ياديرةٍ ضمّت كل الأحباب

Part 47

سبحان الله وبحمده سبحان الله العظيم

.

النجمه لطفاً قبل تبدون القراءه ❤.

..........••..........
في سوق المحاسن
كان ابو هادي بمحله وعنده عمال ومعه حمد
وابو راشد بمحله عند الطاوله يحاسب للزباين وعنده عبدالسلام يبيع وبرا السوق عند سيارته كان تركي وسعد ونواس وعمران ينزلون الصناديق واغراض المحل اللي جابوهم ووقفت سيارة راشد عندهم ونزل وهو مبتسم ؛ يالله عاونهم يالله
سعد ؛ ارحبب
تركي ؛ هلا هلا تعال اربط شماغك وثوبك وشل معنا
راشد ضحك ؛ والله مايشيلها الا انت خلني اشوفك مكروف ياخي
تركي ؛ اهب عليك والله اني اكرف اكثر منك
راشد ضحك وهو يجي ويشيل معه صندوق ودخلوا للسوق ولمحل ابو راشد ونزلوا الصناديق ونواس يعبيها ويرتبها وحط راشد الصندوق والتفت على ابوه اللي قال ؛ هلا ها عسى ماخلاف " يقصد منيره وروحتهم للمستشفى "
راشد ابتسم ؛ ابد البشاره
ابو راشد والعيال ؛ ابشر ، وش
راشد بضحك ؛ بيجيك حفيدٍ جديد يبو راشد
وسكتوا لثواني يستوعبون وابتسم ابو راشد ؛ ماشاء الله ماشاء الله عسى يجيبه على خير ويحييه
سعد ابتسم وقرب يسلم عليه ؛ مبرروك يبو ناصر
راشد بأبتسامه ؛ الله يبارك فيك وعقبالك
ابتسم سعد وتركي نفض ثوبه بسرعه وهو يحضن راشد بضحكه ؛ كلي بهارات لكن والله غير اخمك على هالبشاره
راشد ضحك وهو يحضنه ويخبط على كتفه ؛ عقبال ماتبشرنا بجية ولدك
ابو راشد وسعد ؛ امين
وابتسم تركي وتنحنح وبعد وقرب ابو راشد يسلم على راشد اللي باس راسه ورجعوا يكملون شغلهم
•
بالطرف الثاني من السوق
في محل ابو هادي
اللي حصل عمال وكان واقف يكلمهم وحمد معه ودخلوا هادي ومساعد ؛ السلام عليكم
ابو هادي التفت ؛ وعلييكم السلام
مساعد ؛ ها عسى لقيت اللي يعرفون
ابو هادي ؛ ايه ماشاء الله طلعوا يعرفون لكل شي مو بس للفرشات وبيعها
ووقف مساعد عند ابو هادي ومشى حمد بطفش للطاوله وجلس عند هادي اللي كان جالس على الكرسي وحاط راسه ع الطاوله ؛ تدري انك حمار ؟
هادي رفع راسه ؛ وليه ان شاء الله ؟!
حمد بقهر ؛ رايح مع مساعد من فجر الله وانا هنا اسمع تعليمات ابوي الين صدعت
هادي تنهد ؛ والله حتى انا صدعت
حمد ؛ هذا وانت توك جاي ، الا وين رحتوا ؟
هادي ؛ قريب عند القهوه اللي ورا المحطه
حمد ؛ ليتك اخذتني انت ومساعد هاللي كنه خويك قبل يصير خوي ابوي
هادي ؛ والله عاد خويي وخوي ابوي
حمد تأفف وهو يقوم ؛ انا طفشت بقول لأبوي بطلع امشي بالسوق وبنحاش للبيت
هادي ؛ سيارتك معك ؟
حمد ؛ لاجاي مع ابوي
هادي ؛ حتى انا مع مساعد
حمد ؛ ابك اروح مشي ولا اجلس هنا صدع براسي هالعامل هذا قاعد يعدد وش يعرف
هادي ؛ وين لقيتوه ؟
حمد ؛ جا لأبوي هو وخويه يبون شغل جينا الصباح نشوف المحل وقال لي ابوي ربع ساعه ونجي وهذا حنا لنا ساعتين
هادي تنهد ؛ اقولك شي ؟
حمد ناظره بأنتباه ؛ وشو ؟
هادي وهو يقوم ؛ قرقرتك عز الله انها اكثر من هالعامل اللي تقول
وناظره حمد بصدمه وهو يشوفه راح لجهة ابوه ومساعد والعمال اللي عندهم ؛ لا يالحمار صدق !
ونزل من الطاوله بقهر وهو يجلس ع الكرسي بطفش ويطقطق بجواله
ومر هالوقت عند محل ابو هادي بأنه يتفق مع العمال على شغلهم ورواتبهم
ونفس الشي في محل ابو راشد اللي كانوا يرتبون الأغراض ويصفون الصناديق
..........••..........
بيت ابو راشد الظهر
اللي رجعوا من السوق بعد ما اذن الظهر وصلوا بالمسجد ورجعوا قبل دقايق وكان تركي عند سيارة ابوه ينزل الأغراض اللي جابوهم للبيت ومن بينهم اكل قطوة اروى ودخل للبيت وهو يتنحنح ونادى ؛ يممه
ام راشد ؛ هلا تعال مافيه احد
ودخل وهو يحط الاغراض ؛ السلام عليكم
ام راشد ؛ وعليكم السلام
وطلعت اروى من سمعت صوته ؛ تتركي جبت اللي وصيتك ؟!
تركي عطاها الكيس ؛ ايه هذا هو
اروى اخذته وابتسمت ؛ كففو ياتروك
وركضت تحط للقطوه وطلع تركي برا وهو يروح لسيارته وركب وهو يفتح الدرج اللي فيه اوراق واشرطه واخذ ورقه وهو يستند ويرجع يقراها وهو مبتسم
وبعد دقايق وقفت سيارة نايف عند البيت وهو ينزل وانتبه لسيارة تركي اللي بابها مفتوح وناظر وهو يشوف تركي جالس فيها ومتكي ع الباب وفاتح نصه وجالس يقرأ شي بورقه ولا انتبه لنايف اللي قرب وسحب الباب وفز تركي وهو ينزل رجله بخوف ؛ ببسم الله
نايف ضحك وهو يناظر الورقه اللي يحاول تركي يخفيها ؛ بسم الله عليك ! وش اخبارك طيب ؟!
تركي اعتدل وهو يتنحنح بتوتر من ابتسامة نايف اللي تدل على ان فيه شي ويخاف انه شاف الورقه ؛ اا .. بخير
ولف يناظر سيارة نايف اللي بجنبة ؛ مالك صوت بسم الله
نايف قبل لايمشي لجهة الباب الثاني ؛ انت ماسمعتني الظاهر منت مع العالم
تركي اللي من شافه يمشي بيركب جنبه حط الورقه بالدرج بسرعه ويرتكي عليه ويشد على فروته بتوتر
وركب نايف وهو يضحك بخفه ؛ ياحليييلك ياتركي تدري ليه ؟
تركي تنهد بتوتر ؛ لا ما ابي ادري انزل بندخل
نايف مسكه قبل ينزل وهو يضحك ؛ حلفت والله لا اعلمك ليه
وناظره تركي ونايف من داخله ميت ضحك على وجهه اللي لو سوا شي مايعرف يخفيه ابد وقال وهو يتنحنح ؛ تصدق من اليوم تارك اشغالي وافكر بكلامك امس
تركي هدا شوي ؛ وشو كلامي ؟
نايف ؛ البارح يوم تقول علمت امي وقلت زايد بالغلط وقلت لها عزام قاله وهو ماقال ، وشلون دريت عن اسمه اجل اذا عزام ماقاله ؟
تركي رجع يتوتر وتصنم بصدمه وضحك نايف ؛ والله اني قايل فيك بلا ، غرد غرد
تنحنح تركي اللي راح صوته من الأرتباك ؛ اا وشو ؟..
نايف ؛ الظاهر مب ناوي تعلمني
وبعد يد تركي وهو يفتح الدرج بسرعه ؛ وخر وخر شفتك حطيت ورقه هنا
تركي فز وهو يبعد يد نايف ؛ وششو وخر انت
ولا قدر يلحق على نايف اللي سحب الورقه بسرعه وهو ينزل يركض ونزل تركي وراه ويلحقه وهو ينادي ؛ نااايف
وركض نايف للمخزن اللي كان بجنب البيت بمسافه بسيطه ودخل وهو يصفق الباب وياخذ نفس بضحك وهو يفتح الورقه ؛ عز الله غير اقراها اشووف انا اللي مغير يفكر ووجهه منقلب اشوففه
تركي قرب عند الباب وهو يهمس ؛ نايف هاتها
وطنشه نايف وهو يضحك وجلس تركي عند الباب بتعب وهو يخاف يدق الباب وينادي يطلع ابوه ولا احد من العيال على الصوت وقرب للباب ؛ ابك والله غير اوريك الوجه المنقلب لاكفختك اطلع انت بس
وتنهد وهو يسمع ضحكة نايف وشد على يده وهو يحس انه انكشف وبيفضحه نايف من سمعه يقول ؛ الله الله نشوف الكلام ياااكثره ... وسكت يقرا وتركي توتر زياده من سكوته وقال بهدوء ؛ نايف والله لو يدري عنها احد ماني اخوك ولا تعرفني ...... نايف ؟
والتفت بخوف وهو يدق الباب ؛ وللد
وقال نايف بهدوء وهو يقرا الورقه ؛
لاتتركيني للهوى والنسيان
ترا حبك بقلبي باقي
تركي سكت شوي يستوعب وتنهد وهو يمسح وجهه برااحه من عرف ان نايف اخذ الورقه اللي كتبها بالمحل امس مو ورقة شموخ وكمل نايف اللي يقرا بصوت عالي ؛
ودي لو انسى الدنيا واقعد على فيّه
ومانسيتك ياحبيبي لاتنساني
اذكرك واحن لك وانت صاحب الحنيه
لاتقسى على اللي يحبك وتجفاني
هالأبيات جت على جرح تركي رغم انه كتبها امس بالمحل وهو يفكر بشموخ وبدون لايحس لكن وصفت حاله اليوم وباللحضه هذي اللي جالس على عتبة باب المخزن وساند راسه وبالفتره هذي كان كل تفكيره بشموخ وخطبتها وخايف يجي يوم يسمع فيه خبر زواجها وهالشي برضوا كتبه بأبيات اللي كمل نايف يقراها بصدمه ؛
كتبت خطٍ بيدها لاتنساني
مثل وصاتي لها لاتتركيني
لاتلبسين خاتم ماهو بيدي الثاني
ولا تهجريني للوقت ترا ماهو منسيني
هذي الأبيات بالضبط شعوره لها وهي مخطوبه وهو لما كان يقرا رسالة شموخ بالسياره يتذكر كيف اعطته الرساله وكيف عطاها الشريط وكان اخر يوم كلمها فيه ولما مشوا ودعها بقصيده ومثل ماكتب الأبيات اللي قبل كتب هذي اللي كمل نايف يقراها ؛
ودعتك ربٍ بحبك امتحني
وذكرتك بشريطٍ وقصيده
واتغنى بك ولو ماني مغني
وافكر بك وماغبت عن بالي دقيقه
واخذ تركي نفس بهدوء وهو يشوف ان نايف زاد الطين بله وفز من الباب وهو يلتفت وضرب كتفه وهو ياخذ الورقه ؛ هات الورقه اهب عليك !
نايف رد له الضربه وهو يضحك بصدمه ؛ ياوولد ! وش ذا الحب والرومنسيات هذي ! منين سارق القصايد
تركي مشى للسياره وهو يسفط الورقه ؛ سد حلقك
نايف وقفه وهو للحين مصدوم ويضحك ؛ بالله انت كاتبها ؟ وبعدين متى كتبت لك لاتنساني !
تركي تنحنح ؛ يخووي ماكتبت انا كذا قلتها بقصيده كلام كلام بس
ومشى للسياره وقال نايف وهو يمشي وراه ؛ وحتى اللي ذاك اليوم لدياركم قلتوا راجعين والثانيه شفت الليل والسماء زرقاء مدري وشنهي انت كاتبها!؟
تركي هز راسه وحط الورقه بالدرج وهو يسكر السياره ويلتفت لنايف ؛ لاعاد تلقف يانايف وياويلك تعلم احد
وتعدا بيدخل البيت ووقفه نايف ؛ اصبر اصبر ماعلمتني وشلون دريت عن اسم زايد ؟ .. هي قالت لك !
تركي تنهد ؛ لا سألتها منهو ولد عمك قالت زايد
وجا بيدخل ووقف نايف قدامه ؛ يخخوي اصبر اكلمك انا كيف سألتها وين ؟
تركي تنهد ومسك وجه نايف وهو يناظر عيونه بقهر ؛ سألتها بالبقاله وبس لاتلقف يورع ووخر
ودفه ومشى للدوانيه وهو يدخل ونايف حط شماغه على كتفه بضحكه ؛ منت بهين ياتريك ، اجل صرت شاعر ؟ .... اعقب والله تعرف
ومشى للمطبخ وهو يشوف الباب مفتوح ودخل وماشاف فيه احد بالمطبخ وتنحنح وهو يدخل الصاله وشاف الصغار عند التلفزيون واستغرب ان امه والبنات مو فيه ودخل لممر الغرف وهو ينادي ؛ ياهووه
والتفت على باب غرفة هاجر واروى اللي فتح وطلعوا يركضون وقالت هاجر وهي تلحق اروى وتحط يدها على فمها ؛ والله لا اقول انا اسسكتي ، نايف نايف الببشاره
نايف ناظرهم بأستغراب ؛ وش !
اروى كانت تدف هاجر وتبعدها وهاجر متعلقه فيها ومسكره فمها ونطقت هاجر بسرعه ؛ زوجة راشد حامل وبتدخل الشهر الثاني بعد
وبعدت عن اروى اللي كانت تتخبط وتضرب يدينها ومن بعدت هاجر لفت اروى عليها وهي تطقها ؛ انقلعي سخيفه انا قمت اول
هاجر ردت لها الضربه ؛ ااه انا اللي قلت بعلمه وانتي طلعتي تهابدين
قاطعهم نايف ؛ احللفي صدق !
اروى وهاجر ؛ والله
نايف ابتسم ؛ ماشاءالله يااربي ، وغريبه تو كنت برا عند تركي ماعلمني
هاجر ؛ تركي فاهي تلقاه نسى ولا سحبو عليه وماعلموه
اروى ؛ ولا تلقاه هايت ماكان عندهم بالمحل يوم راح راشد يعلمهم
نايف ضحك وقالت هاجر ؛ الممهم ابي بشارتي استاهل ولا لا ؟
اروى ؛ والله يانايف اني كنت بعلمك قبلها بس انها سدت فمي سد الله فمها
هاجر شهقت ؛ اهب ابك استغفري
اروى بقهر وهي تبعدها بترجع الغرفه ؛ استغفرالله اذلفي
نايف ضحك وهو يمسكها ؛ تعالي تعالي حتى انتي تستاهلين بشاره بس وين امي وعبير وشريفه
اروى ابتسمت ؛ ايه عشت ، امي بالغرفه تو دخلت وعبير تجهز اغراضها من الصباح وشريفه الظاهر نامت قالت لي امي اشوفها ونسيت
نايف ؛ وشو عبير وش تسوي ؟!
هاجر ؛ تقول بيمشون بكره يمكن عشان ابو سعد يبيه بشغل وعبير قالت بتروح وترجع بالتمايم عشان فيه اغراض تبيها من بيتها
نايف ؛ افااا وماقالتوا لي الا الحيين ؟
اروى ؛ والله انا دريت الفجر ونسينا نعلمك واصلاً بس انا والبنات اللي عرفنا ابوي وراشد وتركي مادروا
وطلعت ام راشد على اصواتهم ؛ نايف متى جيت ؟
نايف التفت ؛ هلا يمه قبل شوي
ام راشد ؛ اجل يلا للغداء ابوك قال اذا جا حطوه صل وتعال خذه ، وانتي وياها ورا مارحتوا اخلصوا قدامي المطبخ
وطلعت والتفتت هاجر ؛ نايف لاتنسى بشارتي
اروى ؛ وانا بعد
ودفتها هاجر قدامها وراحو للمطبخ وضحك نايف ودخل غرفته
بعد نص ساعه تغدوا وخلصوا وكانت عيون نايف على تركي ويتبسم وتركي يأشر له بحواجبه وهو مرتفع ضغطه منه وماصدق يخلصون ومسكه وهو يضربه بشماغه ؛ انقللع يالموذي اشغلتني
نايف ضحك وهو يغسل ؛ والله مبين انك مسوي شي وماتبي تعلم وعجزت فيك
تركي ؛ والله ماسويت شي لاتبلشني عاد وتشككهم
نايف التفت يناظر تركي بجديه ؛ طيب قل الصدق انت وش دراك عن اسم ولد عمها ؟
تركي قرب يغسل وهو يتأفف بطفش ؛ ياثور قلت لك سألتها لما كنا بالبقاله قلت ولد عمك من قالت زايد
نايف ناظره بشك ؛ والله ماني مصدقك لكن اعرف شلون اطلع كذبتك
تركي التفت يناظره وهو يطنشه ومشى للدوانيه شالوا الغداء ودخلوا للمطبخ وكانوا هاجر واروى يغسلون الصحون وقالت هاجر وهي تنفض يدينها ؛ هيه امي تبي اغراض من البقاله تقول اذا بغيتوا تروحون للسوق علموها
نايف التفت لتركي ؛ تروح انت ؟
تركي ؛ لا والله مصصدع ومن الصباح ما ارتحت بروح اقيل ساعتين ان قمت رحت
اروى ؛ اجل نايف تكفى ونبي نروح معك البشاره ولا نسيت ؟
تركي ابتسم ؛ الله الله بشارتهم يانايف زين اني مادريت منهم
هاجر ؛ والله عاد يازين البشاره منا المهم نايف خلنا نروح تكفى
نايف ؛ الحين ؟
هاجر واروى ؛ ايه
نايف ؛ طيب اذا الورعان صاحين كلهم بناخذهم معنا عاد لازم بكره يروحون
تركي ناظرهم بأستغراب ؛ منهم !
نايف ؛ يووه مادريت عبير بكره بتروح
تركي ؛ من علمك ؟ ليه علامهم وش معجلهم
نايف ؛ ابو سعد يبيه بشغله
تركي ؛ خلاص يروح سعد بسلامته عبير تجلس
هاجر ؛ لا عبير تبي اغراض من بيتها لازم تروح وتقول يجون بالتمايم
اروى وهي تسكر المويه ؛ خلاص تجي ماعليكم ٢٠ او ٢٥ يوم بالكثير وتجي بس والله انها جاحده يوم كانت بتجي قالت بجلس لين تمايم العنود
هاجر ناظرتها بصدمه ؛ ماعليكم اجل ؟ غريبه وين الصياح ولا بس يوم راحو اهل عزام بغيتي تموتين
نايف قدر يمسك ابتسامته واروى ناظرت تركي اللي ماقدر وابتسم وهو يمسح وجهه وصدت بأبتسامه ؛ تعودنا عليهم
هاجر ؛ يعني عبير ماتعودتي ؟
اروى ؛ يختي خلاص وانا يوم صحت قلتي المراهقه صعبه ومدري وش واذا ماصحت مب عاجبك بعد
نايف ؛ خخلااص اص اص مشينا يلا
اروى وهاجر التفتوا بسرعه ؛ صدق ؟
نايف ضحك ؛ ايه اجهزوا وخلوا الورعان يجون بس اول شي شوفوا ان كان احد نايم لاتعلمونهم بننسرق عنهم مهو ان صحى يبلشنا ليه ما اخذناه
اروى ؛ يلا اجل بروح انا اجهز هاجر شوفيهم
وطلعت من المطبخ بسرعه قبل لاترد هاجر اللي تأففت بقهر وهي تطلع تشوفهم والتفت نايف لتركي وهو يدق كتفه بضحك ؛ وين وصل العاشق
تركي ضحك بقهر ؛ بالله اسكت
نايف ؛ خلاص خلاص تروح معنا ؟
تركي ؛ لا بنام رح انت وياهم
ودخل للصاله هو ونايف وشافوا ام راشد وشريفه فيها وسلم تركي ودخل غرفته ينام ونايف جلس وهو يبوس العنود ؛ بنروح البقاله الحين انا والبنات وبناخذ الورعان وش بغيتوا منها
شريفه ضحكت ؛ ابد تعرفني وش احب
نايف ضحك ؛ ليكون للحين تحبين عصير ابو نص؟
شريفه ؛ اي والله وبرتقال بالله
نايف ضحك ؛ ابشري والله
والتفت لأمه اللي قالت ؛ ابوك والعيال وينهم
نايف ؛ والله يايمه غطوا ابوي وسعد بسابع نومه ، وراشد بغرفته تلقينه لحقهم بعد
ام راشد ؛ اييه اجل هات الدفتر هذا واكتب النواقص
وقام نايف وهو ياخذه من طاوله التلفزيون ومعه القلم وهو يجلس عند امه اللي قالت وهي تتذكر ؛ انا وش قلت ناقص اللهم صل على محمد ، ايه ايه من اغراض الفطور مافيه مربى
نايف وهو يكتب ؛ مربى .. هه وغيره
ام راشد ؛ جب اللي بالبطيخ حلو وهات بببععد .. ايه سكر خلص وجبن ابو كاسات .. وهات سيدة الفطور على قولتك تراها خلصت
ضحكت شريفه وقال نايف وهو يكتبها ؛ اوووه اهم شي الحلاوه لو مانفطر الا هي بجيب طحينية ابو جمل بعد عشان ماتخلص ... وغيره
ام راشد ؛ وجب بسكوت الميزان وجب بعد ...... وكملت تعدد عليه الأغراض وهو يكتب
وبعد دقايق طلعوا اروى وهاجر والبزارين وجت اروى وهي تشوف امها ونايف مشغولين بالأغراض وناظرت شريفه ؛ وين منيره ؟
شريفه ؛ بغرفتها ليه ؟
اروى ؛ خلاص اذا جت قولي لها ان عيالها راحو معنا
شريفه هزت راسها وقالت ام راشد ؛ هاجر جابوا عسل مع الأغراض اللي اليوم ؟
هاجر وهي جالسه عند باب الممر حق الغرف وتلبس مناير جاكيتها ؛ مدري اروى رتبتهم
وناظرت ام راشد اروى اللي قالت ؛ ايه ايه جابوا
ام راشد ؛ زين اجل امسحه وجب صابون ولاتنسى شي
نايف قطع الورقه من الدفتر وهو يصفطها وحطها بجيبه ؛ ابشري ، وين خويلد ؟
هاجر ؛ تقول عبير ماراح يروح بس جيبو له بطاطس ابو ورده
نايف ؛ طيب وعبير تبي شي ولا لا
هاجر ؛ لا
نايف وقف ؛ زين اجل يلا مشينا
ام راشد ؛ انتبهوا للورعان لايضيعون خلوهم معكم
نايف والبنات ؛ ان شاء الله
وطلعوا وقالت اروى ؛ مانروح مشي ؟
نايف ؛ لا امي تبي اغراض واجد لازم بالسياره اركبوا
وركبت هاجر قدام واروى والبزارين ورا وحركوا للبقاله وبدقايق وقفوا عندها ونزلوا والتفت نايف بعد ماسكر الباب للسياره اللي بجنبه وابتسم وهو يمشي ومن دخلوا كان مرزوق يحاسب عند الطاوله ومشغل الراديو حقه على اغنيه وراحو اروى وهاجر والبزارين لورا ونايف قرب وهو يدق كتف مشاري ؛ يالأخو
والتفت مشاري وضحك نايف ؛ وكل شوي معي انت بكل مكان بالمكتب بالبقاله
مشاري ضحك ؛ ههلا ، والله انت اللي تلحقني
نايف ضحك وهو يشيل الولد اللي معه ويبوسه ؛ ماشاء الله هذا يزن
مشاري ابتسم ؛ ايييه حبيب خاله مواعده لي يومين ولا رحت لهم الا اليوم
نايف حطه وهو يجلس على ركبه ؛ وش اسمك
يزن " ولد اخت مشاري عمره 3 سنوات ونص " ؛ يزن
نايف ضحك وهو يرجع يبوسه ؛ ياازقينننك زقيناااه ينن اجل ، ناصر .. عبدالله ، تعال تعال اوريك اخوياك
ومسك يده وهو يمشيه وابتسم مشاري وكمل ياخذ اغراضه
ترف نادت ؛ ججوجو
والتفتت لها جوري وتلفتت ترف ؛ لا هاجر .. هااجر
وكان مشاري يسمع واعتدل بأنتباه وهو بيتأكد وسمع صوت خفيف وراه بالجهه الثانيه ؛ هنا تعالي
ومشى على اساس يشوف بالرفوف ولف بسرعه يمينه وناظر للي واقفه وهو يحس انه عرفها من شكلها وشبه تأكد ومشى بسرعه وهو يدور نايف اللي كان عند الثلاجه هو ويزن وناصر وعبدالله ووقف بسرعه من كان بيصدم بوحده بالغلط وتنحنح ؛ ماعليش
وتعدا وكمل بسرعه لعند نايف اللي كان عند الثلاجه ومن شافه تنحنح بأرتباك ؛ يزن يلا
بالطرف الثاني كانت اروى تمشي ووقفت بصدمه من شافت مشاري قدامها وهي تعرفه وقد شافته كثير مع نايف وبعدت من بغت تصدم فيه وهي تبعد وركضت لهاجر اللي كانت عند ترف تطلع لها البسكوت من فوق الرف وفزت من مسكتها اروى وهي تتكلم بهمس وبسرعه ؛ تخيلي تخيلي تخيييلييي
هاجر ؛ بسسم الله وجع وشو
اروى اخذت البسكوت وهي تعطيه ترف ؛ روحي روحي جيبي بطاطس لخالد
وراحت ترف وقالت اروى ؛ مشاري هنا
هاجر شهقت ؛ ووجع وش اسوي له يعني
اروى ؛ يااخبله تعالي شوفي ولد اخته تو جيت من نايف يقول يزن ولد اخت مشاري ورحت وهو يطلع قدامي تعالي تعاليي
وسحبت هاجر اللي مامداها تستوعب وهي تأشر لها عليه من بعيد ؛ شوفيه هذاك الورع اللي شايله نايف يزن وهذا مشاري يااطوله يابنت وانا اشوف نايف طويل طلع مشاري اطول منه ومن الثلاجه بعد
وناظرتهم هاجر وهي فعلاً تشوفه طويل رغم ان نايف اطول واحد بالعايله الا ان مشاري اطول منه وناظرت كيف يشد على سبحتة وكأنه منزعج من شي من ملامح وجهه وكيف انه يشبه نايف بوقفته وحتى بلبسهم كانوا طقم كلهم ثياب سودا وشمغهم لافينها عصبه وناظرت ولد اخته اللي لابس ثوب شتوي وجاكيت سودا وابتسمت ؛ يااحلو يزن ياااربي يالشعر والوجه يهبل
اروى ؛ يجنن نتفه انا مت عليه كنت بلعب معه واسولف وقال نايف روحي كش عليه
هاجر التفتت وهي تسحبها ؛ اي خلاص امشي لايشوفنا ثم والله ماعاد نطب البقاله
اروى ؛ يويلي الورعان وين غدو
هاجر ؛ ترف واميره عند الحلاو وجوري ومناير هذا هم
اروى قربت وهي تمسك يد جوري ومناير ؛ جوري يلا تعالي بنروح لترف واميره هناك
جوري ؛ هذي اميره مناير مع ترف
اروى ؛ هه ... ماعليه كلهم واحد يلا
ومشت وهم معاها وهاجر راحت لترف ومناير وهي تاخذهم وكملوا يشترون وبعد دقايق قالت اروى ؛ هاجر دوري بطاطس خالد مالقيناه
هاجر ناظرت الرفوف وهي تمشي تدوره ومالقته وقالت وهي تمشي للطاوله ؛ عمي وين بطا... وسكتت بصدمه وهي تشوف مشاري اللي للحين موجود وواقف يحاسب وهو شايل يزن والتفت العم مرزوق وهو منشغل يحاسب ؛ هلا ياعمتس وش بغيتي
هاجر كانت واقفه بتوتر وهي ترفع عيونها لمشاري اللي واقف وكان يناظرها وفز من استوعب الأغنيه اللي مشغلها العم مرزوق واللي كانت ؛
وشاءت الأقدار نلتقي ..
بعد ماشفتك ؟ تختفي! ..
اليوم لقيتك قبالي ..
عينك بعيني ياكل شوقي ولهفتي ..
ونزل عيونه بسرعه ولفت هاجر بترجع بسرعه وهي تفز على ترف اللي جت ومعها كيس البطاطس ؛ هاجر هذا هو لقي.... هاجر حطت يدها على فم ترف وهي تقول بنفسها بقهر ؛ " هماني جوجو هالمره هاجر ابك غسى ماهاجر عسى ماجوجو " وهمست وهي تحاول تمسك نفسها ؛ امشي
ورجعت هي وترف عند اروى ومشاري حاسب اغراضه واخذ الأكياس وطلع هو ويزن وجا نايف وهو يوقف عند البنات ؛ ماخلصتوا .... ابك ماشريتوا شي
هاجر ؛ اايه نندور البطاطس هذا الحين نشتري رح انت قضي الأغراض
ومشى نايف وهو ياخذ كيس وياخذ الأغراض ويقرا بالورقه
بعد دقايق خلصوا كلهم وحط نايف الكيس الثاني ورجع الورقه بجيبه ؛ خلاص باقي قشطه مافيه ؟
مرزوق ؛ الا هناك بالصندوق
وراح نايف ياخذها وجت هاجر وهي تحط كيسها وبعدها جت اروى وباقي الصغار اما عبدالله وناصر كانو خالصين وجالسين عند باب البقاله ويشربون عصيرات
خلصوا كلهم وطلعوا كل واحد معه الكيس حقه ونايف شايل اكياس البيت ؛ فيه مكان ورا ؟
اروى اللي كانت ورا هي والبزارين وهاجر قدام ؛ لا كل واحد معه قشه حطهم عندكم متوسعين
ضحك نايف وركب وحط بعضها بحضنه وبعضها عند هاجر وهو يتنهد بتعب ؛ اوووه مابغينا كم لنا بالبقاله
هاجر وهي تشوف ساعتها ؛ نص ساعه
نايف حرك ؛ يييااوك والله لوننا وش
ناصر ؛ انا وعبدالله خلصنا قبلكم بغينا نروح البيت
ضحك نايف وقالت اروى ؛ الا اقول نايف يزن كم عمره
نايف ابتسم ؛ ٣ سنين ياحليله
جوري ؛ كبر اميره ومناير
نايف ؛ ايه ياجوجو كبرهم
اروى ؛ وانت تقول ولد اخت خويك مشاري يعني بس اخته هنا
نايف ؛ ايه صار ماتدرين ! امه وابوه واخوه بآخر الرياض
هاجر ؛ وهو ماعنده الا اخو واخت؟
نايف هز راسه وقالت اروى ؛ ويجي من الرياض لهنا كل يوم ؟
نايف ؛ لا مب كل يوم احياناً يصير عند اخته وبالأجازات يروح لأهله
ووقفوا عند البيت ونزلوا ونايف اخذ الاغراض وهو ينزلهم وسكر الباب ودخل للصاله وهو يحطهم ؛ السلام عليكم
ام راشد والبنات ؛ وعليكم السلام
ام راشد ؛ علامكم تأخرتوا
نايف بضحك ؛ والله يا امي من هالأغراض مابغيت اخلصها
ام راشد ؛ وعساك لقيتها كلها
نايف ؛ ايه ايه كلها جبتها
ونزل شماغه على كتفه وهو يروح داخل لغرفته
والصغار جلسوا بنص الصاله وهاجر واروى حطوا الاغراض اللي جابوا لهم وللبنات عندهم وقالت اروى ؛ يمه قبل شوي شفنا ورع صغير ياحليله اسمه يزن
ام راشد ؛ منهو ورعه ؟
اروى ؛ يقول نايف ولد اخت مشاري خويه هو عنده اخت بالديره ؟
ام راشد ؛ ايه ساره ماتعرفينها ؟
اروى وهاجر ؛ لا
وتنحنحت هاجر ؛ يقول نايف عنده اخت واخو وامه وابوه بالرياض
ام راشد ؛ ايه حسنه امه وعواد ابوه واخوه فارس كانوا هنا اول بس يوم تزوجت ساره اخذهم فارس عنده وهو متزوج بعد
عبير ؛ مالحقوا عليهم هاجر واروى بس انا اذكر يوم يسيرون علينا
شريفه ؛ ايه وساره كبري اعرفهم حتى انا
ام راشد ؛ هاجر كانت كبيره وقتها اصغر من اروى بشوي غريبه ماتذكرهم
هاجر ؛ لا والله ما اذكرهم ما اذكر الا ان نايف ومشاري اخويا من زمان
ام راشد ؛ ووش كبره يزن والله من زمان عنها ساره
اروى ؛ كبر اميره ومناير يقول نايف عمره ٣ بس مبين اكبر بشوي ماشاء الله
ام راشد هزت راسها ؛ الله يخليه لأهله
ونزلوا هاجر واروى عباياتهم وراحت هاجر للغرفه تحطهم وطلع نايف ؛ فيها احد الصاله ؟
هاجر ؛ لا تعال
اروى ؛ يمه وين منيره
ام راشد ؛ بغرفتها عسى مهي تعبانه
اروى ؛ ماتقول ريحة عطر مب زينه ولا راحت ؟
ام راشد ؛ مدري يمكن راحت
وطلعوا نايف وهاجر وجلسوا واخذ نايف العنود من امه ؛ عطيني عطيني حبيبة خالها .. عنوده وش اخبارك
..........••..........
بيت ابو هادي
اللي من بعد الغداء دخل ابو هادي ينام بعد ماقال لهم ان العمال بيجون العصر عشان ينقلون التلفزيون للصاله ويحطون الفرشه وكان حمد بالمجلس يلعب وعنده شهد وام هادي بالمطبخ وهادي بغرفته
شهد كانت جالسه بجنب حمد وتشوف لعبه وتنهدت بطفش ؛ حمد
حمد وهو مندمج يلعب ؛ هاه
شهد بقهر ؛ ياخي ماودي اكره هالديره بس شكلي بكرهها من الطفش
حمد ؛ والله حتى انا من كرف المحل
شهد ناظرته بصدمه ؛ وش كرفت الا ياحضك تطلع بالسوق تتمشى وانا هنا جالسه قسم بالله طفشت
حمد ؛ امحق تمشيه اليوم ابوي صافني مع العمال يعلمني
شهد ؛ وهادي معك ؟
حمد ؛ لا هادي كان مع مساعد بالقهوه
شهد ؛ وين مكانها القهوه ؟
حمد ؛ شفتي المحطه اللي ورا ورا .. اللي رحنا لبقالتها ذاك اليوم بالليل ؟
شهد ؛ ايوه ؟
حمد ؛ وراها حقت رجال بس
شهد ؛ وغريبه ابوي ماخلاه يكرف معك
حمد تنهد من خلصت اللعبه وحط اليد وهو يناظرها ؛ ابوي مايبي يشغله لأنه مبين تعبان ولا يقدر اول شي من يده ونفسيته ضاربه مدري علامه
شهد اعتدلت وهي تتنحنح ؛ يعني ماتدري ؟
حمد ؛ الا والله ادري وكلنا ندري انها من بنت سامي اذا يده انكسرت بسبتها وقفت على نفسيته ؟ بس كلنا مطنشين نبي نحسسه انه شي مايستاهل عشان ينسى
شهد ؛ اي والله صادق اما اذا زعلنا معه وكل شوي جبنا سيرتها ماراح ينسى
حمد ضحك ؛ الله عليك تفهمين اجل .. المهم الطفش عندك التلفزون اليوم بيحطونه لك بالصاله وتابعي فيه خليني بهالكم ساعه العب
شهد ؛ طيب بلعب معك وشلون
حمد وهو ياخذ اليد الثانيه ؛ ععز الطلب ، هه خذي نلعب مصارعه واللي يفوز يحكم على الخسران
شهد ؛ هييه ماعرف العب اكيد بخسر
حمد ؛ طيب اول محاوله اعلمك وبعدها نشوف
شهد ؛ يلا
وشغل حمد اللعبه وهو يعلمها وشهد تحاول تفوز عليه وانتهت بأنها فازت وحمد تعمد يفوزها وضحكت ؛ ايييه والله اني كفو الحين احكم عليك
حمد ضحك ؛ ايه بس تراني مالعبت صح عشانها اول مره لك احكمي حكم سهل
شهد بسرعه ؛ نبي نطلع
حمد ؛ والله اني داري ، وين نطس
شهد ؛ لمزونه
حمد ؛ ييوه والله مافيني حيل اطقها لديرة ابو صالح وثم يمسكني راجح ، غيره
شهد ؛ بطلع ياخي طفشت طفشت تعرف شلون طفشت ؟
حمد ؛ اطلبي الله وعطيني حكم غيره ولا كملي لعب يروح الطفش
شهد تأففت ؛ ماعندي شي الا اني ابي اطلع
حمد ؛ والله الناس الحين الظهر مافيه احد
شهد ؛ ليه ظهر العيد هو ؟ بعدين حتى الظهر ترا الناس هنا طوول النهار ماشاء الله
حمد ؛ يليل البلشه ، شرايك تقولين لهادي ؟ ومنها تخلينه يتمشى شوي
شهد ؛ هادي مايقدر يسوق .... وسكتت من جت لها فكره وهي تبتسم بضحك ؛ بسوق فيه
حمد ضحك ؛ على القووه ، روحي اتحداك يوافق
شهد فزت ؛ ليه مايوافق انا اقنعه
وقامت وهي تحط اليد ؛ كمل انت مع السلامه
وطلعت وضحك حمد وهو يكمل لعب
بغرفة هادي اللي كان جلس قدام المرايه ويتذكر كلام مساعد الصباح
{ كانوا بالقهوه اللي كانت جلسات من طين وبسيطه وسقفها من سعف وبالنص شابين نار وعلى طرف منقل حطب عليه الشاي والقهوه وجلسوا وحط مساعد الفطور ؛ يييوووه فطور ابو عادل هذا احسن فوال بالرياض كلها ، يافرحاان
فرحان ؛ سم
مساعد ؛ هات ٢ شاهي حليب
فرحان ؛ ابشر دقايق وهو عندك
مساعد ؛ ايييه والله من زمان ماطلعت معك ياهادي وش اخبارك
هادي ؛ الحمدلله
مساعد ؛ شف انت امس كلمتني وعرفت السالفه وانا الحين ابي ادخل بدون مقدمات .. شف ياطويل العمر اول شي دامك حالف ماتاخذها وعفتها تزوج يخوك وين المشكله ؟ بالعكس والله انت تذكر اول يوم ابوك وابو فواز وابو سلطان والعيال يقولون لي تزوج تزوج راح عمرك والله اني خبل يوم ماسمعت كلامهم كنت اقول شقى وشغله بس والله ان كانك تبيها مني نصيحه والله ماندمت اني تزوجت الحمدلله الواحد لا اختار اللي تناسبه وتفاهم معها بيصير مافيه اسعد منه وانا اقولها لك خلنا نشوف لك بنت الحلال ونزوجك وصدقني ان شاء الله انك ماتندم بالعكس حياه جديده تنسيك كل شي وكل شي بيتغير مادام انك تعطي نفسك فرصه فأنه بيتغير للأحسن اما انك تجلس كذا وتفكر باللي راح واللي تركك واللي مدري وش والله ماتزيد نفسك الا هم بالعكس تراها خييره والله انها خيره يوم الله بين لك نيتها قبل لاتاخذها يعني لو ماقالت هالكلام هذيك الليله كان للحين تحبها وهي تكرهك وماتبيك وهذا الشي بيرضيك ؟
هادي هز راسه ب " لا " وكمل مساعد ؛ شفت ؟ لما تلقى شخص يحبك انت افضل من مليون مره من انك تلقى شخص انت تحبه
هادي ؛ وكيف تعرف اذا الشخص يحبك انت ؟ وشلون مايخذلك مثله مثل غيره ؟
مساعد ؛ انت لما تبني حياه جديده مع شخص اختار انه يبني حياته معك وتصرفاته معك كيف وصبره عليك وشلون هذا دليل انه يحبك دليل ان هذا الشخص يشوفك بالدنيا كل... قاطعه هادي ؛ التصرفات كانت زينه وطلعت كذب .. صبر كانت صابره كانت منتظرتني ٦ شهور كذا بدون لا اكلمها كلمتها شهرين يوم كنا بالديره وكانت بالأسبوع مره بعد وولا مره زعلت
مساعد عفس ملامحه بقرف ؛ اممحق صبر الا امحق والله ساكته طمع يوم شافت خير قامت تنب... وسكت من حس انه تهور وتنحنح ؛ هادي مهما كان بنت عمك ولا ودي اسب خلها الحين هي راحت وترا ان جلست تبرر لها والله بتطلع نفسك غلطان وتندم خل الندم لها انت كمل حياتك ونص دينك ان كانك تبي نصيحتي .... والتفتوا للعامل فرحان اللي حط الحليب وقال مساعد ؛ يعطيك العافيه
وتنهد هادي ؛ ترا السالفه لها كم يوم تحسسني اني الوم نفسي لي دهر خلاص خلني افكر ووالله ماتوقف حياتي عليها بس مهو عناد هو يوم اتركها اليوم وبكره اعرس! خلني افكر واذا لقيت بنت الحلال اخذها ان شاء الله اذا الله كاتب لي فيها خير
مساعد ابتسم ؛ ان شاء الله يلا افطر وعين خير تراك نحفت شوي
هادي ؛ هذا المطلوب
مساعد ضحك ؛ رب ضارةٍ نافعه والله تقول بنحف وبنحف وجاك يامهنا ماتمنى ، بس عاد لاتنحف تعب كل وخل النحف بعدين زين ؟
هادي ؛ والله مالي نففس اببد
مساعد ؛ والله ان تاكل انت ذقه بس والله بيعجبك
وقرب له الفطور وهو يفطر معه وهادي يحاول ياكل وهو يغصب نفسه }
وتنهد هادي وهو يرفع راسه وتذكر كلام تركي ؛ " صدقني انها خيره وبالعكس الحمدلله ان ربي بينها لك" كان كلامه مثل مساعد اللي يردد ويحاول يقنعه انها خيره وهادي بعد يقنع نفسه والتفت على صوت الباب وشهد اللي دخلت وهي تبتسم ولاشعوريا ابتسم هادي بتعب ؛ هلا شهد
شهد بأبتسامه ؛ كيفه حبيب اخته ؟
هادي ؛ الحمدلله
شهد جت عنده وهي تستند على الدرج ؛ طفشانه ماودك تطلعني قرييب نتمشى انا وانت نوسع صدورنا
هادي ؛ والله ياشهد مصدع خليها يوم ثاني
شهد بضيق ؛ والله لي كم يوم بطلع ومتضايقه لحالي طفشانه وضاق صدري من قعدة البيت هنا البقاله ودني بسرعه واجي
هادي ؛ شوفي حمد انا مقدر اسوق
شهد وهي تمسح كتفه ؛ ياعمري ادري عشان كذا اقول لك بنطلع نوسع صدورنا خلني انا اسوق ترا اعرف
هادي ؛ والله ! لا مقدر اخليك تسوقين
شهد ؛ هاادي ! والله اعرف ماعليك تدري سقت بسيارة حمد من المحطه اللي ورا لباب البيت وصفيت السياره بعد
هادي ؛ اوف !
شهد ؛ لاتسلك اتكلم جد يلا تكفى
هادي تنهد وقالت شهد بزعل ؛ خلاص بروح انام ما ابي اطلع
ضحك هادي بخفه وهو يمسك يدها قبل تروح ؛ تعالي تعالي زعلتي يعني كذا ؟
شهد ناظرته ؛ ها بتوديني ؟
هادي ؛ ابشري بس نروح مشي لهاذي القريبه اللي عند السوق
شهد ؛ لا عاد اتمشى بالديره على رجولي اي بس مو الظهر بالشمس !
هادي قام وهو يفتح الشباك ؛ ظهر بس وين الشمس ؟ غيم الجو يلا
شهد هزت راسها ؛ تمام اجل بلبس واجي
وطلعت بسرعه وهادي سكر الشباك واخذ اغراضه وحتى هو ماوده يجلس بيطلع لأنه لو جلس بيفكر ومشى للصاله وهو يشوف امه اللي طلعت من المطبخ ؛ يمه بنروح انا وشهد للبقاله تبين شي ؟
ام هادي ؛ زييين تبي من يطلعها ، لا ياحبيبي انتبه للطريق ولا خل حمد يوديكم
هادي ؛ بنروح مشي قريبه
ام هادي ابتسمت ؛ ماعليه تتحركون شوي بس انتبهوا للطريق
وهز راسه هادي وطلعت شهد وهي تعدل نقابها ؛ يلا ؟
هادي ؛ يلا " ودخل للمجلس" حمد تروح معنا
حمد التفت وقال بهمس ؛ اما عاد وافقت .. لا جيبوا لي فصفص وانا بسوي لي شاهي الين تجون
هادي هز راسه وطلع ولحقته شهد ومن طلعت التفت هادي ؛ ترا برد اخذتي شي ؟
شهد ؛ لبسي شتوي ماعليك
هادي ؛ زين اجل
وفتح باب العماره وطلع وطلعت وسكر الباب وناظرها من قالت بأبتسامه ؛ الله يالجو
هادي ؛ اي والله جو تمشيه
وابتسمت وهم يمشون للبقاله
كانت مسافتها قريبه دقايق بس ماحسوا فيها شهد تناظر البيوت والطريق وناظرت اول ماطلعت بيت ابو راشد مقابلها ومشت لليمين جهة البقاله وناظرت المسجد يسارها بجنب بيت ابو راشد وحوله كم بيت ووراهم محل كان فوال بس ماشافت لوحته زين وكملت تمشي وشافت البقاله مقابلها ع اليمين والسوق وراه وحول البقاله محلين وهادي ماحس بالطريق لأنه بدون مايحس جلس يفكر واستوعب من وصلوا للبقاله وتأفف بضيق ودخلوا وماكان فيه الا ٣ عيال صغار واغلب الناس بالسوق شافتهم شهد داخلين وطالعين منه وابتسمت من دخلت للبقاله وكان صوت اغاني خفيف ومرزوق يقرا بالأشرطه ويبدل فيها وتنحنح هادي ؛ السلام عليكم
العم مرزوق ؛ وعلييكم السلام
ومشت شهد وهادي اخذ لها كيس ومشى معاها وهو ياخذ فصفص لحمد وقالت شهد بضحك ؛ ناخذ لك اوريو ماتلاحظ انه خلص وهو ماقد خلص من عندنا الا وتجيب كرتون منه ؟
هادي ابتسم بخفه ؛ اييه ناسيه
وكملت شهد تشتري وهادي عندها وتغيرت ملامحه من ركز بكلمات الأغنيه اللي كانت مشغله ووقف يسمعها بقهر وكانت شهد شايله اغراض وعطاها هادي الكيس بدون لايتكلم ولف يرجع يسمع ؛
انتهى الفصل الاخير .. وانتهى عرض الرواية
ويلي ياجرحٍ كبير .. عجل بقرب النهاية
مسرحييه .. مسرحية! وانت وحدك البطل
انت وحدك البطل .. من البدايه من البداية
كل شي مسموح وقابل للسماح ... الا تمثيل العواطف الخداع يثير في قلبي الجراح ..!
وتبدا يا انت العواصف ..
تخلف اسامح .. تخطي اسامح..
تعتب اسامح.. اسامح اسامح ..
لكن تمثل علي ؟.. يا سيدي انا اسف!
انا سلمتك فؤادي وماسلمت ..
اعترفلك والله اني ندمت !..
كنت في التمثيل رائع .. قمت في دورك و اكثر ! ..
عينك تراقب تحسّب وش كثر هالدور اثر ..
اعترف انك قدرت توصلني حيل .. والدليل .. !
عندي جروحي هي الدليل .. انا صدقتك تأمل آه
يا اكبر ممثل! انا سلمتك فؤادي وماسلمت .. اعترفلك والله اني ندمت !
وشد على يده بقهر وهو يمشي لشهد ؛ ماخلصتي !
شهد ناظرته بأستغراب ؛ لا ! .. هادي فيك شي!
هادي اعتدل وهو يتنحنح ؛ وشو
شهد حطت الكيس على الأرض بخوف وهي تحط يدها على خده ؛ وجهك احممر .. لايكون تعبان ؟
هادي ؛ لا لا استعجلي يلا
ومشى قدام شوي والتفت على اللي دخلت ؛ السلام عليكم
ورد السلام مع مرزوق وهو يصد
هيلا ؛ شلونك ياعم عساك طيب
العم مرزوق ؛ هلا هلا انتي هيلا بنت ام عبدالرحمن
هيلا ابتسمت ؛ اييه زين هالمره مانسيتني
مرزوق ابتسم ؛ هلا ومرحبا سمي وش بغيتي
هيلا ؛ ابد انا اخذ اغراضي بس عطني كيس
وعطاها وهي تاخذه وراحت تاخذ اغراضها وهي تناظر يسارها لشهد وقربت بأستغراب ؛ مسيتس بالخير
شهد ناظرتها وابتسمت ؛ هلا مساء النور
هيلا ضحكت ؛ يوه انتي شهد " وقربت وهي تسلم عليها " والله اني ماعرفتس قلت منهي هالمره اللي ماعرفها
شهد ضحكت ؛ صدق ماعرفتيني !
هيلا ؛ لاوالله ماعرفتس الا يوم تكلمتي زولتس بالعباه ماعرفته مغيرتس حتى عيونتس ماشفتها زين
شهد ضحكت وكملت هيلا ؛ وش اخبارتس اخبار امتس
شهد ؛ بخيير الحمدلله وانتي وامك اخباركم
هيلا ؛ الحمدلله .. والتفتوا على هادي اللي جا ؛ ها شه .. وسكت وهو يشوف هيلا اللي ناظرته وهي كل ماشافته تلقاه معصب وعاقد حواجبه ورجع وابتسمت شهد ؛ يلا مع السلامه
هيلا ؛ ياهلا سلمي على امتس
شهد ؛ ان شاء الله
وراحت لهادي وهيلا كملت تاخذ اغراضها
شهد ؛ هادي خلصت يلا
هادي تنهد ؛ يلا
واخذ الأغراض وحاسبهم وشالهم وطلعوا وقالت شهد ؛ عطني اشيلهم عنك
عطاها هادي بدون مايتكلم وشكت شهد ؛ هادي فيك شي !
هادي ناظرها ؛ لا يابنت قلت لا
وسكتت شهد وهي تمشي معاه للبيت ..
دخلوا البيت وكانت ام هادي بالصاله وعندها حمد وراح هادي لغرفته بسرعه بعد ماسلم وشهد دخلت وراه وهي تحط الأغراض ؛ سلام
ام هادي وحمد ؛ وعليكم السلام
حمد ؛ جبتوا لي فصفص؟
ام هادي ؛ هادي وش فيه
شهد وهي تعطي حمد الكيس ؛ مدري شكله تعب فجأه حمر وجهه حتى عيونه
ام هادي وهي تقوم ؛ بسم الله عليه خليني اقوم اشوفه
حمد ناظرها بأستغراب ؛ ليه وش صار ؟ اكيد انك قشعتي مطب ولا صدمتي
شهد ؛ لا رحنا مشي بس مدري وش جاه
" بغرفة هادي "
دخلت ام هادي والتفت هادي اللي كان ياخذ علاجه وتنحنح وهو يشرب مويه
ام هادي ؛ مو اخذته بعد الغداء ؟
هادي هز راسه ؛ الا بس يدي توجعني يمه
ام هادي ؛ عشان كذا تقول شهد تعب صقعت بشي جاها شي ؟
هادي ؛ لا لا يمكن برد الا اكيد برد بنام شوي
وانسدح وقربت ام هادي لمست جبينه وهي تغطيه وطفت النور وهي تطلع وتسكر الباب
•
بعد كم ساعه .. العصر
كانوا ابو هادي وام هادي بالصاله وحمد بالمجلس وشهد بغرفتها وهادي نايم والتفت ابو هادي بعد ماقفل ؛ بيجون العمال الحين
ام هادي قامت وهي تأشر له ؛ طيب اذا شالو التلفزيون خلهم يحطونه هنا
ابو هادي ؛ خلاص بس شوفي شهد علميها لاتطلع ١٠ دقايق ويجون
وهزت راسها ام هادي وهي تروح لغرفة شهد دخلت وهي تشوفها تمشط شعرها وتغني بخفوت والتفتت لأمها ؛ هلا يمه
ام هادي ؛ اييه ذكرتيني انتي حاطه لشعر حمد خلطه امس ؟
شهد ضحكت ؛ ايه ماسك وطلع يجنن وحطيته على شعري الصباح ماتشوفيني مستانسه عليه
ام هادي ضحكت ؛ مب صاحيه انتي وياه وهو بعد معجبه يعلمني الظهر يقول مافيه شي متغير بشعري
وضحكت شهد وقالت ام هادي ؛ المهم فيه عمال بيجون عشان التلفزيون ويفرشون المجلس لاتطلعين
شهد ؛ بيتأخرون ؟
ام هادي ؛ لا ما اتوقع انا بروح الغرفه لاتطلعين طيب ؟
شهد هزت راسها ؛ طيب
وراحت ام هادي غرفتها وشهد كملت تمشط شعرها
بعد دقايق سمعت صوت ابوها والعمال وعرفت انهم دخلوا ، اما ابو هادي وحمد كانوا عند العمال اللي بدو شغلهم
..........••..........
بيت ابو راشد
نفس الوقت
كانوا سعد وتركي ونايف مع ابو راشد بالمحل
وطلع راشد من قسمه وهو يدخل للصاله ؛ مسيهم بالخير
ام راشد وهاجر ؛ مساء النور
راشد تنهد وهو يجلس ؛ وين الباقين ؟
هاجر ؛ الورعان عند اروى والبسه بالسيب والبنات بغرفهم
راشد ؛ الا يقولون عبير بتروح ، متى ؟
ام راشد ؛ تقول بكره
راشد اخذ فنجال القهوه من هاجر اللي مدت له ؛ عشتي .. واليوم منيره ، تقول بتروح عند امها كم يوم الين تطيب
ام راشد ؛ افا ، تعبانه واجد ؟
راشد ؛ والله تقول من الوحام ولا هي مافيها شي ، وكارهه الغرفه وبس معصبه ليه مدري !
ام راشد ضحكت ؛ والوحام مايتعب ؟ بعدين هذا رابع بطن لها ولاعرفت الوحام ونفسيته؟!
راشد ؛ الا بس يعني متوحمه كارهه ولا تحب ؟
ام راشد بضحك ؛ فيه وحام كره وفيه وحام حب
راشد سكت لثواني يفكر ؛ اجل وحامها هذا كره
ام راشد ؛ ايه كارهه عطر بالغرفه مدري وشو
راشد تنهد ؛ والله مدري عاد
هاجر ؛ يعني بيفضى البيت ! عبير بتروح بكره ومنيره بتلحقها بورعانها
راشد ؛ تقول الورعان يجون كل كم يوم ان كانك تبي
ام راشد ؛ ماتخليهم ؟ هي حامل وامها كبيره لو تخليهم عندنا اريح لها
راشد ؛ لا مايقعدون بالذات اميره وان صاحت بتصيح مناير ، نجيبهم طول النهار وبالليل يروحون
هاجر ؛ طيب ومنيره ؟
راشد بقهر ؛ الصدق ان هذي كارهتني ومتوحمه علي انا
ام راشد وهاجر ؛ ههههههههههههههههه
وطلعت شريفه اللي سمعت اخر كلام راشد وهي تضحك ؛ منيره متوحمه عليك؟ .. السلام
ردوا وراشد معهم ؛ وعليكم السلام ، اي والله .. الا لمتى يبقى الوحام ؟
شريفه عطت العنود لأمها اللي مدت يدينها تاخذها وهي تجلس ؛ بعضهم اول ٣ شهور وبعضهم يستمر للولاده
راشد ؛ الله يستر عساه هالثلاث شهور ولا ينتهي قبلها
ام راشد وهي تشوف ملابس العنود ؛ شريفه انتي مالبستيها بجامه داخل ؟
شريفه ؛ لا تنكتم حرام
ام راشد ؛ وش تنكتم ابك برد تبينها تمرض ! .. هاجر قومي جيبي بجامتها البيضاء تلقينها على الدولاب الصغير بغرفتي
وقامت هاجر وقالت شريفه ؛ راشد متى تروح منيره ؟
راشد ؛ اليوم ، جالسه تجهز اغراضها
ام راشد ؛ يوه ! علامها ؟
راشد ؛ والله ياميمتي مدري
شريفه ضحكت ؛ شكلها بتجلس ٣ شهور يا راشد
راشد ؛ يييوه لا بنرجع القصيم حنا
شريفه بضحك ؛ ترجعون وقت المدارس يمديه يخلص وحامها
وضحكوا وطلعت هاجر وقال راشد ؛ هاجر الورعان كلهم داخل ؟
هاجر وهي تعطي امها ملابس العنود ؛ ايه ، وناصر وعبدالله راحو مع ابوي والعيال
راشد قام ؛ اجل بروح للمحل عندهم تبون شي ؟
ام راشد والبنات ؛ سلامتك
وطلع ركب سيارته وحرك للسوق
..........••..........
في سوق المحاسن
كانوا ابو راشد وسعد بالمحل
وتركي ونايف وناصر وعبدالله يتمشون بالسوق وانتبه تركي لمحل ابو هادي اللي مسكر والتفت لنايف ؛ غريبه مافتحوا !
نايف ناظر المحل ؛ اي والله هذا وهو خالص .. بس امس خلصوا منه مايمديهم يفتحون اليوم
تركي سكت وكمل يمشي ويتذكر كلامه مع هادي امس لما مر عليه بالمحل وكيف انه حاس ان اسلوبه كان ماش وخاف ان هادي كان بيقول له شي بس ماقدر وجلس على طرف جلسة طين من نفس جدار السوق وطلع جواله وهو يدق على هادي .. المره الاولى ما رد ودق مره ثانيه ورد هادي ؛ هلا
تركي ؛ هادي!
هادي تنحنح ؛ هلا تركي
تركي بأستغراب ؛ نايم ؟ ولا علامه صوتك !
هادي ؛ نايم نايم ، وش بغيت ؟
تركي ؛ اا .. ابد استغربت ماجيتوا للمحل وقلت ادق عسى مافيكم شي ؟
هادي بتعب ؛ مدري مدري .. ابوي وحمد فيه
تركي ؛ ولد فيك شي ؟ ، مسكر محلكم المهم وين انت ؟
هادي ؛ بالبيت مافيني شي يجون .. يجون بالطريق
تركي سكت بأستغراب من صوت هادي اللي يادوب يتكلم ؛ طيب طيب ... تبي شي ؟
هادي ؛ سلامتك
تركي ؛ مع السلامه
وقفل هادي وتنهد تركي وقام وهو يروح لنايف والعيال اللي كانوا عند كشك جويد
نايف ؛ تركي عنده شاهي تبي نعناع ولا ساده ؟
تركي وهو يعدل شماغه ؛ نعناع
نايف ؛ نعناع ٢ ياجويّد
وكان جويد يحط لناصر وعبدالله حلاو ومن خلص عطى نايف اكوابهم والتفت نايف وهو يمد لتركي كوبه ؛ حاسبه ياتركي لانزل الراتب اعطيك
تركي ضحك وهو يطلع الفلوس ؛ والله من الكذب
وضحك نايف والتفت لناصر وعبدالله ؛ نرجع المحل ولا ماخلصتوا تمشيه ياطويل العمر انت وياه ؟
تركي بضحك ؛ لا خلهم يتمشون اخر يوم من غير شر ويروح عبيد يصير ناصر بلحاله
عبدالله التفت لناصر ؛ ترا نجي بعد اسبوعين امي تقوله
ناصر ؛ ايه جده تقول بطلايع العنود الصغيره تجون
وكملوا يمشون وتركي ونايف وراهم يمشون معهم
..........••..........
بيت ابو هادي
بساعه خلصوا فيها العمال وكان ابو هادي واقف عندهم يشيك على التلفزيون اللي حطوه بالصاله ويتأكد انه شغال والتفت لهم
ابو هادي ؛ يسلام ، ماشاء الله تعرفون لكل شي الله يعطيكم العافيه
العمال ؛ الله يعافيك
ابو هادي ؛ والمحل يمكن بكره العصر ان شاء الله نفتحه الصباح ماني فيه
العمال ؛ ان شاء الله
وطلعوا والتفت ابو هادي لحمد اللي قال ؛ مب يوم شرينا الفرشه قلت نخليها بالمحل الين نضبط المجلس ؟
ابو هادي ؛ الا بس خلاص امك تقول بنفرشه بسرعه عشان لو جو ضيوف يكون جاهز وباقي المساند بعد لازم نستعجل
حمد هز راسه ونادى ابو هادي ؛ ياامريم .. رح رح ناد امك قل راحو
ومشى حمد وهو يدق باب الغرفه وطلعت ام هادي وهي تعدل طرحتها ؛ ها خلصوا ؟
حمد ؛ ايه تعالي
ومشت وهي تشوف المجلس والصاله ؛ ماشاء الله زيين قضينا
ابو هادي ؛ باقي المساند لو خليتينا نصبغ الين تخلص ونحطها مره وحده ازين
ام هادي ؛ لا لا زين لونه بعدين نصبغ مايحتاج الحين
وطلعت شهد تشوف معها والتفت ابو هادي بأستغراب ؛ هادي ماقام؟!
شهد ؛ ييوه صح ترا نايم من الظهر
ابو هادي ؛ والناس الحين صلوا العصر وخلصوا قوموه ماباقي على المغرب شي ، رح ياحمد قومه
وتنهد حمد وهو يروح لغرفة هادي دق الباب ودخل وهو يشوف النور طافي قرب وهو ينادي ؛ هادي ه.. وسكت بصدمه وهو يشوف وجه هادي اللي كان احمر وعرقان ويرجف وبعد الغطاء عنه ؛ وللد ! هادي ! ... ييمه يمممه
وجت ام هادي بسرعه وشهد وابو هادي وراها
ام هادي بخوف ؛ وش فيكم !
حمد وهو يلمس جبين هادي ؛ هادي هادي مدري الظاهر تعبان
وقربت وهي تلمس جبينه وخده وشهقت ؛ ييويلي بسم الله علييك هادي يا امك ؟!
ابو هادي ؛ الولد شابه ناره وين انتوا عنه من الظهر محد جاه !
شهد ؛ وش دراني انا بغرفتي
ام هادي ؛ دايم ينام لهالحزه وش يدري.. قاطعهم ابو هادي بعصبيه وهو يقوم هادي ؛ هادي ! هادي قم قم نروح المستشفى " والتفت لحمد بغضب " قوومه معي انت اخلص!
وفز حمد وهو يسنده وقوموه وطلعوا فيه وقالت ام هادي ؛ اصبروا بلبس عباتي واجي معكم
ابو هادي ؛ لا والله ماتروحين وشوله علاج ونجي ان شاء الله
وطلع لبرا وحمد معه ساند هادي وركبوه السياره وجا حمد بيركب وسحبه ابو هادي ؛ اقول انثبر وارجع لأمك واختك لو فيك خير دريت عن اخوك
وسكت حمد بصدمه وركب ابو هادي وحرك للمستشفى ودخل حمد بقهر ؛ اهب يالعدو وانا وش دخلني!
ودخل وسكر الباب والتفت لأم هادي ؛ راحو ؟
حمد جلس بقهر ؛ ايه بغيت اروح معهم وطردني ابو هادي كل شي الا بِكره والوسطاني بتراب
شهد ضحكت وقالت ام هادي ؛ قم نلحقهم انا وانت
حمد انسدح بقهر ؛ والله ماروح ولا انتي بعد بتهاوشيني ؟
ام هادي بعصبيه ؛ اقول قم وانت ساكت بسرعه !
حمد فز ؛ ياييمه هو قال مب لازم ان وديتك الحين بيذبحني خلاص وبعدين مدري اي مستشفى راحو
ام هادي ؛ وين بيروحون يعني المستوصف اللي بالديره هنا قريب
شهد ؛ يمه ابوي قال علاج وخلاص ان شاء الله والله مايحتاج ، عادي عادي هذا من البرد يخف ان شاء الله
وسكتت ام هادي وحمد ناظرهم وصد يمسح نظارته وهو مرتفع ضغطه
وضحكت شهد وهي تاخذ الريموت ؛ والحمد لله افتكينا من بلاستيشن حمد وازعاجه
حمد اعتدل ؛ هين اشتري تلفزيون واحطه بغرفتي وافقع راسك بالأزعاج ، دوري شي نتابعه بس
وضحكت شهد وهي تغير بالقنوات وام هادي تنهدت وهي تروح للمطبخ
..........••..........
بيت ابو راشد
الصغار كانوا عند الدكه يلعبون مع القطوه وبالصاله كانوا شريفه واروى وعبير وبالمطبخ كانت ام راشد تجهز سلتها وهاجر عندها ؛ يمه متى طلعت ام رائد ؟
ام راشد وهي تصب القهوه ؛ امس وعندها بنتها جتها وبنسير عليهم انا وام عبدالرحمن
هاجر ؛ بتروحين مع واحد من العيال ؟
ام راشد ؛ لا تجي ام عبدالرحمن ونروح انا وياها ، هه حطيها بالسله وطلعيها عند الباب بروح البس عباتي
وطلعت ام راشد والتفتت لصوت باب الحوش ؛ اروى روحي افتحي تلقينها ام عبدالرحمن
واخذت اروى طرحتها وطلعت للحوش ؛ مين ؟
ام عبدالرحمن ؛ انا افتحي
وفتحت اروى الباب ودخلت ام عبدالرحمن ومعها هيلا ؛ مسيتس بالخير وين امتس ؟
اروى وهي تسلم عليهم ؛ هلا مساء النور ، داخل ادخلي حياك
ودخلت ام عبدالرحمن وهي تحط سلتها ع الباب ؛ مسيهم بالخير
شريفه وعبير ؛ مساء النور
وقاموا سلموا عليها وطلعت هاجر وسلمت ؛ ياهلا ، امي تلبس عباتها وهذي سلتها
عبير ؛ اجلسي تقهوي الين تجي
ام عبدالرحمن وهي تجلس ؛ والله اني مستعجله مير مايضر فنجال ، نبي نروح لأم رائد مسويه عمليه وطلعت امس هي مغير امكم اللي تبي تروح ؟
شريفه ؛ اييه ماتشوف شر ، اي والله مغير امي
ام عبدالرحمن ؛ ومنيره وينها ؟
عبير ؛ بغرفتها مصخنه شوي من هالبرد
وطلعت ام راشد وهي تعدل غطاها ؛ هلا ام عبدالرحمن يالله حيها يالله حي هيلا
وسلمت عليهم وقالت ام عبدالرحمن ؛ هلا فيتس شلونتس
ام راشد ابتسمت ؛ بخيير الحمدلله ، وشلونك ياهيلا
هيلا ؛ بخير الله يسلمتس
ام عبدالرحمن ؛ يلا يلا توخرنا خلينا نروح
ام راشد ؛ يلا مشينا ، اروى تعالي سكري الباب
وطلعوا وسكرت اروى الباب ورجعت للصاله وهي تلتفت لشريفه اللي قالت بضحك ؛ زيين ياعبير قلتي من البرد
عبير ضحكت وهي تقوم ؛ وش اسوي اخاف اعلمها يدرون الديره كلها ، بروح بس اطلع عفشي
شريفه ؛ يووه من الصباح انتي ماخلصتي ؟!
عبير ؛ ابك لا قعدت اغسل الملابس عشان افتك اذا رجعت البيت " وقالت وهي تروح للغرف " اروى انتي ولا هاجر وحده تجيب الملابس من الحوش يلا اخر خدمه
هاجر ؛ اروى قومي عشتي مدري وين طرحتي
اروى عطتها حقتها ؛ هه هذي الطرحه قومي
هاجر ؛ هييه والله عجزانه تو جلست من اليوم مع امي سويت شوربه وشاهي وانتي قاعده قومي ماتموتين
وتأففت اروى وهي تقوم وهاجر صبت لها شاي وجلست تفصفص وهي تناظر التلفزيون
بعد دقايق دخلت منيره وهي تنزل غطاها ؛ السلام
شريفه وهاجر ؛ وعليكم السلام
منيره تنهدت ؛ وين عمتي ؟
هاجر ؛ راحت مع ام عبدالرحمن وهيلا يزورون ام رائد
منيره ابتسمت بتعب ؛ طيب ترا بروح لأهلي كم يوم وكلمت راشد يقول شوي ويجي
شريفه ؛ انتي صادقه ؟ يبنت يقول راشد كارهه الغرفه خلاص اجلسي بالغرفه اللي داخل مافيها لاريحة عطر ولا شي
ودخلت اروى وقالت هاجر ؛ ايه تكفين عبير بتروح بكره وانتي اليوم سلامات
اروى ؛ وشو منيره بتروحين ؟؟
منيره هزت راسها وقالت شريفه بضحك ؛ انتي متوحمه على راشد ؟
منيره سكتت وانتبهت شريفه لملامحها اللي تغيرت بقرف وضحكت ؛ يوييلي صدق
هاجر واروى ضحكوا وتنهدت منيره ؛ يختي مدري بس اني بروح الحين واشوف اذا تحسنت النفسيه رجعت
شريفه ؛ ماضنتي استغفرالله هذا وحام شكله
هاجر صبت لها شاي ؛ شاهي ؟ ولا بعد متوحمه عليه
منيره ضحكت وهي تاخذ الكاسه ؛ لا الحمدلله ، وين الورعان ؟
اروى وهي تروح للغرف ؛ بالحوش مع البسه
هزت منيره راسها وهي تتفرج ع التلفزيون مع شريفه وهاجر ..
بعد دقايق دخل راشد ؛ السلام عليكم
الكل ؛ وعليكم السلام
راشد جلس ؛ اميمتي وين ؟
منيره وهي تقوم ؛ بروح البس
شريفه بنفس الوقت ؛ مسيره
راشد ناظر منيره اللي طلعت والتفت لشريفه ؛ ابك هذا الوحام صحيح ؟
شريفه ضحكت ؛ والله ياهي متوحمه عليك وحااام
هاجر بضحك ؛ اي والله ياعزتي لك
راشد ضحك بخفه ؛ الله يعين ، بقوم اخذ الشناط لو تشوفون عفشها تقولون بتهج ماهي اغراض كم يوم
وضحكوا البنات وطلع راشد لقسمه وطلعت عبير من الغرفه واروى وراها وراحوا للصاله
عبير ؛ منيره بتروح اليوم ؟
شريفه ؛ ايه راحت تلبس
اروى بقهر ؛ سلامات ، اجل عبيروه لاتروحين تكفين
عبير ؛ والله ودي بس مقدر ا.. والتفتت على ام راشد اللي دخلت ؛ السلام
البنات ؛ وعليكم السلام
ام راشد جلست بتعب ؛ يووه يربي ، الورعان ليه برا البرد لايمرضهم
هاجر ؛ بالدكه دفى
ام راشد ؛ لا بالشارع عند الباب قلت لهم يدخلون مدري لحقوني للحوش ولا لا
اروى شهقت ؛ البسه لاترووح
ام راشد ضحكت ؛ لا بالدكه نايمه روعتني مدري كيف هي منسدحه
شريفه ؛ طيب يمه ترا منيره بتروح الحين بغرفتها تجهز
ام راشد ؛ ايه تقوله اليوم شكلها تعبانه بالحيل الله يعينها
اروى جلست عند رجول امها ؛ طييب ييمه تكفين عبير بتروح بعد شوفيها
ام راشد تنهدت وهي تمسح شعر اروى ؛ والله يمك عبير رجالها مشغول ومهو فاضي يوديها ويجيبها وطريق تبوك طويل ان كانك بتصيحين صيحي الحين واسكتي
ضحكوا البنات واروى قامت بقهر وضحكت عبير ؛ اصبري يازعول تعالي تعالي " وسحبت اروى اللي كانت بتروح للغرفه " الحين التمايم كم باقي له ؟
اروى بقهر ؛ توووه يبنت توه الحين شريفه لها ١٦ يوم والده ولا بعد تبي التمايم بعد الأربعين سلامات باقي
شريفه ؛ اصبري اصبري انتي الحين انتي زعلانه عشانهم بيروحون مع بعض ؟ راشد يقول يجيب الورعان يعني يجون حتى لو منيره عند اهلها وباقي ٢٤ يوم والله تخلص ويجون كلهم
ام راشد ؛ وتجي معهم حصه " ام سعد " وخالك ياسر واهله وام عزام وشموخ ونتجمع كلنا علامك انتي!
هاجر وهي تشوف اروى بتبكي وعبير ماسكتها لاتروح للغرفه ؛ ابك انتي ورع ؟ كل ماراح احد قعدتي تصيحين يبنت الحلال يجون يجون الناس ماهم طايرين
اروى وهي ماسكه نفسها ؛ ايه خلاص وخروا بس بروح الغرفه
ام راشد ؛ تعالي تعالي
ومشت اروى لأمها وهاجر تأشر لها بضحك بمعنى " يويلك " ام راشد شافتها ؛ اسكتي انتي ، تعالي عندي يالعنقود تعالي ... وجلست اروى عندها وقالت ام راشد ؛ وش رايك هالحين تقومين تجيبين سطل الحنا وكيس الحنا اللي بالدولاب الأبيض فوق وتجيبين كوب ماء وتعالي خلينا نتحنى انا وانتي توني شفت ام رائد حاطه حنا بيديها وش زينه وانا حناي بيروح يلا يلا قومي
عبير ؛ اخص اخص حنا وحنو ترف بعد تراها تحبه
شريفه وهي تبوس العنود ؛ يمه حني عنودي
ام راشد اخذتها ؛ يييوه عنوده تبين حنا ؟ .. خلاص احط لها بس عساها ماتاكله بربط يديها زين
اروى ابتسمت ؛ يلا وانا معك بحنيها
ام راشد ؛ اجل قومي عشتي هاتي اللي قلت لك
وقامت اروى تجيب اغراض الحنا وضحكت هاجر ؛ بكايه
ام راشد ضربتها بخفه ؛ اقول لاتطفشين اختك وتضحكين عليها خليها بس
هاجر ضحكت وهي تاخذ الريموت ؛ وانا الصادقه مغير تبكي
وجلست تتفرج على التلفزيون هي وشريفه وام راشد تسولف للعنود وتلاعبها وعبير اخذت جلالها وراحت تدخل البزران من برا
..........••..........
المستشفى
كان ابو هادي جالس بالكرسي عند سرير هادي اللي نايم والتفت لصوت لجواله وهو يقوم يطلع
ابو هادي رد ؛ هلا مريم
ام هادي ؛ هلا ها وش صار ؟
ابو هادي تنهد وهو يسكر باب الغرفه ؛ اصبري ، الحين هو ماقال ان علاجاته ماتفيد ماقالك يده توجعه ؟
ام هادي ؛ علاجاته ياخذهم ماقال ماتفيد بس يده والله قاله الظهر قال توجعه واكل علاجه مرتين ، ليه وش صاير ؟
ابو هادي ؛ يقول الدكتور العلاجات مافادت كتب له ابر ليده بس ينتظر حرارته تنزل والظاهر بيتنوم
ام هادي تنهدت ؛ ياعمري طيب نجي انا وحمد ؟
ابو هادي ؛ لا اصبري ان تنوم يجي حمد يرافق معه عاد اعلمك بعد شوي وش يقولون
ام هادي ؛ طيب
وقفل ابو هادي ورجع للغرفه وجلس وهو يناظر هادي بأستغراب وهو ملاحظ كيف متغير وجهه وحتى اسلوبه وطبعه ماعاد مثل اول صار على اسمه هادي ولا يحب يتكلم وتنهد وهو يقرب وحط يده على جبين هادي وهو يقرا عليه
..........••..........
نرجع لبيت ابو راشد
اللي جا هو والعيال من المحل قبل آذان المغرب ودخل ابو راشد من عرف ان منيره بتروح لما قال له راشد اللي كان برا عند سيارته يحط الأغراض
ودخل ابو راشد للصاله وكانوا كلهم فيها ؛ مسيهم بالخير
ام راشد والبنات ؛ مساء النور ياهلا
عبير قربت تحب راسه ؛ شلونك يبه
ابو راشد ؛ بخيير عساك طيبه ، ماشفتك اليوم
عبير ؛ بخير الحمدلله والله اجهز
ابو راشد ابتسم ؛ انتي تجهزين وخويتك تشيل اغراضها برا " يقصد منيره " وش معجلكم
عبير ضحكت وجلس ابو راشد ؛ وشلون ام العنود
شريفه ابتسمت ؛ بخير الحمدلله
ابو راشد ؛ وينها ام ناصر ؟
ام راشد وهي تعجن حنا ؛ بغرفتها الحين تجي
اروى اللي كانت جالسه ع الأرض بجنب امها ؛ يمه بحط بس لاتحطين على اظافري عشانه بيقعد سنه وهو ماراح
ام راشد ؛ ازين شي خليه يقعد
اروى ؛ لا يروح حنا يدي وهو يتقرش مابيه يخرب شكل اظافري
ام راشد ؛ خلاص هاك صبي ماء
وقامت اروى وابتسم ابو راشد ؛ ماشاء الله بتحنون كلكم
ام راشد ابتسمت ؛ اي والله انا بحني ومعي اروى وترف ونحني السميه واللي يبي مانقول لا
عبير ؛ شوفي جوري واميره ومناير يمكن يبون
ام راشد ؛ شوفيهم ياهاجر بالغرفه الورعان
وقامت هاجر لغرف ودخلت منيره ؛ مساء الخير
الكل ؛ مساء النور
ابو راشد ابتسم ؛ ياهلا بأم ناصر ياهلا باللي بتروح وتخلينا
منيره ابتسمت وقربت تسلم عليه ؛ والله ياعم لو ماني تعبانه مارحت بس اجي اجي ان شاء الله
ابو راشد وهو يمسح على كتفها ؛ ماتشوفين شر والله يقومك بالسلامه
منيره ؛ الشر مايجيك الله يسلمك يارب
عبير ؛ بتروحين الحين ؟
منيره هزت راسها وقالت ام راشد ؛ تعشي معنا وروحي
منيره ؛ لا والله بروح بالعافيه عليكم بس الورعان يقول راشد يجيبهم بالليل الحين بس انا اللي بروح
ام راشد ابتسمت ؛ زين اجل عشان احنيهم زين ؟
منيره ؛ طيب يلا مع السلامه " وقربت تسلم على عبير " استودعتك الله وسلمي لنا على اهل تبوك واشوفك على خير ان شاء الله
عبير وهي تحضنها ؛ ياحبيبتي يوصل ان شاء الله وسلمي على امك والبنات
منيره ؛ ان شاء الله
وكملت تسلم على شريفه وام راشد اللي قامت واروى اللي طلعت ومن بعدها هاجر
شريفه ؛ يلا ماتشوفين شر ولا تبطين
منيره ابتسمت ؛ الشر مايجيك ، ان شاء الله
ام راشد قربت وهي تحضنها وتمسح على ظهرها ؛ يلا مع السلامه ياحبيبتي انتبهي لا تتعبين نفسك
منيره ابتسمت ؛ ابشري ياعمه
وسلمت على هاجر وعلى اروى وضحكت منيره ؛ لا راحت عبير بكره لاتصيحين تراها بتجي وعلى قولة هاجر الناس ماهم طايرين
ضحكوا وابتسمت اروى وهي تسلم عليها وودعوها كلهم وطلعت منيره وركبت مع راشد وحركت لبيت اهلها
وابتسم ابو راشد وهو يجلس ؛ ياحليلها الله يسهل عليها
الكل ؛ اميين
•
برا طلع تركي لسيارته وترك نايف وسعد بالدوانيه وعندهم ناصر وعبدالله وفتح باب السياره والتفت لعمارة ابو هادي وشاف سيارة هادي موجوده وحمد بعد وركب وهو يسكر الباب نص تسكيره ورجله سندها عليه ودق على هادي وهو ينتظره يرد وتنهد بتوتر من دق اكثر من مره ولا رد هادي مع ان جواله شغال وتردد يدق على حمد ولا لا وسكت يفكر وهو يتصل ورد حمد ؛ اررحب تريك
تركي اعتدل وهو يتنحنح ؛ هلا حمد السلام عليكم
حمد ؛ وعلييكم السلام يامرحبا
تركي ؛ شلونك عساك طيب
حمد ؛ والله بخيير الحمدلله وش اخبارك انت
تركي ؛ بخير دامك بخير ، الا بسألك هادي موجود ولا وينه ... الو .. حمد ؟
حمد تنحنح ؛ اا.. ها معك لا راح مع ابوي عندهم شغل مدري وين
تركي ؛ ايييه .. استغربت ادق عليه مايرد
حمد ؛ ايه يمكن مهو عنده ولا طافي
تركي ؛ لا يدق جواله بس مايرد يمكن انه مشغول ، طيب بالله اذا جا خله يدق علي
حمد ؛ ان شاء الله يجي شوي واعلمه
تركي ؛ زين اجل الله يعطيك العافيه
حمد ؛ ياهلا الله يعافيك
وقفل تركي وتنهد والتفت للدرج وابتسم وجا بيفتحه ورجع بسرعه من تذكر موقف الظهر لما كان نايف بيكشفه وتنحنح ونزل وهو يسكر الباب ودخل وهو يلتفت لصوت القطوه وشافها عند سيب راشد وقرب وهو يمسح عليها ؛ يوه ابك انتي للحين حيه ، وش جايبك بهالبرد انثبري بالدكه "وكمل وهو يشيلها" بايعه عمرك يومنك طالعه ولا ماتسمعين صوت الكلاب ؟
ومشى فيها للدكه وهو يحطها ؛ اخمدي اخمدي لا اسمعك تعوين بنص الليل صجيتينا
ونفض يديه وهو يروح يتوضى عشان يصلون المغرب
..........••..........
بيت ابو هادي
قبل دقايق
كانوا بالصاله ع التلفزيون وسمعوا صوت جوال هادي والتفتت ام هادي ؛ جوال هادي ناسيه ؟
شهد رفعت كتوفها وقالت ام هادي ؛ قومي قومي جيبيه اشوف
وقامت شهد لغرفته ودخلت وهي تاخذ الجوال وشافت الأسم وطلعت للصاله وهي تمده لأمها ؛ تركي
ام هادي ؛ تركي من ؟
حمد ؛ ولد ابو راشد اكيد ، اشوف رقمه ... الا هو
ام هادي ؛ ييوه خلوه خلوه يقفل
وحطته صامت ورجعوا يتفرجون ع التلفزيون والتفت حمد لجواله ؛ ابك دق علي
ام هادي ؛ هو وش يبي ؟
حمد ؛ مدري خوي هادي تلقينه بيسأل عنه
ام هادي ؛ رد وقل نايم ولا مهو هنا لاتعلمه انه بالمستشفى
ورد حمد وام هادي تأشر له لايعلم وهي مقربه وتسمع معه ومن قفل تأفف ؛ ابك انا ماعرف اكذب ليتني مارديت
ام هادي ؛ لا ماعليك بس شف ابوك هم وين راحو صدق
حمد ؛ ايه ايه بشوف وش صار على هادي
وفزت شهد وهي تجلس جنبه وقربت تسمع ودق حمد ورد ابو هادي ؛ ها ياحمد
حمد ؛ هلا يبه ها وش سوى هادي
ابو هادي تنهد ؛ تعال تعال بس بيكتبون له تنويم رافق معه
ام هادي ؛ ليه وش قالوا ؟
ابو هادي ؛ والله عيت تنزل حرارته ومايقدرون يعطونه مسكنات ليده بيخلونه لبكره ان نزلت عطوه
شهد ؛ طيب يبه عادي نجي نشوفه ؟
ابو هادي ؛ لا يبوك مهو عادي ماهم مدخلينكم قالوا مرافق وبس مافيه زيارات تعال ياحمد وهات فروته
حمد ؛ يلا بصلي المغرب واجي
ابو هادي ؛ يلا وانا عنده الين تجي
وقفل وقال حمد ؛ عزتي لك ياهادي
شهد ؛ ياعمري والله احسب تعب خفيف علاجات وخلاص
حمد وهو يقوم ؛ ماعليه يطلع ان شاء الله بكره
ام هادي ؛ اصبر بعطيك له لبس وجواله والفروه
حمد ؛ ايه يلا بصلي
وراحت ام هادي تجهز اغراضه وراحت معها شهد وحمد فرش سجادته وصلى
خلص وراح لغرفته يبدل وبعد دقايق طلعت ام هادي ونادت ؛ حمد
حمد من غرفته ؛ ها يمه دقيقه بغير ملابسي
وطلعت للصاله وهي تحط الشنطه الصغيره اللي جهزتها لهادي وقالت شهد اللي كانت متكتفه بتفكير ؛ يمه
ام هادي ناظرتها وكملت شهد ؛ برافق معه انا مايصير
ام هادي تنهدت ؛ لو يصير رحت انا بس اكيد لازم رجال معه
وطلع حمد ؛ ها يمه خلاص ؟
وناظرته شهد وضحكت غصب عنها ؛ وشش بنطلون وتيشيرت وين رايح انت سياحه ؟ ، ولا خله ماحاصل تلبسه الا لحالك
ام هادي ضحكت ؛ والله قلتي اللي بقلبي
حمد تكتف ؛ بالله ؟ يعني اذا بغيت اخمد تبون اخمد بثوبي ؟ البس بنطلون وخلاص بس عساه مايكفخني ابوي ويسدحني بجنب هادي
ام هادي وشهد ؛ ههههههههههههههههه
حمد ضحك ؛ يلا يلا وين اغراضه
ام هادي ؛ امسك هذي هي وانتبه لهادي
حمد ؛ ابشري
شهد ؛ خذ لك ثوب طيب عشان تغير
ام هادي ؛ ايه خذ لك لبس انت بعد
حمد مشى لغرفته بسرعه واخذ ثوبه وحطه بشنطة هادي وطلع ؛ والله اني تأخرت يلا بروح جواله جواله وين
ام هادي ؛ بالشنطه رح بس
شهد ضحكت ؛ والله ياحمد الطقم ولا غلطه ابهرتني
حمد وهو يدور ؛ كيف بالله ؟ والله اني ذويق
شهد ؛ اي بس ترا كنت ابيها هالجاكيت من يوم ماشريتها وانا اقول لك بلبسها
حمد ؛ وانا قلت حريمتك كل ملابسي عندك
شهد ؛ الله والملابس تراها بس الجاكيت السودا اللي اخذت
حمد ؛ والرصاصيه بعد ياكذوب
ام هادي تأففت ؛ يويلي منكمم اخلص اطلع ولا لازم يدق ابوك مره ثانيه
حمد ؛ لا خلاص طلعت يلا يلا
وطلع وضحكت شهد ؛ اهب ماشاء الله ماينسى
ام هادي ابتسمت وهي تهز راسها وراحت للمطبخ
..........••..........
المستشفى
كان ابو هادي جالس عند سرير هادي وينتظره يصحى وهو كل شوي يلمس جبينه والتفت لجواله وشافه حمد يدق ورد ؛ ها وصلت ؟
حمد ؛ ايه وينكم ؟
ابو هادي وهو يقوم ؛ تعال انا عند الباب حق المستشفى واقف
وطلع وسكر الباب وهو يوقف عند باب المستشفى ويتلفت وانتبه لسيارة حمد وعقد حواجبه بصدمه من لبس حمد اللي كان بنطلون وتيشيرت اسود وجاكيت بيج طويله وصد وهو يمسح وجهه وقرب حمد وهو ماسك ضحكته من فهم حركة ابوه ؛ سلام
ابو هادي تنهد ؛ وعليكم السلام ادخل ادخل انت وهالملابس ، انا وش انا قايل عنها ؟
حمد ابتسم بضحك ؛ وشو ترا مهب بس انا البسها
ابو هادي وهو يمشيه معه ؛ وعسى مانسيت فروتك البنفسجيه بعد ؟
حمد ضحك ؛ لا الجكيت تكفي جبت ثوب يليق معها
ابو هادي هز راسه بأسى ودخلوا لغرفة هادي وقال حمد وهو يحط الأغراض على الطاوله ؛ سلامات سلامات ياهدهد ، شف جبت لك ذيك الأغراض من البقاله والله بغيت اجيب لك من المطعم ذاك العشاء بس مافيه الا بالرياض ان تأخرت بيذبحني ابوي
وناظر لهادي بأستغراب ورجع ناظر ابوه ؛ نايم ؟
ابو هادي تنحنح وهو يجلس ؛ من يوم ماجينا ماصحى اسمعه يتكلم ولا ادري وش يقول
حمد عقد حواجبه ؛ افا
وقرب وهو يجلس على طرف السرير ويمسح شعر هادي ؛ هادي ؟ .. تسمعني ؟
ابو هادي ؛ والله انا اناديه من المغرب ولا رد قم نروح سجل انك مرافق معه وبطلع يلا
حمد قام مع ابوه وطلعوا للأستقبال وسجل حمد بياناته هو وهادي ومن خلص التفت لأبوه اللي قال ؛ انتبه له وخل جوالك شغال عشان ادق عليك
حمد هز راسه ؛ ابشر
ابو هادي ؛ يلا اجل بروح البيت استودعتكم الله
حمد ؛ وياك
وطلع ابو هادي ركب سيارته وحرك للبيت وحمد رجع عند هادي للغرفه وسكر الباب وجلس وهو يسند راسه على سرير هادي ؛ والله ياهادي اني احسبه تعب خفيف مادريت انك منت مع الناس من التعب ... ياخي قم سولف معي ولا ترا بقرق على راسك الين ينفجر .... هادي انت تخاف مني صح ؟ ، منهو تاج راسك ؟ ... لا خلاص امزح ، ورع
وتنهد بطفش وهو يعدل الكرسي اللي كان عليه واللي كان سرير بنفس الوقت وانسدح على جنب وهو يتكي راسه على كفه ويناظر بهادي ينتظره يصحى
..........••..........
بيت ابو راشد
كانوا ابو راشد والعيال بالمسجد من صلاة المغرب وكان باقي دقايق على آذان العشاء
وكانت اروى بالمطبخ تطفي النار وطلعت للصاله ؛ يمه خلاص استوى العشاء
ام راشد ؛ زين روحي انتي وهاجر حطوا حقنا وخلوا حق العيال الين يجون نبي نتعشاء بدري عشان نتحنا
اروى هزت راسها ورجعت للمطبخ ولحقتها هاجر وقالت ام راشد ؛ من تبيني احني يديها ؟
التفتوا جوري وترف واميره ومناير اللي كانوا متسدحين يتابعون التلفزيون وقالوا مع بعض ؛ اناا
ام راشد بضحك ؛ خلاص نتعشاء واحط لكم ، عبير انتي وشريفه ماتبون ؟
شريفه ؛ لا والله بالتمايم ان شاء الله
عبير ؛ وانا والله مادانيه ما احط الا بالمناسبات
ام راشد ؛ خلاص اجل نحط انا والبنات
وبعد دقايق طلعوا هاجر واروى بالعشاء واجتمعوا كلهم
•
خلصوا وشالت هاجر الصحن للمطبخ واروى كملت تلم السفره ودخل نايف للمطبخ وهو يشوف هاجر تغسل ؛ السسلام عليكم
هاجر ؛ وعليكم السلام
نايف ؛ اما سبقتونا ؟
هاجر ؛ ايه احط عشاكم الحين ؟
نايف ؛ لا خليه بكره ازين
هاجر ؛ وانا بعد اقوله
نايف ضحك ؛ اخلصي اخلصي حطيه بس
هاجر ابتسمت بضحك وجلست تحط عشاهم ودخلت اروى وهي تحط السفره ؛ هاجر تبين حنا
هاجر ؛ لا والله عجزانه احط وانتبه له لايخرب
نايف اللي كان متكي ع الدولاب ؛ بتحنون ، ليه وش عندكم ؟
اروى ؛ كذا ، امي بتحني وبنتحنا معها
والتفتوا على دخول تركي مستعجل ؛ يلا العشاء وينه ؟
هاجر ؛ بسم الله صدق وانا وش اسوي!
تركي ؛ ابوي يقول بسرعه
وتنهدت هاجر وهي تكمل تغرف واخذوه العيال وطلعوا هاجر واروى للصاله وقالت ام راشد اللي جلست بالأرض وحطت عندها سفره ؛ اروى هاتي قمايش الحنا
وراحت اروى تجيبهم وهاجر جلست على الكنب ومدت رجولها وهي تصب لها شاي وتتفرج وعبير بعد مثلها وبحضنها ولدها خالد وشريفه بحضنها العنود والصغار متسدحين بالأرض حول التلفزيون
ام راشد ؛ جوري تعالي احنيك قبل تروحون
ترف التفتت ؛ وانا ؟
ام راشد ؛ وانتي بعد بس هم بيروحون بعد شوي بحنيهم بسرعه
وهزت ترف راسها وهي ترجع تناظر التلفزيون وقامت جوري وجت اروى وهي تجلس ؛ يمه هذولي هم
ام راشد ؛ زين انا بحنيهم وانتي لفيها على يديهم
وهزت اروى راسها وكملت ام راشد تحني جوري ومن بعدها اميره ومناير ولفت اروى يدينهم واعتدلت ام راشد بتعب ؛ يلا ياترف ، اروى عطيني مركى
اروى وهي تلف يدين مناير ؛ هاجر هاتي لأمي مركى بلف يد مناير
هاجر اخذت المركى ؛ ترف خذي عطيه جده
واخذته ترف وهي تحطه ورا ظهر ام راشد وجلست عندها تحنيها وبعد دقايق دخلوا ناصر وعبدالله للصاله وناظر عبدالله يدين ترف وضحك بتقرف ؛ ييع ترف حنا
ترف خزته ؛ يع وجهك ، اعلف لك تبن بس
كتموا ضحكتهم هاجر وشريفه وهم يناظرون بعض وشهقت ام راشد ؛ يابنيه عيب الكلام هذا !
عبير هزت راسها بأسى ؛ ماله طب لسان ترف
ام راشد ؛ وانت ياعبيد وشو يع الحنا مزين منه
اروى ؛ خلاص عيب نويصر اجلس انت وعبدالله تابعوا ولا روحوا الدوانيه
وجلسوا ناصر وعبدالله عند التلفزيون بضحك وتنهدت ام راشد وخلصت وهي تلتفت لشريفه ؛ عطيني العنود بحنيها
اروى خلصت من ترف وهي تفز ؛ هاتيها هاتيها
واخذتها من شريفه وهي تبوسها ؛ يلا يلا عنودي حنا
وتربعت والعنود بحضنها وقالت ام راشد ؛ شريفه بحني رجليها
شريفه ضحكت ؛ ماقول لا حنيهم
وابتسمت ام راشد وهي تحني يدين العنود ورجولها وتجمعوا الصغار يشوفونها وعبير وشريفه وهاجر يناظرونهم من مكانهم وخلصت ام راشد وهي تلفهم ؛ شريفه مهديها زين ولاتفكينها بكره ان شاء الله نغسله
شريفه ؛ ان شاء الله
وقامت اروى وهي تعطي العنود شريفه وقالت ام راشد ؛ يلا ياهاجر
هاجر ؛ لا يمه ما ابيه مزريه انتبه له واصلاً بغسل صحون العشاء
عبير ؛ تحني انا اغسلهم
ام راشد ؛ قومي يلا والله مافيه ازين من يد البنت لاصار فيها حنا ... قومي ما احط على اظافرك ماعليك
هاجر ناظرت اظافرها ؛ حاطه مناكير مايجيهم حنا اصلا
وقامت وهي تتربع عند ام راشد ؛ طيب يمه ابيه دويره مب على كفوفي كامله
اروى شهقت ؛ هيييه انا ابي كذذا
هاجر ؛ والله انا قلت قبلك مالي دخل
اروى دقتها ؛ والله اني لا احط بعد
هاجر ؛ اااه عظامي متكسره لاتدقين اقوم عليك
ام راشد ؛ خلاص خلاص احط لكم كلكم بعدين تراه حنا مثل بعضه نص بنات الديره مثل اللي بتحطون وش فيها لاحطيتوا مثل بعض
هاجر ؛ طيب يمه اخاف تصبغ اظافري وانا مادانيها لاصار عليها حنا
ام راشد ؛ حطي زيت ولا فازلين فوق المناكير عشان لايجيه الحنا
اروى وهي تقوم ؛ بجيب انا واحط على اظافري بعد
هاجر ناظرت اروى اللي قامت ؛ ايه انتي اللي تقلدين شفتي
وطنشتها اروى وراحت جابت فازلين ورجعت وقالت ام راشد ؛ يلا سرعه حطوا
وحطوا على اظافرهم عشان اذا جاهم حنا مايصبغ عليه وبدت ام راشد تحط لهاجر على اصابعها وبنص كفها ومن خلصت قالت هاجر وهي تقرب كفوفها عند بعض ؛ اصبري يمه هذي اصغر من هذي
ام راشد ضحكت وهي ترجع تعدلها ؛ هه كبر اختها كذا ؟
هاجر هزت راسها وقالت ام راشد ؛ وشلون تسوون الحين ماتقدرون تربطونها بتصبغ على يديكم
هاجر واروى مع بعض ؛ نحط كيس
وضحكت ام راشد وقالت اروى وهي تفز ؛ بجيب ٤ اكياس واجي
وراحت جابتهم ورجعت وهي تربط على يدين هاجر وحطت اكياسها بحضنها وجلست عند امها اللي بدت تحط لها ودخل راشد بعد دقايق ؛ السلام
ام راشد والبنات ؛ وعليكم السلام
راشد جلس عند الدفايه وهو يشد على فروته ؛ يييوه البرد البررد ، ماشاء الله متحنين
ام راشد ابتسمت ؛ اييه بتحنى قلت احنيهم معي
جوري التفتت ؛ حتى عنوده حطينا لها بس لفيناها عشان ماتاكله
راشد ضحك ؛ امما يحليلها ، يلا يلا انتي وخواتك مشينا
ناصر جلس ؛ انا بنام هنا قلت لأمي
راشد ؛ ايه ايه بس باخذك معنا تدخلهم البيت خالاتك واهل خوالك هناك
جوري تربعت ؛ حتى انا طيب بنام هنا والله ما اصيح بس نودي اموره وميمي ونرجع
عبير ؛ اي والله خلها تنام عندنا بكره الصباح نروح
ام راشد ؛ ايه ماعليها جوري تنام اما الصغيرات يمكن يصيحون
راشد ؛ والله ياجوجو امك اخذت اغراضك معها بكره الصباح اجيبك انتي وخواتك
ام راشد ؛ ودهم الحين وشف اذا منيره خلتها ترجع واذا عيت تجيبها الصباح
راشد ؛ اجل يلا قومي ياجوري انتي وخواتك يلا
وقاموا والتفت عبدالله لناصر ؛ ارجع مع خالي لاتجلس هناك
ناصر ؛ ماعليك ابجي مع ابوي بعد شوي
ام راشد ؛ لبسيهم جكيتاتهم ياعبير لايبردون
واخذت عبير جاكيت مناير وهي تقوم تلبسها وضحك راشد وهو يلبس اميره جاكيتها ؛ ياحليلكم انتوا وهالحنا
عبير وهي تبوس مناير ومن بعدها اميره وجوري ؛ خلوني اسلم عليهم اخاف نمشي الفجر ، مع السلامه ياحبيباتي
جوري ؛ اذا امي ماخلتني اجي لاتروحون الفجر
عبير ضحكت وهي تلبسها جاكيتها ؛ ابشري ان شاء الله واذا ماخلتك تجين يجيبك راشد الفجر
راشد ؛ ايه ماعليك يلا والله الوقت تأخر
ام راشد ؛ يلا مع السلامه واغسلوا حناكم اذا قمتوا
جوري ؛ طيب
وطلع راشد ومعه عياله وحركوا لبيت اهل منيره
وجلست عبير وناظرتها اروى ورجعت تناظر امها والبنات ؛ الحين اذا رحتي يكونون عيال راشد عند امهم ويصير البيت هاجد كذا مافيه الا حنا وشريفه
عبير ضحكت ؛ يبنت الحلال ورعان راشد يجونكم الصباح وماعليك العنود ماتخليه يهجد
شريفه بضحك ؛ ايه وبعدين العيال وين راحوا تراهم الحين بالدوانيه طول الوقت عشان سعد ومنيره وبيجونك يفجرون راسك
هاجر ؛ وانتي تكفين عن صجتهم كلهم
اروى ؛ اقول لاتخليني اصفقك بالحنا على وجهك
ام راشد ؛ اقول اثبتي بس خليني احط زين ، وترا مايهدى البيت وانتي وهاجر ٢٤ ساعه نقره
اروى ؛ هي تبدا الهوشات دايم
هاجر ؛ لا والله ؟
اروى ؛ اي والله
ضحكوا شريفه وعبير وقالت ام راشد ؛ قومي قومي يلا خلي عبير تربط على يديك الاكياس
وقامت اروى لعبير وقالت ام راشد ؛ عادي بحني رجيلاتي مثل السميه
عبير وهي تقوم بعد مالفت يدين اروى ؛ انا احنيهم لك يمه لايتعب ظهرك
ام راشد ؛ لا ماعليه ان شاء الله
عبير قامت وهي تجلس عند امها ؛ لا والله انا احنيهم يتعبونك
وهزت راسها ام راشد واخذت عبير الحنا وهي تحط لرجول امها ومن خلصت قالت وهي تقوم ؛ بجيب كيس وتلبسين عاد فوقه شرابات اصبري
وراحت جابت اكياس ورجعت ولفتهم على رجول امها ومن خلصت وهي تلف قماش على يدينها بعد وخلصت واعتدلت ام راشد وهي تستند ع المركى بضحك ؛ عشتي وانا امك عاد دامك ماحطيتي حنا شيلي السفره
عبير ضحكت وهي تلم سفرة الحنا ؛ ماعليه اشيلها بدلعكم اليوم دام بروح بكره مع انه المفروض العكس
وضحكوا وابتسمت عبير وهي تروح المطبخ وقامت شريفه وهي تاخذ اغراض العنود ؛ عاد بروح انام انا تصبحون على خير
ام راشد والبنات ؛ وانتي من اهله
ام راشد ؛ انتبهي للعنود لاينفك مهادها
شريفه هزت راسها وهي تروح لغرفتها تنام
بالمطبخ دخل تركي بالصحن ؛ مساء الخير ياعبوره
عبير بأبتسامه ؛ هلا ياتروك ، ها تعشيت
تركي وهو يحط الصحن ؛ اييه الحمدلله
عبير ؛ ناموا الباقين ولا وين راحوا
تركي ؛ لا عند المشب نبي كاسات شاهي
عبير وهي تفتح الدرج ؛ ابشر كم وحده ؟
تركي ؛ ٧ ، وين البنات ؟
عبير ؛ بالصاله متحنين ، هذي هي
اخذهم تركي وراح للدوانيه وعبير جمعت صحون العشاء وهي تغسلهم
بعد دقايق دخل راشد الصاله ومعه جوري وناصر وابتسمت ام راشد ؛ ها عسى وافقت منيره
جوري ضحكت بفرحه وابتسم راشد وهو يحط اللي معه ؛ اييه مع ان بنات خالاتها وخوالها هناك بس تقول تبي ترف ، وهذا فراشها جابته معها بعد
اروى همست لهاجر بضحك ؛ القطو مايحب الا خناقه
ضحكت هاجر ؛ لا احسن شي انهم يتهاوشون شوي ويتسامحون بسرعه
راشد ؛ يلا انا بروح للدوانيه عند ابوي والعيال ، ناصر انت وعبدالله شوي وتعالوا لاتسهرون
ناصر وعبدالله ؛ طيب
وطلع راشد للدوانيه والتفتت جوري لترف ؛ غيمه برا نروح نلعب معها
ترف ناظرتها ؛ مانقدر من الحنا
سمعوهم البنات وقالت ام راشد بأستغراب ؛ منهي ؟
ترف ؛ البسه
اروى ؛ وشو اللي غيمه طيب ؟
جوري ؛ انا وترف سميناها غيمه
ترف ؛ عشانها بيضاء وحلوه
ام راشد ضحكت ؛ بعد مسمينها
اروى ؛ والله حلو ! من سمتها
جوري ؛ انا قلت اسم غيمه حلو قالت ترف ايه بنسميها
هاجر ضحكت ؛ لايق عليها
اروى ؛ اي والله
وطلعت عبير من المطبخ وضحكت ؛ ها جوجو وافقت ماما
جوري ؛ ايه قالت طيب
هاجر ؛ جابت فراشها تبي ترف
عبير بضحك ؛ اجل بنومها عندي
ام راشد ؛ الا الساعه كم ؟
عبير ؛ ١٠ ونص
ام راشد ؛ ييوه يلا يلا نوم عشان تقومون بدري
جوري ؛ شوي الحين تنتهي امجد وميمو
ام راشد ؛ الا ياعبير كم الساعه تروحون بكره ؟
عبير ؛ الصباح ٧ ولا ٨ مع ان ودي نمشي الفجر عشان نوصل قبل الليل
ام راشد ؛ الله يعينكم والله الطريق طويل مهو زين تمشون بالليل
عبير ؛ لا عادي بس ان سعد ينام ، يوم جينا مشينا العصر ووقفنا الساعه ٩ بالليل نمنا وكملنا طريق الصباح وجيناكم الظهر ماداني كذا انا ابي مره وحده
ام راشد ؛ عاد ان مشيتوا الفجر توصلون على المغرب قبل الليل احسن
عبير ؛ ايه عاد مدري هو يقوم من الفجر ولا ينام
ام راشد ؛ ماعليه خليه يشبع نوم الله يعينه على السواقه ، اجل انا بنام عبير لايسهرون عشتي
عبير ؛ ماعليك عندي نوم العافيه
وراحت ام راشد لغرفتها وبعد دقايق قامت عبير ؛ خلاص انتهت يلا قوموا
عبدالله ؛ يمه بعد شوي يجي كابتن ماجد انا مافيني نوم
عبير ؛ لا توه بعد ساعه رح بس نام انت وناصر تتابعها بعدين
وتأفف عبدالله وقام وناصر معه وراحوا للدوانيه وعبير شالت خالد اللي كان نايم واخذت فراش جوري وراحت للغرفه ولحقوها جوري وترف ودخلوا ينامون
وبقوا هاجر واروى وقالت اروى ؛ سالي بتبدا بس اعادة الظهر تابعتها ، بس مافيني نوم بتابعها مره ثانيه
هاجر ؛ انا ماشفتها بتابعها وانام ، الحلقه ١٦ ولا كم ؟
اروى ؛ لا ١٥ اليوم
هزت هاجر راسها وهي تتابع وبعد دقايق ضحكت ؛ البسه هذي كنها بستك بيضاء بعد
اروى ؛ لا والله تروع هي وعيونها اما غيمه تجنن وصغيره هذي ياكبرها
ضحكت هاجر وكملوا يتابعون ومن انتهت تنهدت اروى ؛ يوه والله مالوم لوتي حتى انا متعلقه بسالي
هاجر ضحكت وهي تقوم ؛ ايه بس قومي يلا طفي التلفزون بروح ارقد
اروى قامت ؛ يدي حنا كيف اسوي
هاجر وهي تروح للغرفه ؛ طفيه برجلك
وضحكت اروى وطفته ولحقتها للغرفه تنام ...

•
نهاية البارت ...
وبكذا ياحبايبي اخر بارت قبل رمضان لأن والله فكرت اني انزل لكم بس مافيه وققت اببدا خلونا نتفرغ للطاعه والعباده وضموا اسمي بين دعواتكم الحلوه والله يجعل لكم بالمثل ويجعلكم من صوام هالشهر الفضيل وقوامه وانتظروني بأذن الله بعد العيد انزل لكم احلا بارتات ❤.