ياديرةٍ ضمّت كل الأحباب

Part 40

' سبحان الله وبحمده سبحان الله العظيم '

☆ قبل القراءة لطفاً
.
.
..........••..........
عمارة ابو هادي العصر
ابو هادي ينتظر المستأجر وهادي وحمد عنده وام هادي وشهد بالمطبخ
حمد ؛ يبه المحل متى يخلص
ابو هادي ؛ خلاص باقي الأثاث والعمال بكره الصباح يبدون فيه
هادي ؛ العمال منين جبتهم وكم واحد ؟
ابو هادي ؛ كلمت ابو عايض راعي البقاله قال يعرف عاملين وعطاني ارقامهم وكلمتهم وبكره يجون
هادي ؛ والأثاث متى يجي ؟
ابو هادي ؛ اذا طلبناه ، ولازم تجي معي اليوم مصدع عذرناك
حمد ؛ افا وانا ناسيني
ابو هادي ضحك ؛ انت ماتعرف بالشراء والزين من الشين اذا فتحنا المحل تستلمه
ام هادي دخلت بالقهوه ؛ هادي ماودك تقوم انت وحمد تسحبون الكنب للصاله الثانيه
هادي ؛ حمد عيا يقوم يقول شوي
ابو هادي ؛ اسحبوه سحب مهو شي تراه
ام هادي مدت له الفنجال ؛ افا ياحمد هذا وانا قاعده اسوي الفطاير اللي تقول سويتيها امس وماذقتها ماخليتها بخاطرك
حمد ؛ ابششري والله بقوم الحين
شهد بضحك وهي عند الباب ؛ وترا مسويه حلاي اللي فيه اوريوات على قولة هادي
ضحكوا وهادي حط يده على وجهه بأبتسامه ؛ اووه تكفين والله لي اسبوع خاطري فيه
ام هادي ؛ شرايكم نروح للحوش وتنقلون انتوا الكنب
هادي ؛ يلا اطلعي انتي وابوي وشهد تكمل حلاها وحنا نشيله
ام هادي قامت وهي تشيل الصينيه ؛ يلا يمال العافيه اسحبوه سحب وحطوه بنفس الترتيب
وطلعت من باب الصاله ليسار الممر اللي كان باب للحوش وابو هادي طلع بعدها وشهد رجعت تكمل الحلا وتشيك على الفطاير اللي بالفرن
حمد وهو يربط ثوبه ؛ انت بعد الطاوله والفرشه وانا بدفه
هادي بعدهم وهو يسحب الكنبه مع حمد
هادي ؛ ماتطلع مع الباب خلنا نقلبها
حمد ؛ يلا اطلع ونقلبها وانا ادفها وانت اسحب
وطلع هادي قدام الباب وحمد وراه وقلبوها عشان تطلع وقال حمد وهو يناظر ؛ هذي مقطوعه من تحت
هادي وهو يناظر تحت الكنبه ؛ ايه القماش مشقوق
وكملوا يدفونها للصاله الثانيه وطلعوا الكنب الباقي وخلصوا وبقت طاوله وشالوها وجا حمد بيبعد الكنبه على ورا شوي وفز وهو يصرخ ؛ ههاديي
هادي جا يركض ؛ وشش
حمد وهو يأشر ؛ ففااار عند رجللك
هادي فز ونقز على الكنبه وماهي الا ثواني وسمعوا صرخة شهد اللي بالمطبخ وركض حمد وهادي وراه ودخلوا للمطبخ وطلعت شهد وهي توقف وراهم وقالت وهي تصارخ ؛ فااره عندد رجولييي مشت مشتتت عليهااا
حمد ؛ ويننها وين
شهد ؛ تحتت الدولابب دخلت
هادي وهو يحاول يوخر شهد اللي متمسكه فيه ؛ حمد دورها بطلع الكنبه اللي قبل شوي اكيد انها كانت فيها ، اببك امشي انتي اطلعي للحوش
شهد ركضت للحوش وحمد جلس يدور الفاره تحت الدولاب وهادي راح يسحب الكنبه بيطلعها
شهد طلعت وهي تركض وجلست عند امها وهي بتبكي
ام هادي ؛ ببسم الله شفيك
شهد بكت ؛ ييع يمه مشت على رجلي فاره
ام هادي شهقت ؛ وينها
شهد ؛ دخلت تحت دولاب المطبخ وحمد جالس يطلعها
ام هادي ؛ من وين جت
شهد ؛ مدرري مدري اتوقع كانت بالكنبه يقول هادي بيطلعها كانت فيها
ام هادي ؛ ييووه لايكون فيه غيرها بعد
شهد ؛ اببوي ويين
ام هادي ؛ جا الرجال وطلع له راحوا فوق اكيد
وبعد دقايق تأففت شهد بقرف ؛ يع الله ياخذه مشى على رجلي
ام هادي ضحكت وهي تكمل قهوتها
بالمطبخ
حمد للحين يدورها وهادي فتح الباب اللي على سيب باب الشارع وطلع الكنبه عند الباب ورجع وهو يسكره والتفت لحمد اللي صرخ ؛ طللع
وشاف حمد وهو يركض ورا الفار اللي جاي لجهة هادي واخذ هادي نعلته وهو يحذفها وصقعت بجنبها ورجعت تركض لجهة حمد اللي سكر باب المطبخ وحذفها ورجعت مره ثانيه لهادي وهي تركض بالصاله وكانت الصاله فاضيه بحكم انهم شالوا الكنب وكل شي مابقى الا التلفزيون ويشوفونها
هادي صرخ ؛ اففتح الباب
حمد ؛ والله لا اذبحها اصببر
هادي حذف عليه نعلته الثانيه ؛ الله ياخذ عدوك افتح الباب وتطلع للحوش اخلصصص
وشهق حمد من طلعت من تحت الباب وهو يفتح الباب ويركض وراها وهادي وراه وحمد كل شي قدامه وبيده يحذفها فيه ومن طلعته من باب الصاله للسيب طلع ابو هادي والمستأجر نازلين للسيب وطارت عيون ابو هادي بصدمه وهو يشوف فاره تعدت من قدامهم وحمد يركض وراها لحد ماطلعت من باب الشارع اللي كان مفتوح وانحاشت
وجا هادي بدون نعوله اللي حذفهم حمد على الفاره وكل وحده بجهة من السيب وهو يادوب ياخذ نفس ومد يده يسلم على الرجال ؛ اارحب هلا شلونك
الرجال تنح ؛ هلا بخير
وجا حمد وهو ماسك نعوله وحطهم ولا انتبه للرجال وقال وهو يلبسهم ؛ اهب حذفها الله ياسرعها ما... وانتبه للرجال وهو يستوعب ويسلم ؛ سسلام عليكم
الرجال ؛ وعليكم السلام
حمد ضحك بتسليك يضيع الموضوع ؛ ااا ههههههه والله فار جا من السطح كنا ننضف العماره عشانك
الرجال ابتسم ؛ ماققصرتوا واخذت شقه بالدور الثاني
هادي ؛ ايييه حياك الله
ابو هادي ؛ وان شاء الله بكره الفجر وهي جاهزه بس بننضفها شوي ونتأكد من الكهرب
الرجال هز راسه ؛ ان شاء الله تسلم
وابتسم ابو هادي وطلع الرجال وحرك وسكروا الباب والتفت لحمد وهادي ؛ انتوا وش جاكم !
هادي اشر على حمد ؛ والله يايبه اني قلت له افتح الباب خله يطلع لاتلحقه وقال " وقلد نبرة حمد بأستهزاء " والله لا اذبحها اصبر
حمد ؛ اقول والله هو ماطردها ولا ردها يوم دخلت عند شهد بالمطبخ وهو كان عند الباب
هادي ؛ كذاب كنت جاي للصاله
ابو هادي ؛ منين طلعت
هادي اشر على الكنبه اللي طلعها عند الباب ؛ طلعت منها مشقوق قماشها من تحت
ابو هادي ؛ اكيد فيه غيرها خلوا الكنبه برا
ورجع التفت على حمد اللي للحين يتنفس بسرعه وضحك وهو يهز راسه ودخل ودخلوا وراه
..........••..........
بيت ابو راشد
مثل كل يوم العصر يكون تركي بالمحل وهالمره الكل بالمحل ونايف معهم وبالصاله البنات عند التلفزيون
ام راشد ؛ ماودكم نطلع الحوش
عبير ؛ الجو كيف ؟
منيره ؛ يهبل دافي
ام راشد ؛ انا اقول لو نشب نار الليله ونشوي بالدكه
اروى شهقت ؛ الله ايييه تكفين
هاجر ؛ الا الا يمه نبي نشوي
ام راشد ؛ خلاص اذا جو العيال اقولهم يجهزون المنقل والجلسه
منيره ؛ وش نشوي
ام راشد ؛ والله مدري دجاج ولا لحم ؟
اروى ؛ دجاج
هاجر ؛ لحم
اروى التفتت لهاجر ؛ هييه دجاج احسن
هاجر ؛ مب على كيفك محد يحبه الا انتي
عبير ضحكت ؛ لا والله حلو
ام راشد ؛ كله نعمه الحمدلله
اروى ؛ ايه يمه بس اللحم يفرق بالشوي
هاجر ؛ يصير احلا ومانشوي الا هو
اروى وهي مرتفع ضغطها من الصبح بسبب هاجر ؛ والله مانشويه
هاجر ؛ والله ان نش... قاطعتها اروى بقهر وهي تقوم ؛ انا بنت ابوي
هاجر حطت وسادة الكنب قدامها ؛ اقول انثبري
ولقت عبير دفتر وقلم ؛ قُرعه قُرعه تدورون الهواش انتم
اروى ؛ يلا وامي تختار نشوف
هاجر بعناد ؛ لحم
ضحكوا وضحكت عبير وهي تكتب بورقتين وقالت ام راشد ؛ انتوا قايمه شياطينكم يوم شموخ هنا مالكم صوت
هاجر ؛ ايه تهجدها شموخ ذي ام لسانين
اروى ؛ اخخ بس ياشموخ
عبير ضحكت ؛ يمه اختاري
ام راشد اخذت ورقه وفتحتها عبير وضحكت ؛ دجاج
اروى التفتت لهاجر ؛ ايييه احسسنن
هاجر ؛ ايه بعد شوي يقول ابوي لحم ثم انتي اللي احسن
اروى استوعبت ان ابوها والعيال يشوون لحم وبيصير مثل ماقالت هاجر
ام راشد ضحكت ؛ ماعليك انا ابي دجاج اذا يبون لحم يسوون حقهم
اروى قامت وهي تجلس عند امها وتحضنها ؛ يزيين امي ينااس يزينها
ضحكوا وابتسمت هاجر وهي تصد
ام راشد ضحكت ؛ الا وين قطوتك
اروى اعتدلت بقهر ؛ شكل امها اخذتها ماسمعت صوتها وماطلعت
منيره ؛ شفتها الظهر بالسيب اتوقع موجوده
اروى ؛ ان شاء الله " وابتسمت من تذكرت " ودللبسس يزينها دبدوبه وبيضاء
هاجر ؛ نفسك
اروى ؛ يازينها اذا هي نفسي بعدين تراك تمدحيني اذا تحسبينها سبه
هاجر ؛ اقول نروح البقاله ؟
اروى ؛ يلا تتمم
ام راشد ؛ وشوله ؟
هاجر ؛ ناخذ حلويات وحركات لليله
ام راشد ؛ وصي العيال اذا جو يجيبونها
اروى ؛ بدق على تروك
هاجر ؛ شعندك انتي وتروك طايحين مدح ببعض
اروى ؛ شدخلك اخويي مثلك انتي ونيوف
هاجر ؛ يعني نايف مب اخوك
اروى ؛ يعني تركي مب اخوك
شريفه ؛ انتوا تدورون شي تتهاوشون عنده
هاجر ؛ لا والله صدق اذكرها تتناقر هي وتركي الحين تمدحه قدامه ووراه عالأقل انا اتناقر مع نايف بس وراه امدحه
اروى ؛ خلاص انا صرت امدحه قدامه ووراه عندك شي
هاجر طنشتها وهي تلتفت للتلفزيون
وبعد دقايق تأففت اروى ؛ افف يالطفش حتى شبكه مافيه
هاجر ؛ ومتى صار فيه اصلا ، هاك حب
واخذت اروى حب وهي تفصفص ؛ اقول ليه مانروح عند جيرانا اهل ابو هادي ذولا
ام راشد ؛ انا ماعلمتكم ؟ بيجون الجمعه
التفتوا لها وقالت عبير ؛ من يقوله ؟
ام راشد ؛ ابوك عزمهم يوم راح لعشاهم امس قال ابو هادي الجمعه نجيكم
اروى ؛ ليه مو بكره من زمان بشوفهم
ام راشد ؛ يمكن مشغولين عادي كلها بكره وبعده تشوفينهم
هاجر ؛ اخاف مايجون اهله بس هو وعياله
ام راشد ؛ لا ماعليك بيجون كلهم
..........••..........
بالسوق
في محل ابو راشد
دخل ابو راشد هو وناصر وعبدالله اللي كانوا معه جايين من البقاله وجلسوا على الكرسي
ابو راشد ؛ السلام عليكم
الكل ؛ وعليكم السلام
ابو راشد ؛ برجع للبيت ترجعون معي ولا ؟
راشد ؛ ليه ؟ دايم نقعد لصلاة المغرب
ابو راشد وهو يتكي على الطاوله ؛ والله تعبت برجع اريح
التفتوا عليه بسرعه وفز نايف ؛ عسى ماشر !
تركي ؛ علاجك اكلته ؟
سعد ؛ نروح المستشفى ؟
ابو راشد ضحك ؛ لا يبن الحلال انت وياه بس ودي اخذ لي غفوه قبل المغرب مصدع
راشد ؛ يلا بوديك للبيت ، ياعيال تجون ؟
نايف هز راسه ب " لا "
تركي ؛ انا بجلس
سعد ؛ وانا شوي وجاي اسبقونا
راشد هز راسه والتفت لناصر ؛ بتجي معي ولا ترجع مع العيال
ناصر ؛ برجع مع عبدالله وعمي سعد
راشد هز راسه وطلع وجلسوا العيال يبيعون مع العمال وبعد دقايق دق جوال تركي وهو يقوم وطلع عند باب المحل ؛ هلا اروى
اروى ؛ تروك بالسوق انت ؟
تركي ؛ ايه بالمحل
اروى ؛ طيب تكفى خلنا نشب نار ونشوي الليله بالحوش
تركي حك جبينه ؛ والله مدري ، كيف الجو ؟
اروى ؛ يهبل ودفى واذا بيجي مطر يجي خفيف
تركي ؛ خلاص جهزوا اغراضكم وراشد وابوي جايين للبيت علموهم
اروى ؛ طيب تجيب اغراض من البقاله ؟
تركي رجع يدخل للمحل واشر لنايف يقرب له الدفتر والقلم ؛ وش تبون
اروى بدت تقوله الأغراض وهو يكتب وبعد ماخلص قال ؛ خلاص وانا جاي اجيبهم ساعه وشوي كذا
اروى ؛ طيب
وقفل تركي وهو يجلس
نايف ؛ من ؟
تركي ؛ اروى تبي اغراض تقول بنشوي
نايف ؛ اووه اول مره تسوي شي زين
تركي ابتسم وتنهد ؛ لاوالله مو اول مره
نايف ؛ اقول تبي شاهي
تركي ؛ منين تجيبه ؟
نايف ؛ فيه واحد قبل شوي يبيع شاهي جمر عند الباب اجيب لك ؟
تركي ؛ اوه اييه تكفى نعناع
نايف هز راسه والتفت لسعد ؛ سعد تبي شاهي نعناع ولا ساده
سعد ؛ نعناع
نايف ؛ عبدالسلام بالله خذ وجب شاهي ٢ نعناع ، نواس يبغى شاي نعناع ولا ساده
نواس ؛ ساده
نايف ؛ ٢ نعناع و٢ ساده وجب لك اللي تبي يلا يلا اعجل قبل يمشي
عبدالسلام اخذ الفلوس من نايف وطلع يجيب لهم
•
وبعد ساعه اذن المغرب وبدت المحلات تسكر وقاموا العيال وطلع سعد بسيارته ومعه ناصر وعبدالله وحركوا للبيت ، ونايف وتركي جو مع بعض وراحوا للبقاله اخذوا الأغراض وطلعوا متوجهين للبيت
..........••..........
نرجع لبيت ابو راشد
بعد ساعه صلوا فيها وجهزوا اغراض الشوي وشبوا النار كان ابو راشد يتقهوى بالصاله وسعد وراشد بالحوش عند النار ونايف وتركي مع البنات بالمطبخ
هاجر وهي تغسل ؛ احسن يا اروى قلت لك لحم
اروى ؛ اقول بس حتى الدجاج بنسويه سوي حقك وانتي ساكته
نايف ؛ اقول اعجلوا بس عشان يخلص بسرعه
اروى ؛ من الحين اقولكم اللحم اللي تبونه بيأذن الفجر وهو ماخلص
ام راشد دخلت ؛ ها خلصتوا ؟
تركي ؛ لا والله يميمتي ماخلصنا دام بناتس يتهاوشن
ام راشد ضحكت ؛ لييه هذا الشوي وبنشوي لحم ودجاج وش مزعلكم
اروى ؛ والله هي بدت
هاجر ؛ يمه الرز نسويه الحين
ام راشد ؛ لا شوي بس بغسله الحين وبعدين نركبه
وبعد دقايق التفت تركي ؛ اقول اروى البسه تراها موجوده
اروى شهقت ؛ احلفف
تركي ؛ اي والله عند الدوانيه ، تبينها ؟
اروى ؛ اييه بس حرام تركتها امها
نايف ؛ خلاص صيري امها انتي
هاجر ؛ وسبحيها ووكليها وشربيها ونوميها
اروى ؛ ايه وين المشكله يازينها
ام راشد ؛ اقول يلا اعجلي
ضحكوا وطلعوا نايف وتركي للحوش وبدوا يشوون وطلع ابو راشد وام راشد وبعدها عبير والصغار اما منيره وهاجر واروى وشريفه بقوا بالصاله بحكم ان سعد موجود وقام بعد دقايق وراح للدوانيه ولحقوه العيال وطلعوا البنات وجلسوا يكملون الشوي وابو راشد عندهم اللي بحضنه بنت شريفه والصغار حوله وجو ناصر وعبدالله وهم شايلين القطوه وحطوها قدام الدكه
ابو راشد اعتدل بأستغراب ؛ هذي منين جبتوها
اروى بسرعه ؛ يبه تكفى ذي موجوده من الصباح انتظرنا امها تاخذها وماجت حرام تبرد اذا بقت بمكانها
ابو راشد ؛ لا تاخذها تاخذها خلوها انتوا
ام راشد ؛ لا والله ياعمري عليها من الصباح وهي بمكانها
ابو راشد ؛ يمكن تعبانه تمرض الورعان
ام راشد ؛ هم شالوها الله يصلحهم ، روحوا غسلوا وخلوها هنا لاتلمسونها
اروى ؛ اييه ايه خلاص مانلمسها بس خلوها
والتفت اروى لأمها وهي ترسل لها بوسه بالهوا وضحكت ام راشد وهي تقوم ؛ بركب الرز دام ماباقي الا شوي ويخلص الشوي
هاجر ؛ مابغى يخلص الساعه ١١ وشوي
اروى بهمس ؛ من اللحم اللي تبونه
هاجر بضحك ؛ تراك اشغلتينا لا اختم جبهتك في ذا الجمره
وسمعتهم ام راشد وضحكت وقامت وراحت معها عبير والباقين كملوا يقلبون اللحم واروى تلعب مع القطوه من بعيد وتنتف من اللحم وتعطيها
وبعد ماخلصوا وجهزوا كل شي جو العيال واخذوا العشاء وراحوا للدوانيه وابو راشد معهم والبنات بقوا بالحوش بيكملون عشاهم فيه حول النار
وبعد العشاء ناموا البزارين لأن الوقت تأخر بالنسبه لهم وبرضوا العشاء تأخر مو نفس وقته كل يوم
وجا تركي وهو شايل صحن العشاء ؛ احطه هنا ولا اوديه المطبخ
اروى ؛ المطبخ بالله
وراح تركي للمطبخ واروى وهاجر يشيلون سفرة العشاء حقهم وعبير اغراض الشوي وشريفه دخلت ببنتها ومنيره راحت تودي اميره ومناير اللي ناموا
وام راشد شالت خالد ولد عبير اللي نام ودخلت وكانوا بالصاله شريفه وناصر وعبدالله وجوري وترف وطلع تركي للصاله ؛ يلا ناصر انت وعبدالله امشوا بنرقد
وقاموا وطلعوا معه للدوانيه اللي فيها ابو راشد نايم وسعد تو غفى ونايف وراشد يرتبون على السريع وطلع راشد ؛ يلا ناصر
ناصر ؛ بنام عند عبدالله
راشد ؛ خلاص تعال خذ فراشك وارجع
وراح معه والتفت نايف لتركي ؛ هاك بالله ودها المطبخ بنام مانمت العصر
تركي ضحك ؛ اييه خميس بكره
نايف ؛ اووه يازين الخميس بنام زين عشان العصر بروح المزرعه والمحل وامشي بالسوق كله
ضحك تركي واخذ الاغراض للمطبخ ورجع ناصر وانسدح بجنب عبدالله وناموا كلهم
عند تركي بالمطبخ دخل وهو يشوف اروى وهاجر يغسلون
تركي ؛ فيكم نوم ؟
اروى ؛ شوي
هاجر ؛ اي والله بس ودي اجلس عند النار شوي ولو علي نمت بالحوش
تركي ضحك ؛ اجل انا مافيني نوم نجلس بالحوش ؟
اروى ؛ طفت النار اتوقع
تركي ؛ لا مجمره
هاجر ؛ يلا اجل احط حب ؟
تركي ضحك وهو يطلع ؛ ياكثر ماتاكلينه حطي اللي تحطين
وجلس بالصاله وقالت ام راشد ؛ ناموا كلهم ؟
تركي ؛ ايه ابوي وسعد ناموا وراشد ونايف بينامون
شريفه ضحكت ؛ غريبه ماقال بنام بغرفتي
تركي ضحك ؛ والله ينعس لو حذفتوه بالحوش بينام
ام راشد ؛ وانت تبي تنام بغرفتك ولا معهم ؟
تركي ؛ لا هذي ولا هذيك بجلس بالحوش عند النار مافيني نوم
ام راشد ؛ ييوه لاتنام فيه وتمرض مثل ذاك اليوم
تركي ابتسم وهو يتذكر يومها لما تعب مع شموخ وقامت شريفه ؛ اجل حتى انا بروح انام تصبحون ع خير
الكل ؛ وانتي من اهله
ام راشد قامت وهو توقف عند باب المطبخ ؛ ها يبنات خلصتوا ؟
اروى ؛ ايه خلاص
ام راشد ؛ اجل بروح انام
هاجر ؛ نامي يمه نوم العافيه
والتفتت ام راشد على تركي ؛ وانت ياتركي طف النار تراها شغاله ولاتنام بالحوش انتبه
تركي ؛ ابشري
وراحت ام راشد لغرفتها
ودخلت منيره ؛ السلام
تركي وعبير ؛ وعليكم السلام
منيره وهي عند الباب ؛ يلا جوري ننام
وقامت جوري اللي كانت هي وترف عند التلفزيون وطلعت مع منيره وقامت عبير ؛ يلا تروفه كلهم ناموا
وطلعت هاجر ؛ عبوره فيك نوم ؟
عبير ؛ اي والله ما ابي الا النوم
هاجر هزت راسها ودخلت عبير وطلعت اروى ؛ يلا تروك مشينا
تركي قام وهو يطلع معهم للحوش وجلسوا وقالت اروى ؛ يعمرريي انا اللي جالس ومتكي
تركي ضحك ؛ يحليلها للحين فيه
هاجر ؛ يراسي الحين شلون اجلس وهي فيه
اروى جلست وقربت القطوه عندها وجلست بجنبها
تركي جا بيجلس وتلفت ومالقى فروته ؛ بجيب فروتي من الدوانيه نسيتها
هاجر ؛ نايف نايم ؟
تركي ؛ ايه يقول ينعس خلوه ينام لايصدع علينا بكره
وراح للدوانيه وهاجر حطت الشاي واروى حطت باقي اغراض البقاله اللي جابهم تركي وضبطوا جلستهم
بالدوانيه دخل تركي بشويش وقرب بياخذ فروته اللي بجنب فراش نايف والتفت نايف وقال بهمس ؛ وين رايح
تركي جلس ؛ ماتقول بتنام ؟
نايف ؛ الا بتروح مكان ؟
تركي ؛ ابك لا بس بنجلس بالحوش انا واروى وهاجر عند النار
نايف اعتدل ؛ ييوه لو الواحد بيعدل نومه مايعرف منكم ، بجي بجي معكم
تركي ضحك ؛ لا يشيخ قم يلا وخذ فروتك
وضحك نايف واخذ فروته وطلع مع تركي اللي سكر الباب وراحوا للدكه
اروى ؛ ها صحيته ولا مانام
نايف وهو يجلس ؛ نص ونص بتسمرون وماعلمتوني
هاجر ؛ والله قال تركي خلوه ينام عشان مايصدع بكره
نايف ضحك ؛ طيبته بوقت غلط ، اروى شكل البسه هاذي كانت عند احد وضاعت شوفيها نظيفه واليفه
اروى اللي كانت القطوه بحضنها وتمسح عليها ؛ اي والله تهبل بس من يقنع هاجر
هاجر ؛ هي حليله بس اخاف فيها شي
تركي قرب منقل الحطب وهو يتدفى عنده ؛ ايه ووش عندكم من سوالف
اروى ؛ ابد والله السوالف عند هاجر
هاجر ؛ ماعندي ، نايف كيف دوامك
نايف قرب المركى وهو يحطه بينه وبين هاجر وانسدح وهو يسند راسه عليه ؛ والله ياجوجو ماعليه بس طفش انا ودي بشغله اتحرك فيها مهب بس جالس
تركي ؛ ايه تحب الشقى
اروى ؛ المحل مافيه الا هو
نايف ؛ المحل من زمان فيه الواحد لازم يغير
هاجر ضحكت ؛ ييوه اجل شغلك هذا بتغيره بعد شهر
نايف ضحك ؛ والله يمكن
وسكتوا لدقايق ودندن تركي بخفوت وهو يدق الملقط على المنقل بخفه ؛ خلي ورا العرق والوادي .. خلي ورا العرق والوادي
نايف ضحك بخفيف وهو يغني معه بنفس نبرته ؛ تكفون مروا بنا صوبه
ضحكوا وقالت اروى ؛ نايف تكفى غن من زمان ماغنيت
هاجر ؛ اي والله تكفى صوتك يجنن
تركي ضحك ؛ والله اول مره تقولين شي صح يلا غن وانا بدق
نايف اعتدل وهو يجلس ؛ بس بصوت خفيف ها عشان لايطلع ابوي ويلحطنا واحد واحد
تركي ضحك ؛ يلا نفس الشيله هذي
نايف بدا بهدوء ؛ خلي ورا العرق والوادي .. خلي ورا العرق والوادي تكفون مروا بنا صوبه
وبدا تركي يطق على المنقل بخفيف وهاجر قلبت صحن وهي تطق بخفه واروى تطق بأصابعها وبدا تركي يغني مع نايف ؛ يازين دله وبرادي عند الغضي داعج عيونه .. يازين دله وبرادي عند الغضي داعج عيونه خلي على جمس عنابي .. خلي على جمس عنابي رقم احدعش فوق طبلونه وخلي ورا العرق والوادي
وضحكوا وتنهد نايف وهو يعتدل ويجلس ؛ ييوه يازين هالجلسه مبطي عنها
اروى مدت له الشاي ؛ اييه مايكملها الا عيسى
تركي ؛ يلا كلها اسبوعين ويجي
التفتوا له بشهقه وقالت اروى ؛ لا يقول بعد شهر ونص او شهريين
تركي ؛ لا هو كلمني امس الظهر قال هالأسبوع اخر دوام رسمي وبعدها عنده اختبار وقال مو اكثر من شهر
هاجر ؛ ليه ماقلت لنا
تركي ؛ نسييت واحسبكم تدرون
اروى ؛ يعني بكره اخر يوم دوام له
تركي ؛ لا يقول السبت وعاد بعدها يختبر ويرجع
نايف ابتسم ؛ نكلمه !
تركي ؛ اقول عاد اشغلت الرجال خلها بعدين الحين نبي نكمل غن بعد
هاجر وهي تحاول تتذكر ؛ فيه شيله بس نسيت اولها ... فيها كذا العجايب سبع وانت ثمانيه مدري اصبحت ثامنها شي زي كذا ، يليييل نسيتها تذكروا
اروى ؛ مدري ماقد سمعتها
نايف وهو يتذكر ؛ الا انا سمعتها اللي فيها الحياه بدون شوفك فانيه ؟
هاجر ؛ اييه اييه هذي بس بدايتها وش
تركي ابتسم ؛ منحرم وصلك وانا قلبي ضعيف !
هاجر بحماس ؛ ايييوه هذي هذي
نايف ؛ ايه يلا يلا
اروى ؛ ييوه تقلبونها دراما الحين يلا غنوا بس
نايف ضحك وهو يغني مع تركي ؛
منحرم وصلك وانا قلبي ضعيف ..
ماتحمل غيبتك لو ثانيه ..
ودمع عيني مايوقف بالنزيف الحياه بدون شوفك فانيه .. الحياه بدون شوفك فانيه ، لا تشمت بي العدا خلك حليف والمشاعر كلها لك عااانيه العجايب سبع وانته يالطيف من جمالك اصبحت ثمانيه .. ينشغل بالي بزينك ياوليف لو معي ربعي وكل اخوانيه ، كيف تبعد عن هوى مغليك كيف وانت حالف نذر ماتنسانيه .. وانت حالف نذر ماتنسانيه .. لاتعذبني وغدى حالي كليف لك مشرع ف الهوى بيبانيه .. انت كيفٍ فارقٍ عن كل كيف
صرت ملهمني على قيفانيه ..
ياخشيف الريم لي مالك وصيف
خايفٍ تبطي ولا تلقانيه ..
واشهد انك يالمفارق حد سيف
يوم ارقت العيون الهانيه .. يوم ارقت العيون الهانيه
وتنهد تركي وهو يمسح وجهه ؛ ييووه
نايف ضحك وهو يتنحنح وقالت اروى ؛ والله اصواتكم طلعت حلوه وحزنت شوي
هاجر ضحكت ؛ شوي ؟ اقول والله صراحه جلستنا هذي يبيلنا نجلسها كل يوم
نايف ؛ ماعللييك ازهلي دام جانا الشتاء يمكن ننام بالمزرعه بعد ولا نروح لها الفجر ومانرجع الا بالليل
تركي ؛ اييه ياحي الشتاء صدق
اروى ؛ طيب غنوا وحده ثانيه زانت لي الجلسه
نايف ضحك ؛ وش تبون
هاجر ؛ والله مدري اي شي طرب
تركي ؛ ومالي غيرك حبيّب .. ذا قلبك واعرفه طيب
ها نغنيها هي ؟
الكل ؛ تم
نايف ؛ ومع بعض شرايكم
اروى حطت يدها على خدها ؛ لا صوتي مب حلو انا بسمع
تركي ؛ حتى انا بس بغني يلا بس معنا
وبدا نايف ؛ وليف الروح تدري من تكوون ؟
وبدوا تركي وهاجر واروى يغنون معه ؛ غرام القلب واغلى من عيوني .. انا لك قلب في طبعه حنون
وابي قلبك فضاي وكل كوني
وبدوا بهدوء وحماس ؛ مشاعر القلب بالخفاق جياشه
مع كل دقه يزيد الشوق في صدري .. العام كان العتب متحكم ف جاشه .. واليوم فيه الحنين اللي سرق فكريي .. ياهاني النوم ارحم هاجر فراشه
ارق عيوني سهر واقول لك بدري .. لاتروح عني تواسي ناس غشاشه .. وانا من العام سلمتك زمام امري .. ومالي غيرك حبيّب ذا قلبك واعرفه طيب
في حبك تداريني .. ولظني مابتخيب
وعشت العمر مفتونك .. واداري دمعة عيونك
وادري العمر مايسوى .. لا غيبت من دونك وم....
وسكتوا من سمعوا صوت صراخ وضربة باب بقوه
نايف التفت للباب ؛ بسم الله وشوو
هاجر ؛ يمه
تركي وهو يتلفت ؛ اص
اروى ؛ كنه هواش ؟
تركي ؛ مدري قم قم نايف
هاجر ؛ وشو تخلونا
نايف ؛ اصببري نجي
وقاموا نايف وتركي وطلعوا من باب الحوش وهم يتلفتون ويناظرون المسجد والبيوت اللي حوله ووراه
نايف ؛ مافيه شي
تركي ؛ اجل من الباب الثاني ، ماسمعت الصوت انت !
نايف ؛ الا والله صوت احد يهاوش وباب انصفق
تركي ؛ تعال الباب اللي ورا
ومشى نايف ورا تركي ليمين الباب على البيت من ورا وعلى باب حوش الدوانيه ووقفوا قدامه وهم يناظرون عمارة ابو هادي وحولها
تركي ؛ بسم الله امش امش والله اني سمعت الصوت من هنا
نايف ضحك ؛ يمكن الجني انطرب معنا
تركي ضرب راس نايف بخفه ؛ هب ياوجهك امش الله يرج العدو
ودخلوا ونايف يضحك وقالت اروى ؛ ها وشو
تركي اخذ فروته ؛ مالقينا شي بس صوت قوموا خلاص ناموا الساعه جت ١ ، وانت تبي ابوي يسحبك بكره ولا تروح عليك نومه
نايف ضحك ؛ خلاص قوموا خذوا اغراضكم
اروى ؛ والبسه ؟
تركي ناظر اروى اللي بحضنها القطوه ؛ خليها بالدكه
وحطتها اروى وهي تقوم مع هاجر وشالوا صينيتهم واغراضهم
هاجر وهي تدخل ؛ طفوا النار ها لاتنسونها
ودخلوا اروى وهاجر للصاله وسكروا الباب واخذوا نايف وتركي تراب وهم يحطونها على النار
تركي ؛ خلاص يلا ادخل
ودخل نايف اللي يضحك من خرشة تركي لاكن حتى هو سمع الصوت ومايدري من وين جا وانسدح كل واحد بفراشه وماهي الا دقايق وغط نايف بنومه وتركي للحين يفكر بالصوت وكان شاك انه جاي من بيت ابو هادي وخاف ان فيهم شي وحاول ينام وجلس يتقلب لحد ماطفش وهو يقوم وده يتمشى ويطلع مثل اول وفعلاً قام واخذ مفتاحه وطلع وسكر الباب وطلع من باب الدوانيه وركب سيارته اللي كانت عند بابها وحرك يتمشى بالديره
..........••..........
قبل ساعات
في بيت ابو هادي ..
كانوا كلهم بالحوش وام هادي جابت الفطاير وشهد الحلا وكملوا قهوتهم عليه الا شهد ماقدرت تاكل
ام هادي ؛ شهد حطيتي لهم حلا وانتي ماحطيتي لنفسك
حمد وهو ياكل ؛ حاطه سم اكيد
شهد ؛ اسكت معدتي تعورني ماني طايقه احد
ابو هادي ؛ افا عسى ماشر
شهد تأففت بقرف وهي تحس انها بتبكي ؛ والله اني اشوف الأوريو فاره
الكل ؛ هههههههههههههههههههههه
شهد ضحكت بقهر وهي تصد وقال هادي بضحك ؛ يبنت الحلال والله طعمه يهبل غمضي وكلي ولا شيلي الأوريو
حمد ضحك ؛ خلاص خلاص خلها ناكله بعد شوي
ابو هادي ضحك ؛ والله لو دريت ماخليتهم يشيلونه
ام هادي ؛ لاا الحمدلله انهم شالوه ولا كان عايشين معنا
هادي تذكر ؛ ييوه وفضحاه من الرجال اللي جا قبل شوي
حمد ؛ كله منك لو ذبحتها يوم جتك كان ماطلعت
شهد قامت ؛ يع اسسكت
وضحكوا ودخلت شهد وقال ابو هادي بضحك ؛ يساتر هذا وهي ماشافتها
ام هادي ضحكت ؛ والله مالومها مشت على رجولها
حمد ؛ اجل لو شافتني وانا امحطها بنعولي ورجعت لبستهم
ابو هادي ضحك ؛ هين انت قاضين منك
وضحكوا وبعد ساعه من السوالف قامت ام هادي تجهز العشاء وشهد رجعت تجلس معهم وبعد محاولات يقنعونها تاكل اكلت وحمد كل شوي يذكرها وابو هادي يسكته ولا يسكت ودخلوا داخل بعد ما اذن العشاء وابو هادي خلا حمد يشيل الأغراض وضحكوا ودخلوا ودخل بعدهم وهم يجلسون بالصاله بعد ماصلوا
ابو هادي ؛ والله لازم نحط التلفزيون هنا ماتصلح الجلسه بالصاله بدونه
هادي ؛ ايه نجيب عامل ينقله بكره
حمد ؛ ويمكن نلقى فويره صغيره ماتضر
ضحكوا وشهد طنشته وهي تروح تساعد ام هادي
ابو هادي ؛ بيجون عمال بعد شوي الساعه ٩ وشوي ينضفون الدور الثاني ويشيكون عليه اطلعوا معهم ولا واحد منكم انا والله مافيني حيل اقابلهم
هادي ؛ ابشر نقابله انا وحمد
حمد ؛ واجد اللي بيسكنون ؟
ابو هادي ؛ لا يقول هو وزوجته وولده جاي عشان جاه نقل وداومه صار هنا
ودخلت شهد ويدها ورا ظهرها ؛ حمد نظارتك وين ؟
ابو هادي ؛ ايه صح ماعدت تلبسها ليه ؟
هادي ؛ وبكره يقول ماشوف وهو تاركها
حمد ؛ ييوه والله اخر مره شفتها ايام الاختبارات شكلها بالمدينه
شهد طلعتها وهي تمدها له ؛ لقيتها مع اغراضي وش جايبها مدري
حمد اخذها وهو يمسحها ؛ انتي كل اغراضي عندك حتى ملابسي
شهد ؛ والله عاد تيشيرتاتك ماتحتاجهم ماعاد بتلبسهم بالديره يمحطك جدي
حمد ؛ البسهم بالبيت والله ماخليهم لك
ابو هادي ؛ البس النظارات بس لاتطلعها
حمد لبسها ؛ خلاص صرت اشوف اذا لبستها انحول
شهد ؛ يمكن تحسن نظرك اذا فحصت وقالوا طلعها طلعها
هادي ؛ عاد والله شكلك بالنظاره احسن من انك تطلعها تصير عيونك كنها الفاره اللي اليوم
شهد ؛ ههههههههههههههههههههههههه
ضحكوا وقال ابو هادي بضحك ؛ وتراها كنها زينه خلها عليك بس
حمد ؛ ايه اختياري ممتاز
ضحكوا ودق جوال ابو هادي والتفت للعيال ؛ العامل يدق شكله جا ، هلا .... ايوه ايوه .. وعليكم السلام .. ايه الحين اطلع لك يلا
وقفل وقال ؛ قوموا موجود برا عالباب دخلوه للدور الثاني خلوه ينضف الشقق كلها
هادي قام وهو يقوم حمد وطلعوا بيفتحون الباب
هادي ؛ ايييه يازين ريحة النار
حمد ؛ ايه شكل اهل ابو راشد شابينها شف الدخنه عند بيتهم
وفتح هادي الباب ودخلوا العمال واخذوهم للدور الثاني وبدوا ينضفونه ويشيكون على الكهرباء وهادي وحمد عندهم وتأخروا العمال ونزل حمد وهادي وراه
حمد ؛ وش جايبك
هادي ؛ انت وين منزلك
حمد ؛ ياخي طفشت لهم ساعتين ونص وماخلصوا
هادي ؛ ابتلشنا الكهرب خربان ما اخرهم الا هو
حمد بطفش وهو يدخل ؛ وليه ماسواه راعي العماره اول
ابو هادي كان بالصاله والتفت عليهم لما دخلوا ؛ ها خلصوا ؟
هادي ؛ لا والله يايبه بيسوون الكهرب وطفشنا شوي ونرجع لهم
ام هادي ؛ استوى العشاء له ساعه ترا بس قال ابوك خليهم لين يخلصون
حمد ؛ ما ابيه صدعت كله من حلا شهد
شهد ؛ محد قالك تاكل
ام هادي ؛ اقول الساعه ١١ ونص بحط العشاء لايبرد
ابو هادي ؛ حطي للعمال عشان يوديه حمد ولا هادي
ام هادي هزت راسها وراحت للمطبخ حطت لهم وللعمال واخذه حمد وداه لهم ورجع وتجمعوا للعشاء
وبعد ماتعشوا قام ابو هادي وراح مع هادي وحمد يشوفون اذا العمال خلصوا ولا لا وطلعوا للدور الثاني وكانوا العمال يلمون اغراضهم
ابو هادي ؛ ها مدير خلاص ؟؟
العامل ؛ ايوه ايوه خلص كلو شغل
ابو هادي وهو يشوف الشقق وتنظيفهم لها ؛ ماشاءالله الله يعطيكم العافيه والكهرب ؟
العامل ؛ ميه ميه
ضحك ابو هادي وهو يحاسبهم وطلعوا ووصلهم هادي للباب وسكره وحمد شال صحن العشاء حقهم وابو هادي طفى اللمبات ونزل للبيت
بالصاله طلعت ام هادي وهي تجلس تتفرج على جوالها ودخل ابو هادي والعيال وطلعت شهد من المطبخ وجلست عندهم
ابو هادي وهو يطلع المفاتيح ؛ هذا لشقة ابو زياد
شهد ؛ من ذا
ابو هادي ؛ المستأجر يجي بكره الصباح ، وباقي المفاتيح مدري حقت اي شقه نتأكد بعدين
ام هادي وهي تناظر بجوالها ؛ بيان انخطبت ؟؟
التفتوا لأم هادي ومن بينهم هادي اللي التفت بسرعه وصدمه وهو يدعي انه سمع غلط
شهد فزت وهي تجلس عندها ؛ وين وين من يقوله
ام هادي ؛ ام حمدان منزله المغرب تو اشوفها
شهد وهي تقرا ؛ من راكان ؟
ام هادي ؛ ييوه ولد اخت ام حمدان اللي يقولون تو تعين ظابط
والتفتت لأبو هادي اللي اعتدل بأستغراب ؛ وليه ماعلمنا سامي غريبه !
حمد ؛ من شسالفه
شهد ؛ بيان بنت عمي سامي خطبها راكان ولد خالتها
حمد هز راسه ؛ الله يوف.... والتفتوا بسرعه على هادي اللي وقف ؛ كيييف !
ابو هادي وهو يناظره بشك ؛ خطبة بنت عمك سامي
هادي ؛ مب على كيييفهمم !
ام هادي بصدمه ؛ هادي وشفيك ؟
هادي وهو يقرب واخذ جوال امه بسرعه وهو يقرا ؛ انا ابيها يمه انا!
شهد شهقت ؛ هادي
حمد اللي للحين ما استوعب فز من صرخ هادي بقهر واخذ مفتاحه من على الطاوله بيطلع
ابو هادي مسك ذراع هادي ؛ وللد ! وش جااك انت
هادي وهو يفك يده ؛ يببه مهو على كيفهم بيان انا ابيها وشلون توافق على راكان !
ابو هادي بحده وهو يشوف هادي بيطلع ؛ هاديي ! الححق اخوك انت لايطلع
وركض حمد وابو هادي وراه وشهد اللي واقفه مصدومه وام هادي مو اقل منها ولحقوهم للسيب اللي طلع هادي وهو يصرخ ؛ والله ماياخذها
حمد مسكه ؛ هادي هادي وين رايح ابوي يكلمك
هادي وهو يحاول يبعد حمد ؛ وخخر ياحمد وخرر
وفتح الباب وقرب ابو هادي وهو يصرخ فيه ؛ اناا وشش اقول تعاللل
وسحب هادي بحده وهو يصفق الباب ودف هادي وهو ياخذ مفتاحه ؛ ادخخل لا تفضحنا
حمد مسك هادي وهو يسحبه ودفه هادي بقوه على الجدار وقفل ابو هادي الباب بالمفتاح وهو يدف هادي لداخل وحمد وراهم وشهد عند باب الصاله ودموعها على خدها بخوف
ام هادي وهي تسحبه ؛ هادي وش فيك اصبر
ودخلهم ابو هادي وقفل باب الصاله اللي على سيب الحوش ؛ والله يا لو ماتقعد وتفهمني انه مايحصل لك طيب ، وين وين بتروح الحين بتذبحه يعني !
هادي بصراخ ؛ بططلع يايبه ابعد تكفى
وصدمهم ابو هادي اللي خلا صوت صراخ هادي ينقطع من الكف اللي اخذه من ابوه وقال ابو هادي بحده ؛ ماتستحي ! لو تبيها ليه ماقلت اخطبوها تحبها من بعيد وش تنتظر !!
هادي سكت بصدمه وحمد وقف قدامه ؛ يبه تكفى اصبر صل على النبي حنا ماندري وش جاه هد
ابو هادي قرب لهادي ومسكه حمد وقال ابو هادي بعصبيه ؛ اجلس الحين وتكلم مثل الأوادم مهو تقعد تصارخ كذا تحسب اني بسكت لك !
هادي مشى بسرعه وهو يدخل غرفته وصرخ
ابو هادي بصراخ ؛ خلك فيها لين تركد جنونك نشوف اخرتها
ام هادي مسكته بخوف ؛ ياحاتم الله يرضالي عليك اجلس ونتفاهم معه الحين
حمد التفت لشهد اللي تبكي ؛ روحي جيبي له مويه
ابو هادي قام وهو يفتح غرفة هادي اللي جا بيقفلها ودفه ابو هادي ؛ ابد انا اقفلها عنك خلك لين تعقل
هادي بقهر ؛ يايبه ماني ورع انا يوم تقفل علي البيبان !!
حمد وهو يبعده ؛ هاديي اعقل
وجلس هادي بقهر وسحب ابو هادي حمد وهو يطلع وقفل الباب من برا واخذ المفتاح والتفت على ام هادي وحمد ؛ خلوني اشوف واحد فاتح له
حمد بخوف وهو يشوف وجه ابوه تغير ؛ اببشر تعال اجلس
ام هادي وهي تسنده وجلس وجابت شهد مويه وام هادي علاج الضغط حقه وهي تعطيه وماسكه دموعها وشهد راحت الغرفه وهي تبكي وحمد جلس بخوف وهو يهديه وبعد دقايق قام ابو هادي ؛ لا اشوف احد كل واحد ينام ولا يطلع احد من غرفته
حمد ؛ اببشر
وجا ابو هادي بيدخل غرفته والتفت على صوت الباب اللي ضربه هادي بقوه وهو يصرخ ؛ يبببه
ابو هادي قرب للباب وقال وهو يحاول يمسك نفسه ؛ والله والله واللي رفع سبع اذا فتحت لك الباب الحين لتطلع منه لقبرك لاترفع ضغطي وانثبر لين تعقل !
هادي جلس عند الباب وهو يضرب راسه بقهر ودخل ابو هادي وهو يصفق الباب وراه
حمد ؛ ييمه وش السالفه من متى يحبها !
ام هادي جلست وهي تبكي ؛ الله يشغلها
واخذت جوالها وهي تحذفه على الارض وتنهد حمد وهو يقومها ؛ خلاص يمه تعوذي من الشيطان ونامي نعرف بكره بس خليه يهدا الحين
ام هادي وقفت بتعب ودخلها حمد وهو يبوس راسها ؛ صلي على النبي وتعوذي من الشيطان
والتفت على ابوه ؛ يبه تبي شي
مارد ابو هادي اللي تنهد وسكت حمد وهو يطلع وسكر الباب ومسح وجهه بضيق وناظر باب غرفة هادي والتفت لغرفه شهد وهو يقرب ودق الباب ؛ شهد
ولقى الباب مفتوح وهو يدخل وشافها جالسه عند السرير وتبكي وقرب وهو يجلس قدامها ؛ الحين السالفه وش
شهد ؛ ممدري مدري هو يحب بيان
حمد بضيق ؛ وش سالفتها بيان هذي الله يمحاها
شهد وهي تبكي ؛ الله ياخذها الله ياخذها
حمد ؛ امين بس وش قصتها
شهد ؛ والله مدري هي بنت عمي سامي وانت تدري وهادي طلع يحبها والحين لما انخطبت يقول انه يبيها
حمد ؛ وعمك سامي هذا محد يدانيه ياكثر مصايبه وش يبي هادي ببنته اكيد انها مثل ابوها
شهد ؛ مدري والله مدريي
حمد جا بيقوم وغمض عيونه بقوه ؛ اااخخ
شهد ناظرته ؛ وششو
حمد وهو ماسك جنبه ؛ دفني هادي وصقعت بالحديده
شهد ؛ طيب وش نسوي بهادي الحين ؟
حمد ؛ لاتجينه انتبهي ابوي معصب لاتزيدينه ثم يمرض ويرجع لعمليات القلب ولا يصير فيه شي الله لايقوله
شهد وقفت وهي تمسح دموعها ؛ طيب هو الحين معصب !
حمد ؛ ايه بس يهدا ان شاء الله ونفهم سالفة هادي بكره الحين نامي
وهزت راسها شهد وطلع حمد وهو يسكر الباب ودخل غرفته وهو ينزل ثوبه ويشوف الضربه اللي بظهره واللي صار مكانها اخضر وهو يادوب يمشي منها وانسدح بتعب وهالليله مرت على الكل بتفكير وخوف والكل يحاول ينام ويمثل النوم
اما بغرفة هادي اللي كان جالس عند الباب بقهر وهو يحاول يستوعب انها انخطبت ودام ان الناس درت يعني هي موافقه ! ماقدر ينام ولا يصبر من التفكير يبي يطلع يتأكد من نفسه ويسألها وقام وهو يفتح الدرج واخذ الأسواره وهو يقول بضيق ؛ الحين صدق انخطبتي ! صدق تبدلت هالأسواره لخاتم !
وحطها بجيبه بقهر وانهبل وهو يدور اي طريقه يقدر يطلع فيها وجلس يفكر ويفكر وجا بيدق على مساعد وتذكر ان جواله بالصاله وضرب الدولاب بقهر وهو يفتح الشباك يفكر وكان شباكه على الحوش بالممر اللي يطلع على الدوانيه وجلس يضرب على حديد الشباك وهو يفكر وسكت من جته فكره وهو يكمل ضرب بقوه على الشباك يحاول يفكه وكمل لحد ماتورمت يدينه والجدار حول الشباك تصدع من الضرب وبعد معاناه وتعب انفك طرف الحديد وضرب بكتفه بقوه لحد ما انفك كله ومسك كتفه بألم وهو يشد على اسنانه ؛ اااه ياربي
ورفع ثوبه وهو يفتش بجيبه يدور مفتاح سيارته وصرخ بقهر من تذكر انه لما جا بيطلع سحبه ابوه منه بس رغم كذا ربط ثوبه وماعنده مشكله لو يروح مشي ونط من الشباك وهو ماسك كتفه ويحس انه شوي ويدوخ من التعب ومشى يمين هالممر بيفتح باب الدوانيه وطلع مقفول من داخل وضربه بقهر وتذكر ان اصلاً حتى الباب اللي على الشارع قفله ابوه ورجع وهو يسكر شباك غرفته واخذ كرسي من جلستهم اللي بالحوش وحطه عند الجدار وهو يعدي فوقه ونقز للشارع من ورا البيت وناظر بسرعه لضو سياره اللي قربت وهادي واقف يناظرها
ووقفت السياره قدامه ونزل شباكها وقال بأستغراب ؛ هادي !
هادي تنهد وهو يقرب واستند على باب السياره ؛ تتركي بروح مكان توديني !
تركي بخوف ؛ وش صاير نازل من هنا اركب اركب
وفتح هادي الباب وهو يركب وقال تركي بخوف ؛ ولد ! فيكم شي ؟
هادي التفت وهو يادوب ياخذ نفس ؛ ابيك توديني مكان واسألك بالله مايدري عنه احد !
تركي توتر ؛ بيني وبينك واللي خلقني وخلقك بس عسى ما شر
هادي ضرب درج السياره ؛ حرك لديرة ابو صالح
وحرك تركي بأستغراب وهو خايف ان اهلهم فيهم شي ويشوف ملامح هادي اللي فيها التعب ويده على كتفه وقال بعد دقايق ؛ هادي صاير شي !
هادي ؛ صاير ياتركي صاير
تركي ؛ عسى ماشر
هادي تنهد ؛ اعلمك اعلمك بس لاتدخل داخل الديره وقف قبلها بشوي بنزل مشي وانتظرني
تركي بدا يشك وسكت وهو يفكر لحد ماقربوا عند ديرة ابو صالح وقال هادي ؛ بس بس هنا وقف واذا تبي تروح الله معك
تركي ؛ لا والله ماني مخليك افا عليك بس ، لاكن وش فيه اخر الليل بتروح بد... قاطعه هادي وهو ينزل ؛ انت ماعليك اجي واعلمك لاتلحقنني
تركي هز راسه ونزل هادي والتفت لتركي ؛ ابي شماغ
تركي سحب شماغه من على كتفه وهو يمده لهادي وهو حاس ان فيه شي غلط وتأكد من تلثم هادي وهو يمشي بسرعه ورا البيوت لحد ما اختفى وجلس تركي ينتظره وهو مو متطمن ونزل من السياره وهو ينتظر وينتظر ومرت دقايق لحد ماصارت نص ساعه وبدا تركي يوسوس ورفع فروته على راسه ومشى مع الطريق اللي مشى فيه هادي
اما هادي اللي كان يمشي من عند البيوت ووقف عند اخرها واللي هو بيت عمه ووقف بالضبط قريب شباك ياما وقف عنده ونزل الشماغ واخذ حجر صغير وهو يرمي على الشباك من بعيد ويطقه وينتظر دقايق ويرجع يطقه وشاف النور اللي تشغل وعرف انها صحت وتنهد وهو ينتظرها تفتحه وهو واقف بعيد عند بيت مهجور ويحذف بالحجر وانفتح الشباك وشاف وجهها اللي غطته بطرف طرحتها وكفها وهالمره ماكانت لهفته مثل كل مره كان الخوف فيه اكثر من الشوق واشر لها وشافته وهي تشهق وسكرت الشباك بسرعه واستند على الجدار بتعب وهو يدعي انها تطلع وفعلا التفت عليها وهي جايه بخوف ولابسه عبايتها ومتغطيه بطرحتها
بيان بسرعه وعصبيه ؛ انتتت وش جايبك وش تسويي !!!
هادي وهو يناظرها بقهر ؛ انخطبتي ؟
بيان شدت على يدها ؛ ايه ووافقت وزواجي بعد شهر وش تبيي
هادي بصدمه ؛ بيان ! وشلون توافقين وانتي حلفتي وقلتي والله ما اخذ الا انت
بيان بأستفزاز ؛ اصوم ٣ ايام وش وراي ؟ مب احسن من اني ٦ شهور انتظرتك تخطبني
هادي بقهر ؛ والله اني ناوي بجيتي هذي اخطببك ! بس ماشفتك عشان اقو.... قاطعته بيان بحقد وهي ماسكه غصتها ؛ كذااب وربي كنت موجود ٣ شهور مايمر فيها اسبوع الا وتشوفني وتكلمني فيها ولا مره قلت لي يابيان بخطبك والحين لما خطبني اللي يبيني قلت انتي حلفتي ؟؟ ودام اني حلفت ليه ماخطبتني كم مره جيت فيها اعدهم لك ؟ ، اول مره بالعيد شفتني ولا خطبت وسكت وكنتوا ٣ شهور موجودين الين عيد الأضحى ٣ شهور ياهادي ولا خطبت والحين بعد ٣ شهور غير الثلاث اللي قبل جاي تقول كنت بخطبك ! ، اول شي ما كنت ابيك من اول ولا اطيق سيرتك وللحين ما ابيك ولا اطيقك ولا ابي اشوف وجهك انا الحين لراكان تعرف من راكان ؟ الضابط اللي احسن من مليون واحد مثلك
هادي اللي كان يسمع وهو مصدوم ويحس كأنه حلم ماهو مصدق ان هذي بيان اللي دايم تضحك له هالمره تقول انها ماكانت تطيقه هالمره استوعب وصحى على نفسه ان كل شي كانت تسوي تمثل عليه فيه وقال وهو يضحك بقهر ؛ يعني ؟ تبين راكان عشان منصب طمعانه فيه ؟
بيان ؛ اي نعم منصب ويوم كنت افكر اتزوجك عشان منصب ابوك اللي هو عمي وعشان ما اكون بهالديره والحين جاني واحد منصب هو وابوه وساكن برا الديره بعد وش ابي فيك ؟ عندك شي
هادي طلع الأسواره من جيبه وهو يشدها بيده ؛ دامها كذا اجل باللي مايحفظك لا انتي ولا هو ولا منصبه " ومد كفه والاسوار فيه " ولا هاللي عرفتك منها
وحذف الأسواره بالأرض وقال وهو يدوس عليها ؛ وتهني مع راعي المنصب يازوجة المنصب
بيان سكتت بقهر وهي تناظر الأسواره ورفعت نظرها لهادي بأبتسامة استهزاء ؛ خلها معك يمكن تحتاج تبيعها اصلاً توقعت انك بعتها وبتجيب لي فيها مهر
هادي بنفس نبرتها وهو يضحك بأستفزاز ؛ وهذي هي اخرتها تحت التراب تنوطي حتى لو بعناها بتطلع اغلى منك رخيصه انتي وياها
بيان شدت على يدها بقهر وهي تدفه وغمض عيونه بألم من كتفه اللي دفته ومسك كفها بقوه وهو يلوي ذراعها ؛ يمين بالله لتنكسر قبل تنمد
بيان شهقت بألم وهي تنزل دموعها بقهر وسحبت يدها منه وقالت وهي تعطيه ظهرها ومشت بسرعه للبيت ؛ تخسي تكسرها
وسكت هادي وهو يشوفها راحت تركض للبيت وسند راسه على الجدار وهو يحس انه مختنق وراسه بدا يثقل من التعب ومشى وهو يادوب يتوازن وجا تركي يركض من شافه يترنح ومسكه وهو يسنده ؛ هاادي وش صار
هادي استند على تركي وهو يمشي معه للسياره وركب وهو يقول ؛ اركب مشينا
تركي سكر الباب وركب وهو يحرك ؛ هادي علامك!
واستند هادي وهو يرجع المرتبه على ورا وصرخ من كتفه ؛ اااخخ ياتركي تكفى !!
تركي وقف بسرعه وهو يلتفت لهادي ؛ اخخو نايف وش يوجعك !
هادي وهو شاد على اسنانه ؛ كتفي كتفي
وحرك تركي للمستشفى وهو انهبل مايدري وش صاير ولا يسمع الا ونين هادي اللي يردد " كتفي "
ووقف بعد نص ساعه عند المستشفى وهو ينزل ويسند هادي ودخلوا والدكتور يسأل وش فيه وتركي مايدري بس قال ؛ ططاح وكتفه يعوره
وساعدهم ينزل ثوبه وهادي يصرخ بألم كل مارفعوا يده
الدكتور ؛ فيه كدمات ومتورم كتفه بنسوي اشعه عشان نتأكد هو خلع ولا كسر
تركي هز راسه وطلع ينتظرهم وهو صدع من كثر مايفكر وبراسه مليون سؤال وبعد دقايق طويله طلع الدكتور وفز تركي ؛ ها وش طلع
الدكتور ؛ خلع بالكتف اليمين بس خفيف ان شاءالله
وهز راسه تركي ودخل وهو يشوفهم يلفون يد هادي بشاش وهو وجهه احمر من الألم
وبعد ماخلصوا قال لهم الدكتور انه يقدر يطلع بعد ماكتب له العلاجات واخذهم تركي وهو يحط فروته على هادي عشانه ماقدر يلبس ثوبه وغطاه فيها عشان لايبرد وطلعوا للسياره وهو سانده وركبوا وحرك تركي وقال بهدوء ؛ هادي بالله وش اللي صاير ؟!
هادي تنهد ؛ اقولك بس ما ابي ارجع للبيت بروح المسجد
تركي هز راسه ووقف عند مسجد الديره اللي بينه وبين عمارة ابو هادي بيت ابو راشد وكان المسجد يسار بيت ابو راشد بمسافه بسيطه وورا بيت ابو راشد عمارة ابو هادي من الجهه اليمين ونزلوا تركي وهادي اللي التفت لتركي ؛ كم الساعه ؟؟
تركي ؛ ٣ وربع
هادي تأفف بضيق وهو يدخل يتوضى وخلص بعد معاناه من كتفه كل مايرفع يده ودخل للمسجد وهو يصلي وتركي واقف ومتكتف بأستغراب وخوف من حالة هادي ويبي يعرف وش فيه وتوتر من تأخر هادي وهو ساجد لخمس دقايق وتنهد براحه من قام هادي وصلى تركي ركعتين لحد مايخلص هادي
وبعد دقايق سلم وقام تركي وجلس بجنب هادي اللي قال ؛ اقولك السالفه بس ما ابي اي احد يدري عن اللي صار قبل شوي كلله
تركي هز راسه ؛ ابشر والله مايدري به احد
هادي ؛ طيب بكلم مساعد خويي يجي هو يدري بالسالفه بس جوالي مب معي
تركي ؛ الحين تلقاه نايم خله كلها ساعه ويأذن الفجر وتدق عليه ، وانا معك اللي تبيه ابشر
هادي هز راسه وقال تركي ؛ بتقول لي السالفه ؟
هادي ؛ ...

.

.

النهايه ..

لا امزح امزح بس حسيت لو تحمست شوي بكتب الروايه كلها 😭
وهالبارت اطول بارت انزله لأن احتمال ما انزل الأسبوع الجاي بكون مشغوله وخليت لكم هالبارت طويل احتياط وعشان كذا قدروا تعبي بالتصوييت لاتنسونه والله ماتدرون وش كثر يشجعني ويحمسني اكمل حتى لو كان الضغط لفوق راسي