ياديرةٍ ضمّت كل الأحباب

Part 12

اروى ؛ اخت عزام
ابو راشد ؛ اييه شوفيها ان بغت تجي بالسياره حياها الله
والتفت لتركي ؛ رح للمخزن هات العزبه هناك
هز راسه تركي وهو مو مستوعب وراح لمخزن اللي برا البيت بس بجنبه وهو وده يبوس راس اروى رغم انه مستغرب من نفسه ومايدري ليه يبي اخت عزام تروح معهم
وركضت اروى لأم عزام قبل تركب ؛ خالتي خالتي تكفين طلبتك قولي تم " تناديها خالتي احتراماً لها ولأنها تعودت عليها طول هالفتره وصارت هي وامها كأنهم خوات "
ام عزام ضحكت ؛ ابشري وش بغيتي
ام راشد ابتسمت ؛ تبي شموخ تركب معهم هي والبنات يروحون سوا
ام عزام ضحكت بصدمه ؛ لا لا خليها معي بالمزرعه تشوفينها مايمديك تشتاقين لها مسافة الطريق
اروى وهي تمثل الزعل ؛ خلاص اجل ماني رايحه
ام عزام ؛ طيب تعالي معنا انتي
هاجر جت من ورا اروى ؛ لا نبيها هي تجي معنا
ام عزام توهقت ؛ والله مافيه فرق بس بكيفكم
اروى ركضت هي وهاجر يسحبون شموخ اللي جت بتركب وتعثرت من سحبتها اروى بدفاشه
شموخ طارت عيونها ؛ يوييلي
ام عزام وام راشد ؛ هههههههههههه
سندوها اروى وهاجر وهم ميتين ضحك واتجهو لعبير وشريفه اللي واقفين عند سيارة ابو راشد
عبير ضحكت من ضحكهم ؛ شفيكم
هاجر اللي انكتمت من الضحك ؛ بناخذها معنا
شموخ استوعبت ؛ لحضه وين وينن
اروى ؛ معنا يالخبله انا وهاجر وعبير وشريفه وابوي
شموخ ؛ اصصبري ماسألت عزامم " والتفتت وهي تشوف عزام ونايف وسعد والبزارين حركو "
شريفه ؛ ماعلييك مايقول شي وش فيها لو رحتي معنا
شموخ اللي لفت وهي تشوف سيارة راشد حركت
عبير ضحكت على فهاوتها ؛ خلاص يبنت الحلال الناس راحت عادي ترا دقايق ونوصل
ضحكو هاجر واروى وشريفه وسحبوها وهم يمشون لسيارة ابو راشد وشافهم جايين وابتسم وهو يسلم على عبير وهاجر وشريفه اللي باسو راسه ؛ يامرحبا
عبير ؛ ياهلا يبه شلونك
شريفه وهي تسلم عليه ؛ مساء الخير شلونك يبه
هاجر ؛ مساء الخير يبه
ابو راشد ؛ ياهلا ياهلا مساء النور بخيير الحمدلله
اروى بضحك ؛ معنا اختنا الجديده
ضحكو وابتسم ابو راشد ؛ ياهلا بنيتي شموخ شلونك وانا عمك
شموخ ارتبكت وهي مو متعوده تكلم احد غريب ؛ ههلا هلا عمي بخير الحمدلله
ابو راشد بأبتسامه ؛ الحمدلله ، يلا يلا اركبو مدري وين راح تركي
اروى شهقت ؛ وش يبي
ابو راشد ضحك ؛ بيروح معنا
شموخ اللي بهاللحضه ودها الارض تنشق وتبلعها مسكت اروى وهي تقرصها وهمست ؛ حسسبي الله على عدوك لو رايحه مع امي احسن
اروى كتمت صرختها ؛ اعنننبو بليسك مادريت ان تركي معنا
شموخ ؛ وقفت على تركي الله لايعطي عدوك عافيه
ضحكت هاجر وهي تدفهم يركبون وجا تركي وهو يمثل انه مادرا ان شموخ معهم وقال بصوت عالي وهو يمشي للسياره ؛ ههلللا ومرحبا... قاطعته اروى وهي حاقده عليه ؛ هيه هيه اصبر اخت عزام معنا
تركي وهو يمثل الصدمه ؛ اوه مادريت ، شلونك عبير
عبير ضحكت ؛ بخير شلونك انت
تركي ؛ الحمدلله ، كيفك شريفه
شريفه ؛ الحمدلله تمام
تركي ؛ شلو..... قاطعته هاجر اللي كاتمه المها من قرصات شموخ ؛ بخير بخير كلنا اركب يلا
ضحكوا وضحك ابو راشد وهو مو فاهم شي وركب قدام هو وتركي
اما شموخ اللي شوي ويغمى عليها من الفشله وتقرص في هاجر واروى اللي كاتمين صياحهم وضحكهم
اما ورا كرسي تركي كانت عبير وبجنبها شريفه وبعدها اروى اللي بالنص وبعدها شموخ وبعدها هاجر اللي ورا كرسي ابو راشد بحكم ان شنطة السياره فيها الاغراض ماقدروا يركبون بالدبه
ومن حركوا وتركي وشموخ الوحيدين اللي متوترين من الصمت وبدت شموخ تطقطق اصابعها من التوتر وتركي بدون مايحس طق اصابعه واستوعبت شموخ وجمدت بمكانها ومحد ملاحظ لأن هم الوحيدين اللي مايفكرون بشي من الأرتباك اما اروى وهاجر مقهورين منه والباقي وضعهم طبيعي
قطع الصمت ابو راشد اللي قال وهو قريب البقاله ؛ وش تبون ناخذ
اروى ؛ اذا مافيه ماء هناك خذ لنا ماء وخذ عصيرات
هاجر ؛ ايه وبساكيت
ابو راشد ؛ والباقي
شريفه وعبير ؛ ابد والله سلامتك
ابو راشد ؛ وانتي يابنتي
الكل فهم انه يقصد شموخ وتركي اللي كتم ابتسامة انتصار وهو وده يسمع صوتها
اروى ؛ شموخ ابوي يسألك
شموخ بهمس ؛ سلامتك
صد تركي وجهه جهة شباكه بأبتسامه ماقدر يمسكها من قالت اروى اسمها ومن صوتها وعبير اللي كانت وراه ولاحضت ابتسامته واستغربت بس سكتت
ووقف ابو راشد عند بقالة مرزوق وهو يشوف سيارة نايف عندها وضحك بصدمه ؛ ياهالولد والله انه مصروع
تركي بضحك ؛ ياساتر هذا وهو ماشي قبلنا ، كم له دقيقه موقف عندها
ابو راشد ؛ والله مدري انزل انزل
نزلو تركي وابوه للبقاله
وصحت العنود بنت شريفه وهي تصيح
شموخ انجلطت ؛ لا لا تو تصيحين احلفي ؟ وينك من قبل شوي
الكل ؛ ههههههههههههههه
شريفه وهي تضحك ؛ يربييي من قبل شوي وانا اشوفك انتي واروى وهاجر تهاوشون بصمت
شموخ ؛ ييبنت والله حتى وانا اتنفس احس الكل يسمعني
عبير ضحكت وهي تسكت العنود ؛ انتي من الخوف تحسبين الكل يسمعك
شموخ ؛ خوف وبس ؟ والله اني شوي واموت
اروى وهي تناظر السياره ؛ اقول بس دام سيارة العيال موقفه ورا ماياخذون تركي
لفو كلهم يناظرون جهة البقاله
شموخ شهقت ؛ ييويلي عزام معهم
شريفه ؛ هذي اللي بذبحها والله عادي عاااادي
هاجر ؛ يالبلشه الله يعينهم البزران معهم ونازلين البقاله الحين ينسون واحد
انفجرو البنات ضحك وقالت عبير ؛ يوه الحين تلقين عيالي بجهه وسعد بجهه
شموخ وهي تشوف بنت راشد على الباب ؛ ييوه اميره طلعت لايكون ماشافووهاا
اروى ؛ لا الظاهر هذي مناير ، ابك لاتضيع
شريفه شافت تركي رجعها ؛ لا لا اشوا انتبهو لها
اروى ؛ يا راسي نايف لاينسى عيال راشد
عبير ؛ لا عاد نايف والله فطين
اروى ؛ وين فطين واميره مدري مناير ماشافها
ضحكت شموخ وهي تشوفهم طالعين ورا بعض ؛ شكل عمي ابو راشد طردهم
ضحكوا وهم يراقبون العيال ويحسبون البزران ويطقطقون عليهم لاينقص احد ناسينه
•
اما قبل بدقايق في البقاله
من دخل ابو راشد وتركي وهم يشوفون العيال متوزعين وكل واحد معه كيسه
ابو راشد ؛ ياولد
نايف التفت ؛ سم يبه
ابو راشد ؛ يلا يلا استعجلو هذا وانتو محركين قبلنا
سعد ؛ والله ياعم لو درينا ان البزارين بيأخرونا ماوقفنا
نايف وهو متقروش ؛ لو درينا ما اخذناهم اصلاً .... اميره امييره تعالي .... ابك ننناصر جبها لاتطلعع
تركي ضحك وهو يرجع اميره من برا
وعزام اللي جمعهم كلهم عند طاولة المحاسب ؛ اوووه يالبلشه ان كان هذي مسؤولية البزارين
سعد ضحك ؛ نشوف مسؤوليتك بعدين
اما نايف اللي ابتلش وصفهم طابور ؛ يلا يلا من الاكبر للأصغر ناصر هات كيسك
ضحكو وهم يشوفونه يحاسب اكياسهم
شال سعد خالد وهو يضحك ؛ ياعزتي لولدي حاطه اخر واحد هات كيسك وانا ابوك
واخذ خالد وهو يحطه فوق الطاولة ويحسب اغراضه
نايف اللي بعد مايحاسب لهم يوقفهم عند تركي ؛ تركي لحد يطلع نبلش فيه
ضحك تركي وكمل نايف يحسب اغراضهم
ابو راشد ؛ مرزوق خله حساب واحد
مرزوق ؛ ابشر
سعد لأبو راشد ؛ لاو.. قاطعه ابو راشد ؛ والله ماتدفع عندي وبدفعه مع اغراضنا مره وحده
وبعد ماخلصو قال ابو راشد ؛ يلا يلا اسبقونا للمزرعه وانتبهو لهم
الكل ؛ ابشر
وطلعو مع نايف وحركو للمزرعه
وابو راشد وتركي اخذو الأغراض وحاسب اغراضهم واغراض العيال وطلعوا
ومن ركبوا رجع الصمت لدقايق بعدها سمع تركي صوت العنود وابتسم وقال ؛ شروف عطيني عنوده
اروى دخلت راسها بين كرسي تركي وابو راشد ؛ لا مو لازم تطيحها الحين
تركي بينه وبين نفسه ؛ " والله لو مب جايبه شموخ كان عرفت وش اسوي فيك بس ماعليه نسكت "
ابو راشد ضحك ؛ لا لا ماتطيح ان شاءالله هاتيها
بعدت اروى ومدت شريفه العنود لتركي اللي التفت ياخذها واروى مالت على شموخ تغطيها وشموخ بغت تحب راسها على فزعتها
اخذ تركي العنود وانقهر من حركة اروى بس استوعب على نفسه ان ماله حق يلتفت وزين من ابوه انه سكت له
اما ابو راشد اللي صح ماوده تركي يلتفت بس ضحك عشان مايطيحها تركي على قولة اروى وقال بأبتسامه وهو يشوف العنود بحضن تركي ؛ ما شاءالله ، عقبال نشوفك شايل عيالك ياتركي
تركي ابتسم ؛ امين
اما البنات مع بعض وبدون قصد ناظرو شموخ بفهاوه وشموخ طارت عيونها بصدمه من نظراتهم وهي تناظرهم وماقدرو يمسكون ضحكتهم من استوعبوا فهاوتهم وادراكهم وانفجرو ضحك ملا السياره وكل وحده تحاول تمسك ضحكتها وابو راشد اللي ضحك يضن انهم فاقدين الامل يخليهم يزوجونه وقال ؛ ماعليكم دامه موافق قريب نزوجه
البنات اللي فعلاً راح تفكيرهم ان ابو راشد يقصد شموخ لتركي وشموخ فكرت نفسهم اما ابو راشد ماكان بباله احد وشموخ من استوعبت وهي شوي وتصفقهم وحده وحده وهي تشوف نظراتهم لبعض وضحكهم
•
وصلوا المزرعه بعد اطول مشوار بالنسبه لشموخ واسرع من البرق بالنسبه لتركي والباقي وضعهم عادي وقفت سيارة ابو راشد وهو يشوف راشد موقف والعيال اللي مبين مالهم وقت طويل وقفو عكس راشد اللي كان جاي قبلهم وام راشد وام عزام ومنيره مجهزين الجلسات عند خيمة الحريم وخيمة الرجال
ونزلو البنات من سيارة ابو راشد اللي نزل هو وتركي وراحو لجهة الرجال وشموخ مصدومه من جمال المزرعه اللي ماتوقعته من الخضار اللي بكل مكان وبيت الشعر اللي جالسين فيه امها وام راشد ومنيره والنار بالنص وخيمة الرجال اللي وراهم فيها العيال والبزران اللي يركضون ويلعبون والجو اللي كان غيييم مو مبينه فيه الشمس رغم ان الوقت العصر وكان المكان نفس الحلم من جماله وللجهه الثانيه من المزرعه اللي كان فيه شبك كبير من بعيد ومبين ان داخله غنم ومواشي ثانيه مو مبينه انتبهت من سألتها اروى ؛ ها شرايك
شموخ ؛ تتجننن ما شاءالله
عبير ؛ الله متغيره عن قبل
شريفه ؛ مرره صايره احلا
هاجر ؛ ييوه انتي نسيناك امشي امشي لاتذبحنا امي
ضحكت شريفه ومشت وعبير شالت العنود واتجهوا للخيمه وهم يسلمون عليهم ؛ سلام
ام راشد و ام عزام ومنيره ؛ وعليكم السلام
ام راشد ؛ تعالي تعالي شريفه اجلسي ، عبير عطيني العنود
عبير وهي تمدها لها ؛ الله الله نسيتينا
ضحكت ام راشد وقالت هاجر ؛ متى جيتو ؟
منيره ؛ قبل ربع ساعه جهزنا الجلسه الين ماوصلتو
اروى ؛ والعيال ؟
ام عزام ؛ تو قبل لاتجون بخمس دقايق
ام راشد ؛ ايه تأخرو ليه ؟
ضحكو البنات وقالت عبير ؛ لقيناهم عند البقاله مابغوا يطلعون
هاجر تذكرت ؛ ييوه الأغراض بالسياره يلا بنات قومو ننزلهم
اروى قامت هي وشموخ وراحو مع هاجر لسيارة ابو راشد يجيبون الأغراض ووقفتهم اروى وهي تأشر لهم على جهه ؛ بنات شرايكم نروح جهة الزرع
هاجر ؛ لا اصبري بنروح كلنا بعد شوي
اروى ؛ امشوا بس عادي نروح الحين وبعد شوي
شموخ مسكتها ؛ لا لا يبنت اخاف نضيع
اروى ضحكت ؛ ويين نضيع حافظتها زي اسمي يلا بس يلا
مشت اروى ولحقوها هاجر وشموخ ودخلو بجهة الشجر وركضت اروى مبسوطه وهي تشوف العنب كثير وما انتبهت للسلك الحديد اللي ممدود وتعثرت فيه وطاحت ؛ ااااهه خشمي
ضحكو هاجر وشموخ وانصدمو من بكت اروى وركضو لها وهم يرفعون رجولهم عن السلك الحديد واتجهو لأروى اللي تبكي من الألم وخشمها دم وشموخ تسحب المناديل من جيبها وتحطهم على خشم اروى وهاجر تسندها تجلس على جنب
•
قريب منهم كانو تركي ونايف يجمعون حطب ووقفو من سمعو صوت الصراخ والضحك
تركي ؛ بسم الله وش ذا الصوت
نايف وقف ؛ ورانا من جهة الشجر
تركي ؛ تعال تعال نشوف
مشى تركي ووراه نايف با الفاس وضحك تركي من شاف نايف ؛ ياولد حطه مافيه شي محد يجي هنا
نايف ضحك وحطه ومشوا بشويش ورا الصوت
وشهقت شموخ من شافت ثنين من بين الشجر وهي تدق كتف هاجر وتأشر لها وماكانت اشكال تركي ونايف مبينه وخافت هاجر وهي تقوم اروى بهدوء وصرخت شموخ ؛ اركضوووو جني جني
فزت هاجر وسحبت اروى وركضت فيها ورا شموخ اللي من الخوف نست السلك الممدود وما انتبهت وطاحت فيه وطاحت فوقها هاجر واروى اللي زاد صياحها وهي ماتدري وش السالفه
اما تركي ونايف اللي عرفو هاجر واروى والثانيه توقعوها عبير لاكن تركي حس انها شموخ بس استبعد من شافها ناظرته وصدت وهو مايشوفها زين وتوقعها عبير وركض لهم هو ونايف من شافهم يركضون ويصارخون يضن ان فيهم شي مايدري ان خوفهم منهم وانفجرو ضحك من طاحو على بعض ونايف ناداهم وهو ميت ضحك ؛ اننااا انا وتركي وقفووو
فزو البنات واخذت اروى الحجر وهي تحذفه عليهم وتبكي
اما شموخ اللي منظرها لاتحسد عليه كل عبايتها تراب وطيحتها مصيبه ثانيه
وهاجر اللي قامت وهي تضحك من الخوف وتقوم شموخ اللي تكسرت منهم
ووقفت شموخ ورا الشجره وهي تبكي من الفشله
وهاجر اللي راحت تمسك اروى وجلستها وجلسو تركي ونايف وهم يضحكون
نايف وهو يدمع من الضحك ؛ ععبييير تعالي تعالي
هاجر التفتت وهي تحسب عبير جت وضحكت بتعب من عرفت انه يقصد شموخ ؛ ابك هذي اخت عزام مب عبير

.... تفاعلو لطفاً 🙏🏻

{ اللهم صل وسلم على نبينا محمد }