ياديرةٍ ضمّت كل الأحباب

Part 41

☆ قبل القراءة

صلوا على النبي وقراءة ممتعه 🥹.

.... هادي تأفف بضيق وهو يدخل يتوضى وخلص بعد معاناه من كتفه كل مايرفع يده ودخل للمسجد وهو يصلي وتركي واقف ومتكتف بأستغراب وخوف من حالة هادي ويبي يعرف وش فيه وتوتر من تأخر هادي وهو ساجد لخمس دقايق وتنهد براحه من قام هادي وصلى تركي ركعتين لحد مايخلص هادي
وبعد دقايق سلم وقام تركي وجلس بجنب هادي اللي قال ؛ اقولك السالفه بس ما ابي اي احد يدري عن اللي صار قبل شوي كلله
تركي هز راسه ؛ ابشر والله مايدري به احد
هادي ؛ طيب بكلم مساعد خويي يجي هو يدري بالسالفه بس جوالي مب معي
تركي ؛ الحين تلقاه نايم خله كلها ساعه ويأذن الفجر وتدق عليه ، وانا معك اللي تبيه ابشر
هادي هز راسه وقال تركي ؛ بتقول لي السالفه ؟
هادي ؛ ابد ياطويل العمر السالفه ومافيها اني احب بيان بنت عمي سامي عرفته ؟
تركي اعتدل بتركيز وهز راسه وكمل هادي بضيق ؛ واليوم دريت انها انخطبت ووافقت وراضيه على خطبتها ويوم سألتها وانا ؟ قالت انها ماتبيني من اول اصلاً واللي خطبها ضابط تبيه طمع .. انا من ٦ شهور احبها واحسب انها تحبني صدق ! والله اني مافكرت بيوم انها تكذب علي لأني يوم اشوفها واشوف كلامها معي كنت اقول هذي اكثر انسانه تحبني طلعت تكذب بكل شي لا وتقول كنت ابيك عشان منصب ابوك بس ماخطبتني واللي خطبني الحين ضابط منصب وابوه منصب وساكنين برا الديره ... ياتركي طلعت طمعانه ولا همها حب الشخص همها فلوسه ، والله ويشهد الله علي اني يوم الثلاثاء كنت بقول لها اني بخطبك ولا جت لاكن هي لو انتظرت يومين يومين بس كان الحين هي خطيبتي انا .. كان قريت اسمي انا اسمي اللي المفروض يكون جنب اسمها مهب اسم راكان اللي وافقت عليه وتركتني
تركي اللي كان مصدوم وضايق على هادي مايدري وش يقول له او كيف يواسيه قرب وهو يجلس بجنبه ويسند ظهره على الجدار
تركي وهو يمسح كتف هادي ؛ صدقني انها خيره وبالعكس الحمدلله ان ربي بينها لك يعني تخيل لو كملت بكذبتها عليك وتزوجتها وعشت معها وهي تكذب ! ولا بعدين لو دريت عنها متأخر وانت عندك منها عيال وش بتسوي ؟ بتقول يليتني عرفت كذبتها من زمان كان ماخذتها .. بتتحسف وبتندم ولا بيفيد لاكن الحين والله ماتستاهل انك تتحسف على وحده كذبت عليك وطمعت فيك بالعكس المفروض انك تسجد شكر ان ربي بعدها عنك وهي كذا وخلها تاخذ الضابط وتشبع بفلوسه ان كانها همها وربي بيعوضك باللي تحبك انت ماتحبك عشان شي مصلحتها فيه واذا اخذته تركتك وبيعوضك ربي باللي تنسيك بيان وطوايفها ووالله انها خيره من ربي يوم كشفها لك وخلاها هي تعترف انها تكذب هي يهادي ! مو احد جا وقال لك انها تكذب ولا كان قلنا يتبلى عليها لاكن دام هي اعترفت ترا ابركها من ساعه يوم اعترفت قبل تتزوجها وتنصدم منها
هادي غمض عيونه بقهر وهو يدق راسه بالجدار بخفه ويفكر وتركي خاف ان اللي صار مع هادي يصير له مو ان شموخ تكون تكذب عليه بس انها تروح منه او توافق على ولد عمها وتنساه وبعد دقايق من التفكير التفت لهادي ؛ وشلون اعرف ان اللي احبه يحبني ؟
هادي ناظره وابتسم بقهر ؛ لاتسألني لأني احسب ان محد يحبني كثرها وانكذب علي
تركي سكت وبانت ملامح الضيق على وجهه واعتدل هادي ؛ وانت تحب وخايف ينكذب عليك ؟
تركي تنحنح ؛ مو ينكذب علي بس انخذل
هادي ؛ والله ياتركي انا الحين اشوف ان الحب كله غلط لاتحب كانك تبي نصيحتي
تركي ؛ ياهادي مو ذنبك ليه تندم ؟ ليه ماتقتنع ان ربي صرف عنك شي مافيه خير لك
هادي ؛ الحمدلله لاكن ببقى اشوف ان الحب غلط ومستحيل اعيده
تركي ؛ وانا اقولك انك بتحب وبتنسى الغلط وبتبدله
هادي ؛ ماظنتي بس ان شاء الله ... من متى تحب ؟
تركي ابتسم بضحك ؛ والله اني استحي اقول لك مالي اسبوعين
هادي ابتسم بخفه ؛ دامك على اول الطريق لاتّعلق
تركي سكت لثواني وتنهد ؛ والله اني تعلقت يخوك
هادي ؛ ان كانها تحبك وتبي نصيحتي لاتخليها اخطبها لاتروح منك وتندم
تركي ناظر هادي بتوتر ؛ مخطوبه
هادي سكت وهو يمسح راسه ؛ اذا هي موافقه اتركها
تركي ؛ ماتبيه
هادي ؛ ورفضت ؟
تركي هز راسه ب " لا " وقال هادي بقهر ؛ اجل تكذب عليك افتك منها
تركي ؛ والله ماتكذب انا كلمت امي عنها قلت بخطبها قالت امي انها مخطوبه لولد عمها وكلمتها قالت انها تفكر
هادي ؛ ياسلام ! تفكر بعد
تركي اعتدل ؛ ياهادي افهمني تكفى ، هي ماتحبه ولا تحبني وانا يوم كلمتها زعلت ماتبي تكلم غريب وبعدين لما درت اني بخطبها وقلت لها ارفضي اللي خطبك قالت بتفكر
هادي سكت بأستغراب ؛ دقيقه قل لي السالفه من اولها عشان افهم
تركي تنحنح وهو يقول لهادي بأختصار انها تقرب لهم وكانت عندهم شافها اول مره قبل ١٣ يوم وشافها بعدها وحبها وكلم امها تخطبها وقالت انها لولد عمها وهم عندهم مايخطبون البنت اذا هي انخطبت الا اذا رفضت لاكن هي مارفضت وماتبيه وهو ولد عمها ماودها تصير بينهم مشاكل ، واخر شي تنهد تركي بضيق ؛ هي ماتبيه والله بس ولد عمها وانت تعرف
هادي ؛ والله ياتركي اني مدري وش اقولك اخاف اقولك انساها وتطلع تحبك وتصير انت الغلطان واخاف اقول انتظرها ويروح عمرك وانت تنتظر لاتاخذ مني نصيحه وانت تدري بالوضع
تركي ابتسم بضيق ؛ طيب يقولون اسأل مجرب
هادي ؛ المجرب يقول لك لا تحب احسن لك
ضحك تركي بقهر وابتسم هادي بخفه وبعد دقايق التفت لتركي ؛ كم باقي على الآذان ؟
تركي وهو يشوف ساعته ؛ ربع ساعه
هادي ؛ وين ثوبي ؟
تركي ؛ بالسياره
وجا هادي بيقوم وقال تركي ؛ انا انا اجيبه اجلس
وطلع واستند هادي وهو يناظر يده بضيق ورجع تركي ومعه الثوب ؛ اووه يالبرد برا البس لاتتعب
هادي وقف وهو يحط فروة تركي ؛ السموحه اخذت فروتك وبردت
تركي ضحك ؛ لا يبن الحلال والله ماقصدي كذا هنا دفى بس يوم طلعت برد
وابتسم هادي وهو يحاول يلبس وساعده تركي ولبس وهو يمسك يده بألم وقال تركي ؛ سلامتك والله
هادي جلس واخذ تركي الفروه وهو يحطها على هادي ؛ خلها عليك انا ثوبي شتوي
هادي سكت لثواني وقال بقهر ؛ ابوي عصب يوم درا ليتني سكت وطلعت بعد ماناموا ولا درى احد
تركي ؛ انت وشلون دريت عن خطبتها اصلاً
هادي ؛ امي درت وعلمتنا وكلنا جالسين عندها يوم دريت قلت ..... وكمل يقول السالفه كلها لتركي وقال تركي بصدمه ؛ وكتفك بسبة الحديد ؟ مجنون انت تضربه بيدك !
هادي بقهر ؛ وش اسوي ابوي مقفل الباب وجوالي مب معي
تركي ؛ عاد تصدق سمعت صوت جاي من بيتكم واحسب اني اتخيل
هادي ؛ متى !
تركي ؛ الساعه ١ او قبلها بشوي
هادي ؛ اييه يوم جيت بطلع
تركي ؛ والحين وش بتقول له اذا سألك
هادي ؛ والله اني مدري هو اصلا مادرا ولا قال له عمي سامي واذا سألني بقول كنت افكر اخطبها وخلاص دامها انخطبت خلها
تركي ؛ وغريبه مادريتوا وهو عمك
هادي تنهد ؛ يبن الحلال ماتعرفه عمي حتى جدي تلقاه مادرى حنا لو نخليه ماعلمنا الا يوم العرس
تركي بأستغراب ؛ ليه ؟
هادي ؛ عمي ماله بالناس ولا يجلس معهم وان جلس معهم تهاوش ياكثر مصايبه اللي دخل توقيف بسبتها والحين منعزل عنهم
تركي رفع حواجبه ؛ يساتر !.. طيب ابوك الحين اذا قام ومالقاك ؟
هادي ؛ بيشوف الدريشه ويدري اني طلعت معها كان متوقع انه بيلقاني نايم يعني ، بس والله اني ماكان ودي يدرون اكيد الحين بيرتفع ضغط ابوي وهو قلبه تعبان واخاف يجيه شي
تركي ؛ لا لا ان شاء الله مايجيه شي انت اقنعه انك انصدمت بس ولا هي ماكانت تهمك
هادي ؛ وانا ؟ ... من يقنعني
تركي تنهد ؛ الأيام بتقنعك انها ماتستاهل تحبها وبتنسيك وتجيب لك اللي احسن منها
هادي تنهد وهو يرفع راسه ؛ ياارب
ودخل المؤذن واعتدل هادي وهو يتنحنح وأذن الفجر
..........••..........
قبل نص ساعه في بيت ابو هادي
طلع ابو هادي من غرفته وهو اصلاً مانام ساعه متواصله كان يفكر ويغفى ويرجع يصحى يفكر
سكر باب الغرفه وراه ووقف يناظر باب غرفة هادي اللي مقابله وتنهد ودخل يتوضى
وطلع بعد دقايق وهو يوقف عند باب غرفة هادي وطلع المفتاح من جيبه وهو يدق الباب وفتحه ودخل وهو يشوف النور شغال استغرب والتفت للسرير وانصدم من مالقى هادي نايم ولا موجود بالغرفه وناظر المفتاح اللي معه وهو متأكد ماطلعه من جيبه ولا فيه نسخه ثانيه للمفتاح مافيه الا واحد ومعه ونادى وهو للحين مستغرب ؛ هادي ؟؟
ورجع يطلع بصدمه وهو يلتفت لباب غرفة حمد اللي طلع منها
ابو هادي ؛ انت فاتح لهادي !!
حمد ؛ لا والله ماطلعت طول الليل
ابو هادي ؛ وكيف طلع مو بغرفته !
حمد قرب بأستغراب وهو يدخل للغرفه ويتلفت وناظر الشباك وقرب وهو يفتحه ورفع حواجبه بذهول من الحديده اللي طايحه وجا ابو هادي وراه وهو مصدوم وشلون هادي قدر يفكها
ابو هادي ؛ طالع من هنا يعني !
حمد هز راسه وناظر الكرسي اللي كان بعيد شوي عند الجدار وكتم ضحكته عشان لايسطره ابوه ؛ طامر من الجدر
ابو هادي تنهد بعصبيه ؛ انا اعلمه خله يجي بس
والتفتوا على صوت الأذان وسكر حمد الشباك وقال ابو هادي ؛ بنروح المسجد يلا اخلص
وهز راسه حمد وراح يتوضى وطلع ابو هادي من غرفة هادي وهو يسكر الباب وناظر شهد اللي جت وهي تتنحنح بتوتر ؛ يبه كلمته ؟
ابو هادي ؛ ماهو موجود
شهد ناظرته بأستغراب ؛ كيف ! وين راح
ابو هادي ؛ كسر الدريشه وطلع
شهد سكتت بصدمه وراح ابو هادي للصاله ينتظر حمد وطلع بعد دقايق وراحوا للمسجد
..........••..........
بيت ابو راشد
كان نايف نايم بالدوانيه ودخل ابو راشد ؛ هذا ماقام ؟ يانايف .. نايف !
نايف فز ؛ هلا ها قايم
ابو راشد ؛ اخلص نبي نروح ، اخوك بغرفته ؟
نايف التفت لفراش تركي اللي موجود ؛ مدري نمت وهو منسدح هنا
ابو راشد وهو يطلع ؛ طيب بروح اشوفه ، قم نحتريك لنا ساعه وانت نايم هنا والعيال برا اخلص لاترقد
وتنهد نايف وهو يقوم يغسل ويتوضى
دخل ابو راشد من باب المطبخ وهو يشوف ام راشد ومنيره
ابو راشد ؛ صباح الخير
ام راشد ومنيره ؛ صباح النور
منيره قربت وهي تحب راسه ؛ ياهلا ياعم شلونك
ابو راشد ؛ يامرحبا بخير عساك طيبه
منيره ؛ والله بخير دامك بخير
ابو راشد التفت لأم راشد ؛ تركي صحى ولا لا ؟
ام راشد ؛ عندكم هو ماتدري عنه ؟
ابو راشد ؛ لا مهو داخل ؟؟
ام راشد ؛ ممدري بشوفه يمكن بغرفته
وطلعت وابو راشد دخل للصاله وهو يشوف جوري واميره ومناير عند التلفزيون ودخل لجهة الغرف وهو يشوف ام راشد طالعه من غرفة تركي
ابو راشد ؛ ها نايم ؟
ام راشد بأستغراب ؛ مو موجود !
ابو راشد بصدمه ؛ كيف ؟ وينه اجل
ام راشد ؛ والله مدري يمكن قام قبلكم وراح للمسجد
ابو راشد استغرب وهو يطلع انه ماقد جا يوم ومانام تركي بالبيت حتى لو يطلع بالليل يرجع قبل الفجر
وطلع للعيال برا وهو يلقاهم ينتظرونه ونايف تو جا
ابو راشد ؛ تركي ماشفتوه ؟
راشد ؛ لا مو نايم عندكم ؟
سعد ؛ لا والله ماشفته
نايف ؛ ماسألت امي عنه
ابو راشد ؛ تقول ماهو فيه امشوا امشوا بيصلون ادق عليه بعد شوي
وطلعوا مشي للمسجد ابو راشد وراشد وسعد ونايف وعبدالله وناصر
..........••..........
في المسجد
من اذن الفجر جلسوا هادي وتركي عشان يصلون جماعه وهم يدرون ان ابو راشد وابو هادي بيجون وهادي مايدري وش بيقول لأبوه وتركي بعد وكل مايدخل احد يلتفتون للباب ودخل ابو هادي والتفتوا له وهو يناظرهم بصدمه من شاف هادي متغطي بالفروه ومنسدح على رجول تركي اللي كان يقرا واللي صدمه انه شاف يد هادي وقرب بصدمه لهادي اللي اعتدل وتنحنح هو وتركي
ابو هادي ؛ هادي ! وش فيها يدك ؟
هادي ؛ ههلا يبه ، مافيني شي
تركي ؛ ماففيه شي ياعم كان هنا وانا جيت وجلست معه
ناظرهم ابو هادي بشك وهو يحس ان فيه شي بس ماحب يتكلم عند تركي يحسبه مايدري وقرب حمد وهو يجلس عند هادي وقال بهمس ؛ يدك من وش ؟؟
هادي ؛ مافيها شي
حمد ؛ وذا وشوو ؟ وش صاير
ابو هادي تنحنح ؛ حمد
وسكت حمد من اشر له ابوه وتنهد هادي وبعد دقايق دخل ابو راشد ؛ السلام عليكم
الكل ؛ وعليكم السلام
وانتبهوا لتركي وقرب ابو راشد ؛ تركي من متى وانت هنا ؟
تركي ؛ اا جيت قبل ساعتين صحيت ولا قدرت ارجع انام قلت اجي
ابو راشد هز راسه وناظر هادي ؛ شلونك ياهادي
راشد انتبه ليده ؛ سلامات عسى ماشر
هادي ؛ بخير ياعم ، بسيطه
سكتوا وابو راشد حس ان فيه شي من وجهه التعبان والتفت على ابو هادي اللي ناداه ؛ ابو راشد
وقرب ابو راشد وهو يسلم عليه ؛ صباح الخير يبو هادي وشلونك
ابو هادي ؛ ياهلا صباح النور بخير عساك طيب
ابو راشد؛ والله بخير الحمدلله ، وشلونك ياحمد
حمد ؛ الحمدلله بخير
ابو راشد ؛ وش فيها يد هادي قبل امس مافيه شي
ابو هادي تنحنح ؛ اا ممافيه شي رضه بسيطه بسيطه
ابو راشد ؛ اييه سلامته
والتفتوا على الأمام اللي كبر وصفوا يصلون
•
بعد الصلاه طلعوا بعض الرجال وبعضهم بقوا ومن بينهم ابو راشد وابو هادي والعيال
ورجعوا تركي وهادي يجلسون عند بعض على الطرف وقال تركي ؛ الحين ترجع البيت ولا تجلس
هادي ؛ مدري مساعد ماجا غريبه
تركي ؛ ماعليه تشوفه الصباح ولا العصر دايم القاه بالسوق
وجا نايف وهو يجلس ؛ شلونك ياهادي
هادي ؛ الحمدلله ، اخبارك انت
نايف ؛ بخيير الحمدلله ، تركي مانمت صح ؟
تركي اعتدل وهو يمسح عيونه ؛ ليه مبين ؟
نايف ضحك ؛ اي والله مبين من وجهك واضح مواصل وين كنت ؟؟
تركي تنحنح بتوتر وقال هادي وهو ساند راسه على كتف تركي ؛ انا دقيت عليه
نايف ؛ ايه صح سلامتك من وش انكسرت يدك
تركي ؛ ما انكسرت رضه خفيفه
هادي ؛ الله يسلمك
نايف هز راسه وسكت ماحب يرجع يسأل مع انه حاس ان فيهم شي من وجه هادي التعبان وتركي اللي مستحيل يعرف يخفي كذبه وقام وهو يجلس على طرف واخذ المصحف وهو يقرا
بالطرف الثاني كان ابو هادي وحمد وابو راشد بجنبهم بس بعيد شوي
ابو هادي بصوت خفيف ؛ اخوك من وداه المستشفى اذا مفتاحه وجواله معي ؟
حمد سكت وهو يرفع كتوفه
ابو هادي تنهد ؛ شكله قايل لتركي ونايف
حمد تنحنح بتوتر ؛ انا اخاف انه راح لعمي سامي
ابو هادي ؛ لا ان شاءالله
حمد ؛ ويده من وش ؟
ابو هادي ناظره بصدمه ورجع يناظر هادي ووقف هو وحمد اللي مشى وراه لعند هادي
ابو هادي ؛ يلا ياهادي مشينا
هادي ؛ شوي يبه بجلس شوي
ابو هادي ؛ لا ابيك بشغله يلا
هادي تنهد وهو يقوم ومشى ابو هادي وحمد بيطلعون وهمس تركي ؛ اصبر علاجاتك بالسياره
هادي ؛ خخلها بيقول ابوي وش قلت له وكيف وداك
تركي ؛ يبن الحلال هو بيسألك بيسألك ان اخذتها ولا خليتها لازم تاخذها كلها مسكنات وبتحتاجها
وتنهد هادي وهز راسه وطلع هو وتركي ورا ابو هادي وحمد والتفت ابو هادي على هادي اللي مشى مع تركي لسيارته وهمس لحمد ؛ هذا وين بيروح
وسكتوا وهم يشوفون تركي يفتح سيارته ويمد كيس لهادي ويتكلم معه
تركي ؛ خذ كلها بوقتها لاتتعب مايستاهل السبب تتعب عشانه
هادي ابتسم بضيق ؛ ابشر
وشال فروة تركي من عليه وهو يحطها على تركي وحضنه وقال وهو يمسح على ظهره ؛ خل اللي صار بيني وبينك وابوي بقول له اني كنت افكر اخطبها عشان كذا زعلت ولا عاد ابيها دامها موافقه
تركي ابتسم وهو يطبطب على كتف هادي بخفه ؛ ابشر ولا تفكر فيها انسى من نساك وخل حياتك مثل ماهي عليه ماتغير شي يوم طلعت منها الا للأحسن
هادي هز راسه ؛ ان شاء الله
وابتسم تركي ومشى هادي مع ابوه وحمد اللي واقفين عند الباب وتركي رجع يدخل
وراح ابو هادي وحمد وهادي للبيت مشي والتفت ابو هادي لهادي ؛ ليه تطلع ؟
هادي سكت بقهر وهو ماوده يعصب ابوه وقال بهدوء ؛ انت قفلت الباب
ابو هادي ؛ وقفلته عشان تطلع مع الدريشه ؟
هادي هز راسه " لا "
ابو هادي ؛ من وشو يدك ؟
هادي ؛ من حديدة الدريشه كسرتها بيدي
ابو هادي ؛ وانكسرت يدك ؟
هادي ؛ لا رضوض بس
ابو هادي ؛ احسن ليتها انكسر... "وتنهد بعصبيه " استغفرالله ، رحت لسامي صح ؟
هادي هز راسه بالنفي وقال ابو هادي بقهر ؛ كذاب !
هادي بسرعه وضيق ؛ والله اني مارحت له
حمد ؛ يبه خلاص لاوصلنا نتفاهم
ابو هادي بعصبيه ؛ ولا نفس انت ، وانت وداك تركي للمستشفى ؟؟
هادي تنهد ؛ ايه
ابو هادي ؛ وقلت له صح ؟
هادي عصب وقال وهو ماسك نفسه لاينفجر قهر ؛ ييبه وش تبيني اسوي طلعت ولقيت تركي برا قلت بروح المستشفى ووداني ورجعنا وجلسنا بالمسجد
ابو هادي ؛ وقلت له عن عمك سامي !
هادي سكت وهو يصد وقال ابو هادي بعصبيه ؛ قلت له هاه ؟
هادي ؛ ايه قلت له قلت له اني كنت ابي بنت عمي وانخطبت
ابو هادي ؛ وقلت له انك انهبلت وكسرت يدك صح
هادي ؛ لا
ابو هادي وهو يفتح باب العماره ؛ ادخل ادخل تكذب عيني عينك
وتنهد هادي وهو يدخل ودخل حمد وسكر ابو هادي الباب ودخلوا للصاله ومافيها احد وجا هادي بيدخل غرفته وناداه ابو هادي ؛ تعال تعال بتدخل غرفتك يوم بغيناك تطلع ويوم نبي تجلس فيها طلعت
هادي تنهد ورجع وجلس بالصاله ؛ هلا
ابو هادي سكت وهو ينادي ؛ مريم
طلعت شهد من المطبخ ؛ يبه امي تقول مصدعه بتنام شوي ، ههادي يدك شفيها !
ام هادي طلعت من سمعت اصواتهم وهي تناظر بهادي وانتبهت ليده وهي تشهق ؛ هادي !
وقربت بسرعه وهو تجلس عنده ؛ وش صاير
هادي بضيق ؛ مافيني شي يمه
ام هادي تنهدت بقهر ؛ تبيها قل ابيها ونخطبها اما انك تصارخ وتعصب وتهاوش وش بيفيد
ابو هادي جلس ؛ انا ادري عنه
هادي ؛ يايمه انا كنت بخطبها بس يوم دريت انها انخطبت عصبت بس
ابو هادي ؛ بس ! ها بس ؟ خلاص كان قلت لي واكلم سامي ويقول لها وهي تقرر تبيك ولا تبيه وانتهينا
ام هادي ؛ ايه لو قلت لنا انك تبيها كلمناهم بس خلاص دامك تبيها نكلم اهلها ونخطبها
هادي بسرعه وقهر ؛ لا مابيها والله ماخذها
حمد اللي كان متكتف ومستند على الجدار اعتدل بصدمه وشهد اللي كانت بنص السيب عند باب المطبخ ناظرت بأستغراب وقال ابو هادي ؛ وشو ! واللي امس يقول انا ابيها الحين تقول لا وتحلف بعد
ام هادي ؛ وش جاك مو تقول انا ابيها يمه الحين يوم بخطبها لك ترفض ؟
هادي ؛ يمه امس غير واليوم غير امس ابيها اليوم لا اليوم والله لو اموت ما اخذتها
ابو هادي بعصبيه ؛ والله انك مكلم سامي وانا ادري
هادي وقف بقهر ؛ والله ماكلمته ولا جبت له طاري ولا ابي اكلمه عن هالموضوع ولا ابيكم تكلمونه
ابو هادي ؛ ووش تغير ؟
هادي ؛ اللي تغير انها وافقت على اللي خطبها خلاص خلها تاخذه وانا اكمل حياتي لاصار شي ولا تغير شي
ام هادي بأستغراب ؛ يعني ؟ ماخطبها ولا تبيها
هادي ؛ لا لاتخطبينها مابيها
ابو هادي ؛ وتركي وش قلت له ؟
هادي ؛ ماقلت له شي يايبه الحين بروح انام مصدع
ابو هادي بعصبيه ؛ اججلس لين اخلص
وجلس هادي بضيق وقال ابو هادي ؛ وش قلت له ؟
هادي تنهد ؛ علمته قلت اني ابي بنت عمي ودريت انها انخطبت
حمد مسح راسه بقهر وابو هادي شد على يده ؛ ايه ؟
هادي ؛ وبس كانت يدي تعورني قلت ودني للمستشفى ورحت وطلعت رضوض بسبة الحديد
ام هادي ؛ اي حديد ؟
ابو هادي ؛ كاسر حديد الدريشه بكتفه لين انكسر هو وياه يستاهل !
هادي هز راسه وهو كاتم عصبيته ؛ استاهل ! وش غير ؟
ابو هادي نزل شماغه وقال بقهر ؛ ياولد لاترفع ضغطي !
هادي ؛ يايبه انا وش اسوي وش تبيني اسوي الحين
ابو هادي ؛ يعني ابو راشد بيدري وعمك بيدري و.. قاطعه هادي ؛ لا لا يبه انا حلّفت تركي مايقول لأحد حتى راشد ونايف سألونا قال لهم رضه خفيفه ماعلمهم
ام هادي بضيق ؛ ليه تطلع ؟ حنا والله ماسكرنا الباب الا عشان تهدي وتفكر اخرتها تنهبل زياده وتكسر يدك عشان تطلع ؟
هادي سكت بضيق وتنهد ابو هادي ؛ والحين وش تبي ؟
هادي ؛ ابد يبوي سلامتك ابي انام مصدع انت تبي شي ؟
ابو هادي ؛ ابيك تعقل وهذا انا قلت لك تبي نخطبها وعييت على كذا لاتجي يوم عرسها وتقول ابيها خلاص مليون بنت غيرها نخطب لك اللي تبي بس لاتشغلنا وتحبها وتسكت وتجي بعدين تصايح تقول انخطبت ابيها
هادي هز راسه وتنهد ؛ ابشر
وقام وهو يحب راسه ويده ؛ بس لاتعصب ولا تزعل
والتفت على امه وهو يحب راسها ويدها وحضنته ام هادي وهي تمسح دموعها ؛ الله يصلحك ويعوضك باللي احسن منها
ابو هادي تنهد ؛ امين ، اجلس افطر عشان تاكل علاجاتك
ام هادي وهي تشوفهم ؛ ايه اجلس اجلس ، شهد خلصتيه ؟
شهد وهي ترجع تدخل المطبخ ؛ ايه يمه بجيبه
هادي ؛ يايمه مابيه والله مصدع وابي انام بس
ام هادي ؛ خلاص افطر وكل علاجك ونام لين تشبع ، صليت ؟؟
ابو هادي ؛ اي كان بالمسجد هو وتركي
وجابت شهد الفطور وهادي ماله نفس ياكل لاكن عشان امه وابوه لايزعلون كان يغصب نفسه وقام بعد دقايق ؛ الحمدلله
ابو هادي ؛ مافطرت !
هادي ؛ الا الحمدلله شبعت
وراح لغرفته وسكتوا وتنهدت ام هادي ؛ ما اخذ علاجه
حمد وهو يقوم ؛ خلك خلك يمه انا بعطيه ، شهد جيبي مويه
واخذ كيس العلاج حق هادي وراح لغرفة هادي ودق الباب وهو يدخل ويشوف هادي عند الشباك ويناظر
حمد ابتسم بخفه ؛ تناظر مصيبتك ؟ يساتر ماشاءالله مدري شلون كسرته
هادي تنهد وهو يسكر الشباك ؛ القهر يخليك تسوي كل شي
وجلس على السرير وتنهد حمد وهو يجلس عنده ؛ ياهادي ترا انت عصبت على الفاضي ورفعت ضغط ابوي وزعلته والله اني ماقدرت انام خايف يصير له شي انت ناسي كم عملية قلب سوا ولا اذكرك ؟ القسطره والصمام وكم مره دخل المستشفى تبي تذبحه عشان وحده ؟؟
هادي بضيق ؛ حمد لاتغثني ادري انه زعل بس راضيته واقنعته هو وامي وان شاء الله مايصير له شي حتى انا كنت خايف يصير له شي واذكر مانسيت وعارف ان قلبه تعبان والوحده تخسي اذبح ابوي عشانها وخلاص راحت بحال سبيلها وماعد ابي اسمع سيرتها
حمد ؛ الله يرفع ضغطها والله اني مستلمها دعاوي من امس بسبة ظهري
هادي بأستغراب ؛ ليه شفيه ظهرك ؟
حمد ؛ من دفاشتك يوم تبي تطلع عشانها وانت تهبدني بالجدر وتدري اني عضم وجلد وانت لا اله الا الله ثور
هادي تذكر لما دف حمد وابتسم بخفه ؛ ييوه والله ماحسيت تستاهل ليه يوم تمسكني ؟
حمد وهو يفتح علاجات هادي ؛ والله عاد ابوي قاله ولا كنت بسكر الباب وراك
وابتسم هادي وهو يهز راسه وقال حمد وهو يشوف العلاجات ؛ مسكنات كلها ، توجعك يدك ؟
هادي بضيق ؛ اي والله توجعني
حمد وهو يقرا واحد ؛ مسكن لألم المفاصل ، هذا باكل منه حتى انا
هادي ؛ للمفاصل ذا مو للظهر ظهرك مفصل ؟
حمد بقهر ؛ والله عاد انت خليت كل عضمه لحالها صار كله مفاصل الله يفصل راس العدو ، هذي وين راحت بالماء
ودخلت شهد وهي تمد لحمد المويه وناظر هادي ملامحها بأستغراب وناظرته وهي تبكي والتفت حمد بسرعه ؛ علامك ؟؟
هادي اعتدل بصدمه ؛ شهد وش فيه ؟؟
وجلست شهد وهي تمسح دموعها ؛ ياسخفك تكسر يدك بسبة وحده
حمد مسك قلبه ؛ الله يخرش عدوك انتي وذا الوحده احسب امي ولا ابوي فيهم شي
هادي تنهد بخوف ؛ حتى انا احسب صار شي
شهد وهي تمسح وجهها ؛ اخلص كل علاجك واخمد
هادي ؛ افا وش مزعلك
شهد ؛ لا لا ابد مافيه شي ماكنك تدر.. وشهقت وهي تشوف حمد اكل حبه ؛ هييه هادي مب انت
حمد شرب مويه وهو يبلعها ؛ حتى انا انكسر ظهري بسبته لو اوريكم ظهري كنها طعنه انخرم من ذا الله يخرم راس " وقال بهمس عشان لايسمع ابوه " بنت سامي
شهد بقهر ؛ امممييين اميين ياربب
هادي ابتسم بخفه ؛ خلاص عطني علاجي انا
وعطاه حمد علاجاته والمويه وقامت شهد وسكرت باب الغرفه وهي ترجع تجلس ؛ انا لو دريت من قبل انك تبيها كان ذبحتك انت وياها يع قسم بالله مو من زينها لا اسلوب لا كلام امي منغثه منها ومن امها
هادي قاطعها ؛ خخلاص فكونا منها هي وامها واهلها كلهم
حمد ؛ لا نعنبو راسها راس السبب والمصايب انا غاسل يدي من ابوها وهو عمي حتى عياله منحاشين عنه كيف هي تلقاها مقشع مثل خشة حمدان
هادي ؛ لايسمعك ابوي بس
حمد همس بقهر ؛ وش اسوي هذا الصدق اشغل جدي اول يوم يتهاوش مع العالم يوم كاسر احد ويوم فاقش احد وكل يوم بالسجن حفظوا وجهه ، والله يوم شفت يدك قلت اكيد تهاوشت معه
هادي تنهد ؛ لا مارحت له
شهد ؛ وطيب ليه ماجلست هنا دامك يوم طلعت مارحت له يعني وش استفدت لما كسرت يدك ؟
هادي ؛ يناس افهموا ماكسرت يدي رضه واسبوع بالكثير وتطيب
حمد ؛ المهم انك بغيت تكسرها واكلت علاجك الحين اندفس واخمد قومي ياشهد
شهد قامت ؛ هادي تبي شي
هادي ؛ سلامتك
وجا حمد بيطلع ؛ تصبح على خير مدري تمسي على خير
شهد ضحكت ؛ نوم العافيه
حمد ضحك ؛ ايه ايه نوم العافيه
ابتسم هادي بخفه وطلعوا حمد وشهد اللي سكرت وراها الباب وتأفف هادي وقام يبدل وخلص بصعوبه وهو يطفي النور وانسدح ينام
..........••..........
بيت ابو راشد
دخل ابو راشد والعيال اللي رجعوا مع تركي بسيارته ومشى للمطبخ ومعه نايف اللي قال ؛ تركي هادي فيه شي؟
تركي ؛ لا ليه
نايف ؛ مدري اشوفه متضايق ووجهه تعبان
تركي ؛ ايه من يده توجعه
نايف ؛ وش صار فيها من وشو
تركي ؛ مدري
نايف ناظره وسكت ودخل تركي للمطبخ وهو يتنحنح ؛ يمه
ام راشد ؛ ادخل ادخل
ودخل هو ونايف ؛ صباح الخير
عبير وام راشد ؛ صباح النور
ام راشد ؛ انت وين كنت ؟
تركي ؛ بالمسجد
ام راشد بأستغراب ؛ طول الليل ؟؟
تركي ؛ اا لا بس قمت قبل الفجر بساعتين وطلعت
نايف وهو يتكي على الدولاب ؛ اميمتي وين البنات يساعدونك
عبير ضحكت ؛ موجوده انا لو سمحت
ضحك نايف وقال تركي ؛ لا هاجر واروى وين
ام راشد ؛ والله لي ساعه اقومهم
عبير ضحكت ؛ يمه تراهم سهرانين امس هاجر واروى وتركي ونايف خليهم ماشبعوا نوم
تركي ؛ اي والله ماشبعت نوم
نايف ؛ كلها بسبتك وانا اقول العصر ما ابي انام بس شكلي بفطر وانام لي ساعه ونص ساعتين كذا وصحوني
تركي ؛ وانا بنام ولا تصحوني اقوم انا
ام راشد ضحكت ؛ ان ماصحيناك ماقمت خذ خذ الفطور وانت القهوه وروحوا
وضحكوا واخذ تركي الفطور ونايف القهوه وطلعوا للدوانيه
وبعد الفطور التفت ابو راشد ؛ تركي هادي علامه ؟
راشد ؛ اييه وجهه تعبان وش فيه
تركي تنحنح وهو يشيل الصينيه ؛ مافيه شي يده توجعه
ابو راشد ؛ من وشو ماكان فيها شي
تركي ؛ يقول طاح على حديد وبسيطه ماهي كسر
وشال الأغراض وراح للمطبخ بسرعه وقال نايف وهو يقوم ؛ يبه انا مصدع شوي بروح غرفتي انام لي ساعه واروح الدوام
ابو راشد هز راسه وطلع نايف وهو يدخل المطبخ ورا تركي اللي تنحنح وهو يدخل ودخل نايف وراه ودخلوا للصاله اللي فيها ام راشد ومنيره وعبير والبزران
نايف ؛ يمه بنام شوي والساعه ٨ بالضبط صحوني
ام راشد ؛ خلاص يحبيبي نام نصحيك
وراح نايف لغرفته وقال تركي ؛ وانا بعد والله مصدع بس لحد يصحيني انا اقوم
ام راشد ؛ زين ، تبي مسكن ؟
تركي هز راسه بالنفي وهو يمشي ودخل للغرفه وهو يشوف الساعه اللي كانت قريب ٧ وتردد يدق على هادي ولا لا بس دق وهو يشوف جواله مقفل وتنهد وحط الجوال وانسدح ينام
•
بعد ساعه طلعت ام راشد من المطبخ بالقهوه والبنات كلهم موجودين وشريفه وهاجر واروى يفطرون وابو راشد وراشد وسعد وناصر وعبدالله رايحين من ساعه
ام راشد وهي تشوف ساعتها ؛ هاجر قومي صحي نايف يروح دوامه الساعه ٨
هاجر ؛ ابشري
وقامت للغرفه وهي تطق ؛ ناييف ... نايف قم الساعه ٨ ... اخلص قم
نايف من داخل الغرفه ؛ زيين قمت قمت
وراحت هاجر للصاله وهي تجلس ؛ قومته
اروى ؛ يمه وتركي ماقال صحوني ؟
ام راشد ؛ لا ماعنده شي خلوه المحل يروح له العصر
اروى وهي تقوم ؛ اجل بروح اشوف بسبوستي
منيره ضحكت ؛ عاد ماشفتها تلقين امها اخذتها
هاجر ؛ اروى ترا احس فيها مرض وبتعديك
اروى ؛ لا مافيها شي اصلا حتى نايف يقول شكلها ضايعه من احد من كثر ماهي نضيفه
ام راشد ؛ حطي لها اكل ولاتلمسينها
وطلعت اروى ولحقوها جوري وترف واميره ومناير وخالد
عبير ضحكت ؛ ماشاءالله هذا وحنا ماقلنا بسه
شريفه بضحك ؛ سمعوا حطي لها اكل وركضوا يعرفون انه لها
ام راشد ؛ والله انه برد عليهم
منيره ؛ ماعليهم متدفين
وبعد دقايق طلع نايف وهو يعدل شماغه ؛ السلام عليكم
الكل ؛ وعليكم السلام
ام راشد ؛ ياهلا تعال تعال خذ هالفنجال تو سويتها
نايف قرب وهو يجلس عند ام راشد وياخذ فنجال القهوه ؛ اييه بوقتها والله مصدع
ام راشد ؛ الله يصلحكم من البرد امس
نايف ؛ لا والله بس ماشبعت نوم للحين
هاجر ؛ العصر تنام ولا بتروح مكان ؟
نايف ؛ لا بروح للمزرعه ولا السوق ، تركي قام ولا ؟
ام راشد ؛ لا للحين
نايف ؛ واروى وينها ؟
عبير ؛ طلعت هي والورعان للبسه
نايف هز راسه وناظر بالعنود الصغيره اللي قامت تصيح وابتسم بضحك ؛ ماشاءالله على صغرها الا ان صياحها اسمعه وانا نايم
شريفه ضحكت ؛ لا لا هذا صياح الدلع ماسمعت شي
ودخلت جوري وترف وهم شايلين القطوه واروى وراهم معها خالد واميره ومناير
ام راشد ؛ اروى انا وش قلت
اروى ؛ يمه والله هم يبونها وخالد قام يصيح يبينا نجيبها
نايف ؛ يمه والله انها حليله خليهم يلعبون معها ، جوجو هاتيها
هاجر ؛ والله ماشيلها
نايف ضحك ؛ جوجو الصغيره مب انتي
ضحكوا وجابتها جوري وهي تحطها بالأرض وجلست هي والبزران ونايف والباقين على الكنب يناظرونهم
منيره ؛ ياجوري لاتلمسين وجهك
ام راشد ؛ كله من اروى مدري ليه جايبتها عند الورعان
اروى جلست عندهم ؛ هم جابوها
وجلست تلعب معها هي والبزران وتحطها بحضنهم وام راشد تهاوشها وهي تقول انهم يبونها
وبعد دقايق قام نايف ؛ يلا بروح الحين ، تبون شي ؟
ام راشد ؛ سلامتك ياحبيبي
وطلع نايف وراح لدوامه وام راشد والباقين يناظرون اروى والقطوه وهاجر اللي من الطفش قامت وهي تلعب معها
..........••..........
بيت ابو هادي
الكل نايم بحكم ان محد نام زين بعد اللي صار وصحى ابو هادي وهو يشوف الساعه اللي كانت قريب ٩ واتصال من المستأجر قبل دقايق وتنهد والتفت لأم هادي اللي نايمه وقام وهو يطلع للصاله ورجع دق على الرجال ورد ؛ هلا ابو هادي
ابو هادي تنحنح ؛ هلا هلا ، دقيت علي آمر ؟
تركي " المستأجر " ؛ مايامرك عدو بجي انا والأهل جاهزه الشقه ؟
ابو هادي ؛ حياكم الله جاهزه
تركي ؛ تسلم الله يحييك اقل من ساعه واجي
ابو هادي ؛ ان شاءالله ... مع السلامه
وقفل وهو يقوم ودخل للحمام " الله يكرمكم "
وبعد دقايق طلع ودخل يبدل وهو يشوف جوال هادي ومفتاحه على الدرج واخذهم وهو يضبط شماغه وطلع وهو يدق باب غرفة هادي بشويش ؛ هادي
ومارد هادي وفتح ابو هادي الباب وهو يشوف النور طافي وهادي نايم وحط الجوال والمفتاح على درجه وهو يطلع ويسكر الباب ومشى لغرفة حمد وهو يدق الباب وبرضوا مارد ودخل وهو يشوفه نايم
ابو هادي ؛ حمد ... حمد
حمد تحرك ؛ هاا
ابو هادي ؛ المستأجر واهله بيجون بروح للمحل العمال فيه قم عشان تطلع لهم وتعطيهم المفتاح
حمد ؛ يلا شوي شوي الحين اقوم
ابو هادي ؛ لاترقد يلا قم بروح انا
حمد بنوم ؛ ايه طيب قمت
وطلع ابو هادي وحط مفتاح الشقه على الطاوله بالصاله وطلع ركب سيارته وحرك للسوق
..........••..........
سوق المحاسن
اللي كان مزحوم وفي محل ابو راشد اللي كان جالس ودخل ابو نايض " من شياب الديره " ؛ سلام عليكم
ابو راشد ؛ وعلييكم السلام ارحب ابو نايض
وقرب وهو يسلم عليه ؛ يالله حيه وشلونك
ابو نايض ؛ الله يحييك بخير عساكم طيبين
ابو راشد ؛ والله بخير والحمدلله ، متى جيت ؟
ابو نايض ؛ والله هذي جيتي حتى البيت مامريته
راشد اللي كان عند الطاوله ؛ هلا ابو نايض يالله حيه
وسلم عليه هو وسعد وقال ابو نايض ؛ ياماشاءالله سمي الغالي وابوه هنا
سعد ابتسم ؛ وشلونك
ابو نايض ؛ والله بخير الحمدلله وش اخباركم
راشد وسعد ؛ الحمدلله
ابو راشد ؛ تعال اجلس مبطي عنك عطنا اخبارك
ومشى معه لعند الباب وجلسوا على جلسه من طين من نفس الجدار عند باب المحل
ابو نايض ؛ سمعت عن ابو هادي ؟
ابو راشد ؛ ايه جارنا علامه
ابو نايض ؛ يوه احسبك ماتدري عنه ، يقول ابو فارس باع محله لأبو هادي
ابو راشد ؛ الله يبارك له وعمارة ابو جابر اشتراها بعد
ابو نايض ضحك ؛ ماشاء الله جا من ينافس التاجر ابو راشد
ابو راشد ابتسم ؛ الله يرزق الجميع ويبارك له
ابو نايض ؛ واخبار المزرعه وتركي ونايف ماشفتهم وينهم ؟
ابو راشد ؛ والله كل شي بخير ، نايف توظف الحين ماعاد يجي للمحل واجد وتركي يجيه العصر
ابو نايض ؛ ماشاءالله الله يوفقه عاد تركي من اول مايجي للمحل ، وعيسى وش اخباره واخبار دراسته
ابو راشد ؛ بخير الحمدلله يتخرج قريب ويرجع ان شاءالله
ابو نايض ؛ ماشاء الله الله يوفقه
ابو راشد ؛ واخبار القصيم و... ووقف وهو يشوف ابو هادي دخل وناداه ؛ ابو هادي
ابو هادي قرب وهو يبتسم ؛ هلا ابو راشد صباح الخير
ابو راشد اشر لأبو نايض ؛ هذا ابو هادي ، صباح النور ياهلا
وجا ابو هادي ومد يده ابو نايض يسلم ؛ سلام عليكم يا ابو هادي
ابو هادي وهو يسلم عليه ؛ وعليكم السلام ياهلا
وسكت لثواني بأستغراب وقال ابو راشد ؛ هذا ابو نايض من اهل الديره كان بالقصيم من شهرين عشان مزرعته هناك وعاد درى انك سكنت بالديره ويبي يسلم عليك
ابو هادي ابتسم ؛ اييه يامرحبا والله
ابو نايض ؛ وشلونك عساك طيب
ابو هادي ؛ بخيير ياربي لك الحمد
وجا راشد وهو جايب لهم دلة قهوه وشاف ابو هادي ؛ اووه ابو هادي فيه يالله حيه وانا اقول نور السوق
ابو هادي ابتسم ؛ تسلم الله يحييك
وصب لهم قهوه وهم جالسين عند باب المحل ورجع دخل للمحل
ابو هادي ؛ انت وش شغلك بالقصيم يبو نايض
ابو نايض ؛ والله عندي مزرعه هناك واروح لها نوبات
ابو هادي ابتسم ؛ ماشاءالله ، تبيع منها شي ولا ؟
ابو نايض ؛ ايه ايه تمور والحمدلله خير وبركه
ابو هادي ؛ الله يرزقك ويبارك لك
ابو نايض ؛ اجمعين يارب ، وانت وش بتشتغل بالسوق ؟
ابو هادي تنحنح ؛ ماقررت للحين بس شريت محل وافتحه قريب ان شاء الله
" ماحب يقول محل اثاث عشان كان السوق مزحوم والناس داخله وطالعه وتسمع وخاف تروح عليه "
ابو نايض ؛ وين كنت تشتغل انت ؟
وبدا ابو هادي يسولف لهم عن المدينه وشغله فيها
وبعد دقايق التفت لجواله اللي دق وهو يستأذن وقام وهو يرد ؛ هلا .... ايه حمد ولدي ينتظرك .. وشلون مافيه احد ؟ ... والباب مسكر ! ... خلاص بدق عليه يطلع لك السموحه دقايق بس
وقفل وهو يدق على حمد ومايرد وعصب وهو يدق مره ثانيه ومارد ودق على ام هادي وردت ؛ ههلا
ابو هادي من صوتها عرف انهم للحين نايمين وقال بعصبيه ؛ حمد وينه !
ام هادي اعتدلت بخوف ؛ ليه وش صاير
ابو هادي تنهد ؛ يبنت الحلال المستأجر برا وانا بالسوق صحي هالحمار حمد ياخذ المفتاح بالصاله يعطيه الرجال برا بسرعه
ام هادي فزت ؛ طيب طيب اقومه الحين
وقفل ابو هادي وهو يرجع عندهم ؛ يلا ياجماعة الخير انا بروح للمحل العمال فيه
ابو راشد ؛ ماتشوف شر والله يبارك لك
ابو نايض ابتسم ؛ امين
ابو هادي ابتسم ؛ تسلمون
ومشى لمحله بآخر السوق وابو نايض وابو راشد قاموا يمرون ع المحلات وابو نايض يسلم على اصحابها والناس اللي يعرفهم
ومر هالوقت على ابو هادي بتجهيزات محله وهو جالس عند الباب ويشوف شغل العمال اللي كانوا يصبغون ويفكون الرفوف اللي كانت بالمحل لأنه يبغاه فاضي وشالوا اللوحه وبهاللحضه قام يفكر بأسم لمحله وماطول بأختيار الأسم ابتسم وهو حس انه مناسب وأكده ...
وبعد ماخلصوا وقف ابو هادي وهو يشوفه وماباقي الا اللوحه والأثاث والسجاد اللي راح يبيعه
قفل المحل ومشى من الباب الخلفي اللي يطلع من السوق لأنه قريب من محله اللي بآخره
ركب سيارته وهو يفكر يطلع للرياض ويوصي على بضاعته بس حس انه بيتأخر وباقي على اذآن الظهر نص ساعه قرر يرجع البيت والعصر يروح لسوق الزل وبكره الفجر يطلع الرياض

•

•

رأيكم فالبارت ؟ وتوقعاتكم للبارتات الجايه 🥹؟؟