ياديرةٍ ضمّت كل الأحباب

Part 23

..........••..........
في بيت ابو راشد
قبل ساعه
دخلوا عزام ونايف للدوانيه ولقوا تركي اللي ماصدق يجي نايف وقعد يسأله عن دوامه ويسولف له
نايف تذكر ؛ ايييه شفت ابو هادي ؟
تركي ؛ منهو ذا
عزام ؛ اللي جا قبل اسبوع وبيسكن بالعماره
تركي ؛ ايييه وش فيه
نايف ؛ جا هو واهله قبل شوي شفناهم
عزام ؛ وعياله هادي وحمد معه
تركي ؛ وش كبرهم
نايف ؛ هادي يمكن كبري وحمد اصغر بكم سنه
تركي ؛ يعزمهم ابوي اكيد ونعرفهم
•
برا عند ابو راشد اللي جا هو والعيال وشاف عمارة ابو هادي والسيارات اللي عندهم ووقف وهو ينزل والتفت لراشد وسعد اللي وقفو معه ؛ ابو هادي شكله جا
سعد وهو يشوف السيارات عند عمارته ؛ ايييه شكله تو جا
راشد ؛ ماشاءالله الظاهر انهم كثار
ابو راشد ؛ اييه ادخلوا ادخلوا
دخلوا للدوانيه وابو راشد شاف تركي ونايف وعزام ؛ جارنا سكن عمارته شفتوه ؟
عزام ؛ ايه قابلناه يوم جينا وسلمنا عليه
ابو راشد ؛ متى جا
نايف ؛ توه قبل نص ساعه
ابو راشد هز راسه وطلع برا الدوانيه وهو يدق على ام راشد وردت وهي بالمطبخ ؛ هلا
ابو راشد ؛ ابو هادي اللي قلت لك عنه جا قبل شوي
ام راشد ؛ ماشاء الله سكنوا ؟
ابو راشد ؛ ايه الظاهر ، شوفي الغداء زودوه عشان نحط لهم منه
ام راشد ؛ ابشر وش كثرهم ؟
ابو راشد ؛ والله مدري يمكن واجد ٣ سيارات عند بيتهم حطي لهم بالصحن الكبير
ام راشد ؛ ان شاء الله نص ساعه ويخلص
ابو راشد ؛ طيب ... وقفل ورجع يتوضى عشان يصلون الظهر
•
•
عند البنات داخل كانت ام راشد وهاجر بالمطبخ والباقي بالصاله
قفلت ام راشد وقالت هاجر ؛ يمه مين اللي سكنوا ؟
ام راشد ؛ شفتي العماره اللي قدام البيت ؟
هاجر ؛ حقت ابو جابر ؟
ام راشد ؛ اي بس باعها لواحد وجو اليوم هو واهله
هاجر ؛ وابوي وش يقول
ام راشد ؛ بنحط لهم من غدانا ونرسل لهم صحن
هاجر ؛ اي بس مانعرفهم
ام راشد ؛ ابوك شاف الرجال الأسبوع اللي طاف وعزمه بس راح لديرته وتو رجع
هاجر هزت راسها وهي تكمل تشتغل وجهز الغداء وحطوا لأبو هادي صحن وطلعت ام راشد للدوانيه
ام راشد ؛ الغداء استوى من يودي صحن جارنا
ابو راشد التفت للعيال ؛ واحد يقوم معي نوديه ونسلم عليه
راشد قام ؛ يلا انا معك
وطلعوا واخذ راشد الصحن وراحو لبيت ابو هادي مشي مايبعد عنهم الا كم خطوه
وام راشد كملت تحط غداهم وغداء العيال
..........••..........
بيت ابو هادي
طلعوا هادي وحمد من عمارتهم وهم يشوفون ابو راشد وراشد قربوا وولا واحد قد شاف الثاني ابو راشد توقع ان هذولا عياله او من قرايبه لأن يدري لسى محد استأجر عندهم وهادي وحمد توقعوا انه ابو راشد لأنه طلع من بيت ابو راشد واللي معه اكيد مو غريب اللي هو راشد
ابو راشد قرب يسلم عليهم ؛ السلام عليكم
هادي وحمد ؛ وعليكم السلام
راشد حط الصحن بالأرض وهو يصافحهم ؛ عيال ابو هادي ؟
هادي ؛ ايه انا هادي ولده وهذا حمد ، انت ابو راشد ؟
ابو راشد ؛ يامرحبا والله ، ايه انا ابو راشد وهذا راشد ابوك موجود؟
هادي ابتسم ؛ تشرفنا ، ايه بس والله تو نام
ابو راشد ابتسم ؛ ماعليه خله يرتاح ... هذا غداكم وسامحونا على القصور وسلم على ابوك
هادي توهق ؛ لييه الكلافه ياعم
ابو راشد ؛ لا كلافه ولا شي هذا واجبكم وبالعافيه
هادي ؛ ماقصرت ... ااء اقلط اقلط تقهو حياك الله
ابو راشد ؛ المره الجايه ان شاءالله ارتاحوا و بلغ ابوك اني احتريه في بيتي تزورونا
هادي ؛ ان شاءالله
ابتسم ابو راشد وراح هو وراشد للبيت وهادي شال الصحن ودخل هو وحمد اللي قال ؛ هم من متى يعرفون ابوي ؟
هادي ضحك ؛ مدري انا ماعرفت وش اقوله وانا ماعرفه
حمد ضحك ؛ فكونا من الفرفره
ضحكوا ودخل هادي وشهد تو طلعت من الغرفه وجلست تشغل التلفزيون ومن شافتهم استغربت ؛ ماشاء الله بذا السرعه لقيتوا !
ام هادي جت
هادي ؛ ابو راشد جابه
شهد ؛ جارنا ؟
حمد ؛ ايه طلعنا الا هو جاي هو وولده راشد ثاني غير اللي سلمنا عليهم قبل شوي
ام هادي ؛ ييوه فشله كان قلت ماتقصر
هادي ؛ والله قلته بس لزم وقال نحتريكم تزورونا
شهد ؛ متى ؟
حمد ؛ ماقال متى بس مب اليوم اكيد
ام هادي ؛ ما سأل عن ابوكم ؟
هادي ؛ الا قلنا تو نام
شهد غمضت عيونها بفشله ؛ اببوي تتو طلع من الحمام مانام للحين
حمد مسك راسه ؛ كله من هادي
هادي ؛ وانا وش دخلني ما اعرف اتعامل مع الشياب
ام هادي ضحكت ؛ خلاص مايخالف خلوني اناديه يتغدى قبل ينام
ودخلت وهي تضحك منهم ولقت ابو هادي ينشف شعره وهي تقوله اللي صار
وهادي وحمد راحوا لغرفهم يبدلون وشهد تجهز الغداء واجتمعوا يتغدون وهم دايخين من التعب
..........••..........
بيت ابو راشد
بعد الغداء بالدوانيه كانوا جالسين ونايف يسولف لهم عن دوامه وهم يسولفون له عن المحل ووش صار اليوم ودق جوال ابو راشد وسكتوا ورد ابو راشد ؛ هلا ومرحبا
مساعد ابتسم ؛ السلام عليكم
ابو راشد ؛ وعليكم السلام ياهلا
مساعد ؛ وش اخبارك عساك طيب
ابو راشد ؛ بخيير والحمدلله ، وشلونك انت
مساعد ؛ الحمدلله بخيير وعافيه ، دقيت اعزمك انت واهلك على العشاء عندي الليله لأبو هادي وحياك الله
ابو راشد ابتسم ؛ الله يبقييك ان شاءالله نجي ، انت من متى تعرفه ؟
مساعد ابتسم ؛ من قبل لا اسكن هالديره وهو خويي واعرفه بالمدينه وجيت هنا عشان شغلي وعاد هو بعد جا عشان شغله
ابو راشد ؛ ايييه الله يوفقه
مساعد ؛ اجمعين يارب ، يلا الليله نشوفكم ان شاءالله
ابو راشد ، ان شاءالله .. مع السلامه
وقفل وقال ؛ الليه مساعد عنده عشاء لأبو هادي
راشد ؛ ابو هادي اخوه ؟
ابو راشد ؛ لا خويه يعرفه من المدينه وجا هنا يشتغل
سعد ؛ وش شغله ؟
ابو راشد ؛ والله مدري ماسألته ، نروح كلنا ولا احد عنده شغل ؟
راشد ؛ لا والله ماعندي شي
سعد وتركي ؛ وانا بعد
نايف ؛ انا والله شوي مصدع باخذ لي غطه ان ماخف الصداع ماني رايح
ابو راشد ؛ وانت ياعزام
عزام ؛ ماعندي شي ، بس والله ماعرفهم واجد مساعد يادوب تو عرفته وابو هادي ما اعرفه الا سلام
ابو راشد ؛ نتعرف عليه كلنا مانعرفه واجد لازم تروح
عزام ؛ خلاص ابشر
راشد ؛ عشاء رجال بس ؟
ابو راشد ؛ لا قال انت واهلك اكيد مهب عشاء رجال وهو لأبو هادي واهله معه
تركي ؛ خلاص نقول لأمي يمكن بتروح
ابو راشد ؛ يلا كلمها ولا رح لها
تركي فز ؛ ااي بروح عشان ابي ثوبي
ابو راشد ؛ اييه حتى شماغي تراني ناسيه قل لأمك ان كانه يحتاج كويه خلهم يكوونه باخذه الليله
تركي ؛ اببشر
وطلع من الدوانيه ركض وهو يدق باب المطبخ كان مسكر والثاني من داخل ع الصاله مفتوح
ام راشد بالصاله وكلهم عندها وسمعت صوت الباب ؛ اروى قومي شوفي يمكن واحد من العيال
اروى قامت وهي تدخل للمطبخ وسكرت الباب وراها وهي توقف عند الباب اللي على حوش الدوانيه ؛ مين
تركي ؛ انا افتحي
فتحت اروى الباب ودخل تركي ؛ وين امي
اروى ؛ داخل وش بغيت
تركي ؛ الليله عند مساعد عشاء ناديها بسألها اذا هي بتروح ولا لا
اروى طلعت وسكرت الباب ؛ يمه تركي بالمطبخ يبيك
ام راشد قامت وهي تدخل له ؛ ها وانا امك
تركي ؛ يمه مساعد عنده عشاء لجارنا ابو هادي وعازم ابوي عليه يقول ابوي تروحين ؟
ام راشد؛ والله مدري انتوا بتروحون كلكم ؟
تركي ؛ ايه بس نايف يقول مصدع يمكن مايروح
ام راشد ؛ خلاص يمكن اروح انا واشوف ام عزام تروح معي ونتعرف عليهم
تركي ؛ ااا طيب ابي ادخل عشان اخذ ثوبي وابوي يقول جهزي شماغه اذا يبي كوي
ام راشد ؛ والله وانا امك كلهم بالصاله وش تبي غير ثوبك اجيبه
تركي ؛ لا يمه تكفين ضروري بدخل ولا خليها بعد شوي انا بدخل اذا ماصاروا بالصاله
ام راشد استغربت ؛ ضروري ؟
تركي ؛ ايه ايه
ام راشد ؛ خلاص انتظر بخليهم يدخلون وخذ اغراضك اللي تبي
تركي هز راسه وطلعت ام راشد وضحكت ؛ تركي بياخذ له اغراض من غرفته
هاجر ؛ وش الأغراض حنا نجيبهم
ام راشد ؛ لا يقول ضروري ادخلوا المجلس لين يطلع
عبير ؛ يمه ترا ماعنده احد بس ام عزام ومنيره ويتغطون وشموخ هذي هي دخلت الحمام تتروش وتو دخلت مايمديها تطلع الحين
كلهم متعودين حتى منيره كانت تجلس معهم بعد وهي متغطيه بس ام عزام دايم تحب تدخل وهم خلوها براحتها مع انه عادي بما انه متغطيه
ام راشد ؛ والله وانا مع عبير تركي مثل ولدك ارتاحي
ام عزام ترددت شوي بس عدلت غطاها وجلابيتها واسعه وامورها تمام ؛ خلاص خليه يدخل
ابتسمت ام راشد ورجعت للمطبخ ؛ تركي ادخل وام عزام تغطت ماعندك احد
تركي ؛ يلا ، وتنحنح ودخل من الصاله للغرف ولا طالع بس قبل لايدخل راحت اروى تتأكد اذا شموخ دخلت الحمام ولا لسى وشافت حمام الغرف مسكر وعرفت ان شموخ داخل وقربت عند الباب وهي تطق ؛ شموخ
شموخ من داخل ؛ هاا
اروى ؛ لاتتطلعين تركي بيدخل غرفته شوي ويطلع
دخل تركي وسمعها وهو داخل من لما طقت
شموخ وهي تحسب انه للحين مادخل ؛ ماخلصت اصلاً
اروى كتمت ابتسامة نكبه وهي تطالع تركي ؛ ييلا خذ اغراضك
تركي دخل بسرعه وسكر الباب وابتسم وهو لو عليه ماطلع ولقى ثوبه بس وده يتأخر شوي وقعد يحوس بملابسه ويفتش
وبالصاله جلست ام راشد وتسولف معهم واروى بالممر تنتظر تركي يطلع ولفت على امها اللي نادت ؛ اروى
اروى طلعت للصاله ؛ هلا يمه
ام راشد ؛ شماغ ابوك بالغرفه جاهز ومعلق ورا الباب اذا طلع تركي عطيه
اروى ؛ ابشري
ورجعت للغرف ودخلت وهي تاخذ شماغ ابوها بس علق خيط الشماغ بالشماعه حقت الملابس وخافت تسحبه اكثر ويخرب وطلعت لأمها ؛ يمه الشماغ نشب خيطه بالمعلاق
ام راشد ؛ يويلي لايكون انقطع
اروى ضحكت ؛ لا بس خيط صغير اخاف اسحبه كله وينهل
هاجر قامت ؛ انا اطلعه
ام راشد ؛ انتبهي لاينقطع
وراحت هاجر مع اروى وطلعته بشويش عشان لايخرب وسمعت امها اللي قالت بصوت عالي من الصاله ؛ ها طلع ؟
اروى بنفس النبره ؛ اي يمه طلع خلاص
وطلعت هاجر للصاله واروى سكرت باب الغرفه وراحت بالشماغ للصاله وجلست لحد مايطلع تركي وتعطيه
بعد دقايق خلصت شموخ وهي قبل بدقايق سمعت اروى وام راشد لما سألتها طلع قالت لها انه طلع وتحسب ان قصدها تركي وتركي تو فتح باب غرفته ولف بيسكره وطاحت عينه على شموخ اللي مقابله ويمين غرفته طلعت من الحمام ولا انتبهت له وهي توقف عند مراية الحمام اللي عند المغسله برا وتعدل المنشفه على شعرها وشهقت من انعكاس تركي بالمرايه وهي تلف وتركض للحمام وصفقت الباب وراها وتركي اللي كان فاهي يناظرها انخرش هو بعد ودخل غرفته وسكر الباب وبعد استيعاب طلع بنفس الدقيقه للصاله وهو يتنحنح وطلع مستعجل ولحقته اروى ؛ تركي خذ شماغ ابوي عطه
تركي اخذه واروى شافت وجهه اللي منقلب وطلع وطلعت وراه سكرت الباب ورجعت جلست تسمع سوالفهم وبعد دقيقه استوعبت وتصنمت من توقعت ان تركي شاف شموخ وفزت للغرفه تشوف شموخ فيها ولا لا ومالقتها ورجعت للحمام وشافته مسكر وطقت ؛ شموخ
شموخ اللي من دخلت وهي تحس انها انهبلت هي متأكده انها سمعت ام راشد بعضمة لسانها قالت لأروى طلع ؟ واروى ردت بأنه طلع وسمعت بعد صوت الباب وبين ماهي جالسه تستوعب رجعت سمعت صوت باب فتح وقفل وهي ترجف كل ماتذكرت شكله اللي واقف على الصامت ومن خوفها كل انتعاشها تبخر ولفت على الباب واروى اللي نادت وقربت شموخ للباب وهي يالله تتكلم ؛ نعم
اروى ؛ خلصتي ؟
شموخ ؛ فيه احد ؟
اروى ؛ لا تو طلع تركي
شموخ فتحت الباب بقوه واروى كانت مستنده عليه وفزت بغت تطيح وتمسكها شموخ بأذنها بخفه ؛ طلعت روح العدو صار خالتي العنود قبل شوي ماقالت طلع وقلتي لها طلع خلاص ؟؟؟ والحين تقولين تو طلع !!
اروى شهقت ؛ لايكون طلعتي بو... قاطعتها شموخ وهي شاده على اسنانها بقهر لاتبكي ؛ جعلها تطلع مصارينك.... اروى سدت فمها ؛ استغفري استغفري ماكنت اقصد تركي اللي طلع تعالي الغرفه يالغبيه بفهمك
شموخ طلعت للغرفه ركض وسحبت اروى وراها ؛ انطقي حسبي الله ع.... اروى ؛ يابنتتت اصبري اصبري انا ارسلتني امي اجيب شماغ ابوي ...... وقالت لها اللي صار وان ماكان قصدها تركي اللي طلع كانت تقصد الشماغ واخر شي ضربت شموخ بخفه ؛ بعدييين انتي الغلطانه انا ماقلت تترركي طلع
شموخ ماسكه راسها بصدمه ؛ ااهه يراسي وانا طلعت وهو واقف عند غرفته ويطالعني ولو ماشفت خشته بالمرايه اللي كنها جني كان للحين يطالع
اروى بصدمه ؛ وانا اشوف وجهه منصفق يبننت ذا وش صاير له انا اسطره
شموخ ؛ انا بسطرك انتي وياه تكفيين الحين اخاف يقول لأحد
اروى بقهر ؛ على تبن تستاهلين انتي وياه وحسابه عندي من الصباح وهو يناظر من مراية السياره وساكته
شموخ شهقت ؛ لاحظتيييي !!
اروى ؛ ايييه شايفته لاكن سوي فيني اللي تبين لو تركي مايحبك
شموخ ؛ نعنببببوا بليسك وش انتي الثانيه وش تبربرين
اروى ؛ انا قفلت معي من الآخر بقولك ، اول شي بالدوانيه شافك وقلنا بالغلط ومشيناها بعدين بالمزرعه كلمك واستغربنا ولليوم افكر فيها وبعدين بالسوق اليوم ماقدرت اسكت ابد ابد اول شي بالمحل وبعدها بالبقاله وبعدها بالسياره وبعدها هنا وش تفسرينه ؟
شموخ ؛ لحظه لحظه السياره فهمنا السوق والبقاله وش فيهم ؟
اروى ؛ اليوم هيلا لما كانت تسولف على تركي وجيتي وخليتي تركي يحط لك وشفت نظرات تركي وشفت لما طلعنا وتسألين عن هيلا هي متزوجه ولا لا هذا يعني انك " سكتت بخوف وتدري ان شموخ بتصفقها "
شموخ ؛ اني وشش ؟
اروى بعدت على ورا ؛ انك تغارين
شموخ فزت وهي تمسك اروى اللي جت بتطلع ؛ وش وش وشششش اغار ؟؟ على من ؟ ومن من !!
اروى ؛ شموخ حبيبتي انتي اسمعي ولا تهاوشيني انا بقولك تحليلاتي وربي الغبي بيفهمها
شموخ قفلت الباب وشهقت ؛ انا غبيه ؟
اروى ؛ يييراسييي شوفي عاد ماتسمعيني والله ما اقول ترا فيه سر خطير خليني اقولك
شموخ جلستها ؛ انثبري وقولي
اروى جلست وهي تمسح شعرها ؛ افف ايه كذا بالهداوه ، شوفي واسمعي ولو قاطعتيني والله ما اقول حرف
شموخ هزت راسها بقهر وضحكت اروى ؛ اول شي تركي بحياته بحياااته ما دقق على بنت وانتي الوحيده اللي احس انه يسوي اي شي عشان ينشب لها هو مو عناد بس من حركاته وعيونه كل شي فيه فاضحه وان شاءالله محد ملاحظ الا انا وثاني شي يحاول يكلمك ولا جا بالغصب ولا ضايقك ولما بالمزرعه قلتي له انك ماتحبين تتكلمين او ماتبين تكلمينه هو مارجع يكلمك وانا متأكده انه يحاول بس يخاف تزعلين وبعدين تركي ماهمه لا زواج ولا حب وعلى كثر البنات اللي حولنا مافكر يخطب ولا وحده منهم وامي عددت له بنات كثر شعر راسي ومايبي لاكن لو تبيني احلف الحين انه يبيك انتي
شموخ اللي وهي تسمعها تحس ان كلامها صدق بس خايفه تصدقه وتنخذل او يطلع كلامها عكس رغم انها صايره تفكر بمواقفها مع تركي وكلامه بس تحاول دايم تنسى عشان لاتطيح بشي هي ماودها ان اخرته كذب ، تضحك من حركاته مع خواته من كلامهم عنه وانه دايم مشيب براسهم وعناده بس مافكرت بيوم انها تحبه وتفكر اذا ورا حركاته هذي شي او يكذب عليها وجت اروى بكلامها هذا ودخلته براس شموخ اللي فعلاً استوعبت بس خايفه تصدق
اروى ؛ يهوووه معي ؟
شموخ بضيق ؛ قومي قومي بنشف شعري
اروى ؛ وانا ليييي ساعه وش اقول سمعتيني ؟
شموخ ؛ ايه
اروى ؛ شموخ والله مافيها شي انتي لو ماتفكرين بسلبيه صدقيني بتتأكدين انه يبيك صدق
شموخ ؛ واذا طلع كل هذا صدفه ؟
اروى مسكت راسها ؛ وش هالصدف اللي اكثر من قرقرة هاجر .. لا لا ياحبيبتي مب صدفه هو يبي يلمح لك بس الظاهر الكل فهم الا انتي
شموخ ؛ اروى انتي تبين كف ؟ اقولك زايد عسى ما زايد خاطبني يعني انا مو لتركي
اروى ؛ امين ، الا لتركي لو ماتبين زايد وانتي قلتيها ماتبينه يعني ماراح تاخذينه
شموخ تنهدت واروى حست انها بدت تقتنع وهي نشف حلقها وهي تشرح وقامت وهي تاخذ المشط وتجلس ورا شموخ بضحك ؛ بمشط شعرك وياويلك تقولين لا انا بخاطري امشطه كذا احس ملمسه يجنن ماشاء الله
شموخ ضحكت وهي تشيل المنشفه وتمسح شعرها ؛ يلا ماني قايله لا
اروى ضحكت وهي تبدا تمشط شعرها وهي صدق تحس ان تركي وشموخ لايقين على بعض ومناسبين