ياديرةٍ ضمّت كل الأحباب

Part 30

..........••..........
بيت ابو هادي
بعد صلاة المغرب جالسين بالصاله وام هادي بالمطبخ
ابو هادي ؛ بكره الصباح يمكن نروح لجدانكم وعاد ماندري متى نجي العصر ولا بالليل
حمد ؛ والسوق متى نخلصه ؟
ابو هادي ؛ والله الظاهر توه انا اقول نزور اهلنا بكره وبعدها نتفضى له
هادي ؛ اي والله لاحقين عليه اهم شي نسير على جدي لو يدري اننا جايين من يومين بيزعل
شهد ؛ بكره الساعه كم نروح ؟
ابو هادي ؛ يمكن ٩ ونص ولا ١٠
شهد ؛ ٩ ونص عشان نوصلهم الساعه ١٠ بس كأنه بدري ولا ؟
ام هادي ؛ لا لا يقومون من الفجر
شهد ؛ وخالاتي وبناتهم كلهم بيجون ؟
ام هادي ؛ ايه كلهم بالديره معنا وقت للعصر نشوفهم ان شاء الله
ابو هادي ؛ لا يمكن نجلس لليل ونرجع
هادي ؛ ايه اييه بالليل احسن من زمان عنهم
حمد ؛ طيب يمكن تستمر الامطار هنا لبكره خلنا نعزمهم
ابو هادي ضحك ؛ ترا الديره بجنبنا حتى المطر جاهم
حمد ؛ يمكن هنا اكثر ولا هناك شمس
ام هادي ضحكت ؛ يقولك جنبنا نفس الجو بس انا ادري تبي تجلس هنا ماعليك نرجع
حمد ضحك وقال ابو هادي ؛ حبيتوها ؟
الكل بصوت واحد ؛ ايه
ضحكوا وضحك ابو هادي ؛ الحمدلله
شهد ؛ بس الشيء الوحيد اللي ماحبيته النت فيها ضعييف ، الا مايشتغل ابد
هادي ؛ اييه وانا احسب جوالي معلق طلع من الشبكه
حمد ؛ خلو عنكم النت والجوالات بس اللي بهالديره ينفع بس يتأمل
شهد ضحكت ؛ وش يتأمل ؟
حمد ضحك بصدمه ؛ جوها جوها
ضحكوا وقالت شهد ؛ اييه جوها صادق حق تأمل
ام هادي ؛ اجل قومي تأملي معي العشاء عشان ننام
ضحكت شهد وقامت مع امها للمطبخ
..........••..........
بيت ابو راشد
بالدوانيه كانوا متسدحين حول النار وناصر وعبدالله يلعبون عند الباب
وجا ناصر وهو يجلس عند ابوه ؛ بابا متى نروح نجيب امي من بيت جد
راشد ؛ شوي بعد العشاء نروح ناخذهم
هز راسه ناصر ورجع يلعب
وعزام كان على جواله وانتبه للتاريخ اللي كان بعد يومين موعد امه بالمستشفى وقام للحوش وهو يدق على شموخ وردت ؛ هلا
عزام ؛ هلا شموخ امي عندك ؟
شموخ ؛ لا بالصاله وانا بالغرفه ليه ؟
عزام ؛ موعدها الخميس
شموخ وهي تشوف التاريخ ؛ اييه بعد يومين نرجع الجبيل ولا كيف ؟
عزام ؛ ايه مانقدر نأجله قولي لها شكلها ناسيته وبنروح للجبيل بكره بالليل ولا بعده لازم الخميس الصباح نكون بالمستشفى
شموخ شدت على يدها بقهر ؛ ططيب ماودي نرجع للجبييل
عزام ضحك ؛ ليه جازت لك الديره ؟
شموخ ؛ اي والله تكفى مايتأجل للأحد الجاي على الاقل
عزام ؛ لا لا مانقدر تتعب امي نرجع لها الديره ونسوي تمايم العنود فيها بعد اذا تبين
شموخ ؛ طيب ، خلاص بكلم امي وادق عليك بعد شوي
عزام ؛ طيب يلا ، وقفل ورجع للدوانيه
وشموخ تنهدت بضيق وهي ماودها تترك هالديره وترجع للجبيل وتكون لحالها ولا عندهم احد
وقامت للصاله اللي فيها امها ، وعبير واروى مع ام راشد بالمطبخ وشريفه بغرفتها وهاجر تغسل الملابس وجلست عند امها وقالت ؛ يمه التاريخ اليوم ١ من الشهر وموعدك ب ٤/٤ يعني من بكره يصير بعد يومين
ام عزام تذكرت ؛ يخييه نسيته
شموخ ؛ عاد عزام يقول لازم نروح بكره ولا بعده
ام عزام ؛ اليوم وشو !
شموخ ؛ الأثنين
ام عزام ؛ وهو الخميس ؟
شموخ ؛ ايه
ام عزام وهي تحسب ؛ يعني بكره ٢ وبعده ٣ وهو الخميس ٤
شموخ ؛ يمه مايتأجل ؟
ام عزام ضحكت ؛ ليه نأجله ؟
شموخ ؛ مدري ماودي نتأخر على مواعيدك بس الديره حلوه ييمه
ام عزام ؛ والله انها حلوه بس خلاص وانا امك كم صار لنا وحنا عندهم ماودي نثقل عليهم
شموخ سكتت وهي ودها تجلس اكثر بس شافت ان امها معها حق ؛ صح لنا ١١ يوم عندهم
ام عزام ؛ ايه خلاص يا امي الضيف ٣ ايام وحنا قعدنا عندهم واجد
شموخ ؛ يعني متى نروح ؟
ام عزام ؛ مدري والله بكلم عزام وهو يشوف
شموخ ؛ وشريفه ماتروح معنا ؟
ام عزام ؛ بشوفها بس ماضنتي تقول انها بتجلس الأربعين عند امها مالومها يتعبها السفر
شموخ هزت راسها ؛ اجل اكلم عزام بعد شوي واقوله
ام عزام ؛ لا خليه انا ادق عليه شوي
هزت راسها شموخ وهي تتفرج على التلفزيون
..........••..........
بعد العشاء ببيت ابو هادي
بالصاله وعلى التلفزيون وقال ابو هادي ؛ خلاص ناموا عشان بكره نروح لجدانكم
هادي ؛ ايه يلا عشان مانتأخر
حمد ؛ قلت لهم اننا جينا ؟
ابو هادي ؛ لا ادق عليهم الصباح
ام هادي ؛ ايه يلا ناموا عشان بكره مافيه غفوه العصر يمكن نقعد هناك لليل
شهد ؛ ليه ماننام عندهم ؟ والله استانس مع البنات كلهم هناك
ابو هادي ؛ المرات الجايه ان شاء الله ، يلا ناموا
وقام للغرفه وهادي راح لغرفته ينام
ام هادي ؛ شهد انتي وحمد ناموا بدري مافيني حيل بكره اقومكم ساعه
ودخلت للغرفه وقال حمد ؛ ليه مانروح العصر طيب فيه احد يسير الصباح
شهد ؛ خلاص انثبر هنا ونسير الصباح وانت الحقنا العصر
حمد ناظرتها بأستهزاء ؛ اقول بس الدنيا مطر والجو مايتطوف ابطلع
شهد ؛ واناا تتكففى بطلع
حمد رد لها الحركه ؛ انثبري هنا وبكره تلحقيني
شهد ؛ امززح ياخي خلنا نطلع
حمد ؛ ودي بس وين ؟
شهد ؛ نمشي برا فرتين ونرجع
حمد ؛ ٥ دقايق ماجهزتي بنام
وفزت شهد وهي تركض الغرفه وضحك حمد وهو يقوم وطلعت شهد بعبايتها وفتح حمد باب الحوش وسمعت شهد الصوت وتحسبه بيسحب عليها وركضت وهي لابسه نص العبايه وهي تطلع للسيب وتركض للباب اللي تو فتحه حمد والتفت على صوت الركض وشاف بالضلمه سواد وصرخ وهو ينخرش ؛ الله يخلللععع راس... مسكته شهد وهي تسكته وهي تضحك وماتدري تكتم صوت ضحكتها ولا صوت صرخته ؛ اسسكت ههههههههههههههههه وين وين بتسحب علي هاه
حمد مسك قلبه ؛ طيرك الله طيرتي قلبي جوالي طاح دوريه دوريه
وشهد اخذت جواله من الارض وهي ميته ضحك ؛ هذا هو احسبك بتنحاش وجيت اركض
حمد ؛ انتي لو تشوفين شكلك وانتي تركضين بالضلمه مدري وش اللي جاني جني ولا وشو والمشكله ركضتك مالها صوت
شهد ضحكت ؛ اركض على اطراف اصابعي عشان لايسمعون وانت فضحتنا بصيحتك
حمد دفها ؛ امشي بس محد بيفضحنا الا انتي
ضحكت شهد وهي تعدل العبايه وطلعت وسكر حمد باب العماره ؛ شهد مافيه صوت وين نروح هالحزه
شهد ؛ مدري يمكن يجينا شي
حمد ؛ خلاص خلينا نرجع اصلا برد
شهد ؛ اقول بس ايه برد يالخواف امش نروح بالسياره
حمد ؛ وين نرروح
شهد ؛ اركب ونفتر عاد
وركب حمد سيارته وشهد معه ؛ اوووه اشتقت لسيارتي موقفه لها يومين
شهد ؛ اسمع خلنا نمشي بالديره ولا نروح مع الشارع هذا اللي ورانا ونرجع قبل ١١
حمد ؛ يلا ندور مكان ونروح له
وحركوا وهم بس يبون يطلعون لأي مكان
..........••..........
بيت ابو راشد
بعد العشاء داخل عند البنات
كلهم بالصاله وقالت ام عزام لأم راشد اللي بجنبها ؛ يوم الخميس عندي موعد بمستشفى الجبيل ويمكن بكره ولا بعده نروح
ام راشد ؛ صادقه ؟ يخيتي والله ماشبعنا منكم ، سلامات عسى ما شر
ام عزام ؛ ياحبيبتي والله حتى حنا بس لازم موعد للقلب وعندي مراجعات للسكر
ام راشد ؛ سلامتك ، بس اخاف تبطون علينا
ام عزام ؛ الله يسلمك لا ان شاء الله نجي على خير بس مدري شريفه تجي معنا ولا بتقعد هنا
ام راشد ابتسمت ؛ لاوالله تبي تقضي النفاس هنا وماودي تتعبك ان شاء الله تجيكم بعدين
ام عزام ؛ ان شاء الله ، بكلم عزام اشوف متى نمشي
ام راشد هزت راسها وقامت ام عزام لغرفتها تكلم عزام
ام راشد التفتت لشموخ اللي على التلفزيون هي والبنات ؛ اجل بتروحون ياشموخه
شموخ التفتت لها ؛ اي والله ياخالتي عشان مواعيد امي
عبير ؛ وين بيروحون ؟
ام راشد ؛ للجبيل بكره ولا بعده تقول ام عزام عندها موعد الخميس
اروى لشموخ ؛ ليه ماقلتيي لي
شموخ ؛ والله قبل شوي قاله عزام
عبير ؛ شريفه بتروحين ؟
شريفه ؛ لا بجلس طول النفاس هنا
ام راشد ؛ ايه عندي مابيها تتعب ام عزام
شموخ ؛ يووه والله بشتاق لكم
هاجر ؛ لاززم تروحون ؟؟
شموخ ضحكت ؛ ماودي والله بس مانقدر
اروى ؛ ايوه ومتى نشوفكم المره الجايه ؟؟
شريفه ابتسمت ؛ بتمايم العنود بنسويه بالديره
شموخ ؛ صصدق ؟ قاله عزام بس توقعت يمزح علي
شريفه ضحكت ؛ لا صدق وان شاء الله شهر بالكثير وتجون مره ثانيه
شموخ ؛ وبترجعين معنا اكييد
شريفه ابتسمت ؛ ان شاء الله
اروى ؛ هييه تكفون توها الأجازه وين بتروحونن
شريفه ؛ اقولك شهر عندك يعني بتطفشين مني
عبير ؛ وانا اسبوع بالكثير وبرجع تبوك مابتشتاقون لي ؟؟
هاجر ؛ ويين انتي بعد وشو اسبوع ؟؟
عبير ؛ ترا لي ١٠ ايام وتقريباً ٥ ايام وبنرجع يعني ١٥ يوم يمديكم تشبعون
ام راشد ضحكت ؛ ماعليك يجون كلهم بالتمايم وتجي خالتك ام سعد وخوالك وترجع ام عزام وشموخ ويجون عماتك وكلهم وحتى عيسى يمكن يكون موجود
اروى ؛ ياليت بس والله شهر كثيير
هاجر ؛ شريفه مو لازم بعد الأربعين تصير التمايم عادي قببله خلينا نجتمع كلنا
شريفه ضحكت ؛ والله انا ابي بعد النفاس
ورجعوا يتفرجون واروى وهاجر ماودهم يروح احد وشموخ تنهدت وهي بعد ماودها ترجع للجبيل
•
قبل بدقايق بالدوانيه
قام راشد هو وناصر واخذو معهم عبدالله وراحو لبيت اهل منيره يرجعونهم
وتركي ونايف وسعد عند النار وابو راشد يسولف لهم ودق جوال عزام وهو يقوم للحوش ؛ هلا يمه
ام عزام ؛ ها ياحبيبي ، الموعد الخميس ؟
عزام ؛ ايه وترا لازم نروح له
ام عزام تنهدت ؛ خلاص اجل بعد بكره الصباح ولا العصر بكره بجهز الاغراض
عزام ابتسم ؛ كنكم ماتبون الروحه ؟
ام عزام ابتسمت ؛ اي والله ياحلو هالديره ماشاء الله حتى شموخ ماودها تتركها وترجع الجبيل
عزام تنحنح ؛ شموخ ماتبي الجبيل عشان هذاك الموضوع يايمه مالنا سالفه الا هو
ام عزام بضيق ؛ الله يكتب اللي فيه الخير وانا امك
عزام ؛ امين ، يلا اجل نامي وارتاحي وبعد بكره نروح
ام عزام ؛ ان شاء الله
عزام ؛ تصبحين على خير
ام عزام ؛ وانت من اهله ، وقفلت ورجعت للصاله
وعزام رجع للدوانيه ودخل وهو يجلس عند النار ؛ بعد بكره برجع للجبيل
ابو راشد ؛ اففا ليه ماتقول اجازتك شهر ؟؟
عزام ابتسم ؛ الا بس الوالده عندها موعد الخميس والأربعاء ان شاء الله نروح
تركي ونايف ناظروا بعض بسرعه وقال ابو راشد ؛ اييه سلامات اجل ترجعون ان شاء الله وحنا ترا ببداية العطله
عزام ؛ الله يسلمك ان شاءالله نشوفكم مره ثانيه
تركي شد على يده بقهر انه ماكلمها وماعنده فرصه الا بكره مايدري يقدر ولا لا وانتبه له نايف وهو يتنحنح وتنهد تركي وهو يفكر
..........••..........
بشوارع الديره
عند حمد وشهد اللي وقفوا عند محطه من مالقوا مكان يروحون له
حمد ؛ ماهو حاصل الا البقاله هذي خلينا ناخذ شي ونرجع
شهد ؛ يعني نص ساعه وحنا نفتر واخرتها للبقاله
حمد نزل ؛ انزلي نشوف مكان بعدها
ونزلوا للبقاله ودخلوا ومافيها الا العامل واخذوا لهم اغراض ينقنقون عليها
وطلعوا بعد ماخلصوا وهم يركبون السياره وحركوا
حمد ؛ شرايك نجلس عند الجبل هذاك
شهد ناظرت للمكان اللي يأشر له حمد ؛ لا ييويلك بعييد وقف هنا هنا نجلس على ذا التراب ونشوف النجوم
حمد ؛ وش تشوفين مافيه الا غيوم ولا فيه قمر
شهد ضحكت ؛ شدعوه انا موجوده
حمد وهو يمثل القرف ؛ يياكبدي بس خليني اشرب هالعصير لاتنسد نفسي
شهد ؛ اقول اسكت ووقف معك فرشه ؟
حمد ؛ ليه وش انا رحاله ... الا اصبري فيه بطانيه مدري بطانيتين مانزلتها بالشنطه
شهد ؛ يلا انزل وافرشها لنا ونتكي ونسولف
حمد نزل وهو يفتح الشنطه واخذ البطانيه وهو يفرشها وشهد نزلت اكياسهم وهي تجلس ؛ برد صح
حمد ؛ فيه بطانيه ثانيه خليني اجيبها لاتموتين علينا من البرد
ضحكت شهد وهي تتكي على سياره حمد اللي وراهم وفرشتهم بجنبها وجاب حمد البطانيه وحطها على كتفها ؛ قولي شكرا
شهد بضحك ؛ شكرا
حمد ؛ العفو ماسويت شي
شهد ؛ تعال تعال اجلس هنا وخذ نص لاتموت ماعندي احد يرجعني
حمد التفت لها بصدمه ؛ لا يالورع ماهمك الا الرجعه
شهد ضحكت ؛ لا لاامزح خذ بس ، اقول شرايك تعلمني السواقه
حمد ؛ بالله ؟ بسيارتي ؟ الجديده ؟
شهد ؛ يالليييل اشغلتنا كأن محد شرا سياره الا انت ماعليك علمني زين ومايصير لها شي
حمد ؛ خلاص افكر
شهد ؛ لا ابي الحين وحنا راجعين تعلمني
حمد ؛ ووش لي ؟
شهد ؛ اللي تبي وش ؟
حمد ؛ والله مدري وش ابي
شهد ؛ خلاص اذا قررت يصير خير قل تم
حمد ؛ تم .. اشوف وشو ذا البطاطس ما اخذتي لي نفسه
شهد ضحكت وهي تعطيه حقه ؛ الا هذا لك حاط عينك على حقي
ضحك حمد وهو ياكل ؛ شهد لو شي ودك تغيرينه بهالديره وشو ؟
شهد ؛ ااا مدري النت
حمد ؛ غيره
شهد ؛ بس
حمد ؛ تدرين ان هذي الديره من يوم ماعرفت اسمها وقصتها احس انها شي غريب بس حلو يعني كل شي فيها قديم ابد ماهي نفس باقي الديار هذي بيوتها قديمه والناس زي اول ويعني مافيهم تصنع ولا كذب تحسين انهم اللي للحين باقي من زمان
شهد ؛ الصدق اي والله حلوه وكأنك عايش مع جدانك اول بزمانهم
حمد ؛ اي والله الا جداني ليه ماسكنوا فيها
شهد ؛ مدري مو ديرتهم اقدم من الديره هذي ؟
حمد ؛ الا، يعني ماطلعوا عن ديرتهم من وهم صغار
شهد ؛ ايه هم بديرتهم اللي انولدوا فيها
حمد ؛ طيب لو يرجع فيك الوقت تبقين بالمدينه ولا تكونين ساكنه هنا ؟
شهد ؛ هنا عشان الجو والناس والديره والمدينه عشان الدراسه والطلعات
حمد ؛ الله والدراسه ليتك فلحتي
شهد ؛ شفف من يتكلم يا ابو ٤ مواد انت مابغيت تتخرج
حمد حط البطاطس ؛ انا عارف نفسي لاتسدين نفسي وتذكريني بس انتي نجحتي وش سويتي بعدها ؟
شهد ضحكت ؛ لا امزح كل خلاص ماسويت شي يمكن اتوظف
حمد ضحك ؛ ووين تتوظفين ان شاء الله ؟ بديرة ابو صالح ولا هنا ؟
شهد ؛ لا امسك مكانك بمحل ابوي
حمد ؛ يحليييلك تبطين
شهد ؛ اقول تعرف تبيع ؟ ماتحس انك بتخسرهم
حمد ؛ لا والله متأكد اني بخسرهم ولا اعرف ابيع بس يمكن اتعلم
شهد ؛ لا والله الا طفرنا
حمد ؛ ان طفرنا تمسكين مكاني على قولتك
شهد ضحكت وبعد دقايق من الطقطقه على بعضهم شافت شهد الساعه ؛ خلاص قريب ١١ خلنا نرجع
حمد ؛ يلا قومي
شهد ؛ وترا انا اللي بسوق
حمد ؛ والله نعسان خليها بكره
شهد ؛ لا تكفى الحين الشارع فاضي ومافيه احد خلني اتعلم براحتي
حمد ؛ يبيلها وقت مابتتعلمين لو نقعد للفجر
شهد ؛ اتعلم شوي لين نوصل للبيت بعدين ترا اعرف شويه يعني مابتتعب وانت تعلمني
حمد ؛ طيب قومي لا انفضك مع هالفرشه وشيلي الاغراض
شهد قامت واخذت الاكياس وحطتهم بالسياره وحمد شال البطانيات وحطهم بالشنطه وركبت شهد مكان حمد
حمد وهو يركب بجنبها ؛ اشهد ان لا اله الا الله
شهد ؛ يربيي ياخي ماعليك مشينا بس
حمد ؛ شوي شوي واذا قلت وقفي وقفي شوي شوي مهو مره وحده وتهبدين راسي بالقزازه
شهد ضحكت ؛ طيب يلا
حمد شغلها لها وداست شهد بنزين وهي تمشي شوي شوي
حمد بخوف ؛ اصبري اصبري خليني اطلعك من هاللفه وبعدها ترجعين تكملين سيارتي ابيها تكفين
شهد ؛ لا ماعلييك والله اعرف وبمشي بشويش ومايصير لها شي ان شاء الله
حمد وهو يمسك الديركسون ؛ انا بلفه وانتي دووبك تدعسين
شهد ضحكت وهي تلفه معه وطلعت من اللفه ؛ شفت
حمد تنهد ؛ شفت يلا انزلي
شهد ؛ لاا وين للبيت
حمد ؛ البيت ١٥ دقيقه والله ماسقتيها
شهد ؛ والله ان اسوقها وترا الطريق واحد مافيه زحمه ولا شوارع منا ومنا
حمد ؛ انا ليه ماخمدت وش قردني اطلع
شهد ضحكت ؛ اصبر بس وتعلم
حمد صار يناظر الطريق وماسك الديركسون وعلى اعصابه ومشت شهد لحد ماوصلوا لشارع بيتهم
حمد ؛ الحمدلله اللي وصلنا سالمين
شهد بضحك ؛ يلا باقي اسفطها بالمظله وخلااص
حمد ؛ لا لا خلاص والله ان تسفطينا بالجدار سيارة ابوي وهادي يمينك ويسارك ان شطبتيهم شطب بس رحتي فيها
شهد ؛ ان ماوخرت بدعس وادبسك بالجدار
حمد ؛ ششههد وقفي ماتعرفين انا اسفطها
شهد ؛ هه هه شف بس اناظر سيارة ابوي وهذي هي بينا مسافه وهادي بعد خلااااص وهذا الجدار مادبسنا فيه شفت والله اني سواقه
حمد تنهد بتوتر ؛ اخر مره اخليك تسوقين
شهد ؛ على سيارتك لاكن المره الجايه بكون بسيارتي
حمد ؛ ايه يصير خير انزلي بس
ضحكت شهد وهي تنزل وقفل حمد السياره ودخلوا للبيت بشويش عشان لايصحى احد وراحوا لغرفهم ينامون