ياديرةٍ ضمّت كل الأحباب

Part 48

صلوا ع النبي وفيه نجمه اضغطوها وقراءه مُمتعه ❤.

..........••..........
من بكره الفجر
بيت ابو هادي
كان يشرب فنجاله ومستعجل بحكم ان ماباقي الا دقايق على الأقامه ؛ شهد نايمه ؟
ام هادي وهي تروح للمطبخ ؛ ايه ، هادي يطلع اليوم ؟
ابو هادي حط فنجاله ؛ مدري والله اكلم حمد بعد شوي ونروح له العصر ان كانهم ماطلعوه ، يلا بروح انا
ام هادي من المطبخ ؛ مع السلامه
وطلع ابو هادي وام هادي كملت تجهز الفطور
•
بالمسجد
دخل ابو هادي على تكبيرة الأمام ورجال الديره اللي اصطفوا يصلون وصف معهم وكبر وصلى ..
بعد الصلاه اعتدل والتفت لمساعد اللي قال ؛ صبحه بالخير
ابو هادي ؛ هلا مساعد صباح النور
وناظر عم مساعد اللي بجنبه ومد يده يسلم عليه ؛ حي الله ابو عايد
ابو عايد وهو يسلم عليه ؛ هلا الله يحييك شلونك
ابو هادي ؛ بخيير عساك بخير
ابو عايد ؛ الحمدلله
وجلس على طرف بعيد شوي وقال مساعد ؛ وين العيال ؟
ابو هادي تنحنح ؛ والله هادي تعب امس وتنوم ومعه حمد مرافق
مساعد بصدمه ؛ تقوله صادق ؟ وش فيه ليه ماعلمتني!
ابو هادي شد على يد مساعد بهمس ؛ ققصر صوتك مافيه شي حراره وتخف ان شاء الله
مساعد ؛ كان علمتني طيب ، متى يطلع ؟
ابو هادي ؛ مايحتاج بسيطه اليوم ان شاء الله وهو طالع
والتفتوا على تركي اللي تنحنح وجا وجلس عندهم بأبتسامه خفيفه ؛ صباح الخير
ابو هادي ومساعد ؛ صباح النور
تركي ؛ اا الا ياعم بسألك هادي من امس مايرد ، والحين مب معك هو وحمد وينهم ؟
ابو هادي ناظر مساعد والتفت لتركي ؛ تعبان شوي منوم بالمستشفى ومعه حمد
تركي سكت بصدمه وتنحنح ؛ سلامته ان شاء الله
ابو هادي ؛ الله يسلمك
وقام تركي بسرعه وطلع والتفت مساعد لأبو هادي ؛ يلا برجع انا وعمي تعال افطر معنا
ابو هادي رفع كفه ؛ لا والله مالي فيه برجع اريح
وقام وناظر ابو راشد والعيال اللي جالسين على طرف قريب الباب ومر من عندهم ؛ صبحهم بالخير
ابو راشد والعيال ؛ صباح النور ، ياهلا
ابو هادي ؛ شلونكم طيبين ؟
ابو راشد والعيال ؛ بخير الحمدلله ، بخير عساك بخير
ابو هادي هز راسه وقال وهو طالع ؛ الحمدلله بخير
وركب سيارته وحرك للبيت وكان تركي جالس برا عند جدار المسجد وهو خايف ان هادي فيه شي وكان ماسك جواله بيدق بس مافيه ابراج وتنهد وقام وهو يلتفت لأبوه والعيال اللي طلعوا من المسجد ومشى معهم للبيت
..........••..........
بيت ابو راشد
7:00 الصباح
عند باب الحوش كانت سيارة سعد وهو واقف عندها وعنده ابو راشد وراشد ، وناصر وعبدالله وجوري وترف بالدكه عند القطوه وتركي ونايف بالصاله ياخذون اغراض عبير ويطلعونها لسيارة سعد وطلعت ام راشد للحوش وناظرت عند الدكه ؛ انا وش اقول الله يصلحكم برد برد امشوا ادخلوا
ترف ؛ شوي بنلعب مع البسه
ام راشد ؛ جيبوها الصاله لاتقعدون بهالبرد ، يلا بسرعه
وقاموا وترف شالت البسه ودخلت للصاله مع الباقين وكانت عبير تلم شعرها وناظرت ترف ؛ ترف تعالي خذي شنطتك البسيها وخليها داخل بالسياره لاتحطينها بالدبه
ترف ؛ طيب غيري بجامتي
عبير وهي تلبس عبايتها ومتقروشه من خالد اللي متعلق فيها ويصيح ؛ حطيت لك لبس بالشنطه هذي ابدل لك بالطريق بنوقف اخلصي لا افصل عليك
وتأففت ترف وهي تاخذ شطنتها الصغيره ولبستها على ظهرها وهاجر شالت خالد ؛ خلاص هذي هي ماما اسكت
عبير ؛ والله مايسكت يحسبني بخليه ، امي وين راحت
شريفه وهي واقفه عندها وشايله العنود ؛ طلعت الحوش
عبير وهي تلف طرحتها ؛ عبدالله لاتنسى جكيتك خذها والبسها عن البرد
وطلعت اروى وهي جايبه الشنطه الثانيه ؛ عبير هذي فيها ملابس خالد واغراضه وثوب لعبود
عبير ؛ عبدالله خذها ، انا وش اقول جكيتك وينها
عبدالله ؛ مالقيتها
هاجر وهي شايله خالد بتروح للغرفه ؛ بشوفها يمكن بغر... وفزت وهي تحط يدها على اذنها من خالد اللي صاح زياده وقالت عبير ؛ هاتيه هاتيه والله مايسكت
اروى وهي ترجع للغرفه ؛ بشوفها انا
شريفه ؛ يويلي هذا وش جاه
عبير بقهر وهي تجلس وتلبسه نعوله وجاكيته ؛ حمار
وضحكت شريفه وقالت هاجر ؛ عبدالله خذ الشنطه هذي حطها داخل السياره مع حقت ترف
واخذها عبدالله وطلعت اروى ؛ هذي جكيتك البس البس
وجلست على ركبها تلبسه بسرعه وقالت عبير ؛ شوفوا اغراضكم العابكم ترا اللي بيصايح لاوصلنا بصفقه تأكدوا من الحين لاتشغلوني
ترف ؛ العروسه حقتي وينها
عبير ؛ هذي شلتها بالشناط اللي طلّعنا ، تعالي اربط شعرك
ترف ؛ لا خليه ما ابي اربطه
وتأففت عبير وهي تقوم ؛ عبدالله ابوك ماقال يلا
عبدالله ؛ لا يسولف برا وجده طلعت عندهم
عبير تذكرت ؛ ايه ايه امي تقول فيه اغراض تبيني اعطيها خالتي وينها ؟
اروى ؛ قالت اعطيك اذا بغيتي تمشين بس طلعت
عبير التفتت لعبدالله ؛ رح نادها قل امي تبيك بسرعه ، وخذ شنطة اخوك ودها
واخذها عبدالله وطلع ولحقه ناصر وجلست عبير بتعب وهي تحط خالد بجنبها وصاح وشالته بقهر ؛ ابك سد فمك ماني طايره ، ترف غسلي يدك مشينا
ترف ؛ ماني بابا ماقال يلا
عبير ؛ هاجر هاتي لي ماء نشف حلقي ، اروى تكفين تأكدي ليكون نسيت شي بالغرفه
وهزت راسها اروى وراحت وجت ام راشد وهي تضحك ؛ ياحليله سعد يضحك على ناصر وعبدالله
عبير ؛ ليه ؟
ام راشد بضحكه ؛ يقول ودي اخلي عبدالله ولا اخذ ناصر لو تشوفينهم البارح كلنا رقدنا الا هم يسولفون عند الباب
عبير ضحكت ؛ يوه وانا مقومتهم من التلفزون عشان ينامون
شريفه ؛ يعمري والله بيطفش نويصر
عبير ؛ حتى عبدالله بيشغلني ، ايه يمه وين اغراض خالتي اللي تقولين
ام راشد ؛ ايه ايه ، ياهاجر
هاجر طلعت من المطبخ وهي تعطي عبير كوب المويه ؛ هلا
ام راشد وهي تجلس ؛ روحي غرفتي فيه كيس ابيض كبير على السرير هاتيه
وراحت هاجر وطلعت اروى ؛ عبير مافيه شي نسيتوه تأكدت
عبير ؛ زين اجل ، يمه وش يقول سعد
ام راشد ؛ يسولف هو وابوك للحين ، عطيني خويلد هو باكي ؟
عبير ؛ ايه يوم شافني لابسه عباتي يحسبني بروح واخليه قعد يصيح
ام راشد شالته وصاح وضحكت وهي تخليه ؛ يوه يوه خلاص خلك بحضن امك
وطلعت هاجر بالكيس ؛ يمه هذا
ام راشد ؛ ايه عطيني اشوفه
ومدته لها هاجر وفتحته ام راشد وهي تطلع الأغراض ؛ شوفي ياعبير ، وصليهم لحصه وسلمي لي عليها جبت لها قطعتين قماش خليها تفصلهم على كيفها وهذا كيس حنا انتبهتي لايتنثر ، وهذي سجاده .. وهذيلي براقع وهذا بخنق وفيه علبة بخور ماني مطلعتها عشان شريفه والعنود شوفيها بالكيس ، وهذيلي قماشات هذي لسهام وهذي لمها
" بنات حصة " تشوفين لاتنسين
عبير ؛ اصبري قماشتين لعمتي اللي هي الخضراء والرصاصيه وقماشة مها البيضاء وقماشة سهام البنفسجيه ... عساني ما انسى عاد ان نسيت ادق عليك
ام راشد وهي ترجعهم الكيس ؛ زين ، بوديهم السياره واشوف ابوك والعيال
وهزت راسها عبير وقامت ام راشد وهي تحط شرشفها عليها وطلعت وناظرت عبير العنود اللي بحضن شريفه وضحكت ؛ ياحلوك ياعنوده انتي وهالحنا ، تعالي تعالي بس عسى مايشغلني هالورع .. خلودي اجلس هنا باخذ العنود
وحطته بجنبها وسكت وهي تمد يدينها وتاخذ العنود من شريفه وتبوسها ؛ نجي ياعنوده بطلايعك ان شاء الله وعقبال عرسك
ضحكوا هاجر واروى وابتسمت شريفه ؛ اميين
ودخل نايف وهو يشد على فروته ؛ ها عبير باقي اغراض ؟
عبير ؛ لا يانيوف خلاص ماباقي شي
نايف تكى بكفوفه وراها على الكنب بضحك ؛ ماشاء الله ماتقولين لي نيوف الا اول لاتجين ولا اذا رحتي ليه تبين تقهريني ؟
ضحكوا وقالت عبير بضحك ؛ ايه عشان تشتاق لي اكثر
نايف ضحك ؛ والله اني اشتاق لك بس انتي جاحده تقطعينا
عبير ؛ افا لاوالله بس ننشغل وماعليك اجيكم اجيكم
الين تطفشون مني
نايف بضحك ؛ اجل بقول شيٍ ماودي فيه .. سعد يقول يلا
اروى بقهر ؛ اححلف !
نايف وهو يطلع ؛ اي والله
هاجر وهي تلبس جلالها ؛ صيحي صيحي يمديك
اروى دقتها بقهر وقامت عبير بضحك وباست العنود وهي تمدها لشريفه اللي قامت ؛ هه ياشروف انتبهي لنفسك ومع السلامه
وحضنتها وقالت شريفه وهي تسلم عليها ؛ ياعمري ياعبوره مع السلامه سلمي لي على خالتي حصه والبنات
عبير ؛ ان شاء الله يوصل
اروى ؛ ويويلك لو جيتي المره الجايه وماقعدتي عندنا واجد
عبير ضحكت وهي تعدل غطاها ؛ يبنت لي اسبوعين عندكم وش تبين اكثر
اروى ؛ مالي دخل المره الجايه شهر
عبير ؛ يييوه شهر ايه ايه ان شاء الله ، ترف يلا غسلي بابا يقول مشينا
وقامت ترف تغسل ولحقتها جوري وقربت عبير وهي تحضن اروى ؛ خلي الصياح ماخبرك صياحه
هاجر ؛ وترا مهي طايره تشوفينها بالتمايم
اروى بقهر وهي تسلم على عبير ؛ ايه ماني باكيه وبتجي وتجلس شهر !
وضحكت عبير وقربت تسلم على هاجر وتحضنها ؛ بلاك يا اروى ماجربتي تمترين خط تبوك
هاجر وهي تسلم عليها ؛ معليك منها ابك هذي خبله تحسبها حذفة عصا
اروى ؛ اقول سدي حلقك ادري انه طويل عشان كذا مب كم يوم ويروحون
عبير ضحكت وهي تاخذ شنطتها ؛ يلا بس بطلع الوقت راح وحنا مامشينا ، مع السلامه ياشروف ... يلا ياترف
شريفه سلمت على ترف ومشت معهم لعند باب الصاله ؛ استودعتكم الله وتوصلون بالسلامه ان شاء الله
عبير وهي تطلع للحوش ومعها هاجر واروى ؛ الله يسلمك
ولحقوهم ترف وجوري وعدلت اروى جلالها وهي توقف ورا الباب ومعها هاجر ؛ عبيير لاتبطين وزي ماوعدتيني شهر زين !
عبير ضحكت ؛ خلاص قولي لسعد تحداك يوافق يروح ويرجع
وباست هاجر خالد اللي شايلته عبير وحضنت ترف ومن بعدها اروى وهي تهمس لترف ؛ ترف قولي لبابا اذا جينا المره الجايه بنقعد شهر
ترف هزت راسها ؛ طيب
وطلعت عبير وترف وجوري طلعوا وراها واروى وهاجر سكروا الباب وهم يناظرون من الفتحة الصغيره
برا طلعت عبير وهي تشوفهم عند سيارة سعد ويسولفون وناظرت ناصر وعبدالله على طرف جالسين عند الجدار بعيد شوي والتفتوا ابو راشد وام راشد والعيال لترف اللي جت تمشي لسعد وقالت بصوت عالي ؛ بابا اروى تقول قولي لبابا اذا جينا المره الجايه بنقعد شهر
ضحكوا واروى وهاجر سمعوا من ورا الباب وضربت اروى كفها بجبينها ؛ يويلي ويلاه من ترف
وضحكت هاجر وتنحنحت اروى وهي تفتح نص الباب وقالت وهي وراه ؛ سعد
برا التفتوا لصوت اروى وضحك سعد وهو يعرف اصواتهم كلهم وعادي عنده وعند ابو راشد والباقين بحكم انهم متعودين على بعض ؛ ها يالقعده
تنحنحت اروى اللي تدقها هاجر تسكتها ودقتها اروى وقالت بهمس ؛ انطمي بعلمه ، اا اذا جبتهم المره الجايه تراهم بيقعدون شهر من الحين اعلمك لاتقول بعد كم يوم مشينا
عبير ضحكت ؛ عندكم شريفه تسد مكاني
اروى بقهر ؛ شريفه تروح بعد تمايم العنود سدي مكانها
راشد ضحك ؛ وهي الصادقه وبعدين مسرع مامشيتوا ماشبعنا منكم
سعد ؛ والله الشغل والطريق طويل وانت تعرف
ابو راشد ؛ ماعليه المره الجايه ترتاحون من الطريق لاجيتوا وتقعدون عندنا واجد
ام راشد ضحكت ؛ ووخيتي بعد ترا مبطيه عنها ابي اجلس معها
سعد ابتسم ؛ ابشروا ان شاء الله نجي قريب كلنا
الكل ؛ ان شاء الله
وقربوا يسلمون على بعض وقالت عبير وهي تسلم على تركي ؛ ابي اذا جيت المره الجايه اجي على تمايم العنود وعرسك
تركي ضحك ؛ اوووه عرس مره وحده كان قلتي خطبه ، ان شاء الله على خير
والتفت سعد بعد ماسلم على الكل يدور ناصر وعبدالله ولمحهم جالسين بأخر جدار البيت على طرف وانتبه لعبدالله اللي يمسح دموعه بأكمامه وناصر جالس قدامه ويكلمه وعقد حواجبه ؛ ياعبدالله ناصر علامكم ؟
التفتوا معه الباقين وابتسم تركي بقهر ؛ محد زعلان كثر زعلهم
وقرب لهم وضحك ؛ لا ياعيين تركي وش مزعلك
عبدالله قام وهو يمسح دموعه ؛ ماهو مزعلني شي
وناظر تركي ناصر اللي دموعه بعيونه وهو يمشيهم معه ؛ ماعليكم تجون قريب وتقعدون الين تطفشون من بعض بس عيب لاتصيح انت رجال
سعد ابتسم ؛ نصور تروح معنا ، ها عبدالله ناخذه ؟
عبدالله بزعل ؛ مايقدر
ناصر ؛ انتوا خلوه عندنا عادي يقعد
ترف وهي مطلعه راسها من شباك السياره وجوري معها ؛ ناصر لاتزعل نجيبه معنا ترا
نايف ضحك وهو يتكي عندها على الشباك ؛ اللي يصيح اخوك جحدتيه ؟
عبدالله ؛ ما اصيح انا
راشد ؛ بعدي حبيب خاله ماعليك ان جيتوا المره الجايه ترا ابوك يقول بيخليكم شهر
ابو راشد ؛ والله مهيب شينه ان قعدت عندنا ماعليك خوف رجال وانا جدك
عبير ضحكت ؛ وبعد يومين يقول ودوني تبوك ، نجي ياعبدالله مشينا الساعه بتجي ٨
سعد ؛ اي والله تأخرنا يلا يلا اركبوا
وحضن ناصر عبدالله وسلم نايف على ترف وهو يشيل جوري اللي كانت داخل السياره وطالعه مع الشباك واشرت بيدها لترف ؛ باااي ترف
ترف اشرت لها ؛ باي
وركب عبدالله بعد ماسلموا عليه الباقين واشر لهم سعد وهو بيحرك ؛ مع السلامه ونشوفكم على خير ان شاء الله
الكل ؛ ان شاء الله ، توصلون بالسلامه
ام راشد ؛ لاتسرعون ولاوصلتوا علمونا
سعد ؛ ابشري استودعناكم الله
وحرك وكانو ترف وعبدالله مع شباك السياره ويأشرون لهم وجوري وناصر يأشرون لهم لحد مابعدوا وابتسمت ام راشد ؛ يحليلهم عسى الله يستر عليهم
والتفت نايف لناصر بضحك ؛ لاتزعل عاد وانا عمك حنا معك مثل عبدالله
راشد ؛ لا لا مايزعل كبير يدري انهم بيجون ان شاء الله
ابو راشد ؛ على خير ان شاء الله ، يلا يلا دخلنا عن هالبرد
داخل بالصاله كانوا اروى وهاجر سابقينهم وقالت شريفه بضحك ؛ عبيد ماسلم علي
هاجر ؛ ولا علينا تخيلي زعلان
اروى ؛ ويصيح مايبي يروح حتى ناصر بيبكي
شريفه ضحكت والتفتوا لأبو راشد والعيال ؛ السلام
شريفه والبنات ؛ وعليكم السلام
ابو راشد بأبتسامه وهو يجلس ؛ ام العنود تسد مكانهم وتكفي عسى الله يحفظها
راشد ضحك ؛ نسيت ام ناصر وعبير هاللي حتى ماطلعت من المحاسن
الكل ؛ هههههههههههههههه
..........••..........
بيت ابو هادي
كان ابو هادي بالصاله وام هادي عنده تنتظره يتصل على حمد اللي رد من دق ابو هادي ؛ هلا يبه
ابو هادي ؛ السلام عليكم
حمد ؛ وعليكم السلام
ابو هادي ؛ نايمين ؟
حمد ؛ لا والله انا صاحي بس هادي نايم
ابو هادي ؛ وش صار عليه نزلت حرارته ؟
حمد ؛ والله تنزل وترتفع وماقدرت انام ساعه على بعضها كل شوي داخل واحد
ابو هادي ؛ ماعليه الله يجزاهم خير ووش قالوا طيب
حمد ؛ هو يده توجعه ومسكناته مافادت ولا تسكن ولا يقدرون يعطون يده ابر وهو فيه حراره
ابو هادي ؛ ومخلينه ويده توجعه ؟
حمد ؛ وش يسوون مايقدرون وهو اصلا نايم من التعب من امس
ابو هادي تنهد ؛ اجل علمني لاصار شي ونام انت لاتتعب
حمد ؛ ابشر
ابو هادي ؛ يلا مع السلامه
حمد ؛ مع السلامه ياهلا
وقفل ابو هادي والتفت لأم هادي اللي قالت ؛ طيب واذا قام وحرارته مانزلت بيتعب زياده
ابو هادي ؛ ماعليه شر ان شاء الله تخف تخف ، شهد للحين نايمه ؟
ام هادي هزت راسها وهي تقوم ؛ ايه الله يصلحها بصحيها اكيد انها سهرانه على التلفزيون
وراحت تصحي شهد وابو هادي اخذ جواله وهو يكلم العمال يبلغهم انه ماراح يروح للمحل اليوم
..........••..........
بعد كم ساعه
في بيت ابو راشد
نايف مشى لدوامه وابو راشد وراشد وناصر راحوا للسوق وتركي قال بيروح العصر وكان بالدوانيه يحاول يتصل على هادي بس مافيه ابراج وطلع وهو يرفع الجوال ويمشي بالسيب وتنهد وهو يناظر الجو كان غيم وهواء بارده ومشى للحوش وهو يشوف اروى بالدكه عند القطوه تلعب معها وعندها جوري وقال وهو يدخل للصاله ؛ ابك امشوا داخل عن البرد
ودخل للصاله وهو يسلم وقالت ام راشد ؛ انت مارحت مع ابوك ؟
تركي شد على فروته وهي يجلس عند الدفايه ؛ يييوه يالبرد ، لا لا مارحت اصلا ابوي مايروح للمحل الا اذا عندنا احد والحين بيتمشى بالسوق ماهو طاب المحل
ام راشد ؛ ايه لاصاروا رجال خواتك هنا مايقعد عشان لايطفشون ولا يطفشونا يطلعهم اما للمزرعه ولا للمحل اما لاصار مافيه احد يقعد بالبيت عادي
تركي ؛ ايه والحين راح هو وراشد وناصر ويقول لي اكنس الدوانيه خلي هاجر ولا اروى
ام راشد ؛ والله هاجر داخل تنظف الغرف واروى مدري وين راحت هي وجوري
تركي ؛ بالدكه عند البسه ، الا شريفه وينها
ام راشد ؛ بغرفتها راحت تلبس بنتها
تركي هز راسه وهو يتدفى ويفكر وقام بعد دقايق وهو يجلس عند امه واخذ الفنجال وهو يصب لها قهوه ؛ تقهوي يمه
ام راشد اخذت الفنجال ؛ عشت
تركي تنحنح ؛ اا.. الا يمه ماكلمتي ام عزام ؟
ام راشد سكتت لثواني وهي تناظره ؛ وشو عنه ؟
تركي بصدمه ؛ وشو وشو عنه عن شموخ!
ام راشد كتمت ابتسامتها ؛ ايييه علامها ؟
تركي سكت بأستغراب وقالت ام راشد ؛ والله عاد انت ماعلمتني بالصحيح ماني معلمتك عن شي
تركي ؛ ليه وش كذبت فيه انا .. يمه تكفين ليه مكذبتني!
ام راشد ؛ لأني احس انكم مكلمين بعض ولا شايفين بعض ولا ولا
تركي بذهول ؛ ولا وش!
ام راشد رفعت كتوفها ؛ مدري عنك ماتحبك هي ؟
تركي سكت لثواني وابتسم بخفه ؛ ياليت والله ياليت
ام راشد ناظرته بحده وتلعثم تركي ؛ ااء يعني مدري وشلون تحبني مدري بس ماضنتي ليه وش يدريها عني ؟
ام راشد ؛ انا ادري ؟! ... الصدق ماكلمتها بس بحتري العلم
تركي تنهد ؛ يمه البنت بتروح وانتي تحترين تكفين يايمه كلميهم ولا بكلم ابوي واللي فيها فيها
ام راشد ؛ ياليت انت لو تخليني اكلمه وتفكني مير انت شغله!
تركي بقهر وهو يقوم ؛ خلاص يمه لاتكلمينها ولا شي خليها الين تعرس وكلميهم زين!
ام راشد سحبته من فروته قبل يتعدى ؛ اقعد محلك بس انت شلون تبيني اكلم ام عزام والبنت لولد عمها
تركي تنهد وهو يجلس ؛ يمه انا الحين بسألك
ام راشد حطت فنجالها ؛ ها اسأل
تركي ؛ عيسى يوم مات وحيا عشان تخطبين له رغد صح انها ماكانت لولد عمها بس انها كانت مخطوبه صح ولا لا ؟
ام راشد ؛ الا بس اني مادريت انها مخطوبه ولا لو يموت ماخطبتها له
تركي ؛ ليه وش فيها لو خطبتيها وهي مخطوبه وتدرين ؟!
ام راشد ؛ بتصير بينا مشاكل مع اللي خاطبينها ولا اخاف تبيه واهلها وافقوا علينا
تركي ؛ ليه الشور مهو شور البنت هي اللي بتعرس ولا اهلها !
ام راشد ؛ اهي بس اهلها لهم راي بعد وهم ادرى بمصلحتها
تركي تنهد ؛ يعني شموخ منتي خاطبتها لي وهي مخطوبه !؟
ام راشد ؛ لا والله وانا امك ولولد عمها بعد وانا ماودي اخرب بين الاهل نشوف يمكن ماتوافق عليه عقبها عاد نخطبها
تركي بقهر ؛ اجل انا بقول لأبوي يخطبها لي وماني معلمه انها مخطوبه وتشوفين ان ماوافقوا!
ام راشد بصدمه ؛ وشو ؟ صار ماتقول عزام مره قال قدامكم زايد خطيب اختي وشلون مادرى ابوك!!
تركي سكت بصدمه وطلعت هاجر وهي تتأفف بتعب ؛ يمه ترا تكسر ظهري وانا اكنس واروى قالت بتساعدني ولا جت ترا عليها المطبخ اليوم مالي دخل !
ام راشد وهي تناظر تركي بقهر ؛ هذا هي اروى كذوب انا اوريك فيها ، قم اكنس الدوانيه انت قم عطيه ياهاجر المكنسه!
وفز تركي ولحق هاجر للغرف وهو ياخذ المكنسه وطلع من باب المطبخ وسط نظرات امه اللي معصبه منه وحطت فنجالها بعصبيه ؛ اهب ياشر هالولد مدري منهو طالعٍ عليه بالكذب .. ابد الا يرفع ضغطي
•
بالدوانيه
عند تركي اللي دخل وجلس وهو ياخذ نفس بتوتر ؛ نكبه نكبه والله اني نكبه .. انا وش اسوي ادق على عيسى ، لا لا يمكن نايم ولا مشغول
وناظر ساعته وتنهد وهو يقوم ؛ ونايف باقي له ساعتين ويجي الله المستعان
واخذ المكنسه وجلس يرتب الدوانيه ويكنس
ومن خلص وهو يطلع عند باب الدوانيه وناظر الجو والغيوم وتنهد ؛ ايييه يالله تجيب الخير
وخاف يدخل تسأله امه وهو منقهر على نفسه وكيف انه مافكر قبل يتكلم ورجع اخذ فروته ومفتاحه وجواله وطلع وسكر الباب وراه وركب سيارته وحرك
فكر يروح المزرعه بس من ناظر جهة السوق عرف انه مافيه ناس واجد وتوقع ان ابوه وراشد وناصر راحوا للمزرعه وحرك للمحطه يعبي سيارته وبعدها يشوف وين يروح
وقف عند المحطه يعبي واخذ جواله وانتبه ان فيه ابراج ودق على هادي وهو ينتظره يرد ودق عليه مرتين ولا رد وتنهد ومن خلص حرك وهو يوقف عند القهوه ورا المحطه بمسافه بسيطه وفتح الشباك وهو ينادي ؛ يافرحاان
التفت فرحان اللي كان يحط لزبون ؛ هلا
تركي ؛ عطني كوب شاهي نعناع
فرحان ؛ ابشر شويات ويجيك
تركي ؛ سكر وسط زين
فرحان هز راسه واستند تركي وهو ياخذ جواله ودق على عيسى ورد ؛ هلا
تركي ابتسم بفشله ؛ اووه نايم من صوتك
عيسى ابتسم ؛ لا والله توني صاحي .. عسى مافيه شي
تركي ؛ زيين ما ازعجتك يعني صاحي بدوني .. لا والله مافيه شي كم الساعه عندكم ؟
عيسى ؛ الفجر ٥ وربع ، وانتوا ؟
تركي ؛ ١٠ ونص الناس الضحى .. اجل اكلمك بعدين اذا جيت من دوامك
عيسى ؛ لا لا ماعليك ماني مداوم صار ما اقولك الاسبوع اللي راح اخر دوام وبعدها اختبر واخلص؟
تركي ؛ وخلصت اختبرت عساه زين ؟
عيسى ؛ ايه الحمدلله باقي اوراق التخرج وتنتهي البعثه
تركي ؛ يعني بتجي قريب ؟
عيسى ابتسم ؛ قريب
تركي التفت لفرحان اللي جاب الكوب واخذه وحاسبه ؛ عشت يافرحان
فرحان وهو يرجع للقهوه ؛ بالعافيه
عيسى ؛ وين انت ؟
تركي وهو يحرك ؛ عند القهوه مانزلت بس بوقف على جنب اخاف اشوف لي واحد من العيال وابتلش ماني متحمل احد يولد عندي سوالف بعلمك فيها
عيسى ضحك ؛ من يوم مادقيت بدون لاترسل وانا عارف ان عندك شي
تركي ؛ والله قبل ساعه كنت بدق عليك بس قعدت انظف الدوانيه زين اني انشغلت فيها ولا كنت دقيت عليك وانت نايم
عيسى بضحك ؛ مكروف عزتي لك .. بس ماعليك انت لو تدق بنص الليل اتفضى لك كم عندنا تركي حنا ؟
تركي ضحك وهو يوقف على جنب بطريق فاضي ؛ مروق ماشاء الله هذا وانت توك صاحي
عيسى ؛ لا يبن الحلال لي ساعه وقاعد افطر وماعندي شي فاضي ، اخباركم
تركي ؛ والله بخير الحمدلله ، ابد عبير روحت الصباح والبيت مافيه الا امي وشريفه وبنتها وهاجر واروى ونايف بدوامه وابوي وراشد وولده بالمحل مدري هم للحين فيه ولا راحوا للمزرعه والطفش لاعب فيني يولد
عيسى ابتسم ؛ ياحليلها الله يسستر عليهم واهل راشد وين ؟
تركي اعتدل وهو يشرب كوبه ؛ اييه انا ماعلمتك ... ام ناصر عند اهلها توقع ليه؟
عيسى ضحك ؛ ياوك عسى ماهي طامح " زعلانه "
تركي ضحك ؛ لا حامل ابشرك
عيسى بفرحه ؛ ماشاء الله تبارك الله!
تركي ؛ وعند اهلها يقول راشد تعبانه وتوها بأول شهورها
عيسى بأبتسامه ؛ الله يقومها بالسلامه ان شاء الله
تركي ابتسم ؛ امين وعقبال ماتبشرنا انت بعد
عيسى ابتسم وقال تركي ؛ ايه شفت ابو هادي اللي اقول لك جا وشرا العماره اللي قدامنا؟
عيسى ؛ ايه علامه
تركي ؛ يولد عنده ولده هادي اصغر مني بسنتين وتعرفنا عليهم سيروا علينا وصار خويي بس يده تعوره بس مهو كسر المهم والفجر شفنا ابوه وسألته عن هادي قال منوم تعبان من يده ومعه اخوه حمد هذا اصغر من هادي وهادي والله طيب وحليل بس لو تشوف وجهه من تعب يده يكسر خاطرك المهم وادق عليه مايرد ولا ادري وش فيه
عيسى بأستغراب ؛ الله يشفيه تلقاه مهو عند جواله ولا تعبان صدق ولا هو يم احد يطلع ان شاء الله وتشوفه
تركي ؛ ايه بس انه كاسر خاطري وودي اعرف وش صار عليه
عيسى ؛ وليه كاسر خاطرك ؟ يده اذا مهب كسر تطيب ان شاء الله ماعليه
تركي ؛ ااء مدري يعني الله يشفيه وادق عليه من امس مايرد اخاف فيه شي
عيسى ؛ لالا ان شاء الله ماعليه ، " وكمل بضحك " متى عمرك شلت هم احد مثل هادي هذا ؟
تركي ابتسم ؛ والله اني اشيل هم بس محد يحس .. المهم وبعلمك عن امي بعد
عيسى ؛ علامها عسى مافيها شي !
تركي ؛ لا لا مافيها شي الحمدلله بس انها تبي تموتني وانا حي
عيسى ضحك ؛ فداها جعلني افداها وش انت مسوي
تركي تنهد ؛ يخوي تكفى وش اسوي ماتبي تخطب لي شموخ ليه؟ عشانها مخطوبه الظاهر تحتريها هي تخطبني! " وكمل من تذكر انه ماقال لعيسى ان امه درت عن شموخ وانه قال لها يبيها " اا هيه انت من زمان ماكلمتك ونسيت اعلمك تراي كلمت امي قبل كم يوم قلت لها ابي شموخ واخطبيها لي وحاولت اقنعها واليوم رجعت اكلمها
عيسى ؛ ابك يولد هذي مارفضت للحين ؟ لو تبيك والله ان ترفضه عشانك علامها ؟
تركي تنهد ؛ عاذرها ياعيسى ولد عمها !
عيسى ؛ واذا يعني ترضى انها تاخذه بس عشانه ولد عمها ؟
تركي ؛ مدري يمكن رفضت بس حنا مادرينا ولا وش يدرينا وحنا ماسألنا ؟
عيسى ؛ قل لأمي تسألهم ي.. قاطعه تركي ؛ ابك وش تبيها تقول ولا وبعد تقول خلني اكلم ابوك تبيه يذبحني وبعدين تقول بخطب لك بنت ابو هادي اخت هادي اللي تعبان
عيسى ؛ عادي دامه صار خويك خذها وخل اخت عزام يمكن تبي ولد عمها
تركي شهق وهو يشرق بالشاهي ؛ اهب عليك الا تبيني اخلي اللي احبها واخذ وحده عشاني اعرف اخوها بس ؟ لو على كذا اخذت نص بنات الديره
عيسى ضحك ؛ صحه صحه .. لا بس انت كلمتها واكيد انها عرفت انك تبيها ليه ماخلت ولد عمها ؟
تركي ؛ مدري وامي تقول ماتبي تفرق بين الاهل وماهي خاطبتها لي وهي مخطوبه .. تعال تعال الحين صدق يوم خطبوا لك ام تالين كلهم مايدرون انها كانت مخطوبه وقتها ؟
عيسى ابتسم ؛ لا كانوا اللي خاطبينها مالهم وقت ومايمدي الناس تدري وبعدين انت على كثر ماشفت بنت ام عزام ولا مره قد شفتها قدام احد ؟
تركي ؛ كيف يعني ؟!
عيسى ابتسم وهو يناظر رغد اللي طلعت من الغرفه للمطبخ ؛ يعني انا يوم شفت ام تالين شفتها قدام شريفه وبالغلط ومن اول مره شريفه علمت امي ومن بكره قلت لأمي ابيها وخطبتها انت ماقد شفت بنت ام عزام قدام امي ولا خواتي ؟
تركي تردد بس قال ؛ الا .. قدام اروى
عيسى ضحك بصدمه ؛ اروى!! وماعلمت؟ مستحيل!
تركي ؛ اا لا ماعلمت احد
عيسى ؛ وين شفتها متى ، عند اروى مهو بالمليون مره لحالك
تركي ضحك ؛ بالدوانيه كانت اول مره اشوفها زين يعني قبلها كنت شايفها اول لاجو لمحه من دريشة المطبخ ويوم شفتها قدام اروى كنت جاي من برا واروى وشموخ بالدوانيه ودخلت وهم فيها وقالت اروى شموخ هنا حتى اسمها اول مره اعرفه من اروى عيسى ؛ اجل علم امي انت
تركي ؛ انت مهبول ؟ يعني اروى سكتت افضح نفسي ليه ؟
عيسى ؛ ماتبي بنت ام عزام انت ؟
تركي ؛ الا
عيسى ؛ اجل قل لأمي انا شفتها مره بالغلط واروى عندنا بس يمكن ماعلمت عشان لاتهاوشينها ولا شي لاتنكب اروى يويلك منها ترا تقلبها عليك وتقول هو متعمد
تركي ؛ يخوي المشكله ان امي قد سألتني قالت شايفها انت ؟ قلت لا مره بعباتها بس
عيسى شد على اسنانه بقهر ؛ لوا اهب عليك على كثر ماشفتها تقول مره لا وبعباتها بعد يالكذوب
تركي ؛ عيسى وش اقول اقول ايه حافظها ! خلاص قلت لا والحين لو برجع اقول لها بتقول ليه تكذب علي وماني خاطبتها
عيسى ؛ وانت ليه يوم تكذب ابك انت ليكون للحين على طبعك جاحد لو الكذب طالع من عيونك؟
تركي ؛ لا لا يبن الحلال بس انا معرف ارتب كلامي بتقول امي اني كذاب
عيسى ؛ خلاص رتب كلامك فكر قبل تتكلم مهو تهبد ثم تزعل لاقالت لك تكذب
تركي ؛ الحين انا ماني داق عليك عشان تهاوشني هاوشت نفسي قبلك فكني وعطني حل وش اقول لأمي
عيسى ؛ امي خلاص لاتجلطها اعتقها حول على ابوي
تركي ؛ تبيني اجلطه ؟
عيسى ضحك ؛ اهب يعني معترف انك جلطه صحيح! .. لا لا انا اعلمك وش تقول له وتشوف ان ماجيت تبشرني
تركي ؛ يالله يارب .. ها عطني
وجلس عيسى يفهمه وش يقول بالضبط ووش يسوي وتركي مركز لأنه يشوف ان هذا اخر حل ومن خلص عيسى تنهد تركي ؛ وان قالت له امي ؟
عيسى ؛ ابك امي تبي الفكه منك اشغلتها غاسله يدها منك ماعليك وان علمته انا اكلمها بس انت سو اللي اقولك عليه وتشوف ان ماخطبوها لك
تركي ؛ تقولها ؟
عيسى ؛ خذها مني وانا اخو تركي وبشرني
تركي ابتسم ؛ ان شاء الله ، تالين وينها ؟
عيسى ابتسم ؛ نايمه والله
تركي ؛ اييه واخبارك انت
عيسى ؛ والله اني بخير ياربي لك الحمد وقريب ان شاء الله واجيكم والله ياتركي اني اشتقت لكم
تركي ابتسم ؛ ياعين اخوك والله كلنا اشتقنا لك الله يسهل لك ويوفقك وتخلص هالبعثه على خير
عيسى بأبتسامه ؛ اميين يارب ، ونايف بدوامه ؟
تركي ؛ ايه
عيسى ؛ اجل بكلم امي والبنات دامهم بالبيت وفاضين وابوي وراشد كلهم بكلمهم
تركي ؛ زيين بس لاتجيب طاريي ابد
عيسى ضحك ؛ لا ماعليك بنشد عنهم بس ، الا انت ماتوظفت ولا قدمت على شي ؟
تركي ؛ لا والله وماني مقدم انا اقعد طفشان لين اموت ولا مشغول يوم ولا ابي احد يتأمر علي انا ابوي غصب عني اطيعه
عيسى ؛ ابك محد متأمر عليك شغلك وانت تسويه يخوي توظف لاتقعد عاطل كيف بتتزوج وانت ماتوظفت ؟
تركي ؛ اشتغل شغل انا اتأمر على نفسي فيه ماني متحمل احد
عيسى ضحك ؛ اعوذ بالله صاير ماتّحمل احد انت ، المهم دور شغله قبل تعرس ترا ماهم معطينك بنتهم منين تصرف عليها
تركي ؛ ماعليك القى
عيسى ؛ ان شاء الله يلا اجل بكلم امي والبنات واسمع ودي اكلم نايف بس انه بدوامه العصر فاضين ادق عليكم ؟
تركي ؛ والله مدري العصر يرقد بس بقول له ان جا
عيسى ؛ لا ابك العصر عندي يعني الساعه ١٠ بالليل عندكم تنامون بدري ؟
تركي ضحك ؛ اييه لا يمكن صاحي
عيسى ابتسم ؛ اجل ادق عليه خلك عنده نبي نسولف
تركي ؛ ابشر ماعليك
عيسى ؛ يلا اجل مع السلامه
تركي ؛ مع السلامه ياهلا
وقفل وتنهد تركي وهو يفكر بكلام عيسى واعتدل بتفكير ؛ والله اخاف تنكبني اروى وماتوافق ... الا الا حتى هي تبيني آخذ شموخ ليه ماتوافق
وشغل سيارته وحرك يتمشى بأطراف الديره ...
ومر الوقت بدون احداث مهمه لحد الظهر كان ابو راشد وراشد وناصر بالمزرعه وكلموا تركي قبل ساعه انهم بيتغدون فيها وتركي كان عندهم ونايف اللي جا من داومه بدل وراح للمزرعه عندهم
وام راشد والبنات بقوا بالبيت وعلمهم نايف لما جا انه بيروح للمزرعه عند ابوه والعيال
..........••..........
الظهر بالمزرعه
وقفت سيارة نايف ونزل وهو يمشي لجهة النخل وللمكان اللي دايم يكتب فيه على التراب واخذ عود ومن جا بيكتب عقد حواجبه وهو يقرا المكتوب واللي كان كاتبه تركي ؛ ابك هذا وش .. ممر القمر ! والتفت يناظر الممر اللي يساره واللي من لفة المزرعه لوسطها وعقد حواجبه وكمل يقرا ؛ غلاب ياهوى لايامال الهوى اللي يملا فم العدو والله ماغيره تركي
" وضحك بخبث " انا اخليه اضن ابوي يقراه ... لا لا بيحسبه انا مافيه غيري يكتب على هالمكان
ومسحه وهو يقوم ولا كتب شي ورفع ثوبه عن المويه وراح جهة الخيمه اللي فيها ابوه والعيال وشاف العامل عند الزرع وابتسم ؛ اررحب عمران متى جيت
وسلم عليه عمران وقال ؛ صباح انا يجي
نايف ؛ ايييه الحمدلله على السلامه .. شلونه بابا كويس ؟
عمران هز راسه ؛ كويس الحمدلله
نايف ؛ اييه الحمدلله
وكمل للخيمه وهو يدخل ؛ سلام علييهم
ابو راشد والعيال ؛ وعليكم السلام
نايف وهو يجلس ؛ وش هالجو الزين والجلسه الزينه
ابو راشد ؛ اي والله يازين هالجو
نايف ؛ الا عمران من جابه
ابو راشد ؛ وصله واحد من العمال خويه وجا الصباح
نايف التفت لتركي اللي مد له البياله ؛ شاهي يانايف
نايف ابتسم وهو ياخذه ؛ عشت والله شاهيك مامثله
راشد ؛ وشلون دوامك
نايف وهو يتركى ؛ يووه ياولد اليوم بالذات طففش وكسل اعوذ بالله مدري وش جانا كل العيال هادين
تركي ضحك ؛ وين الهدوء وانت ومشاري عند بعضكم
نايف ؛ عاد مشاري اكثر واحد هاجد اليوم ماله صوت ابد ماهو مثل دايم مايسكت .. والله اني ماصدقت الدوام يخلص كنت ناوي ارقد والله يا اني مصدع بس شفت هالجو قلت والله مايتطوف
ابو راشد وهو يتدفى ؛ لاحق على النوم الحين نبي نصلي ونتغدى وعقبها ان كانك تبي ترجع البيت ترقد مع السلامه انا والله بقعد واللي يبي حياه الله
تركي ؛ ايه ايه وانا بعد بجلس بالمزرعه
راشد ؛ وانا بعد والله الجو بالمزرعه غير
نايف ؛ اقول جوري انت ناسيها تراها عند البنات استغربت مارجعت
راشد ضحك ؛ ييوه والله اني نسيتها بس ماقالت تبي تروح
تركي ضحك ؛ عند البسه هي واروى ماعليها طفش
ابو راشد وهو يقوم ؛ يا هالبسه عساها ماتمرضهم بس .. قوموا قوموا صلينا ، ياحكيم عمران نواس عبدالسلام صلاه صلاه
وبدقايق اجتمعوا واصطفوا يصلون ..
ومن خلصوا راحوا العمال يكملون الغدا ولحقهم تركي اما ابو راشد وراشد وناصر ونايف جلسوا بالخيمه حول النار وكان نايف منسدح وساند راسه ع المركى وفز من ناداه ابوه ؛ ولد ! لاترقد صحصح
نايف تنهد وهو يمسح وجهه ؛ مصحصح يبه
ابو راشد ؛ ايه عشان تتغدى وترجع للبيت اما مع تركي ولا واحد من العمال منت رايح لحالك تغفى بنص الطريق
نايف هز راسه ؛ ابشر ابشر
وكملوا جلستهم لوقت الغدا ابو راشد يتدفى ويتقهوى ونايف مقابله يقاوم النومه وراشد جالس على طرف ويسمع سوالف ناصر ويسولف معه
بالجهه الثانيه عند تركي اللي شيك على الغداء وجلس على طرف بعيد شوي وفتح جواله متوقع ان هادي رد عليه وتنهد وهو يرجع يدق عليه وعقد حواجبه بأستغراب من جوال هادي اللي مقفل وبدا يوسوس وهو يدق على حمد رغم انه مقهور من كذبه امس لما قال ان هادي مع ابوه بس سكت وهو يفكر ؛ يمكن عقب ماجا تعب .. بدق اشوفه يويله ان كذب هالمره بعد
ودق على حمد ينتظره يرد ولا رد ودق مره ثانيه وبرضوا مارد وهنا عصب تركي وهو يقوم ولو معه رقم ابو هادي دق عليه بس ما اخذه ورجع بقهر يشوف الغداء اللي جهز وجلس يحطه مع العمال
تغدوا وخلصوا وبعد الغداء كانوا برضوا حول النار بحكم برودة الجو وانسدح نايف عند النار والتفت ابو راشد لتركي اللي يصب شاهي ؛ ود اخوك للبيت يرقد
نايف التفت ؛ لا لاوالله ماني راقد وهذا الجو بنسدح بس
وصب لهم تركي شاهي ومد لأبوه الكاسه ؛ سم يبه
ابو راشد اخذها ؛ سلمت
تركي ؛ الا يبه رقم ابو هادي عندك صح ؟
ابو راشد هز راسه وقال تركي ؛ اباخذه بكلمه الفجر ماجو هادي وحمد معه وسألته عنهم قال هادي منوم وحمد معه مرافق
ابو راشد عقد حواجبه ؛ افا علامه ؟
راشد ؛ والله اني اشوف وجهه دايم تعبان وش فيه
تركي ؛ مدري بس يمكن من يده وانا بدق على ابوه عشان هادي جواله مقفل وحمد مايرد
ابو راشد ؛ يمكن تعبان مايبي احد خله اذا رد عليك تحمد له بالسلامه لاتشغلهم
تركي تنهد وهز راسه وجلسوا لدقايق يسولفون والتفت ابو راشد لنايف ؛ نايف ؟ ... ولد
تحرك نايف وهو يلف للجهه الثانيه وكمل نومته
ابو راشد ؛ اجل بينسدح بس .. هات اللحاف اللي وراك حطه على اخوك
والتفت تركي وهو ياخذ لحاف نايف وغطاه فيه
كملوا جلستهم وبعد ساعه طلعوا يتمشون بالمزرعه ويشوفون الزرايع ونايف باقي بالخيمه نايم
..........••..........
بيت ابو راشد العصر
بالصاله
كانت هاجر عند باب الصاله تنتظر اروى وجوري اللي يلبسون ؛ اخلصوا يلا ترا للبقاله وجايين
ام راشد ؛ والله مدري وش موديكم هذا وانتوا رايحين امس
اروى وهي تعدل غطاها ؛ نتمشى يمه طفشنا
ام راشد ؛ لاتبطون للبقاله بس وترا محل ابوكم مافيه الا العمال لأنه بالمزرعه هو والعيال
هاجر ؛ ابشري .. يلا
وجو اروى وجوري وطلعوا وام راشد رجعت تتقهوى مع شريفه
بالحوش فتحت هاجر الباب ووقفت تنزل غطاها وطلعت جوري قدامهم وشهقت ؛ فيه سياره
اروى طلعت راسها ؛ منهي سيارته
جوري ؛ مدري نزلت منها مره
هاجر بقهر ؛ ياليل الشغله جايه عندنا ؟
جوري وهي ترجع تدخل ؛ ايه ايه .. راحت سيارتها ومعها الورع اللي بالبقاله امس
اروى سكتت تتذكر وقالت هاجر ؛ يزن ؟!
جوري ؛ ايه
والتفتوا على اللي دخلت ؛ مساء الخير
هاجر واروى ؛ مساء النور
هاجر ؛ ام يزن ؟
ساره ابتسمت ؛ ايه ساره عسى ماجيت بوقت غلط؟
اروى ؛ لا حياك ادخلي ادخلي
اما جوري ركضت تعلمهم داخل واخذت اروى يزن وهي تسلم عليه ؛ هلاا والله شلونك
يزن ؛ طيب
وابتسمت هاجر وهي تبوس خده ؛ حياك ادخلي
ومشت داخل والبنات وراها واروى شايله يزن وتبوسه
دخلوا للصاله وكانت فيها ام راشد واقفه وجوري عندها وابتسمت ام راشد ؛ ياهلا يالله حيها .. ماشاء الله ساره
ساره ابتسمت وهي تسلم عليها ؛ الله يحييك وشلونك ياخاله
ام راشد ؛ بخير الحمدلله وش اخبارك
ساره ؛ بخير دامك بخير
ام راشد ؛ اجلسي اجلسي مابغيتي تسيرين كم لنا عنك
ساره ضحكت وهي تجلس ؛ اي والله انشغلنا عنكم ولا شفنا بعض من مبطي
ام راشد شالت يزن من اروى وهي تسلم عليه ؛ ياذكرت ربي ماشاء الله هذا يزن
ساره بأبتسامه ؛ اييه هذا يزن ماشفتيه الا يوم ولدت فيه
ام راشد ؛ اي والله من زمان عنك يالله حيها
ساره ؛ الله يبقيك ياخاله
وحطت ام راشد يزن وهي تاخذ القهوه وتقهوي ساره وهاجر راحت للغرف ولحقتها اروى ومرت على شريفه ودخلت عندها ؛ هيه شريفه ساره جت اخت مشاري خوي نايف
شريفه اللي كانت تعدل طرحتها ؛ احلفي غريبه قالت جوري مره ومعها ورع
اروى ؛ ايه ولدها يزن روحي لهم امي لحالها بطلع عباتي
شريفه وهي تشيل العنود ؛ وهاجر وين
اروى وهي تطلع ؛ بالغرفه
وطلعت شريفه للصاله وابتسمت ساره وهي تقوم ؛ شرييفه ياهلااا
وقربت شريفه بأبتسامه تسلم عليها ؛ ياهلا فيك هلا بالقاطعه
ساره ضحكت ؛ والله مانفضى يبنت وان فضينا رحنا للرياض .. ياعمري هذي العنود الحمدلله على سلامتك والله من يوم مادريت وانا ودي اجي بس مافضيت
شريفه عطت العنود ساره اللي اخذتها وجلست بضحك ؛ والله العمر يخلص والشغل مايخلص بعدين وش مشغوله فيه يوم تقطعينا هاا ؟؟
ساره ؛ والله ابو يزن مشغول ومقدر اسير ماصدق يفضى واسير على امي
ام راشد ؛ ووش لونها عساها طيبه
ساره وهي تبوس العنود ؛ بخيير الحمدلله وتسلم عليكم
ام راشد وشريفه ؛ الله يسلمها
ساره ناظرت شريفه بضحك ؛ العنود ماهي آخذه منك واجد شكلها على ابوها وعمانها
شريفه ضحكت ؛ اي والله ماخذت مني الا شوي
واخذت ساره الكيس اللي بجنبها وهي تقوم ومدت العنود لشريفه وحطت عندها الكيس ؛ هذا وجوبك وسامحينا على القصور
شريفه ابتسمت ؛ مامنك قصور ياساره جيتك اكبر هديه
ابتسمت ساره وهي تمد الكيس لأم راشد ؛ وهذي ياخاله لك موصيتني امي وتقول سلمي عليها
ام راشد ابتسمت ؛ ياعمري عسى الله يسلمها ماتقصرون يابنتي
ساره بأبتسامه ؛ وين راحوا البنات هاجر واروى ؟
ام راشد ؛ دخلوا الغرفه " والتفتت لجوري اللي جالسه بجنبها " روحي حبيبتي صوتي للبنات
جوري هزت راسها وقامت وهي تروح لهم داخل وقالت ساره ؛ منهي بنته هذي ؟
ام راشد ضحكت ؛ هذي اللي تقطع عن الناس ، هذي بنت راشد جوري
ساره ضحكت ؛ ايييه والله ناسيتهم وامها وين ؟
ام راشد ؛ مسيره على اهلها ونايمه عندهم وجتنا جوري شوي
ساره ؛ عاد يوم جيت كانوا طالعين شكلي جيت بوقت غلط
ام راشد ابتسمت ؛ لا والله حياك الله كانوا طفشانين اصلاً يبون يروحون البقاله هذا وهم رايحين امس
وابتسمت من تذكرت ؛ ايه ويقولون شايفين يزن بعد
ساره سكتت لثواني وابتسمت وطلعوا هاجر واروى والتفتت ساره ؛ ياهلاا والله وش اخباركم يبنات
هاجر واروى ؛ بخير الحمدلله
ساره ابتسمت ؛ هذي هاجر؟
ام راشد ضحكت ؛ ايه زين مانسيتينا
ساره بضحك ؛ لا والله .. كم عمرك هاجر ؟
هاجر ؛ ٢٠
ساره هزت راسها بأبتسامه ؛ ماشاء الله ، وهذي اروى ها
اروى ابتسمت وهزت راسها وهي تناظر يزن اللي جالس وماد رجوله وودها تسحبه وقامت وهي تجلس عنده بأبتسامه ؛ تصدقين شفته امس ولا قدرت العب معه يسسحر بسم الله عليه
ساره ابتسمت ؛ ياحبيبتي
ام راشد ؛ امك ماعندها جيه يختي مبطيه عنها
ساره ؛ الا ان شاء الله تجي قريب هي عند اخوي فراس بالرياض
ام راشد ؛ سلمي لنا عليها وقولي لها ان جت تمرنا
ساره وهي تلتفت لجوالها ؛ ابشري .. يلا انا بمشي ابو يزن برا
ام راشد ؛ وين ماقعدتي افا ياساره مبطيه عنا واخر شي تقعدين هالربع ساعه
ساره ابتسمت ؛ والله مقدر بيروح لشغله ومايخلص الا بالليل الجايات ان شاء الله ولا انتوا تعالوا
ام راشد ؛ ان شاء الله على خير
وقامت ساره وهي تعدل غطاها وشالت يزن اللي باسته اروى وطلعت وام راشد وراها ؛ يلا تمسوا على خير
ام راشد والبنات ؛ تلقين خير ، وانتي من اهله
ووصلتها للحوش وطلعت ساره وسكرت ام راشد الباب وهي ترجع داخل ؛ يحليلها بس غريبه جت
اروى ؛ يمكن عشان شريفه مافضت الا الحين
شريفه ؛ ايه شكلها ، يربي ياحلو ولدها ماشاء الله
ام راشد ؛ اي والله عسى الله يخليه لها
هاجر قامت وقالت اروى ؛ البسي عباتك وجيبي عباتي بنروح يلا
هاجر ؛ ماني رايحه روحوا انتوا
ودخلت للغرف وقالت ام راشد ؛ خلاص مهو لازم جت ساره خيره .. جويد ليه ماعاد يجي ويفكنا
اروى ؛ مدري عنه يقهر اول كل عصر يحوم عندنا
شريفه ؛ خلاص مهو لازم خلوها بكره
جوري جابت ريموت التلفزيون ؛ اروى غيري القناه
واخذته اروى وهي تغير وجلست تتفرج هي وجوري
..........••..........
في المستشفى
كان هادي صاحي من وقت وحمد عنده يعلمه وش صار عليه ومن خلص وهو يقوم ؛ وعاد الحمدلله نزلت حرارتك وترا جبت اغراضك وجوالك وتركي من امس يدقدق عليك ودق علي اليوم ولا رديت مدري وش اقوله
هادي تنهد وهو يقوم ؛ ادق عليه شوي عطني ملابسي بغير واتوضى واصلي
وعطاه حمد شنطته ودخل هادي وجلس حمد يفكر وتذكر وهو ياخذ جواله ويدق على ابوه ورد ؛ هلا حمد
حمد تنحنح ؛ هلا يبه مساء الخير
ابو هادي ؛ مساء النور ، ها وش صار على هادي
حمد ؛ الحمدلله نزلت حرارته الظهر وقبل شوي صحى
ابو هادي ؛ الحمدلله اخذ الأبر ؟
حمد ؛ اخذ وحده قبل ساعتين والثانيه بعد ٤ ساعات كل ٦ ساعات ياخذ ابره باقي له ابرتين
ابو هادي ؛ مايطلعونه اليوم ؟
حمد؛ والله مدري بسأل الدكتور ان كانه يقدر يطلع ويرجع لهم وقت الابر بس ماضنتي الساعه ٨ ياخذ وحده والساعه ٢ الفجر الثانيه ماضنتي يطلعونه
ابو هادي ؛ وينه طيب عطني بكلمه
حمد ؛ راح يغير ويتوضى
ابو هادي ؛ طيب الزياره فاتحه صح ؟
حمد ؛ ايه فتحت قبل شوي
ابو هادي ؛ بجي اجل واشوف امك شكلها بتجي
حمد ؛ طيب
ابو هادي؛ يلا شوي ونجيكم مع السلامه
حمد ؛ مع السلامه
وقفل ابو هادي واخذ حمد نفس بقهر وهو يناظر سرير هادي ويتذكر كلامه
طلع هادي بعد دقايق وهو ياخذ جواله ؛ طافي ؟
حمد ؛ لا انا قفلته ، وكلمني ابوي تو وبيجي بعد شوي
هادي هز راسه وهو يشغل جواله وحطه وهو يمسح وجهه وناظر حمد اللي يناظره وعاقد حواجبه وهز راسه هادي بمعنى " وش " وتنهد حمد ؛ مافيه شي اجلس كل من امس ماكلت
هادي اخذ جواله ؛ مابيه ، ياساااتر تركي داق ١٢ مره
حمد ؛ من امس يدق وتراه دق علي بالليل وقالت امي لاتعلمه وقلت له انك مشغول مع ابوي
هادي ؛ ومساعد بعد داق مرتين خلني بس اصلي وادق عليهم
وهز حمد راسه وكبر هادي وصلى ..
خلص وهو يقوم ويمسح على يده ؛ والله اشوا ماتعورني مثل امس اعوذ بالله لو اني شاب فيها ماعورتني كذا
حمد ؛ ايه قاله الدكتور مافادت مسكناتك " وقام وهو يحط على الطاوله الاغراض " تعال بالله كل ابوي موصيني ولو جت امي ودرت انك ماكلت بتذبحني انا وانت
واخذ هادي جواله وجلس واخذ مويه وحمد يحط عنده الاكل ويغصبه
اكل شوي وهو يدق على تركي اللي على طول رد ؛ هاديي!
هادي ابتسم ؛ ياهلا ومرحبا
تركي بعصبيه ؛ لا هلا ولا مرحبا ليه يوم ادق عليك ماترد ؟!
هادي ؛ افاا مشغول يولد ولا فضيت لجوالي
تركي ؛ مشغول ؟؟ وش مشغول فيه !
هادي ؛ مع ابوي وشغل المحل تو فضيت
تركي بصدمه ؛ اثاريك اكذب من حمد ! ليه ماعلمتني انك منوم ؟
هادي رفع حواجبه ؛ من علمك
تركي ؛ اوريك ياهادي وين انت الحين ؟
هادي ابتسم بخفه ؛ بالمستشفى
تركي ؛ حق الديره ولا الرياض؟
هادي ؛ الديره
تركي ؛ بجيك واعلمك شلون تكذب هين ياهادي
وقفل بقهر وضحك هادي وهو يلتفت لحمد ؛ درا مدري من علمه وانت كذبت عليه ويقول لي اكذب من حمد
حمد ابتسم ؛ والله وش اسوي امي ورطتني
وهز راسه هادي بأبتسامه وهو يدق على مساعد ورد ؛ هلا والله
هادي ؛ هلا فيك وشلونك
مساعد ؛ بخير ياحبيبي وش لونك انت نزلت حرارتك ؟
هادي بصدمه ؛ ابك انتوا من علمكم
مساعد ابتسم ؛ والله الفجر شفت ابوك بالمسجد وسألته عنك وعلمني وتركي بعد سأله عنك
هادي تنهد ؛ يعني ابوي اللي علمه
مساعد ؛ ايه ، وش قالوا متى تطلع ؟
هادي ؛ والله مدري بس ماضنتي اليوم يمكن بكره الصباح اذا اخذت الابر وخلصت
مساعد بضحك ؛ طيب اجيك ولا مب فاضي لأحد
هادي ؛ ماعليك مافيني شي والله نزلت الحراره ويدي الحمدلله ماعليها لاتتعب نفسك
مساعد ؛ لا والله ودي اجيك اسلم عليك
هادي ؛ اجل حياك احتريك
مساعد ؛ ياحبيبي يلا جاي
وقفل وهو يلتفت لحمد ؛ تركي ومساعد بيجون وش يقول ابوي متى يجي
حمد ؛ شوي ويمكن امي معه بعد وان جت ماهي مخليه شهد
وهز هادي راسه واشر لحمد اللي يقرب له الأكل ؛ بس بس والله شبعت خلاص
حمد ؛ يارجال كل لا اسطرك شف لونك رجع الحمدلله يوم خفت يدك والحراره راحت كل اخلص عشان تبرى .. هاك اشرب لا اعلم امي
وابتسم هادي وكمل اكله ..
بعد نص ساعه دخل حمد قبل دقايق يبدل والتفت هادي لصوت الباب ولمساعد اللي دخل ؛ السسلام عليكم
هادي اعتدل بأبتسامه ؛ وعليكم السلام ياهلا
وقرب مساعد وهو يسلم عليه ويحضنه بأبتسامه ؛ سلامات سلامات ياهادي ماتشوف شر
هادي ؛ الله يسسلمك مانشوفه فيك
مساعد ؛ لا لا ماشاء الله احسن من اول الحمدلله
هادي ؛ اي والله الحمدلله
وطلع حمد وابتسم ؛ هلاا مساعد
مساعد التفت يسلم عليه ؛ ارحب حميد شلونك
حمد ؛ بخير عساك بخير
مساعد ؛ بخير الحمدلله ، وين حاتم ؟
حمد ؛ بالبيت بيجي بعد شوي
مساعد هز راسه وهو يحط السله على الطاوله ويصب قهوه ؛ وهذي القهوه عشان تروقون من هالمستشفى
ومد لهادي الفنجال ؛ تقهو تقهو ترا مايسكن الراس صدق الا فنجال ولا المسكنات خرطي
هادي ابتسم ؛ والله صدقت
وصب مساعد لحمد وصب له وجلس يسأل هادي متى تعب ووش صار عليه
بعد دقايق دخل تركي والتفتوا لصوت الباب وابتسم هادي من شاف تركي عاقد حواجبه وواضح معصب ولاشعوريا ابتسم من ابتسامة هادي ؛ سلام
الكل ؛ وعليكم السلام
هادي وهو يقوم بأبتسامه ؛ يالله حيه ارحب ياهلا ومرحبا بتقول لا هلا ولا مرحبا ؟
تركي ابتسم وقرب يحضنه قبل يقوم ويمسح على كتفه ؛ خلك خلك البقى ياعيينه طالع من الشر
هادي ابتسم ؛ اييه هذا تركي
وسلم تركي على مساعد وحمد وهو يدقه ؛ شلونه الكذوب
حمد ضحك بفشله ؛ بخير
وحط تركي السله وجلس على سرير هادي بجنبه ؛ حمد صب قهوه وطلع التمر واللي معه
حمد ضحك وهو يطلعهم وقال بضحك ؛ جايين والد سمن وزبدة غنم
ضحكوا وقال تركي بضحك ؛ والله عاد امي مسويتها وحطت لهادي تقول هذا اللي يرم العظم
هادي ابتسم ؛ عسى الله يخليها لك
وصب لهم حمد وهو يقهويهم والتفت تركي لهادي ؛ وش تعبّك ؟
هادي ؛ يدي والله وحمى وراحت الحمدلله
تركي ؛ وصوتك رايح بعد .. الحمدلله على سلامتك
هادي ؛ الله يسلمك
مساعد ؛ لا والله بس متحسن وجهك رجع
حمد ؛ اي والله اقول له قبل شوي
تركي ؛ الحمدلله ، متى تطلع ؟
هادي ؛ مدري والله ، حمد ماقالو لك متى ؟
حمد ؛ لا بس مب اليوم باقي لك ابرتين اخذت الظهر وحده وباقي لك الليله الساعه ٨ والساعه ٢ الفجر
تركي ؛ وشي له ؟
حمد ؛ ليده مسكنه بدل العلاجات مافادت
مساعد ؛ يعني بكره الصباح ان شاء الله
هادي ؛ ان شاء الله
وجلسوا يسولفون لدقايق وبعدها قام مساعد ؛ يلا اجل انا بمشي يعيال
العيال ؛ مع السلامه
وطلع مساعد وهو يشوف ابو هادي اللي كان جاي وانتبه ان اهله معه ؛ ارحب ياحاتم
ابو هادي ابتسم ؛ هلا مساعد .. ها سابقنا اشوف
مساعد ابتسم ؛ اييه سبقتكم
وفتح باب غرفة هادي اللي كان واقف عندها ودخل راسه وقال وهو بنفس الوقت بيبلغ تركي ؛ هادي ابوك واهلك جو
تركي وهو يقوم ؛ زين اجل بروح انا اهم شي تطمنت عليك وماتشوف شر
هادي ابتسم ؛ الشر مايجيك مع السلامه
وطلع تركي وابتسم ابو هادي ؛ اوووه وتركي بعد فيه شلونك
تركي ابتسم ؛ مسّاك الله بالخير ياعم ، بخير عساك بخير
ابو هادي ؛ ياهلا مساء النور بخيير الحمدلله
تركي بأبتسامه وهو يروح ؛ الحمدلله
ولحق مساعد وابو هادي التفت وهو يأشر لأم هادي وشهد اللي كانوا على طرف ودخلوا ..
•
برا طلع تركي والتفت لمساعد اللي ناداه وهو يقرب عنده ؛ تركي اصبر
تركي ؛ هلا مساعد
مساعد تنحنح ؛ تركي انت تدري عن سالفة هادي مع بنت عمه وهو قال لي انه قالك وانا الحين بطلب منك طلب
تركي سكت لثواني وهز راسه ؛ ابشر
مساعد بهدوء ؛ شف ياتركي ترا هادي يده وتعبه وحالته بسبة بنت عمه وهو والله ماكان كذا انا اعرفه من زمان كان يضحك ويسولف ويازين سوالفه لاكن الحين تغير وانا ماودي يبقى على حالته هذي انا كلمته واقنعته يتزوج عشان ينساها وانت اقنعه انا ادري ان انت اصلا شايل فكرة الزواج فكيف تنصحه لاكن صدقني لو تقنعه معي انه يتزوج بينساها وبيرجع مثل اول مابيه يتعلق فيها وهي مو له وانا بعد قلت له نخطبها لك ارجع كلمها بس هو مايبيها وقلت له اجل تزوج وقال بيفكر وواضح انه بيسكتني ومهو مقتنع ابيك تقنعه عشان يعرف ان كلنا نبيه يتزوج ونقنعه
تركي تنهد ؛ وش اقول لك يامساعد انا اخاف يتزوج ولا يحبها وتصير بينهم مشاكل وماودي يشوف ان حنا السبب خله الحين وشف الحمدلله وجهه متحسن وانا والله قد قلت له بيعوضك الله باللي تنسيك بيان بس مو معناته انه على طول يتزوج وهو توه تاركها
مساعد ؛ ياتركي صدقني بيقتنع وماهو صاير شي
ان شاء الله على الاقل الفتره هذي اللي بنخليه فيها يكون خاطب ونلهيه يصير يفكر باللي خطبها مهو بيان وبعدين ماندري لو عرسها قريب بينقهر هادي اكثر مهو اهون لاتزوجت وهو خاطب ؟
تركي هز راسه ؛ الا والله
مساعد ؛ اجل اقنعه معي تكفى وانت بعد يبيلك من يقنعك
تركي ضحك ؛ لا ماعليك اقتنعت انا الحمدلله
مساعد ابتسم ؛ ها من باقي ؟ هادي نقنعه
تركي ؛ خلاص ابشر اكلمه واقنعه يتزوج
مساعد بأبتسامه ؛ الله يسعدك ياتركي حاول فيه
تركي ؛ وياك ابشر ، امش معي البيت تقوى عند.. قاطعه مساعد وهو يخبط على كتفه ؛ لاوالله بروح شغلي عسى الله يستر عليك
تركي ابتسم ؛ زين اجل موفق
مساعد رفع كفه ؛ وياك
وراح لسيارته وتركي ركب وحرك وهو متردد يروح للبيت لأنه اساساً قبل لايجي لهادي اتصل على اروى تجهز القهوه والأغراض وقال لها انه بيزور هادي بالمستشفى وحتى لما مر البيت عطته اروى من الباب ومادخل عشان لاتسأله امه بس تنهد وحرك للبيت لأن حتى لو سألته بيقول لها اي شي ويسوي اللي قال له عيسى ..
نرجع عند هادي ..
بعد مادخلوا وسلموا عليه قالت شهد وهي تصب قهوه ؛ والله يا ان البيت مشتاق لكم
ام هادي ضحكت ؛ ايه ودها احد تتهاوش معه .. ياحليلها ام راشد هذا والله هذا معمولها ، وهذي من زوجة مساعد ؟
حمد ؛ ايه هذي جابها تركي وهذي مساعد
ام هادي ؛ ياحليلهم جو قبلنا بعد
ابو هادي ؛ والله انا من اول لافتحت الزياره بغيت احرك بس انتي انشغلتي بالشوربه
ام هادي وهي تحط لهم ؛ والله قلت لازم اسوي له شي يفيده
وعطتهم وهي تاخذ صحن هادي وجلست بجنبه ؛ ها اشرب وانا امك تصحصحك خل القهوه والشاهي بعدين
هادي ابتسم ؛ والله يايمه اكلت الحمدلله وتقهويت بعد
ام هادي ؛ ماينفع كل اللي اكلته كثر الشوربه يلا اشرب اشرب
حمد ؛ الا يبه وش صار على المحل
ابو هادي ؛ والله مامريته اليوم ماحنا مستعجلين نفتحه بعد يومين ولا ثلاث متى مابرى هادي
شهد ؛ عاد الحمدلله والله متحسن وجهك ياهادي
ام هادي ؛ اي والله الحمدلله
وكملوا يسولفون وجلسوا عند هادي لوقت المغرب...
وقام ابو هادي ؛ يلا باقي شوي على آذان المغرب بتسكر الزياره مشينا
ام هادي ؛ طيب هادي حمد تبون شي من البيت ؟
حمد ؛ لا معي اغراضي
هادي ؛ وانا بعد سلامتكم
ام هادي ؛ زين ماتشوفون شر ، اباخذ سلة ام راشد وزوجة مساعد اخاف تضيع ولا تنكسر ترامسهم بخلي عندكم قهوتي
شهد اشرت بيدها ؛ يلا مع السسلامه ماتشوف شر ياهدهد
هادي ابتسم ؛ الشر مايجيك مع السلامه
ابو هادي ؛ تبون شي ؟
هادي وحمد ؛ سلامتك
وطلع ابو هادي وام هادي وشهد ومشوا للبيت
..........••..........
بيت ابو راشد
بعد المغرب
رجع راشد من عند بيت عمه بعد ماوصل جوري وناصر اللي بقى عندهم ودخل للصاله اللي كلهم فيها وهو يسلم وردوا ؛ وعليكم السلام
ابو راشد ؛ وين ناصر ؟
راشد ابتسم بضحك ؛ عند بيت عمي لقوا خالتهم وعيالها جايين
نايف ضحك ؛ عوضه الله نويصر
تركي ابتسم ؛ ماينسى عبدالله
ام راشد ؛ الا عيال خالاته كبره ماعليه وعبدالله يجيه مره ثانيه
اروى بقهر ؛ بس والله عبير تقهر ليه يوم تروح بسرعه
ابو راشد ضحك ؛ يبنت الحلال الأجازة طويله يالله العافيه يمدي الناس تروح وتجي
ام راشد وهي تقوم ؛ اي والله يلا يلا بس قومن معي نسوي العشاء
وراحت للمطبخ وهاجر واروى لحقوها وابو راشد والعيال جلسوا يسولفون مع شريفه والعنود تتنقل من بينهم
بعد دقايق بالمطبخ ..
غطت ام راشد على العشاء والتفتت للبنات ؛ الصحون هذي منهي عليه
هاجر ؛ علي بس خلي اروى تساعدني اليوم ماسوت شي
ام راشد ؛ ها اجل تعاونوا بروح الصاله لا جهز العشاء اجيه
وطلعت ام راشد والتفتت هاجر لأروى ؛ غريبه ماقلتي ماني منظفه ولا مالي دخل
تنهدت اروى اللي اصلاً طفشانه تبي شي تسويه ؛ والله عاد ذابحني الطفش خليني الهي عمري بالصحون
وتنحنحت هاجر وهي تسكر باب المطبخ وناظرتها اروى بأستغراب وهي تغسل ؛ انتي علامك
هاجر وهي تستند على المغسله ؛ مافيني شي
وسكتت اروى وهي تكمل وهاجر ترتب الصحون وتنحنحت ؛ الا اروى تتوقعين ساره ليه جايه اليوم؟
اروى ؛ توجب شريفه
هاجر ؛ وش بيجيبها وهي ماعمرها جت حتى على عرس شريفه عشان تجي توجبها
اروى رفعت كتفها وابتسمت ؛ ييربي ياحلو يزن ماشاء الله
هاجر ؛ خلينا من مشاري الحي... وشهقت وهي تحط يدها على فمها والتفتت اروى بأبتسامة صدمه ؛ وشو وشو منهو ؟؟
هاجر بتوتر ؛ يزن قصدي انا يعني استغربت كنت بقول واهلها ماعمرنا شفناهم
اروى قربت وهي تلف هاجر تناظرها وتكتفت بأبتسامة خبث ؛ منهم اهلها مغير امها ، والباقين اخوانها مشاري وفارس
هاجر بأرتباك وهي تروح جهة المغسله ؛ خلاص خلاص ممدري عنهم ماعرفهم خليهم
اروى لحقتها ؛ تعالي تعالي انتي ماقلتي وش جابها وهي ماعمرها جت الا وانتي عارفه انها جايه لشي وشو؟؟
هاجر بصدمه ؛ وش دخلني انا اسألك
اروى ؛ تخيلي تبي تخطبك!
هاجر بشهقه ؛ لمن؟
اروى عقدت حواجبها ؛ لمن؟ لزوجها لمن يعني! لمشاري اللي شايفك ولا نسيتي
هاجر دقتها وقالت بهمس ؛ اروى وجع لحد يسمعك انتي حلفتي ماتعلمين احد
اروى ؛ اهب وانا من علمت
هاجر ؛ مدري عنك الحين لو سمعنا احد بنروح فيها
اروى التفتت للباب وهي تتخصر بضحكه ؛ ايييه عشان كذا قفلتيه
وتأففت هاجر وهي تكمل غسل وقربت اروى تساعدها وقالت بهمس ؛ طيب الحين لو مشاري يبي يخطبك توافقين ؟
هاجر ؛ على تبن انتي وياه لا جا يصير خير
اروى غمزت ؛ تحترينه ؟
هاجر شهقت ؛ يالله انك تعجل عليها وانا استغفرالله! ابك انتي عقوبه ليتني ماتكلمت
اروى ضحكت ؛ وش قلت اسأل لو جا
هاجر ؛ وانا قلت يصير خير اص عاد
اروى ضحكت ؛ عاد تصدقين يشبه نايف شكل والظاهر حتى طبع بعد يعني منتي مفتكه
هاجر ؛ بسم الله على نايف ليه افتك منه
اروى رفعت حواجبها بصدمه ؛ يويلي على كثر هواشكم بسم الله عليه
هاجر ؛ وشو هواشنا اللي يسمعك يقول تونا متذابحين ترا كلها مزوح بعد دقايق تلقينا نضحك بعدين متى اخر مره تهاوشنا هوشه صدق ؟ قبل شهر مدري شهرين يومنه سحب علي بالجامعه وطلعت اخر وحده
اروى اخذت الصحون ؛ يراسي راساه خلاص انطمي يكثر قرقرتك الله يعين مشاري
هاجر شهقت وهي تكتم ضحكتها وتمثل العصبيه ؛ انطمي انتي حاصل له هاجر بعد !
اروى ضحكت ؛ الثثقه يناس
وطنشتها هاجر وكملت شغلها ..
.
بعد صلاة العشاء بساعة كان العشاء جاهز وتجمعوا بالصاله
والتفتت ام راشد على جوالها ؛ فزي اروى هاتيه
وقامت اروى وهي تجيبه وتشوف الاسم ؛ عبير
وردت وهي تحط الجوال على اذن امها وتتسمع معها
ام راشد ؛ هلا والله .. وعليكم السلام .. ها وين وصلتوا .. ماباقي شي بس ازين والله مهب زين الطريق بالليل عسى الله يستر .. وانتوا من اهله الله يحفظكم
وقفلت وهي تحط الجوال ؛ عبير تقول وقفوا ينامون وبكره يكملون طريقهم
ابو راشد ؛ الله يعينهم والله طريق تبوك ماهو بسيط
راشد ؛ ماشين من ٨ الصباح الظاهر ماباقي شي ويوصلون
ام راشد ؛ ايه تقول باقي ساعتين ونص بس سعد نعس الصباح ان شاء الله وهم واصلين كانهم مشوا الفجر
وكملوا عشاهم ومن خلصوا قاموا هاجر واروى يلمون السفره وقال نايف ؛ يبه ليه مانروح المزرعه كلنا بكره
اروى ؛ اي والله يبه تكفى الجو زين هالايام خلنا نروح
ام راشد ؛ يويلي برد وش يودينا
هاجر ؛ الخيمه دفى نجلس ونشب نار ونروح الصباح ونجلس للظهر نشوي ونتغدى ونرجع
نايف ؛ وش الصباح انا بدوامي
هاجر ؛ ها اجل متى نروح بالليول عشان حضرتك
نايف ؛ لا قصدي العصر يعني ولا الظهر نسوي غدانا هناك واطلع من الدوام واجيكم
هاجر ؛ خلاص نروح الصباح وترجع الظهر والغداء جاهز ونقعد للعصر
نايف دقها بقهر وقال ابو راشد ؛ والله ماهيب شينه ومنها كشته
ام راشد ؛ لا والله شينه برد على شريفه والعنود
نايف ؛ ايه خلاص خلاص برد
شريفه ؛ لا ماعليك يمه بالخيمه اجلس وعند النار ووقت الظهر يعني دفى
ام راشد ؛ هوا بارده حتى الظهر
راشد ؛ خلوها يوم ثاني لاتتعب شريفه وبنتها
تركي ؛ ايه بعدين اليوم والله برد حتى الظهر يومنا بالمزرعه
ابو راشد ؛ اجل نخليها بعدين الا ان كانه دفى بكره يمكن نروح
هاجر ؛ يعني نجهز ؟
ابو راشد ؛ والله مدري اجهزوا وان مارحنا بكره نروح بعده
ام راشد ؛ والعمال وينهم
ابو راشد وهو يقوم ؛ العمال ورا بالبيت ماهم عندكم ، تصبحون على خير انا بروح ارقد لاتسهرون شوي وارقدوا
الكل ؛ وانت من اهله ، ابشر
ودخل ينام وتنهد نايف ؛ انا وش قردني اقول نبي المزرعه نسيت دوامي
تركي ضحك ؛ استغربت احسب عندك اجازه
ام راشد ؛ خلاص مهو لازم خلوها بعدين " والتفتت لهاجر واروى " وانتم تبون تفرون للمزرعه واختكم نفاس
هاجر ؛ دفى الظهر حتى هي تقوله
ام راشد ؛ ماحنا رايحين اطلعوا الظهر بالحوش وشبوا ناركم بالدكه ، يلا شيلي الصحون انتي واختك سرعه
وفزت هاجر بالصحون ولحقت اروى اللي سبقتها للمطبخ وضحك راشد ؛ والله يايمه مالومهم بالمزرعه بعز البرد ولا بعز الحر يازينها ماشاء الله
تركي ؛ اي والله بس يازينها بالصيف تقعد تحت هالنخل والأرض متبرده من الماء
نايف ؛ ايه عانها لاعبه فيك الشموس محد يروح لها بالصيف كثرك
تركي ضحك ؛ لا والله اللي لاعبه فيه الشموس عيسى لاجا يقعد فيها اليوم كله
راشد ابتسم ؛ كلمنا اليوم بالمزرعه
ام راشد ؛ ايه وكلمني العصر انا والبنات
نايف ؛ وانا علامه مادق علي
راشد ؛ قلنا له بدوامك ويقول بيخلص قريب ويجي
ام راشد ؛ عسى الله يوفقه والله ان هذي سالفته كل اسبوع يقول ها الأسبوع اخر شي
تركي ؛ لا لا ان شاء الله قريب قريب وهو جاي
راشد ؛ على خير صب شاهي
تركي ضحك وهو ينادي ؛ اروى جيبي كاسات
اروى بحده من المطبخ ؛ تعال خذها بغسل الصحون
ام راشد ؛ ذابحك السنع جيبيها بس
راشد ضحك ؛ نروح المزرعه ولا تزعلين بس نبي نشرب شاهي تكفين يالقعده
اروى طلعت ومعها صينيه وضحكت شريفه ؛ خلاص روحوا انتوا بكره انا عيت علي امي
ام راشد ؛ بكره يشوفون البرد ويهونون محد يطلع هالأيام
تركي اخذ الصينيه من اروى ؛ اقول بسيستك وينها مالها حس
اروى ؛ بالدكه شفتها قبل شوي وحطيت لها اكل
ورجعت للمطبخ وصب تركي لهم شاهي والتفت وهو يمد لشريفه اللي جالسه وراهم على الكنب وبحضنها العنود ؛ بس والله ياتروك بروح انام دام العنود نامت ، تصبحون على خير
الكل ؛ وانتي من اهله
وقامت لغرفتها وحط راشد بيالته وهو ينسدح على حضن امه اللي قالت ؛ يوه انت نعست
راشد ابتسم ؛ لا بس بنسدح لين تبرد بيالتي
تركي ضحك وهو يقوم ومعه كاستين ؛ قم بس انسدح على المركى لاتكسر رجيلات اميمتي
راشد ضحك ؛ تبي مكاني قلها
تركي ضحك وهو يدخل المطبخ ويشوف هاجر واروى يرتبون وعطى كل وحده بيالتها ؛ بعدي خواتي سنعات ، هاكم شاهي
هاجر ضحكت وهي تاخذ بيالتها ؛ قصرت عقب ماخلصنا
تركي ضحك ؛ انه ازين شي لاخلصتوا
وطلع وهو يشوف راشد يبوس كفوف امه اللي كانت تمسح على شعره ؛ ييوه ياحلو الحنا وريحة الحنا يميمتي بالذات لاصار بكفوفك
ام راشد ضحكت ؛ الله يحلي ايامك وانا امك
تركي ضحك وهو يجلس ؛ اقول بس اشرب شاهيك ورح ارقد من يوم ما انسدحت وانت ناويها نومه مثل نايف الظهر يوم قال بس بنسدح ورقد للعصر
ضحك راشد واعتدل وهو يجلس ؛ والله اني نعست بس الليل طويل بدري
التفت نايف اللي كان يغير بقنوات التلفزيون لتركي ؛ الا انت رحت لهادي بعد العصر ؟
تركي هز راسه وقالت ام راشد ؛ ايه هو وش فيه ؟
تركي ؛ مافيه شي يده تعبته وتنوم يمكن بكره الصباح يطلع ان شاء الله
ام راشد ؛ ان شاء الله ، " ونادت للبنات اللي بالمطبخ " يبنات ماخلصتوا ؟
هاجر من المطبخ ؛ الا خلاص
ام راشد قامت ؛ زين اجل انا بروح ارقد تصبحون على خير
طلعوا البنات عند باب المطبخ وقالوا هم والعيال ؛ وانتي من اهله يمه
وراحت ام راشد للغرفه وطلعت اروى وهي تجلس عندهم وتعدل شعرها وبعدها طلعت هاجر وهي معها صحن حب وكاستها وجلست وهي تصب شاي وقالت اروى ؛ هيه اذا امي وشريفه مايبون يروحون المزرعه نبي نروح انا وهاجر
نايف ؛ مع من ان شاء الله ؟
هاجر ؛ مع ابوي ولا راشد ولا تركي مافيه الا انت يعني ؟
راشد ؛ والله اذا برد محد مخليكم تروحون لا امي ولا ابوي
تركي ؛ ماعليكم اخذكم انا ونهج
نايف ؛ يويلك ثم يسطرك ابوي
تركي ؛ والله عاد اذا الجو زين ماهو قايل شي باخذهم ، عطني الريموت بس لك ساعه تقلب ولا لقيت لنا شي نتابعه
نايف وهو يحذف له الريموت ؛ هه دور انت ، صبوا لي شاهي
هاجر ؛ عطني كاستك تبي اقوم لك
وانسدح نايف وهو يمدها لها والتفت لصوت التلفزيون ولف لتركي وهو يضربه بخفه ؛ ابك اقصصر تبي تقوم ابوي علينا
راشد ؛ اقصر لا يطلع يجلدنا واحد واحد راح عيسى وجيت انت
تركي ضحك وقصر وهو يغني بخفوت مع الأغنيه اللي شغاله على القناه اللي حطها ؛ عادي ابوي يحب يسمع ابو عبدالله " مغني " ابو سميه
اروى ؛ لا والله مايسمع اغاني يهاوشنا عليها اصلا
نايف ضحك ؛ الله ياعيسى اني ماشفت مثل صملته على كثر مايهاوشه ابوي مايتوب
راشد بضحك ؛ وانت وتركي مثله بس من ورا ابوي تدسسون الأشرطه بسياراتكم ولا لو يشوفها بالبيت كسرها
تركي ضحك ؛ والله ان ابوي يسمع بس يقصر عليها مثل مرزوق وبعدين تلقاه يغنيها " ورجع يلتفت للتلفزيون وهو يغني مع الاغنيه " مقاديير ياقلبي العنا مقادير وش ذنبي انا مقادير
راشد قام بضحك ؛ اقول خلك مع قدورك بس انتبه لا يطلع ابوي يهبدها على راسك ابروح ارقد
الكل ؛ ههههههههههههه
تركي ضحك ؛ سكر بيبان الحوش ان طلعت اسكرها ركبت سيارتي وروحت
راشد ؛ يووه لا خلك بس بسكرهم تصبحون على خير
الكل ؛ وانت من اهله
وطلع وسكر باب الصاله وراه وباب الحوش وباب الدوانيه ودخل لغرفته ينام
هاجر وهي تفصفص ؛ تركي بتودينا بكره نجهز ولا لا؟
نايف ؛ مسكت معها عاد
تركي ضحك ؛ والله مدري الصباح نشوف اذا الجو زين رحنا بعدين وش الأغراض عبيكم وخلاص كل شي هناك جاهز
اروى ؛ لا بنشوي وبضبط كيكه عشان نقعد للعصر
نايف ؛ ارقدوا بس اكيد برد بيعيي ابوي
هاجر ؛ ارقد انت ، عاد هالليله ادفى من دايم
تركي ؛ خلاص من اصبح افلح عينوا خير ، اروى طفي اللمبات يبيلنا نتسدح ونتفرج
اروى قامت وهي تطفيهم ؛ انا الحين انعس وشلون لاطفيتها بروح اخمد ان خلصتوا اقصروا وطفوه
وراحت للغرفه وقامت هاجر وهي تجلس على الكنب وحطت صحن الحب بحضنها وهي تتفرج وتركي ونايف اخذوا كاساتهم وجلسوا عندها ولا استوعبوا الوقت لحد ماسمعوا النهاية ؛ والى هنا سيداتي سادتي تنتهي سهرتنا لهذه الليله نتمنى لكم جميعاً نوماً هانئاً وتصبحون على خير "
وتنهدت هاجر وهي تتمغط ؛ شوفوا شي ثاني نتابعه
تركي ؛ لا خلاص قومي ارقدي مافيه شي
هاجر ؛ الا فيه دور
نايف ؛ خلاص ابك مافيه والوقت تاخر قومي وخذي الكاسات وديها المطبخ
وتأففت هاجر وهي تشيل الصينيه وودتها للمطبخ ورجعت ؛ طفوا التلفزيون بروح انام
تركي ؛ ايه ماعليك تصبحين على خير
هاجر ؛ وانت من اهله
وراحت الغرفه والتفت تركي لنايف ؛ عيسى العصر كلمني ويقول بيرجع يدق بعد شوي ويكلمك انت بعد
نايف اعتدل ؛ زين وانا احسبه ناسيني ، يلا شوفه اذا فاضي الحين لأن اكيد بنقعد نقرق ساعتين خلنا نكلمه دام الوقت بدري
تركي اخذ جواله ؛ وين بدري الساعه ١٢ بس ماعليه ماحولنا نوم وهو عنده الوقت العصر الظاهر
نايف ؛ يلا يلا دق
وفز يسكر الباب اللي على ممر الغرف ورجع وهو يجلس بالأرض ؛ هات مخده وتعال تكي عندي ازين
وقام تركي وجلس عنده بالأرض واخذ صحن الحب وحطه بينهم وقصر على التلفزيون وبقى ضوه واللمبات طافيه وهو ينتظر عيسى اللي رد ؛ الوو
نايف ؛ ارحب
عيسر ابتسم ؛ سسلام عليهم
نايف وتركي ؛ وعليكم السلام
تركي ؛ فاضي ها ؟
عيسى ؛ ايه والله كنت بدق قبل شوي بس ماكنت بالبيت
نايف ؛ تو جيت من دوامك ؟
عيسى ؛ لا لا اجازه بس مشوار قريب انتوا صاحين للحين كم الساعه؟
نايف ؛ ١٢ بالليل وانتوا
تركي ضحك ؛ الحين هذي سالفتكم كل مادقينا كم الساعه عندكم وكم الساعه عندنا
عيسى ضحك ؛ يخوي وش نسوي لخبطة الوقت بلشه
تركي ؛ وانتوا كم الساعه عندكم
عيسى ؛ المغرب ٧ الا ربع
نايف اعتدل ؛ زين يعني ماعندك شغل والوقت بدري وحنا ليلنا طويل مافيني نوم
تركي ؛ ايه شبعان نوم من الظهر للعصر
نايف ؛ حتى انت توك من شوي تقول ماحولنا نوم
عيسى ؛ اجل سولف علي تركي اخذت علومه الصباح وانت بدوامك ، الا وشلون شغلك عسى مرتاح فيه
نايف ؛ والله نص ونص اذا على الوقت مهو شي ٣ ساعات بس لكنه يطفش مغير قاعد عند هالأوراق اللي وش كثرها واقراها كامله غصب وكلها مثل بعضها اللهم فرق الاسم يختلف
عيسى ضحك ؛ يخوي احمد ربك بلاك ماجربت توقف على عصب رجلك من صباح الله خير والعمليات ورا بعض تسد نفسك عن كل شي
تركي ؛ الحين دوامك كله على العمليات ؟
عيسى ؛ ايه بس بالأسبوع مهو كل يوم الا اذا فيه حالات طارئه يجروني غصب واذا لا يعطون المرضى مواعيد عملياتهم وكلها بيوم واحد اجي واسويها مره وحده ، ومع البعثه كارفيني كل عمليه يحذفونها علي عطوها عيسى وحولوها لعيسى
نايف ؛ عزتي لك ماعليه اهم شي خلصت ولا بترجع تداوم بعد ؟
عيسى ؛ لا دوام الابتعاث خلاص والاختبار اختبرت واحتري اوراقي عطوني تاريخ قالوا بتطلع قبله وان تأخرت بيومه ، يوم حسبته بالهجري طلع بنص الشهر كم تاريخ اليوم؟
نايف رفع كتوفه والتفت لتركي اللي جلس يحسب ؛ قبل امس ابو لافي عزم بالسوق على عرس ولده قال بعد يومين ب٩ من الشهر والحين مع الساعه يعني صرنا ٩ من الشهر
عيسى ؛ ولد ابو لافي ؟! منهو ولده كل عياله متزوجين
تركي ؛ لافي طلق مدري متى وبكره عرسه مدري ابوي يحضر ولا لا بالرياض
عيسى ؛ يووه الله يتمم له ، اجل ٦ ايام بالكثير وانا جاي ان شاء الله
تركي التفت لنايف اللي ماد يديه ويحسب ومبتسم ؛ هذا علامه
عيسى ؛ منهو
تركي دق نايف ؛ نايف
نايف التفت بضحك ؛ ابك اليوم ٩
عيسى وتركي ؛ ايه ؟
نايف ضحك ؛ وجعيه يالعدو اليوم كملت ٢٦ سنه
تركي ضحك ؛ اقععد يعني كبرت ولا وشو
عيسى بضحك ؛ اووه ماشاء الله تبينا نسوي لك عيد
تركي ؛ اعقب ماعندنا الا عيدين ولا غيرتك ديرة الكفار
عيسى انفجر يضحك ؛ انا ادري عنه لو هو عندي وقالها لأحد سوو له حفله ، بعدين كيف حكمت انها ديرة كفار فيها مسلمين الحمد لله
نايف ضحك ؛ لا بس يعني عشان تعرفون ان اخوكم الصغير اللي ماعندكم اغلى منه بهالتاريخ انولد
عيسى وتركي ؛ هههههههههههههههه
عيسى ؛ سقى الله يانايف تذكر يوم تنجلد من جدي معنا ياللي ماعندنا اغلى منك
تركي ضحك ؛ والله كان جني هو السبب يوم نتسطر
نايف ابتسم ؛ ييوه يازينها من ايام
عيسى ؛ اي والله ايام المزرعه يومنا ساكنين فيها كلنا ببيت جدي هو وش صار عليه للحين العمال فيه ؟
تركي ؛ ويين ايام المزرعه ماكان فيه لا مزرعه ولا شي نخلتين متصرعات وشبك غنم ورا بيت جدي بس انه موجود للحين وبانين على اول المزرعه بيتين شعر
عيسى ؛ افا والنخل وين راح
نايف ؛ النخل بالصيف ابرد والخيمه بالشتاء ادفى
عيسى ؛ والغنم والنياق والدجاج والحمام والارانب لايكون فيه شي منهم رايح ؟
تركي ؛ لا لا على حطة يدك الغنم بعنا وشرينا والنياق على ماهي عليه ولدت كم وحده والباقي مابعنا منهم شي
عيسى ضحك ؛ يوه اذكر يومنا صغار نعدي على الغنم وهن حوامل ويجي جدي يجلدنا بالخيزرانه واحد واحد يوم ولدوا ميتين
نايف غمض بضحك ؛ ييوه لاتذكرني تكفى والله وقتها جاني تأنيب ضمير على اللي ذبحناهم
تركي ضحك ؛ يخوي وش درانا انهم حمل مادريت الا يوم جدي جاي يهاوش " وقلد صوت جده " لا يالجنون راكبين البهايم وهن حمّل الين موتوا الجفار " صغار الغنم "
عيسى ونايف ؛ هههههههههههههههه
وكمل تركي بضحك ؛ وهو يلقط العصى من النخله ويطردنا فيها ولاعاد شاف الا غبرتنا
نايف بضحك ؛ ولابغا يروح المحل ولا مشوار نتعلق على حوض السياره وثم ينزل ونهج ويرجع يركب ونرجع نتعلق ولا ينفع فينا مدري وشلون تحمل مايديور علينا بالسياره ويدعسنا ويفتك
عيسى ضحك ؛ والله اننا كنا عفاريت مدري وشلون تحملنا الله يرحمه
نايف ؛ وراشد اخوي عاقل وجدي يحبه غير انه سميه وولد ولده الوحيد " جدهم ابو ابوهم اسمه راشد وراشد اخوهم على اسم جدهم "
تركي ؛ اوووه مدلعه وان بغينا من جدي شي ارسلنا له راشد
عيسى ضحك ؛ واذا عيا راشد وش نسوي فيه ؟
تركي ضحك ؛ نتكاثر عليه كلنا ونجلده
نايف بضحك ؛ ويعلم جدي ويجلدنا ولا نتوب نرجع نضربه ليه يعلم
عيسى ابتسم ؛ يازيينها من ايام ويوم يجون عماتنا وعيالهم ونتهاوش معهم نجيب راشد يفزع معنا
نايف ضحك ؛ ايه ناخذه بصفنا بس انه كفو من يومه وقت الشدايد يفزع معنا مايذكّرنا ويقول تكاثرتوا علي وضربتوني وماني فازع
عيسى ضحك ؛ ايه والله ، الا هو اكبر احفاد جدي ولا من اكبر ؟
تركي ؛ لا لا ويين ياعيسى ناسينا انت قبل ابوي تزوجن عماتي كلهم عمتي سلمى جابت بنتها نوف الظاهر عمرها ٤٠ مدري كم وبعدها تزوجت عمتي وصايف جابت عبدالكريم وعمتي سلمى بعدها جابت محمد وعمتي عزيزه بعدهم تزوجت وجابت صالح بكرها وبعدها كل عماتي الثلاث ولدوا بنفس السنه سلمى جابت عادل وعمتي وصايف جابت مريم وعزيزه جابت فاطمه معهم والباقين والله ناسيهم بس اصغر احفاد جدي من عيال عماتي وبناتهم فارس ولد عمتي وصايف اللي كبرك ٢٩ اما من ابوي اروى
عيسى ؛ ياساتر هذا وانت انولدت بعدي وبعدهم ماشاء الله عليك وتعرفهم
نايف ؛ انا يالله اذكر عماتي وهذا يعرف عيالهم واعمارهم وبالترتيب ماشاء الله
تركي ضحك ؛ اعوذ بالله من عيونكم اسأل ابوي وامي دايم عنهم واعرفهم بس من كثرهم ماشاء الله ناسيهم
عيسى ؛ انا اذكر عدد عيالهم عمتي سلمى ٥ وعمتي وصايف ٤ وعزيزه بعد ٤
تركي ؛ ايه سلمى اكبرهم بنتها ٤٠ مدري اصغر واصغر عيالها بعد بنت ٣٠ عمرها ووصايف اكبرهم عبدالكريم ٣٨ مدري ٣٩ واصغرهم فارس ٢٩ وعزيزه اكبرهم صالح ٣٥ الظاهر واصغرهم عابد ٣٠
نايف ؛ وتعرف كل واحد كم عنده ورع ؟
تركي دقه ؛ تطقطق انت وجهك بلاك ماتسأل عن اهلك ولا كان دريت عنهم ولو تبي بعد اقول لك كل وحده كم عندها ولد وكم عندها بنت
نايف ؛ ها قل خلنا نعرف اهلنا منك
تركي ؛ سلمى عندها ولدين و٣ بنات ووصايف ٣ عيال وبنت وعزيزه ولدين وبنتين اعلمك عن ابوك بعد كم عنده ولد وكم عنده بنت ؟
عيسى ضحك وقال نايف بضحك ؛ لا لا اعرف ٣ عيال و٤ بنات
عيسى عقد حواجبه بأستغراب والتفت تركي ؛ بسم الله ٣ عيال والرابع وينه اكلته ؟
نايف ؛ منهو مغير راشد وعيسى وانا
عيسى ضحك وابتسم تركي وهو يضرب كتف نايف بخفه ؛ اعقب قبلك واحد اسمه تركي يورع
نايف ضحك ؛ اوووه نسيناه السربوت
ضحك تركي وقال عيسى بضحك ؛ هو للحين على اسمه ماعقل !
نايف ضحك ؛ ابد هذا تركي
تركي بضحك ؛ والله اني من زمان ماطلعت اخر مره يوم الأربعاء قبل اسبوع
عيسى ؛ وش عندك
تركي ابتسم ؛ اتمشى اوسع صدري عقب ماراحوا الحبايب
نايف ؛ اعققب حبايب ها
عيسى ؛ منهم الحبايب اللي خلوك تتمشى بأخر الليول ضايقٍ صدرك بتوسعه
نايف ؛ ايييه اهل عزام راحوا قبل اسبوع يوم الاربعاء الصباح
عيسى ضحك ؛ احللف ومن ليلتها مارقد العاشق راح يسربت
نايف ؛ اي والله مغير ليله ونساها صار يرقد بدري مثل الشيبان
تركي خبطه ؛ اعقب هذا انا مانمت اسولف معك انت وياه بس شكلي بروح واخليكم
عيسى ضحك ؛ وين تروح تشوف القمر وتذكرها ؟
تركي ضحك بقهر ؛ انا الغلطان اللي علمتكم
نايف بضحك ؛ نمزح نمزح بس انت ورا ماتخطبها وتفكنا ؟
عيسى ؛ هو ماعلمك وش قلت له الصباح ؟
نايف ؛ لا والله ما اطرى شي
تركي ؛ مافضيت انت رقدت وانا رحت ازور هادي
عيسى ؛ ايه هو وش صار عليه
تركي ؛ ماعليه رحت له بالمستشفى المغرب وسلمت عليه يطلع الصباح ان شاء الله
نايف ؛ وش قايل له الصباح ياعيسى ؟
عيسى ؛ ابعلمك وقل انت مع كلامي ولا عندك شور ثاني تعطيه اياه عشان ابوي يزوجه اخت عزام
نايف ؛ ابك ماهو خاطبها له وهي مخطوبه
عيسى ؛ لا فيه شي بيخليه يخطبها له لو بكره عرسها على ولد عمها
نايف ناظر تركي بصدمه ؛ ابك انت وش انت مسوي !
تركي فز ؛ اهب انت وين راحت فيك الهواجيس اسمع وانت ساكت
عيسى ضحك ؛ ماعليك مافيه شي اسمع بس
نايف تنهد ؛ ها وشو
وبدا عيسى يقول لنايف فكرته اللي قالها لتركي اللي مستند على المخده ويفصفص ونايف يشرب شاهي ويسمع ومن خلص عيسى عقد نايف حواجبه وهو يلتفت لتركي ؛ وليه ماعلمتنا انك شفتها قدام اروى !
تركي ؛ يخوي قلت يمكن يدري احد ودام هي سكتت ماني معلم
عيسى ؛ لو علمت ازين كان اخت عزام الحين خطيبتك
نايف ؛ ماتسكت اروى من عبث اكيد انها قايله لأحد
سكت تركي بأبتسامه يفكر ليش سكتت اروى وقتها رغم انها ماكانت تدري انه يحب شموخ ولا تدري انه شافها من قبل وتنهد ؛ ترا وقتها هي كانت ورا اروى وانحاشت ورى الباب واكيد اروى تحسبني ماشفتها
نايف ؛ طيب الحين لو قلت لها انك شفتها ذاك اليوم وتبيها بتروح تقول لأبوي؟
عيسى ؛ ايه بتقول له ماعليك انت ياتركي بس قل لأروى بخطبها وحبيتها من يوم ماشفتها معك ذيك المره وانا ابيها ومايحتاج تقول علمي ابوي ولا امي ولا احد هي بتروح وتفضحك
نايف ضحك ؛ هذي الفضيحه الزينه
تركي ضحك ؛ الله لايفضحنا من متى فيه فضايح زينه ، بقول لها وان شاء الله تفهم وتعلم علي خلاص بكره باخذ البنات للمزرعه وان شاء الله الجو زين يجي معنا ابوي واقول لأروى اني احب شموخ
نايف بضحك ؛ اوووه وانا اشوفك يوم تقول اخذ البنات ونهج اثاريك تبي تضبط وضعك
عيسى ؛ ليه وش السالفه
نايف ؛ انا قلت على العشاء نبي نروح المزرعه كلنا بكره العصر وقالت هاجر لا نبي الصباح عشان نرجع العصر وانا دوامي الصباح واطلع الظهر متى يمديني اجلس بالمزرعه
تركي ؛ ايه وانا قلت مهو لازم يوم ثاني بس قال ابوي اذا الجو زين نروح
عيسى ؛ خلهم يروحون انت تخلص الظهر وتقعد معهم للعصر واذا الجو زين على قولتكم لليل اهم شي نخلص من سالفة تركي ، وبعدين انت دامك طرقت ٢٦ متى ناوي تعرس انا تزوجت وانا كبرك ولا تبي تحب مثل تريكي
نايف ضحك ؛ خل تريكي يتزوج وعقبها تفضون لي اخر واحد انا " والتفت لتركي " اسمع خذهم الصباح وعلم اروى هناك ووقت الظهر اكيد يجي ابوي اذا ماجا معكم الصباح واكيد بتعلمه ، بس المصيبه لا علمت هاجر ولا امي ولا راشد
تركي ؛ لا لا ماتعلم ماعليك وبعدين خلهم يدرون عشان كلهم يقنعون ابوي بس امي بتذبحني ليه يوم كذبت عليها
عيسى ؛ عاد هي خربانه خربانه مافيه الا هالحل
نايف ضحك ؛ اجل خربانه على قولتك
تركي ؛ لا ان شاء الله شوفوا هو بالحالتين انا باخذها باخذها ان قالها الله بس اللي بنسويه هو اللي بيخليني اخذها بوقت اسرع ولا انا متأكد انها ماراح توافق على ولد عمها لو اخذت وهي تفكر عشر سنين مردها بترفضه
عيسى ؛ يساتر وبتحتريها عشر سنين ابك البنت ليكون ماتبيك وانت ناشب لها هي وولد عمها
تركي ؛ لا تبيني لو تبيه رفضته وبترفضه واحتريها عمري كله لو تبي
نايف كش عليه ؛ هه ، والله لو تاخذ بنت خالي ياسر اللي راح صوت امي وهي تقولك خذها ازين لك
تركي ؛ على وجهك ، والله ماخذها يخوي انا ابي شموخ بعدين دانه " بنت خاله " ورع ٢٠ سنه فرق العمر ٧ سنين
عيسى ؛ وين المشكله ام تالين عمرها ٢٢ وانا ٢٩ فرق ٧ سنين مثلكم مافيها شي هذا انا عندي منها بنت والحمد لله ماله دخل العمر
تركي تنهد ؛ عيسى انت تحبها انا ما احب دانه بعد ما اكرهها بس يعني مابيها ابي شموخ
نايف ؛ واخر شي شموخ تطلع اصغر من اروى
تركي ابتسم ؛ ووين المشكله على قولة عيسى ؟ ماله دخل العمر احبها وهي اكيد انها تحبني
عيسى ضحك ؛ ايييه هو على القلب ومايهوى يعني اجل خله يانايف خلاص ماعاد فيه حيله
نايف ابتسم بضحك وهو يتكي ؛ والله انكم تضحكون ، شفتوا انا لابغيت احب اشوف انه احسن شي بعد ماتاخذها اما قبله تتحسر الين تقول بس ثم تجي بطلعة الروح
تركي ضحك ؛ اي والله ياشينها بس مهب على كيفك انت خلاص لاغلطت بنظره ثواني رحت فيها عمرك كله
عيسى ابتسم ؛ اي والله والمصيبه لازاد حبك بعد ماتاخذها هنا سلم امرك لله
تركي ؛ هذا اللي بيصير لي الظاهر
نايف ضحك ؛ وعزاه عنكم ذابحكم الحب يالله انك لاتشغلنا
عيسى ضحك ؛ عاد انت يانايف لو تسوي مصيبه محد درى مايبين عليك ابد ، مايندرى عنك الحين لو انك تحب اما تركي لو سألوه انت تحب بين على وجهه والمصيبه يجحد
نايف رفع كتوفه بأبتسامه ؛ مايندرى عاد
تركي ضحك وكمل عيسى بضحك وهو يقلد نايف ؛ انا لابغيت احب اجل يحليلك مهو على كيفك الحب متى مابغاك من اهله طيحك
نايف ؛ لا والله لاصار قلبك رهيف طحت اما لاغضيت النظر تسلم
عيسى ضحك ؛ تدري وش تذكرت " وغنى بضحك " غضي النظر ياعين وش جاك وش صار
نايف ضحك وهو يكمل ؛ اللي يحب اثنين لابد يختار
تركي ابتسم ؛ الله
عيسى بضحك ؛ عاد اخر شي يطلع نايف يحب ثنتين مثل هاللي كملها
نايف ؛ يووه لا الله لايقوله وبعدين اللي يحب يحب واحد كم له قلب هو ؟
عيسى بأبتسامه ؛ بعضهم يحبون واحد وقلب واحد مايتحمل ماسمعت اللي يقول تبغى زياده في حبك اجيب لك قلب ثاني منين ؟
تركي ابتسم وهو يخبط على فخذه بحماس ؛ الله الله يولد تكفى غن
عيسى ضحك ؛ والله تالين تعبانه وتوها غفت ماودي اصحيها ، نايف اللي ماشاء الله عليه خله يغني يطربنا
نايف ؛ حنا بالصاله تبي ابوي يطلع علي يلسبني ، سلامتها تالين وش فيها ؟
عيسى ابتسم ؛ ابد حراره وخفت الحمدلله وتو نامت
تركي اخذ بريق الشاي اللي بجنبهم وهو يطق عليه بخفه ؛ محد يسمع شوي شوي نغني
نايف ؛ لا ابوي يطلع اسكت
عيسى ؛ روحو الدوانيه طيب اطربونا
نايف ؛ والله عجزان
طنشه تركي وهو يطق بخفه ؛ يلا عيسى ، غضي النظر ياعين
وكمل معه عيسى بأبتسامه ؛ وش جاك وش صار اللي يحب اثنين لابد يختار
وتحمس نايف ودخل معهم وهو يغني بخفه ؛
الاول احبه حقيقي .. فارشلي ورد بطريقي
بس انه بطبعه خجول .. عاجز عن احساسه يقول
ناسي وعن عينه يغيب .. اني حبيب اني حبيب
ويطالب بغض النظر ! .. ناسي حبيبي اني بشر
والثاني حس بقيمتي .. حب وتفهم كلمتي
بعيونه شي من الوله .. جدد حياتي ودنيتي
يا عين قولي شحيلتي ؟ .. محتار بين أمريين
اللي يكون بحالتي! .. وشحيلته يا عييين ؟
هذي ظروفي وقصتي .. دليني دربي ويين ؟
وغضي النظر يا عين وش جاك وش صار ! ..
اللي يحب اثنين لابد يختار ..
وانتهت مكالمتهم وسوالفهم وليلتهم على هالأغنيه اللي بعدها ودعوا عيسى وقفلوا وكل واحد راح غرفته ينام ..

.
من طول الغيبات جاب الغنايم 😂❤
بارت طوييل وكملت لكم عليه بعد وآسفه على التأخير بس والله مشغوله
تفااعلكمم ورايكم بالبارت ..
وتوقعاتكم للبارت الجاي؟؟