ياديرةٍ ضمّت كل الأحباب

Part 28

..........••..........
بالسوق
اللي بدا يفضى شوي شوي وام هادي وشهد وقفوا عند محل ابو هادي وابو هادي وهادي وحمد قاعدين فيه ويتكلمون
ام هادي ؛ السلام
ابو هادي وهادي وحمد ؛ وعليكم السلام
حمد بمزح ؛ مافتحنا يا اختي مانبيع شي
ضحكت ام هادي وهي تحط اكياسها هي وشهد عند الباب ؛ بس حلو ما شاءالله حتى وهو فاضي
ابو هادي ضحك ؛ كننا غيرنا عن الأثاث
ام هادي ؛ لييه
ابو هادي ؛ مساعد يقول كنب وغرف نوم يفصلونهم تفصيل مايشترونهم والزل والسجاد يمشي بس لازم تحط زل للأجار عشان ياخذونهم بالأعراس والعزايم
شهد ؛ خله تفصيل طيب وحط سجاد للأيجار
هادي ؛ المشكله وين نلقى عمال يفصلون
ام هادي ؛ اسأل عمال السوق اكيد يعرفون بعض
ابو هادي ؛ والله اني انحست توقعون يمشي ؟
حمد ؛ انا اقول نشوف سوق الزل اللي برا الديره وكيف بيعه ووش يشترون الناس ونستفيد منه
ابو هادي ؛ ونسوي نفسه يعني ؟
حمد ؛ اييه بس هذا سوقنا بديرتنا وهذاك سوقهم
هادي ؛ الله الله ديرتنا
ضحكوا وقالت ام هادي ؛ والله قبل شوي مريت من عند وحده تبيع فرشات حوش صغار ويشترون منها وحلوات وسوق يبيع مساند ومخدات والله حلو وزحمه
ابو هادي ؛ نبقى على الأثاث بس
ام هادي ؛ ان طعتوا شوري اي والله انه ماشي
شهد ؛ كل شي بهالسوق ماشي ما شاء الله يبه تخيل كل محل زحمه الناس عنده حتى واحد يبيع تمر ومزحوم الله يرزقه
ابو هادي ؛ اميين ماشاء الله السوق زحمه دايم والناس واجد
حمد ؛ ايه انتي تمشين وانا امتر هنا واقيس
ضحكوا وقالت شهد ؛ الحين نطلع وتمشي وذقت حلاو عند محل هنا ورببي يجنن اخذت لك منه انت وابوي وهادي
حمد ؛ ايييه اذا على كذا سامحتك
ابو هادي ضحك ؛ يلا يلا مشينا ويمكن العصر اشوف سوق الزل اللي برا وبكره نبدا شغلنا ونشوف عمال
وقاموا كلهم واخذو الاكياس اللي حطتهم ام هادي على الباب وكل واحد شال شي وطلعوا برا المحل وسكره ابو هادي وراه وهو يقفله
شهد ؛ يبه اللوحه مكتوب فوق ابو فارس للأقمشه والملابس الجاهزه
ابو هادي وهو يناظر لوحة المحل ؛ ايه كان لواحد وباعه نطلعها بعدين اذا بدينا
ومشوا طالعين من السوق
•
محل ابو راشد
كان هو وعزام وسعد وعياله عبدالله وترف
ابو راشد ؛ والله اني مدري وش اخره تركي
عزام ؛ والله ياعم جيت البيت مالقيت احد احسبه راح للمحل
سعد ؛ يمكن برا الديره راح لسوق ولا مكان
ابو راشد بعصبيه ؛ ولا يرد يدق جواله بس مايرد
عزام ؛ ماعليه تلقاه ناسيه بالبيت ولا بأي مكان ، نرجع البيت ولا نحتري للصلاه
ابو راشد ؛ لا لا بنرجع يسكره عبد السلام
وقاموا وقال ابو راشد ؛ عبد السلام وقت صلاه قفل محل وارجع العصر انت وعمران خلي نواس بالمزرعه عشان بروح لها العصر
عبد السلام هز راسه ؛ ان شاء الله
وطلع ابو راشد والعيال وركب كل واحد سيارته وراحوا البيت
وابو هادي واهله طلعوا لسيارتهم وحركوا لبيتهم بعد
ومن وصلوا ووقفوا مع بعض نزل ابو هادي وهو يلتفت لأبو راشد اللي نزل وسعد وعزام وراه ؛ مسهم بالخيير
ابو راشد من بعيد ؛ هلا ومرحبا مساء النور
سلموا على بعض من بعيد ودخلوا كلهم وابو هادي وعياله نزلوا اغراضهم ودخلوا هم بعد
..........••..........
بيت ابو راشد
دخل ابو راشد وسعد وعزام والدوانيه مافيها احد
ابو راشد بأستغراب ؛ نايف طلع وينه لا جا المحل ولا هو هنا !
سعد ؛ ندق عليه يمكن تركي معه ؟
ابو راشد ؛ دق خلنا نشوفهم
دق سعد وهو يشوف جواله بمكالمه ؛ بخط ثاني
ابو راشد ؛ ارجع دق عليه
ودق سعد ورد نايف بعد دقايق ؛ هللا سعد
سعد ؛ وينك ؟
نايف ؛ ببالمزرعه
سعد ؛ وتركي وينه
نايف ؛ عندي
ابو راشد كان يسمعه وقال ؛ وليه مايرد وانت من تكلم !
نايف ؛ جواله اا بالسياره وحنا عند الغنم وككنت اكلم مشاري اسأله عن اوراق
ابو راشد ؛ تعال اجل انت وياه
نايف ؛ شوي يا ابوي نبي نشوف الغنم يمكن نتأخر
ابو راشد ؛ طيب وقل لنواس لايروح المحل خل عمران يروح يعاون عبد السلام نواس ابيه العصر
نايف ؛ ابشر الحين اقوله
ابو راشد ؛ تتغدون هناك ولا تجون
نايف ؛ لا لاتحترونا نتغدى ونجي شوي يبه
ابو راشد ؛ زين
وقفل سعد وهو يجلس ؛ قلت لك ياعم متعودين على تركي دايم يطلع
ابو راشد جلس ؛ ايه بس يرد لو ندق عليه
•
داخل كانوا كلهم بالصاله واروى وام راشد بالمطبخ يحطون الغدى وخلصوا وشالت ام راشد الصحن ؛ نايف وتركي مالهم حس ولا جو ياخذونه بروح اوديه واشوفهم
اروى هزت راسها وطلعت ام راشد للدوانيه وهي تدخل ؛ السلام عليكم
ابو راشد وسعد وعزام ؛ وعليكم السلام
ام راشد حطت الصحن ؛ وين نايف وتركي
ابو راشد ؛ بالمزرعه يتغدون هناك
ام راشد هزت راسها وطلعت وهي تدخل المطبخ ؛ بالمزرعه مغير ابوك وسعد وعزام هنا
اروى ؛ اجل يتغدون هناك
ام راشد ؛ ايه يلا هاتي الصحن وتعالي الصاله
..........••..........
بالمزرعه قبل ساعه
وصل نايف وهو يوقف سيارته ونزل لبيت الشعر اللي شاف تركي منسدح فيه ودخل ؛ سلام ، وش صاير
تركي جلس وتنهد ؛ وعلييكم السلام
نايف جلس جنبه وهو يشوف وجهه وعيونه اللي كانت حمرا وكأنه كان يبكي ؛ افا ياذا العلم !
تركي بضيق ؛ الله ماكتب
نايف عقد حواجبه ؛ وش؟
تركي غمض بقهر ؛ جيت وانا مقتنع اني .. مابغيت غيرها حلالي
وقالوا ودريت اني .. ماجيت الا وهي لواحد ثانيٍ
نايف بصدمه ؛ كييف!
تركي ناظر نايف ؛ مخطوبه لولد عمها يانايف
نايف بقهر ؛ من متى ؟
تركي ؛ كلمت امي الصباح ... وقال له كل شي قالته امه وكلامه معها
نايف مسك راسه ؛ اففاا ..ططيب كيف وش بتسوي
تركي ؛ ماهي نصيبي دام ولد عمها يبيها
نايف ؛ ياولد طيب ليه ماتقول لأمي تكلم ام عزام يمكن يوافقون عليك انت
تركي بقهر ؛ وشللونن امي مستحيل تكلمها بتقول نخطب على خطبتهم ! وولد عمها بعد
نايف شد على يديه بقهر ؛ يعني ماعاد فيه حيله
تركي هز راسه ؛ لا والله وانا اخوك مهي لي
نايف ؛ الله بيعوضك احسن منها صدقني انها خيره ماتوقف الدنيا عل... قاطعه تركي ؛ يانايف والله اني كاره الحب ولا حبيته الا يوم حبيتها وشلون بنساها وهي اول حب !
نايف ؛ بتنسى وترا مالك عشر ايام تحبها ياتركي لاتفكر والله بتتزوج وتنسى حبها وتنساها
تركي ؛ ماضنتي يانايف
نايف تنهد وهو مايدري وش يقوله ؛ كلمت عيسى ؟
تركي ؛ لا اخاف انه نايم ولا بدوامه
نايف ؛ بدق عليه نشوف وش يقول يمكن عنده حل والله انا مدري وش اقولك
تركي سكت وهو ينتظر نايف اللي دق على عيسى ورد ؛ هلا ياحبيبي
نايف ؛ هلا عيسى .. وقتنا مناسب ولا ؟
عيسى ؛ لا ماعليك مناسب قايم من الفجر والساعه 6 الصباح
نايف ؛ وفاضي ؟
عيسى ؛ ايه فاضي واليوم اجازه وش فيك ؟
نايف ؛ اا تركي عشان تركي
عيسى ضحك ؛ ايييه العاشق الولهان ، وش حاله
تركي تنهد ؛ لاتسأل ياعيسى عن الحال مدام ان اللي ابيها ماهي حلالي
عيسى ؛ افا
نايف بدا يشرح له ؛ اليوم كلم امي انه بيخطبها و....... وقال له كل شي وعيسى مصدوم ويسمع
عيسى ؛ ابن عبدالله ! انت صادق ؟
نايف ؛ اي والله هذا اللي تركي قاله
تركي والعبره خنقته ؛ ما ابي الا هي ياعيسى وش اسوي تكفى
عيسى ضاق ؛ مالك الا تكلمها هي كلمتين على طول قل انك تبيها وان كانها تبيك ترفض ولد عمها
نايف بصدمه ؛ وشو وش تقول انت ! وان علمت عزام ودرا ابوي والله ان يذبحنا
تركي ؛ ماتقول لأحد هي بس اخاف ماتبيني اخاف تحب ولد عمها وتبيه
عيسى ؛ والله مافيه الا هالحل وانا اخوك كلمها وان كانها وافقت على ولد عمها وتركتك حزتها غيرها عشر
تركي ؛ وش اقول لها كيف اقنعها
عيسى ؛ اذا لقيتها طالعه منا ولا منا قل لها انك تبي تخطبها ودريت انها لولد عمها وقل ان كانك تبيني على ولد عمك لاتوافقين وانا اللي ابيك
تركي ؛ هي ماتبيني اكلمها اكيد تكرهني
عيسى ؛ وان كانها تكرهك تحبها ليه !
تركي سكت بقهر وقال نايف ؛ انا اقول نخليها لولد عمها اكيد ماترفضه وتاخذ غريب واخاف تصير مشكله ولا احد يدري
تركي ؛ خله يصير اللي يصير انا بكلمها وان كانها تبي ولد عمها بحريقه هي وياه وقلبي
عيسى ؛ لا والله لاتقهر نفسك ان كانها ماتبيك ، اللي مايبيك منت بحاجةٍ له ولا بتموت بعده لا والله الا بتخطب غيرها وتنساها
تركي ؛ وانت تشوف اني بنسى ؟
عيسى ؛ انت الحين كلمها وحزتها يصير خير لو ماتبي بتتناسى لين تنسى يخوك
تركي تنهد وكمل عيسى ؛ اللي مايبيك لاتحد نفسك عليه ولاتحبها اذا هي تحب ولد عمها لاتعلق نفسك بشي الله مهو كاتبه لك ( وَعَسَى أَنْ تُحِبُّوا شَيْئًا وَهُو شَرٌّ لَكُمْ ) كل شي خيره وكاتبها ربي لك وحياتك ماتوقف عليها هي اذا اختارت انت بتكمل حياتك وهي بتروح بحال سبيلها
نايف ؛ وعيسى صادق والله ان ربي مايكتب لك الا اللي يشوفه خير لك والخيره فيما اختاره الله
تركي ؛ الله يكتب اللي فيه الخير بكلمها وهي تختار
نايف شاف جواله اللي دق ؛ عيسى سعد يدق شكل ابوي عنده
تركي ؛ ايه دق علي قبل شوي مارديت
عيسى ؛ يقلع بليسك الحين يعصب خلاص نايف قفل ورد قل تركي طافي جواله ناسيه اي شي وكلمني اذا صار شي عن تركي
نايف ؛ ان شاء الله يلا يلا مع السلامه
وقفل ورد على سعد اللي دق مره ثانيه ؛ هللا سعد
.... وحطه سبيكر من اشر له تركي
سعد ؛ وينك ؟
نايف ؛ ببالمزرعه
سعد ؛ وتركي وينه
نايف ؛ عندي
ابو راشد ؛ وليه مايرد وانت من تكلم !
نايف وهو يناظر تركي اللي يأشر له على جواله والسياره ؛ جواله اا بالسياره وحنا عند الغنم وككنت اكلم مشاري اسأله عن اوراق
ابو راشد ؛ تعال اجل انت وياه
نايف ؛ شوي يا ابوي نبي نشوف الغنم يمكن نتأخر
ابو راشد ؛ طيب وقل لنواس لايروح المحل خل عمران يروح يعاون عبد السلام نواس ابيه العصر
نايف ؛ ابشر الحين اقوله
ابو راشد ؛ تتغدون هناك ولا تجون
نايف ؛ لا لاتحترونا نتغدى ونجي شوي يبه
ابو راشد ؛ زين
وقفل وتنهد نايف ؛ قم بشوف نواس وعمران وغسل وجهك وصحصح لاتضيق وانا اخوك الدنيا قسمه ونصيب
تركي هز راسه وقام وطلع هو ونايف
..........••..........
بيت ابو هادي
بعد ساعات والعصر
كانت ام هادي ترتب المطبخ هي وشهد وابو هادي يتقهوى وهادي وحمد بغرفهم
ونادى ابو هادي ؛ ياهادي ياحمد
ام هادي طلعت من المطبخ وضحكت ؛ خلهم سكرت عليهم عشان يرتبون حوستهم ملابسهم محذفه بكل مكان ولا رتبوها
ابو هادي ضحك ؛ مامداهم يبنت الحلال
ام هادي ؛ الا ماعليه الحين معهم وقت هذي شهد خلصت ترتيب غرفتها الظهر والحين ترتب المطبخ
ضحك ابو هادي وقالت ام هادي وهي تجلس ؛ الا جيرانا اهل ابو راشد مانزورهم ولا نعزمهم ؟
ابو هادي ؛ الا اكيد بس بعد شوي بروح سوق الزل اشوفه وانتوا مشغولين باليت ماعندنا وقت
ام هادي ؛ اي والله مشغوله بالبيت بس فشله ارسلوا لنا من اول ماجينا ويعزمونا من زمان
ابو هادي ؛ ماعليه يدرون اننا مشغولين بالبيت وتو سكنا والايام جايه ان شاءالله نشوفهم ونسير على بعض
ام هادي ؛ ان شاء الله الا على طاري البيت وشغله ودي ان المجلس الثاني نخليه لنا والصاله هذي للضيوف بدل مهو فاضي ومافيه الا الشنط فاضيه نحطه مجلس ارضي وتلفزيون ونقعد فيه دايم
ابو هادي ؛ والله زين بعد ولو نخلي الدوانيه اذا جو رجال ندخل عشاهم من الباب اللي على الحوش والمطبخ يصير احسن من اننا ندخل مع الصاله
ام هادي ؛ ايه ايه اكيد محنا طالعين من هنا لسيب الدوانيه ولا تدخلون والحريم هنا نسكر هالباب وتدخلون مع باب السيب
ابو هادي ؛ صح ، والمجلس ماناخذ له كنب ؟
ام هادي ؛ لا لا والله انا عجبني مجلس الحريم امس حق بيت مساعد واسع ماشاء الله وارضي الكنب يضيق المكان وتكفي هالصاله كنب
ابو هادي ؛ ولو جو ضيوف واجد تكفيهم الصاله
ام هادي بتفكير ؛ والله مدري نبدل اجل وناخذ الكنب نخليه بالمجلس والصاله هذي نخليها فرشه ومساند ؟
ابو هادي ؛ بكيفك انا اشوفه احسن عشان يكفيهم
ام هادي ؛ اجل ناخذ الكنب هذا ونحطه بالمجلس والصاله هذي نجيب لها اثاث
ابو هادي هز راسه وقامت ام هادي ؛ اجل بروح اكمل المطبخ عشان اخلص بسرعه
وطلعت وهي تدخل المطبخ وتكمل مع شهد
وقام ابو هادي وهو يوقف عند باب المطبخ وقال بضحك ؛ بروح للسوق حق الزل باخذ هادي وحمد يشوفونه اعتقيهم
ضحكت ام هادي وهي تطلع للغرف ؛ اصبر ان كانهم خلصوا يطلعون ... ياحمد خلصت ؟
حمد من داخل ؛ اييه يمه افتحي وشوفي
ام هادي ضحكت وهي تفتح ودخلت ودخل ابو هادي وراها يضحك وشهد لحقتهم
حمد ؛ هه هه يمه شوفي رتبت
ام هادي وهي تشوف الدولاب ؛ والله انه.. يلا ماعليه باقي شوي تكمله اذا رجعت من سوق الزل انت وابوك بشوف هادي وش سوى
وطلعت لغرفه هادي وهي تطق ؛ هادي رتبت ؟
هادي ؛ افا عليك ادخلي وشوفي
دخلت ام هادي والكل وراها وقال هادي ؛ يساتر لجنة تحكيم ولا وش
ضحكوا وقالت ام هادي ؛ لا لا ماشاء الله عليك مرتب يلا رح مع ابوك وحمد شوفو السوق
ابو هادي ضحك ؛ بنروح لسوق الزل نشوف فرشاتهم واغراضهم تروح معي انت وحمد ؟
هادي وحمد ؛ ايه
ابو هادي ؛ يلا اجل معي بالسياره
وراحوا طلعوا مع ابو هادي ورجعوا ام هادي وشهد لشغلهم
..........••..........
بيت ابو راشد نفس الوقت
بالدوانيه كان فيها تركي ونايف ، وابو راشد وسعد وعزام وراشد راحو للمزرعه ولف تركي على الباب اللي يطق ؛ من اللي جا
نايف ؛ تلقاها وحده من الديره مايطق هالباب الا حريم الديره الرجال يجون من الدوانيه ، تفتح امي ولا وحده من البنات
تركي ؛ والله مدري المهم بروح المحل لايرجع ابوي وانا هنا انت بتجي ولا بتنام ؟
نايف ؛ بنام لي ساعه واقوم اذا امداني جيت
تركي هز راسه وطلع مع باب الدوانيه وحرك للمحل ونايف انسدح ياخذ له غفوه
•
بالصاله لفوا على صوت الباب حق الحوش اللي يطق وقامت ام راشد ؛ اروى افتحي المجلس يمكن وحده من جاراتنا وسوو قهوه بسرعه
وقامت اروى تفتحه بسرعه وعبير راحت تجدد القهوه وهاجر معها وام عزام راحت للمجلس وشموخ للغرفه
وقربت ام راشد للباب ؛ من ؟
ام عبدالرحمن ؛ انا انا افتحي
فتحت ام راشد ؛ ياهلا ياهلا
ام عبدالرحمن وهي تسلم عليها ؛ ياهلا فيتس شلونتس عساتس طيبه
ام راشد ؛ بخيير والحمدلله ، ياهلا هيلا وش اخبارك
هيلا سلمت عليها ؛ بخير وانتي وش علومتس
ام راشد ؛ بخير ، تفضلوا
ودخلوا للمجلس وحطت ام عبدالرحمن سلتها فيها قهوه وشاي وهي تسلم على ام عزام وهاجر واروى وعبير ؛ وش اخباركم ، وين ام ناصر
ام راشد ؛ والله عند اهلها سيرت عليهم تجي بالليل
ام عبدالرحمن ؛ اييه وشلون امها عقب تعبها
ام راشد ؛ الحمدلله هونت
ام عبدالرحمن ؛ الحمدلله ، وين بنتس يأم عزام
ام عزام ؛ داخل تجي الحين
عبير مدت لها القهوه ؛ تقهوي
اخذتها ام عبدالرحمن وصبت عبير قهوه لهيلا والباقين
ودخلت شموخ ؛ سلام
ام عبدالرحمن قامت ؛ هلا وعليكم السلام شلونتس
شموخ ؛ بخير
هيلا ؛ هلا شموخ وش اخبارتس
شموخ ؛ الحمدلله تمام
وجلست عند البنات وقالت ام عبدالرحمن ؛ يختي توني وانا جايه الا يطلع جاركم ابو هادي وعياله انتوا مازرتوهم ولا جو لكم ؟
ام راشد ؛ لا والله يزورونا ان شاء الله بس اكيد انهم مشغولين ببيتهم واغراضهم
ام عبدالرحمن ؛ ايه اليوم تقول هيلا شافتهم الصباح بالسوق وام هادي تقضي اغراض لبيتها من صحون ومونه وتقول محلهم حق ابو فارس اللي باع
ام راشد ؛ بالله ، بيبع ملابس وقمايش ولا وش
ام عبدالرحمن ؛ لا لا تقول هيلا شالوا كل شي فاضي المحل ماضنتي يبيع ملابس
ام راشد ؛ والله مدري يمكن يخليه بقاله
ام عبدالرحمن ؛ يمكن ، الا انتي شفتي ام هادي وبنتها امس ؟
ام راشد ؛ ايه ايه ماشاء الله عليهم
ام عبدالرحمن ؛ يويلي بس ، والله ان بنتها موتٍ احمر لو عندي ولد غير عبدالرحمن والله اني لا ازوجه شهد
ام راشد ضحكت ؛ اي والله قمر الله يحفضها
ام عبدالرحمن ؛ انا اقول تخطبينها لتركي امس كل الحريم يعاينونها لاتروح منتس والله انها ماتتطوف
شموخ واروى ناظروا بعض بصدمه وجلطتهم ام راشد اللي قالت ؛ اي والله انك صدقتي اخاف تروح باخذها لتركي وان كانه مايبي اخذها لنايف ...

تفاعلوا تصويت وكومنت لطففاً ❤❤.