ياديرةٍ ضمّت كل الأحباب

Part 5

..........••..........
في بيت ابو هادي
هادي وهو يناظر مع الشباك ؛ يمه يمه وصلوا هذي سيارة حمد وقفت
ام هادي وهي تطفي النور ؛ تعال تعال بسرعه خذ العلبه هذي افقعها اذا دخلوا
ضحك ابو هادي اللي كان جالس يتقهوى ؛ ياساتر بتروعونهم ماتحتفلون فيهم
ام هادي ؛ لازم نفاجأهم ولا ماتصير حفله
سمعو صوت شهد وحمد يتناقرون من عند الدرج وقربوا للباب
شهد ؛ الحين تلقى ابوي مجهز العصى بيجلدك
حمد ؛ لا والله وش دخلني انا بقول هي اللي موديتنا للسوق ولا على اساس للبقاله اللي تحت
شهد ضربته بالكيس ؛ شف من يتكلم مو انت تقول خلنا نتقهوى ونروق بسببك تأخرنا
حمد وهو يفتح الباب ؛ والله ان انجلدت بتنجلدين معي حتى انتي تأخرتي وانتي ت...وما مداه يكمل الا فقع هادي العلبه
شهد صرخت بخوف ؛ ييمممه
حمد فز ؛ وش ذا
ابو هادي انفجر يضحك ؛ والله اني داري
ام هادي بضحك ؛ مبرروووك تخرجكم
هادي ؛ مبروك التخرج وعقبال الوظيفه
حمد بصدمه ؛ حفله؟؟
شهد ضحكت ؛ ماتوقعت احد يعبرنا والله وناسه
ابو هادي ضحك وهو يحضنها ؛ و ليه مانعبركم افا بس الا والله نسوي لكم حفله ونفرح فيكم
حمد ؛ الله الله
ابو هادي وهو يخبط كتفه ؛ مبروك ياحميد وعقبال الوظيفه انت وشهد
حمد وهو يبوس راسه ؛ يابعد راسي الله يبارك فيك
هادي ؛ يلا يلا تعالو شوفو الكيكه
ام هادي ؛ بينجلط حمد لو شافها
حمد وهو يبوس راسها ؛ اكيد ان هادي اكلها
ابو هادي ؛ لا ماعليك يالله مسكناه
تقدم حمد وهو يشوف الكيكه وانفجرت شهد ضحك من قرت الكلام ؛ تكفونن وش ذا تستاهل ياحمد
حمد ضحك بصدمه وهو يقرا ؛ افتكت الجامعه ، ليه كذا ليتك اكلتها ياهادي
الكل ؛ هههههههههههههه
شهد ؛ كيكتي حلوه الحمدلله ماسوو لي نفسك
كملوا ياكلون وهم فرحانين بتخرجهم ويطقطقون على حمد والكلام اللي ع كيكته واللي كتبه هادي
..........••..........
الرياض
في المستشفى
وصلوا عزام واهله وهم متحمسين والفرحه بقلوبهم
ام عزام ؛ شموخ عطيني الكيس اللي عندك
شموخ ؛ بنزله معاي يمه هو وهدية شروف
ام عزام ؛ عزام وانا امك اغراض شريفه بتنزلهم هنا ولا ببيتهم
عزام وهو يدق على شريفه ؛ والله مدري يايمه بسألها الحين
ردت شريفه ونزل عزام من السياره ؛ شرروف
شريفه ابتسمت ؛ هلا والله
عزام ؛ ياحيها وش اخبارك
شريفه ؛ بخير الحمدلله وينكم
عزام ابتسم ؛ تحت وصلنا
شريفه ؛ صدق ؟
عزام ؛ اي واهلك ورانا بنجي كلنا انا اتصلت عليك اسألك ونسيتيني
شريفه ضحكت ؛ تعال طيب واسأل على راحتك
عزام ؛ طيب وملابس عنوده واغراضها اجيبهم ؟
شريفه ؛ لا لا كلهم تجيبهم عندي ويين جيب الشنطه البيضاء بس ، لاتقول نسيتها
عزام ضحك ؛ لا ماعليك جبت كل شي الشنطه هذي هي معي اجيبها بس هي ؟
شريفه ؛ اي والباقي خلهم بالبيت تنزلهم
عزام ؛ يلا بنطلع لك الحين انا وامي وشموخ
شريفه ابتسمت ؛ ياروحي حياهم الله
قفل عزام وفتح الباب ؛ يلا يمه نزلنا
نزلت ام عزام وشموخ وطلع عزام الشنطه اللي تبيها شريفه ودخلوا
عزام التفت لأمه وهو يضحك على اكياسهم واغراضهم ؛ كيف تعرفون انه اول حفيد من اغراضنا
شموخ ضحكت ؛ اي والله تو اقوله اغراضنا اكثر منا
ام عزام ؛ ماعليه تستاهل شروفه وبنتها لو علي جبت هدايا الدنيا كلها
عزام ابتسم ؛ ياحبيبتي يايمه ماتقصرين والله دامك جدتها هذي اكبر هديه
ام عزام ضحكت ؛ ييوه والله صرت جده
ضحكوا ووقف عزام للأستقبال يسأل عن غرفتها واخذو الرقم وطلعوا
دقوا الباب ودخلوا وهم يشوفون شريفه فرحانه والابتسامه شاقه وجهها ؛ هلا هلا
شموخ قربت تحضنها ؛ شروفتي الحمدلله على سلامتك ياقلبي
شريفه وهي تسلم عليها ؛ عمري شموخ الله يسلمك
ام عزام وهي تحضن شريفه ؛ الحمدلله على سلامتك ومبروك ماجبتي يابنيتي
شريفه وهي تبوس راسها والدموع بعيونها ؛ ياقلبي ياخالتي الله يسلمك من كل شر
التفتت ام عزام لعزام وهي تضحك ؛ مستحي نطلع يعني ؟
شريفه وشموخ ؛ ههههههههههههههه
عزام ضحك و قرب وهو يسلم على شريفه ويبوس جبينها ؛ الحمدلله على السلامه يا شروف
شريفه ابتسمت ؛ الله يسلمك يارب
شموخ ؛ ويينها
شريفه ضحكت ؛ الحين يجيبونها اخذوها يبدلون ملابسها
عزام ؛ اي صح هذي الشنطه اللي تبين صح ؟
شريفه ؛ اي هذي هي حطها هنا
دخلت الممرضه والبنت بالسرير قدامها
فزت شموخ وهي تركض تشوفها ؛ ييييروحيي تجنن تجنن بسم الله عليها
ام عزام ؛ ما شاء الله بسم الله عليك تبارك الله
عزام تجمعت دموعه بعيونه ومد يده ياخذها ؛ ياربيي ما شاءالله ماشاءالله
ام عزام دمعت عيونها ؛ ياروحي تتربى بعزكم يارب ويجعلها من الصالحين
شريفه وعزام ؛ اميين يارب
شريفه ؛ اذن لها ياعزام
اذن عزام بأذنها وهو قد مايقدر ماسك دموعه من الفرحه وصوته يرجف من فرط السعاده وشريفه وام عزام وشموخ دموعهم تعبر عن فرحتهم
ام عزام ؛ متى تسميها
عزام ابتسم ؛ شريفه تبي تسميها على اسم امها عمتي العنود
ام عزام ابتسمت ؛ ياحلو الاسم والسميه احلا الاسامي العنود
شريفه ابتسمت بحرج ؛ والله من زمان خاطري اسميها على امي لو توأم سميت الثانيه هنوف
ام عزام ضحكت ؛ ياعمري انا وامك واحد واسمها احسن اسم الله يخليها لك يا أم العنود
والتفتت على عزام ؛ مابغينا نشوفك ابو يأبو العنود
عزام ضحك ودخلت ام راشد ؛ السلام عليكم
الكل ؛ وعليكم السلام
ام عزام ؛ ياهلا بجدة سميتها
ام راشد ضحكت ؛ انا جده من زمان مبروك حفيدتك يا أم عزام
ام عزام ابتسمت ؛ الله يبارك فيك وين البنات
ام راشد ؛ برا الحين يدخلون
نزل عزام البنوته بحضن شريفه وقال ؛ يلا بطلع خذوا راحتكم
ام عزام ؛ خذنا معك عشان يدخل ابو راشد وعياله ومنها نصلي المغرب ونرجع لكم
ام راشد ابتسمت وهزت راسها
طلعوا عزام وامه وشموخ وأشر عزام لأبو راشد يدخلون ماعندهم احد
ابتسم له ابو راشد ودخل هو وهاجر واروى وراشد ومنيره
ابو راشد ابتسم ؛ سلام عليكم يا أم العنود
شريفه ابتسمت ؛ وعليكم السلام
راشد قرب يسلم على شريفه ؛ مبروك ماجاكم ياشروف
شريفه ؛ الله يبارك فيك يارب
منيره وهي تسلم عليها ؛ يازين اللي صارت ام الحمدلله على سلامتك ياشروفه
شريفه ابتسمت بخجل ؛ ياحبيبتي يا منّو الله يسلمك
قربوا هاجر واروى وهم يحضنون شريفه
هاجر ؛ الحمدلله على سلامتك ياقلبي انتي
اروى ؛ الحمدلله على السلامه ياشروف
شريفه ؛ ياحبيباتي الله يسلمكم يارب
راشد وهو يبوس العنود ؛ ياحلوها ماشاءالله
اروى ؛ عطني تكفى بشيلها
هاجر ؛ لا انا انا اول
ام راشد ؛ لا لا تطيحونها بالبيت بالبيت احطها بحضنكم الحين بس لاعبوها وشوفوها
منيره ضحكت ؛ ماشاءالله يخليها لك يارب
شريفه ؛ امين ياروحي ويخلي لك عيالك وينهم ماجبتيهم ؟
راشد ؛ اخذوهم تركي ونايف معاهم للمزرعه
ام راشد ؛ ماقالو لك متى تطلعين
شريفه ؛ لا الدكتوره بعد شوي بتجي وتقول متى يطلعوني
ابو راشد ؛ اجل تعال معي ياراشد نطلع نصلي عشان يجون اهل عزام ياخذون راحتهم
طلعو ابو راشد وراشد والتفتت شريفه لأمها ؛ يمه كلمتني عبير بتجي بكره
هاجر ؛ صددق ؟؟
ام راشد ؛ اي حتى انا الصباح كلمتها ونسيت اقولكم
اروى ضحكت ؛ وناسه هالأجازه كلنا متجمعين
هاجر ؛ كل اجازه نتجمع
اروى ؛ اي بس هالأجازه من بدايتها ماشاءالله
دخلت الدكتوره ؛ سلام عليكم
الكل ؛ وعليكم السلام
الدكتوره ؛ كيف صحتك يا شريفه
شريفه ؛ الحمدلله كل شي تمام
الدكتوره ؛ قلتي انك تحسين بألم خف ولا لا ؟
شريفه ؛ اي الحمدلله الحين احسن
الدكتوره ؛ طيب رح اكتب لك خروج الحين تمام ؟
شريفه ؛ تمام
طلعت الدكتوره ودخلت وراها ام عزام وشموخ
ام عزام ؛ وش قالت يطلعونها الحين ؟
ام راشد ؛ اي بتكتب لها خروج الحين ونطلع للبيت
ام عزام جلست ؛ الحمدلله والله اني ما احب المستشفيات
•
عند عزام وابو راشد وراشد برا
ابو راشد وهو يكلم تركي بالجوال ؛ ها خلصتوا
تركي ؛ اي صلخها نواس وهذا حنا بالبيت ننتظركم
ابو راشد ؛ خلاص حنا شوي وجايين
تركي ؛ بيطلعونها شريفه ؟
ابو راشد ؛ مدري والله بسأل امك الحين ان طلعوها جبناها معنا
تركي ؛ طيب
وقفل والتفت لراشد ؛ كلمتها ؟
راشد ؛ اي يبه تقول منيره كتبو لها خروج وبتطلع الحين
ابو راشد التفت لعزام ؛ طلعو شريفه بنرجع كلنا للبيت
عزام ابتسم ؛ اي تو كلمتها وبروح اوقع على الأوراق الحين
ابو راشد ؛ اجل مشينا لهم
دخلو للمستشفى ووقع عزام اوراق الخروج واتصل على امه ينزلون لهم
عزام ؛ شريفه بترجع معي انا واهلي انتو سبقونا
ابو راشد ؛ تم يلا ياراشد كلمهم يطلعون وانا بالسياره
طلعو راشد وعزام لغرفة شريفه ودق عزام الباب ؛ يمه
ام عزام ؛ اصبر يا يمه البنات هنا
عزام ؛ معي راشد بنطلع دامهم كتبوا لشريفه خروج اجهزوا يلا
ام عزام ؛ يلا الحين نطلع
ام راشد طلعت لهم ؛ عزام خلصت الاوراق ؟
عزام ؛ اي ياعمه وقعت وخلصنا وشريفه بترجع معي انا وامي وشموخ
ام راشد ؛ خلاص بطلع اغراضهم تنزلهم معك بالسياره
عزام ؛ ابشري
راشد ؛ يمه انا وابوي تحت بالسياره تعالو انتي والبنات
ام راشد ؛ طيب
ودخلت تطلع اغراض شريفه وبنتها لعزام اللي اخذهم للسياره ونزل معه راشد
اروى ؛ شريفه عطينا عنوده ترجع معنا
هاجر ؛ اي تكفين
شريفه ضحكت ؛ ترا لاحقتكم للبيت انا ماحنا طايرين وراكم وبتشبعون منها بالبيت
ام راشد ؛ ايه يلا الحين بنروح حنا وانتو تعالو شريفه يمه ترا اغراضك طلعتهم لعزام اخذهم لسيارته بنمشي حنا لأني تأخرت على البيت والعشاء للحين ماجهزته
شريفه ؛ خلاص روحو وانا ارجع مع عمتي وشموخه
اروى ؛ ياحضك ياشموخ طول الطريق تشوفينها
شموخ ضحكت ؛ اننن احسن
ام عزام ابتسمت ؛ بالبيت بتشوفينها طول الوقت ماعليك
ام راشد ؛ يلا يلا يابنات طلعنا
طلعو وركبوا للسياره ام راشد ومنيره واروى وهاجر مع ابو راشد وراشد متجهين للبيت
ام عزام ؛ روحي ياشموخ جيبي كرسي لشروفه
شموخ ؛ ابشري
طلعت ودخل عزام ؛ يلا جاهزين ؟
ام عزام ؛ اي بس راحت شموخ تجيب كرسي وتجي
وجت شموخ بالكرسي ؛ يلا يلا شروف اجلسي
عزام ضحك ؛ هيه زوجتي وبنتي ابيهم بتفحطين فيهم بالممر الحين
ام عزام وشريفه ؛ ههههههههههههههه
شموخ ضحكت ؛ شلون كشفتني
عزام ضحك ؛ اعرفك ماتعقلين
طلعو من المستشفى ومعهم شريفه وبنتها وحركوا متجهين لبيت ابو راشد
..........••..........
في بيت ابو هادي
بعد ماصلوا المغرب كانو جالسين بالصاله
ابو هادي ؛ اسمعوني يا عيال ، انا بكره ماشي للرياض ان شاء الله
حمد ؛ ليه
هادي ؛ لحالك ولا معك احد ؟
ابو هادي ؛ لا بروح انا لحالي اشوف محلات بشتريها واذا شريتها نروح كلنا هناك
ام هادي ؛ ان شاءالله وبلغنا اول ماتوصل
التفت ابو هادي على شهد اللي لاحظ انها تضايقت من الطاري ؛ ماودك نروح؟
ماردت شهد اللي مو معهم وتفكر كيف بتترك المدينه وهي كبرت فيها وكل اللي تحبهم فيها
ام هادي ابتسمت بضيق وهي عارفه ان شهد ماتبي تترك المدينه ؛ شهد ابوك يكلمك
شهد التفتت لهم ؛ هلا وش
ابو هادي ؛ اقول ماودك نترك المدينه صح ؟
شهد ؛ الصدق اي والله ماودي نتركها
حمد ؛ كلنا ماودنا بس الشغل هناك واهلنا هناك
هادي ؛ غريبه حمد مو زعلان عاد توقعت انت وشهد اكثر اثنين مايتركون المدينه
شهد ضحكت ؛ ماينلام المدينه كل شي حلو فيها
ابو هادي ؛ الرياض بعد حلوه وبتحبونها
ام هادي ؛ اي والله حلوه وتحبون الديره انتوا
ابو هادي ؛ بس هالديره اللي بشتغل فيها اول مره بتشوفونها وبتعجبكم بعد
حمد ؛ اذكر بالعيد اللي فات اخر مره رحنا
هادي ؛ اي بس من زمان قبل ٣ شهور
شهد ؛ اي حلوه بس ماتوقعت بنسكن فيها
ابو هادي ؛ مهي ديرة ابو صالح اللي بنسكن فيها " ديرة ابو صالح ديرة اهل ابو هادي وام هادي " لا ديره بجنبها ديرتنا مافيها شغل وعاد الديره اللي بنروح لها حلوه والله
ام هادي ؛ ايه وانا متأكده بتعجبكم تراها بجنب ديرة ابو صالح بس انها اوسع
ابو هادي ؛ اي والله
اشرت ام هادي لهادي وقام هادي يجيب الهديه اللي جابوها لحمد وشهد
ابو هادي انتبه ؛ الا ياحمد انت وشهد ماقلتو لي وش ودكم هدية تخرجكم
شهد بضحك ؛ كل شي منكم حلو ، اهم شي هديه
ضحك ابو هادي والتفت لحمد ؛ وانت وش ودك
قبل مايتكلم حمد دخل هادي ومد الكيس لأمه ؛ هذي هديتنا
ام هادي ؛ هذي يا شهوده لك مني و من ابوك وهادي
وهذي لك ياحمد مننا كلنا بعد
واخذو هداياهم يفتحونها وابتسمت شهد من الهديه ؛ يياحلوه يمه ماقصرتوا
" كانت سلسال ذهب ناعم بأسمها "
هادي ؛ اللعبب ماعرفناك وانتي مستحيه
ابو هادي ضحك ؛ وانت ياحمد اعجبتك هديتك؟
حمد وهو يفتح الاكياس ؛ وانا شفتها اصلاً مليون كيس عليها
ام هادي بأستغراب ؛ كيف اكياس ماغلفناها ، بعلبه هي
هادي كتم ضحكته ؛ يلا ياحمد بسرعه افتحهاا
ابو هادي أشر لهادي بمعنى وش
هادي ضحك ورفع كتوفه بمعنى مدري
حمد عصب ؛ ماايفتحح
انفجر هادي يضحك وام هادي عرفت ان هادي مغلفها بأكياس كثيره عشان مايفتح وضحكت من حركته وعصبية حمد
ابو هادي ؛ اشوف عطني افتحه
حمد ضحك ؛ خلاص هذا اخر كيس مخلصين تغليف المحل شك... هذا مفتاح وش ؟ " وفز يعتدل بصدمه " لحضه سياره هذي
ابو هادي ضحك ؛ ماشاءالله اشوف اي والله سياره
حمد بصدمه ؛ سياره؟ لي؟؟
شهد ؛ الله ، اي لك ياخبل
هادي ؛ ماتبيها عطني اخذها انا
حمد ؛ لا والله ماتاخذها حقتي
ام هادي ضحكت ؛ من زمان تبي هالسياره قال ابوك لو تخرجت يجيبها لك
حمد ؛ لو قلتو لي هالكلام كان تخرجت من زمان عشان تجيبونها لي
الكل ؛ ههههههههههههههههه
ام هادي وهي تقوم ؛ السياره تحت ورا العماره خلها بكره تشوفها وتاخذ لنا فره فيها الحين بروح اسوي العشاء
حمد وهو يلحقها للمطبخ ؛ طيب يمه
ام هادي ؛ ها
حمد ؛ انا اقول ما دام اني تخرجت وعندي سياره ، وبننتقل للرياض وماباقي لي الا الوظيفه.. شرايك اتزوج ؟
هادي من الصاله بضحك ؛ هههيهييييي وش وش سمعت انا ، تتزوج ياحمد ؟
حمد في المطبخ ؛ بسم الله اذنك وينها انت
ابو هادي بضحكه ؛ نسمعك ترا ، و من اللي تبي تتزوجها هذي
حمد وقف عند باب المطبخ وهو يتكتف ؛ محد محد انا اشاور امي وهي تخطب لي
شهد ؛ وتبي تتزوج قبل هادي؟
هادي ؛ هذي المصيبه واثق الاخو
حمد ؛ وانا وش اسوي فيك قالت لك امي وماتبي الحين
ابو هادي ؛ اي لأنه يبي يضبط اموره ماهو مثلك وانت تو تخرجت تبي تتزوج
حمد ؛ اخوياي كلهم تزوجو واللي خطب واللي ملّك
شهد صفقت بضحكه ؛ اهااا يعني عشان اخوياك تزوجو تبي زيهم لعبه هي ؟
حمد ؛ انتي يالورع سوالف كبار مالك فيها
ابو هادي ضحك ؛ والله انها اصحى من مخك ولا انت مع الخيل يا شقرا ، بعدين هذا مساعد تو تزوج ومسفر للحين وفهد ولد ابو سلطان وهو اكبر منك ماتزوج
حمد ؛ هذولا مايبون شيبوا انا بتزوج
هادي اشر له بخبث ؛ والله لو تطيييير شفت لو تطير ؟ماتزوجت قبلي يالورع
حمد رجع يدخل المطبخ ؛ انا مالي شغل امي وافقت صح يمه
ام هادي ؛ اي ابشر انت أشر عليها بس وانا اخطبها لك
حمد بطفش ؛ ييمه والله اني صادق ما..... وماكمل الا وأم هادي شغلت الخلاط وسحبت عليه
الكل من الصاله ؛ ههههههههههههههههههه
طلع حمد للصاله وهو يضحك من القهر ؛ ياخي والله شر البلية مايضحك صدق
هادي حذفه بعلبة المنديل ؛ خذ خذ مسح دميعاتك
ابو هادي بضحك ؛ خلاص خلاص لاتبكي بنزوجك
شهد ضحكت ؛ تكسر الخاطر والله
حمد ؛ اي اضحكو اضحكوا الحين وش فيها لو تزوجت الحين ؟
هادي ؛ الحين بعد ؟
حمد ؛ لا ياغبي يعني هالفتره بهالعمر
ابو هادي ؛ هذا انت قلتها بهالعمر يعني تشوف نفسك صغير على الزواج ، انت يالله اعتمد عليك تودي امك وشهد مشاويرهم تبيني أأمن عندك بنت الناس
حمد طفش منهم وانسدح يناظر التلفزيون ؛ خلاص مانبي نتزوج
شهد ؛ احسن لك حياة العزوبيه زينه
هادي ضرب كتفها بخفه ؛ شفت هذي الفاهمه
ابو هادي ؛ عطني عطني الريموت ياحمد
وكملو يتابعون وكل شوي يطقطقون على حمد
..........••..........
بيت ابو راشد
بعد ما جو تركي ونايف وعيال راشد من المزرعه دخلو للصاله بحكم ان مافيه احد فالبيت
تركي ؛ يا ولد شاحني ضاع ومالقيت شاحن
نايف ؛ شاحني بسيارتي خذ شاحن اروى ولا هاجر
تركي وهو يفتح باب غرفتهم ؛ مقفلينها الله والقراشيع اللي فيها وين المفتاح
نايف انسدح بالصاله وشاف الشاحن عند الكنب ونادى ؛ شف ذا يشحن نفس شاحن جوالك اشحن فيه
تركي جا وهو ياخذه ؛ ياخي خواتي فزعه يحطون اللي تبيه قبل لاتطلبه
نايف ضحك ؛ اخلص طيب والمغرب اذن وهم ماجو تأخرنا بالعشاء وهي ذبيحه كيف بتجهز الحين
تركي بضحكه ؛ ماعليك اهم شي حنا ما تأخرنا ولا كان حطو السبه علينا
نايف سمع صوت سياره ؛ نويصر شف الباب فيه احد
ناصر وقف عند باب الصاله ؛ لا محد... الا الا جدي وبابا جو
تركي فز ؛ نايف اركض اركض لايدخلون اهل عزام وحنا متسدحين هنا
قام نايف وطلع مع تركي للدوانيه
وقف تركي عن باب الدوانيه اللي دخل فيها ابو راشد وراشد ؛ عزام ماجا
ابو راشد ؛ الناس تسلم
تفشل تركي وقال هو ونايف ؛ السلام عليكم
ابو راشد وراشد ؛ وعليكم السلام
نايف ؛ اللحم في المطبخ بدخل لأمي ان كان اهل عزام ماوصلوا للحين
ابو راشد ؛ رح ماقدامك احد
راشد ؛ وخذ اميره ومناير لأمهم داخل
مسك يديهم نايف و سحب تركي ؛ تعال معي
تركي ؛ اصبر بحط جوالي بالشاحن واجيك
حط تركي جواله بالدوانيه بالشاحن اللي اخذه من الصاله وطلع ورا نايف للمطبخ
جوري ؛ بابا وين بنت عمه شريفه
راشد وهو يسحبها بحضنه ويجلس ؛ جايين بالطريق رحتوا للمزرعه ؟
ناصر ؛ اي وجبنا خروف والحين بنسويه
شوفو راشد ضحك ؛ اجل يلا خذ اختك وروحو داخل شوفو الخروف وهم يطبخونه
ابو راشد ؛ قم قم كلنا نروح نشوف الذبيحه دام اهل عزام ماجو للحين
قامو متوجهين للمطبخ
•
في المطبخ عند ام راشد وعيالها
تركي ؛ يمه احطه كله بالقدر
ام راشد ؛ مدري ابوك بيعزم احد ولا بس حنا
تركي ؛ لا بس حنا واهل عزام
ام راشد ؛ مدري شف اب... التفتت على صوت ابو راشد نادى ؛ ياولد
نايف ؛ سم يبه
ابو راشد ؛ ماركبتوه للحين ؟
ام راشد ؛ كله اطبخه ولا يكفي هذا ؟
ابو راشد وهو يطلع على جنب ؛ هذا اطبخوه وهذا للثلاجه
هاجر دخلت ؛ يويلي المطبخ علامه
نايف ؛ تنظفينه الحين وش شغلتك
هاجر ؛ تنظف معي انت
تركي ؛ لا والله انتي واروى تكفون
اروى دخلت بصينية القهوه ؛ نعم نعم والله يالأخو انا بغسل ذا الصينيه وبجدد القهوه
ام راشد ؛ خلاص مو من كثر الشغل عشان تتهاوشون عليه
ابو راشد ؛ يلا يلا تعاونو وخلصوه بدري
راشد ؛ اللحم يتأخر لين يستوي بس اكتمو ابوه ويستوي بساعه
تركي ؛ الله الله اكتمو ابوه على قولتك
هاجر ؛ صوت سياره وقفت جو جو اطلعو
اسرعوا يطلعون لبرا ومابقى بالمطبخ الا ام راشد وبناتها اللي طلعو للصاله يستقبلون البنوته اللي دخلت بحضن ام عزام وشموخ مع شريفه
هاجر ؛ نوور البيت والله
اروى ؛ يلااا يمه حطيها بحضنيي
شريفه ضحكت ؛ اصبرو بنجلس وخرو وخرو
شموخ ؛ ايه لو سمحتوا لاتطيحون زوجة اخوي وبنتها بعدو
اروى وهاجر ؛ اححلفي
الكل ؛ ههههههههههههههه
ام راشد ؛ تعالي اجلسي وانا امك هنا
ام عزام ؛ هاتي مهاد عنوده ياشموخ
" مهاد سرير اسفنج صغير للمولود "
شموخ ؛ هذا هو يمه
اخذته ام عزام وهي تحطه بجنب شريفه على الكنب
دخلت منيره مع بناتها ؛ السلام عليكم
الكل ؛ وعليكم السلام
جوري ركضت للعنود ؛ مامااا هذي العنود
منيره ضحكت ؛ اييوه هذي عنوده بنت عمه شريفه
شريفه ؛ ياعمريي جوجو هذي صديقتك العنود
جوري قربت وباستها وهي فرحانه ؛ حلللوه
شموخ بهمس لأروى ؛ اروى شاحني حطيته هنا ومالقيته بالله دوريه لي جوالي طافي
اروى ؛ كيف شكله
شموخ ضحكت ؛ ابيض و عليه مناكير لون وردي
اروى بضحكه ؛ اجل مايضيع دام عليه حقوق بجيب لك شاحني اذا لقيت شاحنك اجيبه لك
شموخ ؛ طيب
ام راشد ؛ هاجر اروى الحقوني للمطبخ نكمل العشاء
ام عزام ابتسمت ؛ ساعديهم ياشموخ
شموخ ؛ ابشري يمه
ابتسمت ام راشد وراحت للمطبخ ومعها البنات