ياديرةٍ ضمّت كل الأحباب

Part 45

..........••..........
من بكره الفجر
في بيت ابو هادي
قبل الآذان صحت شهد على صوت شي يضرب على الشباك بقوه وقامت وهي تسمع صوت مطر وفتحت الشباك وشهقت من المطر اللي رش على وجهها وشافت الأرض اللي كلها امتلت ومبين له وقت يمطر وفزت بخوف من صوت الرعد وهي تسكر الشباك وشغلت النور وهي تطلع من الغرفه وشافت ابو هادي اللي واقف عند الشباك حق الصاله ؛ يبه من متى تمطر ؟
ابو هادي ناظرها وابتسم ؛ مدري والله بس من زمان الارض ماشاء الله امتلت
شهد قربت عنده وهي تناظر مع الشباك اللي على ممر باب العماره والمويه ملت الأرض وقال ابو هادي ؛ صحيتي على صوته انتي ؟
شهد هزت راسها وطلعت ام هادي وضحكت ؛ تشوفون المطر ماشاء الله يهبل
ابو هادي ؛ اي والله الله يجعلها امطار خير وبركه
ورجعت شهد للغرفه وجلست على السرير لثواني وانسدحت وغفت
•
بعد ساعه طلع ابو هادي والعيال يصلون وفتح ابو هادي الباب وهو يشوف المويه ملت الممر وقال حمد ؛ هذا نتعداه سباحه ماشاء الله
ابو هادي ضحك ؛ اطلعوا اطلعوا سرعه
ورفعوا ثيابهم وطلعوا وسكر ابو هادي الباب ومشوا بالممر لباب العماره وكان كله مويه وفتحوا الباب وقال هادي وهو يناظر السماء ؛ ييوه ماشاء الله برق بعد
ابو هادي وهو يمشي مع العيال للمسجد ؛ ايه شكل اليوم امطار
حمد ؛ والله برد برد
ابو هادي ؛ ليه ما اخذت فروتك
حمد ؛ لبست شتوي وطلع مايكفي بعد
هادي ؛ ندخل وتدفى
ومشوا وهم رافعين ثيابهم بحكم ان الارض كلها مويه ودخلوا للمسجد بعد دقايق وفيه ابو راشد وراشد وسعد وناصر وعبدالله
وجلس ابو هادي عندهم ؛ صبحهم بالخيير
ابو راشد والعيال ؛ صباح النور
ابو راشد بأبتسامه ؛ وصباح الامطار والاجواء الزينه
ابو هادي ضحك ؛ اي والله ماشاءالله من متى تمطر؟
ابو راشد ؛ من الساعه ١
ابو هادي ابتسم ؛ ماشاء الله
راشد ؛ يقولون اليوم ماشاء الله كله مطر
ابو هادي ؛ ان شاء الله
ودخلوا نايف وتركي سلموا عليهم وبعد دقايق كبر الأمام للصلاه
..........••..........
بيت ابو راشد
الساعه 9 الصباح
كان الغيم مغطي الشمس والجو بارد وضباب ورش مطر خفيف
كانت اروى وهاجر بالحوش وابو راشد وراشد وسعد بالمزرعه
والباقين كلهم داخل
اروى ضحكت هي تدور ؛ يازييين الجوو
هاجر رفعت يدينها ؛ تمطر للحين ياربيي يالغيووم
وطلع تركي ووقف عند الباب وهو يصفق بيدينه ؛ نعنبوا بليسكم برد
اروى ؛ تعال شف الجو بس والله لو ازكم شهر قدام راضيه
تركي ضحك وهو يمشي لها ؛ لا بعيد الشر
ومشت اروى وهي تناظر الزرايع والتفتت على هاجر اللي شهقت بضحك ؛ وااو تعالي شوفيي
ومشت اروى وجا معها تركي وهو يضحك من شاف الممر اللي كان بلاط مليان مويه وسمع نايف اللي نادى ؛ تركي
تركي ؛ هاا بالسيب تعال
وجا نايف وهو حاط فروته على راسه ؛ يااوك برد
هاجر ؛ هذا وانتوا لابسين فروه وانا واروى جلال خفيف
اروى ؛ الحين يعرفون البرد صدق
واخذت من المويه اللي بالأرض وهي ترش عليهم ولحقتها هاجر ترش معها وتركي ردها لهم وركض نايف وهو يخبص عليهم المويه ويرشهم وبدوا يرشون على بعض وهم يضحكون واخر شي انحاشت منهم اروى من اتفقوا عليها كلهم وهي تركض بالممر وتصارخ بضحك ودخلت بسرعه من باب المطبخ وهي تسكره وراها وضحكوا ودق نايف بضحك ؛ اهب افتحي
اروى من داخل وهي تلقط نفس ؛ مافيه قلبتوا علي موتوا برد
تركي ضحك ؛ جايينك من الباب الثاني هيين
وبثواني ركضوا من جهة الدوانية يسار للحوش ودخلوا من باب الصاله اللي عليه وهم يكتمون ضحكتهم من شافوا ام راشد تهاوش اروى ؛ تبين تمرضين انتي ! محد يطلع بهالبرد
وناظرت تركي ونايف وهاجر اللي مثلها الماء مغرقهم وثيابهم مبلوله وقالت اروى بقهر ؛ هم رشوني وهاجر اللي خلتهم
نايف ؛ هي اول من بدا
ام راشد ؛ وانتوا بعد للحين مارحتوا للمحل ؟
تركي ؛ مافيه احد السوق محد طالع من بيته
نايف ؛ وان كان فيه ماهم واجد
ام راشد ؛ وان كان محد طالع من بيته ليه تطلعون
تركي ضحك وهو يجلس عند الدفايه ؛ حنا ببيتنا ماطلعنا
ناصر التفت له وهو كان على التلفزيون مع عبدالله والصغار ؛ اذا رحتوا المزرعه خذونا ابوي يقول تجون معهم
نايف بهمس وهو يضحك ؛ يصرفكم ، ابك اطحس اطحس انت بتدفى ليتني ماطلعت وراك
تركي وسع له مكان وجلس وتكى تركي على فخذ نايف وهو يتدفى معه
عبير بضحك ؛ والله بغيت اطلع بس هاوشتني امي
ام راشد ؛ تمرضون والله اللي يطلع بهالبرد مايعيّن خير
هاجر ؛ يايمه عيّني خير انتي دامنا متدفين مايصيبنا البرد ان شاء الله
اروى جلست وهي تاخذ كوب ؛ ايييه وحليب حار ونتدفى صدق
..........••..........
بيت ابو هادي
قبل نص ساعه
طلعت شهد من غرفتها وهي لابسه عبايتها وطرحتها ونقابها ولافه عليها شال ابيض شتوي وشافتها ام هادي وقالت بأستغراب ؛ وين وين ؟
شهد ؛ يممه تكفين شفت الجو يهبل بروح السطح وهذا انا لابسه عباتي عشان لو طلع جارنا
ام هادي ؛ ييويلي للسطح بعد واذا جا برق وهو كله كهرب مهبوله انتي ؟
شهد ؛ مافيه برق بس مطر خفيف تكفين بطلع محد مطلعني ابوي وهادي وحمد كلهم مشغولين بالمحل
ام هادي ؛ اذا جو اخليهم يطلعونك الحين لا
شهد بقهر وهي بتبكي ؛ يممه
ام هادي ؛ وششو مجنونه انتي ؟
شهد ؛ خلاص بالسيب بس
ام هادي سكتت لثواني ؛ خلاص بس لاتروحين السطح مو اطلع وما القاك !
شهد هزت راسها وهي تطلع وتسكر الباب ومشت بالممر شوي وهي تناظر باب الدرج يسارها ورجعت ناظرت باب البيت من داخل وهي تركض بسرعه وطلعت للدرج وهي تروح للدور الثالث وفتحت باب السطح وهي تضحك بتوتر وقرت المعوذات وهي تثبت الباب عشان لايقفل وناظرت المويه اللي ملته ومشت بشويش وهي تعدي على حجر وشهقت بذهول من منظر الديره اللي كانت مبينه كلها واللي صدمها جمال خضارها والزرع ولونه مع المطر اللي ملى الأرض والبيوت وناظرتها من كل الجهات وهي تتلفت ورا عمارتهم ماكان فيه بيوت بس تشوف وراها وبالجهه اليسار نخل بعييد ومزارع وناظرت يمين العماره كانت فيه بيوت بعيده شوي ووراها بمسافه كبيره كانت تشوف سقف السوق من بعيد والبقاله وكم محل حولها ولمقابل العماره على الجهه اليمين تشوف المسجد وبجنبه بيوت ومن بينهم بيت ابو راشد اللي كان مقابل عمارتهم وقالت وهي تتأمل ؛ ماشاء الله طلع كبيير !
كان حوش كببيير وبيت ابو راشد بوسط هالحوش وممر طويل على كل جهه من البيت وورا لقسم راشد ومقابله بالجهه اليمين ممر يساره باب المطبخ اللي برا ومقابله باب الشارع ويمين باب الشارع باب الدوانيه وحمامها وبعد الدوانيه برضوا ممر للحوش وبابه الكبير ماعرفت الا هو اما الابواب والممرات الباقيه ماعرفت وش تكون لأنها ماشافت بيتهم الا من داخل
وحاولت تناظر الجهه الثانيه من الحوش واللي كانت يمين الباب الكبير بس ماقدرت تشوفها بس تشوف سقف الدكه اللي كان من سعف وطرف الحوش من النص وبابه الكبير تشوفه بوضوح الباقي ماكان مبين من الجدران
وابتسمت من شافت اروى مشت بالممر اللي على البيت من ورا وجت هاجر وراها وشافتهم يرشون بالمويه وبعدها شافت العيال ركضوا يرشون عليهم وهي تضحك ماتعرف اخوانهم لاكن ناظرت نايف وهي تتذكر لما جا يسلم على ابوها وهادي وحمد اول لاجو للعماره وناظرت تركي وماكان نفس اللي جا مع نايف وقتها وماعرفته وضحكت من شافت اروى ركضت وهم يرشونها وفتحت باب وهي تدخل وتقفله وراها انفجرت تضحك ؛ ياربييي يازين ذا البنت !
وشافتهم يطقون ويتكلمون ماكانت تسمعهم وبعدها ركضوا لأخر الممر يسار وماقدرت تشوف اكثر وتحاول بس مو مبين من الجدران وانتظرت اروى تطلع وهي تضحك واستغربت من تأخرت وهي ترجع تناظر بالديره وهي عارفه مايشوفونها لأنها هي يادوب تشوفهم والسطح بعيد مستحيل يشوفون اللي عليه وتنهدت وهي تتأمل الجو لدقايق والبيوت والمحلات ومن حست بالمطر زاد مشت بسرعه وطلعت من السطح وهي تسكر الباب ونزلت من الدور الثالث والثاني وهي تمشي بالممر ودخلت للبيت وناظرتها ام هادي ؛ ها شفتي الجو
شهد ضحكت بوهقه ؛ ااي شفته يجنن يمه بس جا مطر زياده ودخلت
وابتسمت ام هادي وهي تهز راسها وراحت شهد لغرفتها تبدل
..........••..........
سوق المحاسن
بمحل ابو هادي
كان مستند على الباب وهو يفكر وحمد وهادي جالسين على طاوله وقال هادي ؛ مايمدي صدقني مطر وين يجون بالفرش يمتلي ماء
ابو هادي ؛ والمشكله اذا جا مطر يصير السوق مافيه احد شف بس اصحاب المحلات وكم واحد
هادي ؛ يجون اذا خف بس اهم شي ماتجيبه اليوم والدنيا مطر
حمد ؛ خلها بكره الحين شف عمال ولا تخليهم بعدين ونجرب حنا اول شي ؟
ابو هادي رفع كتوفه ؛ مدري ماعرف للفرشات واجد
هادي ؛ والله حتى انا هات عامل واحد يعرف له وبعدين عاد نشوف اما نتعلم منه ولا نجيب غيره
ابو هادي ضحك ؛ ايه ترا لوحة المحل كلمت واحد يسويها
حمد ناظره بأستغراب ؛ وش اخترت له اسم ؟
ابو هادي اعتدل بضحك ؛ شف عاد اقول بس لاتزعل حنا وش اسم الحي حقنا اول بالمدينه ؟
حمد عقد حواجبه ؛ ليه ازعل ؟ ، حي الهدى
ابو هادي ابتسم ؛ اييه عاد انا قلت الهدى اكيد حمد بيقول سحبت على اسمي قريب لهادي
هادي ناظرهم بأستغراب وقال حمد بضحك ؛ لا ماقلته يوم اخترت الحي اول
ابو هادي بأبتسامه ؛ المحل خليت اسمه مفروشات الهدى
هادي رفع حاجبه بأبتسامه خفيفه ؛ غريبه اخترته على اسم الحي
حمد وهو يمثل الزعل ؛ اييه يعني صح فيه من اسم هادي وانا كالعاده بالهامش
ابو هادي ضحك ودقه هادي بمزح وابتسم حمد ؛ لا امزح والله حلو الاسم خله يجيب اللوحه وعلقها اليوم
ابو هادي ؛ المهم انا اليوم لازم اخلص شي بالمحل وترا العماره بعد يبيلها شغل
هادي عقد حواجبه ؛ وش بتسوي فيها
ابو هادي ؛ مب عاجبني مكان الدوانيه ولا الباب بينها وبين سيب المطبخ ماينفع
حمد ؛ ليه ماتقول عشان اذا جو رجال نطلع عشاهم من الباب بدل ماندخل ؟
ابو هادي ؛ ايه بس مضيق الحوش ومكانها على مدخل العماره يعني لو فيه رجال ودخلوا المأجرين بيروحون شققهم بيمرون من عندهم ماينفع
هادي ؛ وين المشكله خله مكانها حلو
ابو هادي ؛ لا لا انا خططت مكان لها احسن ومنها يتوسع البيت بس الحين خلنا نخلص من المحل بكلم العامل اللي سوا اللوحه يجيبها ويركبونها اليوم وبكره ان شاء الله نجيب الفرشات
هادي ؛ يلا اجل وحنا ننتظرهم هنا يبطي هو ؟
ابو هادي ؛ لا قريب وتلقاها خالصه من زمان بكلمه
ودق وهو يناظر المحلات وهو عند باب محله ورجع التفت على هادي وحمد اللي داخل ؛ مافيه ابراج
هادي خبط حمد بخفه ؛ قم وارفع الجوال
ابو هادي ضحك وهو يعطيه حمد ؛ ايه ايه وقف على الطاوله عشان يدق
حمد قام وهو ياخذ الجوال ووقف على الطاوله وهو يرفعه ويدق ورد الرجال ؛ هلا
ابو هادي ؛ الو توفيق
توفيق " العامل اللي سوا اللوحه " ؛ ايوا
ابو هادي ؛ انا حاتم راجح اللوحه جاهزه ؟
توفيق ؛ ايوه ايوه متى يبغى ؟
ابو هادي ؛ تقدر تجي بعد شوي وتركبها ؟
توفيق ؛ مافيه مشكل انا يجي شويه واركب
ابو هادي ؛ زين انتظرك عند المحل انا
وقفل وناظر العيال ؛ شوي ويجي
هادي هز راسه وجلس حمد ينتظر معهم لدقايق وبعد 10 دقايق جا العامل وهو شايل اللوحه هو وواحد ثاني معه والناس تناظرهم وهم رايحين لمحل ابو هادي ودخلوا وصفق حمد ؛ وصل وصل
ابو هادي ابتسم ؛ اشوفها
وشال العامل القماش وهم يشوفون اللوحه باللون الأسود ومكتوب عليها بالذهبي { مفروشات الهدى }
ابو هادي ؛ ايييه ياسلام يلا علقوها
ورقى العامل السلم وبدا يعلقها هو واللي معه وقربوا بعض الموجودين بالسوق يشوفون اللوحه وباركوا لأبو هادي وهو يرد عليهم وهو مبتسم وبعد دقايق التفت حمد ؛ يبه بجيب سلك ونحطه ورا اللوحه عشان يعطيها منظر حلو باخذ من حقات شهد عندها اسلاك الالوان كلها
ابو هادي ضحك ؛ نحط ضو بس مب من حقات شهد خلهم لها
حمد ؛ لا لا عندها ويكفون للسوق كله بعد وشوله نشتري
وضحك ابو هادي وهو ينتظر العمال يخلصون وكان هو وحمد برا وهادي داخل على جواله عند الطاوله وبعد دقايق قام وهو يطلع عندهم ويشوفهم خلصوا ونزل العامل من السلم وطلع بعد ما حاسبه ابو هادي
هادي ؛ والله حلوه بس لو خليت اللوحه بيضاء تطلع احلا
حمد ؛ لا لا فيه لوحات واجد بيض خلنا حنا الاسود
ابو هادي ضحك ؛ ايه مختلفين
هادي ؛ والحين وش باقي غير الفرشات ؟
ابو هادي رفع كتوفه وهو يناظر سقف السوق ويسمع صوت المطر اللي يضرب فيه بقوه ؛ خلاص ، والفرش بكره الحين مانقدر من المطر الا ان كان العصر ماجا نخليهم يجيبونه
هادي هز راسه وحمد تذكر ؛ ييوه ليتك ماخليت العامل يروح لو خليته يشيل لنا التلفزيون من المجلس
ابو هادي ؛ ماهو شغله فيه عمال هنا بس يلا الحين بنرجع للبيت بسكر المحل
هادي وحمد اخذوا جوالاتهم وطلعوا وقفل ابو هادي الباب ومشوا طالعين وناظر حمد محل ابو راشد والتفت لهادي اللي كان بجنبه وابو هادي قدامهم ؛ عيال ابو راشد ماهم بالمحل ؟
هادي ناظره ؛ لا بس عماله تلقاهم مايجون وقت الامطار
حمد ؛ ايه حتى الناس مايجون ، طيب واذا الامطار كل يوم ؟
هادي رفع كتفه ؛ مدري والله
وطلعوا لبرا السوق وقال ابو هادي وهو يركض للسياره ؛ اركبوا سرعه
وركبوا بسرعه وقال حمد وهو يسكر الباب ؛ ايييه وش هالأجواء الزينه
ابو هادي شغل السياره ؛ اي والله احد يجلس ببيته والجو كذا ؟؟
حمد ضحك ؛ شكلهم متعودين ماشاء الله
هادي ؛ لا بس عشان لايصردهم المطر وين يطلعون
وفتح ابو هادي الشباك وهو يطلع يده للمطر ودخل حمد من بيت المراتب وهو يضغط زر وقال ابو هادي ؛ياولد افتح دريشة الباب الحين يدخل علينا المطر حمد وهو يوقف ؛ لا لا فاتحه على قدي ماعليك ورش خفيف
وطلع راسه من سقف السياره وهو يشوف المطر ويرفع يدينه بضحك من رش المويه البارده وهادي فتح شباكه وهو يبتسم ويناظر انعكاس حمد بالمرايه واخذ جواله وهو يصوره مع المطر ومن قربوا عند العماره التفت حمد لنايف اللي ناداه بضحك وهو جاي من المخزن بحزمة حطب ؛ حمييد
حمد ضحك وهو يلوح له ؛ ارحب يالنايف
وضحك نايف وهو يأشر له يجي ودخل وكان هادي يناظرهم وقال ابو هادي ؛ وابو راشد بعد شكله داخل مدري ليه مايروحون للسوق مع انه مغطى
هادي ؛ والله مدري يمكن مايجيهم زباين مايطلعون
وقف ابو هادي قدام العماره ودخل حمد وسكر ابو هادي الشبابيك ونزلوا والتفت هادي لتركي اللي طلع وهو يناديه من عند باب الدوانيه ؛ هادي
التفتوا مع هادي يناظرون تركي ونايف اللي وراه وقال تركي وهو ينادي ؛ ياعم ابو هادي تعال انت والعيال يقول ابوي القهوه والمه
ابو هادي ابتسم ؛ ان شاء الله شوي واجي ، هادي رح انت وحمد باخذ فروتي
هادي هز راسه ودخل ابو هادي للبيت ومشى حمد مع هادي لدوانية ابو راشد ؛ ابك ليه ماقال المره الجايه بلعب سوني انا
هادي ؛ خلاص ارجع العب دامه بالبيت الحين يمكن الله يرزقك بفلقه
حمد ؛ ياوك لا هونت " وصفق وهو يمشي ويرقص " والمطر جانا غرّق معزانا صرّد حذانا
هادي ابتسم وهو يهز راسه ؛ امش امش
ودخلوا وكان تركي عند الباب ؛ هلا والله
هادي ابتسم ؛ شلونه تريك
تركي ؛ بخيير ادخلوا يالله حيهم
ودخلوا للدوانيه وكانوا العيال كلهم موجودين وابو نايض عندهم
•
داخل
ام راشد وعبير ومنيره وشريفه بالصاله وهاجر بالمطبخ واروى كانت تغسل الملابس وسمعوا هواش البزارين بالممر حق الغرف ومن بينهم ترف وقامت عبير وهي تروح ولحقتها منيره ودخلوا على كلمة ترف اللي قالت وهي ماسكه القطوه بيد وباليد الثانيه دفت جوري وهي تهاوشها ؛ مو على كيفك حقت اروى اصلا
عبير ؛ ترف وش فيه !
وطلعت اروى وهي شايله الملابس ؛ وشو اللي حقتي
جوري ؛ انا شفتهم بس يشيلونها ويعورونها قلت ترا اخذها
ترف ؛ كذابه قالت بناخذها القصيم اذا رحنا مهو على كيفها مالقيناها عند فراشها حنا !!
عبير بصدمه ؛ ترف !
منيره ؛ تمزح هي على خالد واميره ومناير عشان مايشيلونها كثير محد بياخذها
اروى وهي تشوف ترف للحين تهاوش ؛ يويلي ياللسان
وجت ام راشد ؛ وش الصراخ الرجال بالدوانيه عيب!
ترف ؛ جوري بدت هي كانت معاي وجت بتاخذها
جوري بقهر ؛ اقول بس انا كنت بحطها بالأرض وانتي بس غافصتها بحضنك
عبير ؛ ترف حطيها العبوا معها وهي بالأرض
ترف طنشتها وبعدت وهي شايله القطوه ولحقتها جوري وهي معصبه ؛ ترف حطيها
وطنشتها ترف وطنشت عبير وام راشد ومنيره واروى اللي كلهم ينادونها ويكلمونها وجوري ماتحملت وهي تمسك ترف من شعرها واخذت منها القطوه وهي تدفها وركضوا يفرقون بينهم من بكت ترف وهي تنط على جوري وتطقها
واما القطوه اخذوها مناير واميره وخالد وطلعوا للصاله وهاجر طلعت على صرخة ترف وهي تشوف شريفه تضحك والصغار عندها بالقطوه ودخلت هاجر للممر وهي توقف بصدمه من شافتهم يتهاوشون ؛ يويلي هذولا علامهم !
اروى وهي تسحب ترف ؛ ياترف عيب انتي وياها خلاص انا اودي البسه لأمها
وضربت ترف برجلها جوري وشالتها عبير ؛ ترف والله اطقك !
جوري مشت مع منيره اللي بعدتها ؛ عيب خلاص انتوا صديقات
ترف عدلت شعرها بقهر ؛ تخسي
جوري ؛ تخسين انتي والبسه والله ما اخليك تشيلينها
ام راشد وهي تصفق بيدينها ؛ خلاص يلا يلا مافيه بسه انا بخلي تركي يوديها لأمها
اروى صرخت من ترف اللي عضتها وهنا عصبت عبير وهي تطق ترف على يدها ؛ انا وش قلت
ترف دفتهم وهي تروح لغرفة عبير وسكرت الباب وجوري مسحت دموعها بزعل وقالت اروى بضحكة صدمه ؛ ييمه تكفون من طالعه عليه
عبير ضحكت بقهر ؛ والله انها مثلك يومك صغيره وللحين بعد
اروى شهقت ؛ نععم والله اني مؤدبه لاتخليني اعيد المصارعه هنا
ام راشد ومنيره ؛ هههههههههههههه
هاجر ؛ ابك وش صايير
ام راشد ضحكت ؛ والله انها مثلك ياعبير الله يرحم ايام يوم تضربين اخوانك حتى راشد وهو اكبر منك كنتي تضربينه
منيره ضحكت بصدمه ؛ يويلي والحين بنتها تكفخ بنته
عبير ؛ يختي والله عجزت فيها حتى علي تنافخ
ام راشد ضحكت ؛ عوذه قشرا الله يصلحها
وطلعوا للصاله واروى طلعت وراهم للحوش بسلة الملابس وهاجر مشت وراها ؛ وش متهاوشين عنده
اروى ضحكت ؛ عشان البسه
هاجر تكتفت وهي واقفه عند اروى اللي تعلق الملابس ؛ ياعزي عن ذا البسه مصعوها
اروى ضحكت وهي تلتفت لهاجر بشهقه ؛ غطاك يالخبله !
هاجر لمست كتوفها بصدمه ؛ هاه ، يويلي نسيته
اروى ضربتها بخفه بشماغ تركي ؛ طسي داخل بعدين تجي تقول شافني بالغلط
هاجر شهقت وهي تضربها ؛ اص لحد يسمعك
وضحكت اروى وهجت هاجر لداخل وكملت اروى تعلق الملابس وهي للحين تضحك على هوشة ترف وجوري
بعد دقايق خلصت وهي تدخل للصاله وارخت جلالها ؛ يمه ترا علقت الملابس والجو غيم واضح بتمطر ان شاء الله يمدي الملابس تنشف
ام راشد ؛ خلاص يمال العافيه حطي للبسه اكل
اروى هزت راسها واخذت صحن الأكل حق القطوه وراحت للمطبخ وهي تشوف هاجر ترتب ووقفت عند المغسله وهي تناظر مع الشباك ؛ من جا غير ابو نايض ؟
هاجر ؛ مدري محد اتوقع
اروى ؛ الا فيه نعول زياده
هاجر رفعت كتوفها وهي تكمل ترتيب
وقفلت اروى المويه وهي تفتح الدولاب ؛ ياليل وش احط للبسه الحين
هاجر ؛ اتوقع فيه تونه حطي لها
اروى اخذت علبه وهي تشوفها ؛ مافيه الا ذي رينج كاب مدري شسمها الصفراء احطها ؟
هاجر ؛ نعنبوا بليسك ذي بالطماط والفلفل لا وشوك بعد بتحطينها للمسيكينه خلاص حطي لها حليب
اروى تنهدت وهي ترجعها واخذت حليب ؛ ياعزي عنها حليب وحليب لازم اوصي العيال اذا راحو الرياض يجيبون من اكل البسس
هاجر ؛ والله حتى انا ودي اروح اتمشى اشوف الأسواق
اروى وهي تطلع ؛ محد موديك الاسواق حدك سوقنا
وتأففت هاجر وهي تكمل شغلها
..........••..........
بيت ابو هادي
جلست شهد بطفش عند امها اللي تتقهوى بالصاله ؛ يمه ماطفشتي ؟
ام هادي ؛ الا والله
شهد بقهر ؛ التلفزيون وفاصله حمد الحيوان والسوني ماعرف اشغله والنت ميت تكفين قولي لأبوي ولا اخواني يطلعونا حتى الجو يقول اطلعوا محد يقعد
ام هادي ضحكت ؛ والله يحبيبتي ابوك والعيال مشغولين تو جو من المحل
شهد ؛ ايه وراحوا يتقهوون مع ابو راشد هذا هم فضوا
ام هادي ؛ وين تبين تروحين طيب ؟
شهد ؛ فيه مليون مكان بس خليهم يطلعونا ، ماودك نروح لجدتي ؟
ام هادي ابتسمت ؛ الا والله بس الحين مشغولين وبعدين البنات مب عندها
شهد ؛ عادي مزونتي تكفي عنهم كلهم
ام هادي ضحكت ؛ خلاص نشوف وهي قالت بتجينا يمكن تجي
شهد هزت راسها وهي تصب لها كاسة شاي وقالت ام هادي ؛ شهد من احسن هاجر ولا هيلا ؟
شهد بأستغراب ؛ كلهم
ام هادي ؛ وحده
شهد ابتسمت ؛ ليه ماقلتي اروى لو قلتي هاجر ولا هيلا ولا اروى بقول اروى
ام هادي ابتسمت ؛ كلهم يهبلون بس ابي هاجر او هيلا
شهد ؛ بالشكل ولا بالحركات ولا وش ؟
ام هادي ؛ يبنت الحلال كلهم من احسن ؟
شهد اعتدلت ؛ اول شي كلهم ماشاء الله حلوات وفيهم شبه من بعض بس يختلفون بالسوالف هاجر ماشاء الله اجتماعيه وتعرف تسولف هيلا هاديه شوي وترد على السالفه بس كلهم يهبلون واروى احلاهم
وابتسمت ام هادي وهي تفكر وقالت شهد ؛ ليه ؟
ام هادي ؛ بخطب وحده لهادي
شهد شهقت وسكتت لثواني ؛ اا بس يمكن هو مايبي
ام هادي ؛ ليه ؟ اذا على سالفة بيان هو قال مايبيها ليه مايوافق على غيرها الحين ؟
شهد ؛ وانتي وين تحسين اللي مناسبه لهادي ؟
ام هادي ضحكت ؛ مدري عشان كذا سألتك بس احس هاجر ثقيله وشخصيتها ماشاء الله حتى هيلا والله سوالفها تهبل بس مثل ماقلتي ترد على السالفه بس انها قمر وكلهم والله يهبلون عاد مدري
شهد ؛ طيب كلمي هادي قولي له وخليه يوافق عندي فستان اموت والبسه من كثر ماهو يجنن
ام هادي ضحكت ؛ عسى يوافق بس مدري من باخذ له
شهد تنحنحت ؛ طيب يمه ليه ماتاخذين له نجلاء بنت خالتي مرام ؟
ام هادي ؛ صغيره ١٩ وهو ٢٥ فرق ٦ سنين
شهد ؛ بالعكس عادي والله انها تهبل ونعرفها اكثر
ام هادي ؛ لا لا .. وبعدين تبين الصدق ؟ اخاف ياخذها ولايتفاهمون وتصير بينا مشاكل ولا رسميات انا والله ماني مفرطه بهاجر ولا هيلا لاكن خواتي ماودي تصير بيني وبينهم مشاكل
شهد ؛ يعني تحسين ان هادي ماراح يقتنع بنجلاء بس ولا بهاجر او هيلا ؟
ام هادي ؛ بالزواج كله انا اكيد ماراح اخليه يرفض الا بسبب مقنع له سنتين وهو يقول افكر هالشهر بس ماودي اغصبه ويتهاوش مع البنت ولا يطلقها
شهد ؛ يييوه اجل خليه يفكر ماعليك بيوافق قريب مانبي مشاكل
ام هادي تنهدت وهي ترفع كتوفها وكملت شهد تشرب شاي وتفكر
..........••..........
نرجع لبيت ابو راشد
بالدوانيه
من جا ابو هادي وهو يقولهم عن لوحة المحل اللي وصلت ووش بيبيع فيه بما ان الناس عرفوا اسم محله وباركوا له
ابو هادي ابتسم ؛ الله يبارك فيكم
ابو نايض ؛ يعني خالص ماشاء الله
ابو هادي هز راسه ؛ ايه ماباقي الا الفرشات ماقدرنا نجيبها بالمطر
ابو راشد ؛ يعني ماشاء الله هاليومين بتفتحه
ابو هادي ؛ والله يمكن بس انا ماني خبرة بالفرش يمكن اجيب عمال
ابو راشد ؛ فيه بسوق الزل عمال واجد كلم اي واحد وترا تحتاجهم انا وانا اعرف بالشغله من سنين عندي عاملين للمحل وحتى المزرعه بعد عاملين بس الحين عمران مسافر وحكيم اللي فيها
ابو هادي ؛ غير الأثنين اللي بالمحل ؟
ابو راشد ؛ اي والله اللي بالمحل عبدالسلام خبره فيه ونواس يساعده واللي بالمزرعه عمران وحكيم بس عبدالسلام مايعرف للمزرعه وحكيم مايعرف للمحل وعمران ونواس يعرفون نص ونص بس انت هات عمال يساعدونك بتحتاجهم
ابو هادي ؛ ان شاء الله ، الا السوق ليه مايجونه وقت الامطار وهو مغطى من داخل
ابو راشد ضحك ؛ كاشتين نص الديره مافيه احد
ابو هادي ؛ ييوه ماشاء الله وين ؟
ابو نايض ضحك ؛ وين ماتبي عند الضلعان " الجبال " ولا بالبر ولا بالمزارع
ابو راشد ؛ شفت الضلعان اللي بأطراف الديره ؟
ابو هادي هز راسه وكمل ابو راشد ؛ تلقاها الحين كلها سيارات اهل الديره
ابو هادي ابتسم ؛ ايه الا على طاري السيارات ما اشوف بالديره سيارات واجد ويجون للسوق على رجليهم ليه ماعندهم ؟
ابو راشد ضحك ؛ عند كل بيت تلقى سياره تشيلهم لابغوا يروحون مكان بعيد اما السوق والجيران حذفة عصى وبعضهم كل واحد عنده سيارته لاصار مشغول ، اما حنا نحتاجها واجد اول بس انا وراشد عشان دوامه بعيد وبعدها عيسى توظف بالرياض وشرا له سياره عشان يروح عليها ويوم ابتعث اخذها نايف ويروح الحين لدوامه وتركي شريت له وحده يوم كنت انشغل بالمحل ويقضي مشاوير البيت واهله
ابو هادي ضحك ؛ ماشاء الله الا عيسى متى يجي ؟
ابو راشد ؛ قريب ان شاء الله والله له ٤ شهور وهو يقول اسبوعين واخلص بس اوراقه تتأخر
تركي وهو يتذكر ؛ لا لا اليوم السبت اخر دوام له والاسبوع هذا اللي يجي عنده اختبار وبعدها عاد ان شاء الله يجي
ابو هادي ابتسم ؛ ان شاء الله الله يوفقه يارب
الكل ؛ امين
حمد اشر لتركي للمره المليون وتنحنح تركي ؛ اا يبه بنروح انا ونايف وهادي وحمد نتمشى شوي بالديره
ابو راشد ؛ برد خلوه العصر
نايف ؛ لا يبه العصر اروح دوامي بنروح الحين ويمكن اروح الحلاق مقدر العصر اتأخر
ابو راشد هز راسه ؛ ايييه خلاص الله يستر عليكم
وفز حمد ؛ يلا يبه شوي ونجي ها
هز راسه ابو هادي وطلعوا العيال وضرب تركي راس حمد بمزح ؛ انت علامك كل شوي تأشر
حمد ؛ يخوي طفشت انتوا ماتسمعون صوت المطر منهو اللي بيجلس والمطر برا يصوت ؟
هادي ؛ مستانس بالمطر ها واخرتها تمرض
حمد ؛ ماعليه لو امرض اهم شي اني طلعت بهالجو
تركي ؛ اركبوا يلا يلا
وركبوا بسيارة تركي اللي بجنبه هادي وورا نايف وحمد وحركوا وقال تركي ؛ ها وين ؟
نايف ؛ الحلاق الحلاق
حمد ؛ يخوي خله اخر شي نبي نعدي على ضلع واشوف الأمطار
هادي ؛ لا لا الحلاق حمد خل المكشات بعدين
تركي ؛ ايه وقبل شوي ابوي يقول يمكن نروح المزرعه بكره تجون ونشب نار ونضبط الجلسه
نايف ؛ ايه ماعليكم الحين ابي احلق
ومشى تركي وهو يوقف عند الحلاق اللي كان قبل السوق ورا البقاله ونزلوا ونزل حمد شماغه وهو يحطه على كتفه ومسح شعره بوهقه ؛ تدرون والله ماودي احلق
نايف ؛ لا لا والله اول واحد يلا
تركي ضحك ؛ لا خفف ماعليك احسن من انه كذا
وضحكوا وهم يدخلون ؛ السلام عليكم
كان موجود الحلاق وبدر من عيال الديره ؛ وعليكم السلام
بدر " صاحب تركي " فز وهو يصافحه ؛ اووه تريك يالله حييه القاطع
تركي ضحك ؛ هلااا بدر وشلونك
بدر وهو يصافح نايف وهادي وحمد ؛ بخيير بخير ، شلونك يانايف
نايف ابتسم ؛ بخير عساك طيب
بدر بأبتسامه ؛ والله الحمد لله ، ان ماخاب ظني هذولا عيال ابو هادي " واشر على هادي " هذا هادي ؟
تركي ابتسم وهز راسه ؛ وهذا حمد
بدر رجع يجلس وهو مبتسم ؛ ايييه يالله حيهم
العيال ؛ الله يحييك
وجلسوا ينتظرونه يخلص وقال بدر ؛ ياخي تركي ماعدت تجينا وينك غاطس
تركي اعتدل بضحك ؛ موجود
بدر ؛ لاوالله ماشوفك الا من بعيد حتى نايف بعد ولا عاد جيتوا تلعبون معنا بالملعب
نايف ؛ نجي نجي ان شاء الله بس مشغولين شوي
بدر ضحك ؛ اييه على طاري الشغل مبروك الوظيفه
نايف ضحك ؛ الله يبارك فيك
بدر ؛ انت يمكن نعذرك اما تركي الظاهر انه مغير راقد
تركي ضحك ؛ لا والله بس بالمزرعه واشغال المزرعه
بدر ؛ والله العيال يسألون عنك يقولون ماعاد جا ولا عاد طلعنا مع بعض مثل اول يحترونك تراهم
تركي ؛ ان شاء الله اجيهم اجيهم
بدر ؛ واخبار علوم
نايف ؛ ابد على حطة يدك
بدر ؛ عاد يوم اختفى تركي قلنا اكيد بيعرس مانويت ؟
ضحك نايف وهادي ابتسم وتنحنح تركي بأبتسامه وهو يحك جبينه ؛ الا
بدر ضحك ؛ والله اني قايل مبرروك مبروك
تركي ضحك ؛ اصبر افكر بس
بدر ؛ يعني ماخطبت للحين ؟
تركي ؛ لا قريب ان شاء الله دعواتك بس
بدر ابتسم ؛ الله يتمم لك ويفرحك وعقبال مانحلق ونتضبط لعرسك
الكل ابتسموا ؛ اميين
وقام بدر بعد ماخلص وقال تركي ؛ نعيماً
بدر ؛ الله ينعم عليك يلا مر علينا ها
تركي ابتسم وهز راسه وطلع بدر وقال حمد ؛ هذا من ؟
تركي ؛ خوينا بدر
نايف ضحك ؛ الا خوي تركي اللي يدوج معه اخر الليول
حمد ضحك ؛ اخصص طلعت راعي تمشيات بالليول مرني اجل
تركي تنهد بضحك وهو يقوم ؛ وانا احسبه بينصح اجلس اجلس انت اول واحد
حمد جلس وهو يضحك وقال نايف وهو يحط يده على عيون حمد ؛ بغمز للحلاق اصبر
ضحك تركي وحمد اللي التفت للعامل ؛ لاااصديق بس قصه من هنا شف وحلق الزلف لحد هنا مهو تحشه وخفف من ه....قاطعه نايف ؛ ابك وش يخفف هذا يبيله نتف علأقل حلّقه كله على الخفيف
حمد ؛ لا ابي من هنا كثيف وخر بس
تركي ؛ ابك محد يقص مثلك حتى اسلام " العامل " بيفهمك غلط ويحلقه لك والله ان قصيته مثل ماتبي ينقدون عليك
نايف ؛ شف هذا بدر اللي قبيل ماهو من طول شعره
حمد ؛ والله ماحلق وغير اللي قلت لا
هادي حط جواله وهو يناظرهم ؛ لاتحاولون خلوه اهون من انه مايحلق
حمد ؛ توك تفزع انت
تركي ضحك ؛ كيفك اجل ، بس شعرك منت شايل الشنب بعد ؟
حمد ما استوعب وقال نايف بضحك ؛ مير مافيه الا شعرتين
حمد خبطه بمزح وهو يقرب للمرايه ؛ الا فيه بس اني اخففه هه هذا وشو
تركي ؛ بعد ، انت ماينقال لك ماعندك حل وسط لأن حلولك كلها وسط يعني صامل تخلي شعرك
حمد هز راسه وهو يأشر للعامل ؛ ايه يلا صديق وانتبه
وجلسوا تركي ونايف وهم يضحكون من حمد اللي جلطهم وماوقفت على حلاقته لا حتى لما حلّقوا هم كان واقف فوق راسهم ويقنعهم باللي يشوفه يناسبهم مثل ماناسب هادي اللي اقنعه بقصه وهادي ماله خلق يجادل وخفف شعره واما الدقن والشنب ماتدخل فيه حمد لأن متعود على حلاقة هادي اللي كان يخفف دقنه والشنب يخليه وتركي كان نفسه الا بالشعر ماحلقه ونايف اللي حلق دقنه وهو يحب يبقى بالشنب بس وشعره اساسا كان خفيف ماغير فيه شي
حمد خبط كتف تركي ؛ ومشغلنا شعرك وشعرك وانت مخلي شعرك ماحلقته
نايف ؛ هذا مثلك بشوشته شف شعري يازينه بس
ضحكوا وطلعوا بعد ماخلصوا والشمس بدت تبين من بين الغيوم والمطر موقف من وقت وقال هادي وهو يشوف الساعه ؛ بيأذن الظهر
تركي ؛ ايه خلاص بنروح المسجد اكيد ابوي وعمي هناك
وركبوا وحركوا للمسجد
•
بعدالآذان والصلاة رجعوا هادي وحمد مع ابوهم للبيت وابو راشد والعيال رجعوا بيتهم وابو نايض راح بيته ومر الوقت بدون احداث مهمه بجلستهم بالبيت وعند النار واللي عند الدفايه من برودة الجو
..........••..........
بيت ابو راشد العصر
بغرفة نايف
كان يتجهز عشان يروح دوامه ودخلت هاجر وهي جايبه شماغه ؛ نايف كويته
نايف نايف سكر ساعته وهو يلتفت ؛ ايه شاطره عطيني اشوف
ومدته له وقبل ياخذه التفت لجواله اللي دق واشر لها ب " شوي " وهو يرد ؛ هلا مشاري
شدت هاجر على الشماغ بتوتر وحط نايف الجوال على الدرج بعد ماحطه سبيكر وهو ياخذ شماغه
مشاري بضحك ؛ تراك تأخرت ١٠ دقايق وتوقع تحت الخط الأحمر
نايف وهو يعدل شماغه ؛ ابك اصبر للحين ماطلعت من البيت
مشاري ؛ اعجل اعجل ابيك بسالفه بعد
هاجر طاح قلبها وهي تأشر له انها بتطلع واشر لها ب " لا " واشر على عقاله اللي وراها وهي تجيبه بسرعه
نايف ؛ يلا جاي
قفل مشاري والتفت نايف ؛ ماكويتيه زين
هاجر تأففت بتوتر ؛ اقول احمد ربك ترا على اروى الكوي ونايمه
نايف تعطر وبعدت هاجر وهي تضربه بخفه من بخ على وجهها متعمد ؛ اخخلص علينا !
نايف ضحك وهو ياخذ اغراضه وطلع مستعجل وقالت هاجر وهي تتنهد ؛ الله يشغله وش سالفته هذا بعد
وطلعت للصاله وهي كل شوي تتوقع سالفه
•
بالدوانيه
كان تركي منسدح عند النار ويفكر والتفت على ابوه اللي ناداه ؛ تركي !
تركي فز ؛ هلا سم
ابو راشد ؛ ماتسمع ؟
تركي مسح جبينه بتوتر ؛ لا
ابو راشد ؛ رح للمحل شف وش ناقصه عشان بروح للسوق بكره والحين انا والعيال بنروح المزرعه
تركي ؛ ابشر
وطلع ابو راشد ورا العيال اللي كانوا برا وجلس تركي وهو من البارح يفكر بشموخ من بعد ماكانوا يكلمونها البنات ووده يسأل ووش صار بسالفتها وقام وهو يدخل وماكان بالصاله الا هاجر والقطوه والصغار اللي عندها والباقين كلهم بغرفهم وتنحنح وهو يوقف عندها ؛ هاجر وين اروى ؟
وشاف هاجر سرحانه وتفكر وهمس ؛ لا اله الا الله كلنا ذابحتنا الهواجيس ، ياهيه
هاجر ؛ ها بسم الله
تركي جلس عندها ؛ علامك
هاجر ؛ مافيني شي وش تقول ؟
تركي ؛ اا اروى وين
هاجر تنحنحت ؛ نايمه من ساعه
تركي وهو يقوم ؛ بشوفها ابيها ضروري
هاجر سكتت وهي تاخذ الريموت وتتفرج على التلفزيون ودخل تركي للغرف وهو يدق باب غرفة هاجر واروى ودخل ؛ اروى
وتنهد وهو يشوف النور طافي واروى للحين نايمه وطلع وهو يسكر الباب والتفت على ام راشد اللي طلعت وهي تعدل طرحتها ؛ تركي وش بغيت ؟
تركي ؛ مما ابي شي اا شلونك يمه
ام راشد تذكرت ؛ بخير بخير تعال ابيك بسالفه
تركي اللي كان متوتر من اول زاد وهو يمشي معها وهي ترجع تدخل غرفتها ودخل وهي تجلس ؛ سكر الباب وتعال
وسكره تركي وهو يجلس عندها ؛ هلا يمه
ام راشد ابتسمت ؛ قلت لي بتفكر يوم قلت لك بزوجك ها مافكرت ؟؟
تركي تنحنح ؛ اا لا
ام راشد تنهدت ؛ شف ياتركي انا كل مره اقول لك تقول لي بعدين هالمره ابيك تقول تم انا والله لقيت لك بنت قمر بسم الله عليها وهالبنت بالذات مابيها تروح
تركي سكت لثواني وهو يدعي انها تقول شموخ ؛ منهي ؟
ام راشد بأبتسامه ؛ بنت ابو هادي اللي تو جا
تركي سكت وبينت الصدمه على وجهه وعقدت ام راشد حواجبها ؛ وشو ؟
تركي بنفسه ؛ " مستتحيل والله ماخذها "
كان يبي شموخ وحتى لو ما اخذها ماراح ياخذ شهد وهي اخت هادي وهادي يدري عن سالفتة مع شموخ مستحيل يحطه بهالموقف ومايدري وش يقول لأمه ؛ اا لا لا يمه مابيها
ام راشد سكتت لثواني وهي تمسك عصبيتها ؛ فكر هالمره صدق ابيك تفكر ياتركي والله ماتتطوف من اول لاشفتها قلت والله ماتروح
تركي بتوتر ؛ يمه والله اني ماخذها يايمه
ام راشد عصبت ؛ وليه تحلف !! فكرت انت ؟
تركي سكت وقالت ام راشد بعصبيه ؛ انا بفهم يوم كل ماقلت لك ابي لك فلانه قلت بفكر وتقعد سنه وبعدها تقول لا انت ماتبي من الأساس ولا تبي تسكتني ولا وش تبي بالضبط ؟
تركي بهدوء ؛ انا عن كم بنت كلمتك ؟
ام راشد سكتت لثواني وهي تناظره ؛ وحده ؟؟
تركي بسرعه ؛ ولا غيرها يمه انا كلمتك عن شموخ ولا ابي الا هي وقلتي لي مخطوبه ولولد عمها وللحين ماجابوا طاري حتى خطبه وين موافقه ؟
ام راشد سكتت بصدمه وكمل تركي من حس انه خربها خربها مره وحده ؛ انا ماكلمتك عن اي بنت الا هي ولا ابي غيرها وكلمي ام عزام ولا بكلم عزام يوافقون علي ولا على ولد عمها اللي مدري كم له خاطب ولا ردوا له خبر
ام راشد ؛ وشو ؟؟ وانت وش دراك
تركي ؛ ادري يايمه سسألت عزام بس لا تقولين له لأني سألته لحاله
ام راشد بصدمه ؛ وكيف سألته وش قايل له انت !
تركي ؛ ييايمه سألته وبس ماقلت له ش... قاطعته ام راشد بشك ؛ انت تحبها صح ؟
تركي سكت بصدمه وحس انه شوي وينفجر من توتره وام راشد تناظره بهدوء ؛ انا شايفه وجهك من يوم ماقلت لك انها انخطبت وانا عارفه انك تبيها بس الظاهر اني قلت لك انها مخطوبه وترا كنت ابيها لك اول لاشفتها بخطبة شريفه وكنا نسولف انا وام عزام وجابت طاري عمانهم وقالت ان شموخ لولد عمها وانا ماتكلمت ما ابي اخرب بين الأهل وانت تعرف كيف لولد عمها
تركي ناظرها برجاء وهو ماهو مقتنع انها خلاص لولد عمها يحس انه عادي ووين المشكله لو خطبها وخيرها ؟؟ قرب وهو يبوس يد امه ؛ يمه تكفين والله مافيها شي وانتي بعد تدرين ان لو تزوجوا وربي ماكتب بيطلقها والمشاكل تصير بس النصيب يايمه ماهو بالغصب !
ام راشد ؛ ياتركي ! انت ترضى انك تفرق اهل عن ب... تركي بقهر ؛ يمه يمه ييمه مافرقت انا التفرقه انك تشوفينهم ماردوا لهم خبر وتدرين انهم مايبونهم وساكته التفرقه انك تبين تخطبين لي وحده غيرها وانتي ماجربتي تكلمينهم حتى ! تكفين يايمه وانا والله ماني آخذ غيرها والله !
ام راشد بقلة حيله ؛ وش تبيني اسوي ؟ اروح اقول لأم عزام تركي يبي شموخ لاتعطينها ولد عمها ؟
تركي ؛ لا انتي بس قولي نبي شموخ لتركي وحنا ندري انها لولد عمها بس شوفيها هي من تبي
ام راشد بصدمه ؛ بعد !! اخطب على خطبتهم ؟؟
تركي قام بقهر وهو ماسك نفسه لاينفجر ؛ ايه .. انقلبت الدنيا لو خطبناها حنا بعد ؟ ذبحنا احد حنا ؟ لاهو عيب ولا هو حرام البنت تختار وبكيفها
ام راشد ؛ وان اختارت ولد عمها ؟؟
تركي ؛ لا بتختارني انا وتشوفين
ام راشد ؛ وليه متأكد كذا ؟
تركي تردد بس قال ؛ لأنها هي بعد تحبني ترضين وحده من بناتك تاخذ واحد يحب وحده وتحبه ؟
ام راشد ؛ تحبك ؟! شموخ ؟؟
تركي بتوتر ؛ اا..يه
ام راشد ؛ وش دراك ؟ تركي قل الصدق مكلمها انت شايفها ؟
تركي تلعثم ؛ لا لا بس..
سكت وهو حاس انه تسرع وضغط على نفسه ولا يقدر يتكلم خصوصاً ان اروى بالموضوع وخاف يفضحها وتفضحه
ام راشد ؛ بس وشو ؟ تركي ترا حرام عليك ان كانك شايفها ومكلمها وانت ماترضاها على خواتك ليه ترضى عليها ؟
تركي سكت لثواني وهو يفكر وقال ؛ يمه انا ماشفتها الا بعباتها وماكنت وقتها افكر فيها ولا بغيرها لاكن يوم شفت انها مناسبه ونعرفهم وجلسوا عندنا قلت بخطبها وهي هنا بس قلتي لي انها مخطوبه وانا يايمه تعرفيني لابغيت الشي مابغيت غيره وقتها كنت ابيها والصدق اني ماكلمتها ولا كلمتني وان كانها رفضت هذا الشي مايغير علاقتنا فيهم ماعليك انتي قولي لأم عزام كذا وهي بتفكر وانا حاس انها بتوافق لأنها لو تبي ولد عمها اخذته
ام راشد تنهدت ؛ ياتركي نصيحه والله بنت ابو هادي قمر خلني اخذها لك !
تركي هز راسه ؛ مابيها يمه اما شموخ ولا لا
ام راشد ؛ بكيفك اكلم ابوك وام عز... قاطعها تركي ؛ لااا الله يسترك يمه تبينه يذبحني انتي تعرفين ابوي ان درى اني ابيها والله ان يذبحني اليوم قبل بكره بيقول قلوا بنات خلق الله تاخذ وحده وهي لولد عمها
ام راشد ؛ ودامك تدري انه بيقول كذا ليه تتعب عمرك ؟ وبعدين تبيني اكلمهم وانا ماعلمت ابوك !
تركي ؛ يمه انتي كلمي ام عزام قولي بنخطبها لتركي ولا اسألي هم بيوافقون ولا لا ان كانها قالت تفكر قولي اجل بخطبها لتركي وخليها تفكر تبيني ولا تبي زايد و.... قاطعته ام راشد بصدمه ؛ وششو !! زايد ؟ وش دراك انت تركي حلفتك بالله انك مكلمها صح !
تركي للحضه حس انها نهايته وهو يحس بهبوط ودوخه وكل شي ؛ لا لا لا يمه انا سألت عزام انا ككنت بشوف بس بعد ماقلتي لي انها مخطوبه سألته عن عيال عمه واهلهم وقال زايد ومدري وشو وقال خطيب اختي وسكتت
ام راشد بقهر ؛ والله انك كذاب اذلف ماني خاطبتها وانت تكذب علي تبي تفضحني عند الناس
تركي ؛ ييمه ! وش افضحك كل العيال يدرون كنا بالمزرعه ونسولف وسولف عن عمامه وقال بالحرف زايد خطيب اختي " كان يكذب وهو صامل ماينفضح هو واروى "
ام راشد ؛ اسأل ابوك انا
تركي توتر بس قال عكس اللي داخله ؛ اسأليه بس بعد ماتكلمين ام عزام عشان لايدري اني بخطب وانا صادق
ام راشد تنهدت وهي تمسك راسها ؛ انا داريه انك تغثني ماعمري كلمتك عن العرس الا وانت مشغلني
تركي ؛ انتي بس كلمي ام عزام وانا والله ان كانهم رفضوا والله لا اخليك تزوجيني اللي تبين
ام راشد ؛ رح رح عني راسي صكني خلني افكر واشوف وخلك تكذب علي وانا اعرف شلون اطلع كذبتك ياتريك !
تركي تنحنح ؛ سلامتك ماعليك يمه بس اهم شي لاحد يدري الا انا وانتي تكفين يميمتي انا ولدك تركي اللي ماعندك اغلى منه لاتكسرين بخاطري
ام راشد ناظرته وهي تشوف شلون يستعطف وصدعت زياده ؛ اطلع اطلع
تركي باس راسها ؛ ابشري بس كلميها تكفين
ام راشد ؛ ابك اطلع اكلمها لاتشغلني !
وطلع تركي وهو يرجف من توتره وشاف اروى اللي طلعت من الغرفه وهي تو صحت ومسك قلبه بقهر ؛ اهب عساه يرقد حضك يالعدو اهب عليك ياوجه النكبه يوم بغيناك خامده
اروى وهي للحين ماصحصحت ؛ ها ؟ منهي
تركي اخذ شماغه من على كتفه وهو يلففه ويلسعها فيه وصرخت وهي تضربه ؛ وجع وجع
تركي لسعها مره ثانيه وهو ينحاش ويضحك واروى ماسكه كتفها ؛ اوريك ياتركي والله ما اخليك يالمخنز
وطلعت ام راشد وهي تناظرها ؛ وش يصايح فيك انتي بعد ؟
اروى بقهر وهي تمشي ؛ تركي يمسطني والله لأوريه
ومشت للحمام " الله يكرمكم " ورجعت ام راشد للغرفه وطلع تركي للصاله وهو يلتفت لهاجر اللي قالت ؛ ليه صحيتها خلها تفكنا
تركي ؛ ماصحيتها هي صحت ، نايف راح ؟
هاجر ؛ ايه طلع من زمان
وهز راسه تركي ودخلت منيره ؛ السلام عليكم
هاجر وتركي ؛ وعليكم السلام
وتنحنح تركي وهو يطلع وجلست منيره عند هاجر ؛ وين الناس
هاجر ؛ والله الظاهر ناموا اروى تو صحت " وعقدت حواجبها من شافت وجه منيره اللي نزلت غطاها " منيره شفيه وجهك تعبانه ؟
منيره بضيق ؛ مدري يختي مصدعه ومعدتي تقلب
هاجر ؛ سلامتك والله
منيره ؛ الله يسلمك
..........••..........
عمارة ابو هادي
كان ابو هادي بالحوش وام هادي عنده يتقهوون وهادي بغرفتة وحمد بالصاله يلعب ودخلت شهد وهي تجلس عنده بطفش واشر لها تسكت وبعد ثواني التفت لها ؛ ابوي وينه
شهد ؛ بالحوش هو وامي
حمد ؛ وهادي
شهد ؛ بغرفته ، حمد طفشت
حمد ؛ تعالي تعالي العبي
شهد بضيق ؛ ما ابي ياخي ابي اطلع
حمد حط اليد ؛ اييه احسن ... هاه وش تقولين وين بتطلعين ؟
شهد ؛ ابي مزونه
حمد ؛ ماهي فاضيه مزونه عند غنمها الحين تحلبهم
شهد ؛ راضيه اروح عندها بس بطلع ، الا يالنذل ليه مطفي السوني ليتك شابك التلفزيون اليوم بغيت اطق واموت من الطفش
حمد ضحك ؛ والله عاد بعلمك عليه بس ماتبين
شهد ؛ اقول بس شرايك نطلع السطح
حمد ؛ اطلعي
شهد ؛ امي ماتخليني اطلع معي نشوف الجو
حمد ؛ والله شمس وعجزان بلعب تبين تلعبين ؟
شهد تأففت ؛ ما ابي قلت اشغلتني
ودخل ابو هادي وهو ينادي ؛ هادي .. حمد
حمد ؛ هلا يبه
ابو هادي جا للصاله ؛ بكلم حقين الورشه يجون
حمد ؛ ماتقول بكره ؟
ابو هادي ؛ لا الحين مافيه امطار بكره ماندري
وطلع هادي ؛ يبه ؟
ابو هادي ؛ بالصاله تعال
وجا وقال ابو هادي ؛ بنجيب الفرش بدق على العمال
هادي هز راسه ؛ يلا اجل كلمهم
ابو هادي ضحك والتفت لحمد ؛ تعلم
حمد بضحك ؛ كيفكم بس معكم انا
شهد ؛ يبه متى يخلص شغل المحل ؟
ابو هادي استند على الباب ؛ خلصنا باقي نبيع والأثاث نجيبه اليوم ان شاء الله ليه ؟
شهد بضيق ؛ نبي نطلع يبه طفشت والله وانتوا مشغولين
ابو هادي ضحك ؛ ابشري نطلع بس اليوم مانقدر والله بروح للمحل تبين تجين معنا ؟
شهد سكتت بتفكير ؛ مدري .. داخل السوق هو يعني عادي اتمشى لين تخلصون ؟
ابو هادي رفع كتفه ؛ ايه بكيفك وتجي معنا امك ان بغيتوا تتمشون ولا تشوفون المحل ... انا ماقلت لك عن اسمه ؟
شهد هزت راسها ب " لا " وقال ابو هادي ؛ اجل تروحين معنا وتشوفين لوحته وتشوفينه بعد ماغيرنا فيه شوي
شهد ؛ اجل بروح معكم يلا
ابو هادي ؛ شوي بكلمهم يبيلهم وقت يشيلون الفرشات والطريق ساعه بيتأخر
شهد ؛ عادي نتمشى بالسوق او نشوف الديره ناخذ فره ماعندكم شي الحين اذا وصلوا تروحون للسوق
ابو هادي ابتسم ؛ خلاص اجل بكلمهم وانتي اجهزي
شهد هزت راسها وهي تفز لغرفتها واخذ جواله ابو هادي وهو يطلع للحوش وهادي راح للمجلس وحمد كمل يلعب
وبعد مادق ابو هادي وبلغهم يجيبونها جلس وهو يكمل فنجاله ؛ بنطلع نتمشى فرتين بالديره ونروح للمحل بعدها كلمتهم بيجيبون الفرشات وشهد تبي تتمشى بالسوق ومنها تشوفون المحل
ام هادي ابتسمت ؛ عاد والله من الصباح وهي طفشانه تبي السطح وماخليتها تطلع
ابو هادي ؛ لا السطح مافيه شي انا بضبط هالحوش بعد ما اخلص من المحل
ام هادي هزت راسها وهي تدري وش بيسوي ابو هادي بالعماره ووش بيغير فيها وكانت هي بعد مقترحة عليه بعض التغييرات
بعد نص ساعه جهزوا ابو هادي وام هادي وشهد اما هادي قال بيروح للمحل اذا وصل السجاد وحمد معه وطلع ابو هادي وام هادي وشهد يمشون بالديره
ورجع هادي لغرفتة وحمد اللي باقي يلعب
..........••..........
سوق المحاسن
في محل ابو راشد
كان تركي واقف يشيك على الصناديق وهو متوتر ونص عقله مو معه واغلب الأغراض سجلوها العمال اللي اساساً قايل لهم ابو راشد بس ارسل تركي عشان يتعلم وجلس وهو يعطي الدفتر عبدالسلام يكمل واخذ جواله بيتصل على عيسى بس حس انه بيوتره معه او اصلاً يمكن يهاوشه على تسرعه وتنهد وهو يهدي نفسه ويشغل تفكيره بالبيع ويرتب ويحوس
وكمل لساعتين وهو يبيع وشتغل وتنهد وهو يقوم وطلع عند باب المحل وهو يوقف عنده
•
وبهالساعتين هذي جا ابو هادي للسوق وهو يدخل من الباب الخلفي بحكم انه اقرب لمحله لأن السجاد بيوصل بعد دقايق وناظرت شهد جدار المحل والباب اللي غيروه وناظرت اللوحة وابتسمت ؛ مفروشات الهدى ؟
ابو هادي ابتسم ؛ اييه ها حلو الأسم
ام هادي ؛ اي والله حلو غيرتوا الباب بعد ؟
ابو هادي وهو يفتح المحل ؛ ايه ومن داخل بعد
ودخلوا وكان مغير لونه وشايل الرفوف ومافيه الا مكتب صغير يسار الباب
جلس ابو هادي وهو ياخذ جواله يدق على هادي وام هادي وشهد يناظرون المحل
ابو هادي ؛ الو هادي ... تعال تعال انت وحمد الفرشات وصلت ... يلا مع السلامه
وقفل وهو يجلس ينتظرهم والتفت على شهد اللي قالت ؛ يبه اذا جابوهم بنطلع انا وامي نتمشى هنا واذا خلصوا نجي نشوفهم
ابو هادي هز راسه ؛ خلاص ماعليه
ودق جواله وهو يرد بسرعه ؛ هلا وين وصلتوا ؟ ..... ايه ايه اول لاتدخل تلقى سوق كبير على يسار .. ايه .. وامش ورا السوق فيه باب ثاني غير الكبير وقف عنده ... يلا انا قدامه
وقفل وهو يلتفت ؛ خلكم هنا شوي جو بشوفهم
وطلع مستعجل واشر لهم ووقفوا وبدوا ينزلون الفرشات ودخل ابو هادي للمحل ؛ هذولي وين راحوا
ام هادي ؛ منهم
ابو هادي؛ هادي وحمد .. الحين بينزلونها بتروحون ولا شوي ؟
شهد ؛ لا بنروح واذا خلصوا نجي
ابو هادي ؛ يلا اجل لاتضيعون
وطلعت شهد وام هادي يتمشون بالمحلات وابو هادي يناظر العمال اللي بدوا ينزلون
بعد دقايق ناظرت شهد هادي وحمد اللي عند محل ابو راشد وهي تلتفت لأمها ؛ شوفي شوفي ابوي ينتظرهم وهم يسولفون هناك
ام هادي ؛ روحي روحي ناديهم قولي ابوي ينتظركم روحوا له بسرعه
ومشت شهد لمحل ابو راشد كان بعيد شوي وهادي وحمد عند الباب يسولفون مع تركي ووقفت وهي ماتدري كيف تناديهم وتنتظرهم يناظرونها وابتلشت وهي تنادي بصوت عالي شوي عشان الأزعاج ؛ هادي
التفتوا هادي وحمد وصد تركي وهو يمثل انه انشغل بجواله
هادي قرب ؛ ها ؟
شهد ؛ الحين انتوا واقفين تخثرقون هنا وابوي بالمحل والعمال جو اخلص لايعصب عليكم
حمد ؛ احلفي وصلوا !
شهد ؛ اييه اخلصوا
ومشى هادي بسرعه وحمد معه ولحقتهم شهد ؛ اصبروا طيب وصلوني لأمي
ومشت وراهم ومن شافت امها وهي تروح لها وهادي وحمد راحوا للمحل وهم يشوفون العمال ينزلون وابو هادي يأشر لهم يحطونها ودخلوا وهم مايدرون وش يسوون وجلسوا ينتظرونهم يخلصون ...
بعد نص ساعه
دخلت ام هادي وشهد لمحل ابو راشد وكان مزحوم شوي وتركي عند الطاوله والعمال يعبون للزباين والتفتت ام هادي لشهد ؛ هاتي اكياس
شهد ؛ وينها
ام هادي ؛ هذيك عند الطاوله
وراحت شهد وهي توقف عند الطاوله ؛ لو سمحت ابي كيس
تركي تنحنح وعرف انها اخت هادي وهي نفسها اللي نادت قبل شوي واخذ كيس بسرعه وهو يعطيها ولا ناظرها ولا تكلم وهو على اساس منشغل يقرا الدفتر وقالت شهد ؛ اا وواحد ثاني بعد
تركي طلع لها اثنين وهو يعطيها ؛ تفضلي اختي
واخذتهم شهد وهي تروح لأمها
وسند تركي راسه على كفه بتوتر وهو ياخذ القلم ويشخبط على الورقه وقال بنفسه ؛ " ياراسي راساه " كانت فكرة انه ياخذ اخت هادي لحالها تصدعه وهادي يدري عن سالفته وعنده لو ما اخذ شموخ ياخذ هيلا ولا ياخذ شهد بكل برود وهادي يدري
وبعد دقايق جت ام هادي وهي تحط الاكياس وبدا تركي يحاسبهم وخلصوا وطلعوا وهو يوقف ؛ عبدالسلام تعال بطلع شوي
وطلع بيوقف عند الباب وانتبه لهادي اللي واقف وام هادي وشهد عنده ويتكلمون وتنحنح وراحوا وجا هادي ؛ ها تركي
تركي اعتدل ؛ هلا ، ها ماخلصوا العمال ؟
هادي ؛ لا والله توهم مانزلوا نص الفرشات قلت اجيك الين يخلصون
تركي هز راسه وهو مبين على وجهه ان فيه شي وتركي ينكشف لو كذب وانتبه هادي ؛ وجهك يقول انه صاير شي
تركي ناظره ؛ هاه لا مافيه شي
هادي عقد حواجبه ؛ الا ، وش فيك !
وهز راسه تركي وقال هادي بأستغراب وهو يهمس ؛ صاير شي بسالفة شموخ !
تركي ناظره وابتسم ؛ اخت عزام ياهادي
هادي ابتسم بأستغراب ؛ اخت عزام طيب ؟ صار شي
تركي رفع كتوفه ؛ يمكن يصير
هادي ؛ يخوي معرف الألغاز انا فيه شي ولا لا
تركي تنهد ؛ والله مدري كلمت امي عنها وقلت اني ابيها
هادي ابتسم ؛ زيين اللي قلت لها خلاص ماعليك تكلمهم هي وحزتها تشوف ما انت واثق انها تبيك ؟
تركي ؛ الا
هادي ؛ خلاص اجل بتوافق تطمن
وحس هادي انه متوتر ماحب يسأل اكثر وتنحنح ؛ خلاص برجع المحل انا ان بغيت شي كلمني
هز راسه تركي ومشى هادي مستغرب على انه يبي يسولف مع تركي بس حس انه مشغول وتنهد تركي بقهر وهو حاس ان اسلوبه ماش ويخاف ان هادي زعل بس تناسى وهو يرجع يدخل للمحل
ومر الوقت بالسوق على تركي اللي كل دقيقه يزيد توتره اكثر من كل شي من ان قال لأمه السالفه بهالطريقه ومن انه كذب وماسأل عزام ولو يدرون بيحلم انه ياخذها واستوعب انه يكتب على الدفتر وهو يفكر وناظر كلامه اللي كاتبه وهو يفز بصدمه وقطع الورقه من الدفتر وحطها بجيبه وتأكد انه ماكتب بأوراق ثانيه وسكره وهو يحطه على جنب ورجع اعتدل على الكرسي وهو ينتظر الزباين يخلصون عشان يحاسب
•
في محل ابو هادي
اللي خلصوا ونزلوا السجاد والزل وكان ابو هادي يحاسبهم وحمد وشهد يشوفون السجاد وام هادي كانت بالمحل اللي بجنبهم وهادي عند الباب وجا ابو هادي بعد مامشوا العمال وابتسم وهو يشوف الناس اللي عرفت وش بيبيع وقال واحد ؛ خير ما اخترت خير ما اخترت الله يبارك لك فيه
باقي الناس اللي كانوا عنده ؛ اي والله ، مبروك ، الله يبارك لك
وطلعوا شهد وحمد على الصوت وهادي اللي كان مستند على الباب اعتدل بأبتسامه خفيفه وابتسم ابو هادي ؛ تسلم تسلم الله يبارك فيكم جمييع
وحمد بعد شهد على داخل وهو يهمس ؛ اهب رازه خشتك ومافيه الا رجال برا
شهد ؛ انطم بعباتي ترا وصار لي ساعتين افتر بالسوق نفس الشي
ودخل ابو هادي وهادي وراه سكر باب المحل نص تسكيره وقال وهو يتلفت ؛ وين امي
شهد ؛ مدري طلعت لمحل جنبنا
ابو هادي ابتسم وهو يشوف الزل ؛ والمحل نقول خلصنا منه بجيب عمال
هادي ؛ نفتحه بكره ولا متى ؟
ابو هادي ؛ والله مدري يمكن بعد يومين الين نلقى عمال ، ها وين مريم رح نادها ياحمد
وهز راسه حمد وطلع يشوف امه وقال ابو هادي ؛ هذي فرشة المجلس نزلوها هنا بخليها الين نخلص من المجلس
وقربوا هادي وشهد يشوفون معه السجاد وهو يوريهم ويقول لهم وش نوعه
بعد دقايق دخلت ام هادي وحمد اللي شايل اكياس وابتسمت ؛ ماشاء الله وش هالمحل الحلو
حمد همس بقهر وهو يحط الأكياس ؛ قشيه بعد
شهد سمعته وشهقت وهي تضحك ؛ يمه وين كنتي
ام هادي وهي تشوف السجاد مع ابو هادي ؛ عند الخياط
ابو هادي ؛ شوفي هذي اللي للمجلس حطيناها على طرف
شهد وقفت عند هادي اللي كان متكي على الطاوله وهمست ؛ وين وصلت؟
هادي تنحنح وهو يناظرها ؛ وين ؟
شهد ضحكت ؛ مدري تفكر
وجا حمد وهو يجلس عند هادي على الطاوله ؛ بروح البيت ، ترجع مع ابوي ؟
هادي ؛ لا بروح معك بس اصبر يمكن ابوي يبي شي
حمد وهو يوقف ؛ والله انكتمت من ريحة ذا الفرش بطلع عند الباب اجل
شهد ؛ اي والله قويه ريحتهم ، يبه نمشي ؟
ابو هادي ؛ يلا شوي شوي
وطلع حمد وهو يوقف عند باب المحل ويتأمل بالسوق والمحلات لدقايق وطلع ابو هادي والباقين ونادت ام هادي ؛ تعال حمد خذ الاكياس
واخذهم حمد هو وشهد وابو هادي وقف يسكر المحل ومشوا وكانت شهد تمشي بجنب ام هادي اللي قامت تسولف لها ؛ ليتك جيتي معي لقيت قطعة قماش تهبل وعلى طول رحت للخياط وانا اعطيه مقاس جلابيه شريتها قبل شوي ومقاسي خليته يفصل على مقاسها
شهد ؛ يتأخر ويمكن مايضبط بعد الجاهز احسن
ام هادي ضحكت ؛ لا والله التفصيل تفصلين على ماتبين محد مثلك اما الجاهز طقم
شهد بضحك ؛ شكلك بتخلين كل ملابسك تفصيل اجل
وضحكت ام هادي وطلعوا من السوق وهادي استغرب انه ماشاف تركي بمحلهم ولا بالسوق وحتى سيارته مو برا وتنهد وركب مع حمد ، وابو هادي اخذ ام هادي وشهد حركوا للبيت
..........••..........
بيت ابو راشد
بالصاله
طلعت ام راشد وهي تجلس وكان فيها عبير وشريفه وهاجر واروى يتفرجون على مسلسل والبزارين بالغرفه يلعبون
ام راشد ؛ وين منيره
شريفه ؛ مدري والله
هاجر وهي تفصفص ؛ اتوقع نايمه ماشفتها من العصر
وهزت راسها ام راشد وهي تشوف ساعتها ؛ اجل قومي انتي واروى جهزوا العشاء ابوك يبيه بدري عشان ينام وراه سوق من فجر الله
اروى التفتت ؛ بيطلع الرياض ؟؟
ام راشد ؛ ايه قوموا
هاجر ؛ يلا تكفين بس شوي الحين ينتهي المسلسل
عبير وهي تقوم ؛ اذا انتهى الحقوني
وراحت للمطبخ وبعد دقايق جا راشد وهو ينادي ؛ يمه
ام راشد ؛ ها يمه بالصاله
ودخل وهو يحب راسها ؛ مسيهم بالخيير
ام راشد والبنات ؛ ياهلا مساء النور
راشد ؛ يمه منيره تعبانه بوديها المستشفى وارجع الورعان بالله لايطلعون بسرعه ونجي
ام راشد ؛ عسى ماشر علامها ؟
راشد ؛ اابد الله يسلمك تعب من البرد ، وناصر مع ابوي والعيال بالمزرعه للحين ماجو
ام راشد ؛ خلاص ماعليك عندنا ماتشوف شر
راشد هز راسه وهو يطلع ؛ الشر مايجيك
وراح والتفتت اروى ؛ اخاف تصيح اميره وش يسكتها
ام راشد ؛ لا خليها تلعب ماتدري ، قوممي يلا انتي وياها الساعه بتجي ٧ متى بيخلص العشاء
وفزت هاجر للمطبخ واروى قامت وهي تجلس عند امها ؛ طيب يمه حطي لي حنا
ام راشد ناظرت يدينها ؛ والله حتى انا بحط بيروح حناي
اروى ؛ لا لا ابي لشعري بخليه يطول ماعاد بقصه
ام راشد حطت يدها على راسها وهي تلتفت لشريفه ؛ تبي تكحلها قالت بحط حنا على شعري ، ابك ماينحط الحنا على الراس بالبرد
ضحكت شريفه وقالت اروى ؛ هاه اجل وش احط ابيه يطول بسرعه وقبل التمايم وابيه نفس شعر شهد شكلها تحط حنا اسود
شريفه ضحكت ؛ تبين مثل شعرها ؟
اروى هزت راسها وقالت ام راشد ؛ والله ان شعرك حلو بس انك خبله تقصينه ولا لو خليتيه شهر كنس الأرض
اروى بقهر ؛ لا والله هو مايطول
شريفه ؛ ايه لأنك تقصينه متى اخر مره قصيتيه قولي الصدق ؟
اروى وهي تحسب ؛ بداية الأجازه ... قبل ٢٠ يوم او اقل يمكن بس كانت اطرافه تحديد بس !
ام راشد ؛ ايه خلاص لاتقصينه وشوفي كيف يطول بسرعه هو تراه حلو وكثير واسود مثل شعر شهد واحسن بعد بس هي ماتقصه وانتي مغير تقصينه
اروى تخصرت ؛ طيب هه الحين لي ٢٠ يوم ماقصيته وماطول وش اسوي ؟
ام راشد ؛ خليه ١٠ ايام بعد وقومي ساعدي خواتك اخلصي انا مصدعه سوو العشاء انتوا
اروى تنهدت وهي تقوم واخذت ام راشد العنود وهي تحطها بحضنها ؛ ياعمري يامنيره امس مافيها شي وش جاها
شريفه ؛ من البرد وهي تطلع لغرفتها اكيد لفحها الهوا
ام راشد هزت راسها وهي تبوس العنود وتلعب معها وبعد دقايق التفتت لشريفه ؛ اقول شريفه شموخ وولد عمها وش صار عليهم
شريفه ؛ ماصار شي للحين على ماهم عليه
ام راشد ؛ هي تبي ولد عمها طيب ولا لا ؟
شريفه ؛ لا كلهم مايبونه بس عشان عمي الله يرحمه
ام راشد ؛ طيب ما انخطبت لغيره ؟
شريفه ؛ لا يدرون انها لولد عمها
ام راشد ؛ ولو خطبها احد وهو يدري وش بيقولون ؟
شريفه ؛ مدري ما اتوقع يوافقون بس ليش يخطبها وهو يدري انها مخطوبه
ام راشد ؛ مدري اسألك انا لو خطبها وقال خلوها توافق على ولد عمها ولا علي
شريفه ؛ هي ماتبي ولد عمها بس يعني ماتكرهه يعني يمكن تفكر واذا بتفكر بوصية ابوها بتاخذ ولد عمها
ام راشد ؛ ويعني اذا اخذت غيره مافكرت بوصية ابوها ؟
شريفه ضحكت ؛ والله مدري يايمه بس يعني مافيه شي بالغصب وهي ان اخذت ولد عمها غاصبه نفسها
ام راشد تنهدت ؛ الله يعين
شريفه ؛ ليه وش صاير؟
ام راشد ناظرتها لثواني بتفكير وهي تقوم ؛ تعالي غرفتي ابقولك سالفه
وراحت ولحقتها شريفه بأستغراب ودخلت وسكرت ام راشد الباب وهي تجلس ؛ خليها بيني وبينك انا بعلمك عشان تجسين النبض وتشوفين
شريفه ؛ وشو طيب ؟
ام راشد بدت تقول لها السالفه بأن تركي يبي شموخ ويحبها وتبي شريفه تعرف اذا رفضوا او وافقوا ....
شريفه بشهقه ؛ ياعمري والله اني حاسه واشوفه يوم كانوا هنا
ام راشد ؛ ليه وش شفتي ؟؟
شريفه ؛ ذاك اليوم يوم قالك انه يبيها وقلتي مخطوبه وجا للصاله وشفت وجهه حسيت انه يبيها ، واخر مره يوم كلمتي عمتي وعطيتي اروى الجوال تكلم شموخ ماشفتي تركي اللي وصلت ابتسامته لأذنه ؟
ام راشد ؛ الا والله اني شفته واستغربت
شريفه ؛ ولما كانوا هنا يدخل كل شوي وبالمزرعه بعد يووه والله توني استوعب
ام راشد ؛ وشو بالمزرعه وش صار ؟؟
شريفه ؛ اذكر يوم رحنا انا وعبير والبنات اخذنا شموخ وتركي وقتها راح معنا وبالرجعه اذكر يوم ركب السياره مادرى انها معكم يوم رجعتوا مع راشد تذكرين ؟
ام راشد هزت راسها وكملت شريفه ؛ وقلنا مو معنا البنات مع راشد وحسيت ان وجهه تغير ونزل بعدها ورجع
ام راشد بصدمه ؛ وتوك تعلميني ؟
شريفه ضحكت ؛ والله اقولك تو استوعب
ام راشد ؛ وش اسوي الحين يبيها ؟
شريفه ؛ والله حرام ماياخذها كلمي عمتي وقولي نبي شموخ لتركي اذا انتو مب موافقين على زايد وحنا والله مانبي له الا شموخ ومن هالكلام وعزام والله يبي الفكه ماعليه منهم لو قطعوا قاطعين من الحين ويعرف تركي واكيد مابيقول لا اقنعه انا ماعليك بس كلمي عمتي اول شي
ام راشد ؛ يعني ماسوينا غلط لو اخذنا شموخ منهم ؟
شريفه ؛ ومن قال انها عندهم ماعليك منهم يمه والله انا متأكده ان محد يبي الثاني هذا هم ماتكلموا ماقالوا ها موافقين لا مخلينهم وانتي بتشوفين
ام راشد ؛ يعني اكلم ام عزام ؟ بس الحمار مايبيني اعلم ابوه يقول ماراح يخليني اخطبها وهي مخطوبه
شريفه شهقت ؛ لا لا تعلمين ابوي وهو صادق بيقول لا ، سلامات خلينا نكلمهم مافيها شي ابوي يقتنع بعدين
ام راشد ؛ واسوي شي من وراه كيف اقعنه بعدين!
شريفه ؛ وش سوينا قولي انا كلمت ام عزام بسألها وهي قالت لا الله ماكتب وخطبت منها شموخ لتركي
ام راشد حطت يدها على راسها ؛ جتكم الثانيه تبيني اكذب وان سأل عزام ؟؟
شريفه ؛ سلامات ماراح يقول صدق ماوافقتوا على ولد عمكم ولا يقول صدق تركي خطب شموخ بعد مارفضت لا طبعاً ماراح يسأل ولا راح يدري ماعليك
وسكتت ام راشد بتفكير وشريفه ضحكت ؛ اهب ياتركي ذويق بس والله مالومه قمر يايمه قمرر لو اني ولد تزوجتها
ام راشد ضربتها بخفه وضحكت شريفه ؛ والله اني صادقه يايمه واشوفها تناسبه ومثل مايبي تذكرين يوم يتحلطم زمان يقول مواصفات فارسة احلامه على قولته ؟ ويقول ابيها هاديه ورزينه واذا تكلمت الكل يسكت عشان يسمعها عاد والله انه صدق شموخ هاديه واذا تكلمت تونسنا ورزينه وثقل وجمال يويلييي بس
ام راشد ضحكت ؛ اي والله صدق جت على مايبي طيب شهد مهي كذا ؟
شريفه ؛ شهد تو جت متى امدانا نعرفها وبعدين تركي يبي شموخ خلي شهد لنايف حطيها بحلقه قبل يحب ثم نبتلش وزين ان وافقت عليه ولدنا يمه ولد الديره وهذي واضح انها مدلعه بنت المدينه خليها نفكر فيها بعدين خلينا بشموخ الحين كلمي عمتي واقنعيها
ام راشد ؛ والله انك صادقه ثم ابلش بالثاني ان خلصت من سالفة تركي على خير اشوف نايف قبل يشغلنا ، بس اسمعي السالفه هذي بيني وبينك والله ان عرف عنها احد ماعرف الا انتي
شريفه ؛ ابشري ببير بس علميني وش يصير
ام راشد ؛ انا ابيك تعلميني وتشوفين اذا رفضوا ولا لا
شريفه ؛ علميني واعلمك ، اجل يليل يعني لازم اكلم عزام بكره وانا مسويه نفسي ثقيله ما ادق بس يلا ماعليه اسأل وبعدها ما ادق
ام راشد ضحكت ؛ الله يشفيك وين الثقل بالكلام مافيها شي
شريفه ؛ لا يعني بس عشان هو يدق وكذا
ام راشد ضحكت وهي تقوم ولحقتها شريفه للصاله وعلى طلعة عبير اللي قالت ؛ يمه ترا سوينا مرقوق خضار بس اسرع شي
ام راشد جلست ؛ ماعليه زين ، ييوه شوفي الورعان وينهم نسيت امر عليهم
وراحت عبير للغرفه تشوف الصغار ولقتهم يلعبون وطلعت وهي تجلس عند شريفه ؛ يلعبون الله يستر لايتهاوشون
ام راشد ؛ والله يمكن تسمعون صيحه الحين