ياديرةٍ ضمّت كل الأحباب

Part 37

..........••..........
بيت ابو راشد
ام راشد وام عزام بالحوش جالسين بالدكه وعندهم عيال منيره وعبير والبنات بالمطبخ وشريفه بالصاله تتابع التلفزيون وبنتها بحضنها
بالمطبخ البنات يجهزون العشاء وتنهدت اروى وهي تلتفت لشموخ ؛ اخر عشاء معكم من غير شر
شموخ ابتسمت ؛ يييوه والله بفقدكم
هاجر وهي تقرب الصحن لعبير ؛ والله وحنا اكثثر
عبير ؛ بس تجون مره ثانيه تعودنا عليكم لازم نرجع نجتمع
منيره وهي تقطع ؛ اي والله لازم نشوفكم دايم
شموخ هزت راسها ؛ ان شاءالله
اروى اللي كانت متضايقه ومبين على وجهها سكتت وهي تطلع بالصاله وجلست جنب شريفه وهي تبوس العنود
شريفه ضحكت ؛ ترا جعت خلصتوا عشاكم ؟
اروى تنهدت ؛ ايه قاعدين يحطونه
شريفه ؛ بيتعشون هنا ولا بالحوش ؟
اروى ؛ تقول امي الجو حلو بالحوش اتوقع بنتعشى هناك
شريفه ؛ اجل فزي حطي لي بصحن ماراح اطلع
اروى هزت راسها وقامت للمطبخ واستغربت شريفه هدوءها بس انشغلت من صحت العنود وقامت تصيح
بعد ماجهزوا البنات العشاء طلعت عبير بالصحن ومعها منيره ، وهاجر جت وهي تحط صحن شريفه
هاجر ؛ الجو حلو برا اطلعي
شريفه اعتدلت ؛ لاوالله برد بجلس مع عنودي وباكل هنا
هاجر هزت راسها وطلعت للحوش وجلست عندهم وقالت ام راشد ؛ شريفه مهي جايه؟
عبير وهي تعدل السفره ؛ لا يأمي حطينا لها عشاء بالصاله تقول تبرد هنا
ام عزام ؛ اي والله هوا خفيفه داخل ادفى
ام راشد ؛ ييوه عليكم برد ؟ تبون ندخل
ام عزام ؛ لا لا قصدي برد عليها وعلى العنود حنا ماعلينا
منيره ؛ اي والله يهبل الجو نتعشى وندخل
ام راشد هزت راسها وهي تلتفت ؛ اروى وين ؟
هاجر ؛ بالمطبخ تجي الحين
طلعت اروى وهي تجي وقالت شموخ وهي توسع لها مكان ؛ تعالي تعالي عندي اروى
جت اروى وهي تجلس عندها وقالت ام راشد ؛ يلا اجل سموا بالله وتعشوا
..........••..........
ديرة ابو صالح
دوانية راجح خلصوا العشاء والعيال قاموا يشيلونه وجا نايف بياخذ الصحن واخذه طلال ؛ لا والله ماتشيله ماقصرت يشيلونه العيال
نايف ؛ ابد ماسوينا شي خلني اساعدكم
طلال هز راسه بمعنى " لا " وجا منصور وعطاه الصحن وراح وابتسم نايف وهو يجلس عند تركي اللي قاعد يسولف مع عزام ويسأله
عزام ؛ الفجر ان شاءالله ولا الضحى
تركي ؛ لاا وين الفجر ناموا وارتاحو والضحى تمشون ولا انا والله اشوف العصر احسن تروحون الطريق مهو طويل قبل الليل وانتوا واصلين ان شاءالله
عزام رفع كتوفه ؛ والله اشوف يمكن اجل العصر نروح
تركي هز راسه وابتسم ودقه نايف بخفه بضحك والتفت تركي وهو مبتسم وقام ابو راشد بعد مامشوا اغلب الرجال ومابقى الا محسن وعياله واحفاده وراجح وعياله وعيال ابو هادي اما حمدان ولد سامي مشى قبل دقايق
ابو راشد ؛ كثر الله خيركم وماقصرتوا وابو هادي والله انه نور الديره ونحتري جيته وانتوا معه ان شاء الله
راجح ؛ عافيه وان شاءالله الجايات
ابو هادي ؛ ابشر يبو راشد الجمعه ان شاء الله ازورك
ابو راشد ابتسم ؛ حياك الله ونحتريك وانت يبو سامي وسامي وابو طلال وعياله لازم تجون للديره وتسيرون
محسن وراجح ؛ ابشر ان شاءالله
وقاموا عيال ابو راشد وعزام وسعد وطلعوا بعد ماسلموا عليهم وحركوا راجعين للمحاسن
وقرب حاتم ولد جميله اخت ابو هادي وهو يجلس عند ابو هادي اللي قال ؛ وشلونه السمي
حاتم ابتسم ؛ بخيير عساك طيب
ابو هادي ؛ بخير وشلون ابوك ويزيد ليه ماجو ؟
حاتم ؛ بخير ماعليهم والله يزيد بالخبر ماجا وابوي مسافر يخلص اوراق للشغل
ابو هادي هز راسه وقال حاتم ؛ عاد قلت لأمي مشينا قالت ماسلمت على سامي وحاتم بروح اجيبها عند بيت جدي راجح تعالوا هناك
ابو هادي ؛ ايييه والله مبطي عنها يلا اجي الحين
حاتم هز راسه وقام لبيت محسن ياخذ امه وخواته
والتفت ابو هادي لسامي ؛ سلمت على جميله ؟
سامي ؛ لا جايه ؟
ابو هادي ؛ ايه بياخذها حاتم لبيت ابوي تعال هناك
سامي ؛ خلاص اجي شوي
وقام ابو هادي وهو ينادي هادي وحمد والتفت لراجح ؛ يبه حنا بالبيت بتجي ام يزيد ونسلم عليها
راجح ؛ يلا اجيكم انا
وطلع ابو هادي وعياله وقام محسن ؛ وانا بروح للبيت اسلم على ام جابر وام حسام وعيالهم
راجح هز راسه وطلع محسن وطلال ومحمد للبيت
راجح التفت لسامي ؛ الحين انت ليه ماتقعد مع الرجال وتسولف معهم وانت بس قاعد بمكانك تقل صنم !
سامي عقد حواجب ؛ ليه وش سويت
راجح ؛ وش انت مسوي ؟ اقول عيالك معاذ وماجد ليه ماجبتهم
سامي ؛ يايبه كل واحد منشغل ببيته وشغله وحمدان كان قريب وجا
راجح تنهد ؛ قم قم نسلم على اختك واسلم على ام حمدان وبيان
سامي قام وهو يطلع مع ابوه وراجح راح لبيته وسامي لبيت محسن يجيب ام حمدان وبيان
ووقفت سيارته وهو يدق على ام حمدان اللي طلعت هي وبيان وكان هادي واقف مع حمد وابو هادي ومتكي على السياره وفز واعتدل من شافها وهو عارفها وتنحنح ونادى ؛ ححمد
حمد كان عند العيال بعيد شوي والتفت ؛ هااه
وفتحت بيان باب السياره ولفت على هادي اللي رفع عيونه يناظرها وصد بسرعه عشان لاينتبه احد لأن كلهم واقفين وطنشت وركبت وحرك سامي لبيت راجح
ابو هادي فتح شباك السياره وطلعت ام هادي وشهد وجا محسن وطلال ومحمد وقال محمد وهو يحاوط كتف شهد ؛ يخالي شرايك تقعدين معنا
شهد ؛ بسلم على عمي ماشفته وبنجلس مع جدي وارجع لكم
حمد ضحك ؛ لا يالطيبه بنرجع البيت
طلال ؛ انت تبي البيت شهد بتقعد صح ؟
شهد ضحكت ؛ صح
ابو هادي ضحك ؛ ان كان مافيكم نوم نرجع لكم بعد شوي نص ساعه ونروح للبيت
محسن ؛ ليه ماتنامون هنا احسن
ابو هادي ؛ الجايات ان شاءالله ماجبنا اغراضنا والله
هادي ؛ اججل يلا يبه انا بحرك لبيت جدي
وركب بسرعه وضحك محمد ؛ سبحان الله ياعيالكم محد يقعد جاحدينا
ضحكت ام هادي وابو هادي وركبت شهد وحركوا وحمد حرك قبلهم مع هادي ودخل محسن وعياله واحفاده لبيتهم ودخلوا للحوش اللي كان فيه الصياني والمويه وحوسه وكان فيه مرام وروان واميره وام جابر وام حسام ومزنه بالحوش والبنات والبزارين داخل
محسن ؛ السلامم عليكم
الكل ؛ وعليكم السلام
وجت ام جابر وام حسام وهم يسلمون عليه
ام جابر ؛ وشلونك ياعم
محسن ؛ هللاا والله بخير وشخباركم
وسلمت ام حسام وقالت ام جابر ؛ وشلون ابو حسام
محمد ؛ بخيير عساكم طيبين
ودخل محسن للصاله وكانوا فيها كيان بنت طلال وايلاف بنت محمد والبزارين كلهم وباقي البنات بالمطبخ وقاموا وهم يتجمعون عنده وابتسم وهو يسلم عليهم
محسن ؛ هلا هلا يالله حيهم
كيان ابتسمت ؛ الله يحييك ياجد
ايلاف وهي تبوس راسه ؛ وشلونك ياجدي
محسن ؛ بخيير الحمدلله
وقرب وهو يوقف عند باب المطبخ والبنات يغسلون صحون العشاء ويغنون وضحكوا من دخل الجد محسن وضحك ؛ على القووه
البنات ؛ الله يقويك ياجد
وابتسم ورجع يطلع للحوش والعيال يجمعون الصياني ويفضونها ومرام والباقين يشيلون القهوه والفناجين ويودونها للمطبخ يغسلونها البنات وجلس عند مزنه اللي تتفرج عليهم والراديو حقها عندها
..........••..........
بيت راجح
من وقف ابو هادي ونزلوا ودخلت شهد وهي تسلم على سامي وابو هادي وراجح سلموا على بيان وبعدها سلموا على جميله وبناتها والعيال هادي وحمد وحاتم كانو عند الباب يسولفون وام هادي واقفه عند جميله وبناتها وام حمدان جنبهم
سامي ؛ وش اخبارك
جميله ؛ بخيير الحمدلله
ابو هادي ؛ حصه مهي هنا ؟
جميله ؛ لاوالله عند ولدها من يوم ماتوفى ابو ضاري وهي ماتجي واجد للديره
ابو هادي تنهد ؛ الله يرحمه ، وعند ضاري هي ؟
جميله ؛ ايه وماتجي الا بالمناسبات الكبيره ولا بالعيد
سامي هز راسه ؛ الله يعين ، انا والله مصدع وبرجع للبيت اريّح وسيري علينا بكره
جميله ؛ ماتشوف شر لا والله انا بمشي الليله بنرجع الرياض " هم بديره من قرى بالرياض بس تبعد عنها كم كيلو وجميله بيتها بآخر الديره لاكن اغلب الأيام تكون عند اهل زوجها اللي ساكنين هم وحصه بالعاصمه "
سامي ؛ اجل ودعتكم الله ونشوفك على خير ، يلا يأم حمدان
ومشت ام حمدان وبيان وتنهد راجح وقال ؛ تعالوا اجلسوا بالمجلس خلوا العيال يدخلون يجلسون بالحوش
ودخل ابو هادي وام هادي وشهد وجميله وبناتها للمجلس وراجح طلع عند العيال على الباب وكان هادي واقف لحد ماحرك سامي تنهد انه ماقدر يتكلم بس ارتاح انه شافها رغم انه حس ان فيه شي غريب
راجح ؛ تعالوا ياعيال ادخلوا للحوش الباقين بالمجلس
حاتم ولد جميله ضحك ؛ لاوالله ياجد خلنا نسولف هنا الجو حق سوالف
راجح ابتسم ؛ والحوش مثله ، بكيفكم اذا بتدخلون الفرشه موجوده وحنا بالمجلس
ودخل والعيال كملوا يسولفون
..........••..........
بيت ابو راشد
قبل ساعه من وصلوا ابو راشد والعيال وفتحوا باب سيب الدوانيه وسمعوا اصواتهم اللي بالحوش
ام راشد ؛ صوت سياراتهم والعيال شكلهم جو
ام عزام ؛ ايه صوت الباب
ودخل ابو راشد والعيال للدوانيه وجلسوا ونايف تذكر ؛ ااوووه نسيت اقول لأبو هادي عن المستأجر اللي جا اليوم
ابو راشد ؛ وشو مستأجره ؟
نايف ؛ اليوم واحد شفته واقف عند عمارة ابو هادي يبي يأجر ومالقاه قلت حط رقمك واعطيه اذا جا وشفته ونسيت اعلمه
ابو راشد ؛ يجي يمكن الليله ولا بكره وتعلمه
راشد ؛ يمكن ينامون عند اهلهم ، الا ياحليلهم والله
ابو راشد ؛ اي والله وابو سامي وابو طلال الله يحفضهم
سعد ؛ الحين راجح عياله حاتم وسامي بس ؟
ابو راشد ؛ الظاهر ، ماشفت الا هم اول احسب طلال اخوهم طلع ولد محسن واخو محمد
عزام ضحك ؛ ايه والله يشبهون بعض
تركي ؛ اا الا الساعه كم بتروح ؟
عزام ؛ والله ودي اكون بالجبيل قبل الظهر يعني الساعه ٦ ولا ٧
ابو راشد ؛ ايييه نسيت انك بتروح بكره ومانمت لازم تصحصح عشان لاتنام بالطريق انا اشوف اذا قمت وشفت انك شبعان نوم تروح
عزام ؛ الفجر اقوم بس اتوقع ٦ الصباح نمشي
ابو راشد ابتسم ؛ الله يسهل لكم ويستر عليكم اجل ريّح الحين واشبع نوم قوموا ياعيال جهزوا الفرش
راشد قام ؛ اي والله ورقد ناصر بوديه وانام يلا تصبحون على خير
الكل ؛ وانت من اهله
وقاموا كلهم يجهزون فرشهم عشان ينامون وعزام طلع للحوش واتصل على امه وردت ؛ هلا عزام
عزام ؛ ها يأمي وشلونك
ام عزام ؛ بخيير ياحبيبي وانت
عزام ؛ بخير دامك بخير ، يمه بكره لو نمشي الساعه ٦ زين ؟
ام عزام ؛ ايه زين نمشي ٦ ؟
عزام ؛ ايه عشان نوصل ١٠ احسن قبل الظهر
ام عزام ؛ خلاص ان شاءالله
عزام ؛ شموخ وين
ام عزام ؛ مع البنات داخل وانا وام راشد بالحوش
عزام ؛ تمام بكره الصباح نروح ان شاء الله اجهزوا ، وترا شريفه بتجلس نرجع لها بالتمايم
ام عزام ؛ ان شاء الله
وقفلت ورجع عزام للدوانيه
ام راشد ؛ الصباح تمشون ؟
ام عزام ؛ اي والله يقول ٦ ، بشوف شموخ اقول لها تجهز الأغراض
ام راشد ابتسمت بخفه ؛ يلا اجل تعالي ندخل
وقاموا للصاله ومن دخلوا وقفوا وهم يضحكون بأستغراب من اروى وهاجر وشموخ وعبدالله وترف وخالد عيال عبير وجوري واميره ومناير عيال منيره يركضون ويلحقون بعض وقالت جوري ؛ مسكتهم مسكتهم كلهم فزنا
شموخ بضحك ؛ شششطووره فوزتيناا
هاجر ضحكت وهي تجلس ؛ عادي اليوم فزت عليكم انا وشريفه الحين عطيناكم الفرصه
اروى ؛ اووه بتمسكينها علينا عاد
عبدالله ؛ لو ناصر صاحي كان فوزنا
منيره ضحكت ؛ ييوه نام هو ؟
عبدالله هز راسه وهو يجلس عند امه ويشرب مويه
عبير ؛ وانت بعد يلا روح الدوانيه عند بابا عشان تنام
وقام عبدالله وهو يروح للدوانيه وجلسوا البنات وام راشد وام عزام اللي قالت ؛ شموخ تجهزي بكره الساعه ٦ نمشي
شموخ تنهدت ؛ ان شاءالله
اروى سكتت وبعد ثواني من الصمت تنحنحت وهي تاخذ ريموت التلفزيون ؛ اا فيه مسلسل حلو خلونا نشوفه
وتجمعوا يتابعون المسلسل وهاجر قامت تغسل الكاسات ورجعت وهي تصب لهم شاي وكملوا يتابعون
•
بالدوانيه قبل دقايق قام تركي وطلع للحوش ونايف حس بحركته وقام بشويش عشان لايصحون الباقين وطلع ورا تركي اللي جلس عند باب الشارع حق الدوانيه
تركي التفت لنايف اللي جا وجلس جنبه ؛ مانمت ؟
نايف ؛ والله انعس بس شفتك طلعت ولحقتك وش سالفتك من الصباح سحبت على المحل وشوي تضحك وشوي تهوجس ووضعك غريب
تركي ابتسم بضيق صح ان اليوم كان من احلا الأيام عنده لاكن فكرة ان بكره بتمشي وان اليوم اول وآخر كلمه ومايدري متى بيلتقون من جديد تضيقه بعز ابتسامته وقالت بأبتسامه خفيفه ؛ اليوم الصبا.. قاطعهم عبدالله ولد عبير اللي جا وهو يوقف وراهم ؛ وش تسوون
نايف التفت بخوف ؛ ببسم الله انت مانمت عند امك ؟
عبدالله استند على الباب ؛ لا لعبنا ومسكتنا جوري وفازت هي وخاله اروى وشموخ
تركي التفت بسرعه ؛ وششوو ؟
عبدالله ؛ فازوا علينا
تركي وسع له مكان بينه وبين نايف ؛ تعال تعال وش تقول
عبدالله استغرب بس جلس وقال ؛ والله جوري غشاشه تعد وتطالعنا ماغمضت وعرفت مكاني انا وجوجو " يقصد هاجر " ومسكتنا
تركي ؛ وو وش تقول انت واروى ومين
عبدالله قعد يسولف بحماس وهو مو فاهم تركي وش يسأل عنه بالضبط ؛ انا وجوجو وترف فريق وجوري واروى وشموخ فريق ومسكناهم مره وهم ٣ مرات وفازوا علينا
تركي ؛ اا وانت تلعب مع البنات !
نايف اشر لتركي يسكت ؛ ععادي ايوه كمل عبود
عبدالله ؛ ومسكتنا جوري وصخه وغشاشه انا اعلم عليها ناصر وانا اذا عديت تقول لي غمض وتحط علي شرشف جده عشان ما اشوف
نايف ضحك وتركي ابتسم بخفه ؛ خخلاص بكره علم عليها ناصر الحين روح نام
عبدالله ؛ وانتوا ؟
نايف ؛ ششوي ونجي بعد بس بكلم خويي
عبدالله ؛ وتركي ؟
تركي رفع حواجبه ؛ قل خالي تركي ! وانا بعد بكلم خويي
عبدالله هز راسه وركض للدوانيه ودخل ينام
نايف ضحك ؛ يحليله شبلاك عليه !
تركي تنهد ؛ مقرود وش موديه يلعب مع البنات
نايف ضحك ؛ اووه ان كانك تغار منه ترا ورع ابو ٧ سنين
تركي ضحك وقال نايف ؛ وش كنت تقول اليوم الصباح ايش ؟
تركي بهدوء ؛ شفتها بالبقاله وكلمتها
نايف ؛ شموخ !
تركي رفع حواجبه بصدمه وحرك يده بمعنى " وش او خير "
نايف ضحك ؛ يلييل منك نسيت اخت عزام تقول كلمتها كيف ؟
تركي تنهد ؛ ياخي والله سالفه طويله قلت لعيسى عنها كلمته الصباح " وكان اصلاً مايدري شلون كذب على عيسى بدون لا يشك ويخاف يقول لنايف ويكشفه انه وشلون كلمها وعرف وكيف ما انتبهت اروى "
نايف ؛ طييب انا ماقلت لي بعرف السالففه
تركي تنهد بتوتر وبدا يقوله وهو يحاول قد مايقدر مايزل لسانه ولا يبين انه يكذب وان اروى ساعدته وكان نايف يوهقه بالأساله اللي شككته بتركي
..........••..........
قبل نص ساعه في ديرة ابو صالح
بيت راجح
ابو هادي وراجح كانوا واقفين برا لحد ماحركوا ومشوا جميله وبناتها مع ولدها حاتم والتفت ابو هادي ؛ اجل يايبه الوقت تأخر ولازم نرجع وانت لازم تزورنا ان شاءالله
راجح ؛ ان شاءالله على خير وعاد انت دامك قريب تعال ديرة اهلك هذي لازم تجيها
ابو هادي ابتسم وهز راسه ؛ ابشر ، يلا ياعيال ادخلوا نادوا امكم بنمر عمي ابو طلال ونمشي
ودخلوا هادي وحمد وطلعوا بعد دقايق مع ام هادي وشهد اللي قالت وهي تسلم على راجح ؛ يلا مع السلامه ياجد وتعال لمحاسن الصدف بتعجبك والله
راجح ضحك وهو يطبطب على كتفها ؛ اعرفها المحاسن وبجيها عشانك ابشري
ام هادي وهي تبوس راسه ؛ ودعناك الله ياعمي وسيّر علينا ننتظرك
راجح ابتسم ؛ ان شاء الله
وسلموا عليه هادي وحمد وابو هادي وركبوا بسياراتهم وحركوا لبيت محسن ودخل راجح لبيته ينام
•
في بيت محسن
كلهم بالحوش والبنات متغطين وينفضون الفرشات ويطوونها والعيال على الباب خلصوا غسيل الصحون والقدور والصياني ومرام وخواتها وزوجة طلال وزوجة محمد يكنسون الحوش وطلال يفتح المويه وصار يرشه بالحوش
نجلاء ؛ خاال الفرشات اصصبر
طلال ضحك ؛ يووه ماطلعتوهم تعالل جابر انت والعيال اسحبوها حطوها بالحوض نوديها الصباح
محمد وهو ينادي من برا ؛ المخزن مسكر ؟
محسن اللي كان واقف عندهم على الباب ؛ لا فتحته دخلوا الصحون فيه
وشال محمد والعيال الصحون وهم يدخلونها بالمخزن
مرام ؛ يلا ماباقي الا الفرشات تساعدوا عليها والحوش علينا
وسمعوا صوت سيارة ابو هادي اللي وقفت ووراه عياله وقال محمد ؛ ابو هادي ادخلوا
ودخلت مرام وخواتها وزوجة طلال وزوجة محمد وباقي البنات وقفوا عند مزنه اللي اشرت لهم يقربون عندها ونزلت شهد والباقين ودخلت ورا ام هادي اللي قالت ؛ على القوه
الكل ؛ الله يقوييك
ابو هادي ضحك ؛ افاا وهادي وحمد ماسكينها سوالف وانتوا هنا تشتغلون ولا عاونوكم
طلال ؛ اببد خلصنا والله ماباقي الا الفرش يشيلونهم العيال
ابو هادي ؛ هادي وحمد معكم يلا يلا عاونوهم
وهاتوا الفرشات
ودخلوا العيال يسحبون الفرشات يطلعونها لسيارة محمد اللي واقف هو وابو هادي ويسوون الحبل
ام هادي دخلت للصاله وهي تلقاهم جالسين وقالت وهي تجلس عندهم ؛ الرز ليش حاطينه بالسفره برا ؟
مرام ؛ ماعليك هذا الباقي بالقدر محروق وبعضه كنسناه من الحوش قالت امي افرشو سفره برا وحطوه عليها تجي الطيور وتاكله
ام هادي هزت راسها وقالت روان ؛ الا سولفتي مع جميله ؟ كانت عندكم موضي ؟
ام هادي كشرت بضيق ؛ ييوه سلمت على عمي وراحت هي وبيان قال سامي بينام مصدع وماجلسوا وقعدت انا وجميله وبناتها وبعدين طلعت تسولف مع حاتم والعيال برا
مرام ؛ وماقال شي راجح ؟
ام هادي ؛ لاوالله بس واضح مايداني ام حمدان
ام جابر ؛ يختي هي تغث الواحد الله يعين سامي
اميره ؛ وجميله ماقالت شي ؟
ام هادي ؛ لا ماجابت طاريها بس ماتكلمت معها
ام حسام ؛ ايه حتى هنا قبل شوي بس سلام
بالحوش العيال يشيلون الفرشات وقالت نجلاء ؛ ورع لاتطيح ماتعرف تشيلها
حمد التفت بضحك ماكان الا هو والباقين طلعوا يودون فرشه ؛ الصوت هذا كأني اعرفه ؟
شهد ضحكت ؛ ننجوله
حمد ضحك ؛ ييييوه هذي المقروده اللي تتهاوش معنا
مزنه ضحكت ؛ يلا بس بنياتي بعيدةٍ عنهم القراده
حمد كان صاد وهو يضحك ؛ افاا يامزونه وعيالك ؟
مزنه ضحكت ؛ اللي يغلط مقرود
وجا هادي وسكتوا البنات واصلاً هو الوحيد اللي يستحون منه ولا حمد والباقين يطقطقون عليهم عادي وجا جابر وقال حمد ؛ تعال ياجابر اسمع جدتك وش تقول
جابر ضحك ؛ وش تقول مزونه
حمد ؛ تقول بنياتها بعيده عنهم القراده والعيال مقاريد
مزنه ضحكت ؛ لا يالكذوب
حمد ضحك وهو يلتفت لجابر ؛ يمكن مزونه تشوفنا مقرد بس بعض الناس مايشوفونك مقرود
هادي فهم وضحك ؛ ايه ايه القرد بعين حبيبه غزال
ريما ضحكت بفشله وهمست ؛ حسسببي الله
وضحكوا وجابر ابتسم وكملوا يشيلون ومزنه مبتسمه بحب لعلاقتهم اللي كانت اخويه وهي معودتهم وكانوا بناتها وعيالها مو راضين ويشوفون ان عيالهم كبار وعيب لاكن مع الأيام اقتنعوا وصاروا يحبون علاقتهم ببعض اكثر من مزنه
وطلع محسن وهو يسكر المخزن ويشوف العيال خلصوا وطلال فتح المويه وهو يرش الحوش والبنات جابوا الصابون والمكنسه وجابوا كرسي لمزنه ومحسن اللي جلسوا بآخر الحوش وهم يتفرجون عليهم ومحمد وابو هادي والعيال خلصوا الفرشات وهم يشدون الحبل عليها والتفتوا على المويه اللي شطفوها من الحوش وطلعوها على برا وقرب حمد ووقف عند الباب وما انتبهت غلا وهي تكب المويه على رجوله
حمد بعد ؛ ييييوه اصبرروا
نجلاء ضحكت وهي تكب السطل الثاني ؛ وخخر وخر لا اقول جعلك تزلق
حمد بعد وهو يضحك ؛ ترا امسك هالتراب وانثره عشان تغسلون مره ثانيه
ابو هادي حط يده على وجهه وهو يضحك بفشله من ميانة حمد اللي عجز فيها ؛ وللد
طلال وهو بأخر الحوش يعبي السطول ؛ عشان انثر ضلوعك وانا خالك واخليك تشطفها مع هالماء
ضحكوا وضحك حمد وهو يوقف عند العيال وخلص طلال والبنات من شطف الحوش ودخل محمد ؛ ياسلااام كذا مرايه البلاط
شهد ؛ اييه عشان تعرف سنعات
طلال سكر المويه وهو يمشي بشويش عشان لايزحلق ؛ وانا سنعه يعني
الكل ؛ هههههههههههههههه
محسن ضحك وهو يقوم ؛ الله يعطيكم العافيه
الكل ؛ الله يعافيك
مزنه دخلت للمطبخ وهي تطلع من الدولاب حلويات وعصاير وهي تحطهم بالكيس وطلعت وقالت وهي تمر من الصاله ؛ تعالو يبنات
وقاموا ام هادي واللي معها وطلعوا وراها ووقفت مزنه بنص الحوش وهي توزع عليهم واحد واحد كبير وصغير وبنظرها كلهم صغار وابتسموا وهم ياخذون منها لحد ماعطتهم كلهم حتى ابو هادي اللي ابتسم من لطافتها والعيال اللي كانوا برا كللهم عطتهم
حمد ؛ اووه يامزونه العيد اللي راح والله مانسيته
مزنه ضحكت ؛ اييه تستاهلون العيديات والعيد هذا ان شاء الله تبشرون فيه
ابو هادي ؛ اجل دام خلصنا حنا نستأذن تأخرنا والله ولازم نرجع
مزنه ؛ ليه ماتنامون هنا !
ابو هادي ؛ والله ياعمه اليوم مانقدر عندي شغل ولازم اخلصه تزورونا انتوا ونجيكم
محسن طلع ؛ ان شاءالله وان كانك تبي شي ترانا قريبين لايردك الا لسانك
ابو هادي ابتسم ؛ ابشر ياعم ، يلا يعييال
ورجعت مزنه ونادت ام هادي وشهد عشان يطلعون وطلعوا بعد ماسلموا على الكل وركبوا وحركوا راجعين وقال طلال ؛ يلا كيان نادي امك مشينا
محمد ؛ وانتي يا ايلاف يلا اركبوا
مزنه ؛ خواتكم بينامون هنا ناموا عندنا
طلال ؛ والله يأميمتي من فجر الله عندي شغل وماجبنا اغراضنا مره ثانيه ان شاءالله
محمد ؛ اي والله الجايات وتجي مريم بعد وننام كلنا
محسن ؛ اجل مع السلامه ان قدرتوا سيروا بكره
طلال ومحمد ؛ ان شاءالله
وطلعوا اهل طلال واهل محمد وركبوا وحرك كل واحد لبيته ودخلوا محسن ومزنه للبيت والكل راح ينام ونجلاء وغلا وريما جلسوا يسولفون شوي لحد ماناموا من التعب
..........••..........
محاسن الصدف
وقف ابو هادي عند بيته وهادي وحمد وقفوا وراه ونزلت ام هادي وشهد وهادي وحمد اللي دخلوا ونادى نايف ؛ ياعم
ابو هادي التفت ؛ ههلا نايف سم ؟
نايف قام من عند تركي وفتح سيارته واخذ الورقه ومشى ووقف نايف عند سيارة ابو هادي
نايف ؛ الظهر جا واحد بيأجر عندك ومالقاكم وعطاني رقمه عشان تكلمه وبيسكن بعمارتك
ابو هادي اخذ الورقه اللي مدها له نايف ؛ ماققصرت اكلمه الصباح ان شاءالله واشوفه
نايف هز راسه ؛ ان شاءالله يلا تصبحون على خير
ابو هادي ؛ وانت من اهله
ودخل ورجع نايف وهو يجلس عند تركي اللي قال ؛ وش عطيته ؟
نايف ؛ ورقه رقم المستأجر اللي اقولكم اليوم
تركي هز راسه وقال نايف ؛ وش قال عيسى يوم قلت حطيت بكيسها شريط ؟
تركي استوعب انه ماقال لعيسى عن الشريط ولا عن انه وصلهم وكذب على كل واحد كذبه ؛ نسسيت نسيت اقوله بس قلت له اني شفتها بالبقاله وكلمتها يوم بعدت اروى وماقلت له وش صار بعدها
نايف ؛ واروى ماقالت لأمي ولا لأحد انك وصلتها هي وياها ؟
تركي ؛ لا لا ان شاء الله ماقالت لأحد بس انا قلت تبين اوصلكم لأنها شمس شوي قالت طيب ووصلتهم وحركت للمزرعه
نايف ضحك ؛ غريبه ماعلمت اروى ولا فضحتك
تركي ابتسم ؛ ماشكت بشي ولا انتبهت
نايف بأستغراب ؛ واخت عزام طيب ماقالت لأمها ؟ياخي ما اصدق يعني اروى حتى بالبقاله ماشافتك وانت تتكلم معها ؟ ولا سمعت صوتك ولا احد بالبقاله شافكم !
تركي تنهد ؛ عاد قلت لك والبقاله كانت فاضيه واروى بعيده ، قم قم انت شكل النوم بدا يأثر عليك
نايف ؛ وبكره مابتقول لها شي كلمتها خلاص صح ؟
تركي وهو يقوم ؛ يمكن ايه
نايف ضحك ؛ بس والله طلعت مب هين شريط وحب وحركات بعدين الشريط حقنا كلنا المفروض تستأذن
تركي ضحك ؛ خلاص اجيب لك واحد مثله وعشر غيره
نايف ابتسم وهو يدخل للدوانيه وكل واحد راح لفراشه وناموا
•
عند البنات داخل
شموخ وام عزام طلعوا شناطهم واغراضهم عند باب الصاله والبنات يساعدونهم وخلصوا وتنهدت هاجر وهي تجلس ؛ يربيي زين عفش شريفه مو معكم ولا كان انكسر ظهري
شريفه ضحكت وهي تدقها بخفه ؛ والله مو كثيره الأغراض كلها شنطتين
هاجر ضحكت ؛ نشوف اغراضك كم شنطه
شريفه بضحك ؛ لاا اشوفك مستعجله على اغراضي ترا ازعل واروح معهم
الكل ؛ هههههههههههههه
ام عزام ضحكت ؛ ياعمريي والله بنشتاق لكم ولعنوده
ام راشد ؛ عنوده تنتظركم بتمايمها ان شاء الله
الكل ؛ ان شاء الله
ام عزام ؛ يلا ياشموخ روحي نامي عشان مااتعب وانا اصحيك بكره
ام راشد وهي تشوف الساعه ؛ ايه خلاص اليوم والله تأخرنا الساعه ١٢ وشوي يلا روحوا ناموا عشان تقومون كلكم بكره وتسلمون على ام عزام
وقاموا كلهم ومنيره كانت رايحه تنام قبل دقايق عشان عيالها كلهم ناموا وراحت ام عزام لغرفتها وام راشد وعبير وشريفه بعد وهاجر واروى وشموخ بالغرفه كلهم استعدوا للنوم وهالمره كانت الليله بدون سوالف لأن اروى كانت ساكته لحد مانامت ولحقوها كلهم

•

على اني تأخرت ٣ ايام وما نزلت ولا بارت الا ان مافيه احد فقدني 🤨🤨
رغم كذا جمعتها لكم ببارت اليوم بما ان اليوم اجازه نزلته لكم لعيون الوطن 💚💚🇸🇦😂
وتفاعللللوا والله رغم قلة التفاعل الا اني انزل عشان خاطر المتفاعلين ❤.