ياديرةٍ ضمّت كل الأحباب

Part 19

..........••..........
المستشفى
خلص تركي وعزام عنده والتفت له ؛ بروح داخل اشوف وش سوو وارجع
تركي هز راسه وطلع عزام لغرفة شموخ ومن دخل وهو يشوف الممرضه تفك لها المُغذي
عزام ؛ ها يمه وش قالو
ام عزام ؛ خلاص بيطلعونها نزلت الحراره
عزام ابتسم ؛ الحمدلله اجل يلا حتى تركي بيطلع
شموخ عقدت حواجبها ؛ وين يطلع ؟
عزام ؛ هو هنا تعبان وبيرجع معنا
شموخ غمضت عيونها بأستيعاب وهي تحاول تتذكر انها كلمته بس وين ماتدري وكانت بتسأل كيف جا وكيف تعب بس سكتت وقالت ام عزام وهي تقومها ؛ يلا وانا امك طلعنا
قامت شموخ وهي تعدل طرحتها وطلعت مع امها وعزام قدامهم مشى لغرفة تركي والتفت لهم ؛ اسبقونا للسياره ، شموخ هذا المفتاح تلقينها يسار الباب على طول
اخذت شموخ المفتاح وراحت مع امها يسبقونهم للسياره وعزام دخل لغرفة تركي ؛ ها ياترييك يلا مشينا
تركي ابتسم وهو يقوم ؛ يلا
وتردد يسأل ولا لا بس تنحنح وقال ؛ اهلك وش صار عليهم
عزام ابتسم ؛ طلعو بالسياره
ابتسم تركي وهز راسه وهو يطلع مع عزام وركب للسياره وأول ماركب قالت ام عزام بعد ماترددت ؛ الحمدلله على سلامتك ياتركي
تركي ابتسم وهو صاد ؛ الله يسلمك ياعمه وماتشوفون شر
ام عزام ؛ الشر مايجيك
ابتسم تركي وعزام وحركوا للبيت
وشموخ كانت ورا كرسي عزام وتناظر وجه تركي على جنب وهي تتذكر وتقول بنفسها ؛ " انا والله كلمتك .... يويلي لايكون صدق اللي صار .. لا لا اتوقع انه حلم ... الا الا حلم حتى شفت زايد بعد اكيد حلم ولما قمت قالت امي حلم .. بس هو كيف تعب وش جابه " ، واستوعبت من هزتها امها بأستغراب من لاحضت شموخ تناظر لتركي وهزت ام عزام راسها لشموخ بمعنى " وش " وتنحنحت شموخ وهي تهز راسها ب " لا " ولفت لجهة شباكها
ورجع الصمت لحد ماوصلوا ، وقف عزام ونزل هو وتركي لجهة الدوانيه وشموخ وام عزام راحو لداخل جهة باب الصاله اللي ع الحوش ودخلت ام عزام وشموخ ناظرت بصدمه لفراش تركي اللي باقي بمكانه بالدكه وشهقت وهي تقول بنفسها ؛ " صصدق الا الا جيت عنده انا اللي طلعت ييويليييي وسألني تعبانه وكانت الساعه ٣ ال..
قاطعت افكارها ام عزام وهي عند الباب ؛ شموخ وش موقفك تعالي
مشت شموخ وهي تدعي انه حلم ودخلت لداخل وسكرت ام عزام الباب ؛ وش صاير لك انتي سرحانه
شموخ ؛ مو صاير لي شي بروح الغرفه
ام راشد طلعت من المجلس على صوت الباب وابتسمت من شافتهم ؛ هلا والله الحمدلله على السلامه
ام عزام ضحكت ؛ الله يسلمك
شموخ ابتسمت بأرتباك ؛ الله يسلمك
ام راشد ؛ تعالوا تعالوا افطرو وتقهوو
شموخ ؛ انا بروح ابدل وارجع
وراحت للغرفه وام عزام دخلت للمجلس اللي فيه عبير ومنيره وعيالهم ؛ السلام
منيره وعبير ؛ وعليكم السلام
ام عزام وهي تنزل عبايتها وتجلس ؛ يربي من المستشفيات وغثاها
ام راشد ضحكت ؛ ياعمري عنك قومي ياعبير جيبي لها مويه
قامت عبير وقالت منيره ؛ ماتشوف شموخ الشر ياخاله
ام عزام ابتسمت ؛ مانشوفه فيك ياحبيبتي
•
داخل في ممر الغرف دخلت شموخ لغرفة هاجر واروى وطارت عيونها بصدمه من صرخوا وركضوا لها يحضنونها
اروى ابتسمت بضحكه ؛ ششموخ اشتقتتت لك
هاجر ؛ يييوه اشتقنا " وقالت وهي تلمس جبينها وخدها " فيك شي ؟ راحت الحراره ؟ تحسين بشي ؟
شموخ ضحكت ؛ خوفتونيي لا مافيني شي وانا بعد اشتقت لكم
هاجر ؛ جا معك تركي ؟
شموخ بصدمه ؛ هه!
اروى ضحكت ؛ هاجر ياغبيه ، قصدها انه كان بيرجع معكم جا ولا لا ؟
شموخ استوعبت ؛ اها اي معنا راح للدوانيه هو وعزام ، "وقالت وهي تسحبهم وتجلس " بعدين تعالو وش صار سولفوا لي
هاجر ؛ هيه حنا المفروض نقول وش صار
اروى ؛ وش سويتي وش فيك
شموخ ؛ مدري قمت بالمستشفى وكانت حرارتي مرتفعه وبعد مانزلت جينا ، " وتنحنحت بتوتر" تتركي وشلون جا
هاجر قعدت تسولف لهم وش صار واللي قال لها نايف وشموخ تحاول تعرف هي كانت تحلم ولا لا بس ماتدري شلون تسألهم وسكتت وهي تلتفت لأروى اللي قالت ؛ والله مب صاحي نايم بالحوش شكله يحسب ان الشتاء توه الين اكلها
ضحكوا وقالت شموخ وهي تقوم ؛ والله البرد من امس ماتعبت الا منه " وناظرت اروى وهاجر " ولا يمكن من بعض الناس حذفوني بالتراب
هاجر واروى ؛ ههههههههههههههههه
اروى ؛ ياشييينك حقدتي
هاجر ؛ والله اسفين مادرينا انك بتتعبين من التراب
ضحكت شموخ ؛ لا عادي يلا بس ببدل ملابسي اسبقوني للمجلس واجيكم
وطلعوا هاجر واروى للمجلس وشموخ لحقتهم بعد مابدلت
•
قبل بدقايق بالدوانيه
دخلو تركي وعزام وهم يشوفون العيال يفطرون
عزام ؛ السلام عليكم
ابو راشد ؛ هلا ومرحبا وعليكم السلام
العيال ؛ هلااا ، يالله حيهم ، وعليكم السلامم
ابو راشد ؛ الحمدلله على السلامه
تركي وعزام ؛ الله يسلمك
ابو راشد ؛ تعالوا الفطور تو حطيناه
تركي ضحك ؛ اييه من برا ، والله وسحبت عليكم امي وجت معي تعرفون اغلى عيالها انا لازم تخاف علي
راشد ؛ ايه ايه اغلى عيالها اشوفها نستك بالمستشفى وجت
الكل ؛ هههههههههههههه
وجلسوا يفطرون وتركي تذكر ؛ ايه صح وشلون شلتوني ماشاءالله
نايف ؛ والله من الروعه وانا اخوك مدري شلون وصلت فيك للسياره ماحسيت بثقلك
عزام ؛ والله منت بثقيل ياتركي عريض عضلات ماشاءالله مب شحوم مثل واحد الله يستر عليه
تركي انفجر يضحك ؛ ررراشد
ضحكوا وراشد ضحك وهو يناظر نفسه ؛ حرام عليكم والله مب سمين بس لي كرش
ناصر ؛ لا سعد دبه شف راسه كبير
انفجروا يضحكون وقال سعد بصدمه ؛ افا هذا وانا ابو عبدالله اعز اخوياك وبعدين عزام اللي قاله مب انا
نايف بضحك ؛ يدافع عن ابوه بعدين انت ابو عبدالله منت بعبدالله
ضحكوا وقال تركي من استوعب ؛ نايف دوامك ؟
ابو راشد ؛ اوهووه ياتركي حتى بالمستشفى بعد قال نايف صحوه لدوامه لايروح عليه
نايف ارسل بوسه بالهوا لتركي ؛ فديت الأخو مانساني ، ماعليك الساعه 8 اروح باقي وقت
تركي ؛ اييه اشوا احسبك نسيته
سعد ؛ متحمس اكثر منه ياتركي شكلك تبي من الراتب
نايف ؛ لو يبيه كله يستاهله
تركي رفع حواجبه بأبتسامة صدمه ؛ مدلعني اشوف
راشد ؛ كل وانت ساكت ماينفع معك الدلع
ابو راشد ؛ كلكم كلو واسكتوا لا ادلعكم بهالعقال
ضحكوا وكملو يفطرون وهم ساكتين عشان لايجلدهم
•
مر الوقت بدون احداث مهمه الا ان نايف راح لدوامه اللي بديرتهم ومكانه مايبعد عن بيتهم مسافه كبيره وهو البنك شغال بمكتب فيه واخذ وقت دوامه من المدير وكان من الساعه 9 الصباح الى 12 الظهر يومياً الا الجمعه ، والسبت يكون من 4 العصر الى 8 بالليل ومن بكره يبدأ
..........••..........
في بيت ابو هادي العصر
دخل ابو هادي ولقاهم بالصاله جالسين ؛ السلام عليكم
الكل ؛ وعليكم السلام
ابو هادي ؛ خالصين ؟
ام هادي ؛ من وش ؟
ابو هادي ؛ اغراضكم
ام هادي ؛ ايه كل الشنط بالسياره
ابو هادي عقد حواجبه ؛ وليه مانمشي طيب ؟
حمد ضحك ؛ انا ادري عنهم يايبه كلنا جاهزين
ابو هادي ؛ اجل خلونا بكره الفجر نمشي وش قلتوا
هادي رفع حاجبه ؛ الفجر!
ابو هادي ؛ ايه الفجر الساعه 5 بعد الصلاه على طول
شهد ؛ خلها بعد صلاة الظهر يبه تكفى
هادي ؛ اي والله انا انام متأخر واذا مسكت خط من فجر الله نمت بنص الطريق
ابو هادي ؛ عشان تلعب فيكم الشموس
ام هادي ؛ حتى لو مشينا الفجر بنوصل الظهر بتكون الشمس محرقتنا
ابو هادي ضحك ؛ يعني ؟
هادي ؛ يعني الساعه ٤ العصر تكون الشمس خفت
ابو هادي ؛ بعد صار العصر ؟ اول شي الطريق ٨٠٠ كيلو لو مشينا العصر نوصل ١٠ ولا ١١ بالليل وانا لو تطير مامسكت خط طويل بالليل
حمد ؛ خلنا الفجر نروح عشان نوصل الظهر نرتاح شوي والعصر نتمشى بالديره ونشوفها
ابو هادي ؛ هذا الكلام ، الفجر بنمشي ان قالها الله ونامو بدري واللي مايقوم اخذ مفتاح سيارته واخليه
ام هادي ضحكت ؛ زين اجل 5 الفجر كلنا جاهزين ان شاءالله
شهد ؛ يعني اقوم قبل الصلاه اجهز ونصلي ونروح
هادي عقد حواجبه بكسل ؛ يبه اذا ماقمت لاتاخذ المفتاح صحوني الين اقوم
ابو هادي ضحك ؛ طيب بس جهزوا كل اللي تبون عشان ماننسى شي
حمد وهو يأشر على الكنبه ؛ يبه والله اننا جاهزين ماباقي الا هذي نشيلها
الكل ؛ ههههههههههههههههه
ابو هادي ضحك وهو يقوم ؛ يلا بروح انام لي شوي وانتوا شوفو اغراضكم
ودخل وكلهم راحو لغرفهم يجهزون
ام هادي ؛ شهد تعالي معاي المطبخ باخذ كم غرض
شهد ؛ يمه تكفين بلبس عبايتي واروح بسلم على ريناد وارجع اساعدك
ام هادي ضحكت ؛ طيب لاتتأخرين ولاتطلعون برا
شهد هزت راسها وراحت تلبس وطلعت لبيت صديقتها وجارتهم
..........••..........
بيت ابو راشد العصر
كانو كلهم بالصاله والعيال مع ابو راشد بالسوق
وطلعت ام راشد من المطبخ ؛ شفتو ام عبد الرحمن يقولون جت للديره البارح بالليل
عبير ؛ يحليلها ماتصبر عن الديره
منيره ضحكت ؛ مابغت تروح اصلاً
هاجر ؛ يمكن تجي عندنا الحين تلقونها عند بيت ثاني
شريفه ضحكت ؛ يزينها ماتقعد بس تحوم
اروى ضحكت ؛ وهيلا بعد والله اذكر كل مارحت للبقاله القاها تفتر بالسوق
ام عزام ضحكت ؛ من هذولي
ضحكت ام راشد وهي تمد لها فنجال قهوه ؛ تقهوي ، هذي ام عبدالرحمن ساكنه بالديره من مبطي وتزوج ولدها من برا الديره بنت اختها اللي بالشرقيه وسكن فيها هنا وزوجته يوم قربت ولادتها راحت لأهلها بالشرقيه وراحت ام عبدالرحمن تزورها وقعدت شهر والله فاقدينها وامس جت بس مدري ولدها جاب مرته وولده معهم ولا لا
عبير ؛ يمه اذا هي معهم خلينا نروح نسلم عليهم
شموخ ؛ وهيلا من ؟
اروى ؛ بنت ام عبدالرحمن " وضحكت من جت ببالها فكره " يممه تكفين خلينا نطلع للسوق والله لو بحلف انها فيه الحين
الكل ؛ ههههههههههههههه
هاجر ؛ اي تكفين يمه ولا خلينا نطلع للبقاله ونرجع اصلاً من زمان مارحنا مشي بطلق رجولي يلا يمهه
ام راشد ضحكت ؛ والله حتى انا ودي اطلق رجيلاتي بس اصبرو يمكن تجي هي اصلاً خابره شريفه انها ولدت يمكن تجي تسلم
عبير ضحكت ؛ ييوه ماشاءالله عليها جت على سابع يوم اهم شي تجي
شريفه ؛ اي صح اليوم اخر يوم من السابع ياسرع الوقت
اروى ؛ ايه ياسرعه ماكرفتي كرفنا انا وهاجر ولا كان حسيتي بالوقت صدق
ضحكوا وقالت ام عزام ؛ انتو تروحون للسوق مشي ؟
ام راشد ؛ اي والله مشي
ام عزام ؛ ليه ماتروحون على السياره اريح
ام راشد ؛ لا ماعليك حنا مانرتاح الا اذا رحنا مشي والله ان هذا زين طريقه وحتى لو رحنا بالسياره ماندخل فيها داخل السوق بنمشي ان رحنا سياره ولا مشي
عبير ؛ والله من زمان ودي اروح له واتفرج على الاسواق واخذ من بسطة سعديه ... ييوه هي وين راحت
اروى ضحكت ؛ موجوده للحين وتطورت صايره تبيع مكياج
منيره بضحك ؛ ييزينها اول حنا وبراقع وقماش الحين كل شي
شموخ ؛ الله بشوف السوق حقكم ماقد رحت له
هاجر ؛ ييهبل يبنت والله تدخلين الصباح ماتطلعين الا العصر ولاتحسين بالوقت
اروى ؛ عشان كذا العيال مايروحون معنا بيتعبون وحنا مستانسين
ام راشد ؛ ييوه يا اروى والله اني اشتقت للسوق عاد انتي لارحتي معي وضيعت محل تدلينه من كثر ماتروحين
ام عزام ضحكت ؛ عاد والله ماراحت من يوم ماجينا من اسبوع وهي بالبيت
اروى ؛ اي والله هالأيام ماصرت اجيه يلا عشان مايقولون ماتمسكها الارض اروح له بكره وافره كله
عبير ؛ ايه صح والله مارحتي عاد البقاله ماتصبرين عنها
اروى ؛ ماش عمي مرزوق مايبيع مثل اول الحين بقالته مافيها شي شكله بيقفلها
ام راشد ؛ كبر بالعمر ماينلام الله يعينه
ام عزام ؛ ماعنده عيال يبيعون عنه ؟
ام راشد؛ ساكنين برا الديره ويروح لهم كل شوي واحياناً هم يجونه
عبير ؛ الله يعينه ، شرايكم نروح بكره الصباح
ام راشد ؛ خلاص بكره ، من بيروح
اروى ؛ انا
هاجر ومنيره ؛ انا
ام عزام ؛ وانا وشموخ معكم
عبر ؛ وانا معكم
شريفه ضحكت ؛ وانا من يجلس عندي ؟؟
اروى ؛ ماعليك مابنتأخر بعدين انتي ماتقومين الا الظهر
عبير ؛ اي والله ماعليك والعنود بس نايمه ماتزعج فديتها
شريفه ؛ طيب يعني جيبو لي شي معكم لاتنسوني
ام راشد ضحكت ؛ ابشري نجيب لك
شموخ ؛ كبير السوق ؟
اروى ؛ اييه اسواق مقابل بعض وبسطات وبياعين ماتخلص
شموخ ضحكت ؛ وناسه تحمست اروح
ضحكوا وقالت ام راشد من تذكرت ؛ اروى امس ما اسقينا الزرع اللي بالحوش صح ؟
اروى ؛ لا رحنا للمزرعه ونسيناه واليوم تركي تعبان ونايف راح لدوامه وانشغلنا
ام راشد ؛ اجل قومي انتي وهاجر قبل تغيب الشمس ويبرد الجو
اروى قامت ؛ يلا هاجر ، شموخ تجين معنا ولا تعبانه
شموخ ضحكت ؛ لا بجي مافيني شي
هاجر ؛ اروى تكفين اسقيه انتي شمس ما احب اطلع
اروى جلست عندها وهمست ؛ بشرط
هاجر ؛ وش
اروى ؛ ترتبين دولابي اذا رتبتي حقك
هاجر ؛ يووه انتي اغراضك واجد ، خلاص زين روحي
ام راشد سمعتهم وضحكت ؛ اروى يالجنيه
ضحكت اروى وهي تقوم ؛ والله عاد وافقت هاجر ، يلا بروح انا وشموخ
ام عزام ؛ شموخ طرحتك
شموخ رفعتها على راسها وهي تطلع للحوش مع اروى
اروى ضحكت ؛ ماتبتي من المره اللي طافت
شموخ تذكرت ؛ ييوه لاتذكريني تكفين
ضحكت اروى وهي تفتح المويه وشموخ ودها تسألها بس سبقتها اروى اللي تنحنحت وهي تقول ؛ شموخ امس كنتي بتقولين لي عن سالفة خطبتك ماقلتيها لي ... تقولينها لي الحين ؟
شموخ تنهدت ؛ اول شي بسألك
اروى وهي ترش الزرايع ؛ اسألي
شموخ ؛ تركي نام لحاله بالحوش ؟
اروى بأستغراب ؛ ايه ليش ؟
شموخ ؛ انا ماني متأكده بس اتوقع انه حلم .. اذكر اني قمت الفجر وطلعت للحوش ولقيت تركي وكان فراشه هنا " اشرت على الدكه " .... وكملت وهي تسولف لها عن حلمها اللي مو متأكده اذا هو صدق او لا وبعد ماخلصت عقدت اروى حواجبها ؛ حلم حلم صدقيني سلامات بيشوفك ويسولف معك عادي لا ويلمس وجهك يشوف فيك حراره او لا
شموخ ؛ يختتي اذكر اني بعد قمت وامي قالت حلم بس قبل لا اقوم لفيت بسكر الباب ويطلع بوجهي تركي وطاح قلبي وبعدها ما اذكر شي
اروى ؛ يييوه ياشين احلام الحراره ماعليك كنتي تحلمين صدقيني
شموخ ؛ طيب انا مادريت انه نام هنا وحلمت فيه ولما رجعنا من المستشفى شفت فراشه اخاف انه صدق
اروى ؛ وكيف نتأكد اذا صدق ولا لا
شموخ ؛ ممدري هذا اللي مزعجني
اروى ضحكت ؛ يوه منك ماتذكرين اللي صار حلم ولا لا " ورشت عليها شوي مويه " تذكري
شموخ شهقت ؛ هييه اررروى تبين اتعب نفس ام... وسكتت وهي تتذكر
اروى ؛ وششو
شموخ تنهدت ؛ حلم امس امي رشت علي مويه
اروى انفجرت تضحك ؛ هههههههههههههههه الله ينصرها خالتي صحصحتك زين
شموخ اخذت منها ليّ المويه ؛ وخري بسقي الزرع انا.... امس حلمت بزايد بعد
اروى عقدت حواجبها ؛ من ذا
شموخ ؛ خطيب الفلس
اروى ضحكت ؛ اهاا ولد عمك اي قولي لي شسالفته
شموخ ترددت تقول لها السالفه لأنها ابتدت من عزام وخافت تصير مشكله وقالت لها سالفتها هي بس ؛ اا مو سالفه طويله بس ان جدي خطبني لزايد من ابوي عشانه مايبي احفاده ياخذون غريب وانا وافقت بس ام زايد ماتبيني له وتكرهني وانا بعد كرهتها من كلامها واسلوبها معي ونظراتها ولما توفى ابوي الله يرحمه مافتحو الموضوع اتوقع كنسلو واحسن ان شاءالله ما يفتحونه
اروى ؛ اول شي امه ماعليك منها هو يبيك ال.. قاطعتها شموخ ؛ لا وربي مايبييني ويمشي على كلام امه وامه اذا زاروها خواتها تقعد تمدح في بناتهم وتعطيني نظرات الله يعميها
اروى ؛ طيب قولي ماني موافقه واخطبي لولدك من بنات خواتك اللي تمدحينهم
شموخ ؛ انا ادري عنها ، بس والله اني متأكده اذا اخذت زايد امه بتزوجه وحده ثانيه وهو زي الخروف بيسمع كلامها ماعنده رأي وبتقلب راسه مثل ماقلبت راس عمي وخلته يرفض وصية ابوه وتخيلي جدي كان يقول قبل لايموت اني لزايد وابوي مارفض لحد ما مات لاكن عمي اللي طنش
اروى ؛ طيب اعمامك ماشفناهم بزواج شريفه وعزام... وويعني عزام غريبه ما اخذ من بنات عمه بس انتي اللي يبونك لولدهم
شموخ غمضت عيونها بقهر وهي تقول بنفسها ؛ " غببييه شلون مافكرت انها بتسألني " ااء اروى اقولك بس بيني وبينك ؟
اروى بهدوء ؛ لاتخوفيني وشو
شموخ قفلت المويه وهي تسحب اروى وجلسوا بالدكه وبدت شموخ بعد تردد تقول لها السالفه كلها..
اروى ضربت يد شموخ بخفيف ؛ شففتي عزام رفض وماقالو شي ولو انه ماحضروا زواجه بس انه سوى اللي يبي صدقيني انتي تقدرين ترفضين .. عزام ماسألك ماقال ماتبينه ؟
شموخ ؛ الا عزام اصلاً يقولي لاتاخذينه لاتوافقين وبياخذون حقهم منك انتي افتكي منهم
اروى ؛ هاه شفتي عزام معك منتي مغصوبه
شموخ ؛ طييب امي تقول حرام وصية جدك وابوك عطاهم ووافق وانتي وافقتي ليش ترفضين الحين
اروى ؛ يليل قولي ماجابو طاري ماملكوا ليش انتظرهم كن مالي نصيب الا عندهم
شموخ ؛ تو قبل شهر كلمناها انا وعزام وقالت اذا مرو شهرين وماجابو طاري نكلمهم ونقول مالهم نصيب اذا مايبون والحين مر شهر ان شاءالله يمر الثاني وافتك منهم
اروى ضحكت ؛ يا الله الحمدلله ماعندي اعمام عندي عمات بس كل عيالهم تزوجوا
شموخ ضحكت ؛ صح وينهم ماشفت عماتك ولا خالاتك او خوالك
اروى ؛ الا بالزواج كلهم جو وسلمتي عليهم بعد
شموخ وهي تحاول تتذكر ؛ ما اذكر والله سلمت على كثير ماعرفتهم ، المهم الكلام بيني وبينك لأن ما ادري اذا بتزوج زايد ولا لا والمشكله بتنحل ولا تزيد ان شاءالله عاد لوقتها يصير خير
اروى ضحكت ؛ بيني وبينك وان شاءالله تفتكين منهم اذا مالك خير معهم
شموخ ؛ يبنت خير ولا شر اهم شي افتك
ضحكت اروى وشموخ وهم يلتفتون على طق الباب
شموخ فزت ؛ امانه اصبببرييي بدخل
اروى انحاشت معها ؛ هيييه والله حتى انا بدخل طرحتي مو معي
ودخلو للصاله وشافتهم ام راشد يركضون ؛ وشش فييكم
اروى وهي تاخذ نفس ؛ يمه الباب الباب يطق
هاجر فزت تشيل الصينيه ومنيره راحت تفتح المجلس وشريفه اخذت بنتها وهجت للغرفه ومنظرهم كان يضحك وهم يحاولون يرتبون حوستهم وام عزام وعبير راحو للمجلس ورا منيره واروى وشموخ انحاشو للمطبخ وام راشد طلعت للحوش وهي توقف عند الباب ؛ من ؟
ام عبدالرحمن ؛ انا ام عبدالرحمن
فتحت ام راشد الباب وهي تسلم عليهم ؛ ههلا ومرحبا يالله حيهم نورت الديره
ام عبدالرحمن وهي تسلم عليها ؛ ياهلا فيتس منورةٍ بأهلها علامتس ساعه اطق محد فتح
ام راشد وهي تسلم على هيلا ؛ ياهلا ياهيلا وشلونك
هيلا ؛ بخير عساتس طيبه
ام راشد ؛ بخير الحمدلله ، اعذروني تأخرت ماسمعت الباب كنت بالمطبخ تفضلوا
ام عبدالرحمن وهي تدخل ؛ ييوه والبنيات ويين ... ماشاءالله زرعكم مبين من فوق جداركم
ام راشد ضحكت وهي تمشي وراهم لحد مادخلو للمجلس وهي تشوف منيره وعبير وعيالهم وام عزام
ام عبدالرحمن ؛ ماشاءالله اهل راشد وعبير هنا وقربت وهي تسلم عليهم
عبير ؛ ياهلا بأم عبدالرحمن حياك الله وشلونك
منيره وهي تسلم ؛ ياهلا وش اخبارك ياخاله
ام عبدالرحمن ؛ بخير الحمدالله .. وسلمت على ام عزام وهي تلتفت لأم راشد ؛ هذي منهي
ام راشد ضحكت ؛ هذي ام عزام ام زوج شريفه
ام عبدالرحمن ؛ ايييه وشلونتس يا ام عزام مبروك ماجاكم
ام عزام ؛ بخير الله يبارك فيتس وشلونتس انتي
كتموا ضحكتهم ام راشد وعبير ومنيره على تقليد ام عزام لأم عبدالرحمن
ام عبدالرحمن ؛ بخير الحمدلله ، وينها شريفه والله من يوم مادريت انها اليوم ب آخر السابع زعلت ماعلمتوني انها ولدت
ام راشد ضحكت بخفه ؛ اعذرينا والله شفناك مشغوله مع مرت ولدك وولدها قلنا مانبي نشغلها وابتسمت من تذكرت ؛ الحمدلله على سلامتهم ويتربى بعزكم ، جت معكم ولا عند اهلها ؟
ام عبدالرحمن وهي تمد لها السله ؛ الله يسلمتس وانا اختس ، لا والله عند اهلها ... هذا وجوب ام العنود سويت لها هالمرقوق وقهوه وشاهي وهذي فطاير هيلا
ام راشد ابتسمت ؛ ليه الكلافه يأم عبدالرحمن والله ماتقصرين حنا اللي مقصرين ما اهديناك لحفيدك
ام عبدالرحمن ؛ لا كلافه ولا شي وانتو والله ماتقصرون
عبير ؛ وشلونك ياهيلا
هيلا وهي تقهوى ؛ بخير عساتس بخير
ام عزام كتمت ضحكتها ؛ انتي هيلا بنت ام عبد الرحمن
هيلا ؛ ايه
ام عبدالرحمن ؛ ماشاءالله تعرفينا يأم عزام
ام عزام تنحنحت ؛ ها لا اسمع فيكم من ام راشد بكل خير
عبير ومنيره اللي اختنقو من كتمهم لضحكهم وعبير تقوم من حست انها بتنفجر ؛ ببروح انادي شريفه
وقامت وراها منيره ومن دخلو المطبخ وهم ينفجرون ضحك وشافتهم هاجر اللي مدت صينيه الكاسات والفناجين ؛ انننتظر احد يجي ياخذهم اخاف تناديني امي تككفون خذوهم انتوا
عبير وهي ميته ضحك ؛ روحي بس اصلاً تو تسأل عنكم ام عبدالرحمن انتي واروى وشريفه
هاجر ؛ اروى هجت للغرفه هي وشموخ وشريفه هناك
منيره ضحكت ؛ عبير شريفه شكلها تستنى احد يجيها خلينا نشوف وين راحت
ضحكت عبير وهي تسحب منيره وراحو للغرفه ولحقتهم هاجر ودخلت عبير وهي تشوف شريفه تعدل طرحتها ؛ عبير عبير خذي العنود ، من اللي جا ؟
عبير ضحكت وهي تشيل العنود ؛ ام عبدالرحمن وهيلا
اروى اللي كانت هي وشموخ عند شريفه وقالت اروى بضحك ؛ ما شاء الله على طاريهم جو
عبير ضحكت ؛ اسسكتي لاتسمعنا قومو بسرعه كلكم للمجلس
شريفه ؛ يلا يلا امشي وشيلي العنود
عبير شالت العنود وهي تطلع ؛ هاجر انتي واروى وشموخ الحقونا
هاجر ؛ خلاص روحو الحين اجي
وراحت هاجر تبدل واروى وشموخ ينتظرونها
شموخ وهي واقفه عند الباب ؛ الحين ليه متفرقعين كلكم هي عجوز ؟
اروى ضحكت ؛ متفرقعين عشان ماتاكلنا بلسانها وتفضحنا ، عجوز بس انشط مني ومنك
هاجر من داخل الغرفه ؛ اخاف تدرعم علينا الحين
اروى ؛ تسويها اخلصي بنطلع
طلعت هاجر وهي تمشيهم ؛ يلا اروى انتي اول وحده
اروى وهي تدفها قدامها ؛ لاوالله انتي الاكبر امشي بس
هاجر مشت قدامهم واروى وراها وشموخ وراهم بعد مادفت اروى تجي قدامها
ودخلو وهاجر تسلم عليهم واروى ومن سلمت ام عبدالرحمن على شموخ وهي تشهق ؛ ماشاءالله تتركي تزوج هذي مرته ؟
شموخ طارت عيونها بصدمه وام راشد ضحكت ؛ لا لا هذي شموخ بنت ام عزام
ام عبدالرحمن بضحك ؛ والله احسبها مرت تركي بغيت اقول بعد ماعلمتوني
جلسوا شموخ وهاجر واروى وشموخ تتحسب من الفشله
ام عبدالرحمن ؛ وتركي ليه ماتزوج وانا اختس كبير
ام راشد ؛ قريب ان شاءالله
ام عبدالرحمن ؛ اييه ، وش اخبار ام سعد ياعبير
عبير ؛ بخير تسلم عليك
ام عبدالرحمن ؛ الله يسلمها ، " وقالت وهي تحط فنجالها وتقوم " يلا انا بروح عند نشميه عازمتني
ام راشد وهي تقوم معها ؛ وين ويين تعشي معنا مبطين عنك
ام عبدالرحمن ؛ الجايات ان شاءالله ، يلا تمسوا على خير
قامو معها وهي تطلع هي وهيلا وام راشد توصلهم للباب وطلعو وهي ترجع تدخل وضحكت من قالت عبير ؛ ييمه والله ان نشميه ماعزمتها بس هي بتروح
الكل ؛ هههههههههههههههههههه
شريفه ضحكت ؛ والله ان جوها عليل ماشاءالله عليها
ام راشد ضحكت وهي تجلس ؛ ماضحكتني الا يوم تحسب شموخ زوجة تركي
ام عزام بضحك ؛ ايييه اول مره تشوفها تحسب انها زوجته ، بس والله يازينها ونيسه
ضحكوا واروى كاتمه ضحكتها عشان لاتذبحها شموخ وماقدرت من التفتت لشموخ وهي تشوف وجهها منقلب وانفجرت تضحك وشموخ ضحكت من ضحكهم وهي متفشله
•
ومر الوقت بسرعه بدون احداث جديده لحد ما جا الليل وناموا كلهم
............••............
من بكره في المدينه
في بيت ابو هادي الساعه 4 ونص الفجر
كلهم قايمين يجهزون وشنطهم الصغيره عند الباب وخالصين وابو هادي مع حمد وهادي بالصاله وشهد تلبس وام هادي تشيك على البيت
ابو هادي وهو يشوف هادي نعسان ؛ وللد صحصح لاتنام
هادي فز ؛ يببه قايل لكم قايل لكم الفجر محد يمشي
ابو هادي ؛ ورا مانمت بدري هذا وحنا رجعنا قبل ١٠ من الأستراحه امس عشان لانسهر
هادي ؛ ماجاني نوم
حمد ؛ هذا انا مانمت زين ومصحصح الحين تشرب قهوه ويشتغل مخك صح
ام هادي جت وهي تضحك ؛ ترا ماسويت لاقهوه ولا فطور الأغراض كلها شايلتها بنصلي ونفطر بالطريق
ابو هادي ضحك ؛ الحين ينجلط هادي لانوم ولا فطور
ضحكوا وطلعت شهد ؛ يلا متى نروح
ابو هادي ؛ ماباقي شي على الصلاه نصلي وناخذ فطور ونتوكل على الله
ام هادي ؛ طيب خلونا نطلع ونصلي بالمسجد تحت ونمشي
ابو هادي ؛ والله انه احسن ... اجل يلا ياعيال نزلو هالشنط للسياره حمد خذ شنطتك وهادي شنطتك وحطو شنطة شهد ومريم معي
شهد ؛ يعني كل واحد لحاله وانا وامي معك ؟
ابو هادي ؛ ايه يلا
اخذو هادي وحمد الشنط ونزلوا وطلعو كلهم وقفل ابو هادي الشقه وراه ونزل معهم تحت
حطو شنطهم بالسياره وبهاللحضه جا وقت الصلاه ودخلو للمسجد وام هادي وشهد بالمصلى جنبهم
•
صلوا وخلصوا وطلع ابو هادي والعيال وطلعت ام هادي وشهد
ابو هادي وقف عند السياره ؛ هادي انت وحمد خلكم ورانا لاتبعدون ولاتس... قاطعه حمد بضحك ؛ ولاتسرعون واذا وقفنا وقفوا والحزام اربطوه والجوال لاتنشغلون عليه ، يايبه والله حفظناها يوم رحنا للرياض بعيد الأضحى قلت لنا كذا ويوم رجعنا بعد نفس الشي
ابو هادي ضحك ؛ ياسلام عليك مانسيت التوصيات من ٤ شهور .... معنا ياهادي
هادي ؛ اي معكم
ابو هادي ؛ يلا قبل لانطلع ناخذ فطور ونمشي
حمد ؛ وقهوه عشان هادي يصحصح
ابو هادي بضحك ؛ وقهوه بعد يلا اركبوا والحقونا
ركبوا كلهم وحرك ابو هادي اللي معه ام هادي وشهد ووراهم هادي بسيارته ووراه حمد واخذو لهم فطور ومسكوا خط متوجهين للرياض