ياديرةٍ ضمّت كل الأحباب

Part 36

وكملوا يشتغلون ويجهزون ومزنه تشرف عليهم
محمد وهادي وبعض العيال يفرشون الزل والباقي بالمخزن يطلعون قدور وصحون العشاء وحمد يشوف اللمبات وطلال دخل للمطبخ يغسل اللحم ويجهزه ومعه خواته
في غرفه كانوا البنات يجهزون وغلا تستشور شعرها
شهد ؛ بنات شوفوا مكياجي خرب ولا ؟
غلا ؛ لا والله يجنن
شهد ؛ يعني ضابط ما ازيد عليه ؟
ريما ؛ لا لا خليه يهبل بجيب لك مكياجي ، تسوين لي ؟
شهد ضحكت ؛ تم تعالي
نجلاء ؛ خلوها خلوها بتكشخ جابر هنا
ضحكوا وحذفتها ريما بالمنديل بضحك ؛ هييه والله عشان العزيمه بس بعدين اصلاً ما اطلع بوجهه بكشخ عشانه انا
شهد ؛ لا يابنت الحلال ماعليك منهم تعالي بس
نجلاء ؛ اذا ضبطتيه لها بخليك تسوين لي
غلا ؛ وانا بعدكم
شهد ضحكت ؛ كم تدفعون
ريما ؛ ترا انتي فنانه والله احس لو تصيرين تسوين مكياج تقصين ذهب
شهد ؛ يلا نجرب عليك
ضحكت ريما وهي تقرب وشهد بدت تحط لها
نجلاء ؛ غلّو اذا خلصتي لاتطفينه بجي استشور بطلع اشوفهم وارجع
وقامت وهي تعدل جلالها وطلعت للصاله مافيها احد والمطبخ سمعت صوت امها وخالاتها وطلال وطلعت للحوش ولقتهم موجودين ورجعت وهي توقف وتناظرهم مع الشباك وهي تلقاهم فارشين الفرشات ومزنه والبزران جالسين عليها بالنص والعيال عند الباب يرشون الصحون اللي طلعوها من المخزن بالمويه على السريع وسمعت صوت جدها محسن ودخل للحوش وابو هادي وراه ونادى لهادي وحمد ينزلون الأغراض اللي جابها من السوق الصباح وبعضها جابوها من السوق اللي تو جو منه ونزل اغراض عند بيت ابوه واغراض عمه بدوا ينزلونها
وسلموا عيال طلال ومحمد على محسن وابو هادي وطلعوا يساعدون بالأغراض
محسن جلس على الفرشات عند مزنه واحفادها
مزنه ؛ قضينا الحمدلله وماقصروا العيال فرشوها
محسن ؛ الله يعطيهم العافيه ، جاب ابو هادي اغراض والله ماقصر كلف على عمره ولا خلانا ندفع شي من اغراض السوق قبل شوي
مزنه ابتسمت ؛ الله يرزقه من واسع فضله مايقصر والله
ودخلوا العيال بالأغراض والصحون والقدر اللي اخذوهم من المخزن وغسلوهم برا ودخل محمد للصاله وهو ينادي ؛ ياهييه طريق بيدخلون العيال
نجلاء كانت بالمطبخ اللي فيه طلال وخواته وقالت مرام ؛ نجلاء اطلعي للغرفه
طلال ؛ اصببروا اصبروا
وطلعت نجلاء ودخلت الغرفه وناداهم طلال ودخلوا كلهم
ام هادي ابتسمت ؛ يياهلا
وسلموا عيال طلال ومحمد على ام هادي وخواتها وسلمت روان على جابر وابتسمت ؛ وش اخبارك ياجابر
جابر بأبتسامه ؛ بخيير ياعمه اخبارك
روان ؛ الحمدلله
طلال ضحك ؛ رح رح وانا ابوك خذ اغراض القهوه
والدلال من الدوانيه وودهم لمجلس راجح جهزوهم
ضحكوا وطلعوا العيال وبقى محمد يقسم اللحم مع طلال وخلصوا وقال طلال وهو يقوم ؛ الذبيحه تطبخونها هنا ولا نحط الغاز بالسيب ؟
محمد ؛ لا خلهم يطبخونه هنا السيب فيه اغراض وبعيد عن الباب هنا اقرب
ام هادي ؛ ايه هنا احسن جيبوا القدر والصحون بس
طلال التفت لمحمد ؛ طلعتوهم ؟
محمد ؛ ايه بالحوش بدخلهم
وراح يجيبهم وطلال غسل وهو يروح معه
وجهزوا كل شي وراحوا العيال كلهم لمجلس راجح وام هادي وخواتها بدوا يجهزون القهوه واغراض العشاء والبنات يتجهزون ومزنه حطت قهوتها وجلست بالحوش على الفرشات وعندها احفادها الصغار
..........••..........
بيت ابو راشد
قبل كم ساعه لما دق ابو هادي على ابو راشد يعزمه قفل وهو يلتفت لراشد ؛ ابو هادي يعزم على عشاء الليله له عند اهله
راشد ؛ وين مكانهم ؟
ابو راشد ؛ بديرة ابو صالح
راشد ؛ اووه طلعوا قريبين اهله
ابو راشد ؛ اييه ويقول حياك انت والعيال
راشد ؛ شكلها عزيمة رجال بس
ابو راشد ؛ والله مدري الظاهر
راشد ؛ بس مانعرفهم ولا ندري وين مكان بيتهم
ابو راشد ؛ قاله ابو هادي ثالث بيت يسار
راشد ؛ ان كانك بتروح بجي معك ، مدري عن العيال
ابو راشد ؛ ياعيال فيه عشاء الليله بديرة ابو صالح من بيجي معي
سعد ؛ منهو له
ابو راشد ؛ لأبو هادي عند اهله
تركي ؛ ساكنين هناك ؟
ابو راشد ؛ ايه ، من بيروح ؟
نايف وتركي ؛ انا
سعد ؛ وانا معكم
عزام ؛ وانا بعد
ابو راشد ؛ زيين يعني كلنا
نايف ؛ عشاء رجال بس ؟
ابو راشد ؛ والله مدري
راشد ؛ ماقد رحنا لهم انا اقول خلنا حنا والعيال بس
ابو راشد ضحك ؛ ايه احسن وبعدين لاعرفناهم نجيهم كلنا
•
" عند البنات داخل "
كلهم بالصاله وام عزام تقول لهم وش حبت بديرتهم وتسولف لهم عن الجبيل ومن خلصت ضحكت وهي تقول ؛ ليتنا والله سكنا هنا ولو ان الجبيل حلوه بس هالديره احلا
ام راشد ابتسمت ؛ ابد هالديره ديرتك ووالله اننا ماودنا تروحون لاكن بترجعون وتزورونا مره ثانيه
ام عزام ؛ ان شاءالله وانتوا بعد لازم تجون للجبيل ، وحنا بكره الصباح بنروح ونشوفكم المره الجايه على خير ان شاء الله
الكل ؛ ان شاء الله
اروى وهاجر ناظروا شموخ وهم تعلقوا فيها ولا ودهم تروح وشموخ بعد تعلقت بكل شي بهالديره
•
بعد كم ساعه وقت المغرب رجع تركي من المحل والعيال يجهزون عشان يروحون للعشاء وجت ام راشد تعطيهم اغراضهم وتبخرهم ؛ والله انه برد لو تاخذون فرواتكم احسن
تركي ؛ لا لا الثياب ثقيله مانبرد بس ناصر وعبدالله خليهم ياخذون جكيتاتهم
ام راشد ؛ ايه معهم اخذوها
ابو راشد ؛ اجل مشينا يلا
وطلعوا وحركوا لديرة ابو صالح
ودخلت ام راشد وهي تجلس بالصاله وقالت اروى ؛ يمه من يقول عشاء رجال ليتنا رحنا بششوفهمم
ام راشد ؛ اول شي اهل ابو هادي تو عرفناهم بعد مو مره واهله ماقد شفناهم ولا شافونا وشلون نروح وحنا مانعرفهم ؟
هاجر ؛ عاادي ابوي والعيال راحوا وهم مايعرفونهم
ام راشد ؛ والله ابو هادي عزم ابوك والعيال ماضنتي انه للحريم الا يمكن قرايبهم والرجال كلهم عادي
ام عزام ضحكت ؛ تشوفونهم ماعليكم جيرانكم
اروى ؛ المشكله مايطلعوون ولا يجون يزين من يحذف عليهم ام عبدالرحمن تعلمهم المسايير
الكل ؛ هههههههههههه
عبير ضحكت ؛ اذا ام عبدالرحمن مازارتهم غرييبه
ام راشد ؛ والله انها حليله علامكم عليها توسع الصدر
هاجر ؛ ماقلنا شي حليله بس مستحيل ماتسير
ام راشد ؛ ييوه تبونها مثلكم ماتطلع مغير على التلفزون وقاعدين
اروى ؛ اهاااا قلبت علينا ، هذا حنا نقول بنطلع بنسير بس مابتروحين لعزيمتهم
ام راشد ضحكت ؛ خلاص خلاص نسير بعدين وانتي معنا نشوف تجلسين ولا تروحين
وضحكوا ورجعوا يسولفون
..........••..........
ديرة ابو صالح
بدوانية راجح وصلوا رجال والعيال مستلمين القهوه يقهوون ويسوونها عندهم بالمشب
اما في بيت الجده مزنه اللي للحين ماجو حريم ديرتهم ومزنه عند بناتها فالمطبخ
مزنه ؛ خلاص اغسلوا الرز شوفو القدر الكبير الثاني انقعوه فيه
مرام ؛ خلاص انا اضبطه روحي يمه ارتاحي
اميره ؛ يلا اجل انا بسوي الأيدام
روان ؛ خلاص الكشنه عندي
ام هادي ؛ والبنات بالصاله يقطعون السلطه كل شي خالص
مزنه ؛ اجل تعالي معي للحوش عشان لاجو الضيوف جايين عشانكم هم
ام هادي ضحكت ؛ يلا ياحبيبتي جيت
وطلعوا مزنه وام هادي ودخلت ام جابر " زوجة طلال " ومعها بناتها كيان وجوان ؛ السلامم عليكم
حذفت ريما السكين من يدها وهي تلقط المنديل وتمسح يدينها من الطماطم والبنات اختنقوا من كتمهم للضحك وفزت ريما ؛ هلا ههلا وعليكم السلام
مزنه ؛ ياهلااا يالله حيهم
ام جابر قربت وهي تسلم عليها ؛ هلا ياعمه .. شلونك
مزنه ؛ بخيير ياهلا بالزيين
كيان ؛ هلا ياجده اخبارك
مزنه وهي تسلم على جوان ؛ يامرحبا ، بخيير وش اخباركم انتوا
ام جابر ؛ الحمدلله بخير ، هلا ام هادي يالله حيهم تو مانورت الديره
ام هادي ابتسمت وهي تسلم عليها؛ الله يحييك منوره بأهلها
وسلمت على ريما وهي تقول ؛ هلااا بريومه وش اخبارها بنتنا
ريما ابتسمت ؛ بخير الحمدلله
وسلموا الكل على بعض وجلست كيان عند البنات وهي تضحك ؛ مكروفيين ها هاتوا هاتوا بقطع معكم عشان احط عذر ما اطلع عند الحريم
ام جابر ضحكت وهي تطلع عبايتها ؛ اذا خلصتي تعالي قهويهم
كيان بهمس ؛ والله ما اجي
ضحكوا البنات وطلعت ام جابر للحوش
كيان ؛ وش اخباركم يبنات
البنات ؛ بخيير وانتي
كيان ضحكت ؛ اذا شفت ايلاف اصير بخير " بنت عمها محمد "
غلا ضحكت ؛ اييه صديقتك وكبرك
كيان ؛ والله مشتاقه لها لي ٤ ايام ماشفتها
شهد ضحكت ؛ ٤ ايام وكذا اجل لو شهر وش بتسوين
ضحكوا وكملوا يقطعون والسوالف تدور بينهم
•
دوانية راجح
كان ابو هادي عند الباب هو ومساعد اللي وصل قبل دقايق ينتظرون ابو راشد عشان يستقبله وعلى اساس يدل اهله على بيت عمه محسن
ووقف ابو راشد ومعه راشد وناصر وعبدالله ووراه سيارتين سيارة سعد معه نايف وسيارة عزام معه تركي وشافهم ابو هادي ونادى ؛ اررررحببوا
ابو راشد نزل وابتسم وهو يمشي ويسلم على ابو هادي ووراه العيال وسلموا عليه وعلى مساعد
ابو هادي ؛ الحريم بالبيت اللي هناك حق عمي محسن
ابو راشد هز راسه بضحك ؛ جيت انا والعيال بس
ابو هادي ابتسم؛ اجل حياكم الله تفضلوا تفضلوا
ودخلوا لدوانية راجح وهم يسلمون على الموجودين وابو هادي يعرفهم على بعض ونايف وتركي جلسوا وجا هادي وهو يمد لهم القهوه وسلم الدله لسعود وجلس جنبهم ؛ يالله حيهم
تركي ونايف ؛ الله يحييك
هادي ؛ اخباركم
تركي ونايف ؛ الحمدلله
تركي ؛ اخبارك انت
هادي ؛ بخير
حمد كان جالس عند النار على اساس يجهز القهوه مع جابر وهو اصلاً على جواله وشاف تركي ونايف وهادي عندهم وقام وهو يجلس عندهم
هادي ضحك ؛ خلك عند القهوه
حمد ؛ جابر وسعود يعرفون خلهم
تركي ؛ انتوا كبر بعضكم ؟
حمد ؛ لا هادي ٢٥ وانا ٢٢
تركي ؛ لا لا اقصد انت وجابر وسعود هذولي
هادي انفجر يضحك ويحاول يكتم ضحكته وقال حمد بصدمه ؛ خاف الله جابر ١٩ وانا ٢٢ اكبر منه وسعود ١٨ ليه تشوفوني ورع ؟
تركي ضحك ؛ ييوه والله احسبك كبرهم مبين اصغر من ٢٢
حمد ضحك بقهر ؛ مو اول واحد تقولها
نايف بضحك ؛ وهادي طلعت كبري
تركي ؛ وعاد هادي مبين اكبر توقعته كبري ولا اكبر
هادي ضحك ؛ ماعليه اهم شي ما ابين ورع مثل واحد
حمد ؛ حسابك عندي يالشيبه انت قم صب قهوه
هادي ؛ قم انت اصغر القوم خادمهم
ضحكوا تركي ونايف وقال حمد ؛ خلاص جابر والعيال اصغر مني الا كم عمرك ياتركي ؟
تركي ؛ ٢٧
حمد بأستغراب ؛ اكبر من نايف وهادي ؟
تركي ؛ ايه ليه
حمد ؛ توقعت ٢٤ او بعمرهم
نايف ضحك ؛ يعني تشوفوني انا اكبر
هادي ؛ لا انا اشوف تركي اكبر
حمد ؛ المهم ، اخباركم كيف وظيفتك يانايف
وكملوا يسولفون لبعض ويتعرفون على بعض اكثر
..........••..........
في مكان جديد
بيت سامي اخو ابو هادي
تعريف عنهم
ابو حمدان " سامي "
ام حمدان " موضي "
عيالهم ، { حمدان ٣٠ سنه ، معاذ ٢٨ سنه ، ماجد ٢٥ سنه ، بيان ٢٢ سنه "ركزو عليها" } العيال كلهم متزوجين وبيان البنت الوحيده و مو متزوجه
دخلت ام حمدان وهي تشوف بيان تعدل طرحتها بتأفف ؛ يمه انا بفهم لو قاعدين ببيت جدي مو احسن
ام حمدان ؛ لا مو احسن بشوف مريم تلقينها رافعه خشمها مهي بعاجبتها الديره
بيان ؛ وقلعتها وش دخلنا فيها يع يمه بجلس والله اني كارهتهم
ام حمدان ؛ اقول امشي تأخرنا حتى انا مادانيهم
تنهدت بيان وهي تلبس نقابها وطلعت ورا امها وركبوا مع سامي اللي كان ينتظرهم بالسياره وراحو بيت محسن
ونزلوا وحرك سامي لدوانية راجح
ودخلت ام حمدان وبيان وراها وقربت وهي تسلم على الحريم الموجودين بالحوش وعلى مزنه وام هادي وام جابر زوجة طلال وام حسام زوجة محمد اللي جت قبل شوي
ام حمدان بأبتسامه ؛ هلا ام هادي
ام هادي ابتسمت بخفه ؛ هلا فيك
ام حمدان ؛ ييوه اشتقنا لكم اخبارك ، وين شهد
ام هادي ؛ داخل تجي ، اخبارك بيان
بيان وهي مالها خلق ترد ؛ بخير
وسكتت مريم وقالت مزنه ؛ تفضلي حياك الله
وجلسوا وصبت لهم ام جابر قهوه وطول قعدتهم وام حمدان تاخذ وتعطي مع ام هادي وتسألها وهي مبتسمه بس نظراتها اللي كانت تتفحص فيها ام هادي فاضحتها
•
داخل كانوا كيان وايلاف عند شباك الصاله اللي ع الحوش ويشوفون الناس ولفت كيان على البنات ؛ وععووه جت بيان
فزوا البنات يناظرون ودقتها نجلاء بخفه ؛ اسكتي لحد يسمعك ، وخري وخري وينها
شهد ؛ جايه هي وامها غريبه كانوا عند جدانهم
غلا ؛ يبنت ذي تجي مايردها شي
ونادت روان ؛ رييما
ريما ؛ هلا يمه
وراحت للمطبخ وهي توقف عند امها ؛ ام حمدان جت هي وبيان
روان التفتت لخواتها ؛ ييووه اسمعوا اسمعوا ،.. من جا ؟؟
ريما ضحكت ؛ ام حمداان
مرام ؛ اممششوا خلونا نشوفهم مختفيه ذي
اميره ؛ روحو انتوا مالي خلقها
روان ؛ على اساس حنا ميتين على موضي بنشوف وش تسولف فيه لازم تدق بالكلام
اميره بضيق ؛ هذا اللي اقصده لازم تتكلم
مرام ؛ ماعليك منها من زينها امشي بس
وسحبتها وقالت روان ؛ ريما اطحني قهوه بروح بسرعه واجي
واخذت ريما القهوه وهي تطحنها وطلعوا مرام وروان واميره وهم يشوفون البنات متحاشرين على الشباك ويناظرون
مرام ؛ خير خير فضحتونا اطلعوا اذا بتشوفون الناس محد ماسككم
نجلاء ؛ شوي لحد ما يجون ونسلم مره وحده ونرجع
روان ضحكت ؛ كذا يعني ، طيب ادخلي ساعدي ريما واذا تأخرت وجلست سوي القهوه المويه على النار ، وانتوا بنات بالله انتبهوا لأمجاد ونايف ، نور يماما خليك عند اخوانك .. وطلعت هي ومرام واميره ونجلاء راحت للمطبخ ورجعوا البنات يجلسون ويسولفون في بيان اللي غاثتهم بحركاتها وكلامها
بالحوش طلعت مرام والبنات وراها وقربت وقالت ؛ السلام عليكم
الموجودين ؛ وعليكم السلام
ام حمدان فزت ؛ هلا هلا
مرام قربت وهي تسلم هي وروان واميره ؛ هلا فيك
ام حمدان ؛ شلونكم وش اخباركم
بيان قامت ومرام والبنات واقفين ينتظرونها وسلمت عليهم وماتكلمت
روان ؛ اخبارها بيان
بيان ؛ الحمدلله
وسلمت مرام وخواتها على بعض الحريم اللي ماسلموا عليهم وعلى جلستهم دقت الباب جميله ؛ يا اهل البيت
مزنه ؛ حياك ادخلي ادخلي
ودخلت هي وبناتها وقالت مزنه ؛ يامرححبا بأم يزيد
{ جميله ام يزيد اخت ابو هادي وكبيره بعمر ام هادي متزوجه ولد خالتها وساكنه بآخر الديره وعندها ولدين و٣ بنات " يزيد ٢٨ متزوج ، حاتم ٢٧ متزوح وعلى اسم اخوها ابو هادي ، بدور ٢٣ مخطوبه ، غدير ٢٢ ، غاده ٢٠ " }
جميله قربت وهي تسلم عليهم هي وبناتها وتسلم على ام هادي اللي كانت تحبها بعكس زوجة اخوها ام حمدان والكل يدري ان ولا وحده تطيق الثانيه ولما وقفت جميله عند موضي اللي كانت واقفه وتناظرها بحقد رغم انها تحاول ماتبينه وهي تسلم عليها بدون كلام وعلى بيان اللي كانت تشوفها ماخذه من حركات امها وطبعها وجلست جميله هي وبناتها وقالت ؛ نورتوا الديره يأم هادي
ام هادي ابتسمت ؛ حبيبتي منوره فيك وش اخبارك
جميله ؛ بخيير الحمدلله ، شهود وينها
ام هادي ؛ داخل تجي الحين ، اخباركم يبنات اشتقنا لكم والله
بنات جميله ؛ الحمدلله ، بخير
طلعت نجلاء ومعها ريما جايبين القهوه والبنات طلعوا وراهم عشان يسلمون على الموجودين وسلموا على الكل وقالت جميله وهي تحضن شهد ؛ هلا بقلبي تو مانورت الديره
شهد ابتسمت ؛ منوره فيك
جميله ؛ تعالي تعالي اجلسي جنبي من زمان عنك
وجلست شهد بينها وبين بنات جميله اللي كانوا يعاملونها غير عن بيان لأن شهد اببدا ماتشبه شخصية بيان وامها
وموضي تناظرهم بطرف عينها ونجلاء والبنات يخزونها هي وبيان ومتقرفين من حركاتهم
وطول جلستهم وهم يسولفون ومزنه اللي تسولف لهم ويردون عليها ويسولفون معها
وقاموا البنات وقامت شهد وهي تسحب معها بنات جميله يكملون سوالفهم داخل ودخلوا للصاله
وابتسمت مزنه ؛ اا بيونه روحي مع البنات اذا ودك راحوا للصاله
ام حمدان ضحكت ؛ ايه ايه الله يصلحهم نسوا روحي معهم
بيان قامت بعد مادقت موضي كتفها وهي تدخل للصاله
مزنه ؛ الا وشلون حصه مبطين عنها
جميله ؛ بخير ماعليها وعند ولدها ضاري ماتجي للديره كثير
داخل بالصاله
من جلسوا البنات وهم كلهم كأنهم خوات بنات جميله كانوا طيبين معهم وبعمرهم ويحبون الجلسه معهم
ودخلت بيان وهي تجلس عندهم بهدوء بدون اي تعابير على وجهها وتنحنحت شهد ؛ بيان كيفك
بيان ناظرتها وسكتت لثواني وصدت ؛ بخير
شهد رفعت حاجبها بأستغراب اول كانت بيان تضحك معاها وتسولف مع انه مبين من ورا قلبها بس كانت تجامل لاكن هالمره ماجاملت ابد نظراتها الحقيقيه
صار الوضع رسمي لدقايق وهم متنرفزين من بيان ويهمسون لبعض " ماتبغى تجلس محد غاصبها مانبي نفسيات ، مو عاجبها ليه جت "
نجلاء طنشتها ولا كأنها موجوده وقعدت تسولف مع البنات ولا تناظرها والبنات دخلوا معها بالسوالف لحد مانسوا بيان كلهم
•
دوانية راجح
على جلستهم ويسولفون مع ابو راشد اللي بعضهم يعرفونه وزباين بمحله ومساعد اشر لهادي اللي جالس عند العيال وقام وهو يجلس عنده
مساعد بهمس ؛ اهله هنا
هادي التفت ؛ صصادق ؟ لا العصر يقول كان عند عمه يعني عند جدانهم
مساعد ؛ لا جو على العشاء موجودين في بيت جدك
هادي ابتسم وضحك مساعد ؛ كنت فاقد الأمل شكلك
هادي ضحك وبهمس ؛ ٤ شهور يرجال لا حس ولا خبر
مساعد ؛ بس هالمره خلها الأخيره قبل الخطبه وبعدها هي حلالك
هادي تنهد وابتسم ؛ ان شاء الله
ولفوا على دخول حمدان ولد سامي ؛ السلام عليكم ، مساكم الله بالخيير
الكل ؛ وعليكم السلام ، مساء النور ، ارحب ، ياهلاا
وقاموا وهو يسلم عليكم كلهم وعلى الجد راجح اللي قال بهمس وهو يشد يده ؛ اخوانك مهب جايين !
حمدان ؛ والله انا تو جيت عشان لايزعل عمي ومعاذ دوامه تو خلص مايمديه يجي الديره وماجد يقول مشغول مايقدر يجي
راجح تنهد وهز راسه وجلس حمدان ؛ وش اخبارك ياعم
ابو هادي ابتسم ؛ بخير عساك طيب
حمدان ؛ والله الحمدلله واخبارك ياهادي
هادي تنحنح ؛ بخير دامك بخير
حمدان التفت لحمد اللي جالس وعنده العيال ؛ وشلونه حمد واللي معه
حمد ؛ الحمدلله بخير
العيال ؛ بخيير
راجح كان يناظر بسامي اللي مايتكلم ولا يسولف مع الناس يسمع سوالفهم وساكت
والتفت لمحسن ؛ اذن العشاء نصلي ونقول لهم يحطون عشاهم
محسن ؛ ايه خلنا نصلي الحين
وقام راجح ومعه محسن ؛ الصلاه يجماعة الخير
راجح ؛ يلا ياعيال صلينا
وقاموا وهم يصفون وصلى فيهم شيخ المسجد حقهم اللي كان موجوده
وبعد الصلاه قام طلال وهو يطلع ودق على زوجته ام جابر وردت ؛ هلا ؟
طلال ؛ العشاء استوى ؟
ام جابر ؛ دقايق ويخلص اذا استوى نحطه على طول ؟
طلال ؛ اييه اغرفوه وطلعوه مع باب الحوش اجي انا والعيال وناخذه بس فيه رجال واجد زيدو صحون اذا تكفي
ام جابر ؛ ان شاءالله اذا حطيناه ادق عليك
وقفلت ورجع طلال للدوانيه
•
ام جابر ومرام وروان واميره وام حسام زوجة محمد بالمطبخ والبنات للحين بالصاله وام هادي ومزنه مع الحريم بالحوش
روان ؛ ها وش يقول
ام جابر ؛ اذا استوى نغرفه على طول ويقول كثرو الرجال واجد
ام حسام ؛ صينيتين وصحنين يكفون ؟
مرام ؛ لا حطوا صحن ثالث والحريم اصلاً قليل
اميره كشفت غطاء القدر ؛ خلاص استوى ، روان الكشنه استوت ؟
روان ؛ ايه جاهزه
مرام ؛ يلا هاتوا الصحون نغرف
وقربوا الصحون والصياني ومرام تحط الرز وام جابر وام حسام يحطون اللحم واميره المرق وروان الكشنه والسلطه وخلصوا ونادت مرام ؛ ييبناتت تعالوا تعالوا شيلوا معنا
وقاموا البنات من الصاله نجلاء وغلا وريما وشهد وكيان وايلاف ، وبيان قامت وطلعت للحوش وجلست عند امها وقبلها طلعوا بنات جميله عشان يسولفون مع الباقين اللي ماشافوهم من زمان
نجلاء دخلت ؛ ها يمه خلاص
مرام ؛ ايه بنطلع صحون الرجال عند الباب
روان ؛ ريما انتي و٣ معك خذو صحنين للحريم كل ثنتين يشيلون صحن
ريما ؛ ابشري يمه ، يلا بنات من تجي معي
غلا وكيان وايلاف ؛ انا
نجلاء ؛ يعني بس انا وشهد نشيل صحون الرجال !
ام حسام ضحكت ؛ لا لا معكم حنا يلا
شهد شالت صحن هي ونجلاء وطلعوا للحوش اللي طلعوا قبلهم فيه البنات يحطون صحون الحريم وحطوه عند الباب وكانت اللمبات اللي عنده طافيه عشان لما ينفتح الباب مايكشفون اللي بالحوش وكان يادوب انارة الشارع خفيفه ولابسين جلالهم وجت مرام وروان واميره شايلين الصينيه ووراها ام حسام وام جابر شايلين صحن ورجعوا شهد ونجلاء جابوا الصحن اللي بعده والباقي معهم لحد ماطلعوا الصحون كلهم وبقى اخر صحن رجعت شهد ونجلاء يجيبونه ودخلوا للمطبخ وقالت نجلاء وهي تمسح اصابعها ؛ اظفري انكسر ليتني ماشلت
شهد شهقت ؛ لايكون انكسر وطاح بالعشاء
نجلاء بضحك ؛ احسن خلهم ياكلونه
شهد ضحكت ؛ اخلصي يلا باقي اخر صحن شيلي
وتنهدت نجلاء وشالته مع شهد وطلعوا للحوش حطوا الصحن عند الباب من برا مع الصحون وسكروا الباب نص تسكيره وكانوا الصغار يلعبون بالحوش قريب الباب
طلال جا عند الباب ومعه عياله جابر وسعود وجمال ، ومحمد وعياله حسام وعبدالعزيز ومنصور ، وجو هادي وحمد وجو معهم تركي ونايف يساعدونهم وطلال شال صينيه هو وعياله ، ومحمد وعياله ومعهم حمد شالوا الثانيه وهادي شال صحن وراح بخيبه وهو كان يتوقع انه بيشوفها
تركي شال صحن وأشر على الثاني ؛ نايف خذه وامش
وراح تركي ونايف شال الصحن ومشى والتفت بسرعه وأستغراب من سمع صوت يناديه ؛ ناييف نايف
وشاف ولد صغير عند الباب واللي ورا الباب تناديه مو باين منها شي كان صوتها وهي تنادي بس وقرب الصغير للباب واخذته اللي كانت تناديه ودخلت وسكرته ورفع نايف حواجبه بذهول ؛ هي من تقصد ،الورع ذا زي اسمي ولا كيف !
ومشى بسرعه ورا العيال اللي سبقوه ودخلوا ودخل وراهم وحطوا عشاهم وقال راجح ؛ يلا اقربوا حياكم الله على عشاء جية ابو هادي واهله
وبدوا الرجال يقربون للعشاء وتجمعوا يتعشون
•
قبل دقايق عند بيت مزنه
من سكرت نجلاء نص الباب راحت تدخل وكانت روان واقفه عند باب المطبخ والتفتت على الصغار بتناديهم وانتبهت ان ولدها نايف مو موجود ونادت لنور ؛ نوور اخوك وينه ؟
نور تلفتت وهي تدور نايف ومالقته ؛ مدري كان هنا
رفيف " بنت محمد " ؛ شفته طلع معكم قبل شوي
روان لفت بسرعه لشهد ؛ شوفييه برا اركضي تكفين
شهد كانت جايه بعد ماسكرت الباب وراحو العيال ورجعت تركض وفتحت الباب وهي تشوفه واقف قريب بيلحقهم ونادت بصوت شبه عالي ؛ ناييف نايف
نايف اللي كان خايف وجا يركض من شاف شهد ودخل وسحبته شهد وهي تسكر الباب ؛ ليشش تطلع!
روان جت وهي تشيله ؛ الله يصصلحك ان كانك ماتقعد
شهد تنهدت ودخلت روان والباقين وقالت مزنه ؛ يلا سموا الله يحييكم تفضلوا
وقربوا الحريم للعشاء
بالصاله البنات والصغار وروان واميره
روان ؛ روحوا يبنات تعشوا
نجلاء ؛ والله ما اطلع عند العجايز
روان ؛ لييه عادي قوموا بس تعشوا
ريما قامت ؛ والله بنروح ونحط باقي القدر والدفعه الثانيه بعد مايخلصون
ضحكوا وقامت غلا ؛ اي والله امشي
وراحوا للمطبخ يحطون لهم عشاء باقي بالقدر وطلعوا بالصحون وتجمعوا البنات وروان واميره وبزارينهم

•
•

آسفه والله امس ماقدرت انزل لكم بارت كنت مشغوله بس هالبارت جمعته لكم حق امس واليوم قدروا تعبي بالتصويت للطففاً 🤍