ياديرةٍ ضمّت كل الأحباب

Part 34

صلوا على النبي ولاتنسون التصويت ❤

..........••..........
نرجع لمحاسن الصدف
قبل كم ساعه بالمزرعه
عند تركي اللي وقف وهو متشقق من الفرحه وعلى طول فتح درج السياره وهو ياخذ الورقه ويفتحها بسرعه وبدأ يقرأ ببتسامه ؛ اول شي وبدون لا اقول اسمي وبتعرفني لو ماتحب الا انا ، او مابي اكتب اسمي او اسمك انا اعرفك وانت تعرفني لاكن انا اسفه لو تحبني وزعلت بسبتي .. ولو للحين مانسيت حبك حتى لو اني مخطوبه ابي اقولك اني على خطبتي مو موافقه واذا تبيني صدق لا تنساني ..
تركي كان يقرأ ومع كل كلمه تزيد ابتسامته اكثر وتنهد من قراها كلها اول شي استغرب انها تقول مابتكتب اسمها بس توقع انها كاتبتها من زمان وتو قدرت تعطيه وقال بأبتسامه خفيفه ؛ لو ماتحب الا انا !! والله انك كل شي احبه وببقى احبه وماني بناسيه وتنهد وتذكر اغنيه حس انها توصف حاله وتمثل شعوره الحين وشغلها وبدت كلمات الأغنيه ؛
كلام البارح اتغير .. وصار اليوم شي ثاني
وضِح له الحب واتأكد .. وصالحني وراضاني
وكلمته انا كلمه .. سريعه في منتهى الغفله
ووقف الأغنيه من دق جواله وهو يشوف الأسم ؛ يااحيه والله بوقتك وكنك حاس
ورد وهو مبتسم ؛ يامرررحبببا
عيسى اللي دق وكان خايف بس ارتاح من صوت تركي وابتسم ؛ ارحب ياعين اخوك ، وش اخبارك
تركي ؛ بخييير يوم سمعت هاللصوت
عيسى ضحك ؛ بالله ؟ .. والله من صوتك الحمدلله الأوضاع طيبه
تركي ابتسم ؛ والله انها طيبه وزود بعد
عيسى بتردد ؛ كلمتها ؟
تركي رجع يشغل الأغنيه ويسمّعها عيسى ؛
وكلمته انا كلمه .. سريعه في منتهى الغفله
ووقف تركي الأغنيه وعيسى فهم عليه وضحك ؛ وطمنتك الكلمه ان شاء الله ؟
تركي ابتسم بتنهيده ؛ اي والله اني تطمنت
عيسى ؛ وشلون كلمتها وين لقيتها
تركي ؛ اا كانتت طالعه ولقيتها بالبقاله
عيسى بأستغراب ؛ لحالها
تركي توهق ؛ للا لا اا معها اروى بس كانت بعيده وانا كلمتها لحالها
عيسى ؛ ووش تقول
تركي ؛ ابد تقول انها مب موافقه على خطبة ولد عمها وبترفضه واخطبها انا
عيسى ؛ غريبه ! متأكد
تركي ؛ ايه ايه يبن الحلال ماتبيه متأكد
عيسى بأستغراب ؛ كيف ! هو مو على اساس انها ماتحبك وماتبي تكلمك وشلون رضت
تركي شد على اسنانه بنكبه وهو يحس ان وش ماقال بينقفط هو واروى ؛ يياخي عاد رضت واقتنعت يمكن كانت تفكر ودرت اني ابيها
عيسى ؛ اخطبها قبل يمشون اجل
تركي ؛ عيسى عقلك فيه شي ؟ اقولك امي تدري انها مخطوبه بس ماتدري انها مو موافقه بتقول وش دراك
عيسى ضحك ؛ ايه صح ، الا هات البشاره
تركي ؛ ابشر وش !
عيسى ؛ هالأسبوع آخر دوام بعدها اخلص اوراق التخرج وارجع
تركي ؛ احللف ! يعني نقول اسبوعين بالكثير ؟
عيسى ؛ لا شفت اليوم اداوم والسبت اخر دوام رسمي بعدها الأسبوع الجاي عندي اختبار اخلصه واجهز الأوراق واجي يعني ٣ اسابيع بالكثير بس مو اكثر من شهر ان شاء الله
تركي ابتسم ؛ يييوه مابغت ٥ سنين اشتقنا والله
عيسى ؛ الحمدلله والله وانا بعد اشتقت لكم وللديره وللرياض كلها
تركي بأبتسامه ؛ ياحبيبي ... ووينك الحين ؟
عيسى ؛ بالبيت
تركي ؛ ماعندك دوام ؟
عيسى ؛ شوي الساعه ٥ ونص قمت من النوم وتذكرتك قلت ادق اشوف وش صار عليك
تركي ؛ اووه ياعين اخوك مانسيته
عيسى ؛ لاا والله مانسيتك .. المهم بروح الحين وكلمني لا صار شي
تركي ؛ ابشر والله يوفقك وانتبه لنفسك
عيسى ؛ وانت بعد يلا فمان الله... وقفل وابتسم تركي وهو مرتااااح ونزل يشتغل بالأحواض والزرع ويسقيه بذمه وضمييير وشاف العنب وبدأ ينقي لأروى
..........••..........
ديرة ابو صالح
بمجلس الرجال في بيت راجح
بعد السوالف واخبارهم وقف راجح ؛ اجل انا بسلم على ام هادي وشهد
محسن ؛ اييه وانا ماسلمت عليهم يلا مشينا
ابو هادي وقف معهم وابتسم ؛ وانا معكم بسلم على عمتي ام طلال انا والعيال
محسن طلع ؛ يلا مشينا
ومشوا راجح ومحسن وابو هادي والعيال هادي وحمد وخوالهم طلال ومحمد ، اما سامي طلع قبل دقايق لبيته قال بيريح
•
بيت ابو طلال
بصالتهم كانو مجتمعين ومرام جتهم ومعها بناتها وروان كانت نايمه عند امها هي واميره ومعهم بناتهم وككلهم بالصاله وطق باب الحوش ونادى محسن ؛ طريق طريق
مزنه قامت وهي تاخذ عصاها ؛ الظاهر معه ابو هادي عطيني عطيني شرشفي يالأميره
اميره ابتسمت وهي تاخذ جلال امها وحطته عليها وقالت مزنه ؛ ادخلن داخل يمكن يدخل
وقاموا البنات وام هادي لبست عبايتها تتوقع ان سامي معه
ووقفت مزنه عند الباب ؛ ادخلوا ماقدامكم احد
محسن ؛ معي ابو سامي وابو هادي وعياله
مزنه ؛ حياكم تفضلوا
وعدلت جلالها على راسها ودخل محسن واللي معه
راجح ؛ صبحهم الله بالخيير
مزنه ؛ صبحك الله بالنور يبو سامي ، يالله حيّ ابو هادي
ابو هادي تقدم وهو يسلم عليها ؛ الله يحييك شلونك ياعمه
مزنه ؛ بخيير ونعمه وشلونك انت
هادي قرب وهو يبوس راسها ؛ ارحبي ياجده وشلونك عساك طيبه
مزنه ابتسمت وهي تسلم عليه ؛ ياهللا بالرضيّ بخير عساك طيب
وام هادي قربت لأبوها وهي تسلم عليه وتبوس راسه ؛ وش اخبارك يبه
محسن ؛ يالله حييهم
وتقدمت لراجح وهي تبوس راسه وقال وهو يسلم عليها ؛ يامرحبا يالله انك تحييهم
ام هادي ابتسمت ؛ الله يحييكم ويطول لنا بأعماركم
محسن ؛ وين شهد
ام هادي ؛ دخلت والله ، ياشهد تعالي
وطلعت شهد من غرفه كانت وراهم وابتسمت من قالو محسن وراجح مع بعض ؛ ياهلااا
وضحكت وهي تشوفهم واقفين عند بعض وماتدري من تسلم عليه اول ومثل حركتها من وهي صغيره اذا احتارت بينهم تقرب وهي تحضنهم مع بعض وضحكوا الكل وهم يذكرون حركتها اللي يحبونها وقال راجح وهو يضحك ؛ يامرحبا بالغاليه
محسن وهو مبتسم ؛ يالله حيها
وبعدت شهد وهالمره سلمت على محسن اللي كان يمينها وباست راسه ويده ومن بعدها راجح نفس الشيء
محسن بأبتسامه ؛ وشلونك
شهد ؛ الحمدلله وش اخباركم انتوا
محسن وراجح ؛ الحمدلله
والتفت ابو هادي لحمد ؛ سلمت على جدتك ؟
حمد ابتسم ؛ ايه جيت قبل شوي يوم وصلت امي وشهد
ابو هادي هز راسه وقال محسن ؛ الليله عشاهم يأم طلال والعشاء عندك والبنات يطبخونه
مزنه ؛ ابشر يستاهلون
راجح ؛ ماقصرتي وبيضّ الله وجهك
مزنه ؛ وجهك ابيض ابد تبشرون
محسن ؛ اجل ولمّوا اغراضكم من العصر والناس بنعزمهم بعد شوي
مزنه هزت راسها ؛ ان شاء الله
وطلعوا محسن وراجح وابو هادي وقبل لايطلعون هادي وحمد نادت ام هادي ؛ هادي خلك انت وحمد
اما طلال ومحمد اللي اصلاً جلسوا لأن مافيه احد غريب خواتهم وبنات خواتهم
هادي ؛ هلا يمه
مزنه ضحكت ؛ ماسلمت على خالاتك
هادي ابتسم وهو يرجع يدخل ؛ اي والله نسيت
حمد ؛ ام راكان وام حور هنا ؟
مزنه ؛ ايه مرام جت قبل شوي واميره نايمه عندنا هي وروان
طلال ضحك وهو يلتفت لشهد ؛ انتي ليه دخلتي معهم
محمد ؛ اي والله استغربت انها داخل ماعندها احد غريب
شهد ضحكت ؛ والله مدري قاموا وقمت معهم
ام هادي ضحكت ودقت باب الغرفه ؛ تعالوا سلموا على هادي وحمد ياخالاته
وطلعوا مرام وروان واميره وسكروا الباب وراهم لأن البنات داخل
مرام ابتسمت ؛ السلاام علييكم
هادي التفت ؛ ياهلا وعليكم السلام
وسلم عليها وعلى روان واميره وحمد سلم على مرام واميره لأنه سلم على روان
وقال هادي بضحك ؛ مسلّم على الكل انت
حمد ضحك ؛ لا خالتي مرام واميره ماسلمت عليهم
مزنه ؛ صبي لهم قهوه ياشهوده
وصبت لهم شهد قهوه وضحك حمد ؛ اختي مكروفه مثلي
الكل ؛ هههههههههههه
ام هادي بضحك ؛ وشو كرفه كلها قهوه
طلال ؛ عز الله ماشفت الكرف اصبر الوعد العصر من يوم ماقال ابوي خذ حمد والعيال تراه حوّل عليك
حمد ضحك ؛ يييوه علمني راجح وجا دور محسن
مزنه ؛ ماعليه ياعوينتي لازم تتعلم كل شي عشان وقت الشده مايقولون الا حمد
حمد خبط على كتف هادي ؛ هادي عندكم
محمد ؛ خلصنا منه وتعلم باقي انت
شهد ؛ وانا الحمدلله ماني مع الحسبه
مزنه ضحكت ؛ انتي الذبيحه الليله طبخها عليك
ضحكوا وقالت مرام ؛ لا لا شهوده مهي مع حسبة المكروفين
شهد ؛ شفتوا ، مع اني فنانه بالطبخ بس عاد مو ذبيحه
ام هادي ضحكت وهي تناظر اميره ؛ نفس خالتك
طلال ؛ ايه الصغيره هذي مدلعه مامن طبخ
اميره ضحكت ؛ وانت وش حارق رزك ماتذكر طبخي اللي محد ياكله كثرك
محمد ؛ عاااد الا اميره والله انها طباخه
روان ؛ افا وانا ومرام ومريم نسيتونا
طلال ؛ مريم من زمان عن طبخها لازم تطبخ واقيم
محمد ضحك ؛ لا يشييخ
حمد ؛ مانفخ هادي وابوه الا طبخ مريم
ضحكوا وقال هادي ؛ والله ماني سمين
مزنه ؛ اي والله وش زينك
شهد ؛ جده والله انه سمنان
محمد ؛ اييه اشوف حمد نحيف شكلك آكله بعد
مزنه ضربت فخذه بالعصى بخفه ؛ اقولل والله كلهم بسم الله عليهم احفادي بنات وعيال كل واحد يقول الزين عندي
محمد وهو يأشر على ولد روان الصغير اللي كان يلعب بالكاسات ويحوس ؛ وهذا من الحسبه ؟
روان شهقت وهي تضحك ؛ انتببه عاد الا نيوف
طلال ضحك ؛ وش نسوي فيه لا اله الا الله عليه مايقعد
مزنه ضحكت ؛ صغيير خلوه
شهد مسحت على راس ولد روان وهي تضحك ؛ اي والله ياجده تشوفين عيالك وعيال بنتك حتى البزر ابو ٤ سنين ماخلوه
حمد ؛ هادي تشوفها كنها تبرت منا ؟
هادي ؛ حتى انت مثلها مالك صاحب
شهد ضحكت ؛ ماتبريت منكم بس هذا الصدق
طلال وهو يعاندها بمزح ؛ والله عيال اختنا احسن من بنتها متغيره بنت المدينه
محمد ضحك وهو يقلد ؛ اشبناا يهوه تغيرتي ايش غيرك !
الكل ؛ ههههههههههههههه
حمد ؛ مضيع ياخال هذي جده
طلال ؛ لا اتفق مع اخوي حتى الحجاز كذا
شهد التفتت لحمد وهادي ؛ بالله كيف كلام الديره ذكروني ؟
محمد ضحك ؛ تراك بنتها
شهد ؛ الله الله ! صرت بنت الديره ماكنت بنت المدينه ؟
مرام ؛ انتوا تسوون فريق وتقلبون على بعض حددوا من مع من
طلال ؛ انا مع اخوي
حمد ؛ وانا مع اخوي واختي
ام هادي ضحكت ؛ اييه زين وقت الصدق مع بعض
محسن دخل وهو ينادي ؛ ولدد
طلال فز ؛ سم
وقامت مرام وهي تبوس راسه ؛ صباح الخير يبه
محسن ؛ هلا هلا بأم راكان وشلونك وانا ابوك متى جيتي ؟
مرام ؛ بخير ، والله جيت قبل شوي وش اخبارك انت
محسن ؛ الحمدلله
والتفت على طلال والعيال ؛ وين غديت انت وياه
طلال تنحنح ؛ اخذتنا السوالف
محسن ؛ الله واكبر قاطن عمرك انت وياه مشينا عند الغنم
مزنه ضحكت ؛ خلنا مبطين عن بعض
محسن ؛ هادي وحمد يبيهم ابوهم
حمد ؛ ياجد اللي يبينا راجح
محسن ضحك وقال وهو طالع للحوش ياخذ اغراض من المخزن ؛ ايه بيشّغلك هاللحين
محمد بهمس ؛ قم قم رح وخلنا نجلس مع خواتنا وبناتهم اللي منحشرين داخل عشانك انت واخوك
حمد ؛ ايه اجحد الحين هاه
هادي ؛ حتى حنا نبي نجلس مع جدتي وخالاتنا
طلال ؛ لاحق لاحق رح وسد مكانّا انا يكفيني العصر بكرفه
محمد ؛ وانا عارف شغلي بجيب الأغراض واشيل واحط خلوني اريح
حمد جلس قدامه ؛ اجل سو شماغي لفه عصبه عشان لايطيح معرف اسويه
طلال ضحك بصدمه ؛ اعقبب ماتعرف
هادي ؛ ويزعل لاقلنا له ورع
مزنه ؛ يوليدي ! ماتعرف تنسف شماغك
حمد ؛ لا والله يامزّونه اعرف انتسف بعقال راجح لاطاح الشماغ وطلع الشعر وهو قايل حلّقه
محمد ضحك وهو يسويه ؛ والله مالومه مخلي شعرك كذا شوي وتربطه
طلال وهو يمسح راسه ؛ شف شف انا محلقه ماعمره وصل لأذني
محمد ؛ ايه يمعطها محسن
طلال ؛ مجرب انت كل يوم وهو ماعط اذنك ولا تفهم
محمد ؛ انا شعري خفيف ماداني احلقه لاكن حمد زودها شوي
مزنه ؛ اي والله وانا جدتك مخليه طويل هللون ترا بحنيه
طلال ضحك بقوه ؛ يييوه يالحنا هذا شعر محمد يابس
محمد ضحك ؛ الله يسامحك يايمه ليتك محلقته صفر
وضحكوا وقام حمد وهو يحط عقاله ؛ هذا خلوه امحط فيه ابو صنادح لا جيت
محمد ضحك ؛ طلاللل عزالله الصنادح والثعلبه بعد
طلال ضحك ؛ هين تجي تجي يبو عصبه ومن زين قشعتك انت
وضحكوا وطلعوا حمد وهادي وهم يضحكون وقال محسن وهو يطلع من المخزن ؛ وين طلال ومحمد
هادي ؛ داخل ياجد شغلهم العصر
ضحك محسن وهو يطلع وهم وراه
وداخل نادى طلال بضحك ؛ تعالوا ياعين خالكم راحو العفاريت
طلعوا البنات وهم يضحكون وقال محمد ؛ اي والله وجت الملائكه
وضحكوا وسلموا على بنات مرام وروان واميره
طلال ؛ اخبارك يانجوله انتي وغلا
نجلاء ؛ بخيير ياخالي
غلا ؛ الحمدلله
طلال بأبتسامه ؛ وريومه وخواتها
ريما ابتسمت ؛ بخيير كلنا
طلال ضحك ؛ وبنات الأميره ؟
اميره ضحكت ؛ الحمدلله كلهم بخير
محمد التفت لخواته ؛ عيالكم ورا مايجلسون انا بفهم
مزنه ضحكت ؛ كبار كبار كل واحد خوي ابوه
محمد ؛ يعنني الله يالدنيا يوم ندخل وهم يتهاوشون هنا
روان ضحكت ؛ وعشان كذا يروحون احسن
مرام بضحك ؛ انت انت وين عيالك دام عيالنا يعنني
محمد ؛ والله عيالي مع امهم مهو مثل عيالكم مع ابوهم انا متميزين
ضحكوا وقال طلال ؛ عيالنا اكبر انتوا للحين بزارين
ريما ؛ الا صدق مابيجون ؟
محمد ؛ الا على العشاء الليله
طلال ؛ ايه اكييد لازم نتجمع
روان ؛ امس ليه ماجيتوا
محمد ؛ رقدنا ماجيتي الا بالليل
اميره ؛ لا انا اللي جيت متأخر حور كان عندها موعد
طلال ابتسم بحنيه وهو يمسح على راس حور اللي منسدحه على رجول الجده مزنه ؛ ياحبيبة خالها
مزنه ؛ ماعليها شر ان شاء الله اجر اجر كله
اميره هزت راسها بضيق وقال محمد يغير الموضوع من شاف ضيقها ؛ االا من بتستلم الكرف الييوم
روان بضحك ؛ ااانننتت
الكل ؛ هههههههههههه
محمد ؛ ايوالله اني بكرف لاكن متعود بس العشاء بتطبخونه وبتجهزون قهوة الحريم وتضيفونهم
مزنه ؛ ايييه الا هاتوا زل نفرشهم بالحوش المجلس للحين يسوونه العمال
طلال ؛ يهالمجلس اللي عيا يستوي لو درينا ماعدلناه
محمد ؛ ماعليه يزين نبي ناخذ من سرور فرشات
ام هادي ؛ الا الزل تنفع للبيع ؟ يعني اللي يبيعها ماشي شغله
طلال ؛ ايه بعزايمهم ياخذون منه
ام هادي ؛ زينن عشان محل حاتم بيحطه اثاث وزل
محمد ؛ بسوق المحاسن ؟
ام هادي هزت راسها ؛ ايه ماعندهم
طلال ؛ ايه بيمشي ماعندهم بسوقهم محل زل
ام هادي ؛ وسرور هذا وين سوقه ؟
محمد ؛ بسوق الزل اللي قبل لاتدخلين ديرتنا بشوي فيه اكثر من محل وسرور محله داخله حلوه فرشاته
مزنه ؛ الله يرزقه ازين ما اختار وسوق ديرتكم عزالله انه احسن سوق ماشاءالله
شهد ؛ ايييه ياجده يهبل كل المحلات فيه
محمد ؛ رحتي له ؟
شهد ضحكت ؛ اييه
طلال ؛ ووينه محلكم بانينه ولا شارين ؟
شهد ؛ لا شاريه وكان محل مكتوب على لوحته ابو فارس للأقمشه والملابس الجاهزة
محمد صفق بيده بضحك ؛ ول ، هذا محل امي اللي ماتاخذ الا منه سكرتوه
مزنه ضحكت ؛ الله لايخسر والله ان ثوبي هذا منه علامكم عليه
ام هادي ضحكت ؛ والله انه هو عارضه للبيع وشريناه
مزنه ؛ لو تفتحونه من جديد والله تكسبون احسن محل ملابس هو
ضحكت ام هادي وشهد جلست تسولف لهم عن الديره ووش حبت مع انهم كلهم عارفين محاسن الصدف واسواقها بس بيشوفونها من منظور شهد اللي توصفها بكل حب
°° ( تعرييف مهمم عن احفاد واولاد بيت الجد محسن والجده مزنه )°°
(( اول شي ام هادي مريم الأكبر وعيالها معروفين ))
(( بعدها طلال اللي عمره ٤٥ وعياله جابر ١٩ سنه وسعود ١٨ سنه وكيان ١٦ سنه وبنته جوان وولده جمال توأم ١٣ سنه ))
(( بعده محمد ٤٣ سنه وعنده ايلاف ١٦ سنه وولده حسام ١٥ سنه وعبدالعزيز ١٣ ومنصور ١٠ وايلان ٨ سنوات ورفيف ٥ سنوات ))
(( بعده مرام ٤٠ سنه وعندها نجلاء ١٩ سنه وغلا ١٧ سنه وراكان ١٤ سنه وفارس ١٢ سنه ويوسف ٩ سنوات ))
(( بعدها روان ٣٩ سنه وعندها ولدها عمر ١٩ سنه وريما ١٨ سنه واحمد ١٢ سنه وبنتها نور ١٠ سنوات وأمجاد ٧ سنوات ونايف ٤ سنوات ))
(( بعدها اميره ٣٢ سنه اصغر وحده وعندها حور ١١ سنه " من ذوي الاحتياجات الخاصة " وحنين ٧ سنوات ومها ٤ سنوات وريم سنتين ))

... تركت لكم تعريفهم اخر شي عشان تركزون فيه ولا تتلخبطون ، البارت الجاي بيعجبكم تفاعلوا اذا تبون انزله بأسرع وققت 🔥🔥