ياديرةٍ ضمّت كل الأحباب

Part 33

دخلت اروى وهي تلقى شموخ واقفه تنتظرها عند باب الحوش وقالت بسرعه ؛ اذا بتكفخيني كفخيني هنا ولايدري احد اما بالصاله بيسألون ليه ما ابي يدرون لأنهم بيكملون علي
شموخ ضحكت ؛ والله مدري انا اللي غلطت ولا انتي اسمعي قولي اننا جينا مشي عشان لاتكفخني امي وحزتها بكفخك صدق
اروى بضحك ؛ تم اتفقنا وترا ماغلطتي كلمتيه من بعيد وانا اشوفكم بالبقاله بعيدين عن بعض
شموخ تنهدت ؛ بس مدري اخاف يصير شي
اروى ؛ يبنت وش بيصير مايصير شي ان شاء الله بكره اذا رجعتوا الجبيل قولي ما ابي زايد وترجعين للديره وانتي زوجة تركي
شموخ ضحكت ومشت اروى ؛ يلا ادخلي ولو علمتي احد باللي صار ترا بروح فيها
ودخلوا للصاله وكانوا كلهم موجودين
اروى وشموخ ؛ سلام
الكل ؛ وعليكم السلام
ام راشد ؛ مستحيل ماتتأخرين
اروى ؛ والله الجو يونس ماشين على مهلنا
ضحكت شموخ وقالت هاجر ؛ وين سفاري ؟
اروى وهي تحط الكيس بقهر ؛ بكرش مرضي " مرضي شايب بديرتهم وكل ماضاع شي ولا خلص وكانوا معصبين ولا مالهم خلق يردون قالوا بكرش مرضي "
هاجر ؛ مخللصص !
اروى ؛ اي والله بس لقيت عصير ثلاث جواهر جبت لك تحبينه
هاجر اخذت الكيس وهي تاخذ عصير وتوزع عليهم وشموخ حطت الكيس اللي شرت لهم بساكيت وككاو
اروى ؛ بروح ابدل
ودخلت ولحقتها شموخ اللي راحت لغرفة امها وقفلت الباب وبدلت بسرعه وخلصت وهي تطلع الشريط من الشنطه وتقلبه ؛ ييوه ماعندي راديو من وين اجيبه الحين " وتذكرت حقهم اللي ببيتهم بالجبيل بس مافيها صبر لازم تسمعه بس رجعته وهدت عشان لاتستعجل وحبت تسمعه بالبيت "
وحطت شنطتها بين اغراضها وطلعت هي واروى وتجمعوا بالصاله
..........••..........
في مكان جديد
ديرة ابو صالح قبل نص ساعه وصل ابو هادي وهادي وحمد ووقفوا عند بيت الجد راجح ابو سامي وهو نفسه ابو حاتم اللي هو ابو هادي وهم يسمعون ترحيب اهل الديره وجيرانهم واخوانه وعيالهم اللي طلعوا والجد وكلهم تجمعوا عند السيارات وابتسم وهو ينزل هو وهادي وحمد وام هادي وشهد بقوا بالسياره عشان الرجال قدامهم وزحمه بينزلون اذا بعدوا شوي
وابتسم ابو هادي وهو يبوس راس ابوه وكتفه ويسلم عليه
وقال الجد راجح ؛ يامرحببا باللي جا يالله حييهم
ابو هادي ابتسم ؛ الله يبقيك ويطول بعمرك
وسلموا عليه هادي وحمد اللي باسوا راسه ويده وسلموا على رجال الديره اللي قربوا يرحبون فيهم وطلع ابو طلال من بيته " هو نفسه محسن ابو مريم ام هادي" ومعه طلال ومحمد اللي قالوا لهم عيال الديره حاتم جا وولد ابو سامي جا
محسن ابو طلال ؛ اررحببوا ارحببوا يالله انك تحييهم
وقرب لأبو هادي اللي سلم عليه وباس راسه ؛ الله يبقيك ياعم
وسلموا عليه هادي وحمد وابو هادي سلم على طلال ومحمد اخوان ام هادي وسلموا على هادي وحمد اللي مشتاقين لهم وعلاقتهم ببعض كأنهم اخوان رغم فرق العمر وكلها ضحك ومزح وابتسم حمد وهو يحضن محمد اللي قال ؛ ههلا والله ياخي اشقت لك والله وش اخبارك
حمد ؛ والله بخيير ومشتاق لكم
وسلم على هادي وسلم عليهم طلال
وبعد السلام والرجال اللي تجمعوا دخلوا لمجلس الرجال في بيت راجح ابو سامي وطلال ومحمد ضحكوا من قال حمد ان امه وشهد بالسياره ماقدروا ينزلون من الرجال اللي تجمعوا وراح طلال ومحمد وهادي وحمد لسيارة ابو هادي وضحك طلال وهو يفتح الباب ؛ يااامرحبا بمريم وبنتها اللي اشتقنا لهم
ضحكت ام هادي وهي تسلم عليه ؛ يااهللا فيك وش اخباركم
محمد وهو يحضنها ؛ ارحبي ارحبي ارحبييي
ام هادي ابتسمت وهي تحضنه ؛ ياقلبي يامحمد اشتقنا لكم والله
وفتح طلال الباب اللي ورا من جهة شهد اللي ضحكت ؛ خاالي
طلال وهو يسلم عليها ؛ يااقلبه والله اشقنا
شهد ؛ والله وحنا اككثر من زمان عنكم ، خال محممد
محمد ضحك وهو يسلم عليها ؛ يالله حيها شهوده وش اخبارك
شهد ابتسمت ؛ والله بخيير الحمدلله
واستند محمد على شباك السياره وطلال متكي معه وحمد وهادي معهم ويسولفون
ام هادي بضحك ؛ الرجال تجمعوا عند السياره ولاقدرنا ننزل
طلال ضحك واستوعب وهو مستغرب ؛ ماقلتوا لنا انكم جايين تو وصلتوا ؟
حمد ضحك ؛ يمه اعلم
ام هادي ضحكت ؛ والله اننا جايين من يومين بس انشغلنا بالبيت والمحل
محمد ؛ ااييه حاتم اخذ العماره اللي يقول ؟
ام هادي ؛ ايه ايه واخذ محل وللحين مافتحناه
طلال ؛ ماشاء الله الله يبارك لكم بس ليه ماقلتوا لنا انكم جيتوا
ام هادي ؛ والله مافضينا وقلنا نجي اليوم مفاجأه
محمد ؛ والله انها احسن مفاجأه جيتكم ، وشلون الديره معك يابنت المدينه
شهد ضحكت ؛ والله تهبل محاسن الصدف
طلال ؛ افا وديرتنا ؟
حمد ؛ شبعت منها انا مابغيت اجي
ضحكوا وقال محمد بضحك ؛ لا يالردي
طلال ؛ دامكم قريب كل يوم بيسحبكم ابوي ، وراجح ااووه ياراجح والله ياهو يسولف عنك يقول مايعرف شي لازم اعلمه واسنعه
حمد حط يده على راسه وهو يضحك
محمد التفت لهادي واستغرب سكوته ؛ صرت مثل اسمك ياهادي ؟
هادي اللي كان يتلفت وعقد حواجبه ؛ كيف يعني
طلال ؛ صدق مالك حس اول تلعلع نسمع صوتك وحنا بالدوانيه
هادي ضحك بخفه ؛ لاوالله بس مصدع شوي
حمد ؛ خسارة الحماس والله ياهو متحمس من فجر الله جاهز لو يعرف خط الديره كان سبقنا
طلال ؛ سلامته والله هادي الونيس
حمد ؛ افا وانا
طلال ضحك ؛ وانت بعد بس هو هاجد اليوم
ضحكت ام هادي ؛ يلا يلا حنا للحين مانزلنا من فيه بيت عمي
محمد ؛ والله مدري يمكن عنده اهل سامي ولا خوات حاتم
هادي فز قلبه وهو يلتفت بسرعه لمحمد
شهد ؛ وبيت جدي محسن ؟
طلال ضحك ؛ كككلنا موجودين وتفرقعنا يوم جيتوا
شهد ضحكت ؛ وناسه كل خالاتي هناك
محمد ؛ وعيالنا نسيتيهم
شهد ضحكت ؛ لا ماعليك ومانسينا حريمكم
ضحكوا وقالت ام هادي ؛ والله مدري اروح بيت عمي ولا ماهم فيه
محمد ضحك ؛ سسلمي على امك يبنت الحلال خلي بيت عمك تزورينهم بعدنا
شهد ؛ موجودين خالاتي الحين ؟؟
محمد ؛ ايه كلنا هالعطله عمامك وخوالك كلهم يتجمعون من الصباح لليل
ام هادي ؛ اجل بسلم على امي ابوي وعمي قبل شوي قدامي ولا قدروا من الناس
طلال ضحك ؛ تم ، تروحون مشي ولا بعيد
محمد ؛ لا بعييد حمد ولا هادي اركبوا السياره ووصلوهم وارجعوا
هادي ؛ توديهم حمد ؟
شهد ضحكت ؛ اعرف اسوق شرايكم اروح انا
حمد ضحك ؛ لا لا ترا هنا بيضحكون عليك محد يسوق
طلال بضحك ؛ خلها نست نست بنت المدينه
شهد ضحكت ؛ ييوه كل ماقلت شي قالوا بنت المدينه مانسيتوا هالأسم كل ماجيت لازم تقولونه
محمد ؛ لا الحين بتصيرين بنت الديره ، الا صدق تعرفين تسوقين ؟
شهد ؛ اي والله اعرف بس محد يخليني اسوق
حمد ؛ يالكذذابه امس سقتي
ضحكت شهد ؛ بس شوي سقت بس كنت اعرف صح ؟
محمد ؛ ابشري باللي يخليك تفحطين بعد العصر تسوقين انتي ومريم عشان احتياط اذا حمد وهادي انشغلوا تاخذون سياراتهم وتروحون عليها
طلال ضحك ؛ اي والله ... ياعيال خلاص تأخرنا وحنا واقفين عند السياره ونسولف ، حمد وصل امك وشهد لبيتنا وارجع وحنا نجيكم والله ياكثر السوالف بس مانقدر الحين
شهد ؛ عادي نتجمع العصر ترا والله مشتاقه لكم لازم تجلسون معنا
محمد ؛ اببشري كلنا موجودين ماعليك
حمد ؛ اجل يلا بحطهم عند بيت جدي محسن وارجع
طلال ؛ يلا حنا بندخل المجلس
وراح حمد اخذ السله من سيارته وركب سيارة ابوه يوصل امه وشهد ودخلوا طلال ومحمد وهادي لمجلس الرجال حق راجح اللي كان قريب بيته وبيته مافيه احد سامي بيته بنفس الديره وبناته متزوجات وفي بيوتهم ويجتمعون عند ابوهم احياناً
وحمد وقف عند بيت جده محسن ابو امه
ام هادي ؛ باخذ السله وحقت بيت عمي راجح انزلها عندهم بعد شوي لا انساها
حمد ؛ وانا طيب بنزل
شهد ؛ وين تنزل
حمد ؛ بسلم على جدتي مزّوزنه
ام هادي ضحكت ؛ مزونه عندها خالاتك وبناتهم خلها بعد شوي
حمد ضحك ؛ تراهم بزران حافضهم وبعدين يدخلون انا اذا رجعت عند جدي راجح بيخليني اصب قهوه للرجال كلهم
شهد ؛ خلاص يمه خليه ينزل يسلم ويطلع لأنه اذا راح هناك بيفشله جدي واعرفه حمد لازم يجيب العيد
حمد ؛ صادقه يلا انزلوا
ام هادي نزلت هي وشهد اللي عطت حمد السله ودخلوا لحوش بيت جدتهم مزنه ولقوها جالسه على فرشه وعندها قهوتها وضحكت ؛ ياهللووه باللي جو يامرحبا
وابتسمت ام هادي وهي تقرب وتجلس عندها وتحضنها وتبوس راسها ؛ ياهلا فييك يابعد قلبي عساك طيبه
الجده مزنه ؛ بخيير بخير الحمدلله ، ياهلا ياهلا بعييلي يالله انك تحييهم
حمد باس راسها ؛ هلا ياجده وشلونك
الجده مزنه ؛ بخير ياحبيب جدتك
وقربت شهد وهي تحضنها وتسلم عليها وابتسمت مزنه بضحكه ؛ ياهلا ياهلا بشهوده
شهد ؛ هلا فيك ياجده وش اخبارك
مزنه ؛ بخير يابعدي ، وين اخوك هادي ؟
ام هادي ؛ والله بمجلس عمي عند الرجال ووصلنا حمد قال بيسلم
مزنه ابتسمت ؛ يالله انك تسلمه وابو هادي وينه ؟
ام هادي ؛ معه معه بس وقفنا عند بيت عمي ونزلوا للدوانيه وحمد قربنا هنا الظاهر بيت عمي مافيه احد
مزنه ؛ ايه سامي ببيته وحصه وجميله ببيوتهم
ام هادي ؛ ووين البنات ؟
مزنه ؛ داخل اميره وروان وورعانهم الا مرام الحين تجي درت اكيد
ام هادي ضحكت ؛ ايه ماشاءالله من يوم وقفنا وكل الديره تجمعوا ودروا
وبهاللحضه طلعت روان بصينيه كاسات وفناجين وهي تشهق بضحكه ؛ ممريمم
وركضت وهي تحط الصينيه وتحضن ام هادي اللي ضحكت وهي تقوم ؛ هللا والله
روان وهي حاضنتها ؛ اشتققت لك والله
ام هادي ابتسمت ؛ ياحبيبة قللبيي
وبعدت روان وجت شهد اللي ضحكت وهي تحضنها ؛ وانا ما اشتقتي لي ؟
روان حاوطتها وضحكت ؛ يا الله يبنت والله اني اشتقت لكم كلكم كلككمم
وابتسمت وهي تسلم على حمد ؛ هللا ياقلبي اخبارك ياحمد
حمد وهو يسلم عليها ؛ الحمدلله بخيير وش اخبارك انتي
روان ؛ بخير دامك بخير " وضحكت وهي تشوف فرق الطول " صاير اطول مني
حمد ضحك ؛ اشوا يعني ماعادني ورع على قولة اختك
ام هادي ضحكت ؛ لا والله انك ورع للحين
ضحكت مزنه ؛ لا لا حبيب جدته الله يرزقه ببنت الحلال
ام هادي بضحك ؛ يييوه يايمه وده بس مهو آخذ قبل اخوه
مزنه ؛ ماعليه هو واخوه بيوم واحد
حمد ؛ شفتي يمه الله يخليك ياجده والله انك صدقتي
ام هادي ؛ لا بس رح لجدك يعلمك الصدق
حمد ؛ اووه الله يستر ... يلا ياجده ارجع لكم بعد شوي واسلم على خالتي ام راكان وام حور " ام راكان مرام و ام حور اميره اصغر وحده "
مزنه ؛ ماعليه ياحبيبي تعال انت واخوك
حمد ؛ ابشري .. وطلع مستعجل للسياره وحرك عند مجلس الرجال ببيت راجح
شهد ؛ خاله البنات وين ؟
روان وهي تصب لهم قهوه ؛ يووه ياحمد ماتقهوى ، بناتي نايمات وريما قامت قبل شوي تراها مادرت انكم جيتوا بتستانس والله
ام هادي ؛ ياحبيبتي ، عاد شهد تدورهم هم وبنات مرام غلا و نجلاء
مزنه ؛ الحيين يجون طلعي طلعي عباتك ماعندكم احد
ام هادي ؛ بتجلسون هنا ؟
روان ضحكت ؛ اييه امي تحب جلسة الحوش تطلع من الفجر وتدخل الضحى بس عشان الجو غيم
مزنه ؛ والله براد يهبل هالجو
اميره طلعت وهي تناظر بصدمه ؛ مريييم !
ام هادي ؛ هلا يازييين اللي معها بنوتتها
وضحكت اميره وهي تسلم عليها ؛ ياحياااتي ليه ماقلتي انك جاييه ؟
ام هادي اخذت حور بنت اميره وهي تبوسها ؛ ياررربيي ياحلووو البنااات
اميره وهي تحضن شهد ؛ ياععمريي انا متى جيتوا
شهد ضحكت ؛ تو تو جينا
ام هادي ضحكت وهي تجلس ؛ لهنا ، بس للرياض من يومين
اميره ؛ احلفيي وليه ماقلتي ؟
ام هادي ؛ والله ماقدرنا قلنا بنرتاح وبعدين انشغلنا بالبيت ومافضينا الا اليوم
مزنه ؛ وش سويتوا بهالديره وكيف اشغالكم
وجلست ام هادي تسولف لهم عن جيتهم للديره والعماره والمحل وعزيمة مساعد والناس والسوق وكل شي
•
•
قبل كم دقايق في بيت راجح بمجلس الرجال دخل حمد ورجال الديره رجعوا لبيوتهم واشغالهم ومافيه الا جدانه وابوه وهادي وطلال ومحمد
وتنحنح وجا بيجلس وقال راجح ؛ صب قهوه
حمد بهمس ؛ اما عاد
وطلال ومحمد كتموا ضحكتهم واخذ حمد الدله والفناجين وهو يصب لجده مثل ماعلمه ومد له الفنجان ؛ سم
راجح اشر لمحسن ؛ ابو طلال اول
واخذه محسن بأبتسامه ؛ سلمت
وصب حمد لراجح ؛ سم ياجد
راجح ابتسم ؛ سم الله عدوك عشت ، صب لأبوك واخوك وخوالك
وصب لهم حمد وهم يضحكون وقال ابو هادي ؛ لا لا تعلم صح ؟
راجح ؛ ايه زيين احسبه بيجي وهو ناسي بعد
وضحكوا وحمد طنشهم وجلس وهو مو عاجبه الوضع انهم يشوفونه صغير لاكن فعلاً من ملامحه وشكله يبين اصصغر من عمره نحيف وقصير وعنده شنب خفييف وشعره كثيف بس يغطيه عن جده بالشماغ عشان لايهاوشه ويقوله يحلقه
وقال راجح لمحسن اللي بجنبه ؛ بذبح لهم اليوم اخليه غداء ولا عشاء
محسن ؛ لا لا على العشاء وانا اللي بذبحها ع.. قاطعه راجح اللي شد على يد محسن ؛ والله انها من عندي وانا اللي بجيبها
محسن ؛ افا يخوي قلت لك عندي ، اجل الرجال هنا والحريم ببيتي ويطبخونه هناك
راجح ؛ خلاص ماقصرت الليله عشاهم ، حاتم اخوك ماشفته ؟
ابو هادي ؛ لا والله للحين هو وينه ؟
راجح ؛ والله اني مدري وين يروح يقول لسوق الغنم
محسن ؛ اجل الغدى مايمدينا على الذبيحه عشاكم الليله تبشرون فيه
ابو هادي ؛ ياعمي والله ماتقصرون ليه الكلافه
راجح ؛ لا لا هذا واجبكم والليله ان شاء الله الرجال عندي والحريم عند بيت عمك وانت ياطلال تجي العصر وانا عمك وتذبح خروف وخذ معك حمد والعيال
طلال هز راسه ؛ ابشر
حمد بهمس ؛ وليه مايودونه مصلخ
طلال ضحك ؛ مافيه احد يودي ذبيحته مصلخ يذبحونها هم ولا عيالهم
ودخل سامي وهو مبتسم ؛ السلام علييكم
الكل ؛ وعليكم السلام
هادي فز وهو يلتفت وابو هادي قام وهو يضحك ؛ ارححب
سامي قرب وهو يسلم عليه ؛ يامرحببا يالله حيهم
ووقفوا حمد وهادي يسلمون عليه وسامي كان يستغرب من سلام هادي ولما يحضنه بس تعود وهالمره حضنه هادي اكثر وهو مبتسم وقال سامي ؛ ياههلا بهادي يالله حيه
هادي بعد وهو مبتسم ؛ الله يحييك
وحمد كان يشوف عمه رسمي ويستحي يسولف معه ولا يمون عليه وبعد سلامهم على بعض جلس سامي وتنهد ؛ السموحه والله اني انشغلت وتو فضيت
ابو هادي ؛ معذور يخوك
راجح ؛ وين رحت ؟
سامي ؛ والله رحت اشوف الغنم وقبلها عند بيت عمي ابو عوض وديت الأهل يسيرون على جدانهم اليوم
هادي شد على يده بقهر وهو يدري ان اذا راحو لجدانهم ينامون ليله عندهم ومتعود كل عيد لما يجون للديره ويودي سامي اهله ينامون والليله اهل ابو هادي بيرجعون لبيتهم يعني مابيشوفونهم
سامي ؛ وترا جبت خروف بنذبحه ونسويه غدى ولا عشاء
راجح ابتسم ؛ عاد نقوله قبيل بس اشوا انك جبته يذبحونه العيال العصر والليله عندنا عشاء
سامي ؛ ان شاء الله ، وجلسوا يسولفون وسامي يقول لهم عن شغله وابو هادي بعد .....

آسفه على التأخير بس والله ضغط هالفتره مو طبيعي يمكن يتغير وقت تنزيل البارتات بس رح تكون نفس العدد كل اسبوع ماراح تنقص

تفاعلوووا لططفاً