ياديرةٍ ضمّت كل الأحباب

Part 9

اروى بخوف وبسرعه ؛ تتركييي الله ياخذ عدوك اطلع اطلع شموخ ههنناا
لف تركي بصدمه بسرعه وطلع متجه للباب ودقت شموخ كتف اروى وهي بتبكي ؛ قلت لك قلت لك احد يجي!!
اروى وهي تاخذ نفس ؛ والله ماشفتك عورتك ما قصدت رجعت وراي وصدمت فيك عشانه كان قدامي
شموخ بكت ؛ مو عشانك صدمتي فيني كله بسببك جيت وانا ماحطيت طرحتي حتى
اروى ؛ ماشافك ماشافك صد بسرعه وانتي جيتي ورا الباب والله ماشافك ، خلاص ادخلي داخل والله مادريت انه بيرجع
مشت شموخ وهي ورا اروى خايفه انه يرجع يدخل بعد ودخلت من المطبخ وهي تحاول تخفي ملامح البكي من وجهها واروى كاسره خاطرها شموخ
اما تركي اللي رجع ياخذ عقاله و انصدم من دخل وشافها وطاحت عينه عليها قبل لاتطيح على اروى اللي صدمت فيه ورغم هالنظره اللي كانت لجزء من الثانيه لكن شافها تركي ومانساها ومن سمع اروى وهو ماركز الا بكلمتها اللي تتردد على ذهنه وهي تقول"شموخ هنا" عرف اسمها وشاف وجهها ، حرك من البيت رايح للمزرعه وهو قد مايقدر يخفي توتره ورجفته كل ماذكرها وحمد ربه ان ماكان معه احد من اخوانه واستوعب ان اروى عارفه بالموقف وخايف تفضحه حاول يتناسى الموضوع ويشغل نفسه بالمزرعه والكل ملاحظ فرط الحركه اللي فيه
..........••..........
نرجع المدينه
عند ام هادي وعيالها
في المول بعد ماخلصو واخذو الأغراض اللي يحتاجونها قال هادي ؛ ها مطعم ولا كوفي ؟
شهد ؛ كلهم اكل ماعندك خيار ثالث
هادي ؛ لا عندي طماط
حمد انفجر يضحك وضحكته الكل سمعها ؛ سامج ساامج حتى بالسماجه بطيني
شهد وهي تبعد عنهم لجهة امها ؛ الله يفشلك ياحمد
هادي وهو يحاول يسكته ؛ اسسكت فضحتنا فضحتنا اخر مره اطلع معك
ام هادي همست بفشله ؛ خلاص انت وياه الناس تناظركم
هادي وهو يدف حمد ؛ ادخلو ادخلو هذا المطعم حلو
دخلو وهم يضحكون من ضحكة حمد
ووقت ما هم منتظرين الأكل قالت شهد وهي تشوف رسايل ابوها ؛ الله شوفو شوفو ابوي ارسل الصور
التفتو كلهم لجوالاتهم يشوفون وشهق حمد ؛ انا الحييين بطير للرياض ابك انا ليه مارحت معه
شهد ؛ ياحلو جوها متى نروح
هادي ؛ هذي العماره اللي يقول ؟؟
ام هادي ؛ ايه ايه وهذا المحل بس صور واحد ليه ؟
هادي ؛ مدري بسأله
وارسل يسأل ابوه عن المحلات ورد ابو هادي انه اخذ العماره ومحل واحد كبير
شهد ؛ قل له يصور اذا جا مطر
وكمل يرسل لهم الصور وسط حماسهم وام هادي مبتسمه لأنهم حبوها
..........••..........
بعد صلاة المغرب
في بيت ابو راشد
بعد ما راحو الضيوف وهداياهم معبيه المجلس
وهاجر ترتب وام راشد والباقين بالصاله واروى مع شموخ بالغرفه
شموخ وهي تفصل جوالها من الشاحن ؛ لابارك الله فيك من شاحن كلها بسبتك
اروى ضحكت ؛ يختي خلاص سالفه وراحت وش دخل الشاحن ؟
شموخ ضربتها بخفه ؛ وترا انتي بعد السبب لاتكلميني
اروى قربت وجلست قدامها بضحك ؛ ششموخ والله مادريت ان تركي بيرجع وبعدين قلت لك انه ماشافك
شموخ ؛ ان شاءالله ما انتبه الله يستر اخاف يقول لعزام ولا امي تدري
اروى بضحكه ؛ لا ماعليك مايتكلم ومحد عرف الا انا وانتي وتركي وانا ماراح اقول وانتي بعد بتسكتين وتركي صدقيني ماراح يعلم هو دخل فجأه يعني هو الغلطان وبعدين ليه يسرق شاحنك يستاهل
شموخ ضحكت ؛ صصحح والله هو الغلطان ، حقانيه انتي حتى وهو اخوك
اروى بضحك ؛ الصدق اوقف مع الحق وتركي غلطان ، حتى انا روعني يوم دخل وصدم فيني كتفي للحين يعورني بسبته
ضحكت شموخ ودخلت هاجر ؛ ما شاء الله تاركه لي الكرف والله يالورع يدي ما امدها على طبخ العشاء كله عليك
اروى رفعت حواجبها ؛ خير وش اللي كرفتيه ؟
هاجر رمت عليها السواره ؛ المجلس حوسه وانا رتبته لحالي ، واسوارتك شايلتها لك بعد ماطشيتها
اروى اخذت اسوارتها ؛ لا لا امزح ياحليلك ياجوجو لو طشيتيها يمكن انجلط
هاجر بهمس ؛ ليتني حاذفتها
شموخ اللي سمعتها ؛ ههههههههههه
اروى التفتت ؛ وشش قالت
شموخ ناظرت هاجر وقالت هاجر بضحك ؛ ماقلت شي قومو للصاله طفشت
قامو كلهم للصاله وعلى دخلتهم سكتوا
استغربو البنات بس قالت هاجر وهي تجلس عند امها ؛ يمه ابوي متى يجي
ام راشد ؛ مدري والله بس يمكن انهم جايين ماراح يتأخرون بعد هالوقت
اروى ؛ طيب وش بتسوين على العشاء
هاجر بهمس ؛ قصدك وش اسوي لأن انتي اللي بتسوينه
عبير سمعتهم وضحكت ؛ انا واروى بنضبط لكم العشاء الليله
ام راشد ابتسمت ؛ لا انا وهاجر واروى خليهم يتحركون شوي
ناظروها اروى وهاجر بصدمه وقالت هاجر ؛ يمه متى جلسنا حرام عليك
اروى تمثل الزعل ؛ اصلاً تو جلست انا
شموخ ؛ لا الصدق انا وانتي طول الوقت جالسين هاجر اللي اشتغلت اكثر اليوم
هاجر ؛ صح ، الحين اروى بتوريكم شطارتها
عبير ؛ لاا انا بسويه واروى بتساعدني
هاجر بهمس لأروى ؛ ولو اني ادري ان عبير اللي بتسويه بس اهم شي تشتغلين
قرصتها اروى وردت لها هاجر القرصه وشموخ تفرق بينهم
ام راشد ضحكت ؛ وش بتسوين ياعبير
عبير ؛ مقلوبه على طريقة اختك " ام سعد اخت ام راشد "
ام راشد ضحكت ؛ ياحليلها يلا سويها
شريفه ؛ يعني تعلمتي تضبطينها وبتسوينها لنا الحين
عبير وهي تقوم اروى ؛ اييه ، يلا اروى
قامت اروى مع عبير للمطبخ وام راشد والبنات عند العنود وشريفه تسولف لأم عزام وتعرفها عن جاراتهم اللي زاروهم اليوم
•
•
بعد مرور ٤ ايام بدون شي جديد الا ان ابو هادي رجع للمدينه بعد ماخلص شغله ويجهزون اغراضهم عشان ينتقلون للرياض
وبيت ابو راشد مشغولين بسابع شريفه والزيارات والناس وابو راشد وعياله وسعد وعزام طول وقتهم بالمزرعه ويجهزونها استقبالاً للشتاء اللي بدا يدخل
..........••..........
بيت ابو هادي العصر
بالصاله كلهم وهادي مصدع ويكتب
حمد بينرفز هادي ؛ هادي هادي ، هاااديي
هادي عصب ؛ هههااااااه ، ماتشوفني مشغول ولا كلمه
حمد سكت والتفت لأبوه ؛ يبه
ابو هادي عطاه فنجاله ؛ هلا ، صب قهوه
حمد صب قهوه وقال وهو يمد الفنجال؛ سم ، متى نروح الرياض
ابو هادي ؛ جهزت اغراضك كلها ؟
حمد ؛ لا
ابو هادي ؛ اجل اذا خلصت تعال
ضحكت شهد وام هادي اللي قالت ؛ اصلاً نص الأغراض ماجهزناها عشان نخلص الباقي
هادي مد الدفتر لأبوه ؛ خلاص كل شي سجلته
ابو هادي اخذه ؛ ماقصرت
حمد وهو يقرا معه ؛ الحين الارقام والخطوط هذي وش
هادي ضربه بالقلم ؛ هذا سجل المحل والفواتير
حمد ؛ ايه وشو يعني ؟
ابو هادي ؛ يعني بنشغلك فيها عامل وهذا راتبك
حمد ؛ ليه تش... كم الراتب ؟
الكل ؛ هههههههههههههههه
ابو هادي ؛ كم تبي
حمد ؛ على حسب الشغل
هادي ؛ وتتشرط بعد
شهد ؛ والله انا اقول لا تشغلونه معكم بيخسركم
حمد اخذ القلم من هادي وحذفها ؛ لاتقطعين رزقي بالعكس انا اللي بجيب الزباين
ضحكو وقالت ام هادي ؛ ايه صح وش بتبيعون فيه
ابو هادي ؛ والله مافكرت للحين وش رايك ياهادي
حمد عقد حواجبه ؛ وحمد ماله راي
ابو هادي دقه بخفيف ؛ وش رايك انت بعد
هادي ؛ نخليه محل سجاد ؟
حمد بنفس الوقت ؛ محل اجهزه ؟
ام هادي ضحكت ؛ صح والله ماشي سوقهم
ابو هادي هز راسه بتفكير وكمل يتقهوى
..........••..........
بيت ابو راشد
وقت المغرب بعد ماراحو الضيوف وكالعاده من 4 ايام كل يوم يمتلي المجلس هدايا ويحتاس
بعد ماخلصو اروى وهاجر وشموخ من ترتيبه طلعت اروى للمطبخ ووراها هاجر وشموخ ودخلت وهي تشوف منيره تجهز شاي وقالت وهي تجلس على الرف ؛ الله يامنيره ريحة النعناع واصله للمجلس
منيره ابتسمت ؛ مضبطه شاي وجلسه على مسلسل جديد الساعه 6
هاجر ؛ اايي شفته احتريه من امس شكله حلو
شموخ وهي تشوف الساعه ؛ يلا يلا ماباقي شي خلونا نشوفه
اخذت هاجر كيس الحب وطلعو للصاله واجتمعو على التلفزيون وبدأ المسلسل
وهم مندمجين اشرت عبير لمنيره وام راشد وام عزام وراحت للمطبخ ولحقوها وكل وحده حطت لها عذر اللي تروح تشرب مويه واللي تشحن جوالها واروى وهاجر وشموخ يتفرجون مع شريفه اللي مستنده ع الكنب وبحضنها بنتها وعارفه وش يصير
واللي صاير ان عبير جايبه لأروى كيكه بمناسبة تخرجها وهديه لها ولهاجر ومن دخلت وشريفه تطفي التلفزيون والتفتوا كلهم لها وشافو عبير اللي شايله الكيكه وتضحك ؛ شوفوا صح لهينا مع شريفه بس ترا مانسيناكم
منيره بضحكه ؛ مبروك تخرجك يا اروى ، ونجاحك ياهاجر وعقبال تخرجك
اروى اللي وناستها اكبر من صدمتها قامت تحضنهم وهي مستانسه انه ما انسحب عليها
وهاجر اللي تضحك وشموخ قامت ترقص مع عبير اللي سحبتها وهي تغني والكل يضحك على خبالهم و آخر شي قامو كلهم يرقصون معهم وهم يضحكون
..........••..........
في مكان جديد
مزرعة ابو راشد
واللي كانت بآخر الديره وتبعد عن بيتهم تققريباً نص ساعه
خلصو تجهيزاتها وعدلو بيت الشعر وشالو الزرايع من الاحواض اللي بكل مكان وكل واحد مستلم شغله يشيك عليها وناصر وعبدالله يلعبون بالمويه عند ابو راشد اللي يسقي الزرايع والشجر وسعد وعزام بالخيمه يجهزون الجلسه وراشد وتركي واقفين عند النخل اللي راقي فوقه نايف يجمع تمر ونزل ؛ الظاهر اخر شي من التمر جانا الشتاء
راشد ؛ اييه خلاص
نايف نفض ملابسه ؛ والجو حلو وبتمطر الظاهر والمزرعه وخلصنا شغلها وش يبيلها ؟
راشد بضحكه ؛ يبيلها شبه بالخيمه وشاهي تركي
تركي ؛ ابشر والله يبو ناصر
راشد ؛ ااوووه مروق تريك
ابو راشد وهو جاي من جهة الشجر ؛ ومن يشوف الجو مايروق ؟
نايف وهو يأشر على اللي بيد ابوه ؛ العنب مستوي هالمره لاتنسى اروى
ابو راشد ضحك ؛ وانا جمعته لها ، يلا غسله وحط لنا منه والباقي خله بالكيس
اخذه نايف وراح يغسله وابو راشد وراشد وتركي راحو للخيمه اللي فيها سعد وعزام عند شبة النار
تركي ؛ ها اشوف اخذتو شغلتي
عزام ؛ حنا اشطر
تركي ضحك ؛ لا ياولد الجبيل ماتجي احسن من ولد الديره
سعد بضحكه ؛ عاد شبها ولد الجبيل
راشد ابتسم ؛ اجل ولد الديره بيذوقكم الشاهي حقه
ابو راشد ؛ ناصر انت وعبدالله روحو لنايف يجيب نعناع وهو جاي وخلوه يغسله
ركضو ناصر وعبدالله لنايف يجيبون معه نعناع
وتركي جلس يجهز وابو راشد والباقي تجمعو حوالين النار وبعد دقايق فزو من صراخ ناصر اللي جا يركض وهو يصارخ
وفزو كلهم خايفين من سمعوه وقرب وهو يقول بصراخ ؛ فززتت انا الاول
جا وراه عبدالله وهو يصارخ نفسه ونايف وراهم يضحك قال ابو راشد بعصبيه وخوف ؛ الله يصلحك انت وياه وش الحركات هذي
نايف اللي كاتم ضحكته ويتنفس بشكل سريع
قال تركي ؛ والله انها فكرة هالجني اللي اسمه نايف مسوي نفسه ماسوى شي وهو يالله يلقط نفس
هنا انفجر نايف ضحك وضحكو كلهم منه بعد خوفهم
وجلسو حوالين الشبه والجو والسوالف الحلوه وكملوها با الشوي للعشاء
..........••..........
بيت ابو هادي بعد العشاء
كانو جالسين على الأرض يلعبون ورقه و ام هادي على الكنب وتراقبهم
ضحكت وهي تحذف حمد بالوساده من شافته يسرق ورقه ؛ يا غشاش ياحمد رجع الورقه
حمد فز ورجعها وهادي سحب الاوراق تحت رجله
شهد ؛ هييه هيه رجع الاوراق ع اساس بتوقف الغش وانت بتسرق منهم
ابو هادي اخذهم ؛ هات ، خذي يامريم حطيهم عندك
ضحكت اخذتهم ام هادي وهي تحطهم عندها على الطاوله وتصب لهم شاي وتضحك على لعبهم اللي كله غش و من قال حمد وهو يحذف الورق ؛ بس انت وياه ، الا ابوي محشوم ... بس فزت
ابو هادي ؛ على ان كل لعبك غش بس نمشيها
شهد ؛ لا والله ما امشيها غشاش وخسران
هادي ؛ صح ولا يعرف يلعب
شهد ؛ على اساس انت تعرف تراك غشاش نفسه شف الورق تحت رجلك ياسراق ماعطيته كله لأمي
ام هادي بضحك ؛ صادقه كلكم غشاشين حتى انت ياحاتم يوم انشغلت اصب شاي سرقت 3 اوراق من الطاوله وسكت لك
ضحك ابو هادي وهو يحك جبينه بفشله
وقال حمد بغمزه ؛ اي تسكت للوالد حنا لا
هادي وشهد ؛ ههههههههههه
ابو هادي ضحك وهو يضربه بالسبحه بخفيف وقام يجلس
لمو اوراقهم وجلسو وقالت شهد ؛ يبه وش اكثر شي حبيته بالديره ؟
ابو هادي ؛ كيف يعني
شهد ؛ يعني انت صورتها لنا ..هي جوها حلو ومحلاتها قديمه بس حلوه ، لاكن غييير عن المدينه
ام هادي ؛ غير احلا ولا كيف
شهد ضحكت ؛ مدري بس يعني تختلف عن المدينه؟
حمد ؛ انتي تقولين انها حلوه وغير عن المدينه
شهد ؛ ايه
هادي ضحك ؛ وش ايه اشرحي زين
شهد ؛ خلاص مافهمتوني
ابو هادي اعتدل بجلسته ؛ لا قولي ماعليك
شهد ؛ يعني انا احب المدينه اسواقها بيوتها وكل شي ، بس الديره اللي صدمني فيها انها مخختللفه عن المدينه مره بيوتها واسواقها حلوه بس قديمه
حمد ؛ يا زين الكف على وجهك ، طيب صار لك ساعه تقرقرين اخر شي عاجبتك وانا احسبك كرهتيها
الكل ؛ هههههههههههههه
ابو هادي بضحكه ؛ والله حتى انا احسبها ماجازت لك بس من اسمها ديره ، يعني بتكون غير عن المُدن وبتكون قديمه ببيوتها ومحلاتها مثلها مثل ديرتنا اللي نروح لها كل عيد وعطله بس والله يا انها ديرةٍ خضراء ما شاء الله وجوها حلو
هادي ؛ اي صح يبه وش اسمها الديره ؟
ابو هادي ؛ ...

توقعاتكم لأسم هالديره اللي بتلم الأحباب وتجمعهم ؟

تفاعلوا