ياديرةٍ ضمّت كل الأحباب

Part 49

..........••..........
من بكره الصباح
في المستشفى
كان هادي واقف عند شباك الغرفه ساند راسه عليه وحاط كفه اليمين على كتفة اليسار وهو مانام طول الليل الا ساعه ويتذكر كلام حمد البارح اللي فجأه قاله له وفتح السالفه " حمد ناظر هادي ؛ انت وبيان تحبون بعض؟
هادي التفت له بصدمه ؛ كيف؟!
حمد تنهد ؛ تدري يومنك نايم وتعبان تتكلم وسمعتك تردد بيان بيان ، وبعدين تقول تركتني راحت وانا ابيها وتتكلم ولا فهمت الا كلامك هذا بس كان كله عنها
هادي ؛ لا لا تتخيل انت ماتكلمت
حمد ؛ وليه ماتخيلت الا اسم بيان ؟
هادي ؛ مددري عاد عنك
حمد اعتدل ؛ هادي تكفى علمني اذا انت تبيها لاتخليها عادي لو قلت لأبوي وامي ذاك اليوم ايه احبها وابيها ليه قلت والله ماخذها ؟ هذا وانت انهبلت يوم دريت انها انخطبت لا ويوم سألناك تحبها قلت لا بس كنت افكر اخطبها يعني لو تفكر بس بتزعل كذا ؟
هادي سكت ولمح حمد القهر بعيونه ؛ من متى تحبون بعض ؟ وليه ماقلت لأمي ولا لأبوي ترا ماهي غريبه وبالعكس ماهم قايلين شي ليه هي وافقت على خطبتها وانت حلفت ماتاخذها ولا تخطبها؟
هادي ؛ قلت لكم وقتها هي وافقت يعني تبيه ماني اخذها
حمد ؛ طيب ماكانت تحبك ؟
هادي هز راسه بقهر ؛ لا
حمد ؛ وكلامك اليوم الصباح؟ ، والله ياهادي كله عنها اني انصدمت يوم سمعتك تتكلم انت يمكن ماتذكر من التعب تهلوس ولا تحلم بس كنت تقول تركتني يعني كانت معك تحبها وتحبك
هادي ؛ هذا انت قلتها من التعب اهلوس واتحلم ماهو صدق الصدق علمتكم فيه اني كنت ابي اخطبها وانخطبت
حمد ؛ والله عاد لو كنت تبي تخطبها بس ماسويت اللي سويته ليلتها وتعبك هذا منها
وسكت هادي بضيق وكمل حمد ؛ علمني هادي وش سالفتك معها؟
هادي تنهد بتعب ؛ مافيه لاسالفه ولا شي بنام ياحمد خلاص
حمد مسكه قبل يتغطى ؛ لا والله ان تعلمني ، هادي تراني اخوك! وليلتها رحت مع تركي وانا موجود بعد
هادي بقهر ؛ وانت موجود ؟ انت اللي مسكتني لا اطلع وانت اللي سكت يوم ابوي قفل الباب ايه كنت موجود ياحمد!
حمد تنهد ؛ يعني لو مامسكتك وطلعت بتروح لبيان ؟ هذا اكبر دليل انك تحبها وانت تقول افكر اخطبها وبعدين لو رحت وقتها بتصير مشكله ماحسبت حسابها وابوي كان معصب ولا قدرت اتكلم خفت يصير له شي
هادي هز راسه ؛ طيب خلاص خلني انام
وتغطى وتأفف حمد ؛ هادي انت تحبها وانا متأكد بس ليه ماقلت اخطبوها ؟ يوم امي تقولك ابي اخطب لك تقول لارحنا الديره طلعت تقصد بيان ليه ماقلت ابي بيان ؟
هادي بضيق ؛ مدري ماكان الوقت مناسب
حمد ؛ ليه وش كان فيه وقتها ؟
هادي ؛ كنا بالمدينه وقلت اذا جينا الديره اقول لهم
حمد ؛ طيب جينا للديره يوم العشاء اللي عند جدي كان عمي موجود وكلنا ليه ماتكلمت
هادي سكت وهو طول الفتره متحسف انه ماتكلم مايدري وش اللي اشغله وش اللي خلاه مايقول بس يحاول يقنع نفسه انه مثل ماقالوا له تركي ومساعد " خيره " وتنهد بضيق ؛ مدري وش لهاني كل شوي اقول بكلم ابوي ولا كلمته بس خيره
حمد ؛ طيب دام ابوي وكلنا درينا ليه ماقلت ابيها ؟
هادي تأفف ؛ حمد لاتغثني خلاص
حمد بقهر ؛ انت اللي غثيتني اسألك ساعه وترد علي بكلمتين عطني السالفه وانتهينا
هادي بعد الغطى عن وجهه بقل حيله وهو يجلس ؛ انا احبها من العيد .. عيد الفطر اللي قبل ٦ شهور ونص شفتها عند بيت جدي راجح وهي شافتني وقتها وبعدها صرت اشوفها من بعيد اذا طلعت من البيت ولا راحت مكان وهي درت يوم كلمتها ورا بيتهم لقيتها برا وعلى طول قلت هذي الفرصه وكلمتها قلت اني احبها وبخطبها وجلسنا لعيد الاضحى وانا كل يوم اقول بكلم ابوي بس مدري وش اللي يربط لساني والله اني تأكدت انه شي الله مهو كاتبه لي ومنعني عنه بخيره ، وبعيد الاضحى شفتها بالبقاله يوم رحنا انا وانت والعيال بعد ماكنت اشوفها من بعيد وتشوفني ، كلمتها هناك وعايدتها وكنت ناوي بعد اني اخطبها بس مثل دايم وش يمنعني مدري ورجعنا للمدينه وانا ماخطبتها و٣ شهور رجعت وانقلبت علي قلبه ماني مستوعبها وش اللي غيرها بالثلاث شهور هذي وخلاها توافق على واحد مدري
حمد بصدمه ؛ يعني هي بعد تحبك ليه توافق على اللي خطبها! وشلون محد درى محد انتبه لكم محد لمحكم مستحيل
هادي ؛ وافقت لأنها تبيه غيرت رايها يوم شافت من.. وسكت بقهر وقال حمد ؛ وشلون غيرت رايها وش شافت؟
هادي تنهد ؛ كل الثلاث شهور اللي كنا فيها بالديره من عيد الفطر الين عيد الاضحى كانت تكذب علي لا تحبني ولا شي وت..وسكت بتردد وهو ياخذ نفس ونطق بضيق ؛ تدري يوم طلعت ذاك اليوم رحت للديره ! رحت لبيتهم لبيان ، اول شي كسرت الدريشه وكتفي صدق من الحديد وطلعت ولقيت تركي جاي وقفته وقلت ودني للديره ولا قلت له وش صار وداني ونزلت لحالي وقفته بعيد ورحت لها ادق دريشة غرفتها وطلعت ويوم سألتها ليه وافقتي عليه وانتي تحبيني قالت ماكنت احبك اصلاً وكله كذب عشان فلوس ابوك اللي هو عمي واللي باخذه ضابط منصب وابوه منصب وبرا الديره! ومن ليلتها ندمت على كل شي الا على اني ماخطبتها
وسكت حمد مصدوم وهو يستوعب ؛ مستحييل بيان تسوي كذا؟ نقول عمي ماله طب صح ان عياله ماهم نفسه بس هي وشلون تصير انذل منه وعلى فلوس !
هادي بقهر ؛ ٦ شهور ياحمد وانا كل يوم احبها اكثر من اليوم اللي قبله ويوم تعلقت تركتني وكذبت علي
حمد مسح راسه بصدمه ؛ يهب ياوجهها ليه ؟
هادي بضيق ؛ مدري ياحمد والله اني عجزت اصدق كلامها وللحين ماني مصدقه بس دامه طلع منها خلها تاخذ المنصب نشوف يمكن كذبت عليه بعد
حمد سكت يستوعب ؛ يولد! .. اجل عساها بقلعة وادرين خلها تاخذه وتشبع بفلوسه مرده يكشفها وتطيح بكذبها! لاتزعل عشانها هالكذوب تاخذ احسن منها وتلقى ابرك منها عشر
وتذكر هادي قصيدة تركي " غير اللي راح عشر ونقي اللي تبي " صدقت ماتوقف الدنيا على فعلها بلقى احسن منها
حمد ؛ ماعليك ان شاء الله تخطب لك امي احسن بنت انا اقول لها
هادي ؛ لا! خلها انا اكلمها بعدين الحين ابي افكر واقول لها انا لاتقول شي انت ... وترا لو درا احد بالسالفه ياويلك ياحمد !
حمد ؛ طيب تركي يدري صح؟
هادي هز راسه ؛ يدري ، وماعليك انا متأكده ماهو قايل لأحد وثقت فيه مثل عيوني اللي اشوف فيها
حمد ؛ ان شاء الله .. شكله مايعلم اذكر ذيك الليله ماقال شي حتى حنا ماعلمنا
وهز راسه هادي ورجع ينسدح ؛ خلاص بنام انا طف اللمبه
وقام حمد طفى النور وانسدح وهو يفكر بسالفة هادي لحد ماغفى وهادي عجز ينام من ضيقته "
•
تنهد هادي بقهر وهو يتذكر بالعيد لما شافها لأول مره ببيت جده واسوارتها اللي طاحت ع الباب واللي عرفها منها من اسمها اللي مكتوب يعرف ان بيان الوحيده واللي هي بنت عمه سامي واللي من وقتها وهو مايجلس الا قريب من بيتهم لحد ماطلعت بيوم وكلمها وعطاها الاسواره وماوسعته فرحته يومها وصار كل ماطلعت يشوفها ويأشر لها ويبتسم وهي بعد تشوفه بالبقاله وبالشارع وتكلمه وبيوم اعطته اسوارتها لما كان بيمشون للمدينه من باب انه يذكرها منها وكان محتفظ فيها لحد الليله اللي درى فيها بكذبها ورجعها لها
اخذ نفس بضيق وهو يتذكر حبه لها وحبها اللي كان يحسبه حقيقي وكل مواقفه الحلوه معها اللي خذلته فيها واعترفت انها من ورا قلبها وانها ما تكن له فيه ذرة حب
والتفت لحمد اللي صحى ؛ هادي ؟ وش تسوي متى صحيت ؟
هادي تنحنح ؛ مانمت ماجاني نوم
حمد اعتدل وعقد حواجبه من الم رقبته ؛ والدكتور ماجا؟
هادي ؛ لا يجي الحين الساعه جت ٧
وتنهد حمد ودخل يغسل ..
طلع بعد دقايق على دخلة الدكتور ؛ السلام عليكم
هادي وحمد ؛ وعليكم السلام
الدكتور ؛ كيفك ياهادي
هادي وهو يجلس ؛ الحمدلله
الدكتور ؛ يدك كيفها؟
هادي ؛ لا تحسنت الحمدلله مافيه الم
الدكتور ؛ طيب الالم راح مع الأبر لكن يدك لاتحركها عشان مايزيد الخلع ويتضاعف ولا تشيل عليها شي ولا تعرضها لأي مجهود
بنحط لك دعامه على الكتف بدل الشاش ولا تشيلها الا للضروره عشان ترجع مثل اول واحسن وبعد اسبوع تجيني واشوف وضعها بكتب لك موعد لبين مايركبونها لك
هادي هز راسه ؛ ان شاء الله يعطيك العافيه يادكتور ماقصرت
الدكتور ؛ قدامك العافيه
وطلع وبقت الممرضه تركبها له وقال حمد ؛ يعني نطلع الحين ؟
هادي ؛ ايه بس اخلص ويعطيني الموعد
هز راسه حمد وهو ياخذ اغراضه هو وهادي
خلص هادي وحمد اخذ الأغراض للسياره شغلها ورجع وهو يشوف هادي طالع ومعه الورقه ؛ يلا خلاص
حمد ؛ يلا
وطلعوا للسياره واخذ هادي نفس وهو يناظر الجو
وركب حمد وهو يتنهد ؛ يوه مابغينا ، علاجات ماصرفوا لك؟
هادي ؛ لا مايحتاج
وحركوا للبيت ..
..........••..........
بيت ابو راشد
قبل ساعه
كان تركي برا عند سيارته يحط الأغراض والتفت لنايف اللي جاي من الحوش وحاط فروته على راسه
تركي ؛ ابك هم وين راحوا
نايف ؛ ياوك يالبررد ، وش دراني يقرشعن بالمطبخ حله " اغراض " مدري وشي
تركي تأفف ؛ يوه والله مايخلصن
نايف ؛ حنا ورا مانروح انا وانت ونسحب عليهم هذا وحنا نايمين متأخر قايمين وخالصين قبلهم
تركي ضحك ؛ ودي بس خدمة اروى تمنع
ضحك نايف ووقف تركي على باب الحوش وهو ينادي ؛ ياهييه يلا انتوا وين رحتوا
وجت اروى تركض وهي تحط الكيس عند باب الصاله ؛ اصبروا ٥ دقايق بس وتستوي الفطاير ، هه خذ كيس الخبز هذا تقول امي عطوه النياق
تأفف تركي اللي عصب ؛ ماهو لازم بس امشوا ، بعدين ورا ماسويتنها البارح
اروى رجعت ؛ اصببر ياخي مادرينا
نايف التفت بقهر لتركي ؛ لو دريت كملت نومتي قايلين ٦ وحنا هناك والساعه الحين ٦ وحنا مامشينا بنوصل ٦ ونص انا متى بلحق اجلس قبل اروح دوامي
تركي تنهد ؛ ياكثر قرقرتك والله انها صدقت اروى يوم قالت اخو هاجر
وضربه نايف بضحك وضحك تركي وهو يناظر الجو ؛متأخرين وضباب بعد متى بنوصل ، انا وش اسوي فيهن امش ماينفع الا نسحبهم
ومشى تركي داخل ونايف وراه ودخلوا للصاله يستعجلون هاجر واروى اللي بالغصب خلتهم ام راشد يروحون بعد ماقالوا لأبو راشد الفجر واقنعوه وهي وشريفه بيجلسون بالبيت وابو راشد وراشد بيمرون المحل شوي وبعدها يلحقونهم للمزرعه
تركي ؛ يلا ياهيه انتوا بتطلعون ولا نروح
ام راشد وهي ماده رجولها عند الدفايه وبحضنها العنود ؛ روحوا هونوا البنات برد
هاجر من المطبخ ؛ لااعع طلعنا هه هه
نايف ضحك وهو يقرب ويجلس عند امه ويحط يدينه ع الدفايه ؛ ورا ماتروحين معنا يمه انتي وشريفه والله تدفون عند النار وبالخيمه
ام راشد ؛ لا والله ماروح بهالجميده مايطلع الا المهبول
تركي ضحك ؛ افا
اروى من المطبخ ؛ يمه ترا هنا وبالمزرعه كله واحد هنا دفايه وهناك نار
ام راشد ؛ ودامه كله واحد ورا ماتنثبرن هنا
هاجر ؛ تغيير جو يمه
ام راشد ؛ ها غيري جو بالدكه اجل
نايف ؛ شريفه وينها يمكن تبي تروح
ام راشد ؛ يويلي لا والله ماتروح خلها نايمه
تركي ؛ ماعليه الجايات نطلع كلنا
وطلعت هاجر وحطت السله ؛ خذوا بنلبس عبينا ونجي
ام راشد ؛ خذوا شراشفكم ، تركي وين فروتك ؟
تركي وهو ياخذ السله ؛ معي معي بالسياره
ام راشد ؛ نايف لاتتأخر على دوامك تقعد معهم ولا تنتبه للوقت رح بدري عشان الطريق ضباب محد يشوف شي يالله العقل وانتوا فارين للمزرعه
اروى طلعت بالسله الثانيه ؛ يمه الظهر تعالي انتي وشريفه
ام راشد ؛ وعساكم بتقعدون للظهر؟!
هاجر طلعت وهي تحذف على اروى شرشفها وعبايتها ؛ اييه يمه قلنا لك بنشوي ونتغدا هناك ، هاك انتي
نايف ؛ ترا يمكن للعصر بعد خلوني امركم لاطلعت الظهر
ام راشد ؛ لا لا والله ماحنا رايحين بهالبرد ، وانتوا لاتطلعون يلفحكم الهوا خلوكم بالخيمه
الكل ؛ ايه ابشري
ام راشد ؛ وسكروا الباب لايدخل علينا الهوا وباب الحوش بعد ، تعالي تعالي اروى غيري القناه
وجت اروى وهي تغير القناه وقالت ام راشد ؛ ايه ايه خليها ، يلا روحي حطي شرشفك عليك ياويلك ان طلعتيه وعلميني عن هاجر ان طلعته
اروى ؛ ابشري
وطلعت وراهم وسكر نايف الباب وهو يضحك وركبوا السياره وحرك تركي ؛ نروح البقاله ؟
نايف ؛ لا عااد ثم تلطعوني ساعه اعنبوا بليسكم كلها ساعه بالمزرعه وبطس دوامي وصوا راشد ، شكلكم ماتبوني اروح مخططين تتأخرون الين يروح الوقت وتحذفوني بالدوام وانتوا رايحين
هاجر ؛ زين فهمت تعبنا وحنا نلمح لك
انفجروا يضحكون تركي واروى ولف نايف عليها ؛ اهب عليك ، نزلها تركي نزلها
هاجر ضحكت ؛ انت ترفع الضغط ترانا متأخرين نجهز الفطاير ونضبط طلعتنا
اروى ؛ لا وانا بسوي كيكه ولا امداني
تركي ؛ انا قلت البارح بنهج يعني نروح نروح ان قالها الله ليه ماجهزتوا ، وبعدين كيكه الصبح انتي الثانيه ؟
اروى ؛ ناكلها العصر
نايف ؛ يويلها وهي بتقعد للعصر والله ان تجيها عنز وتاكلها
اروى ؛ محد بيجيها الا انت
نايف التفت لتركي اللي يضحك ؛ خواتك مافيهن طب وشوله اخذناهم مدري
دخلت هاجر بالنص وهي بتفتح الدرج ؛ تريك وين الاشرطه بغيت اسرق منهم واحد بس ماتخليني امي اشغلهم بالراديو حقها
تركي فز وهو يحط يده على الدرج ؛ ااء اصبري مب هنا مب هنا
نايف تذكر اوراق تركي وفضايحه ؛ ايه ايه هنا انا اعطيك وش تبين نشغل بس
هاجر ؛ حط اللي تحط ابو عبدالله ولا ابو نوره
وتنهد تركي بتوتر وفتح نايف الدرج وهو كاتم ضحكته وطلع شريط وشغله
..........••..........
بيت ابو هادي
وقفت سيارة حمد ونزل هو وهادي ؛ يووه يالجو يازينه
هادي ؛ ايه بس برد والله
حمد وهو ياخذ الشنطه والاغراض ؛ ايه ادخل ادخل لاتمرض تونا طلعنا
ودخل هادي وجا حمد وراه ومشوا لداخل البيت وفتح هادي الباب ؛ ياهل البييت
ام هادي من المطبخ ؛ ياهلا ياهلا
وطلعت تركض وابتسم هادي وهو يبوس راسها ؛ صبحها بالخير يارب
ام هادي ابتسمت وهي تسلم عليه ؛ يصبحه بالرضا والسرور ، الحمدلله على السلامه
هادي ؛ الله يسلمك
وجا حمد حط الاغراض وهو يبوس راسها ؛ ارحبي يمه اشتقتي لي صح
ام هادي ضحكت ؛ ياهلا ياحبيبي ، اي والله كلنا اشتقنا لكم كلكم
حمد ابتسم ودخل ورا هادي للصاله ؛ السلامم عليكم
ابتسم ابو هادي اللي كان واقف يسلم على هادي ؛ وعلييكم السلام تو مانور البيت
هادي ؛ منور بوجودك والله
حمد وهو يبوس راسه ؛ شلونك يبه
ابو هادي بأبتسامه ؛ بخيير دامكم بخير ، الحمدلله على السلامه ها وش قالوا لك ياهادي
هادي ؛ الله يسلمك ، ابد حطوا لي هذي وموعد بعد اسبوع
ام هادي ؛ زيين الحمدلله والحين تعبان ولا لا ؟
هادي ؛ لا الحمدلله مافيني الا العافيه .. شهد وينها ؟
ام هادي ؛ والله لي ساعه اصحيها عيت تقوم شكلها سهرانه ، روحوا صحوها يمكن من الطفش نايمه اكيد تقوم اذا درت انكم جيتوا
ابو هادي ؛ ايه وتعالوا افطروا معنا
وراحوا يصحون شهد ونادى حمد وهو يفتح الباب ؛ هيه شهدوه .. قومي قومي جينا
ودخل هادي وصحت شهد وهي تلفت ؛ بسم الله ، متى جيتو
هادي ؛ تو يلا قومي سهرانه امس ؟
شهد اعتدلت ؛ لا نمت بدري ١٠ ليه كم الساعه ؟
هادي ؛ ٦ وربع
التفتت شهد لحمد اللي عند مرايتها ويحط كريم ؛ شهد الدهون هذا للوجه ولا لليدين بحط ليدي صارت كنها جلد ضب من البرد
شهد ضحكت ؛ عادي ينفع لهم كلهم
وحط منه حمد وهو يلتفت ؛ قومي يلا بنفطر والجو تراه زين ودي اقعد بالحوش
هادي قام ؛ لا برد قوموا بس افطروا
وطلع وقالت شهد ؛ وش سوى وش قالوا له ؟
حمد ؛ حطوا له مثبت الكتف ذا وقالوا موعد بعد اسبوع يمكن يفكونها ماعطوه علاج مايحتاجه
شهد ؛ زين اشوا ، خلاص اطلع شوي والحقك
حمد ؛ يلا اخلصي لاترقدين لها ساعه امي تصحيك
وطلع وقامت شهد
..........••..........
المزرعه
وقفت سيارة تركي وهو يشوف النياق قدامهم وحرك يقرب شوي بضحك ووقف بينهم من سمع هاجر تشهق وهي تحاول تسكر شباك الباب ؛ يويلي بعد بعد لاتوقف عندهم .. ترركي الله ياخ.. وصرخت وهي تبعد لجهة اروى اللي تضحك من دخلت الناقه راسها وضحك نايف وهو ينزل يبعدها عن الباب ؛ تستنجدين بتركي ماتدرين انه نذل يعاند
تركي ضحك وهو ينزل ويسكر الباب ؛ انزلي انزلي ماتسوي شي
هاجر وهي تدف اروى ؛ اروى انزلي بنزل من عندك ، اوريك ياتركي النذل حتى دريشة سيارتك مثلك دقرت علي خلني انزل بس
تركي ضحك ؛ انزلي نشوف وش تسوين
نزلت اروى وهاجر وراها نزلت وهي تسكر الباب ؛ ورع هذي ماينمزح فيها لو تهبدتني مت
ضحكوا ونطق تركي بضحك ؛ لا لا بسبع ارواح انتي
نايف ناظر النياق عند حوض السياره وضحك ؛ اييه خابره ان فيه شي
اروى شهقت ؛ يويلي السله
وقربت تهش عليهم وهي تسحب سلتها ؛ اهب بغت تطير تعبي
تركي ؛ بعدي اخت تركي الذيبه ، تعلمي يالخوافه هذي وهي اصغر منك
هاجر ؛ هذي جنيه ماعليها خوف
اروى سحبت خبز من الكيس وقالت قبل تحذفه عند هاجر ؛ اوريك الجنيه وش تسوي
ومدته للناقه وحذفته بسرعه عند هاجر اللي صرخت وهي تركض لنايف من ركضت الناقه لعندها ؛ نااايففف تكفى
تركي انفجر يضحك ؛ الثانيه الثانيه وراك جتك
والتفتت هاجر وهي تلف معها نايف وتوقف وراه وقال وهو يضحك ؛ اخخو هاجر ، هشش
وبعدها ودف تركي هاجر على نايف ؛ تعزوى فيها هالخوافه خافت من بسه يوم لحقتها وش عاد نياق
هاجر ؛ يزينها لاتهبدتك
اروى ؛ اطرديها وتروح ترا ماتسوي شي ، الا اقول ودي افطر على حليب نياق مفور وحاار مع هالجو يازينه
تركي حط اصبعه على خشمه ؛ اببشري على هالخشم نحلبها الحين
عقدت حواجبها اروى بأستغراب وهاجر تكتفت ؛ ايه وانا يعني بعد ابي حليب ما اقول لا حليبها عادي بس هي فكوني
نايف ضحك ؛ الله اجل امشوا الخيمه نشب نار بردنا
تركي ؛ يلا نزلوا الاغراض كل واحد ياخذ له شي انا بسبقكم الخيمه اشب نارنا
ومشى مستعجل بضحك من سمعهم ينادونه يشيل معهم ودخل الممر اللي على بداية المزرعه ماشي للخيمه ووقف بصدمه وهو يلتفت للمكان اللي كتب فيه يتذكر وهو مو متأكد لما كتب مسح اللي كتبه او لا وقرب وشافه ممسوح وجمدت ملامحه بأرتباك يحاول يتذكر ويخاف ان احد شافه وماسحه ودعى انه يكون هو اللي مسحه وكمل مشي بتوتر للخيمه ودخل وجلس يجمع الحطب ويشب النار
وجا بعدها نايف ومعه البنات وجلسوا يضبطون جلستهم وبعد دقايق اعتدلت اروى وهي تدفي يدينها ؛ فيه لعبه من زمان مالعبناها مع بعض
هاجر والعيال ؛ وش
اروى ضحكت ؛ خبطة الصف يوم يوقف عيسى وحنا وراه ومعنا شريفه قبل تزوج وواحد منا يضربه وهو لازم يعرف من
تركي بضحك ؛ اييه يازينها اطلع حرتي فيها
نايف ضحك ؛ بس ماتنفع ثلاث بينعرف من يضرب
هاجر ؛ لا عادي تضبط بأثنين بعد
اروى ؛ ها يلا قوموا
نايف ؛ اصبري تو جلسنا نبي نتدفى ، اسمعوا اسمعوا نبي نلعب صقله " لعبه بالحجر " تونسنا وحنا جالسين عند النار ومتكين وبعدها نلعب هاللي تبين
اروى تأففت ؛ ماعرف لها ولا ادانيها
نايف دق تركي ؛ تركي يبي يحلب الناقه روحي روحي توك تقولين تبين حليب
تركي ناظر نايف ؛ايه اقول لنواس الحين
نايف اشر له بحاجبه يذكره ؛ قم انت يمكن اروى تبي تشوف النياق
تركي ؛ اءء مشينا اروى تشوفين الحاشي الصغير بعد
هاجر ؛ انا ماني قايمه والله ماروح عند النياق
نايف التفت لها ؛ ابك والله محد قال قومي انثبري محلك
ودقته هاجر بقهر وضحك نايف ؛ قم ياتركي يلا اعجلوا
وقام تركي واروى معه وهم يضحكون من هاجر وطلعوا وحطت هاجر اللي بيدها عند نايف بقهر ؛ ورع هذا وانا اجمع حصى تو عشان العب معك صقله صقلوا اذنك
نايف انفجر يضحك ؛ لا خلاص والله سامحينا اخت هاجر تعالي تعالي نلعب
واعتدل وهو يضحك وناظرته هاجر بقهر ؛ بلعب انا اول
نايف ابتسم ؛ ابشري والله ياجوجو يلا سمي
وابتسمت هاجر وهي تبدا تلعب
•
مشى تركي ومعه اروى والتفت من قالت ؛ العمال فيه ؟
تركي هز راسه ؛ ايه بناخذ سطل الحليب ونروح للنياق
اروى وهي تمشي معه ؛ طيب تكفى ابي اشوف الارانب ياخي كل ماجيت وهي بجحرها مدري كم لي ماشفتها
تركي ابتسم ؛ برد ماتطلع بس ابشري اقول للعامل الحين يطلع لك ان كان قدر
اروى ضحكت ؛ للمره الثانيه تقولها
تركي عقد حواجبه ؛ وش اقول ؟
اروى ؛ ابشري ، غريبه وش عندك اليوم
تركي ضحك ؛ وش عندي
اروى رفعت كتوفها ؛ مدري عنك
تركي تنهد ووقف وهو يمسك كتوفها ؛ اروى ابطلبك طلب وانا متأكد انك قده وبتقولين تم
اروى ضحكت ؛ انا حاسه ان عندك شي مكشوف والله ياتركي غرد غرد وش عندك
ضحك تركي بخفه وهو يمشيها معه ؛ بعلمك انا ماصدقت تطلبين حليب نياق عشان اهج من نايف وهاجر واعلمك بالسالفه
اروى بأستغراب ؛ بالله تركي وش فيه ؟
تركي هز راسه ؛ الحين اعلمك بقول لواحد من العمال يروح يحلب النياق بدالي
اروى ؛ ياخي ما ابي خلاص بس قل
تركي ضحك ؛ بعلمك والله بس عشان مايقولون نايف وهاجر وين الحليب خليهم يحسبونا حنا حلبنا عشان كذا تأخرنا لأن سالفتي طويله انا
وتنهدت اروى ووقفت تنتظر تركي اللي دخل لجهة القسم حق العمال وقربت عند شبك الغنم تشوفهم طلع تركي والعامل وراه بسطل وقال تركي ؛ حكيم اذا حلبتهن هات السطل انا اوديه
حكيم هز راسه ؛ ان شاء الله
وراح ورا جهة شبك النياق ومشى تركي لأروى اللي قالت ؛ تركي ابي اشوف الارانب
تركي ؛ تعالي تعالي نواس عندهم نشوفه يمسك لنا واحد
ومشت معه لورا شبك الغنم عند شباك الارانب وقال تركي ؛ سلام عليكم صباح الخير نواس
نواس ؛ وعليكم سلام صباح النور
تركي ؛ كيف حالك
نواس ؛ الحمدلله
تركي ؛ بالله طلع لنا ارنب كان قدرت
هز راسه نواس وجلس عند حفرتهم يحاول يطلع شي وضحك وهو يهز راسه ؛ والله مافي كلو نوم
ضحك تركي وابتسمت اروى وقال تركي ؛ خلاص خلها ان طلعت جب لنا
ومشت اروى لقدام شوي عند شبك ثاني وقال تركي ؛ تبين حمامه
واشر على الشبك اللي وراه ؛ ولا من فروخ الدجاج
اروى ضحكت ؛ فيه صوص اصفر ؟
تركي هز راسه بضحك ؛ فيه تعالي
ومشى يفتح قفص صغير بجنب شبك الدجاج وطلع لها صوص صغير وضحكت اروى ؛ يازيينه
ومدت كفوفها وحطه تركي فيهم يسكر القفص ووقف يربط ثوبه وضحك وهو يأشر ؛ شوفي هذي امه اللي تعاينك لو افكها عليك الحين وصلتك البيت ركض
اروى ضحكت وهي تشوفه الدجاجه بالقفص تناظرها ومدته لتركي ؛ خلاص رجعه حرام خافت عليه
واخذه تركي بضحك وهو يرجعه القفص ؛ خافت عليه ولا خفتي منها
ضحكت اروى وهي تنفض يدينها وتكتفت ؛ اقول بس ماعلمتني انت وش سالفتك
تركي وقف وهو يبتسم ويمشيها معه ؛ اييه ايه ابشري بعلمك وتعلميني
اروى ؛ وش اعلمك عنه ؟
تركي ؛ عن شموخ
اروى ابتسمت ؛ شمووخ .. ماصار شي تقول ولا هونوا
تركي تنهد ؛ لا مب عن خطبتها ادري لأن لو هونوا بتجيني تركضين
اروى ؛ ها اجل عن وشو
لفت تركي للمكان ؛ خلينا نجلس هناك واعلمك
وكملت تمشي معه بأستغراب وجلسوا بمكان بعيد شوي
تركي ابتسم ؛ تذكرين يوم جيتي للدوانيه انتي وشموخ ؟
اروى هزت راسها وكمل تركي ؛ تدرين ان عيسى يوم شاف رغد كانت شريفه عنده وعلمت امي وهذا اللي خلاها تخطبها له لكن انتي ليه ماعلمتي امي اني شفت شموخ وقتها ؟
اروى بصدمه ؛ وصارك شفت شموخ ذاك اليوم ؟!
تركي عقد حواجبه ؛ كيف ماشفتها وانتي وقتها جايبتها معك الدوانيه ولا عليها غطا ولا جلال
اروى ؛ بس انها انحاشت ورا الباب على طول متى امداك ! ... المشكله انك ما التفت حتى دخلت وناظرتني وقلت لك شموخ هنا وانت تناظرني وصديت وطلعت كيف شفتها
تركي ابتسم بضحك ؛ والله اني شفتها لو تبيني اوصفها لك وصفتها ، ماتبيني اشوفها وهي وراك وقفتي تغطين عليها تحسبين نفسك طويله
اروى سكتت بصدمه ؛ بس انا متأكده انك مالمحتها حتى وقتها قلت لشموخ انه ماشافك
تركي ؛ وهي وش قالت ؟ والله ان عيني طاحت بعينها وشفتها
اروى سكتت ثواني تتذكر وناظرته ؛ وش كان لون لبسها
تركي ابتسم ؛ بني مثل لون شعرها ، حتى شعرها ترا شفت طوله لنص ظهرها
اروى ناظرته بصدمه ونطقت ؛ ايهب يالرجال بسم الله
ضحك تركي وكملت اروى ؛ نعنبوا بليسك والله انك من اول لادخلت وصدمتني وانت عينك بعيني ماشلتها الا يوم صديت متى لقطتها
تركي بضحك ؛ اول لادخلت طاحت عيني عليها شفتها قبل اشوفك وتصدميني وانتي جايه طايره ، وش كنتوا جايين له وقتها ؟
اروى ؛ ناخذ شاحنها مدري من سارقه انت ولا نايف
تركي عقد حواجبه بأستغراب ؛ شاحنها ؟
اروى ؛ ايه كانت مضيعته اول لاجو ولقيناه بالدوانيه
تركي ابتسم وهو يتذكر ؛ عليه لون وردي ؟
اروى هزت راسها وضحك تركي ؛ احلفي انه شاحنها !
اروى ؛ والله ، خلنا الحين علمتك عن شموخ وش تبي تعلمني عنه انت
تركي تنهد ؛ ياليتك قلتي لأمي وقتها اني دخلت الدوانيه حتى لو ماكنتي تدرين اني شفتها
اروى ؛ والله ان تكفخني شموخ هي هاوشتني عشاني سحبتها ندور الشاحن وهي ماعليها طرحه ولا جلال وشلون لو علمت عليها بتذبحني
تركي ابتسم بقهر ؛ هي تبيني؟
اروى ؛ والله اللي اشوفه انها تبيك بس تبي تفتك من ولد عمها بدون مشاكل
تركي ؛ ولو اقول لك ان الحل عندك ولو سويتي اللي بقول لك عليه بقدر اخطبها لو مارفضت ولد عمها
اروى ؛ والله ماقول لا ودي تاخذ شموخ اليوم قبل بكره
تركي ابتسم ؛ والله انك كفو .. اجل اسمعي ، بيجي ابوي بعد شوي ولا الظهر وانا بلهيهم كلهم وتاخذين ابوي وتقولين له ....
..........••..........
بعد كم ساعه
في بيت ابو هادي
كان هادي بغرفته عند الشباك ساند راسه يناظر الجو ودخلت ام هادي والتفت لها واعتدل ؛ هلا يمه
ام هادي ابتسمت ؛ احسبك نايم ، علامك قاعد هنا تعال ياحبيبي اجلس معنا
هادي ابتسم بخفه وهو يسكر الشباك ؛ يلا شوي وجاي
ام هادي وهي تمسح على كتفه ؛ امس دقت امي وسألت عنك تقول وشلون الرضي بس ماعلمتها انك بالمستشفى قلت مع ابوه وتسلم عليك
هادي تنهد ؛ الله يسلمها ، زين ماعلمتيها
ام هادي ؛ طيب وش رايك نروح لها اليوم حتى ابوك يقول بيسير على عمي
هادي صد بضيق ؛ والله يمه مافيني حيل اقابل احد تعبان
ام هادي ؛ بسم الله عليك بس نبي نسلم عليهم ونرجع
هادي ؛ روحي انتي وابوي وحمد وشهد اذا يبون انا قولي يجيكم بعدين ، ولا خليهم هم يجون ازين
رفعت حواجبها ام هادي بأستغراب ؛ وش تغير ؟ كنت تحب الديره ماتصدق نروح
ناظرها هادي بقهر ونزل عيونه وكملت ؛ ولا لايكون حب الديره من حب بيان؟
هادي بضيق ؛ يمه!
ام هادي قاطعته ؛ هادي وش حادك تحبها! بيان ماتصلح لك المفروض ماتفكر فيها حتى .. انا بكلمك من ذاك اليوم لكن ما ابي اكدرك قلت كم يوم وتنسى بس اشوفك تعبت وحالك تغير بسببها ليه ياهادي؟
سكت هادي وهو يمسح وجهه بضيق وتنهدت
ام هادي ؛ بيان تراها آخذه طبع امها وطبعها شين والله شين وحتى ابوك يقول جدك كان يهاوش عمك على طبع ام حمدان ويقول بيان لاتاخذ طبع احد يقصد امها ، وانا والله ماامدح شهد عشانها بنتي لكن على كلام جدك يقول شهد طبعها هذا هو ما اخذت طبيعة احد ولا يغيرها احد وهذا اللي مخليه يحبها اكثر من بيان وانا اعرفها بيان اكثر منك واقولك ماتصلح لك ياهادي!!
هادي ناظرها بقهر ؛ ماقلت شي انا ولا ابيها كنت افكر اخطبها وانخطبت تضايقت شوي ونسيت ماعاد فكرت فيها ، وتعبي ماله دخل فيها ولا.. قاطعته ام هادي بعتب ؛ لاتكذب ياهادي انا اعرفك والله انه كله بسببها من يدك يوم كسرت الدريشه عشان تطلع وابوك سكر الباب عشان سالفتها وشلون ماهو سببها؟! .. اصلا حتى ابوك ماوده ياخذها لك يعرفها ويخاف ماتتفاهمون وتصير بينه وبين عمك مشاكل وعمك محد يقول له كلمه الا ويتهاوش فكنا لاتجيب مشاكل ولاتتعب نفسك خلاص اخذت ولد خالتها اللي اكيد ماخطبتها لولدها الا وهي عارفه طبعها! هي وامها خوات ويتفاهمون فكنا من المشاكل تعرف عمك واخلاقه انسى ولاتتعب نفسك وتتعب ابوك وتتعبني معكم الله يرضى عليك
سكت هادي وهو يجلس على السرير ويسند راسه على كفه ؛ والله يايمه اني مابيها الحين ولا ابي سيرتها بنساها بس لاتجيبين طاريها انا ماجبته ولا قلت شي انتي تكلمتي ولا انا مطنش السالفه
ام هادي ؛ والله ياحبيبي ان بلاك يوم تسكت وتطنش لو تكلمت ماصار اللي صار
هادي ناظرها ؛ يعني لو تكلمت من قبل بتخطبينها لي ؟
ام هادي ؛ ولو قلت لي كنت بعلمك انها ماتصلح لك وبصحيك قبل تعلق وتنصدم بعدين ، بس علمني الصدق انت تحبها ولا بس تفكر ؟
هادي اخذ نفس بقهر وهزت راسها ام هادي بفهم ؛ تحبها ياهادي ، بس صدقني لو زوجتك ياها ماراح تناسبك ابد وبتندم انك اخذتها زين انها راحت صدقني انه خير لك فيه احسن منها لو تاخذ بنات الدنيا كلها ولا تاخذ بيان بتقول ازين ، وبلقى احسن بنت اللي طبعها منها ولا تشبه احد واحسن بنات الرياض وابشر بس لاتخليني اعيد وازيد بسالفة بيان
هز راسه هادي ومسحت ام هادي على كتفه ؛ الله يصلحك ويرزقك ازين منها ومن طبعها
سكت هادي وكملت امه ؛ واليوم بتروح معنا ولا بنمر على احد عند جدتك وبدوانية ابوي يجي عمي راجح وتسلم عليه ابوك من كم يوم يبي يروح له ماوده يقطع عنه وهو عنده قريب وانا بعد اهلي كلهم هنا وقريب ليه ماروح
هادي هز راسه ؛ روحوا يمه روحوا
ام هادي ؛ وانت معنا والله ماتجلس وتكدر نفسك على شي مايستاهل رح جدتك تبيك اكبر احفادها واغلاهم تراك لاتزعلها
سكت هادي ومسكت يده ام هادي وهي تقومه ؛ والحين تعال معي نجلس ونسولف من زمان عن سوالفك وضحكك يلا كلهم يبونك تجي
وتنهد هادي وهو يقوم وطلع ورا امه اللي فتحت باب الحوش وهي تشد على شرشفها وابتسمت وهي تشوف حمد عند ابوه يولع بالحطب وشهد جالسه تشرب شاي
ام هادي ضحكت ؛ ها ما اشتبت ناركم
ابو هادي ؛ والله كتمتنا الحطب جايه ماء الظاهر كله دخنه
شهد وهي تشوف حمد يكح ؛ انت بعد لاتموت علينا بخاخك مخلص
ابو هادي هز راسه بأسى وهو يضحك ؛ هذا كل شي فيه ربو وفقر دم وضعف نظر وخر وخر وراك
ام هادي ؛ هادي هادي جا خلوا النار لشبابها
حمد جلس ؛ شبها ياشبابها انت وابوك
ابو هادي ضحك ؛ انه حارق دمك ماحولك شب انت
ضحكوا وابتسم هادي وهو يشبها مع ابوه واشتبت بعد دقايق وقال ابو هادي وهو يشيل المنقل ؛ ابعده شوي لايكتمنا الدخان كله بالمظله بعده ورا
شاله هادي وهو يبعده ورجعوا جلسوا وصبت لهم ام هادي شاي وهي تمد لهادي كوبه ؛ ها ياحبيبي اشرب وتدفى
حمد ؛ وانا حتى ماء ماتعطيني
ام هادي ضحكت ؛ شف هذا هو بجنبك
شهد اخذته وهي تمده له ؛ هاك ولا تزعل
حمد ؛ ايه انتي وخيتي كفو
ابو هادي ؛ الا اقول ياهادي للحين تبي خيل ؟
ناظره حمد والتفت لهادي اللي تنحنح ؛ هلا .. ايه بس بعدين اسبوعين ولا ثلاث واشتري ان شاء الله
ابو هادي ؛ ليه مب الحين
هادي ؛ بسوي له غرفه ولا ساحه ورا البيت ولوقتها تهون يدي ان شاء الله
ابو هادي هز راسه ؛ اييه ، ووش الخيل اللي بتشتريه
هادي ابتسم ؛ اللي ماهو مشتري عربي اصيل لايشتري
ابتسم ابو هادي ؛ اي والله صدقت ، وتقدر تدربه عاد ؟
هادي هز راسه ؛ ان شاء الله اللي تعلمته بيدربه اعرف له ماعليه
..........••..........
مزرعة ابو راشد
كانوا كلهم بالخيمه وابو راشد وراشد جايين من نص ساعه ووقف نايف وهو يحط فروته وياخذ جاكيته ؛ يلا باقي ربع ساعه بروح الدوام انا
ابو راشد ؛ الله يستر عليك سيارتك ماجيت عليها ؟
نايف ؛ لا جينا مع تركي حاطين اغراض بالحوض مانقدر بسيارتي مافيها
ابو راشد ؛ ايه كان جيت وراهم ، اجل خذ سيارة تركي
تركي ؛ رح المفتاح بالسياره
نايف هز راسه وهو يطلع ؛ يلا اجل فمان الله
هاجر ؛ استودعناك الله
ابتسم نايف ومشى للسياره ركب وهو يحرك لدوامه
اروى ؛ راشد ليه ماجبت ناصر وجوري حرام يحبون المزرعه
راشد ضحك ؛ والله هناك عندهم وراعين خوالهم وخالاتهم مستانسين معهم
هاجر ضحكت ؛ اجل بيسحبون علينا يستانسون هناك اكثر
هز راسه راشد وهو يتقهوى وناظرت اروى تركي واشرت له بحواجبها ورد لها الحركه ولفت لأبوها ؛ يبه ابي عنب
ابو راشد ابتسم ؛ ابشري والله يالعنقود رح رح ياتركي لقط لها اللي مستوي كله
اروى ابتسمت وهي تقرب تجلس عنده ؛ لا يبه ابيه من يدك انت ازين
ضحك راشد وابتسم تركي وهو فاهم قصدها وناظرتها هاجر ؛ بسم الله روحي انتي لقطيه تدلينه
اروى ؛ وانتي وش عليك ابيه من ابوي ماضنتي يردني
ابو راشد بضحك ؛ لا والله ما اردك يلا قومي
ابتسمت وهي تقوم وناظرت هاجر ؛ انتي لاتجين تبين روحي لقطي تدلينه
الكل ؛ ههههههههههههههه
هاجر ؛ اصلاً ماني جايه مابيه
وابتسمت اروى بضحك وهي تشد على شرشفها وطلعت هي وابو راشد ومشوا لجهة الزرع ومن دخلوا بين النخل ماشين لشجر العنب تنحنحت اروى وهي مبتسمه ؛ ااء يووه اذكر يوم جينا حنا واهل عزام ياحليلهم
ابو راشد ابتسم ؛ اييه يجون ان شاء الله وناخذهم معنا مره ثانيه
اروى ؛ وشموخ ياحليلها ويازين سوالفها تهبل صارت صديقتي خلاص
ابو راشد ؛ كبرك هي ؟
اروى ؛ لا اكبر مني ومن هاجر
ابو راشد هز راسه ؛ الله يستر عليها تجي قريب وتشوفينها
اروى سكتت لثواني وهي متوتره ولا تدري شلون تتكلم اخذت نفس بتوتر ونطقت ؛ يبه ودي اقولك شي بس اخاف تزعل ولا تعصب
ابو راشد عقد حواجبه والتفت لها ؛ مسويةٍ شي غلط انتي يوم ازعل واعصب منه ؟
اروى هزت راسها بأرتباك ؛ لا والله بس اني مره رحت الدوانيه وانا ماخذت جلالي واخذت معي شموخ وهي بعد ماعليها غطى
وسكتت ووقفت بتوتر من لف ابو راشد وهو يوقف ؛ ايه؟
اروى ؛ ووماكان فيها احد الدوانيه رحنا نجيب الاغراض وانتوا كنتوا رايحين للمزرعه بس وقتها نسى تركي حاجه ورجع ياخذها ... يبه تكفى لاتعلم احد ترا امي لو درت بتعصب علي هي دايم تهاوشني عند الجلال والغطاء
ابو راشد هز راسه ؛ لا لا ماعليك كملي وبعدين ؟
اروى ؛ وجا تركي للدوانيه وحنا كنا فيها انا وشموخ وماعلينا غطاء والله ناسين ونحسبكم قد روحتوا .. وو..وشاف شموخ بالغلط وانا خفت وقتها وقلت اطلع وصد وطلع وحنا هجينا داخل ولا علمت احد يومها خفت تهاوشني انت ولا امي وشموخ بعد خفت يهاوشونها امها وعزام ولا تكلمنا ولا احد درا للحين
ابو راشد ؛ وتركي!
اروى بتوتر ؛ ششافها بالغلط والله يايبه بالغلط وطلع بعدها وراح ولا جاب سيره من وقتها وانا ماتكلمت شفته ساكت وسكت خفت اتكلم يهاوشني
ابو راشد ؛ وعلامك تعلمين الحين ليه ماقلتي لأحد ؟
اروى ؛ كنت بقولك انت لحالك بس ماقدرت الا الحين ولأنك ماتعصب علي وانا حلفت لك انه بالغلط وماراح تخلي احد يهاوشني
ابو راشد تنهد ؛ الله يصلحك وانا ابوك لو انك معلمتني من يومها ، متى شافها تركي قبل كم يوم ؟
اروى ؛ ققبل اسبوعين بنفس اليوم اللي جت فيه عبير هو شافها العصر
ابو راشد ؛ ومتأكده انه شافها ؟
اروى هزت راسها ؛ اييه يايبه عينه طاحت عليها يوم ناظرته انا كان يناظرها وقلت اطلع وصد وطلع
ابو راشد ؛ وهي وش قالت ؟
اروى ؛ ماتكلمت عقب ماراح خافت وجلست تبكي عشان كذا ماعلمت
ابو راشد ؛ لاحول ولاقوة الا بالله ليتك معلمتني .. طيب ماجاب سيره هو ولا تكلم!
اروى ؛ يمكن مايبي احد يدري وشافني ماتكلمت ولا تكلم
ابو راشد ؛ وليه محد يدري بالغلط شافها ماهو متعمد يدخل !
اروى توترت ؛ اي والله هو ماتعمد يشوفها وحنا ماتعمدنا نروح بدون جلال كنا نقول بسرعه ناخذ الاغراض ونرجع ماكان فيه احد حتى باب الدوانيه اللي على الشارع كان مسكر ولاسمعناه يوم فتح ، بس اكيد ماهو رايح يقول لعزام شفت اختك بالغلط
ابو راشد ؛ كم عمرها هي ؟
اروى ؛ ٢٣ اصغر من تركي ب ٤ سنين
ابو راشد ؛ ولا جابت لك طاري تركي ابد ؟
اروى ؛ لا كانت تبكي وبعدها سكتت وماتكلمنا يومها عنه ولا جابت طاريه
ابو راشد ؛ ماجاب تركي سيره وهو بعد مايبي يعرس يسكتنا ، طيب ابيه يعرف اني دريت انه شافها بعلمه
اروى ؛ ااء بس اخاف يهاوشني ولا يعلم احد
ابو راشد ؛ لا ماعليك ياويله ان علم ولا هاوشك بكلمه بس قول له اني دريت انه شافها وان كانه بيعرس باخذها له
مسكت اروى ابتسامتها وفرحتها لاتنط على ابوها وتحب راسه وهي هذا اللي تبيه وتركي وعيسى يبونه ان ابوهم ياخذ شموخ لتركي ويعرفون ابوهم لو درى ان تركي شافها بيقول له اذا يبيها بياخذها له وترددت تقول له كلام تركي اللي لزم عليها تقوله وذكرها مليون مره وهي ماودها ابوها يدري لكن تدري لو ماقالته بيكفخها وناظر ابوها وجهها ؛ والله ان فيه شي بعد وشهو ؟
اروى بتوتر ؛ مره قبل يشوفها تركي كنا نسولف انا وياها وقالت يوم انها صغيره جدها الله يرحمه كان يقول اذا كبرت بتاخذ ولد عمها وقاله لأبوها الله يرحمه وكبرت شموخ وبعد مامات جدها وابوها ماجاب عمها طاري كانت على كلام جدها خطبه حتى ماهي خطبه رسمي كلام بس ، وهي تقول لي ماتبيه بس ماودها تصير بينهم مشاكل ولا يزعلون عليها ولا جابوا سيره وهي ماتكلمت
ابو راشد هز راسه ؛ ادري ادري ، عزام يوم خطب شريفه كانوا يبونه لبنت عمه بس هو مايبيها هذي عاد بعايلتهم ان البنت محيره لولد عمها ان كانه يبيها ولا يزوجها
اروى بصدمه ؛ تدري ؟
ابو راشد ؛ ايه ادري امك علمتني وعزام تكلم بعد وقال راضين والبنت تزوجت وانا بتزوج وعطيناه اختك دامنا نعرفه وراشد يمدحه
اروى ؛ طيب وشموخ ؟ بتخطبونها ولا تشوف اهل عمها
ابو راشد ؛ ان كان تركي يبي يعرس اكلم عزام واقوله نبي شموخ وعلى كلامك دامها ماتبي ولد عمها يمكن تبي تركي
اروى ؛ ايه بس لاتجيب طاري انها ماتبي ولد عمها عشان لاتزعل علي ترا هي ماعلمت الا انا
ابو راشد هز راسه ؛ لا ماعليك ماعليك ماني جايب طاري
اروى ابتسمت ؛ ايه الله يخليك لي يا ابوي والله اني عارفه ان انت الوحيد اللي بتفهم ولا بتعصب علي ولا بتهاوشني عشان كذا علمتك ولو انه متأخر بس مافضينا الايام اللي راحت ولا شفتك واجد
ابو راشد هز راسه ؛ ماعليه زين اهم شي علمتيني
ومشى يكمل طريقه واروى معه والتفت بضحك ؛ اثاريك ماتبين عنب من يدي تبين تعلميني السالفه
اروى ضحكت ؛ لا والله مايحلا الا من يدك بس تذكرت السالفه يوم ذكرت علي شموخ
هز راسه ابو راشد بأبتسامه ومشى ياخذ لأروى عنب اللي وقفت عنده وهي تحط بطرف شرشفها وتجمعه
ورجعوا للخيمه وابو راشد كل شوي يناظر تركي اللي صاد بتوتر وهو عارف لو طاحت عينه بعين ابوه بينكشف ويدعي انه اقتنع بكلام اروى اللي لما قاله لها ماقال انها فكرة عيسى ولا علمها ان عيسى ونايف يدرون لأنه يعرفها مافيها صبر ماراح تفهم بتحسبه قايل لهم عنها وهي ماتبي احد يعرف وهو اساساً لاعب عليهم كلهم هم مايدرون ان اروى تدري واروى ماتدري انهم يدرون
•
الظهر قبل الصلاة
كان ابو راشد والعيال للحين بالمزرعه والجو غيم وكان هو وراشد عند الغنم وهاجر واروى قريب منهم عند الأرانب اللي طلعها لهم العامل وجالسين على طرف كل وحده معها ارنب وجا تركي من جهة الشبك اللي فيه اكل الغنم ؛ يبه تراه بيخلص مايكفيها لبكره
ابو راشد ؛ خلاص علم نواس يروح العصر السوق هو وعمران انا بالمحل وبتجي معي انت والعيال
تركي هز راسه ؛ ابشر
ورجع يبلغ العامل والتفت ابو راشد لراشد اللي جا من وسط الشبك ؛ ها يبه هذا زين
ناظره ابو راشد وهز راسه ؛ ايه ايه وده للعمال
ومشى راشد يوديه ورا عند جهة العمال اللي عندهم تركي وجت اروى وهي للحين شايله الارنب بيدها ؛ يبه الجفر " صغير الغنم " هذا لايكون بتذبحونه
ابو راشد ضحك ؛ ايه بنتغداه
اروى شهقت ؛ يويلي حرام صغير بتزعل امه
ابو راشد بضحك ؛ امه قد اكلناها يبوك
اروى بصدمه ؛ ياشيب عيني صدق
وجت هاجر وهي تنفض عبايتها ؛ انتي وين رحتي
اروى ؛ هذا انا مارحت ، وين الارنب اللي معك
هاجر ؛ رجعته الشبك حطي اللي معك وتعالي امسكي لي حمامه
ومشت معها اروى وابتسم ابو راشد وهو يروح عند العيال
بعد دقايق جا نايف ووقف السياره وهو ينزل ويغني بخفوت ومشى للمكان اللي يكتب فيه دايم وكان مربع متوسط شجر يمين الممر ودخل من بينهم وضحك من تذكر كلام تركي اللي كان كاتبه وغنى ؛ غلاب ياهوى غلاب .. ذوبت قلوب الاحباب
كان يغنيها وهو يضحك ويكسر غصن من شجره وهو يكتب " ياديرة اهلي "
اعتدل بوقفته وضحك ؛ اييه وعشانك ياتركي غالبك الهوى بكتب عنك
ورجع يكمل على اللي كتب " ياديرة اهلي والاحباب "
ومشى للخيمه وهو يغني ودخل وماكان فيها احد وتوقع انهم عند الغنم او الزرايع وطلع جاكيته وعقاله وحطهم ولف شماغه عصبه واخذ فروته يلبسها ومشى لجهة الغنم
ولمح ابوه اللي واقف وعنده تركي وراشد ونواس اللي يصلخ وراشد ماسك اللحم يغسله وتركي واقف بالمويه يصب عليه ؛ سلاام عليكم
التفتوا له كلهم ؛ وعليكم السلام
ابو راشد ؛ جبت امك واختك
نايف ؛ عيت والله دقيت عليها قبل اطلع عشان يجهزون امرهم ونجي بس قالت برد
ابو راشد ؛ اجل علمها لايسوون غدا بنرسل لهم
نايف ضحك ؛ علمتها وقضيت قلت دامكم بتقعدون يجي الغداء لعندكم
ابو راشد هز راسه ؛ زين ، عاونهم عاونهم خلنا نخلص بسرعه يلا
نايف وهو يروح لهم ؛ ابشر
ومشى ابو راشد عند البنات يشوفهم ولقاهم جالسين قريب شبك الحمام وكل وحده ماسكه حمامه وتمسح عليها وابتسم ؛ هاه جازت لكم القعده هنا
اروى ضحكت ؛ اي والله ولا الدم ونذالة تركي لالحقني براس الذبيحه
ابو راشد ضحك ؛ لا ماعليك مايقربك
هاجر ؛ يبه امي وشريفه ماهم جايين
ابو راشد ؛ لا والله يقولون برد ولا كان بيجيبهم نايف
هاجر ؛ وجا ؟
ابو راشد ؛ ايه جا عند العيال قوموا نروح الخيمه تجهزون اغراض الشوي خلصنا
وقاموا البنات وكل وحده فكت الحمامه اللي بيدها وطيرتها وطاروا لفوق قفصهم الين دخلوا الشبك ومشوا ولفت اروى ؛ بغسل امشي هاجر غسلي
وراحت هاجر معها للجهه اليمين وكمل ابو راشد للخيمه وجلست اروى على الحجر وهي تغسل ونزلت غطاها وهي تتوضى ؛ يويلي يابرد الماء هذا وحنا الظهر
هاجر وهي تغسل بجنبها ؛ برد اليوم
وخلصوا ومشوا واروى تزين غطاها ودخلوا الخيمه يجهزون اغراض الغداء ودقايق وجا نايف بصحن اللحم وهو يحط عليه الملح والبهارات ومعه البنات يساعدونه وشوي دخلوا راشد وتركي وهم ينفضون يديهم فرواتهم ووقف ابو راشد ؛ يلا يلا صلينا توضوا والحقوني
العيال ؛ ابشر
وطلع ابو راشد ووقف يأذن وراحوا العيال يتوضون ونادى ابو راشد ؛ صلاه صلاه ياحكيم يانواس صلينا
وجو العمال والعيال وصفوا كلهم يصلون
وبالخيمه بعد عند البنات
اما عمران وعبدالسلام بالمحل وكان ابو راشد اذا مافيه احد من العيال او كلهم مو موجودين بالديره يوصي العمال يجلسون للصلاة ويصلون بالمسجد ويجون المهم يصلي منهم احد بالمسجد
وبعدها كملوا يجهزون الغداء
رفع نايف جواله وتأفف بقهر ؛ الابراج علامها دايم بالمزرعه زينه
ابو راشد ؛ يمكن بيجي مطر ، ليه وش تبي بها
نايف ؛ بكلم مشاري اشوف ليه ماداوم اليوم
اروى رفعت عيونها لهاجر تحاول تلمحها بس كانت هاجر ساكته وهي تمثل انشغالها
تركي ؛ تلقاه آخذ اجازه خله
نايف التفت له ؛ ابك لا تخيل موصي واحد يسد عنه وانا ماقال لي وش عنده
راشد ؛ مايبي يشغلك خله تلقاه مشغول
وتنهد نايف وحط جواله وقام تركي وهو ياخذ الصحن ؛ اروى خذي الرز غسليه
فهمته اروى وهي تقوم ؛ امش معي والله ماروح لحالي
وابتسم تركي وهو يقوم معها وطلعوا ومن بعدوا عن الخيمه حاوط بذراعه كتفها وهو يضحك ؛ كفو الفطينه ، بشري تكفين
اروى وهي تتنهد بقهر وبتمثيل ؛ ماصدق ياتركي قال اكيد ماشافها لاتجيبين طاري
واقف تركي بصدمه ونزل يده ؛ اسألك بالله!
اروى هزت راسها ؛ شكله يكذبك عشانه مايبي يخطبها لك وهي مخطوبه
تركي ؛ اروى تكفين !
اروى كانت بتكمل بس من ناظرت خيبته وقهره وعيونه رحمته وسكتت لثواني ونطقت ؛ يالوفي امزح
تركي اللي حس بهبوط لاشعوريا ضرب كتفها وهو متعود على العيال لارفعوا ضغطه وكانت ضربته شوي قويه وشهقت اروى وهي تردها له ؛ يهب عليك كتفي كسرته
تركي تنهد بتوتر وهو يصد يمسح وجهه وهو صدقها وتنحنح بعصبيه ورجع يلتفت ؛ والله ان دمي نشف من كلامك وش هالمزح !
اروى خافت من عصبيته وهي تمسح على كتفها بخوف ؛ وش دراني بتصدق على طول قلت لك امزح ولا ناويه اكمل الين يجي ابوي يسألك عن السالفه
تركي سكت لثواني وهو عاقد حواجبه بعصبيه وكملت اروى ؛ علمته وصدقني وقلت له اللي وصيتني وقال هو ماجاب طاري لو قال بعرس بقول له عنها كانه يبيها نخطبها له يعني صدّق وبيزوجك ياها بعد بس انتظر كم يوم ورح قل له بتزوج وهو بيقولك بزوجك شموخ اثقل شوي بعدين قل خلاص وان سألك شفتها قل ايه بالغلط وقالت لي اروى صد لايطلع كلامي وكلامك عكس ثم يكشفنا
تركي كان يبتسم شوي شوي كل ماتتكلم وضحك اخر شي وهو يقرب يحب راسها ؛ جعلني والله ماخلا يالعنقود يالسكر المعقود انتي
اروى ضحكت وهي تدق كتفه بخفه ؛ افا عليك ماني هينه ترا
تركي ابتسم ؛ والله انك قدها وقدوود اي والله ، علميني علميني وش قلتي له
اروى اخذت الصحن من يده وهي تمشي قدامه ؛ قلت له اللي قلت لي بالحرف وعلمته انها مخطوبه وماعنده مشكله يقول دامه شافها لو يبيها نخطبها ، الحين خلنا نرجع بسرعه لايشك فينا بعدين اقولك بالتفصيل
تركي مشى معه وهي تجلس تغسل الرز ونطق بتنهيده راحه ؛ انا وش اهديك آمري بس والله ماقول لا
اروى ضحكت ؛ يبيلي افكر فيها هذي .. بس الصدق دامك بتاخذ شموخ هذي احسن هديه والله ياتركي انها تنحط على الجرح يبرى
تركي حط كفوفه على قلبه بأبتسامه ؛ تعلميني فيها
ضحكت اروى وهي تقوم ؛ منتهي انت اعجل اعجل ما ابي نتأخر
ومشوا للخيمه واروى مستعجله عشان لايشك ابو راشد وتركي يتمشى بحب ولهفه وهو يتخيل اليوم اللي بتكون شموخ له وماكان متوقع ان على هالأيام اللي حاول فيها مع امه بتكون ولا شي اروى اللي بدقايق بس اقنعت ابوها وفعلاً اروى ذهينه وذكيه وتعرف تتصرف ومافيه شي ماتعرف له واذا حطت براسها حاجه تجيبها غصب
ودخلوا يجهزون الرز وتركي مع اروى اللي تأشر وتهدده لايبتسم لكن مافيه فايده ومثلت انها تسولف عليه وتضحكه عشان لايستغرب احد من ابتساماته وضحكه ونايف ملاحظه ومسك ابتسامته وتطمن من عرف ان الامور طيبه والسالفه تمت ومشت
جهز الغداء وكانوا البنات يحطون الرز بصحنهم وصحن العمال وعلى جنب لأمهم وشريفه والعيال مثلهم يقسمون لحم الشوي ووقف راشد ؛ ها من يودي غدا امي وشريفه
ابو راشد ؛ تبون نتغدا ونرجع على طول وناخذه معنا
اروى وهاجر ؛ لااا
ابو راشد ؛ هاه اجل
اروى ؛ نبي نجلس للعصر يبه بدري
راشد ؛ اجل من بيروح ساعه روحه ورجعه بيبرد الغدا
تركي ؛ طيب عبدالسلام وعمران يرجعون السوق بعد الغداء خله لاتغدينا ياخذه ويوديه لهم ويروح المحل
ابو راشد ؛ يعني حنا مانروح بعد الغدا
اروى ؛ لا والعمال يحطونه عند باب البيت حنا مانبي نرجع الحين
ابو راشد التفت للعيال ؛ اجل يلا يلا ودوا للعمال غداهم بسرعه ترا تأخرنا عليهم وعلمهم قبل لايروحون يجون ياخذون الغدا
اخذ نايف الصحن ؛ ابشر بوديه انا
ومشى لجهة العمال حط لهم غداهم ورجع وهو يجلس ويفسر كم ثوبه ؛ ايييه والله ماشاء الله اللحم خفيف ومستوي صح
ابو راشد ؛ ايه صغيره الذبيحه ، عطني عطني العسل وراك راشد
اخذه راشد وهو يمده لأبوه اللي فتح العلبه وهو يحط على اللحم ونطقت اروى ؛ لا لايبه انا لاتحط لي ماحبه
نايف ؛ ليه والله انه زين جربيه مع الشوي غير شكل
هاجر ؛ اروى يالله تاكل اللحم تحب الدجاج بالشوي اكثر كيف عاد عسل
راشد ضحك ؛ انتي ماشاء الله اشوى منها
اروى ؛ ايه اشوى مني بس فكوني لاتحطون عند مكاني عسل
وابتسم ابو راشد يحط للباقين على اللحم ؛ والله احسن شي مع اللحم المشوي العسل
وكملوا غداهم وخلصوا وعطوا عمال المحل قبل يرجعون غدا ام راشد وشريفه واخذوه وراحوا
•
تغدوا وخلصوا وكان ابو راشد جالس يشرب شاي والباقين حول النار يتدفون
هاجر ؛ مانطلع نتمشى بالمزرعه ؟
راشد ؛ والله شوفة عينك برد يالله نتحرك
نايف اللي كان متكي على راشد ويتدفى معه ؛ خلونا نتدفى شوي ونطلع نتمشى فيه شمس تدفينا
ابو راشد ؛ ماهو برد والله خذوا فرواتكم وانتوا شراشفكم وتمشوا ترا ماضنتي عقب العصر نقعد بيبرد الجو زياده
اروى ؛ ليه كم الساعه الحين ؟
تركي ؛ ٢ ونص
ابو راشد ؛ وانا قبل صلاة العصر بروح الديره اصلي بالمسجد واروح المحل يعني ساعه ولا اقل تمشوا فيها وخلونا نرجع كلنا مره وحده
اروى ؛ ليه يبه عادي خلنا بنجي قبل المغرب ان شاء الله
ابو راشد ضحك ؛ هما انتي قبيل تقولين العصر ، لا لا والله ان خليتكم امسى الليل وانتوا ماجيتوا لو انه بالصيف ماعليه بس برد واليوم بعد اكثر من الايام اللي قبل
راشد ؛ يمديكم بساعه تفرون المزرعه بعدين شفتوا الغنم واللي عندها ماباقي الا الزرع
ابو راشد ؛ لا اقل من ساعه بعد والله برد عليكم نص ساعه وامشي انا ونوصل قبل ٤ اصلي واروح
هاجر ؛ يببه تكفى والله ما استانسنا خلنا نلحقك بعد صلاة العصر وقبل ٥ وحنا بالبيت
سكت ابو راشد شوي يفكر ؛ اجل كيفكم بس تراه برد ان طلعتوا الحين بترجعون تقولون مشينا
ضحك تركي ؛ اجل قوموا اللي بيروح معي عند النخل يجي
قاموا كلهم وبقى راشد وابوه وقال نايف بضحك ؛ ها ابو راشد وولده شيبتوا ؟!
ابو راشد ضحك ؛ والله انا بحق لكن اخوك صاير شايب
تركي ضحك ؛ شباب ابو راشد بس ولدك شيب قبلك
راشد بضحك وهو يشرب آخر بيالته ؛ لا خلاص هه قمت ، انت مب جاي معنا يبه
ابو راشد ابتسم ؛ لا لا والله بتقهوى عند هالنار واعين من الله خير
هز راسه راشد وقام وهو يلحقهم من طلعوا ومشوا كلهم لجهة الزرايع اللي يسار الخيمه وورا كانت شبوك النياق ووقف نايف ؛ اصبروا اصبروا
ووقفوا معه والتفتوا عليه ؛ وش !
نايف مد رجله وهو يحط خط وضحك تركي ؛ ياحبك للسباق
راشد رفع يديه وضحك ؛ انا الحكم توني متغدي فكوني
نايف نزل نعوله وهو يمسكهم ؛ يعني حنا اللي ماتغدينا نهضم نهضم يلا ، نستابق الين النخله هذيك اول واحد يوقف يطلب اللي يبيه طلب واحد منا كلنا
وقف راشد بجنبه وهو يضحك ومن بعده تركي اللي رفع ثوبه وفروته وبجنبه اروى اللي شدت على شرشفها وهاجر اللي تثبت غطاها وعد نايف ومن نطق ثلاثه ركضوا ركضض يتسابقون
راشد من البدايه كان مستسلم كان يركض بشويش وهو يضحك وتركي ابتلش بفروته ونعوله ونايف اللي دعس على شوك بالغلط ويالله يركض ومن حسن حض هاجر واروى اللي كانوا بالمقدمه وهم مب سريعين ابد بس ان العيال ابتلشوا وكان الفوز من نصيب اروى اللي وقفت عند النخله وهي تاخذ نفس وتضحك ؛ فزت فزت
هاجر وقفت وراها على طول وهي تضحك وتصارخ ؛ اههب شلون فزتي
اروى جلست بتعب وقالت بضحك ؛ قولي ماشاء الله حتى انتي منتي بعيده
ضحكت هاجر وهي تجلس عندها بتعب ؛ ماشاء الله
وجو العيال يمشون ويضحكون وجلس نايف وهو يطلع الشوك من رجله ؛ يهييب ابك انا دعست على قشعه كلها شوك
هاجر ؛ والله استغربت محد يسبقك انت
تركي جلس وهو يحذف فروته وجلس ياخذ نفس ؛ انا اشغلتني هالفروه ولا كان وصلت اول واحد
جا راشد اللي يضحك ؛ ها من فاز
التفتوا العيال يناظرون البنات وعدلت اروى شرشفها بغرور ؛ انا طبعا
العيال ؛ اخصصص
هاجر ؛ والله تخيلوا ماكانت بعيده بس هي فازت
نايف بقهر ؛ خلونا نعيده واغير طريقي والله لا اسبقكم
اروى ؛ مافيه فزت انا وماعليكم الشرط يناسبنا كلنا
هاجر ؛ هاه اشرطي الله يستر
اروى ؛ تقنعون ابوي وامي ننام بالمزرعه الليله
راشد ؛ وش قالت قالت يناسبنا كلنا الا بيذبحنا ابك برد برد والله ماتنامين بهالبرد
تركي ؛ هذا ابو راشد الثاني المفروض قلتي نقنعه معهم
نايف ؛ والله وهو صادق برد الحين جامدين وهو الظهر وشلون بالليل
اروى ؛ والعمال شلون ينامون هنا ؟!
هاجر ؛ العمال ببيت وعندهم دفايه ونار ومافيه هوا يدخل منا ولا منا حنا خيمه جلسه بس ويالله
اروى ؛ نسكر ابوابها ونجيب بطاطين ونشب نار
راشد ؛ مافيه لاتحاولين اشرطي غيرها
تركي ؛ والله شوفي هي زينه النومه بس والله اليوم برد لو اننا على آخر الشتاء اهون الحين بدايته كل شوي الجو يبرد زياده
نايف ؛ غيرها اخلصي نبي نشوف الزرع مافيه وقت
اروى تأففت بقهر ؛ اجل تودوني لأسواق الرياض
تركي ضحك ؛ هذي والله بعيده منتي طابتها
نايف ؛ معصي وش فيها اسواقنا كل شي عندك
اروى وهي تقلدهم بأستهزاء ؛ منتي طابتها معصي ، اقول بس غيركم يقول لأخته آمري ويوديها بدون لاتشرط بعد
راشد ضحك ؛ آمري بس ابوي بيعيي يقول وش ناقصك من سوقنا
هاجر ؛ الصدق حتى انا ودي عادي نتمشى نشوف التطور اللي يقولون
نايف دقها بخفه ؛ ماغير جدران سوقهم ولا كل اللي تلقينه هنا تلقينه هناك خلي عنك انتي وياها
اروى ؛ انا اوريكم ، اجل ٣ مرات تودوني لسوقنا هاللي تقولون وانتوا تدرون انه كبير مقدر افره واتقضى بيوم واحد
نايف ؛ يعني سوق الرياض اللي بدقيقتين ، بعدين قلت طلب واحد هذا ٣
اروى ؛ لا هو واحد السوق
راشد ؛ هذي هينه كل يوم وحنا بالسوق نخليك تفرينه وش ورانا لاقفلنا المحل آخذناك
تركي ضحك ؛ اي والله نحطها لاجينا ولا رحنا اخذناها
هاجر ؛ اروى وانا معك صح ؟
اروى ؛ ايه تشيلين الاكياس
ضحكوا ودقتها هاجر بقهر وقامت ؛ اقول قوموا للنخل بس
وقاموا بضحك يكملون مشي ودخلوا من بين النخل والزرايع يشوفونها
•

عاد عيدكم وكل عام وانتوا بخير ❤..
بارت قصير تقرونه والناس قيلوله 😂
بكمل لكم عليه بعد👍🏻، تم ✅✅
نهاية البارت..