ياديرةٍ ضمّت كل الأحباب

Part 29

ام عبدالرحمن ؛ انا اقول تخطبينها لتركي امس كل الحريم يعاينونها لاتروح منتس والله انها ماتتطوف
شموخ واروى ناظروا بعض بصدمه وجلطتهم ام راشد اللي قالت ؛ اي والله انك صدقتي اخاف تروح باخذها لتركي وان كانه مايبي اخذها لنايف
ام عبدالرحمن ؛ وامها صغيره والله وحلوه شكلها من المدينه وابو هادي من الرياض
ام راشد ؛ لا كلامها من الرياض وتقول اهلها هنا اكيد انها من الرياض هي ورجالها
ام عبدالرحمن ؛ والبنات ليه ماجو امس
ام راشد ؛ والله جينا من السوق الظهر وتعبوا وجينا انا وام عزام
ام عبدالرحمن ؛ الا وشلون الديره معتس يأم عزام احلا ولا الجبيل
ام عزام ضحكت ؛ لا والله الديره ماشاء الله الناس فيها على بعض الجبيل تطفشين شوي شكلي ببني لي بيت بنص الديره
ام عبدالرحمن ضحكت ؛ والله انتس صادقه انا يوم رحت الشرقيه طقت تسبدي مغير هالسيارات والبيوت مسكره وكاتمه على بعضها حطي لتس بيت هنا بهالبراد والهواء الونيس ونسير عليتس
ضحكوا وقالت ام عبدالرحمن ؛ ولدتس عيسى ماعنده جيه ؟
ام راشد ؛ ان شاء الله بيخلص دراسته قريب ويجي
ام عبد الرحمن ؛ ان شاء الله الله يوفقه
الكل ؛ اميين
وقامت شموخ للمطبخ ولحقتها اروى
تأففت شموخ وهي تشرب مويه وجت اروى اللي تناظرها بضحكه
شموخ ؛ الحين هي شدخلها تشتغل خطابه يعني !
اروى ضحكت ؛ عادي شكلها حلوه شهد ذي
شموخ ؛ اروووى ! خيير واذا حلوه عادي تنخطب لتركي
اروى جلست عند شموخ وهي تتكي ؛ والله عاد بعض الناس تتدلع نشوف شهد يمكن توافق بدون دلع
شموخ قرصتها وبعدت اروى ؛ اااهخ اممزح
شموخ بقهر ؛ اييه حتى انا امزح
اروى ؛ والله شوفي لو امي كلمت تركي عنها بيوافق عشان كذا انا اقول لو اقوله عنك بيرفض الدنيا وينتظرك بس شكلك مابتفهمين لحد مانعزمك على عرس تركي وشهد
شموخ شهقت ؛ ففال الله ولا فالك وجع وجعع
اروى انفجرت تضحك ؛ ياسلااااااممم ياسلاممم
شموخ تنهدت بتوتر ؛ وربي تقهرين
اروى رفعت كتوفها ؛ انتي بس لو تخليني اسوي اللي اقولك بيمشي كل شي تتمااام " وقالت وهي تطق على الدولاب " بس راسك مثل ذا
شموخ ؛ وانتي وش براسك ان شاء الله
اروى ؛ شي وربي ماتندمين عليه بس قولي تم
شموخ ؛ وشو يعني مثل وش ؟
اروى ؛ قولي تم ووالله ان كل شي بالسليم
شموخ ؛ تم بس وشو
اروى ؛ شطوره ، تشوفين ماتندمين صدقيني
شموخ ؛ قوليي طيبب
اروى ؛ تثقين فيني ؟
شموخ ؛ اي.. لا
اروى ضربتها ؛ سخيفه اسكتي بس اعلمك بعد شوي تعالي نشوف ام عبدالرحمن وش تقول
ورجعوا للمجلس يسمعون سوالف ام عبدالرحمن اللي مافيه شي ماتعرفه وكل شي تقوله
وبعد دقايق قامت ؛ وعاد بزورها الحين واشوف وش صار ببنتها يلا مع السلامه
ام راشد ؛ وسلمي لنا عليها .... اروى قدري دلال ام عبدالرحمن وحطيهم لها وهاتي الكيس اللي قلت لك
راحت اروى واخذت دلال القهوه والشاي حقات ام عبدالرحمن وفضتهم بدلال ثانيه وغسلتهم ورجعتهم بسلتها وجابت الكيس حق ام عبدالرحمن
ام راشد مدت لها الكيس ؛ هذا يوخيتي قماش جبته لك انتي وهيلا وهذي هدية مرت عبدالرحمن وصليها لها وسلمي لنا عليها
ام عبدالرحمن ؛ يوووه الله يصلحتس ليه مكلفةٍ على عمرتس والله انتس ماتقصرين
ام راشد ؛ لا والله لاكلافه ولا شي وتستاهلين اكثر
ام ابدالرحمن ؛ ماقصرتي وودعناكم الله وسيروا علي
ام راشد وهي توصلها للباب ؛ ان شاء الله مع السلامه
وطلعت ام عبدالرحمن وهيلا ورجعت ام راشد تجلس
اروى ؛ يمه بروح البقاله
ام راشد ؛ امس رايحين وشوله تروحين الحين
اروى وهي تمثل الزعل ؛ يمه ضايق خلقي بطلع امشي واجي بسرعه
ام راشد ؛ لاتدخلين السوق للبقاله بس وتعالي على طول وجيبي رز وسجليه على حساب ابوك
اروى ؛ ابشري
وقامت تلبس عبايتها بسرعه عشان تروح تسوي اللي الفكره اللي براسها
ام راشد التفتت لأم عزام والبنات ؛ والله مدري وش مزعلها اليوم اخلاقها ماش
عبير ؛ ايه متضايقه ماعليها خليها تطلع تتونس وترجع
ورجعوا يسولفون
..........••..........
بالسوق في محل ابو راشد
كان تركي وعبدالسلام وعمران يبيعون وابو راشد قايل لتركي يروح للمحل عشان يتعلم فيه وكان تركي مشغول مع الزباين هو والعمال
ودخلت اروى اللي وقفت عند الطاوله وهي تنادي ؛ تركي
تركي التفت بأستغراب ؛ اروى ؟
اروى ؛ ايه ابيك شوي
تركي ؛ وش فيه ؟
اروى ؛ لا تعال برا هنا زحمه مالي خلق
تركي ؛ مقدر مافيه الا العمال
اروى ؛ ايه ويكفون ابيك دقايق بس ضرورييي
تركي استغرب وهو يلتفت ؛ عبدالسلام تعال عند المحاسب انا شوي واجي
وجا عبد السلام واستلم محله وعمران يعبي للزباين
اروى وهي تسحب تركي ؛ تعال برا برا
تركي ؛ ويين يابنت وش صاير جايه لحالك ؟
اروى ؛ ايييه جايه لحالي وقلت لأمي اني ابي البقاله مقدر اتأخر اخلص
ومشى تركي وراها وطلعوا برا السوق وهي مكمله تمشي لورا السوق من برا لحد ماوقفها تركي ؛ انتي وين رايحه الشارع ورانا !
اروى ؛ بنجلس ورا والله سالفه ضروريه
تركي مشى وراها ووقفت اروى عند جلسه من السوق من برا وجلست على هالجلسه اللي من حجر وطين وتنهدت وهي تأشر لتركي ؛ اجلس بكلمك
تركي جلس ؛ ترا ماني رايق لخبالك تضيعين وقتي على الفاضي
اروى ؛ لا والله بقولك شي محد يدري فيه
تركي حس بجديتها بالكلام واعتدل بأنتباه ؛ وشو ؟
اروى ؛ ولو انك اول شي بتزعل مني بتهاوش يمكن بس بعدها متأكده انك بتستانس
تركي هز راسه وهو يناظرها بمعنى " وش "
اروى ؛ عن سالفتك مع شش.. شموخ
تركي رجع راسه لورا بصدمه ؛ كييف !
اروى وهي تتكلم بسرعه ؛ تركي والله اني ادري انك تحبها وادري انك اليوم كلمت امي سمعتتك
تركي سكت وهو يناظرها بأستيعاب وكملت اروى بخوف ؛ سمعتك الصباح وانا كنت حاسه انك تحب شموخ واذكر لما شفتها بالدوانيه وكانت معي وقالت لي عن لما كلمتها بالمزرعه واليوم تأكدت انك تحبها بس لما قالت لك امي انها مخطوبه شفت وجهك لما تضايقت وصوتك ترا سمعتك وشفتك لما جيت للمطبخ وكنت ابكي ترا ماكان من السكين ابكي لأني زعلانه انك تحب وحده ماتقدر تاخذها
تركي بصدمه ؛ اررروى !
اروى قاطعته ؛ اسمعني تكفى .. انت تحسب انها بتروح منك وماتدري ان خطبتها لولد عمها وصيه من جدها ولا هي ماتبيه ماتحبه ولا تطيق اهله مجبوره انها تاخذه عشان ابوها الله يرحمه وافق على خطبتها ووصاها تاخذ ولد عمها وهي وافقت عشان ابوها وجدها لايزعلون من بعض سالفه طويله ياتركي بس والله انها حتتى هي تحببك.. تحبك ياتركي والله بس ماتدري كيف ترفض ولد عمها تخاف تكسر كلمة ابوها ع.....
قاطعها تركي اللي كان طول ماهو يسمعها يحس انه بحلم ماهو مصدق ان حتى هي تبيه وتحبه حس ان الجبال اللي على قلبه انهدت هم الدنيا وانزاح حضن اروى من كل قلبه وهو يرجف من فرحته ؛ اروى اررروى ! تكفين لاتكذبين علي قولي انك صادقه تكفين
اروى اللي خافت بس ضحكت وهي تحس بفرحته وحضنته ؛ والله اني صادقه هي تحبك بس تخاف ماتاخذك عشان ابوها
تركي سكت وبعد وهو يناظرها ؛ ماتاخذه ماتاخذه والله وابوها لو حي ماغصبها ليه هي مارفضت من قبل ليه ماقالت له ماتبيه !
اروى ؛ قلت لك سالفه طويله وانا تأخرت بس ان الأكيد انها ماوافقت على حياة ابوها الا عشان لايتفرقون ابوها وجدها ، ولما مات ابوها وجدها عمها تغير هو واهله وهي ماعادت تبيهم
تركي ؛ وش دراك انها تحبني ؟
اروى ؛ هي قالت
تركي ابتسم ؛ قولي والله
اروى ؛ يبن الحلال والله بعضمة لسانها قالت لو بختار بين زايد اللي هو ولد عمها وبين تركي بتختار تركي يعني وش ؟؟
تركي تنهد ؛ خليها ترفضه والله انا ابيها باخذها انا
اروى ؛ والله حتى انا ابيك تاخذها تهبل وانت تعرف
تركي ضربها بخفه ؛ اعرف بس بالغلط عرفت
اروى وهي تقوم ؛ ايه ايه ماعليك انا اللي ادري بروح البقاله اخذ رز وارجع والله لتذبحني امي تأخرت
تركي ؛ عادي حتى انا بيجلدني ابوي بس فدا
اروى ؛ اقول بس لحد يدري عن الكلام اللي قلت لك وربي يذبحوني يويلك ياتركي ترا بقول لها مايبيك لو احد درا
تركي بصدمه ؛ نعنبوا بليسك لا والله ما اقول لحد بس لاتنكبيني
اروى ؛ خلاص لاتخون ما اخون يلا مع السلامه
وراحت مسرعه للبقاله وتركي حس ان الدنيا كلها ماتوسع فرحته بهاللحضه ماتوقع ابداً ان اروى تفزع له بمثل هالفزعه وجلس يفكر لما بكت عشانه اليوم وهنا صدق صار اكثر واحد يحبها بهالدنيا
ورجع يدخل للسوق من الباب اللي ورا ويكمل لأول السوق عند محلهم ووصل وهو يدخل ويشتغل من قلبب
•
دخلت اروى للبقاله ؛ سلام ياعم عطني رز
مرزوق ؛ هلا وعليكم السلام ، ابشري
وجاب لها الرز وركضت للثلاجه اخذت مويه وهي ترجع عند الطاوله ؛ اا عطني بطاطس كريك كراك كيس وبسكوت
مرزوق جابه لها ؛ هذا هو يبنيتي غيره شي ؟
اروى ؛ لا ياعم بس وسجله على حساب ابو راشد
مرزوق ؛ ان شاءالله
وطلعت اروى وهي شايله الأغراض ووقفت على جنب وهي تشرب مويه وكملت مشي بسرعه للبيت
..........••..........
برا الديره
بسوق الزل كان ابو هادي وعياله ومعهم مساعد يتفرجون عليه
ابو هادي ؛ والله ماشاء الله عليهم حلو سوقهم
مساعد ؛ ايه السوق كله للسجاد والتفصيل والجاهز
ابو هادي ؛ بس اخاف مانستفيد من المحل داخل السوق وهذا ماشاء الله كبير
مساعد ؛ لا يبن الحلال هذا بعيد عنهم انت حط محلك داخل سوقهم ويصير اقرب
ابو هادي ؛ اجل بدور عمال يفصلون وافتح المحل شكل الشغله توها
مساعد ضحك ؛ ماعليه تتأخر بس بتكسب ان شاء الله
ابو هادي ؛ ان شاء الله نطلع ؟
مساعد ؛ ايه خلاص شفنا السوق كله
هادي ؛ وخلاص للحين على السجاد ماغيرت ؟
ابو هادي ؛ لا ماغيرت خلنا نشوف يمكن يمشي
حمد ؛ اجل يلا نطلع دام خلصنا
وطلعوا بعد ماشافوا سوق الزل وبضاعته
وركب ابو هادي هو ومساعد اللي جا معه وهادي وحمد معهم
مساعد ؛ ماقلت لعمي راجح واهلك انكم جيتوا
ابو هادي ؛ لا والله اني انشغلت ولا ودي اشغلهم بس يمكن بكره الصباح نروح لهم
هز راسه مساعد وطلعوا من سوق الزل راجعين للديره
..........••..........
بالديره بمزرعة ابو راشد
كان مشغول مع العامل بالغنم والعيال راشد وسعد وعزام عند الزرع ومعهم عبدالله وناصر اللي رجع مع ابوه
سعد وهو ينادي ؛ عبدالله لاتروح عند النخل تعال انت وناصر
عبدالله ؛ بنشوف النياق
راشد ؛ اوهووه الحين تهبدهم النياق امشوا نشوفهم
وراحو للنياق ورا النخل وناصر وعبدالله يلعبون عندهم
راشد ؛ تبي تركب انت وعبدالله ؟
ناصر ؛ ايه انا بركب الجمل هذا
عبدالله ؛ وانا بعده
سعد ؛ انت اركب الحاشي الصغير هذا
عبدالله ؛ لا ابي هذا
وضحك راشد وهو يشيل ناصر وركبه على الجمل وشال عبدالله وركبه وراه ؛ كذا تعادلتوا لاتطيحون امسكوا الحبل زين
عزام بمزح ؛ ماشاء الله عليكم ماتخافون ؟
ناصر ؛ لا انا قوي
عبدالله ؛ حتى انا
ضحكوا وجا ابو راشد ؛ ماشاء الله من هاللي راكبين
راشد ضحك ؛ ناصر وخويه عبدالله ماشاء الله عليهم
ابو راشد ؛ انتبه لايطيحون ، يلا مشينا ؟
راشد ؛ خلصتوا من شبوك الغنم ؟
ابو راشد ؛ ايه ماركبوها زين بغت تطيح من الهواء
سعد ؛ والنياق ماتحطها بشبك ؟
ابو راشد ؛ لا ماتروح قريب ، بس الغنم تاكلها الكلاب
راشد ؛ يلا ناصر انزلوا
ناصر مد يده لأبوه وهو ينزل ونزل بعده عبدالله
ابو راشد ؛ نايف ماجا ؟
عزام ؛ لا جينا وهو مع تركي يمكن راح معه للمحل
ابو راشد ؛ يمكن ، " وقال وهو يناظر الجو " شكلها بتمطر
سعد ؛ ان شاءالله والله يازين المطر
ابو راشد ؛ اي والله ، اشوا اني خلصت من الغنم اليوم
ناصر شهق ؛ عبدالله شف
عبدالله ؛ ممطططر
ابو راشد ضحك ؛ اي والله امطرت
وناصر وعبدالله ركضوا وهم يلعبون ويغنون الأغنيه اللي كانوا يغنونها كل ماجاهم مطر ؛ المطر جانا رش معزانا كثر الزبده في معشّانا ، ويضحكون وهم يغنونها
راشد ابتسم وهو يناظرهم ؛ الله يجعلها امطار خير وبركه والله من زمان عن المطر وريحة المطر
ابو راشد ؛ ايييه عز الله يلا يلا البيت لايصردنا المطر
وراحو بسرعه للسياره وركبوا وحركوا للبيت
..........••..........
بيت ابو هادي
فتحت شهد شباك المطبخ من سمعت صوت الطق على الشباك وشهقت ؛ ييمه مطر
ام هادي قربت ؛ بالله ، يا ماشاء الله اي والله مطر
شهد ؛ الله يمه يازين الامطار بطلع الحوشش
ام هادي ضحكت ؛ حتى انا والله بطلع امشي امشي
وطلعوا من المطبخ ليمين الممر اللي كان باب على الحوش وفتحت شهد الباب ؛ الله ياريييحة المطر
ام هادي ؛ تعالي عند المظله لايبلنا المويا
وركضوا لجلسة الحوش اللي كان مغطيه من فوق وهم يناظرون المطر
شهد ؛ يا الله يايمه اذا هذا الشتاء فيهاا
ام هادي ؛ شكله والله لأن الجو براد حتى بالظهر
شهد ابتسمت وهي تتأمله وتصوره
ووصلوا ابو هادي وهادي وحمد للبيت والمطر بللهم ومن فتحوا الباب وركض حمد بالممر عشان يدخل بسرعه وهو يزحلق
هادي انفجر يضحك ؛ اسسسلممم ههههههههههههههه
ابو هادي ضحك وهو يسنده ؛ بسم الله بسم الله جاك شي
حمد ؛ اووه يظهري الماء بارد
ضحكوا وهو يقومونه وكلهم مغرقهم المطر
ودخل حمد للصاله وقبل يجلس مسكه هادي ؛ ييويلك بتجلس على الكنب وانت غرقان عشان تصفقك امي رح بدل بس
حمد ؛ يخوي تكسرت
هادي ؛ بتتكسر زياده ان عدمت الكنب
وابو هادي وقف بالممر وهو يشوف باب الحوش مفتوح ؛ طالعين بالحوش تعالوا نشوفهم
وجو معه هادي وحمد وطلعوا للحوش عند ام هادي وشهد وقربوا وهم يقفون تحت المظله
ام هادي ضحكت ؛ مغرقكم المطر
ابو هادي ضحك ؛ زلق حمد والظاهر تكسر
ضحكت شهد وهي تشوف ثوبه مبلول ؛ كيف الطيحه
هادي ضحك ؛ لا لا ماعليه كلها نجمتين شافهم
ضحكوا وجلس حمد على الكرسي وهو يناظر معهم المطر والجو اللي كان غييم
..........••..........
قبل دقايق ببيت ابو راشد
كانوا بالصاله على التلفزيون وهاجر واروى وشموخ بالمطبخ يسوون بسبوسه وسمعت اروى صوت مطر
وهي تفتح الشباك ؛ هيييه تمطرر
قربوا هاجر وشموخ وهم يناظرون الشباك والارض كلها مويه
شموخ ؛ الله بطلع بططللع
اروى ؛ امشوا الحوش يلا يلااا
وطلعوا من المطبخ ركض وفتحوا باب الصاله اللي على الحوش
ام راشد ؛ ويين ؟
طلعوا هاجر واروى وقالت شموخ وهي تاخذ طرحتها ؛ مطر مطر
ام راشد قامت وهي تطلع معهم وام عزام وراها
وعبير وشريفه داهمتهم ريحة المطر من فتحوا الباب
شريفه ؛ الله يالممطر ياربييي
عبير قامت ؛ ببطلع اشوف
وطلعوا للحوش واروى تركض وتلعب شموخ وهاجر يضحكون وام راشد وام عزام معهم وعبير
وطلع نايف على الصوت وهو يوقف عند باب الدوانيه وشاف اروى اللي تدور وترقص ؛ ارووى
اروى التفتت ؛ مطر يانايففف
نايف ابتسم ؛ ايه لاتطيحين
اروى ؛ لا ماعليك
ورجعت شموخ عشان لايجي وتطلع بوجهه ووقفت عند باب الصاله ودخلوا ابو راشد والعيال وقال نايف ؛ ارروى ادخخلي العيال جو
وعرفت اروى انه يقصد سعد وعزام وركضت تدخل وبغت تطيح على بلاط مدخل باب الصاله وتمسكت بهاجر وهاجر بعبير اللي ضحكت وهي تمسكهم
ام راشد ضحكت ؛ يويلي لاينفلق راسك تعالي تعالي
ام عزام بضحك ؛ ما الومها يزين المطر
ضحكوا وهم يدخلون للصاله وشريفه واقفه ببنتها تناظر مع الشباك وتضحك عليهم
بالدوانيه دخل ابو راشد والعيال معه وقال
ابو راشد ؛ نايم ؟
نايف ؛ اي والله تو قمت على المطر
ابو راشد ؛ وتركي بالمحل ولا وينه ؟
نايف ؛ ايه راح للمحل ونمت انا
راشد ؛ يجي الحين مايصبر عن المطر
ابو راشد ؛ ايه استغربت انه ماجا
..........••..........
بالسوق عند تركي
بالمحل كان يسمع المطر اللي يضرب بسقف السوق وابتسم وهو يطلع مع اغلب الناس اللي طلعوا يشوفونه وطلع والأرض مويه ولون العشب زاد خضاره من مويه المطر والجو ضباب وغيم وهوا بارد تنهد وهو يوقف تحت المطر ويرفع يديه ؛ ياجعلها ترحب يا امطار المحاسن
وابتسم وهو يشوف البزارين يركضون ويلعبون والناس تمشي مستعجله لبيوتها وسكرت بعض المحلات عشان يطلعون ويسكر السوق عشان لايبله المطر
ورجع يدخل للسوق وهو يشوف عمران وعبدالسلام بيسكرونه ؛ يلا بنسكر بس هات جوالي ياعمران
اخذه عمران من الطاوله وهو يمده لتركي وسكروا المحل وطلعوا للمزرعه وتركي ركب سيارته وهو يفتح الشباك ويحرك للبيت ويتأمل الامطار من شباكه وقال من حس ان فيه شي يمثل اللحضه الحين ؛
(يامطر ياساقي الأرض وضماها
امطر على قلبي من شوق المحبين
مثل مايوصل للأرض من سماها
يقرب لي حبيبٍ يسوا هالورد والبساتين )
ووقف بعد دقايق عند البيت وهو ينزل للدوانيه ودخل ؛ سلام علييكم
الكل ؛ وعلييكم السلام
ابو راشد ؛ سكرتوا المحل
تركي جلس ؛ اييه سكرناه والناس راحت لبيوتها
نايف ؛ بررد برد
راشد ؛ اي والله مافيه حطب ؟
ابو راشد ؛ بالمخزن هاتوه خلونا نشب نار بالمشب
تركي قام ؛ يلا ياعيال نروح نجيبه قومٍ تعاونوا ماذلوا
ابو راشد ضحك ؛ لاجاهم المطر ما ابتلوا
ضحكوا وطلعوا يجيبون الحطب من المخزن اللي برا البيت من ورا ودخلوا ياخذون منه للي يكفي شبتهم
واخذ كل واحد حزمة حطب وركضوا لداخل الدوانيه
نايف ؛ يلا حطوه بنشبه ونتدفى جمدنا
وحطوه بمشب الدوانيه وشبوا نارهم وجلسوا حولها
•
عند البنات داخل
جالسين بالصاله ام راشد وام عزام وشريفه وعبير ، وهاجر واروى وشموخ بالمطبخ وطلعت هاجر بالقهوه واروى وشموخ يجهزون البسبوسه
اروى ؛ بنقطعها ونحط لنا وللعيال بصحون
شموخ ؛ تمام ، تسوون لهم قهوه ولا عندهم ؟
اروى ابتسمت ؛ لا هذي قهوتهم والشاهي بس نحط لهم بسبوسه ويجي تركي ياخذهم
شموخ ابتسمت وهي توزعها بالصحون واروى جهزت صينية القهوه حقت العيال وحطت فيها الصحون ؛ الله الله ببسس ريحتها وشكلها يجنن عاد كيف الطعم
شموخ ضحكت ؛ بتعجبك
اروى اخذت جوالها وهي تدق على تركي ورد بسرعه ؛ هلا
اروى ؛ تعال خذ قهوتكم
تركي ؛ يلا جاي
وقفل واخذت اروى الصينيه وهي توقف عن الباب ؛ بيجي تركي اسبقيني للصاله واجيكم
شموخ هزت راسها واخذت حقتهم وطلعت للصاله وفتحت اروى الباب وهي تشوف تركي جاي
تركي ؛ الله مسويه بسبوسه
اروى ابتسمت ؛ مو انا مسويتها
تركي ابتسم ؛ من ؟
اروى ؛ انا وهاجر سوينا القهوه والشاهي وعاد البسبوسه سوتها " وقالت بهمس وهي تضحك " شموخ
تركي ضحك وهو ياخذ الصينيه ؛ اييه يسسلام
ضحكت اروى وهي ترجع تدخل وتركي راح للدوانيه وطلعت اروى للصاله وهي تجلس عندهم ويتقهوون
وبالدوانيه دخل تركي وهو مبتسم وحط الصينيه وهو يقهويهم ويحط لهم من البسبوسه ونايف رغم انه استغرب من ابتسامته الا انه ارتاح ويحسب انه نسى السالفه وماعاد يفكر بشموخ

•
•
تفاعلوا 🤍

▪️ملاحظه بسيطه " القصايد بهالروايه راح اكون انا كاتبتها ولو اضطريت اكتب قصيده منقوله راح تكون عندها هالعلامه ~ اما لو ماعندها علامه ف انا كاتبتها ❤.