ياديرةٍ ضمّت كل الأحباب

Part 25

..........••..........
عند مساعد
فيه مجلس الحريم اللي تعرفوا على بعض وسولفوا لأم هادي عن الديره واهلها وبعد آذان العشاء والصلاه كانت ابتسام وامها وخواتها بالمطبخ يحطون العشاء وطلعت ابتسام بتشيل صينية القهوه وقامت هيلا تشيليها عنها من اشرت لها ام عبدالرحمن وقالت ام حسين " من حريم الديره " ؛ ابتسام الله يصلحتس حامل ارتاحي وانتي تشيلين بهالأغراض امتس والبنات ماقصروا
ام عايد " نفسها ام ابتسام " طلعت من المطبخ وهي تضحك ؛ والله قلت لها تطلع من المطبخ لاتشتغل وجت تشيل القهوه
وجلست ابتسام عند ام هادي وهي تضحك وقالت ام هادي بأبتسامه ؛ انتي بأي شهر ؟
ابتسام ابتسمت ؛ بالسادس
ام هادي ؛ ارتاحي والله ام عايد ماقصرت لاتتعبين نفسك
ابتسام ؛ لا ماعليك ماسويت شي بس اشوف العشاء " وناظرت لشهد " شهد خلصتي جامعه صح ؟
شهد ؛ ايوه الحمدلله
ابتسام ؛ عاد كيف تحسين الديره اعجبتك ولا ؟
شهد ضحكت ؛ الا والله حلوه بس برد شوي
ابتسام ابتسمت ؛ ايه دخلنا الشتاء خلاص
ام هادي لفت لشهد ؛ انتي بردانه ؟ لابسه صيفي الله يصلحك
شهد ؛ لا اقصد برا لما دخلنا قبل شوي هوا بارد بس هنا دفى
ام هادي هزت راسها وهي ترجع تسولف مع ابتسام
•
" بمجلس الرجال "
نفس الوضع يسولفون عن الديره واشغالها وهادي وحمد بدو يسولفون مع تركي ونايف وجالسين على جنب يسولفون مع بعضهم
تركي ؛ هادي انت وش تشتغل ؟
هادي ؛ بالمدينه كنت مع ابوي بالمعرض وهنا بعد بشتغل معه بالمحل اللي بياخذ
تركي ؛ وانت ياحمد
حمد ضحك ؛ انا والله تخرجت من الجامعه مابغيت انجح وبشتغل مع ابوي وهادي كلنا بالمحل
نايف ؛ انا اقول نصيحه دام منت بخبرة بالبيع قدم على وظيفه احتياط انا يعلمني ابوي على المحل ولا اداني شغله
حمد ؛ لا والله خلني كذا مرتاح احسن من الدوامات
نايف ضحك ؛ انا اليوم اول يوم بالدوام الله لايوريك يالطفش مامن شغل
حمد ؛ وش وظيفتك ؟
نايف ؛ بالبنك وبس اكتب ورقتين وباقي الوقت جالس كذا
حمد ؛ يرجال احمد ربك ماتكرف ان كان هذي الوظيفه بقدم عليها
تركي ضحك ؛ نايف يبي شغله يتحرك فيها يحب الشقى والمحل ماعرف له
هادي ؛ والله عاد البيع شقى ان كانك تبيه حاول تتعلم بمحل ابوك
تركي ؛ اييييه انا اليوم تعلمت البيع بالمحل والله تعب بس نتحرك شوي
حمد ؛ وينه محلكم ؟
نايف ؛ داخل السوق عطار
هادي ؛ اول واحد يسار ؟
نايف ضحك ؛ ايييه جيته؟
هادي ؛ اي والله مرينا عليه اليوم ماشاء الله
تركي ؛ وانتوا وين مكانه محلكم ؟
هادي ؛ داخل السوق بعد بس تأخرنا ومامدانا نروح له لأنه ورا اخر شي
نايف ؛ وكيف الديره معكم
حمد ؛ ياولد شي شيييي لو دريت جيت فيها من زمان
تركي ؛ تعلمني بديرتنا والله مالومك بس ماتحبها كثري
هادي ؛ كل اقاربكم هنا ؟
تركي ؛ لا والله الوالده لها اخت واخو وساكنه بتبوك وخالي بالقصيم وابوي بعد له خوات وبرا الرياض بعد وجداتي وجداني الله يرحمهم ماتوا من زمان
هادي وحمد ؛ الله يرحمهم
نايف ؛ وانتوا ؟
هادي ؛ خوالنا واعمامنا بديره وحده بالديره اللي جنبكم حقت ابو صالح
نايف ؛ ايييه ، وغريبه ماسكنتوا فيها جيتوا لديرتنا من قبل ؟
هادي ضحك ؛ والله ديرة ابو صالح صغيره مافيها محلات ولا شغل وهالديره اول مره نجيها مساعد مدحها لنا
تركي ؛ والله صادق مساعد ان كانه مدحها بتعجبكم
حمد ضحك ؛ الا قل اعجبتنا وقضينا
ضحكوا ولفوا على مساعد اللي قال ؛ يلا ياجماعة الخير تفضلوا على عشاء جية ابو هادي واهله الله يحييكم وسامحونا على القصور
ابو هادي ابتسم ؛ سلمت يامساعد مامنك قصور
وطلعوا للحوش اللي فيه الفرشات ممدوده والسفرّ وصحون العشاء عليها
وبعد العشاء عند الرجال والحريم
" عند الحريم داخل "
خلصوا وقامت هيلا وهي تشيل صحن للمطبخ واخذته بدريه " اخت ابتسام " ؛ خليه عنك اشيل الصحون انا وفادية
هيلا وصلته للمطبخ ؛ يابنت مايضر اساعدتس
وحطته وهي تغسل ورجعت للمجلس
شهد بهمس لأمها ؛ يمه متى نمشي ؟
ام هادي ؛ مدري شوي ليه ؟
شهد ؛ مصدددعه ونعسانه
ام هادي ؛ ننتظر ابوك يدق ونروح
ام راشد لأم عزام ؛ يلا بنرجع مع نايف
ام عزام وهي تقوم ؛ يلا
ام راشد قامت وهي تقرب لباب المطبخ وداخله ام عايد ؛ اغناكم الله يا ام عايد
ام عايد ؛ بالعافيه ي أم راشد ، بدريه عطيني هالحافظه
جت بدري وهي تعطيها امها وقالت ام عايد ؛ هذا عشاء البنات وسلمي لنا عليهم
ام راشد ؛ ماقصرتي والله ويوصل ان شاء الله يلا فمان الله ، ومري علينا قبل تروحين بيتك
ام عايد ؛ ان شاءالله
ومشت ام راشد لأم هادي ؛ سيرو علينا ي ام هادي ننتظركم
ام هادي ابتسمت ؛ ان شاءالله ياحبيبتي
وطلعت هي وام عزام وردت ام هادي على جوالها من دق ابو هادي ؛ هلا
ابو هادي ؛ يلا مشينا هذا انا عند الباب
ام هادي ؛ يلا طلعنا
وقفلت وهي تقوم ؛ يلا شهد
والتفتت لأم عايد ؛ ماقصرتوا وكثر الله خيركم
ام عايد ابتسمت ؛ بالعافيه وتستاهلون اكثر
ام هادي ؛ وزورينا انتي والبنات ، يلا مع السلامه
ام عايد ؛ ابشري ، مع السلامه
وطلعت ام هادي وشهد لبست عبايتها وعدلت طرحتها ونقابها وطلعت معها
•
برا كان مساعد وابو هادي وابو راشد وعيالهم ورجال الديره مشوا وطلعت ام راشد وام عزام وقال نايف ؛ هاا يبه ترجعون مشي ولا ارجع اخذكم
ابو راشد ؛ لا نجي هذا البيت
ابو هادي لمساعد وابو راشد ؛ عاد فمان الله وتراني قريب سيروا علي وشرفونا
ابو راشد ومساعد ؛ ان شاءالله
ابو هادي ؛ يلا ياعيال مشينا
وركب وجت ام هادي وشهد وركبوا وحركوا وابو راشد والعيال كملوا مشي
ووقف نايف عند بيتهم و ابو هادي عند بيته ونزل
ومن دخلوا جلس حمد وهو يطلع شماغه ؛ ياربيي يالنومم بسس
هادي ؛ اي والله اني يالله افتح عيوني
شهد ؛ احسسب بس انا اللي نعست
ابو هادي ضحك ؛ مانمتوا العصر وقايمين الفجر اشوف النوم بيتعدل من اول يوم
ام هادي ضحكت ؛ اي والله الله يجزا الديره خير بتعدله صح
حمد ؛ كم الساعه ؟
ام هادي ؛ ٩ بالضبط
ابو هادي ؛ ياسلام لو نمتوا الحين الفجر تقومون وكذا النظام تمام
هادي ؛ اجل بنام عشان يصير النظام تمام
ضحكوا وقاموا كلهم لغرفهم ومن بدلوا نامو على طول من التعب
..........••..........
بيت ابو راشد
دخلت ام راشد وام عزام للصاله
ام راشد ؛ السلام
البنات ؛ وعليكم السلام
ام راشد ضحكت ؛ مسوين عشاء وهم حاطين لكم
عبير ضحكت ؛ والله جعنا وماقصرو منيره وهاجر سوو لنا هالمكرونه تعالوا ذوقوها
ام عزام جلست على الكنب بتعب ؛ بس يربي لك الحمد والله اني شبعانه
ام راشد نزلت الحافظه وجلست بجنب ام عزام ؛ والله وانا مالي نفس كلوا بالعافيه
شريفه وهي تاكل ؛ يمه من جاهم
ام راشد قعدت تسولف لهم وهم على سفرتهم بالأرض وياكلون ويسمعون لها
اروى ؛ زيين عندها اهلها كنت شايله همها وشلون تطبخ العشاء وهي حامل
هاجر ؛ بناتها معها ؟
ام راشد ؛ ايه كلهم موجودين بدريه وفاديه
منيره ؛ واهل ابو هادي شفتيهم ؟
ام راشد ؛ ايه ام هادي وبنتها
عبير ؛ بس بنت وحده ؟
ام راشد ؛ ايه عندها بنت وولدين
اروى بصدمه ؛ اما عاد ٣ سيارات ماشاءالله احسبهم كثار
ام راشد عقدت حواجبها ؛ وانتي شدراك عن سياراتهم
اروى ؛ اا العصر كان باب الدوانيه حق الشارع مفتوح وشفت مع شباك المطبخ
ام راشد ؛ ايييه مع الشباك
هاجر ؛ وش اسمها بنتها
ام راشد ؛ شهد واخوانها اكبر منها حمد وقبله هادي
شريفه ؛ كم عمرها شهد ؟
ام راشد ؛ والله مدري بس تقول متخرجه من الجامعه
هاجر كشت على نفسها ؛ مالت الكل تخرج الا انا ، وكيف شكلها اوصفييهم يمه سولفي
ام راشد ضحكت ؛ وش اقوول تشوفينهم اذا جو
اروى ؛ عادي سولفي لنا عنهم لين نشوفهم انا كان ودي اروح بس المسلسل بدا
ام راشد ضحكت ؛ وش اسولف فيه
اروى ؛ كيف شكلها ذي شهد ؟
ام راشد ؛ حلوه والله بسم الله عليها
اروى ؛ احلا مني ؟
ام راشد ؛ ايييه اكيد
اروى شهقت وضحكت ام راشد ؛ لا لا كلكم والله حلوات بس هي اطول منك بشوي وبيضاء وجسمها يهبل لاسمينه ولا نحيفه وشعرها ماشاء الله طوييل واسسود
اروى ؛ يعني ، انا شوي طويله وبعد بيضاء وشعري اسود بس قصير ورشيقه بسم الله علي
هاجر ؛ ايه يارشيقه لاتاكلينا مع البشاميل بس وبعدين نشوفك ماحنا عميان
الكل ؛ هههههههههههههههههههههههه
قرصتها اروى وضحكت عبير ؛ كملي يمه
ضحكت ام راشد ؛ ولابسه فستان بني ورابطه شعرها بس يوصل لظهرها وهو مربوط يهبل الله لايضرها احلا شي فيها ، وحاطه مكياج كاشخه والله
هاجر ؛ يحركات منزله عباتها يليتنييي رحت
اروى ؛ وامها ؟؟
ام راشد ؛ امها بعباتها ونقابها ماشفت وجهها وبيضاء ومهي سمينه واجد
شريفه ؛ يمه ماعزمتيهم ؟
ام راشد ؛ الا وقالت ان شاءالله عاد مدري يجون بكره ولا بعده
اروى ؛ عساها تجي عشان نشوفهم واضح انهم حلوين ولا عيالها ٣ تلقينها صغيره
ام راشد ؛ اي والله ماشاء الله عليها هي وبنتها كلهم يهبلون
وبعد هالسوالف والتحليلات قاموا كلهم يلمون العشاء عشان ينامون