ياديرةٍ ضمّت كل الأحباب

Part 17

☆ قبل القراءة

•
قبل بدقايق عند البنات داخل
اللي اغلبهم مافيهم نوم بس شريفه راحت تنوم بنتها وعبير عيالها ومنيره تودي اميره ومناير وام عزام تعطي شموخ مسكن ونامت وطلعت ام عزام للصاله عند ام راشد واروى وهاجر بالمطبخ يغسلون صحون الحلويات طلعت عبير وهي تمر على شريفه بغرفتها ؛ نامت ؟
شريفه ؛ اي يلا بنروح الصاله ، فيها احد ؟
عبير وهي تطلع ؛ ايه امي وخالتي والبنات
طلعت وراها شريفه وراحو يجلسون بالصاله
شريفه ؛ شموخ وين
ام عزام ؛ عطيتها علاج ونامت عندي بالغرفه
ام راشد ؛ ياعمري عليها
ودخلت منيره وهي تجلس معهم ؛ والله طول الطريق نعسانه جيت هنا طار النوم
عبير ضحكت ؛ كلنا والله
شريفه ؛ نمت بالسياره طول الطريق وجيت ونومت العنود على اساس انام بعد وماجاني نوم
وضحكوا وهم يكملون سوالفهم
" بالمطبخ "
اروى وهاجر اللي خلصوا غسيل الصحون ورتبوا
اروى ؛ هاجر كيس العنب وينه
هاجر ضحكت ؛ بالثلاجه
فتحت اروى الثلاجه وهي تاخذه وتحط منه بصحن ؛ جوجو شرايك تحطين لنا مكسرات وتسوين شاهي
هاجر طلعت صحن ؛ مكسرات بحط وشاهي الحمدلله ماغسلت الزمزميه باقي من اللي سويناه بالمزرعه
اروى ؛ يارفلا يمكن عاقد سوي جديد
هاجر وهي تصب منه وتذوقه ؛ لا لا حلو بحط مكسرات ونتابع التلفزون ان شاء الله مانامو
هزت راسها اروى وجت تغسل العنب وهي تغني ؛ العنب العنب العنب
هاجر ضحكت وهي تكمل معها ؛ العنب العنب العنب
اروى وهاجر ؛ احمر .. واصفر .. احمرر .. واصصفر .. احمر وزي اللوز واطعم كمان من الموز
وطلعت اروى فيه وهي تغني وترقص بخفه وهاجر وراها بالصينيه وتغني معها
اروى ؛ اححمر وزي اللوووز واطعم ياناس من الموز
ضحكوا اللي بالصاله وقالت عبير ؛ هذا لا اصفر ولا احمر اخضر
اروى ؛ ماعليه اسوي اغنيه للعنب الاخضر ، واخخضرر وزي الكيوي واحلا كمان من السُكر
الكل ؛ ههههههههههههه
ام عزام بضحك ؛ ياحبك للعنب باقي تكتبين فيه قصيده
ام راشد ضحكت ؛ تسويها
منيره بضحك ؛ ييازيينك يا اروى
اروى ؛ يازينك انتي والله يلا يلا شغلو لنا التلفزيون وصبي شاهي ياهاجر
شغلت شريفه التلفزيون وهي تحطه على المسلسل
اروى ؛ خاله شموخ نايمه ؟
ام عزام ؛ ايه والله نامت عندي
اروى استغربت وهي تقول بنفسها ؛ " ليكون زعلت عشان تركي ومانامت عندي انا وهاجر "
ورجعت تتابع معهم واندمجوا بالمسلسل
..........••..........
المدينه
نفس الوقت في بيت ابو هادي بعد ماراحو جيرانهم وأم هادي بالصاله طلعت شهد من المطبخ وهي تنشف يدينها وتعدل اسوارتها ؛ يمه ابوي وهادي وحمد تأخرو وين راحو ؟
ام هادي ؛ يقول ابوك بالأستراحه
شهد ؛ متى كلمتيه
ام هادي ؛ المغرب قال بيروحون لها ، ليه؟
شهد جلست وهي تقلب في التلفزيون ؛ لا بس تأخرو
ام هادي ضحكت ؛ يبنت خوفتيني خليني ادق بس
ضحكت شهد وهي تفز تجلس عند امها اللي دقت على ابو هادي و رد على طول ؛ هلا
ام هادي ؛ وينكم تأخرتو
ابو هادي ؛ بالأستراحه يمكن نتأخر شوي
ام هادي ؛ طيب ، انتبهوا وانتو راجعين
ابو هادي ؛ ان شاءالله
وقفلت وهي تلتفت لشهد ؛ بالأستراحه للحين
شهد ؛ ييوه تلقينهم مع ابو سلطان واخوياه
ام هادي ضحكت ؛ اي ماغيرهم ، عطيني الريموت الحين يبدأ المسلسل
عطتها شهد وهي تجلس تتفرج معها
..........••..........
الأستراحه
قفل ابو هادي اللي كان يلعب بلوت مع مسفر وابو سلطان وابو فواز والتفت وهو يشوف الساعه ؛ الساعه بتجي 12 والله اننا تأخرنا
ابو سلطان ؛ يرجال حنا مانطلع منها الا الفجر اجلس وش وراك
حمد وهو يلعب بلايستيشن مع العيال ؛ صدقت ياعم ماعندنا شغل ولا معرض نفتحه من فجر الله
ضحكوا وقال ابو فواز ؛ ايييه على طاري المعرض رحت له بشوف بيع ابو عبدالعزيز لقيته فاتح ورشه بجنبه ما شاءالله عليه
مسفر ؛ عاد كل محلاته مايشتغل فيهم لا هو ولا عياله معتمد على العمال
ابو هادي ؛ الله يزيده ويبارك له بس ماشي شغله
ما شاءالله
ابو سلطان ؛ اي والله الله يرزقه ويرزقنا
مسفر ؛ محلك اللي اخذت وش بتبيع فيه
ابو هادي ؛ اثاث وسجاد
ابو فواز ؛ ليه ماتخليه معرض انت خبره بالسيارات
ابو سلطان ضحك ؛ يرجالل وين معرض بالديره سياراتهم وانيت وان تسنعوا تسنعوا اخذو لهم ددسن
ابو هادي بضحك ؛ اهااا بسس عن الغلط هذي ديرتي
ضحكوا وقال مسفر بضحك ؛ والله انه صادق مالهم بالسيارات يبيلك تبسط وتبيع خضره دامها ديره
الكل ؛ ههههههههههههه
ابو هادي ؛ انت تجي لها وتحكم والله انها خَضار ولو بحلف ان خضرتهم من حوش بيتهم وزرعهم ما شاء الله
ابو فواز ؛ يرجال سولف لنا عنها يمكن اسكن فيها
فواز ؛ لاا يبه تكفى خلنا بمدينتنا
حمد التفت لهم ؛ الحين ما شاءالله وشلون تركزون باللعب وانتو تسولفون
ابو سلطان ؛ دروس ياحميّد نعطيك دروس
ضحك حمد وقال ابو هادي ؛ والله ياطويلين العمر الديره كبيره وخضراء وبنص الرياض ويقولون انها ديرتين وجمعوها عشان كذا كبيره اسمها محاسن الصدف وقصتها طويله ولا اذكر منها الا شوي
ابو فواز وهو يحاول يتذكر ؛ ديرتين ؟ ومحاسن الصدف ؟ والله سمعت فيها ..... ايييه عزالله ذكرت
واعرف قصتها اسمعوا اسمعوها والله ماتتطوف
التفتو كلهم وتركو اللي معهم وكلهم لفت انتباهم الأسم وحمد وهادي اللي بيعرفون عنها اكثر وبيسمعون قصتها كامله دام ابو هادي مايذكرها
مسفر ضحك من شافهم ؛ ياسااتر وش فيكم كنكم ضبان
ضحكوا كلهم واعتدلو بجلستهم وصفو على المساند وهم يسمعون
ابو فواز ؛ ييوه ياقصتها لها حول ال 60 سنه مدري اكثر ، كانت ديرتين كل وحده اصغر من الثانيه وكل يوم يتذابحون ولا واحد يطيق الثاني وسبب خلافهم كان فيه سوق كبير مشتركين فيه 2 تجار ومنعم عليهم ربي ، وتخالفو على البيع والربح ولا اتفقو وكل واحد سوا له ديره وهو شيخها والناس صارت تسكن بهالديار وهالديار والرجال كل واحد اغنى من الثاني ومأمن اهل ديرته واهلها ومغنيه الله وتقاطعو ولا يدخلون ديار بعضهم .. وبعدين رجال الديره الثانيه كان جاي من مكه هو واهله مدري رايح لها ، الا والله وتضيع بنته بالطريق قريب ديرتهم.. وقعد يدورها وماخلا مكان ، والديره الثانيه فيها رجال يلقط من هالحطب بالبر على حماره ويبيع بالسوق ويلقى بنت الرجال هذا بوسط البر ، لو تأخر عنها شوي تموت جوع وعطش ويسقيها ويوكلها وهو يسألها منهي بنته وتقول له .. وهو عرف وشلون مايعرف والبنت بنت عدوهم وعاد ماقدر يخليها هي بأمان الله والله حطها بطريقه اخذها وردها ديرتها وليت ابوها رضى الا تعادى معهم زود يحسب بنته ماخوذةٍ من هالديره والبنت جزاها الله خير بيّضت الوجه ولا نكرت المعروف وقالت اللي صار لأبوها وهجد يوم درا ان بنته ماصار لها شي ولا هم اللي اخذوها منه وهدت النفوس واستحى الشايب ولا زاد بعداوته مع الديره والرجال يجي ويخطب البنت يوم انه حبها ولا قدر ينساها وابوها حلف ماتاخذ بياع حطب وهي بنت شيخ والبنت حلفت ماتاخذ الا بياع الحطب على قولة ابوها وهي ترجع وتفتح معه الموضوع وتعيد عليه وتمدح بالرجال عنده الين وافق وزوجهم وتخالطو عيال ديارهم وتصالحو هالديرتين وجمعوها ، واللي سمت الديره بنت الشيخ يوم جابت اول ولد وللحين الأسم باقي والقصه باقيه وعاد كلٍ يقول قصه اسم الديره مختلفه شوي بس الأكيده ان سبب اسمها رجال من الديره لقى البنت اللي ضايعه من الديره الثانيه ..
وبعد صمت لثواني ضحك ابو فواز وهو يشوف فهاوتهم واندماجهم بالقصه ؛ يهووه انتوا معي
ابو هادي ضرب على الأرض بخفه ؛ والله اني تذكرت ان هذي اللي قالها مساعد بس قال ان سبب هوشتهم يوم مات شيخهم الأول تهاوشو من ياخذ الشيِخه بعده وتفرقوا
ابو فواز ؛ ايه كلن يقول غير بس اكثرهم يقولون ان قصتها مثل اللي قلت لكم
حمد ؛ والقصه من ستين سنه وانا احسبها تو واقول بشوف صاحب القصه
ابو سلطان ضحك ؛ بكلم مساعد يدور لنا بيت بمحاسن الصدف
ضحكوا وقال ابو فواز ؛ والله لو دريت انك بتسكن فيها ياحاتم كان بنيت لي بيت ولحقتك
فواز ؛ دام اسمها وقصتها كذا انا معك
مسفر بحماس ؛ عزّمت وباخذ من ديرتكم
ابو هادي ضحك ؛ تم اشر على اللي تبي ونخطبها لك
ابو سلطان ؛ اي والله صكيت الثلاثين ولا تزوجت
مسفر ؛ العزوبيه زينه شف مساعد ماتزوج الا يوم صك الثلاثين
ابو هادي بضحك ؛ شكلك بتلحق مسفر ومساعد ياهادي
هادي ضحك ؛ لا قريب ان شاءالله
مسفر ؛ اييه ايه قريب ، اقول من وين بتاخذ ياهادي
هادي ابتسم ؛ اذا استقرينا بالديره وفتحنا محلنا اشوف عاد
حمد ؛ وانا معه
ابو سلطان ؛ لا توك انت صغير فهد اكبر منك ولا يبي
حمد بطفش ؛ يييهوووه ابتلشنا ماتزوجنا عشان الشيبان اللي اكبر منا مايبون
الكل ؛ ههههههههههههههه
مسفر بضحك ؛ كنك تقصدني ولا انا غلطان
حمد ضحك ؛ انت وهادي وفهد ومعكم مساعد بعد اللي ماله سنه متزوج
ابو فواز ؛ والله اخذته منا بنت الديره بس اهم شي انه مرتاح ، الله يرزقهم الذريه الصالحه
الكل ؛ امين
ابو هادي بنوم ؛ والله اني دوّخت ها ياعيال مشينا
ابو سلطان ؛ والله انه بدري لاكن براحتك
ابو هادي ؛ الجايات اكثر ان شاءالله
ابو سلطان ؛ ودعناكم الله ولاتنسون تمرون علينا قبل تمشون
ابو هادي ابتسم ؛ اكيد ان شاءالله
وقام هو وهادي وحمد وطلعو بعد ماسلمو على العيال متوجهين للبيت
مسفر قرب وهو يضحك ؛ اقولكم شي
ابو سلطان وابو فواز ؛ قول
مسفر ؛ ماتحسون ان هادي يحب ؟
فواز ضحك ؛ يرجال اشغلت الآدمي ماخليته يتهنى بعشاه والحين تقول يحب
مسفر بتفكير ؛ ليه ماتهنى بعشاه لو كلامي مو صحيح كان ضحك وطنش
ابو سلطان بأستغراب ؛ طيب ليش ماتزوج اللي يبيها اذا هو يحب
ابو فواز ؛ يعني من الديره ؟
مسفر خبط المركى ؛ والله انيي قلته شكلها من الديره
فهد ؛ راحو لها من قبل ليه ماتزوجها ؟
مسفر ؛ لا ديرتهم هذي اول مره يروحون لها
ابو سلطان ؛ اجل وشلون يحب من ديره ماقد شافها ؟
مسفر استوعب ؛ ايه صح ، بس ولو يمكن كان يحبها وسكنت بديرتهم اللي بيروحون لها
ابو فواز ؛ لااوييين هذي ماتصير حتى بالحلم
مسفر ؛ ياخي اسمها محاسن الصدف ماتدري يمكن تصير صدفه صدق
ضحكوا ومسفر طنشهم وهو متأكد ان هادي يحب بنت من الرياض وكمل يقولهم تحليلاته وهم شوي يضحكون وشوي يصدقون ويستوعبون
..........••..........
بيت ابو راشد
اللي راحو كلهم ينامون بعد يوم طويل وحلو
وتركي بالحوش منسدح عند الدكه وفز من سمع صوت الباب وهو يشوف وحده طالعه وراحت لورا الحوش جهة قسم راشد وما انتبهت له تنهد وعرف انها منيره والتفت للباب وهو يشوف من تحته النور اللي تقفل وعرف انهم نامو رجع ينسدح وهو وده يطلع وهو يشوف الساعه اللي كانت 1:20 وشاف الوقت متأخر وجلس يفكر لحد ماغفى
•
داخل كلهم نامو وام عزام دخلت لغرفتها وهي تشوف شموخ نايمه شافت حرارتها للحين مرتفعه وهي تطلع لغرفة ام راشد ودقت الباب وطلعت ام راشد ؛ هلا هنوف عسى شموخ مافيها شي ؟؟
ام عزام ؛ حرارتها للحين مرتفعه عندك كمادات ؟
ام راشد ؛ ايه عندي تعالي
دخلت ام عزام واخذت الكمادات وقالت ام راشد ؛ اذا ماخفت خلينا نوديها المستشفى
ام عزام ؛ طيب ، الفجر اشوفها اذا ماراحت اوديها
هزت راسها ام راشد وطلعت ام عزام لغرفتها ورجعت ام راشد تنام
دخلت ام عزام وهي تحط لشموخ كماده وانسدحت تنام ....
شموخ ؛ يمهه ما ابيه تكفين .. الله ياخذك الله ياخذك
فزت ام عزام وهي تشوف شموخ تبكي وتحلم
ام عزام قربت ؛ شموخ! .. شموخ حلم وانا امك حلم
شموخ ؛ مابييه يمه مابيييه
ام عزام ؛ منهو!؟
شموخ ؛ زايد زايد الله ياخذك يا####
ام عزام انصدمت وهي تصحي شموخ ؛ شموخ
شموخ قامت وهي تسب وتهلوس وناظرت امها ؛ ليه تركضين
ام عزام بصدمه ؛ زايد ليه تسبينه
شموخ بعدت ؛ يييعع الله ياخذه الله ياخذه
ام عزام ؛ للحين تحلمين " وضربت خد شموخ بخفيف" صحصحي معاي
شموخ بتعب ؛ يمهه
ام عزام تنهدت وهي تعرف ان شموخ تتكلم من الحراره ؛ ها وش فيك
شموخ ناظرت امها بتعب ؛ ليه لازم اخذ زايد ؟ " ولد عمها "
ام عزام ؛ ماتبينه ؟؟
شموخ ؛ لا لا مابيه وحتى هو مايبيني
ام عزام وهي تسايرها ؛ ليه طيب
شموخ ؛ امه الله يا... سكتتها ام عزام ؛ لاتدعين تكلمي بدون ماتدعين
شموخ ؛ امه مابيها وهو مايحبني حتى انا ماحبه الله ياخذ وصيتكم مو ل... ام عزام رشت عليها مويه بشوي وهي تحاول تصحيها
شموخ بكت ؛ يييمهه
ام عزام انصدمت وهي تحضنها ؛ بسم الله عليك طيب تكلمي بدون ماتدعين تكلمي
شموخ ؛ مابيه
ام عزام ؛ انتي وافقتي
شموخ ؛ ععشان اببويي يمه تكفين
ام عزام ؛ ليه ماقلتي لأبوك مابيه ؟
شموخ ؛ ييزعل علي نفس ععزام ي... وغفت وهي تبكي وتتكلم كلام ماينفهم منه شي
رجعتها ام عزام تنسدح وهي تغطيها ؛ زين مانمتي عند البنات الله يصلحك بس
وانسدحت وهي تتذكر

" قبل ٢٤ سنه " .....

تفاعلوواا لطفاً ❤