ياديرةٍ ضمّت كل الأحباب

Part 4

.. سبحان الله وبحمده سبحان الله العظيم ..

..........••..........
بيت ابو هادي
الساعه 9 الصباح
دق جواله ورد ابو هادي ؛ هلا يامساعد بشّر
مساعد " صاحب ابو هادي في الرياض " ؛ ابشّرك لقيت لك عماره ٣ ادوار وقريب من ٣ محلات للبيع ان كانك تبيهم كلهم ولا محل او محليّن
ابو هادي ؛ بيّض الله وجهك ، كلهم فاضيات ولا شغاله؟
مساعد ؛ العماره مفضيها راعيها بيبيعها والمحلات شغاله الين مايجي واحد شراي
ابو هادي ؛ تسلم ماقصرت هاليومين ان شاءالله اجي الرياض واشوفها
مساعد ؛ ان شاء الله
قفل ابو هادي وهو يلتفت لأم هادي اللي قالت ؛ لقيت المحل اللي تبي ؟
ابو هادي ؛ لقيت ثلاث محلات وعماره يالله لك الحمد
ام هادي ؛ ماشاءالله بس صعبه ٣ محلات من بيشتغل فيها
ابو هادي ؛ ماضنتي اشريها كلها يمكن محل ولا محلين مع العماره ان جازو لي شريتهم ان شاءالله و انا وهادي وبعلم حمد واوضف كم عامل
ام هادي بضحكه ؛ اوه ياحمد ماله بالبيع والشراء ابد
ابو هادي ؛ يتعلم ماعليه
ام هادي ؛ ومتى بنروح الرياض
ضحك ابو هادي ؛ يابعد راسي مستعجله انتي على الرياض
ام هادي ابتسمت ؛ الصدق اي والله مستعجله
ابو هادي ؛ ان شاءالله بروح للرياض اشوف المحلات وااعماره وذا شرينا نروح الرياض كلنا
..........••..........
في بيت ابو راشد
نفس الوقت
ابو راشد وهو جالس قبال التلفزيون ويشرب قهوه
طلعت ام راشد من المطبخ وهي جايبه الفطور وتنادي على عيالها دخل راشد وهو متشقق من الفرحه ؛ يا صباح الرضا والاخبار الطيبه
ابو راشد وام راشد ؛ صباح النور
راشد ؛ ماشاءالله اجل ولدت شروف
ابو راشد ؛ اي الحمدلله ولدت بالسلامه
راشد وهو يجلس ؛ مبروك عليكم حفيدتكم الجديده
ام راشد وابو راشد بضحكه ؛ يبارك فيك
دخلت منيره ومعها عيالها وجلست تبارك لأم راشد وابو راشد وكملو يفطرون ويسولفون
راشد ؛ يمه مافيه احد من العيال قايم؟
ام راشد ؛ والله ماضنتي ناديت لهم ومحد رد
راشد ؛ عاد نايف امس يقول بنروح نشوف المزرعه الصباح غريبه نايم
ابو راشد ؛ يمكن انهم تعبانين من الفجر ولا مانامو زين
منيره ؛ اي صح متى تطلع شريفه ياعمه
ام راشد ؛ والله يابنيتي ماقالو متى بس ماظنتي تنام في المستشفى الليله بيطلعونها ان شاءالله
راشد ؛ وعزام متى بيجي
ابو راشد ؛ كلمناه الفجر يقول العصر بيجي
كملوا يفطرون وقامو هاجر واروى ونايف الا تركي بحكم انه ما نام للفجر
خلصو وطلعو نايف وراشد وعياله ناصر وجوري للمزرعه يتمشون شوي
وابو راشد طلع للسوق
..........••..........
في بيت ابو هادي
دخل هادي وهو يأشر لأمه تجي للغرفه وشهد بغرفتها وحمد طالع
ام هادي وهي تقفل الباب وراها وتضحك ؛ وش صار جهزت اللي قلت لك
هادي بأبتسامه ؛ اببد كل شي جاهز زي ماطلبتي
ام هادي ؛ وانا ارسلت ابوك بأغراض وحمد ماهو هنا الحين لازم شهد تطلع من البيت بعد وش اسوي
هادي ؛ عادي اطلع انا واخذها معي نتمشى الين تجهزّين
ام هادي وهي تضرب كتفه بخفه ؛ بالله عليك ؟ وانا من يجهز الاغراض معي
هادي ضحك ؛ يمه ماتقدرين لحالك ؟
ام هادي ؛ اقدر بس بجلس لبكره وانا ماخلصت
هادي ابتسم ؛ اجل بدق على حمد الورع يجي ياخذها ويرجع يطلع هو وياها
ام هادي ؛ طيب بس لايشك انتبه يدري
هزّ راسه هادي وطلع جواله وهو يدق على حمد ووصله صوت حمد اللي قال بضحكه ؛ ياخي انت وش تبي ما اطلع ٥ دقايق الا تدق علي ماتصبر بدوني يعني ؟
هادي عفس وجهه وهو يمثل القرف ؛ يييوه وش ابي بوجهك من زينك وينك بس
حمد ضحك ؛ تحت بمحلات العماره تبي تجيني ؟
هادي ؛ لا انت تعال
حمد عقد حواجبه ؛ ليه
هادي ؛ بسسرعه تعال
وقفل وضحكت ام هادي ؛ الله يهديكم ما قد تكلمتو مع بعض مثل الاوادم
هادي ضحك ؛ نمزح نمزح بخوفه عشان يجي بسرعه
سمعوا صوت شهد وهي تنادي ؛ يمه
طلعت ام هادي وهادي واستغربت شهد ؛ بسم الله متى جيت انت ؟
هادي ؛ قبل شوي ماشفتيني
ام هادي؛ شهوده ابغى اغراض من برا وابيك تروحين مع حمد تجيبينهم
شهد ؛ حمد مو هنا
هادي ؛ بيجي الحين وتروحين معه
شهد ؛ يلا منها اطلع اتمشى طفشت وش الأغراض يمه ؟
ام هادي بورطه ؛ اااء من البقاله
شهد ؛ دايم ابوي ولا هادي يجيبهم هالمره اعتمدتوا علي انا وحمد ؟
هادي ؛ خلاص انطمي ماتبين تطلعين احسن
ام هادي ضربته بخفه ؛ اسكت انت ، لا يابنت بس الاغراض حقت كيك وحلويات وانتي تعرفينهم
شهد ؛ اذا كذا تم انا اللي اعرف
بعد دقايق دخل حمد ؛ سلام
الكل ؛ وعليكم السلام
حمد ؛ وش فيك انت تدق اشغلتني
هادي ؛ نعم ؟
حمد ؛ امزح بسم الله وش تبي داق تقول تعال
هادي ؛ خذ شهد وروحو للبقاله امي تبي اغراض
حمد طارت عيونه ؛ ووشش تمزح صح ؟ سلامات البقاله هذي هي ورا تحت وماعمري عرفت اغراض امي ولا اجيب اللي تبي بالضبط واتبهذل وتجيبها انت وهالمره تبيني انا اروح ، لا واخذ شهد تجيبهم معي بعد
شهد اللي كانت مأيده كلامه وحتى هي مستغربه ؛ صح صادق حم.... " التفتت لحمد بشهقه" دقيقه خير خير ان شاءالله وش فيني انا
ام هادي ؛ ياهادي تفاهم معهم ولا بخرب المفا..... هادي وهو يقاطعها بسرعه ؛ لا لااا يمه بيطسون الحين لاتخربين شي تكفين
ولف حمد للباب ؛ رح للسياره انثبر لحد ماتنزل القرده وتجيك
شهد ؛ يمه خيير شوفيهم
ام هادي ؛ خلاص اهاوشه الحين روحي البسي عبايتك واطلعي والاغراض برسلهم عليك
حمد ؛ شهد ٥ دقايق ان ماجيتي سحبت عليك ورحت اكمل تمشيه
ام هادي وهادي بنفس الوقت ؛ ييياويلككك
حمد ؛ بسم الله خلاص انتظرها
ضحكوا وراحت شهد تبدل وطلع حمد للسياره
شهد وهي تعدل غطاها ؛ يمه ارسلي الاغراض وانا بروح ويمكن اتأخر عشان بروح للسوق تكفين
هادي بهمس ؛ ععزز الطلب
ام هادي سمعته وكتمت ضحكتها ؛ خلاص عادي خذو راحتكم
استغربت شهد بس استانست وطلعت وهي تركض
ركبت السياره وحركت مع حمد
ام هادي بتنهيده ؛ يربي لو مجهزين بالوقت اللي نقنعهم فيه كان خالصين من زمان
هادي ضحك ؛ اي والله يلا يلا
وكملو يجهزون ودخل ابو هادي فجأه واختبص هادي يحسب ان ابوه حمد وشهد رجعوا وركض بيمسك الباب وزحلق بكيس البلونات وهو يصرخ ؛ اصبرووو
ابو هادي انفجر يضحك ؛ ولد هذا انا حمد وشهد حركوا من قبل شوي
ام هادي ضحكت ؛ يييوه احسبهم نسوا شي ورجعو وحنا بحوستنا
هادي وهو ماسك رجله ويجلس على الكنب ؛ يربي وش هالمفاجأه
ابو هادي بضحك ؛ هذي الاغراض حطيتها بسيارتي وشكلها خربت من الشمس
هادي وهو يفز ياخذهم للثلاجه ؛ لا تكفى كل شي الا الحلا لايخرب
ام هادي عطت جوالها لهادي ؛ هذي شهد ترسل خذ ياهادي رد وارسل اي شي تجيبه عشان يلتهون
ابو هادي ؛ ما عليك بتتأخر لو ترسلينها تجيب مويه من البقاله اللي تحت دامها مع حمد بيفترون للفجر
ضحكوا وهم يكملون شغلهم وابو هادي يساعدهم
..........••..........
بيت ابو راشد
دق جوال ابو راشد وهو يرد بأبتسامه ؛ يامرحبا ياعزام
عزام ابتسم ؛ ارحب ياعمي ، كيفك عساك طيب
ابو راشد ؛ بخير والحمدلله انت وش اخبارك
عزام ؛ بخير ابشرك .. هذا انا داخل الديره بس يمكن اتأخر ساعه وجايكم ان شاءالله والأهل معي
ابو راشد ؛ يامرحبا مليون والله ننتظركم والله يحييكم جميع ، بس عسى ما شر وش بيأخركم
عزام ؛ البقى الله يبقيك ياعمي ابد ما شر بس بناخذ شقه نحط اغراضنا ونجيكم
ابو راشد ؛ لا ورب الكعبه ماتنامون الا عندنا بيتكم ومحلكم
عزام ؛ لاوال...
ابو راشد ؛ لاتحلف والله ماتاخذون شقه والبيت بيتكم يا عزام افا بس
عزام ابتسم بحرج ؛ والله ماله داعي ياعم لاتكلفون على انفسكم
ابو راشد ؛ لاكلافه ولا شي تعال انت واهلك وماتنامون الا عندنا
عزام ؛ ابشر ماتقصر والله
قفل وهو يلتفت لأمه بأبتسامه ؛ ياحبيبتي تعبتي من الطريق لاكن الحين نوصل ان شاءالله
ام عزام ابتسمت ؛ يروح التعب ان شفت حفيدتي وامها بخير وعافيه
عزام ضحك ؛ يا حضها حفيدتك بجدتها
وناظر شموخ من المرايه ؛ بتاخذ مكانك ياشموخه
" اخته " شموخ بضحكه ؛ اكييد بس تستاهل
كملو الطريق وهم فرحانين بجية اول احفاد العائله
( نبذه سريعه بسيطه عن اهل عزام )
" ابوه متوفي وهو ولد امه الوحيد واخته شموخ عمرها ٢٢ سنه و الوحيده وساكنين بالجبيل في بيتهم وعزام وشريفه في شقه قريب دوامه "
..........••..........
المدينه
عند شهد وحمد في السياره
شهد بضحكه ؛ امي تكتب لها نص ساعه
حمد ضحك ؛ شرايك نروح نتقهوى وبعدها نجيب اغراض امي ونطلع لأن هادي النشبه دق علي وانا ماتقهويت
شهد ؛ نذل وما اخذتني وانت تدري اني طفشانه
حمد ؛ عاد ما انكتب لي اشرب قهوه الا معك سبحان الله شفتي كيف ؟
ضحكت شهد ووقفوا عند اسواق المدينه ونزلوا وجلسو يروقون وبعدها يجيبون الاغراض ويرجعون
..........••..........
بيت ابو راشد
دخل ابو راشد للمطبخ وشاف ام راشد لحالها ؛ وين البنات
ام راشد ؛ راحو يجهزون الحين يجون
ابو راشد ؛ ترا عزام كلمني جاي هو واهله بالطريق ووصلو الديره وبينامون هنا جهزو لهم الغرف
ام راشد ؛ الله يحييهم ابد كل شي جاهز
ابو راشد ؛ يلا بروح الدوانيه وهاتو القهوه
طلع ودخلت هاجر وقالت ام راشد ؛ تعالي ياهاجر اهل عزام جايين جهزي القهوه
وقعدت هاجر تجهز القهوه والتفتت على امها ؛ يمه بتروحون لشريفه ولا بتطلع وتجي ؟
دخلت اروى وقالت ام راشد ؛ بكلمها الحين اروى خذي الصينيه وديها المجلس ونادي العيال داخل يجون ياخذون قهوتهم بسرعه الناس وصلوا
اروى ؛ منهم
هاجر ؛ اهل عزام بيجون تخيلي
ام راشد ؛ بسسرعه
فزت اروى تشيل الصينيه واخذتها للمجلس وهي تشوف نايف عند الباب ؛ نايف تعال بعطيك صينية القهوه خذها للدوانيه
لحقها وهو ياخذها وطلع للدوانيه
اروى ؛ يمه اهل عزام بيمشون على طول ولا كيف ؟
ام راشد ؛ لا ماسكين خط وبيرجعون بنفس اليوم صعبه يقول ابوك بينامون هنا
هاجر ؛ وناسه عاد من زمان عنهم ماشفتهم الا مرتين قبل عرس شريفه وبيوم عرسها
اروى ؛ والله طيبين
هاجر ؛ ايه وشموخ تهبل هي وسوالفها
دخل تركي وهو يحط اغراض ؛ من اللي سوالفها تهبل هي وسوالفها
اروى ؛ ماجو اهل عزام
تركي ؛ لا يقول ابوي الحين بيجون بطلع للدوانيه انا
ومشى وطلعو اروى وهاجر وامهم للمجلس وجت منيره وجلسوا ينتظرون ام عزام
وسمعوا صوت العيال برا والسياره وفزو يستقبلون ام عزام وشموخ
دخلو شموخ و ام عزام وهي تسلم عليهم والبسمه على وجهها وفرحانه واستقبلتهم ام راشد بالأحضان
•
نرجع شوي برا عند العيال
وقفت سيارة عزام اللي كان يدق بوري وطلع ابو راشد وعياله راشد وولده ناصر ، وتركي ونايف وهم يسلمون عليه ويباركون له
ابو راشد وهو يأشر لباب البيت ؛ يالله حيهم تفضلوا
دخلهم يا نايف
مشى نايف وهو يأشر لهم على باب البيت ورجع برا يدخل معهم للدوانيه وهو يقهويهم والضحكه عامّه المجلس
..........••..........
في بيت ابو هادي
خلصوا من التجهيزات وضبطوا كل شي
والتفت هادي على امه وهو يصفق ؛ الله الله والله اني فنان
ام هادي ضحكت ؛ اشوفك جحدتنا وحنا نشتغل معك
هادي ؛ اووهه لا والله كلنا ضبطنا الشغل
ابو هادي؛ يلا يلا دقوا على حمد وشهد خلوهم يجون
هادي ؛ انا انا بدق الحين
دق على حمد واستغرب جواله مقفل ؛ الله يقلع عدوه وين راحو جواله مقفل
ام هادي ؛ بدق على شهد
دقت ام هادي ووصلها صوت شهد ؛ هلا يمه
ام هادي تأشر لهادي انها ردت ؛ وينكم
شهد ؛ طالعين من السوق انا وحمد
ام هادي ؛ ليه مايرد على جواله
شهد ؛ خلص شحنه وطلعنا بيشحنه لو ماخلص ماطلعنا
ضحكت ام هادي ؛ انا ادري والله يلا ابوك معصب تأخرتوا
شهد شهقت ؛ قولي جايين بالطريق حنا
سكرت والتفتت لحمد ؛ ابوي معصب وامي تقول ليه مايرد على جواله اتوقع ابوي فجّر جوالك ومقفل
حمد ؛ يراسي وين الشاحن خذي حطيه
اخذته شهد وحطته فالشاحن ومشوا متجهين للبيت...
..........••..........
نرجع لبيت ابو راشد
عند ام راشد والبنات
ام راشد ؛ نورتونا والله وش هالغيبه ياهنوف
هنوف " ام عزام " ضحكت ؛ ييوه من زمان ماقالو هنوف نسيت اسمي
ام راشد ضحكت ؛ اي والله لاننسى اسامينا وهم ينادونا بأسامي عيالنا
والتفتت لشموخ ؛ ياحلوك ياشموخ اخبارك يبنتي
شموخ ابتسمت ؛ بخير الحمدلله ياخاله
منيره ؛ ياحلوك انتي شموخ اخت عزام ؟
ام عزام ؛ ايه هذي بنتي شموخ انتي ام ناصر صح
منيره ؛ اي ياخالتي انا منيره زوجة راشد من زمان اسمع عنكم ولا شفتكم الا الحين
ام عزام التفتت لأم راشد ؛ ماجت بالزواج ولا شفتها
ام راشد ؛ ايه ماكانت هنا كان عرس بنت اخوها بنفس اليوم ولا حضرت للعرس
ام عزام ؛ ماشاءالله والحين شفناك وعرفناك حتى حنا سمعنا عنك وتو حصلت لنا الفرصه نشوفك
ابتسمت منيره ومدت هاجر الشاي لأم عزام ؛ سمي ياخالتي
ام عزام ؛ سمّ الله عدوك انتي هاجر وانا احسبك اروى ما افرق بينكم تشبهون بعض
ام راشد بضحكه ؛ يختي الكل يقول يشبهون بعض بس ما اشوف فيه شبه ابد
ام عزام ؛ لا والله فيه شبه بس كل وحده تقول الزين عندي الله يخليهم لك
ام راشد ابتسمت ؛ امين ويخلي لك شموخه ويفرحك فيها
قامت اروى وسحبت شموخ وهاجر وراحو للغرفه وام راشد وام عزام ومنيره جلسوا يسولفون
•
في الدوانيه
عزام همس لراشد ؛ شريفه يمكن تطلع اليوم والزياره مسموحه الحين بروح اشوفها واخذ الاهل منك خوه ؟
راشد ؛ كلنا بنروح لها وننتظركم
ورفع صوته يكلم ابوه ؛ يبه نروح لشريفه الحين ؟
ابو راشد ؛ والله مدري شف امك اذا هي بتمشي الحين نروح كلنا مع عزام واهله
قام راشد لداخل يسأل امه
وعزام ارسل لشموخ يسألها
ابو راشد التفت لتركي ونايف وهمس ؛ روحو للمزرعه وقولو لنواس " عامل مزرعتهم " يطلع خروف يصلخه وجيبوه للعشاء الليله
تركي ونايف ؛ ابشر
قاموا وطلعوا للسياره
تركي ؛ ليه مانروح نشوف شريفه معهم
نايف ؛ الفجر شايفينها واهل عزام هناك وش تبي راز خشتك اركب بس
ضحك تركي وركبوا وحركوا متجهين للمزرعه
دخل راشد ودق الباب ؛ يمه
ام راشد ؛ هلا جايه جايه
جت ام راشد وهي تعدل برقعها ؛ ابوك ماقال متى نروح
راشد ضحك ؛ هو مرسلني اسألك متى نمشي
ام راشد ؛ الحين نلبس ونروح كلنا
راشد ؛ يلا اجل بقوله وننتظركم بالسياره
دخلت ام راشد وجلست عند ام عزام اللي تو قفلت من عزام ؛ تو كلمت عزام يقول بنروح الحين للمستشفى
ام راشد بضحكه ؛ اي وحنا وراكم بعد
ام عزام ؛ ان شاءالله يلا بنسبقكم حنا وين شموخ ناديها اذا ماعليك امر
ام راشد ؛ ابشري تلحقك الحين
ودخلت للغرفه تناديها
" عند غرفة هاجر واروى "
صح ماكانوا متعوديه على شموخ ولا شموخ متعوده عليهم لكن دخلوا بالسوالف شوي شوي وقالت شموخ بفرحه ؛ يا الله يبنات ماني مصدقه صرت عمه
اروى ضحكت ؛ ترا اول مره تطيرين من الفرحه بعدها ينفجر راسك من البزارين
هاجر ؛ يختي ياحلو البزارين بس وربي احلا شي
شموخ ؛ انتو ماشاءالله عمات وخالات انا اول مره محد قدي
ضحكوا ودخلت ام راشد وهي مبتسمه ؛ شموخ امك مشت للمستشفى تزور شريفه وبترجع بعد شوي
شموخ شهقت ؛ لا كيف انا قلت بروح معها
ام راشد ضحكت ؛ امزح راحت للسياره وتقول نادي شموخ
شموخ فزت بضحك ؛ خفت احسبها راحت صدق
ضحكوا البنات وطلعت شموخ تلبس عبايتها وتلحق امها
اروى ؛ يمه وحنا ماراح نروح لشريفه ؟
ام راشد ؛ اذا ماتبون بكيفكم انا بلبس عباتي وامشي الحين
هاجر ؛ الا نبييي وانا بلبس واروح معك
اروى ؛ حتى انا يمه بروح
ام راشد وهي تطلع ؛ يلا البسوا ولا تتأخرون
قامو يلبسون ويلحقونهم للمستشفى ..