض للغرف وتركي لاحقها واروى وراه انهارت من الضحك وعبير ركضت وراهم عشان البزارين بالغرفه بيخافون
هاجر وهي تركض للغرفه وتصارخ ؛ تتركيي الله لايوفقك اذا ماوخرتها امانه امانه بعععدهاااا
تركي وهو ميت ضحك ويلحقها ؛ افا يأخت تركي تخافين من بسيسه
ودخلت هاجر للغرفه وهي تسكر الباب بسرعه وراها وضحك تركي وهو يلتفت لعبير اللي واقفه عند باب الغرفه والورعان قدامها ؛ حسسبي على عدوك خرشت الورعان
اروى بضحك ؛ الصدمه ان هاجر تخاف منها !
هاجر من داخل الغرفه ؛ ابك والله لا احطها بشوشتك بس اصبري
اروى ضحكت ؛ شدخلني انا تركي لحقك
هاجر ؛ وورى ماتوقفينه وانتي تشوفينه يلحقني مغير فالحه تضحكين علي
خالد ولد عبير وهو يأشر ؛ بثه
تركي ضحك وهو يقرب ؛ ايه ياخالي بثه تبيها
مناير وهي تصفق ؛ واااو
وجلس تركي والقطوه بحضنه وجلست عنده اروى وجو الصغار كلهم وقال تركي بضحك وهو ينادي هاجر ؛ الورعان كلهم يلعبون معها وانتي تخافين
هاجر فتحت نص الباب ؛ ياخي ماتخوف بس اتقرف
ولف تركي بسرعه وهي تصفق الباب تحسبه بيفكها عليها وانفجر تركي يضحك وهو يحطها والبزارين حولها يلعبون معها
عبير ابتسمت ؛ والله انها كيوت من وين جت
اروى ؛ لقيناها عند سيب راشد شكل امها نستها
جوري ؛ بنربيها عندنا
تركي ؛ يمكن تجي امها حرام
ترف بعناد ؛ للا ماتاخذها خلاص
تركي ضحك وهو يقلدها ؛ حلاث ماتاحذها
وجت شريفه وهي شايله العنود ووقفت عند الباب اللي يطلع للصاله وهم جالسين بنص سيب الغرف وضحكت ؛ وين راحت هاجر
تركي ضحك ؛ هجت للغرفه
هاجر من ورا الباب ؛ شريفه طلعيهم تكفين ترا بدق على امي ولا لايلحقوني فيها
اروى ؛ اطلعي اطعلي والله مانلحقك
هاجر ؛ تركي احلف
تركي ؛ والله
هاجر ؛ لا قول والله ما الحقك
عبير ضحكت ؛ خلاص يبنت الحلال اطلعي على ضمانتي مايلحقك
تركي بضحك ؛ والله ما الحقك
وطلعت هاجر بشويش وهي تركض وتوقف ورا شريفه ؛ طلعوها طلللعوهاا
اروى ؛ انتي اطلعي والله ماتطلع
اميره ؛ لا بسه حلوه
تركي ؛ اييه حلوه وهاجر وصخه
عبير ضحكت ؛ من متى تحبهم انت
تركي ؛ والله هذي شكلها حلوه وحليله شوفي تلعب
شريفه ؛ ياخي هي حلوه بس الورعان يلمسونها يمكن مو نضيفه واخاف تحسس ، اذا صار بعنودي شي مافيه الا انت
تركي ؛ لا لا فكونا قومي اروى رجعيها مكانها يمكن تجي امها
اروى ؛ تعال معي اخاف القى امها هناك وتاكلني
تركي ضحك وهو يقوم ؛ تاكلينها انتي امشي بس ، خذذي جلالك
اروى التفتت ؛ اييه نسيته والله
وراحت وهي تلبسه وجت ورا تركي اللي اخذ القطوه وجا بيطلع وبكى خالد ؛ لا لاا
عبير ؛ خلودي يع وصخه
ترف ؛ لا حلوه
وطنشتها وهي تركض هي وجوري واميره ومناير وخالد ركض وراهم
جوري وهي تسحب ثوب تركي ؛ حطها حطها
تركي ؛ امها برا تبيها حرام
هاجر وهي للحين ورا شريفه ؛ تاكلكم امها الحين اذا ماوديتوها تعبانه امها بتاخذها وخروا
خالد وهو يحط يده على فمه ؛ اص
ضحكوا وقالت عبير بضحك ؛ اث ياهاجر اث
هاجر ضحكت ؛ نعنبوا بليسهم جت البسه وجحدوني ، هيين انت وياه تعالوا بعدين قولوا العبي معنا ياجوجو والله ما العب
والتفتوا على ام راشد اللي بالحوش وتمشي لباب الصاله ؛ وش عندكم
اروى شهقت وهي تهمس لتركي ؛ اطلع اطلع مع باب المطبخ الثاني والله ان تذبحنا
هاجر بصراخ ؛ يييمه معهم بسسه
اروى التفتت لها بصدمه وهي تأشر لها بتهديد ؛ طيييب ياهاجر
ام راشد جت وهي توقف عند تركي وتناظر القطوه ؛ منين جت ؟
تركي ؛ ااءء اروى لقتها
اروى بصدمه ؛ تركي !
تركي ؛ ققصدي لقيناها برا بالبرد وامها مب فيه
ام راشد ؛ ياعوينتي صغيره ، حطو لها اكل وخلوها برا بكرتون لاتدخلونها
اروى بقهر ؛ ييمه يمه كنتي ماشيه صح
ام راشد ؛ اقول خليها بس تجي امها يمكن مرضانه وتعديك
اروى ؛ لا ان شاء الله مافيها شي تو تلعب حتى الورعان حبوها
ام راشد ؛ نعنبوا بليسك ! مسكوها الورعان ؟ مدخلينها عند العنود !!
جوري ؛ لعبنا معها وحطيتها بحضني
ام راشد وهي تسحب تركي واروى وراه ؛ نعنبوا هالراس مدخلينها عند الورعان وماسكينها ، تعالي تعالي انتي
وسحبت اروى عندها والتفتت لتركي ؛ ودها بمكانها وحط لها اكل ومويه وانتي غسلي يدين الورعان يلا
اروى بصدمه ؛ وشو مايعرفون يغسلون هم
ام راشد وهي تمشيها ؛ لا اعجلي
خالد بكى وهو يشوف تركي راح بالبسه وهو يضحك وام راشد سكرت الباب والتفتت له وهي تشيله ؛ شوي وتجي بيوكلها تركي ويجيبها
وراحت اروى وهي تتأفف والورعان قدامها وتغسل لهم يدينهم واحد واحد
ام راشد حطت خالد ؛ هاك هذا غسليله بعد
هاجر وهي تضحك وتقهر اروى ؛ اييه احسنن
ام راشد ؛ وانتي الصينيه ليه ماشلتيها والحليب تبينه ينكب الحين !
هاجر فزت وهي تاخذ الصينيه ؛ اببشري شلتها
وضحكوا عبير وشريفه وجت ام راشد وهي تنزل عبايتها واخذت العنود وهي تحطها بحضنها ؛ ييوه ياشريفه مهادها ليه فكيتيه
شريفه ؛ هو طاح يمه
ام راشد ؛ وليه ماسويتيه ياعبير هذا وانتي عندك ورعان لاتقولين ماعرفتي
عبير ضحكت ؛ والله يمه سويته بس ماعرفت اثبته
ام راشد تنهدت وجلست تعدل مهاد العنود وتنيمها
جوري جت ؛ جده وين ماما
ام راشد ؛ راحت الغرفه ياحبيبتي الحين تجي
وجا خالد وهو يجلس بحضن عبير بزعل وضحكت ؛ وين براعم هاتوا الريموت
جوري اخذت الريموت وهي تمده لعبير وجو البزارين كلهم وانسدحوا على الأرض عند التلفزيون وعبير وشريفه وام راشد عندهم على الكنب
عبير حطته لهم ؛ الله حديقة المرح
ترف ؛ ماما ارفعي الصوت
ضحكت عبير وهي ترفع لهم واندمجوا بالتلفزيون

•

•

تفاعلوا ✨
اذا تأخرت بالبارتات اعذروني بس احاول ما اتأخر اكثر من اسبوع واجمع لكم البارتات اللي تأخرت فيها واحس افضل لو انزل بارت طوييل ويوم واحد بالأسبوع ويكون من ايام الويكند ، يناسبكم ؟