ياديرةٍ ضمّت كل الأحباب

Part 27

الدوانيه
دخل تركي وهو يسكر الباب وجلست ام راشد بأستغراب ؛ تركي وانا امك فيك شي ؟
تركي ؛ اا لا يمه بس موضوع بكلمك فيه
ام راشد ؛ قل وانا امك وش في خاطرك
تركي تنهد وقال بهدوء ؛ انتي يايمه من زمان ودك اني اتزوج وانا اليوم جايك وموافق
ام راشد ابتسمت بفرحه ؛ ابشر وانا امك اخطب لك احسن البنات
تركي ؛ وان قلت لك ان اللي باخذها انا اخترتها
ام راشد ؛ مايخالف ان كان نعرفها وتعرفنا ابشر اخطبها لك
تركي ابتسم بتوتر وهو يكمل ؛ ععزام عنده اخت وباخذها ونعرفهم ويعرفونا
ام راشد ؛ من متى تعرفها ، عمرك شفتها ؟
تركي ؛ اا لا بس يعني ادري ان عنده والظاهر انها اصغر مني وانا ابيها
ام راشد ؛ من متى تبيها ؟
تركي ؛ تتو فكرت وقلت دامها اخت عزام والنعم
ام راشد تنهدت براحه ؛ وانا امك فيه حولنا واجد اخت عزام مخطوبه
تركي جمدت ملامحه بصدمه وحس ان الدنيا كلها بهتت ؛ ككيف من متى ؟
ام راشد ؛ من زمان والله وهي موافقه
تركي ؛ خطبه بس !
ام راشد ؛ ايه لولد عمها من زمان وللحين ماملكوا
تركي انصدم اول شي بس لما قالت خطبه ارتاح انه يقدر بعد يخطبها وتختار ، بس لما قالت ولد عمها خاف انها توافق عليه وتروح منه
تركي ؛ ييمه... وسكت وهو يحس ان الدنيا ضاقت فيه
ام راشد ؛ علامك يمه !
تركي ؛ هي تبي ولد عمها ؟
ام راشد ؛ والله يا امي انها وافقت صح انهم تأخروا بس موافقه
تركي سكت وكملت ام راشد ؛ فيه بنات غيرها والله كل وحده احسن من الثانيه قلت لك اخذ لك بنت ابو جمال وعييت وبنت خالك ياسر والله انها قمر
تركي ؛ لا لا خليني افكر بعدين
ام راشد ؛ تراك بتدخل ثلاثين وانت تفكر انا ابي هالسنه وانت متزوج ان شاء الله فكر وترا ماني مخليتك كبرت وانا امك خلاص
تركي تنهد وهو مايدري وش يسوي مصدوم ان هذي اول مره يحب وبتكون اخر مره مصدوم انه حبها ولقى فيها كل اللي يبي وماهي له قام وهو يادوب يمسك نفسه لاينفجر قهر ؛ يمه انا بفكر وارد لك خبر
ام راشد ابتسمت ؛ فكر ياحبيبي ولا تبطي بنزفك عريس
تركي هز راسه وطلع وهو يلتفت لباب المطبخ اللي انصفق بقوه وطلعت امه وراه وهي تدخل ؛ تعال شوي تقهوى معنا... اروى اروى ! وش فيك
تركي التفت بصدمه لأمه اللي دخلت للمطبخ وهي تنادي اروى ولحقها مايدري شصاير ودخل وكانت اروى عند المغسله تبكي ؛ اروى وشش صار !
اروى ناظرته وعيونها كلها دموع ؛ ماافييني ششي بس االسكين كنت اغسله وجرح يدي
ام راشد وهي تناظر يدها ؛ وينه مافيه دم وينه
اروى ؛ لا قببل شوي وغسلته ووقف بس يعورني
ام راشد ؛ اشوفه وين
اروى ماسكه منديل على يدها وهي شاده ؛ خليه يمه تكفين يهون يهون
ام راشد استغربت وهي تخليها ؛ خلاص تعالي الصاله
تركي ؛ ايه ايه خلي الغسل روحي اجلسي
اروى هزت راسها وطلعت بس راحت للغرفه ودخلت ام راشد للصاله وتركي وراها
هاجر وهي شافت اروى تعدت تبكي ؛ ييمه شفيها !
ام راشد ؛ تغسل سكين وجرحت يدها
عبير ضحكت ؛ يعمري ماتضر ماتضر
وجلست ام راشد وتركي واقف يناظر
شريفه ؛ تروك وش فيك
تركي ؛ مصدع بطلع شوي
وطلع برا ولفت عبير لأم راشد ؛ يمه وش يقول ؟
ام راشد ؛ هاجر خذي الكاسات اغسليهم
هاجر ؛ طيب شوي
ام راشد ؛ ققومي الحيين
هاجر قامت ومادرت ان امها تصرفها وراحت تغسلهم
ام راشد لفت لعبير وشريفه ؛ يبي يخطب
عبير بفرحه ؛ صصدق ! منن
شريفه ؛ اخييراً
ام راشد تنهدت ؛ بس يبي شموخ
شريفه شهقت ؛ مخطوبه
عبير ؛ ماقلتي له ؟
ام راشد ؛ الا وقلت خلني اخذ لك غيرها وقال بيفكر
شريفه ؛ وزعلان ليكون مايبي الا هي
ام راشد ؛ شكله لأني قلت له بنت ياسر ولا جمال ومايبي
عبير ؛ وش دراه عنها
ام راشد ؛ اكيد يدري ان ام عزام واخته هنا قال بيخطب اخته
عبير ؛ يحبيبي شكله يبيها من زمان وماقدر الا اليوم عشان مافيه احد
شريفه ؛ اييه صح دايم كلهم موجودين ماتكلم الا يوم راحوا
ام راشد ؛ الله يعوضه بأحسن منها هو بس لو يوافق
عبير ؛ طيب كلمي ام عزام يمكن شموخ توافق على تركي
ام راشد ؛ لا وناخذ ذنب قطاعتهم فكونا هو قال بيفكر وناخذ له غيرها
شريفه ؛ يممه والله حرام
ام راشد ؛ نعنبو بليسك انتي وياها الحرام اننا نخرب بين شموخ وعمانها خليهم اهل ويتفاهمون
شريفه ؛ ييوه من زين عمانهم مايعرفون يتفاهمون يبيلهم دق عشان يمشون والله انا اقول كلمي ام عزام ولا بكلم عزام
ام راشد ؛ يوييلك لا تخربين بينهم ومالك دخل لاقال تركي انه مايبي الا شموخ حزتها يصير خير
عبير ؛ ايه وحزتها تكون شموخ راحت علينا
ام راشد تنهدت ؛ اسكتوا والموضوع سكروه انا لو دريت ماعلمتكم
سكتوا شريفه وعبير بقهر وهم يشوفون ان مافيها شي لو كلموا ام عزام وشموخ وهم يقررون دام تركي موافق على شموخ ويبيها
..........••..........
بيت ابو هادي نفس الوقت
ابو هادي قام ؛ بروح اشوف المحل تجي انت وحمد ؟
حمد ؛ اييه بشوفه
هادي ؛ ايه يلا وانا معكم
شهد ؛ تتأخرون ؟
ابو هادي ؛ والله مدري يمكن
ام هادي ؛ ونروح لأهلي وعمي العصر ولا متى ؟
ابو هادي ؛ والله اليوم مايمدي بكره ان شاءالله
شهد ؛ طيب يبه مانروح للسوق وانتوا بالمحل ؟ ونشوفه انا وامي وانتوا تخلصون شغلكم
ام هادي ؛ لا نضيّع
شهد ؛ لا ان شاء الله ندق وخلاص
ابو هادي ؛ تروحون معنا وترجعون معنا يعني ؟
بس يمكن نبطي
شهد ؛ عادي هو كبير واضح بنتأخر نفس امس قريب الساعتين دخلنا ٣ محلات بس والسوق كله اكثر من ٢٠ محل
هادي ؛ يساتر بتفرينه كله ؟
شهد ؛ ايه عادي نشوفه
ابو هادي ضحك ؛ والله كيفكم
ام هادي ؛ خلاص نروح واذا خلصنا قبلكم ياخذنا هادي ولا حمد ونرجع معه وهو يرجع لكم بعدها
ابو هادي ؛ اجل يلا البسوا
ام هادي ؛ تمام ، قومي شهد
وقامت شهد وهي تركض تلبس
وخلصوا وطلعوا وقال ابو هادي ؛ بسيارتي كلنا
وبهاللحضه وقفت سيارة عزام عند بيت ابو راشد
وركبوا وقال حمد بضحك وهو يسكر الباب ؛ الظاهر سيارتي انا وهادي ماعاد بنشغلها دام كل شي قريب
ضحكوا وقال ابو هادي ؛ عاد تدري هنا بعضهم ماعندهم سيارات كل شي مشي وقريب
ام هادي ؛ ماشاء الله يمشون ويتحركون والله انه احسن حتى امس عند زوجة مساعد نصهم جايين من بيوتهم مشي
ابو هادي ؛ اي والله ما شاء الله عليهم
شهد ؛ يبه هذا يبيع ايسكريم برا ليه مايدخل السوق ويبيع داخله يكسب اكثر
ابو هادي ؛ هذا يمشي بعربيته ويبيع حتى بالسوق وعند البيوت
ووقفوا عند باب السوق ونزلوا كلهم لداخله والأصوات والناس دايم موجوده
ابو هادي ؛ تبون هنا ونروح المحل ولا نمشي لين نوصل المحل
ام هادي ؛ لا بنمشي لين تخلصون المحل وين مكانه
ابو هادي ؛ اذا بتمشون من الطريق هذاك تلقونه اخر شي يسار واذا من هنا تلقونه بعد اخر شي بس يمين
ام هادي ؛ خلاص روحو ونمر عليكم
ابو هادي ؛ خذي الفلوس واذا خلصتوا تعالو على طول للمحل ، خلكم مع بعض لاتضيعون
ام هادي ؛ ابشر
وراح ابو هادي وهادي وحمد معه لمحلهم ويتفرجون على الاسواق وهم يمشون
وشهد وام هادي كملوا يشوفون الاسواق ويشترون منها اغراض البيت اللي ناقصتهم
..........••..........
بيت ابو راشد
قبل دقايق دخلت ام عزام وشموخ وعزام راح للدوانيه ومالقى احد توقعهم بالمحل ورجع ركب سيارته وراح للسوق وام عزام وشموخ دخلوا للصاله اللي فيها ام راشد وهاجر وعبير وشريفه وبزارينهم
ام عزام ؛ السسلام عليكم
الكل ؛ وعليكم السلام
شريفه ؛ ها وش صار
ام عزام ضحكت وهي تجلس ؛ خلعناه
ام راشد ضحكت ؛ الحمدلله على السلامه
شموخ وهي يالله تتكلم ؛ الله يسلمك
هاجر انفجرت تضحك ؛ يشلمك هههههههههههههههه
شموخ ضحكت بقهر وهي تضربها بخفيف وهي ماتقدر تتكلم عدل من البنج والقطن اللي بفمها
ضحكوا ودخلت شموخ تبدل وام عزام نزلت عبايتها بالصاله ومدت لها ام راشد فنجال قهوه وهي تاخذه وتسولف لهم عن شموخ ووش سوت
•
بغرفة اروى وهاجر دخلت شموخ وهي تشوف اروى على السرير ومتغطيه استغربت بس اخذت ملابسها وراحت للحمام تبدل وطلعت وهي تشيل القطن وترميه وتشوف مكان ضرسها اللي خلعته ؛ فكه منك والله
ومشت للغرفه ودخلت وهي تجلس على طرف سرير اروى من شافتها تتحرك ؛ اروى
اروى من تحت اللحاف ؛ همم
شموخ ؛ غريبه نايمه !
اروى شالت الغطاء وهي تجلس وتناظر شموخ اللي استغربت ملامحها ؛ بنت تبكين !
اروى ؛ لا ها وش سويتي
شموخ ؛ انتي شفيك ؟
اروى ؛ مافيني شي جرحت اصبعي بالسكين
شموخ ؛ يعمريي وينه
اروى ؛ راح قولي وش صار
شموخ استغربت بس قالت ؛ رحت وقالوا لازم نخلعه وخلعته اخ يبنت جلست ابكي والحين خدي ما احس فيه شوفي احسه مايل من الابره
اروى هزت راسها وشموخ شكت ؛ وريني الجرح
اروى هنا رجعت تبكي وخافت شموخ ؛ ارووى وش صاييير
اروى ببكي ؛ شموخ سمعته والله يبيك
شموخ بخوف ؛ مين !
اروى حاولت توقف بكي وقالت ؛ سسكري الباب وتعالي اقولك
شموخ قامت وهي تقفل الباب ورجعت جلست قدام اروى
شموخ ؛ لاتخوفيني وش السالفه
اروى ؛ لما رحتوا ككان تركي بالدوانيه ورحنا انا وهاجر نجيب الاغراض اللي فيها ... وكملت تقول لها وبكت لما وقفت عند ؛ ررحت المطبخ وطلعت مع الباب اللي ورا ووقفت عند الدوانيه اسمعهم لأني شاكه وسمعت تركي وقال انتي يايمه من زمان ودك اني اتزوج وانا اليوم جايك وموافق وقالت امي... وكملت تقول لها كل شي وهي سمعته كله بالتفصيل ومن خلصت وهي تقول ؛ شموخ وربي انه يحبك صح ان امي سألته اذا شافك او لا وقال لا بس يدري انها بتزعل وهو بيخطبك مادرا انك مخطوبه
شموخ بهاللحضه ماتدري وش تقول خصوصاً ان حتى اروى تبكي وهي تشرح عن تركي اللي انكسر خاطره وهو يبيها ماتوقعت انه بيوم بيخطبها او يفكر خافت وهي تفكر وش بيصير مع زايد وشلون بترفضه بيرجع تركي ويقرر يخطبها !
شموخ وهي تحاول ماتبكي ؛ خخلاص انا قلت لك ما ادري اذا اخذ زايد او لا اروى وربي.. " وماقدرت تمسك نفسها وبكت " وربي مدري وش اسوي ما ابيه بس ما ابي اكسر كلمة ابوي
اروى ؛ يبنت افهمي مافيه شي بالغصب وابوك الله يرحمه لو حي بيقول ماتاخذينه وانتي ماتبينه حتى لو بنقطعهم
شموخ ؛ وتركي !
اروى ؛ يحبك وربي لو كنتي بمكاني وتسمعين صوته اللي يرجف من القهر ووجهه لما طلع قسم بالله لترفضين زايد واهله
شموخ ؛ وش اسوي طييب
اروى ؛ انتي تحبين زايد ؟
شموخ بسرعه ؛ يخسي
اروى ؛ لاتوافقين عليه وتركي هو اللي يبيك بياخذك على طول هو مايدري اني سمعته ولا احد درا وانا عارفه انه ماراح يقدر يتصرف شلون يكلمك وانتي ماتبين وشلون يكلم عزام وهو يدري انه بيقول مخطوبه واببوي ابوي مستحيل يخلي تركي يخطبك وانتي مخطوبه لولد عمك لو احد ثاني نقول يمكن بس ولد عمك مستحيل وابوي واعرفه
شموخ ؛ اقولك شي
اروى ؛ قولي
شموخ ؛ من لما كلمتيني امس وانا افكر وعرفت انه صادق الحين ولو بختار بينه وبين زايد بختار تركي
اروى ابتسمت ؛ اي تكفين ياشموخ والله ماحب الا انتي تركي واعرفه واكثر وحده تحبه انا على اني ما اشوفه الا اتهاوش معه بس اعرفه زين وماكان يبي يتزوج ولا حب ولا وحده انتي الوحيده اللي يبيها
شموخ هزت راسها وهي فعلاً تأكدت ان تركي يحبها
وكملت اروى ؛ الموضوع الحين بيدك ارفضي قبل يصير غصب عليك
شموخ خافت وهي تتنهد بتوتر ؛ لا يارب
اروى ؛ كلمي خالتي وعزام وارفضي تكففين
شموخ هزت راسها وهي تقوم ؛ خلاص قومي غسلي وجهك من متى تبكين !
اروى ضحكت بقهر ؛ من ساعه
شموخ ؛ قومي غسلي وتعالي نطلع
اروى ؛ خليني اكلم تركي
شموخ ؛ عنن وش لاا
اروى ؛ تكفين قال لأمي انه بيفكر عشان تزوجه واخاف يوافق عشان ينسى بسرعه وانا اعرفه والله ماينسى خليني اقول له بس بقول اني سمعته واقول له انك ماراح توافقين على ولد عمك عشان لايوافق على غيرك
شموخ ؛ لا لا بعدين او العصر اي وقت الا الحين يلا قومي وقامت اروى وهي تعدل شعرها وراحت للحمام وشموخ جلست وهي تفكر بتركي
..........••..........
في المزرعه
وقفت سيارة تركي وهو يشوف ان المزرعه افضل مكان له عشان يطلع اللي بقلبه ومافيها الا العمال ثنين وبعيد بجهة الغنم ونزل وهو يمشي لجهة المويه ورا بيت الشعر مشى وهو يتمنى لو شموخ تكون جايه نفس ذيك الليله راضي لو تهاوشه بس يرجع قبل لايعرف انها مخطوبه استصعب كل شي من لما درى انها لولد عمها وهو يدري مستحيل يخليه ولد عمها ياخذها وهي له تنهد وهو يجلس عند المويه غسل وجهه مره ومرتين وثلاث يفكر بأي حل يخلي شموخ تتزوجه هو يخاف انها تكون تحب ولد عمها وحزتها ينهدم كل شي قام وهو ينشف وجهه واخذ جواله وده لو نايف عنده لو يدق على عيسى لو يكلم راشد لو قال له الموضوع من زمان كان هو الحين عنده رفع جواله وهو يشوف الساعه اللي تو جت ١٢ ونايف خلص دوامه دق عليه بسرعه ورد نايف ؛ هلا تروك
تركي ؛ وينك
نايف وهو يطلع ؛ تو طلعت من البنك وانت ؟
تركي ؛ تعال بالمزرعه
نايف ؛ كلكم ؟
تركي ؛ لا بس انا ابيك ضروري
نايف استغرب صوته ؛ وش بلاك !
تركي تنهد ؛ عن سالفتنا امس مع عيسى
نايف ؛ ايييه يلا جاي جاي
وقفل نايف وهو خايف انه صار شي وحرك من البنك للمزرعه اللي تبعد ١٥ دقيقه
وتركي اللي كان ببيت الشعر حط الجوال وهو ينسدح يستنى نايف

تفاعلوا ✨