ياديرةٍ ضمّت كل الأحباب

Part 15

وقفو الحريم والبنات وراهم بصدمه وكل وحده تتخبى ورا الثانيه من الفشله وضحكت ام راشد وهي توقف هي وعبير وام عزام ومنيره يغطون على المصيبه اللي وراهم واما العيال اللي طلعو ع اساس يرجعون مع بعض ويوصلون الحريم لخيمتهم وابو راشد وقف من شافهم والعيال وراه ونايف وتركي اللي انتبهو للبنات واستغربو من اشكالهم وملابسهم
ابو راشد ؛ علامكم ابطيتوا
ام راشد ؛ والله تو خلصنا وشفنا الزرع والنخل انا وام عزام والبنات
ابو راشد استوعب ؛ هلا ام عزام مسّاك الله بالخير
" ابو راشد وعياله واهل ديرتهم كلها متعودين على السلام بين بعضهم وكأنهم اخوان و عادي بين الحريم والرجال يسلمون من بعيد على بعضهم اذا كانو يعرفون بعض "
اما ام عزام ماتعودت على كذا وسكتت
وعزام عادي عنده لأنه تعود عليهم بعد ويعرف طبيعة حياتهم من شريفه
وام راشد استغربت وابو راشد تفهم والتفت للعيال ؛ يلا يلا ياعيال امشوا
ام راشد ؛ ها طلعنا ؟
ابو راشد ؛ ايه يلا روحو الخيمه حزة المغرب الحين
عبير ؛ يبه ماشفنا الغنم ولا رحنا بجهتها
ابو راشد ؛ تبون نروح الحين يمدي ؟
ام راشد ؛ ايه فيه وقت خلونا نروح
ابو راشد ؛ خلاص يلا ، ياعيال من يروح معهم عشان يشوفونها
تركي ونايف وراشد وعزام وسعد بنفس الوقت ؛ انا
ابو راشد وام راشد ضحكوا وقال ابو راشد ؛ اجل انا معكم يلا كلنا نشوفها شوي ونرجع
اروى من ورا منيره وهي تهمس لهاجر وشموخ اللي ورا عبير وام عزام ؛ بس كملت الحين شلون نروح بأشكالنا
شموخ قرصتها ؛ انتي السبب بكمل عليك بعد شوي واحذفك بالشبك مع الغنم
هاجر ؛ يبنات خلونا نغير الوجهه وننحاش لخيمتنا
التفتت اروى وهي تشوفها بعيده ؛ لا والله عندي نروح بغبرتنا ولا نمشي هناك ويطلع بوجهي شي
شموخ ؛ ييمه وش نسوي حسسببي على عدوكم ملابسي ماء وتراب
اروى وهي تمشيهم ؛ يلا بس نروح وراهم ولا نرجع للخيمه لحالنا
راحو جهة الغنم والرجال قدامهم وبعدو عشان الحريم يشوفون الشبك واروى وهاجر وشموخ راحو وراه وشموخ اللي انقهرت من اروى وتخبت ورا الشبك عشان تخوفها اذا جت....
العيال اللي راحو للجهه الثانيه وابو راشد يشيك على العلف ووش باقي منه " اكل الغنم "
ابو راشد ؛ تركي هذا اللي باقي ؟
تركي ؛ بالشبك هذا بس هالأكياس بشوف الثاني كم فيه
وجلسو العيال بجلسة جانبيه كانت للعمال وتركي راح يشوف الشبك كم فيه كيس شعير
وتلفت قبل يمر عشان يشوف فيه احد او لا وكمل مشي لما ماشاف احد قدامه
شموخ اللي تخبت ورا الحاجز عشان تخوف اروى وكان ودها تحذفها بالمويه بعد بس رحمتها عشان برودة الجو واكتفت انها تفجعها من تطلع بوجهها ورجعت على ورا تتخبى اكثر من سمعت صوت مشي ومن قرب الصوت وهي تنط بصرخه بوجه تركي اللي تحسبه اروى ورجع تركي بفجه ؛ ببسم الله خير انش... وسكت بصدمه لما استوعب انها مو من خواته وعرف انها شموخ
شموخ اللي من الصدمه وقفت وهي تتلفت ودها لو فيه وحده من البنات تجي ماتدري وين تروح ماوراها الا جدار وما قدامها الا تركي والشبك على جنب وهي ودها لو تنط داخل الشبك ولا توقف بمكانها
وبالقوه تكلمت شموخ ؛ وخخر احسبك اروى
تركي كان يناظرها ولف يناظر المكان ؛ اروى هناك يا الشموخ روحي لهم لاتجين هنا لحالك تضيعين
انصدمت شموخ من اسمها اللي محد نادها كذا وبعد تركي على جنب وهجت شموخ تركض وهي تحس انها بحلم من الخوف
وتركي اللي واقف يناظرها وهي تركض ومن داخله ميت ضحك على غبار عبايتها وغبار نحشتها وصد يناظر مكانها ورا الحاجز وهنا انفجر ضحك ماقدر يمسكه مايدري هو ضحك توتر او فرحه او من شكلها وركضتها وكمل يحسب الاكياس ويشيك عليهم
اما شموخ ركضت بلا وجهه ومن وقفت وهي تشوف انها وصلت الخيمه ولحالها ودخلت وهي تلقط نفس وشافتها شريفه اللي خافت ؛ بسم الله شموخ علامه شكلك كذا
شموخ جلست بتعب عندها وهي ودها تبكي واعتدلت شريفه وقربت عندها ؛ بنت وين امي والباقين
شموخ وهي تلقط نفس ؛ الله.. يل.... ععطي....يني مو..ييه
شريفه خافت وهي تمد لها مويه ومن شربت شموخ وهدت وهي تنطق بسرعه ؛ ححسببي الله يا اروى هي السبب طحت وتبهذلت كلها بسبتها والله يفشلك يا ت... " سكتت وهي ماتبي تقول سالفة تركي "
شريفه ؛ ورع وش صاير تكلمي ليه ملابسك غبار
شموخ بدت تقول لها اللي صار بس ماقالت لها عن تركي بس قالت لها لما حذفوها اروى وهاجر وانها جت من عند الغنم لحالها عشان ماتبي تجلس وملابسها حوسه
شريفه انفجرت تضحك ؛ ييويلي مو صاحيات والله واروى المجنونه هذا وانتي فازعه لها وتلمين معها عنب
شموخ بقهر ؛ اييييه تشوفين تقهررر لاكن اوريها
ضحكت شريفه وانسدحت شموخ وغفت بتعب من دون ماتحس
•
اما قبل بدقايق بجهة الغنم كانو موجودين فيها الحريم والرجال بعيدين عنهم
اروى وهي تتفرج على الغنم ؛ شموخ شوفي ذي تشبهك ..... ششموخ ؟
وتلفتت تدورها وقربت لهاجر لما شافتها ؛ هاجر شموخ وين
هاجر وهي تعدل طرحتها ؛ مدري عندك كانت قدامك تلقينها عند الشبك
اروى ؛ لا احسبها عندي مالقيتها وين راحت
هاجر تنادي ؛ شمووخ ..
ام راشد سمعتهم ؛ وش وينها
اروى قربت لهم ؛ مدري مو عندكم ؟
ام عزام ؛ لا مو عندنا وينها !
عبير ؛ اروى شوفيها ورى عند الشبك
منيره ؛ او عند الحاجز ذاك
اروى راحت تمشي وهي تتلفت ودخلت للشبك تشوفها ؛ شمو... تركي وش تسوي هنا
تركي ؛ جيت احسب اكياس الشعير وش باقي منها ، انتي اللي وش تسوين
اروى ؛ ادور.. هه لا محد
تركي استغرب ؛ من تدورين ؟
اروى بهدوء ؛ شموخ
تركي بأستغباء ؛ مين شموخ ، اها اخت عزام ليه وينها
اروى ؛ ياخي مدري لو ادري وينها مادورتها ككانت معاي والتفت مالقيتها
تركي خاف ؛ شوفيها عند امها ولا ورا الشبوك اي مكان
اروى طلعت ؛ مدري مدري دورناها مهيب فييه
لحقها تركي وهو يتلفت معها ويدور وشاف ام راشد اللي قربت ؛ تركي اخت عزام ليكون ضيعت
تركي ؛ يمه تكفون شوفوها نادوها لاتضيع هنا المزرعه كلها كلاب
ام راشد بخوف ؛ الله يستر تركي قول لعزام ودوروها كلكم
مشى تركي لجهتهم وهو بالطريق يلتفت يمكن يشوفها ووقف عند الجدار اللي كانت عنده شموخ وهو ينادي بصوت خفيف ؛ شمو..وخ ، يا بنت
وكمل مشي وهو صدق خاف انها ضاعت
ووصل عند العيال اللي واقفين بيمشون
ابو راشد ؛ ها كم باقي كي... قاطعه تركي بهدوء ؛ يبه اخت عزام يقولون البنات مايدرون وين راحت
عزام فز ؛ ككيف مايدرون مو معهم هي وامي ؟؟
ابو راشد بخوف ؛ شلون مايدرون وينها وين مكانهم هم
تركي توتر ؛ الحريم كلهم مع بعض عند الغنم واروى تقول كانت عندها ولفت مالقتها
ابو راشد ؛ بسسم الله ياولد يمكن ضيعت نلقاها قريب اكيد امشو ندورها ومايصير شي ان شاء الله
توزعو العيال يدورونها وعزام راح يسأل امه
عزام ؛ يممه شموخ وين كانت
ام عزام ؛ كنا واقفين وهي عند اروى بجنب شبك الغنم وبعدين راحت مالقيناها
عزام ؛ يمكن رجعت للخيمه ماشفتوها ؟؟
ام عزام ؛ ييوه لاا ماشفنا الخيمه بس بعيده شلون راحت لحالها
عزام ؛ مدري برروح اشوفها هناك ولا لا
وراح يركض للخيمه والباقين يدورونها
ومن وصل عزام للخيمه وهو يشوف شريفه اللي فزت بخوف ؛ بسسم الله انتوا علامكم كلكم جايين تركضون
عزام وهو ياخذ نفس ؛ شريففه شموخ ماجت هنا ؟
شريفه اشرت له على شموخ ؛ الا هذي هي نايمه
عزام تنهد بتعب وجلس ؛ متى جت ليه ماقالت لهمم قاعدين يدورونها!
شريفه ضحكت من تذكرت ؛ جت عشان ملابسها غبار ومويا وقالت ماتبي تروح هناك
عزام قام ؛ الله يعين عليها ماعلمت احد بروح اقولهم انها هنا ، العنود نايمه ؟
شريفه لفت تناظرها وابتسمت ؛ ايي نايمه ماتصحى الا خمس دقايق باليوم
ضحك عزام وقرب يشوف العنود وباسها وابتسم وقام طلع يقول لهم ان شموخ بالخيمه وكانو جايين الحريم والرجال لما مالقو شموخ متوجهين للخيمه من قالت لهم ام عزام ان عزام راح يشوف اذا شموخ هناك ولا لا
عزام ؛ خلاص تعالو لقيتها داخل سبقتكم
ابو راشد ؛ الحمدلله ، عسى مافيها شي
عزام ؛ لا لا مافيها شي
ام راشد ؛ اجل بندخل وانتو روحو بنصلي وبعده نجهز العشاء
ابو راشد ؛ ايه يلا ياعيال صلينا
راحو العيال يتوضون وتركي يضحك بنفسه ؛ " الله ياشموخ من الخرشه مسكتي خط ووصلتي للخيمه وانتي ماتدلينها "، ومن خلصو اصطفو يصلون
اما ام راشد وام عزام والبنات دخلو للخيمه وهم يشوفون شموخ نايمه
الكل ؛ سلام
شريفه ؛ وعليكم السلام ، " وقالت بضحك " زين دخلتو صاحين احتريكم تجون ركض
ام راشد جلست ؛ كيف ؟
ام عزام ؛ شريفه شموخ متى جت ؟
شريفه ابتسمت ؛ تو قبل عشر دقايق ، تحسبونها ضاعت ؟
ام راشد ؛ ييوه والله قعدنا ندور بكل مكان اخرتها سبقتنا خوفتنا
شريفه تذكرت ؛ اروى يالمقروده وش مسويه بالبنت انتي وهاجر !
اروى انفجرت تضحك ؛ ييوووه فاتتك فحطت فيها
هاجر ؛ وطاحت لك اروى طيحه عضت الارض
عبير ضحكت ؛ مب صاحيات والله
شريفه بضحك ؛ والله ياحرام شموخ رايحه فيها
ام عزام ؛ مامداها نامت غريبه
ام راشد ؛ صحيها مو زين تنام هالحزة ، يلا يابنات خلونا نصلي عشان نسوي العشاء
قامت ام عزام لشموخ عشان تصحيها وقربت وهي تناديها ؛ شموخ قومي لاتنامين الحين .. شمووخ قومي
تحركت شموخ وهي تلف لأمها وقالت بصوت مبحوح ؛ ييمه شوي قايمه قايمه بس بردد
ام عزام ؛ لا دافي الجو اشوف " ولمست جبينها وكانت حرارتها مرتفعه " ييوه شموخ فيك حراره
اروى سمعتهم وقربت ؛ شموخ وش فيك ؟
شموخ ؛ الله يقلع عدوك غرقتيني بالمويه ومت برد
اروى جلست عندها وهي تشوف ملابسها بارده ؛ ييووه شموخ ملابسك ثللج
ام عزام ؛ قومي قومي عند النار تدفي لاتمرضين اكثر
قامت شموخ وجلست قريب النار عند شريفه
شريفه ؛ يبنات مامعكم لبس ثاني عشان تبدل فيهم شموخ؟
عبير ؛ لا والله ماجبت
اروى ؛ ولا انا
هاجر ؛ حتى انا
منيره ؛ حتى انا والله ، بس شوفو اذا فيه هنا شراشف ولا غطاء تدفى فيه
راحت هاجر تشوف وهي تلقى شرشف واخذته ولفته على شموخ اخذته شموخ وقامت تتوضى وهي ترجف من البرد وشافتها ام عزام وام راشد اللي جايين من برا
ام عزام ؛ يلا توضي وانتبهي لايبقى وجهك مبلول وانتي بهالبرد
ام راشد ضحكت ؛ ولاتضيعين
ضحكت ام عزام وهم يدخلون وشموخ مافهمت وطنشت وراحت تغسل وهي دايخه نوم وتعب
فكت نقابها وشعرها بعد ما ارخت طرحتها
وحطتهم على الحجر اللي كانت عند انبوب المويه وهي تتوضى وترجف برد
اما في خيمة الحريم بعد ماصلو قامت ام راشد وام عزام وعبير ومنيره يجهزون للعشاء
اما اروى وهاجر انسدحو حول النار عند شريفه
•
" قبل بدقايق عند خيمة الرجال "
نفس الوضع بعد ماصلو جلسو كلهم الا نايف وتركي قامو يجهزون اللحم للشوي وجتهم ام راشد بعد ماخلصت صلاتها عشان تسوي العشاء هي والبنات
ابو راشد ؛ لا لا ارتاحو انتو العيال يطبخونه
ام راشد ضحكت ؛ تركي ونايف والله ما اعتمد عليهم
نايف وتركي ناظروها بصدمه وضحك ابو راشد ؛ لا والله ماذقتي طبخهم محد يضبط لنا بالكشتات الا هم
ام راشد بضحك ؛ والله يخبصون بالمطبخ لاكن يمكن الكشتات غير يلا اعتمد عليهم؟
راشد ؛ ازهلي وانا اراقبهم وسعد يشرف
ضحكت ام راشد وهي ترجع للخيمه وقالت لهم ان العشاء يضبطونه العيال
وتركي ونايف سلمو الشوي لراشد وابو راشد وسعد وعزام يتفرجون عليهم حط تركي الرز بصحن ومده لنايف ؛ نايف خذ اغسله زين وهاته
نايف ؛ وش مشغول فيه انت
تركي ضحك ؛ عجزان
نايف اخذ الصحن وسحب تركي ؛ خلنا بس نروح وبنقول لأمي تعطينا غطاء برد
تركي ؛ ييوه مافيها خيمتنا ؟
نايف ؛ لا بس رح اغسل الرز بجيب شراشف
تركي ؛ لا لا انا بروح.. ضحك من سبقه نايف ركض للخيمه واتجه تركي يغسل الرز وهو يكلم نفسه ويضحك ؛ ياشينك يانايف ، خلني اشوف اللي هجت وبغت توصل لحدود ال... وقف بتناحه وهو يشوف شموخ جايه تمشي وهي تعدل نقابها وما انتبهت له ابتسم غصب عنه لما شاف لحافه على شموخ متغطيه فيه وهو يمشي بجهتها على اساس ما شافها ورفعت راسها شموخ وهي تشوف تركي جاي يمشي جهتها وما انتبه وناظرها وتنحنح ؛ ااء من شوي دورناك ماكنتي موجوده
شموخ عقدت حواجبها وهي تتلفت ماتوقعت انه يكلمها وعصبت وهي ساكته له من لما كانو عند الغنم
تركي ؛ لاتبردين " وضحك يلطف الجو " ولا تضيعين نفس قبل شوي
شموخ بعصبيه مكتومه ؛ شتبي الحين ؟ ترا ما احب كذا ابعد بالله
تركي انصدم ؛ للا ما اقصد شي ششموخ انا ...
قاطعته شموخ ؛ انا بروح وخر
ابعد تركي بضيق وكمل مشي للمويه وتعدت شموخ ومشت لخيمتهم ومن وصلت وهي تشوف نايف طالع ومعه شراشف وقالت بنفسها بأستهزاء ؛ " شرايك تجي تسولف بعد مثل اخوك الحمدلله والشكر "
ونايف انتبه لشرشف تركي اللي عليها وصد وتعدا لخيمتهم تأففت شموخ وهي تدخل للخيمه واشرت لأروى تجي عندها وقفت اروى وقالت ام عزام اللي جالسه هي وام راشد والبنات ؛ شموخ برد لاتطلعين تعالو هنا
شموخ تنهدت ؛ جايه يمه شوي
اروى مشت معها وقالت بهمس ؛ علامك منفسه؟
شموخ طلعت اروى معها ؛ بنجلس بمكان مافيه احد وين نروح ؟
اروى استغربت ؛ ليه ، سيارة ابوي هناك نجلس فيها ؟
شموخ هزت راسها ؛ تعالي لها واعلمك
راحو للسياره وتركي خلص غسل الرز واتجه لخيمتهم وهو يشوف نايف جايب الشراشف
نايف ؛ تركي شرشفك ماجبته تعال تدفى بهاذا
تركي ابتسم بضيق من تذكر شرشفه اللي على شموخ ؛ لا مافيه برد بسوي الرز ، حطيتو اللحم ؟
نايف ؛ اي هذا هو على المنقل
هز راسه تركي وهو يجلس ، زاد الحطب وركب الرز وقلب اللحم ورجع يجلس مع العيال
•
اما شموخ واروى راحو للسياره
شموخ وهي تسكر الباب ؛ متأكده مابيجي احد ؟
اروى ؛ بسم الله ابك علامك مثل من ؟
شموخ ؛ احد من العيال
اروى ؛ لا سكري الباب وانطقي وش صاير
شموخ ؛ وش السالفه كلكم تقولون لاتضيعين
اروى ضربتها بخفه ؛ الحين ساحبتني وانا احسب فيه مصيبه اخر شي تسأليني عن خمدتك وحنا نحسبك ضايعه
شموخ استغربت ؛ وشش السالفه قولي
اروى ؛ كنتي معانا لما رحنا الغنم صح ؟
شموخ هزت راسها بأيه وكملت اروى بضحك ؛ كنت اتفرج على الغنم وشفت وحده نسسختك يبنت ولفيت بوريك شبيهتك مالقيتك
ضربتها شموخ وهي تضحك ؛ كملي كملي وحسابك بعدين
اروى ضحكت وهي تكمل ؛ والله والا التفت مالقيتك وانا اسأل هاجر والبنات وامي وامك ولا احد شافك
وجلست ادور حول الشبك ودخلت الا القى تركي وسألته وش يسوي قال يحسب الاكياس وسألني وش اسوي قلت ادورك وانك ضايعه ويروح يقول لعزام ودورنا عليك كلنا وعزام راح يشوف الا طلعتي بسابع نومه بالخيمه
شموخ بصدمه ؛ كل ذا صار وانا نايمه ؟ وليه ماحسيت محد صحاني
اروى لمست خد شموخ ؛ لأن شكلك للحين تعبانه
سكتت شموخ وهي تقول بنفسها ؛ " والملقوف ذا اللي اسمه تركي وش يبي يروح يعلم عزام "
قاطعت افكارها اروى ؛ والحين جايبتني هنا بس عشان كذا ، ورا ماسألتينا بالخيمه
شموخ بهدوء ؛ لا بقولك شي ، بس امانه بيني وبينك ..... او شرايك فالبيت فالبيت مو وقته الحين
" وقربت بتنزل ومسكتها اروى "
اروى ؛اجلسسي بيني وبينك والله والا وقته وش فيك
شموخ ؛ شي عن تركي
اروى بأستغراب ؛ علامه ؟
شموخ ؛ اسمعيني وبس ولاتفهميني غلط
اروى ؛ اسمعك ماعليك
شموخ ؛ تذكرين لما كنا بالدوانيه وجا تركي ؟
اروى هزت راسها بفهم وكملت شموخ ؛ احس انه شافني ووقتها قعدت افكر وبعدين طنشت واليوم لما قلتي اني اختفيت كنت انا الغبيه متخبيه ورا الجدار وعلى اساس تتعدين انتي واخوفك واخذ حقي من سواتك وحذفتك لي وانا الغبيه سمعت صوت احد جاي وتوقعته انتي واتخبى اكثر والا يمر تركي واخرشه
طارت عيون اروى بصدمه وكملت شموخ بتوتر ؛ احسبه انتتي والله وهو يخاف وانا اخاف وانحشر بمكاني ماتحركت ووقالي " سكتت وهي تتنهد بخوف "
اروى شهقت ؛ حسبي الله عليك ياتركي وش سوى اصدميني ، وبعدين قلت لك وقتها انه ماشافك كنتي ورا الباب
شموخ ؛ مدري ان شاء الله المهم قالي اروى هناك يا الشموخ روحي لهم لاتجين هنا لحالك تضيعين
اروى تنهدت بتوتر ؛ يققلع بليسك وش صار يعني عادي ... لحضه وش يبي يقول يا الشموخ
شموخ ضربتها بخفيف ؛ وشش وش صار ليه يقول اسمي كذا وشلون عرفه
اروى ؛ ليه يقوله كذا معك حق بس وشلون عرفه مافيها شي انا لما سألني وش ادور قلت له شموخ مالقيتها يعني يعرف اسمك وترا اسم عادي انا من كثر ما اروح السوق نص اهل الديره يعرفون اسمي اذا مو كلهم حتى عمي مرزوق يعرفه " صاحب البقاله "
شموخ ؛ ييربيي اروى افهميني تكفين ، وازيدك من الشعر بيت بعد ؟؟
اروى ضحكت ؛ زيديني
شموخ ؛ تو قبل شوي كلمني
اروى عقدت حواجبها ؛ شعنده تريكي صاير ماش ، وش قال
شموخ ؛ كنت جايه من جهة المويه وهو مدري وش يبي جاي وشافني وانا معديه من عنده وقال
" قلدت كلامه بأستهزاء " قبل شوي دورناك ماكنتي موجوده لاتبردين وتضيعين نفس قبل شوي انننن يققهر
اروى ضحكت ؛ يراسي منكم وش قلتي له
شموخ ؛ قلت له شتبي الحين ترا ما احب كذا ابعد بالله قال لا ماقصدي شي شموخ انا وماخليته يكمل طنشته وقلت انا بروح وخر وبعد وخليته
اروى ؛ الله ياخذ العدو ليه ماخليتيه يكمل وش كان بيقول
شموخ بصدمه ؛ ارروى تكفييين وش اخليه يكمل والله قاهرني هو كذا ولا وش يبي ؟
اروى ؛ لا والله تركي عاقل شوفي على انه حمار بس والله مؤدب مايسوي هالحركات " وشهقت وهي تستوعب "
شموخ خافت ؛ وش فيك
اروى ضحكت ؛ لحضه شموخ هو لما قالك شموخ انا وماخليتيه يكمل ، ليكون بيقول انا احبك
ضحكت اروى اكثر من شهقت شموخ ؛ ييويلي لللااا وش انتي نفس اخوك وخخري وخري
ومسكت الباب بتنزل وسحبتها اروى ؛ شموخ شموخ تكفين اسمعي
شموخ بضيق ؛ اروى تكفين خلاص عاد
اروى استغربت زعلها ؛ امزح طييب اجلسي اجلسي بقولك
رجعت شموخ وهي تلتفت لأروى ؛ قولي
اروى بهدوء ؛ شوفي ترا مافيها شي على اني مصدومه ان تركي سوا كذا بس ماتدرين يمكن حبك يبنت مافييها شي
شموخ ؛ الا فيها
اروى ضحكت ؛ يزيينكم والله احس لايقين على بعض وش فيها اذا تزو... قاطعتها شموخ بقهر ؛ فيها اني مخطوبه يا اروى !...

🏃🏻‍♀️🏃🏻‍♀️🏃🏻‍♀️