ياديرةٍ ضمّت كل الأحباب

Part 2

..........••..........
بيت ابو راشد
بالدوانيه
ابو راشد ؛ شلون شغلك ياعزام ان شاءالله مرتاح فيه ؟
عزام ابتسم ؛ الحمدلله مرتاح والامور طيبه
وكملو السوالف بالسؤال عن الحال والشغل
•
" عند البنات داخل "
هاجر جلست عند شريفه ؛ شروف وش رايك تسمين بنتك على اسمي
اروى ؛ اقول اسكتي بس شروف بتسميها علي انا صح شروفه ؟
شريفه وهي تضحك ؛ لا ياحبيبتي لاعليك ولا عليها بسميها العنود
هاجر واروى مع بعض ؛ على اسم اميي
شريفه بضحكه ؛ ايي على اسم امي ليه مو حلو اسمها ؟
هاجر وهي تناظر اروى ؛ الا احسن من اسم اروى
اروى دقتها ؛ واحسن من اسم هاجر
ضحكوا شريفه وام راشد ودخل نايف وجلس وهو يتكي على هاجر ؛ حي الله شروف والله فيه ناس فاقدين السنع
شريفه ضحكت ؛ ياحبيبي والله ، اعترف مشتاق للي كانت تغسل ملابسك وتجهز اغراضك؟
نايف وهو يناظر هاجر ويبتسم ويرفع حاجب ؛ اي والله مب مثل بعض الناس حتى شماغي ماتكويه
هاجر وهي تبعد ذراعه عن رجلها ؛ اقول بس اول شي وخر يدك وثاني شي تعرف تكوي شماغك انت
وقالت وهي تناظر اروى وتقلد نايف وتبتسم وترفع حاجب ؛ ولا عطه بعض الناس تكويه
الكل ؛ هههههههههههههه
اروى ؛ والله ياحبيبتي انا ماعرف اكوي مب مثلك تعرف بس نذاله ماتسوي ورفاله بعد
شريفه بضحك صدمه ؛ يربيي انتو للحين تناقرون وربي احسبكم عقلتوا !
ام راشد ؛ لا والله مايعقلون
دخل تركي وشهق بتمثيل ؛ نايف يويلك يويلك ابوي معصب ارسلك تجيب ماء وانت متكي تسولف .. انا اروح اعلمه
ومثل انه بيروح ونقز نايف يمسكه ؛ صل على النبي يبن الحلال نسيت والله الحين بروح اوديه
ام راشد ؛ علامكم؟
تركي جلس ؛ ابد والله ولدك ارسله ابوي يجيب ماء وقعد وخلانا
اروى ؛ وابوي ارسلك تصوت له وقعدت معه
ضحكو وضرب تركي راس اروى بخفه
نايف ؛ اي والله قم قم خذ معي الماء خلنا نوديه
تركي ؛ اصبر ترا ماقال وايت ولا قليب وده انت وانا بقعد مع شروف والله مشتاق لسوالفها شوي واجيكم
طلع نايف والتفتت شريفه بضحك على تركي ؛ ياحليلك ياتريك انت اكثر واحد اشتقت له من اخواني
تركي ضحك ؛ الله مير يسلمك
هاجر واروى ؛ عععشناا يستحي
ضحك تركي ؛ قومي قومي انتي وياها استعجلوا بالعشاء الرجال بيمشي وراه طريق
ام راشد ؛ ليه مايبي ينام هنا ؟
تركي ؛ لا عزام عيا يخلي ابوي يحلف عليه يقول عنده دوام بكره العصر والطريق طويل
ام راشد التفتت لشريفه ؛ ماعطوه اجازه!
شريفه ؛ لا يقول بيوفر اجازات عشان اذا ولدت يجي
ام راشد ؛ الله يسهل لك وانا امك
وقامت للمطبخ مع البنات اللي سبقوها
تركي ؛ الله الله ياشروف بتصيرين ام ؟
ابتسمت شريفه بحب ؛ ايه ان شاءالله وانت متى نحضر زواجك ونشوف عيالك ؟
تركي بضحكه ؛ والله شكلكم متفقين علي اليوم انتي وراشد
شريفه ابتسمت بضحك ؛ يوه حتى راشد يسألك
تركي ؛ كلهم مب بس انتي وراشد
شريفه بجديه ؛ عاد صدق والله ماودك تتزوج!
تركي ؛ والله ياعين اخوك ماودي .. يعني ماودي اتزوج وانا للحين ماتوظفت واصلاً ما اقعد بالبيت طول وقتي مع العيال ونتمشى وان تزوجت ماراح تصبر علي وانا كل شوي برا
شريفه ؛ قدم على وظيفه طيب واصلاً ابوي ماراح يقصر معك وده انه يزوجك والطلعات صدقني بتتزوج وبتطلع انت وياها وماتجلسون بالبيت
تركي ضحك ؛ عز الله قالها نايف لو تزوجت ماتقعد انت ومرتك بالبيت ٢٤ ساعه هايتين على قولة ابوي
ضحكت شريفه ودخل راشد ؛ ماشاءالله عليك ليكون كنت تصلي العشاء بعد!
تركي ناظره بأستغراب ؛ هه ؟
ضحك راشد وهو يجلس ؛ يوم تأخر نايف ورحت تشوفه جا للدوانيه وسأله ابوي وين راح قال نايف كنت اصلي العشاء وهو ما اذن
ضحكوا تركي وشريفه وقالت شريفه ؛ ياعمري جلس يسولف معنا وراح وجا تركي بداله
راشد وهو يقوم تركي ؛ قم قم رح للدوانيه وانا بجي الحين
قام تركي وهو يضحك ؛ اي يصير خير نشوفك على صلاة الفجر
راشد وشريفه ؛ ههههههههههههههه
راح تركي للدوانيه وجلس راشد مع شريفه
راشد ؛ شلونك ياشروف اخبارك مع الحمل ، عاد اول مره اكيد يتعب
شريفه ؛ اي والله بس الحمدلله هانت ماباقي شي
راشد ؛ الله يتمم لك على خير يارب
شريفه ابتسمت ؛ امين ، اخبار منيره والعيال واموره ومناير " التوأم"
راشد ؛ بخييير كلهم بكره يجون ان شاءالله
شريفه ؛ ان شاءالله
وقام راشد ؛ يلا عاد بروح الدوانيه لايجي ابوي الحين ويجلدني والليله لازم نتجمع فيه سوالف واجد
شريفه ضحكت ؛ ياحبيبي والله ابشر
ابتسم راشد وطلع للدوانيه
•
بالدوانيه
دخل تركي وهو يضحك من نايف واستوعب ان ابوه بيسأله الحين ومايدري وش يقول وقال بنفسه ؛ " بقول الصدق والله وش فيها "
وفعلاً التفت لأبوه اللي قال ؛ وين رحت؟
تركي ابتسم ؛ والله قعدت مع شروف شوي وجيت
ابتسم ابو راشد وهز راسه ونايف يناظر بصدمه
والتفت له تركي وهو يضحك وجلس عنده وهمس ؛ ليه قلت له انك رحت تصلي وهو ما اذن يالكذاب !
نايف ضحك ؛ اجل فضحني راشد
تركي ؛ اييه عز الله تستاهل
•
بعد ساعه
دخلو تركي ونايف للمطبخ وقال تركي ؛ يمه ابوي يقول كم باقي له العشاء
ام راشد وهي تطفي النار ؛ خلاص خلاص جهز احطه الحين ولا بعد الصلاه؟
نايف استند على الرف وهو ياكل خيار ؛ ما اذن يمه الحين حطيه عزام بيصلي ويروح
وجلست ام راشد تحط العشاء وتركي ونايف ينتظرون وخلصت واخذوه وراحو للدوانيه
..........••..........
بيت ابو هادي
كانوا مجتمعين للعشاء وقال هادي ؛ اووووهه يمه وش هالمرقوق الاسطوري ، سويه كل يوم
ام هادي بضحكه ؛ ياحبيبي بالعافيه
شهد ؛ اي والله يا يمه احلا مرقوق سويتيه
حمد ؛ يمه تراها تسب طبخك قصدها ان كل المرقوقات اللي قبل مهيب زينه
شهد بشهقه ؛ ترقرقت عظام العدو لا والله كذاب يايمه انا قصدي ان كلهم يهبلون بس هذا احلا واحد
حمد دقها ؛ اييييه كذا قصدك
ضحكوا وقالت ام هادي بأبتسامه ؛ اي الله يصلحك قصدها كذا اعرفها بنيتي
ابو هادي ؛ اي والله الله يسلم يمينك يا مريم
ام هادي ؛ بالعافيه عليكم
الكل ؛ الله يعافيك
كملو العشاء وابو هادي مقرر بعد العشاء يقولهم عن المعرض
•
بعد ماخلصو عشاء تجمعو كلهم ينتظرون موضوع ابوهم جا ابو هادي وهو يجلس ؛ انتوا يعيال الحين خلصتو دراسه و ان شاءالله انكم ناجحين
شهد اللي كانت خايفه ان صدق فيه احد خطبها
وكمل ابو هادي ؛ وانا من زمان ودي اسكن بالرياض وانتوا بعد تبونها واهلنا هناك بس اشغالنا هنا وانتوا دراستكم هنا بعد والحين خلصتوا وان شاء الله انكم ناجحين وانا اذا على المعرض جاني رجال اليوم وطلب مني يشتريه والرجال معروف ماشاءالله وتاجر والكل يمدحه وانا قلت افكر واشاوركم وانا نص ونص موافق بس باخذ رايكم واشوف وش ودكم
شهد ناظرت حمد وتطمنت وحمد كاتم ضحكته على وجهها الخايف
ابو هادي ؛ والرياض انتوا تحبونها وعشان قرايبنا هناك انا اقول اني ابيع المعرض ونسكن بالرياض وش قلتوا ؟!
ابتسمت ام هادي اللي كان ودها تكون قريبه من اهلها ؛ والله انا اشوف انك تبيعه وشغلك تكمله بالرياض بديرتنا وعند اهلنا
هادي ؛ اجل الرجال اللي اليوم يبي يشتري المحل ؟ والله اني اشوف انك تبيعه الرجال واضح ماشاءالله شراي ويستاهل
حمد سكت لثواني بتفكير ؛ اجل انا مع امي وهادي
ابو هادي وهو يناظر شهد ؛ وانتي ياشهوده وش رايك ؟
شهد اللي تحب المدينه بحكم ان كل صديقاتها وجيرانهم هنا ؛ والله يبه صعبه نترك المدينه حتى هنا لنا اهل بس بنفس الوقت الرياض احبها وانتظر روحتها كل عطله بس الحين مدري
ابو هادي ؛ والله معك حق وانا ابوك لاكن بنزور المدينه ونزور جيرانا هنا مثل مانزور الرياض
شهد ؛ يعني بالأجازات نقدر نجي المدينه
ابو هادي ضحك ؛ ايه ابشري نجي ليه مانجي
شهد ابتسمت ؛ اجل تم
ام هادي ؛ ومتى نروح؟
ابو هادي ؛ اوووه عاد متى نروح هذي يبي لها وقت وانا من بكره بقول للرجال ونتفق على البيع ان شاءالله
وسكتوا لدقايق وقام ابو هادي ؛ يلا اجل انا بنام ناموا لحد يسهر
وقاموا لغرفهم ينامون بس بالحقيقه محد نام الكل يفكر وش بيصير بعدين
..........••..........
بيت ابو راشد
بعد ماتعشوا كلهم وسلم عليهم عزام وهو يتنحنح بأبتسامه ؛ نادوا شريفه شوي بكلمها
ابتسم ابو راشد والتفت لنايف ؛ رح ناد اختك
وراح نايف داخل وهو ينادي لشريفه ؛ شرووفوه عزام يبيك بالدوانيه بيمشي
شريفه طلعت للدوانيه وقال ابو راشد ؛ يلا حنا بنروح شوي داخل تعال يا راشد انت وتركي
وراحو والتفت عزام لشريفه ؛ الله يصلحك الحين لازم تنامين هنا مايكفي ٤٠ يوم بتجلسينها بعد ماتولدين ؟
شريفه بضحكه ؛ المفروض اني اجلس الشهر هذا لبعد الولاده يعني شهرين و١٠ ايام بس شلنا شهر عشانك
عزام وهو يحاوط كتفها ؛ والله لو تجلسين ١٠ ايام بس بعتبرها سنه
شريفه ابتسمت ؛ عاد انت ماعليك بتكون طول وقتك بالدوام واذا جيت بتنام يعني ماراح تفقدني
عزام ؛ والله حتى وانا بالدوام افقدك حرام عليك
شريفه ؛ والله قلت لك خذ اجازه بس ما سمعت الكلام
عزام ضرب خشمها بأصبعه بخفه ؛ والله قلت لك بوفر الاجازات لبعد ولادتك بس ماسمعتي الكلام
شريفه ضحكت ؛ خلاص رح وانا يومين بس وارجع لك مايمديك تشتاق لي عاد
عزام ابتسم وقال وهو يأشر بأصابعه ؛ يومين بس وراجع لك
وطلع وهو على اساس تنام عند اهلها كم يوم وبعدها ترجع للجبيل لحد ما تولد وترجع تقضي النفاس عند اهلها
ورجعت شريفه داخل ولقتهم متجمعين بالصاله
ابو راشد ؛ ها ياشريفه راح عزام؟
ابتسمت شريفه وهي تجلس عنده ؛ ايه راح وبيجي بعد يومين ان شاءالله ونرجع للجبيل
راشد ؛ افا بتولدين بالجبيل والرياض وش فيها ؟
ضحكت شريفه ؛ مراجعاتي هناك وانا حاجزه بمستشفى للولاده
اروى ؛ ابك وش الفرق ليه ماتولدين هنا على الأقل عند امي تكون معك
تركي ؛ وش هالبنت البطله ماشاءالله تحجزون لها بمستشفى وتجهزون لولادتها
نايف ضحك ؛ عشان هذي اول ورع ياحبيبي ولا الباقي يسحبون عليه
هاجر ؛ يعني اول بزر يجي يدلعونه
اروى ؛ ايه اكيد ماتشوفين الحماس ماشاءالله
هاجر ؛ ماشاءالله يمه راشد وش جهزتي له
ابو راشد ضحك ؛ لاتجهيزات ولا شي
ضحك نايف ؛ عزتي لك يارشود مسحوب عليك
ام راشد ؛ لا والله ماسحبنا عليه بس اول مو زي الحين اول حتى مستشفيات مافيه
اروى بصدمه ؛ كيف مافيه وين ولدتي راشد ؟
ابو راشد ؛ بصالة بيت اهلنا اول
انفجروا كلهم يضحكون وراشد ضحك بفشله وهاجر واروى مو مصدقين
هاجر ؛ الحين صدق ما انولد بمستشفى ؟
ابو راشد ؛ توك تدرين؟ والله انولد بالبيت وهذا هو قدامك ماصار له شي
ضحكت ام راشد ؛ بسم الله عليه الله يحفظكم كلكم ، ترا راشد وعبير وعيسى وتركي بالبيت ولدتهم وانتوا تطورت على ايامكم المستشفيات
تركي هز راسه ؛ ياحرام لو انا انولدت بالمستشفى معكم وش بيصير يعني
اروى وهي تعدد على اصابعها ؛ الحين صدق راشد وعبير وعيسى وتركي بالبيت ؟!
نايف تمدد ؛ الله يالدنيا ، عيسى اللي الحين برا لو يدرون انه انولد بالبيت الظهر بالشموس
الكل ؛ هههههههههههههههههههههههههه
شريفه ؛ يعمري هو ، ماقال متى بيجي ؟
ابو راشد ؛ لا والله شغله واجد
راشد ؛ يلا هانت ما بقى له شي وتنتهي بعثته ويتخرج ان شاءالله
نايف ؛ يوه ثم ياخذ سيارته ، لازم اشتري قبل يجي
ابو راشد ؛ معصي ماتشتري الين تعرس
نايف ؛ هذا تركي اشترى وهو ماتزوح
ابو راشد ؛ ماشريت له الا عشان يقضي مشاوير البيت وكانت لك وله بس يوم راح عيسى عطاك سيارته
نايف ؛ خلاص لارجع واخذها اخذ سيارة تركي
ودق تركي كتف نايف ؛ حاسدني هذا
وضحكوا وقالت اروى ؛ يوه ياعيسى والله مشتاقة له صدق اخر مره شفناه قبل سنه وشوي
هاجر ؛ ايه بعرس شريفه
شريفه وهي تغمز لتركي ؛ وعلى جيته ان شاء الله
بزواج تروك
ابو راشد اعتدل ؛ الصدق والله اني بزوجك ياتركي متى تبي تزوج لاصكيت الثلاثين ؟
تركي تنحنح من شاف ان مافيه مجال يرفض اكثر من كذا بحكم ان لهم فتره يلزمون عليه ويذكرونه ؛ الله يسامحك ياشريفه
نايف دقه برجله ؛ الحين صارت شريفه وانت من اليوم تقول لها شروف وشروف
وضربه تركي بخفه وضحك راشد وهو يخبط كتف تركي ؛ لمتى وانت عزابي خلاص امي بتدور لك عروس قل تم
تركي سكت لثواني ونطق ؛ تم
ام راشد وهي تفكر انه يمزح عشان يسكتهم كالعاده ماتدري انه استسلم ووافق جد ؛ اي يصير خير سكتنا بس
تركي وهو يضحك ؛ لا والله اني صادق
ام راشد بصدمه ؛ صدق صدق ؟
الكل اعتدلوا بصدمه ماتوقعو انه يوافق وهو دايم اللي يمشيهم والتفتوا على هاجر اللي صفقت بحماس ؛ اللللعبب شكلك تحب ولا ماوافقت
وسكتت تستوعب ان ابوها موجود وتنحنحت بوهقه ؛ ااءء والله قصدي يعني غريبه وافق وكذا
ضحك نايف وهو يهمس ؛ ورع ليكون صدق تحب ؟
تركي ؛ اقول اسكت لاتخلني اهون الحين
اروى ؛ لاتكفون اسكتو خلوه يوافق ونفتك منه
شريفه ؛ شفتو اقنعته بسرعه
ابو راشد ضحك ؛ والله واقنعتيه وش قايلة له
شريفه وهي تضحك ؛ ابد كل خير
وقام راشد وهو يتمغط ؛ اووه .. والله انا بروح ارقد من الفجر قايم تصبحون على خير
الكل ؛ وانت من اهله
وراح راشد لقسمه اللي هو غرفتين وحمام " تكرمون" له بنفس حوش ابوه بس برا البيت ينام فيه اذا جا هو واهله
ابو راشد وهو يقوم ؛ يلا اجل كل واحد لغرفته
وراح غرفته ولحقته ام راشد بعد دقايق
اروى وهي تلتفت لهاجر وشريفه ؛ فيكم نوم ؟
شريفه ؛ لاتحاولين نعسانه ومالي خلق
هاجر ؛ والله وانا بعد مانمت العصر
قاموا ينامون ولحقتهم اروى
ومابقى الا نايف وتركي اللي ناظر نايف اللي قال ؛ الحين لو امي بتخطب لك من ودك تاخذ ؟
تركي رفع كتوفه بمعنى " مدري "
نايف ؛ تحب ؟ قل الصدق تركي والله ما اعلم
ضحك تركي بصدمه ؛ يااوك لا والله لايسمعك ابوي والله ان يذبحني
نايف ؛ يعني ودك تاخذ عن حب ؟
تركي ؛ اقول ماتشوف كنك ارتحت بالسوالف شكله والله انت اللي تحب
نايف ضحك ؛ لا والله ما احب احد بس استغربت انك وافقت بسرعه
ضحك تركي وهو يقوم ؛ يرجال والله ماعندك الا الخثاريق " الكلام الفاضي" رح نم بس
نايف ؛ وانت وين بتروح
تركي وهو يكتم ضحكته ؛ بروح اهيت على قولة ابوي
ضحك نايف وهو يقوم ؛ اجل انا برقد وانت لايصحى ابوي ومايلقاك بالبيت
تركي ؛ بيدري لو انه نايم
وضحك نايف وراح غرفته وتركي طلع ركب سيارته وحرك يتمشى بالديره
..........••..........
من بكره الصباح
في معرض ابو هادي
دخل ابو عبد العزيز بعد ما اتصل عليه ابو هادي
ابو عبد العزيز ؛ السلام عليكم ، صباح الخييير
قام ابو هادي وهو يسلم عليه ؛ وعليكم السلام صباح النور تفضل حياك الله
جلس ابو عبدالعزيز ؛ الله يبقيك
ونادى ابو هادي العامل ودخل وهو يصب لهم قهوه
ابو عبدالعزيز وهو ياخذ الفنجال ؛ بشر عسى وافقت على الطلب
ابو هادي ؛ ابشر بعزك يا ابو عبدالعزيز وانا والله وافقت وانت رجالٍ تستاهل يتلبى طلبك
ابو عبدالعزيز ابتسم ؛ الله يسلمك يا ابو هادي وابد السعر اللي تطلبه موافق وفوقها حبة مسك
ابو هادي ابتسم ؛ ماتقصر والله
وجلس عنده بالأوراق يتناقشون ويتفقون على السعر وبعد ما اتفقو راحو لكاتب العدل ورسمياً صار المعرض بأسم ابو عبد العزيز اللي مبسوط انه شراه رغم انه اشتراه بسعر غالي نوعاً ما بس يشوف انه يستاهل اكثر
اما ابو هادي اللي كان مرتاح انه باع المعرض بسعر يستاهل ويقدر يشتري فيه معرضين بسعر المعرض الاول ورجع لبيته بعد ما مر على المعرض واخذ هادي وقال له انه باعه ومشو للبيت ودخل هادي مع ابوه وهو ينادي ؛ يمههه تتعالي ابشرك
طلعت ام هادي من المطبخ ؛ بشروا
ابو هادي ؛ بعنا المعرض والحمدلله بسعر معرضين مثل هالمعرض
ام هادي ؛ الحمدلله الحمدلله مبروك
ابو هادي ؛ الله يبارك فيك
هادي ؛ ومتى نروح الرياض
ابو هادي ؛ لاتستعجل يبوك يبيلنا وقت
طلعت شهد من غرفتها وهي تروح لهم ؛ سلام
الكل ؛ وعليكم السلام
هادي ؛ بعنا المعرض ياشهوده
شهد ؛ صدق ؟
ابو هادي ؛ ايه صدق وان شاءالله قريب بشوف بالرياض بيت ولا عماره نسكن فيها ونأجرها ، وين حمد ؟
ام هادي ؛ نايم للحين يقول مصدع مانام زين
ابو هادي هز راسه ودخل يريح لحزة الغداء
..........••..........
بيت ابو راشد
قبل العصر بشوي
دخل ابو راشد المطبخ وهو ينزل الأغراض واروى وشريفه بالمطبخ ؛ وين العيال
شريفه وهي تشرب مويه ؛ تركي وراشد راحو للمزرعه ونايف بينام شوي
ابو راشد ؛ اجل انا بعد بروح انام لي شوي واذا جو اهل راشد صحوني
اروى ؛ ابشر
راح ينام وجت ام راشد ؛ جاب ابوكم الاغراض
اروى وهي تشيلهم ؛ اي يمه هذي هي
وكملت وهي ترتبهم
طلعت شريفه للحوش شوي لأنها تحس بكتمه طول اليوم وتعب ماقدرت تنام منه
دخلو راشد وتركي من برا وهم يشوفونها جالسه على الكرسي عند الباب تركي ؛ شروف ليه جالسه هنا في ذا الشمس
شريفه ؛ مافيني شي بس انكتمت وطلعت شوي
راشد وهو يسندها تقوم معه ؛ قومي ادخلي داخل وانسدحي شوي لاتتعبين نفسك وتشتغلين
دخلو داخل وكانت ام راشد طالعه من المطبخ ؛ شريفه وين رحتي اناديك صارلي ساعه
تركي وهو يعدل لها وسادة الكنب ؛ ماراحت بعيد كانت عند الباب
ام راشد قربت بخوف ؛ شريفه علامك؟
راشد ؛ تقول حاسه بكتمه يمه لاتتعب وتشتغل انتبهي لها وخلي هاجر واروى يساعدونها
ابتسمت شريفه بتعب ؛ لا ماعليكم من زمان احس بهالتعب عادي هذا الحمل
تركي ؛ لا والله مهب عادي لا تتعبين نفسك وتتحركين واجد ارتاحي والبنات يجيبون لك اللي تبين
ام راشد جلست عندها ؛ خلاص خلوها ترتاح وانا عندها ، وانت يا راشد رح ارتاح عشان تجيب اهلك بعد شوي ترا يحترون من الصباح
ابتسم راشد وراح لغرفته يبدل وتركي راح لغرفة البنات
تركي وهو يدق الباب ؛ هاجر ، اروى
اروى وهي تقوم تفتح ؛ ها
دخل تركي وهو يجلس على طرف سرير هاجر اللي تسوي اسوارتها ؛ تدرون شريفه ماباقي لها شي وتولد صح ؟
اروى وهي تجلس على سريرها ؛ ايه ؟
تركي ؛ لاتخلونها تتعب انتبهوا لها ولا خذو شغل امي وخلو امي تقابلها لأنها تعبانه ، وامي بالمطبخ تنادي وانتو جالسين هنا
اروى ؛ انا والله من الصباح معها ماجلست الا الحين
تركي ناظر هاجر ؛ وانتي ؟
هاجر ؛ انا والله ماساعدتها بس ياخي ما اداني شغل المطبخ وامي مايعجبها شغلي
اروى ؛ لأنك رفلا تسنعي
هاجر ؛ اقول سدي فمك اسنع منك انا
تركي ؛ خخلاص كلكم سنعات وقت الاختبارات كلنا نشوف ان امي ماتقول لكم اشتغلوا بس الحين خلصتوا ساعدوها قبل تقول
اروى ؛ ايه وساعدتها ماجلست الا قبل شوي
هاجر ؛ حتى انا اساعد رتبت الصاله
تركي ضحك ؛ طيب اجل قابلي شريفه وانتبهي لها ترا صرتي انتي المسؤوله عنها
هاجر ؛ ايه كذا ابشر
اروى ؛ وين راشد ماجاب منيره والعيال للحين ؟؟
تركي وهو يقوم ؛ الا شوي وبيروح لهم وين نايف ؟
هاجر ؛ نايم
هز تركي راسه وطلع
اروى لهاجر ؛ اسمعي ترا تركي صادق وبعدين حنا خلصنا اختبارات وماعندك عذر ماتساعدين امي صح بوقت الدوامات تخلينا ماتقول حتى شيلوا كيس الحين انا وانتي بنقسم الشغل بينا وامي بتكون مع شريفه زين؟
هاجر ؛ انتي ساعدي امي انا مع شريفه
اروى ؛ انطمي شريفه مو كل الوقت تبيك بوجهها تاخذين شي من البيت واذا شريفه بغت شي اتركي الشغل
هاجر ؛ انطمي انتي واحترمي اختك الكبيره
اروى ؛ اقول بس بنقسم الشغل وعندك اعتراض خليه الين اخلص
وجلست اروى تتفق مع هاجر على شغل البيت عشان يريحون امهم شوي واتفقوا بعد هواش
.. مر الوقت وراح راشد لبيت اهل منيره اللي بنفس الديره يجيبها
ام راشد ؛ يلا يا بنات جيبو القهوه شوي وبيجي راشد واهله
اروى طلعت من المطبخ بالقهوه ؛ يازينهم والله اني مشتاقة لهمم
وجت وراها هاجر ومعها صينيه ؛ يمه شوفي كيكتي سويتها قبل شوي
ام راشد ابتسمت ؛ ماشاءالله يعطيهم العافيه السنعات
شريفه ؛ يمه ابوي ماقام ؟ قال صحوني قبل يجون اهل راشد
ام راشد ؛ الحين بروح اصحيه وانتي ياهاجر روحي قومي نايف قوميه وتعالي لا اسمع هواشكم
ضحكت هاجر وهي تقوم له ؛ ابشري
اروى ؛ وتركي وينه
شريفه ؛ قال بيروح شوي ويجي