ياديرةٍ ضمّت كل الأحباب

Part 50

لا إله إلا الله وحده لا شريك له
له الملك وله الحمد وهو على كل شيء قدير ❤.

☆ اضغطوها وصلوا ع النبي وقراءه ممتعه.

..........••..........
بيت ابو راشد
طلعت ام راشد للحوش وهي تلف شرشفها من سمعت دق الباب وقفت تفتح طرف الباب وهي تناظر ؛ من .. ها عبدالسلام وش بغيت
عبدالسلام نزل للباب يحط عنده الغدا ؛ سلام عليكم
ام راشد ابتسمت ؛ وعلييكم السلام شلونك
عبدالسلام وهو يوقف ؛ الحمدلله كويس ، هذا من مزرعه بابا ابو راشد يعطي انا
ام راشد هزت راسها ؛ اييه ماقصرت الله يعطيك العافيه
عبدالسلام هز راسه ومشى للسياره ركب وحرك هو وعمران للمحل
اخذت ام راشد الصحن وسكرت الباب وهي تمشي للصاله ودخلت تسكر الباب ؛ يربي ياهالهبوب برد برد الله يستر على اللي بالمزرعه مدري وش موديهم
شريفه ؛ تلقينهم بالخيمه عند النار .. من جابه ؟
ام راشد وهي تحطه بالأرض ؛ العمال ... يووه والله مكثرين
شريفه ؛ عاد يربي لك الحمد ماني جوعانه مب مشتهيه
ام راشد ؛ وانتي تحترين تجوعين عشان تاكلين ، النفاس ماتجوع ابد
شريفه ضحكت ؛ انا بخلص النفاس وانا ما اطلع مع الباب
ام راشد وهي تقرب لها الاكل ؛ انه ازين شي ، الله يصلحك انتي وهاجر بالغصب تاكلون والله محد يبرد كبدي الا اروى وعبير رواينات بسم الله عليهن
شريفه بضحك ؛ والله ماحنا بعيدات عن بعض كلنا نفس الشي
ام راشد ؛ لا عزالله هن ريانات عود اللي يقولون
ضحكت شريفه واخذت ام راشد العنود من حضنها وجلست تتغدا معها
خلصوا وشالت ام راشد غداهم وراحت المطبخ وهي تغسل الصحون وطلعت وهي تنشف يدها وشافت العنود بالصاله لحالها وشهقت ؛ يويلي منك ياشريفه مخليتها لحالها وهي صاحيه ولا علمتني اخذها
وتنهدت تاخذها وجلست وهي تقرب الدفايه والتفتت لصوت جوالها اخذته وردت وهي ماتدري من دق والبنات مو عندها ؛ هلا .. وعليكم السلام .. يامرحبا بأم فارس اعذريني والله ماعرفت اقرا من دق .. شلونك وش اخبارك .. والله بخير الحمدلله كلنا بخير .. علامك قاطعه وانا اختك امس سيرت علينا ساره وهي مبطيه وانتي كلش يمال الصلاح مانشوفك .. اي والله قالته رجالها ينشغل وهي ماقصرت سيرت حتى وهو مشغول .. اي والله الله يعينهم .. وانتي ماعندك جيه للديره؟ ولبيتك اللي ماعاد فيه حس ياكافي ليتك تمرينه لونه يوم يخيتي الحريم كلهن يسألن عنك ماعاد جيتي ..
والتفتت لشريفه اللي جت وجلست وتسمع امها اللي ردت ؛ ماشاء الله متى .. زيين ماشاء الله مابغيتي والله كاسر خاطري مشاري تعبته الخطوط وتلقينه يستحي وهو كل شوي عند اخته وبيتكم مافيه احد ان قعد يطفش .. وان شاء الله بتجلسون ببيتكم واجد .. اشوا دام فارس اخذ اجازه يجي معكم هو واهله هو ماوده يخليكم عسى الله يحفظه هو واخوه .. اي والله اليوم ماعندي شي فاضيه .. والله انها ابرك الساعات ماتنور الديره وبيتكم بس الا بيت ابو راشد بعد ينور .. بالمزرعه ابو راشد والعيال كلهم يمكن منشغلين مب يم جوالاتهم .. اييه صحيح يمكن من الشبكه اليوم الجو هوا .. يجي شوي واعلمه اخليه يكلم ابو فارس ونحتريكم ان شاء الله .. خلاص عقب العصر وانا عند الباب .. ان شاء الله على خير ياهلا .. مع السلامه
وقفلت والتفتت لشريفه اللي قالت ؛ بيجينا احد ؟؟
ام راشد ؛ ايه ام فارس دقت تقول بيجون الديره هذا هم بيمشون ومن الظهر ابو فارس يدق على ابوك ولاعنده شبكه
شريفه ؛ متى بيجون ؟
ام راشد ؛ عقب العصر تقول ياصلون بيتهم يريحون شوي ويجونا ومعهم فارس ومرته وتقول اخذ اجازه بيجلسون ببيتهم
شريفه ؛ غريبه امس جايتنا ساره ورا ماعلمتنا ولا انتظرت تجي اليوم معهم مره وحده
ام راشد ؛ والله حتى انا استغربت ، انا كيف ادق على ابوك وهو ماعنده شبكه اخاف انه يبطي بعد ولا يجي الا المغرب
شريفه ؛ وهم الله يصلحهم المفروض يعلمون انهم بيسيرون من بدري
ام راشد قامت وهي تحط العنود بحضن شريفه ؛ الله واكبر من متى ناخذ مواعيد البيبان على بعضها واغلب الحريم كل عصريات يسيرن
شريفه ؛ هين هذي زوارات حريم عادي بين بعضنا اما رجالهم معهم وش نسوي فيهم
ام راشد ؛ مدري عنهم عاد خليني بس ادق عليهم الحين عساهم يردون
واخذت جوالها وهي تدق وحافظه شكل اسامي وارقام ابو راشد وعيالها وتعرف تدق عليهم من نفسها وجلست تمشي بالبيت وتدق ولا احد عنده شبكه
تنهدت وهي تحذف جوالها ؛ يوه والله لو دريت ماخليتهم يروحون ، ابروح احط بخور بالدوانيه اشوا ان البنات نظفوها ولا كان بلشت
شريفه ؛ انا بنوم العنود واجي اساعدك الصاله يبيلها كنس
ام راشد ؛ لا لا هينه خلك جهزي ملابسك انتي والعنود يجون من المزرعه شوي اكيد
شريفه وهي تروح الغرفه ؛ جايه جايه ماعليك
وراحت ام راشد للمطبخ وهي تجهز البخور وتجهز صياني القهوه والشاي
اخذت الجمر وهي تحطه واخذت البخور وطلعت للدوانيه فتحت الباب وهي تدخل تبخر وترتب على السريع وطلعت وهي تروح للصاله رتبتها وهي تدخل للمجلس شافته مرتب ورجعت للمطبخ بعد دقايق التفتت لصوت المكنسه وطلعت للصاله ؛ انتي وش تسوين خليه الصاله كبيره منتي وياها يجون البنات ويكنسونها
شريفه ؛ يايمه ياحبيبتي ماهي شي بس هالجهه وخلاص الباقي نظيف بعدين لي ١٨ يوم خلاص خليني اتحرك
وتأففت ام راشد وهي ترجع للمطبخ ؛ يربي من هالبنات عساهم يجون بسرعه بس
وكملت تجهز كل شي وشريفه تساعدها وخلصوا وقالت ام راشد وهي تحط الجمر ؛ خلاص ببخر الصاله والمجلس روحي الغرفه وسكري باب السيب اجهزي وجهزي اغراض العنود
شريفه ؛ زين اجل وارجعي دقي عليهم وانا بعد
وراحت الغرفه واخذت ام راشد البخور وهي تبخر الصاله وحطته بالمجلس وسكرت الباب
..........••..........
بيت ابو هادي
كانوا يجهزون وحمد وهادي بيروحون بالغصب هادي اساساً كره ديرتهم وحمد مايبي جده راجح يكرفه مثل مايقول وكان ينزل اغراض مع ابوه ودخل للصاله وهو مرتفع ضغطه والتفت لأبوه اللي كمل بعصبيه ؛ وبعدين مافيه عزيمه ولا شي ماهو كارفك لاتخليني اكرفك انا واخذ ذبيحه واعزم هناك
حمد تنهد ؛ يايبه تكفى خلها بعدين وحتى هادي تعبان من يده مايبي احد
ام هادي ؛ لا ماعليه قلت له انا شوي ونجي! وعند بيت جدانه ماحد بيجيه يزعجه وبيسألون عنكم ان ماجيتوا
هادي ؛ خلاص خلاص نروح ولا تزعلون لا انتوا ولا جداني بس بنرجع بدري
ابو هادي ؛ وان تأخرنا بعد العشاء ماعليكم بس اجهزوا خلونا نمشي بعد صلاة العصر على طول ، مريم اغراض ابوي وعمي بالسياره ترا
ام هادي ؛ طيب يلا اجهزوا نص ساعه ، بروح اسوي قهوه
وقامت وتنهد هادي وراح غرفته ومشى حمد عند غرفة شهد وهو يدخل ويشوفها تتجهز وهي اللي ماصدقت انهم بيروحون ؛ وانتي ماصدقتي قال مشينا ركضتي تجهزين
شهد اللي كانت عند الدولاب تطلع لبس ؛ وانت وش مزعلك ولا اكيد ماتحس انت تطلع للسوق وتتمشى وانا هنا بطق واموت
حمد وهو يقلدها بأستهزاء ؛ اطق واموت .. اللي يسمعك يقول بالمدينه ماتجلسين
شهد ؛ لا ما اجلس اطلع واشوف صديقاتي وجيرانا وانزل للبقاله مثل ما انت تطلع هنا وبالمدينه اما انا هنا مافيه احد والبقاله بعيده
حمد ؛ والله من الحسد انا مثلك هنا واشد بعد انكرف
شهد ؛ اطلع اطلع بلبس بس هذي كلمتك انت رح اجهز اخلص لاتأخرنا
حمد عض لسانه بقهر وهو يأشر لها بكوعه ودفته شهد وطلع وسكرت وراه الباب
..........••..........
مزرعة ابو راشد
رغم الضباب والجو اللي برد اكثر كانوا العيال للحين عند الزرايع وواقفين وسطهم يلعبون وكان نايف واقف ومغمض وتركي وراشد وهاجر واروى وراه يأشرون لبعض من يضرب وكانت من نصيب راشد اللي بعدهم وهو يضرب نايف ونزل يده بسرعه ومسك نايف ظهره ؛ عسساااك .. " والتفت يناظر تركي وراشد وهو ماسك ظهره وصرخ " ياااوك هذي ضربة واحد منكم ماهو ضرب بنت
واشر على راشد اللي ميت ضحك ؛ انت
راشد وهو يدفه ؛ غشاش صف صف
وضحك نايف ووقف راشد مكانه وهو لاف وغيروا اماكنهم واشرت اروى وهي تضربه وضحك راشد ؛ اروى
اروى شهقت ؛ وش دراك
راشد ؛ واضح خفيفه
ضحكوا وسحبها يوقفها ؛ وقفي وقفي نوريك الضرب صدق
ووقفت اروى مكانه ورجعوا يبدلون اماكنهم واشر لهم تركي وهو يضربها وشهقت اروى ؛ وجع .. " وضحكت وهي تتذكر تركي الظهر لما ضرب كتفها وكانت نفس الضربه وضحكت ؛ تركي
تركي ضحك ودفوه يوقف مكانها وهالمره كل واحد يأشر بالغصب هو اللي بيضربه بس سبقتهم هاجر وهي تضربه بسرعه وشدت على يدها تبتسم بقهر من انفضحت وضحك تركي ؛ هااااه صوت غوايش اكيد وحده من البنات
والتفت وناظر هاجر بضحك ؛ انتي انتي وقفي
ضحكت هاجر بقهر وهي ترجع اساورها لآخر ذراعها ؛ فضحتني ولا ماكان عرفت
ووقفت وهالمره اشر لهم نايف وضربها وغمضت بقوه وهي تضحك بألم ؛ نايييف اعرف ضربته
تركي ضحك وهو يضرب نايف ؛ اهب عليك من كثر ماتهبدها
ضحكت هاجر ؛ ايييه اوريه خلوه يوقف بس
وضحك نايف وهو يوقف والتفتوا لصوت ابو راشد اللي جا ؛ ياهييه ابك انتوا ماتحسون بالبرد تبون تجمدون هنا !
اروى ؛ نلعب يبه
ابو راشد عقد حواجبه ؛ وش لعبه بهالبرد امشوا امشوا للخيمه نعنبوا عدوكم
ومشوا وراه وضربت هاجر نايف ؛ هه
ورد لها نايف ورجعت ترد له وسحبهم راشد يفرقهم ودخلوا الخيمه وجلس ابو راشد ؛ مافيه دفتر وقلم ؟
نايف ناظر جاكيته واخذها وطلع قلم ؛ معي قلم بس ، ليه ؟
تركي اللي كان يدفي يدينه ؛ وبسيارتي دفتر
ابو راشد ؛ رح هاته
وقام تركي وطلع لسيارته فتح الباب وهو ياخذ من الدرج دفتر وقلبه يشوف اوراقه وتأكد مافيه شي واخذه ورجع ؛ هذا هو
اخذه ابو راشد وهو يمده لنايف ؛ اجلس اجلس اكتب انت خطك زين
نايف جلس وهو ياخذ المركى ؛ ابشر وش اكتب
ابو راشد ابتسم ؛ قصيده للعرس الليله
راشد ؛ بتحضره ؟
ابو راشد ؛ لا اذا رجعت بعطيها ابو نايض بيروح ويوصلها عني هي والمعونه
وناظر نايف ؛ عقبال اكتب قصيدة عرسك انت وتركي ان شاء الله
نايف ضحك ؛ اكتب لعرس تركي واقدمها انا بس زوجوه
ابو راشد ناظر تركي ؛ قريب ان شاء الله والعروس موجوده بس خلوه يقول تم
نايف مثل الأستغراب وهو يلتفت لتركي اللي رغم توتره حاول مايبين شي وضحك راشد ؛ ماشاء الله من بتزوجه
ابو راشد ؛ وحده قريبه اهل حنا وياهم
اروى ابتسمت من عرفت انه يقصد شموخ وهاجر عقدت حواجبها ونزل راسه تركي يصد بنظراته لاتفضحه ؛ والله مدري على خير ان شاء الله
ابو راشد تنهد ؛ اكتب اكتب يانايف .. سلام يأهل الحفل واغلى الراحيب ... وكمل قصيدته ومن خلص نطقوا العيال ؛ صح لسانك
هاجر ؛ ماشاء الله يايبه شاعر من سنين وولا مره كتبت فيني قصيده
ابو راشد ؛ ان شاء الله على عرسك ابشري
انصفق وجه هاجر وانفجرت اروى تضحك وضحكوا العيال معها ووقف ابو راشد وهو يهز راسه بأبتسامه وهو ياخذ الورقه ؛ انا بروح ماباقي على الآذان شي لو تجون وراي ازين برد الجو
راشد ؛ انا والله بمشي بعد بصلي معك هناك
وناظر ابو راشد العيال ؛ وانتوا
تركي ؛ نلحقك ، الا ام كان احد بيروح معك انت وراشد
نايف والبنات ؛ لا لا
ابو راشد وهو يناظر ساعته ؛ اجل قبل تطق ٥ وانتوا بالبيت
الكل ؛ ابشر
ومشى هو وراشد للديره
..........••..........
بيت ابو هادي
بعد نص ساعه
كان ابو هادي يصلي بالصاله والعيال وراه وام هادي بالمطبخ عندها شهد اللي قالت ؛ يمه اخاف يطلعون اهل عمي سامي ببيت جدي راجح وانا لو شفت بيان بذبحها
شهقت ام هادي اللي كانت تجهز الأغراض ؛ بنت انتبهي تلمحين لها ولا تسوين لها شي شهد والله ياويلك خليك معها مثل اول وان ماقدرتي طنشي ولاتناظرينها بس لاتفضحينا !
شهد تأففت ؛ قاهرتني قاهرتني يمه الله ياخذها
ام هادي ؛ خليها ولا تبينين لها شي تجيبين لنا مشاكل ، بعدين ماضنتي نلقاهم عنده واذا لقيناهم بنسلم واروح عند امي وانتي تجين معي
شهد ؛ طيب يمه ماترسلين لخالاتي تقولين لهم يجون والله بيصير طفش اذا مافيه احد
ام هادي ؛ والله كلهم عند اهل رجالهم اميره بالرياض ومرام بكره عرس اخو زوجها وبناتها لاهيات بعرس عمهم محد فاضي
شهد ؛ وخالتي روان ، على الاقل لو ريما تجي
ام هادي ؛ والله عند اهل رجالها بعد ما اتوقع تجي ، بس خوالك واهلهم هنا ماعليك يجون كلهم ان شاء الله
شهد تنهدت ؛ كلهم اصغر مني
ام هادي ؛ ماعليه خلينا بس نخلص من المحل وابوك يفضى ونروح ننام هناك ويجون كلهم
شهد تنهدت ؛ ياذا المحل
ام هادي ؛ خذي خذي السله حطيها عند الباب بروح البس
وطلعت واخذت شهد السله وطلعت الصاله وهي تشوفهم تو خلصوا صلاه وناظرها ابو هادي ؛ ها مشينا
شهد ؛ يلا بس تلبس امي ونمشي
ابو هادي التفت للعيال ؛ انتوا بتروحون مع بعض هادي مايقدر يسوق ولا تعالوا معنا
حمد ؛ لا لا نجي انا وهادي وراكم
ابو هادي قام وهو يفتح الشباك ؛ وخذوا فرواتكم والبسوا ثقيل تراه برد ويمكن تمطر بعد ، ماشاء الله يالجو
وجت ام هادي وهي تحط شنطتها وتعدل غطاها ؛ مشينا .. شهد خذي لك شرشف لاتبردين هناك
ابو هادي ؛ اي والله تو اقوله يلا يلا
ولبس فروته واخذ شماغه وعقاله وطلع للسياره
بعد دقايق طلعوا كلهم وسكرت ام هادي الباب وهي تركب وفتح ابو هادي الشباك ؛ ها ياحمد بتروح انت وهادي ها
حمد وهو يركب ؛ ايه ايه وراكم
هز راسه ابو هادي وحرك ومعه ام هادي وشهد ووراهم حمد بسيارته ومعاه هادي
حمد ؛ وين الحماس اللي دايم على الديره
هادي ناظره وصد للشباك ؛ ماكنك تدري .. ماكان حب الديره الا من حبها
حمد تنهد وسكت لثواني وناظره ؛ وش رايك نسحب عليهم وننحاش الرياض نتمشى
هادي ابتسم ؛ ودي والله
حمد ضحك ؛ افا عليك والله لا اقول لأبوي نعبي بانزين ونلحقكم واسحب ونجي المغرب
هادي ناظره ؛ تسويها ؟
حمد ؛ الحين تشوف
هادي دقه بمزح ؛ كمل كمل لايرتفع ضغط ابوي علينا
حمد ضحك بقهر ؛ انا والله اللي بيرتفع ضغطي ياخي مدري وش مشكلته جدي معي تقل ورع عنده
هادي ؛ تستاهل تذكر يوم تضحك علي جاك الدور الحين ، بعدين جدي هذا هو مب اول واحد انت قبلك انا وعيال عمي سامي كلهم
وتأفف حمد بطفش وهو يكمل طريقه ورا سيارة ابوه
..........••..........
المسجد
طلع ابو راشد بعد ماشاف ابو نايض وعطاه الظروف يوصلها عنه ويسلم له على العريس وابوه وهو يشوف المكالمات ومد الجوال لراشد ؛ شف اللي داق منهو؟
راشد اللي كان يناظر جواله ؛ ابو فارس وامي وشريفه .. حتى انا دقوا عليه امي وشريفه
ابو راشد اخذ جواله وهو يركب ؛ الله يستر عسى مافيهم شي ، وابو فارس غريبه داق لايكون فيهم شي عاد نايف يقول مشاري ماداوم اليوم
راشد وهو يحرك للبيت ؛ لا لا ان شاء الله خير
ووقف عند الباب ونزل يسبق ابوه ودخل وهو ينادي ؛ يمه .. يمه
ام راشد طلعت من المطبخ ؛ هنا علامك بسم الله جاي تصايح
راشد ؛ فيكم شي ؟! داقه علي انتي وشريفه وعلى ابوي
ام راشد تنهدت ؛ لا مافينا شي
دخل ابو راشد ؛ السلام عليكم ، عسى ماشر دقيتوا علينا وحنا ماعندنا شبكه
ام راشد ؛ وعليكم السلام .. لا بس دقت ام فارس تقول جايين للديره وبيسيرون علينا وتقول ابو فارس داق عليك ولا رديت
ابو راشد ؛ ماشفت مكالمته الا يوم طلعت من المسجد وشفتك داقه انتي وشريفه علي وعلى راشد قلت اكيد صاير شي
ام راشد ؛ لا الحمدلله .. بس يوم دريت انهم بيسيرون وانا ادق عليكم كلكم خفت يجون وانتوا بالمزرعه
راشد ؛ العيال قالوا يلحقونا على ٥ وهم هنا
ام راشد ؛ يويلي لا خلوهم يجون ابي البنات يعاونوني ، ابو راشد دق وان كان ماعندهم شبكه ارسل العامل يعلمهم واذبح لهم عيب مبطين عن الديره
ابو راشد ؛ ان شاء الله يبشرون ، راشد انقز للسوق ارسل نواس ولا اقول رح رح انت احسن خلهم يجون بسرعه ونقوا ذبيحه زينه وتعالوا هوا
راشد وهو يطلع ؛ ابشر ابشر
وركب مستعجل وحرك يرجع للمزرعه واخذ ابو راشد جواله ؛ ماعاد فيه وقت ماعلمتك متى يجون ؟
ام راشد ؛ الا بعد العصر ساعه وشوي وهم هنا
ابو راشد وهو يدق على ابو فارس ؛ شريفه وين ؟
ام راشد وهي ترجع للمطبخ ؛ قلت لها تدخل الغرفه عن البخور لا يشم عليها
ورد ابو فارس وابتسم ابو راشد ؛ سلام عليكم .. ياهلا يالله حيه .. وشلونك عساك طيب .. والله بخير ونعمه .. اسفهلت المحاسن حي الله من جاها .. اي والله كنت بالمزرعه تو جيت ونحتريكم .. لا لا والله فاضين حياكم الله الساعه المباركه .. ان شاء الله ان شاء الله .. ياهلا
وقفل ومشى المطبخ ؛ يقول على المغرب ، بروح السوق اجيب شي ناقص ؟
ام راشد ؛ ايه ايه جب معك .... جلست تعدد عليه الاغراض وهز راسه وطلع مستعجل للسوق
..........••..........
المزرعه
وصل راشد وهو اللي كان مسرع وبأقل من نص ساعه وصلها ومشى مسرع للخيمه وفزوا العيال من شافوه
تركي ؛ علامك رجعت!
راشد وهو ياخذ نفس ؛ انهج انت وياهم للبيت ابو فارس واهله جو للديره وبيسيرون علينا وامي تدق من الظهر ولا كان عندنا شبكه
نايف ؛ وشو! وليه ماقال مشاري
راشد ؛ انت ماتفهم! اقولك امي دقت وماعندك شبكه وشلون بيعلمك مشاري وانت هنا
اروى وهاجر كانوا واقفين ولا يدرون شسالفه ولا يعرفون من ابو فارس بس من قال نايف مشاري ناظروا هاجر واروى بعض بسرعه وهم يستوعبون ان اخو مشاري الكبير فارس وابو فارس هو نفسه ابو مشاري وهم اللي بيجون لهم والتفتوا على راشد اللي كمل ؛ بروح اطلع ذبيحه وانتوا روحوا للبيت اسرع من البرق تفهمون اسرع منه الناس جو سرعه!
فزوا كل واحد ياخذ اغراضه ومشوا بسرعه مع تركي اللي ركب وركبوا كلهم وحركوا للبيت
وراح راشد للغنم طلع ذبيحه يصلخها هو والعامل بسرعه
بالسياره ..
نايف وهو يحاول بالشبكه بعصبيه ؛ الله يشغلك من ابراج ان كانك عقوبة ذا الديره واشين لافيها!
تركي ؛ انا بفهم وش جايبهم فجأه كذا اهله مب بالرياض متى امداهم يجون
نايف ؛ وش يدريني عنه ولا يعلم يهب ياوجهه
اروى ؛ الحين ذولا اهل خويك مشاري صح؟
نايف ؛ ايه
اروى ناظرت هاجر وهاجر كانت مثلها مستغربه جيتهم فجأه رغم ان امس كانت ساره اخت مشاري عندهم ولا قالت لهم وحست اروى انها فهمت بعكس هاجر اللي للحين تفكر ..
دخلوا للديره وبوقت واحد كلهم التفتوا لصوت جوالاتهم يشوفون اتصالات امهم وشريفه وعقد حواجبه نايف ؛ مشاري مادق!
تركي ؛ انتوا داقه عليكم امي وشريفه ولا بس انا مفجرين جوالي
اروى ؛ حتى انا
هاجر ونايف ؛ وانا بعد
نايف تنهد ؛ ياخي والله غريبه جيتهم
اخذت نفس هاجر بتوتر تراقب الطريق
وصلوا للبيت ونزلوا لداخل بسرعه ودخلوا العيال للمطبخ والتفتت ام راشد بعصبيه ؛ كان قعدتوا بعد نعنبوا بليسكم لو دريت ماخليتكم تروحون!
تركي ؛ عيني خير يايمه وهم بعد الله يصلحهم احد يجي كذا فجأه
ام راشد ؛ ليت ابوك يسمعك اضنه يقص لسانك ، البنات وين !
نايف ؛ هذا هم جو
ام راشد التفتت لهاجر واروى ؛ روحوا بسرعه نزلوا عباياتكم وتعالوا جهزوا معي القهوه ، وانتوا طلعوا صحون وقدر العشاء من المخزن فوق الدولاب بسرعه
ودخلوا تركي ونايف للمخزن وهاجر واروى راحوا لغرفتهم ونزلت هاجر عبايتها ؛ اروى تكفين وش جايبهم
اروى سكرت الباب وقربت تسحب هاجر وهي تقصر صوتها ؛ ابك هذا وجهي ان كانهم مب جايين خطبه!
هاجر شهقت وكملت اروى ؛ بس الله لايوفق العدو ماجو الا اليوم ... اسمعي بروح المطبخ اساعد امي وانتي روحي تروشي عن ريحة النار والشوي وانا ان امداني تروشت اهم شي انتي اركضي
هاجر بخوف ؛ ارروى!
اروى نزلت عبايتها وهي تحذفها وتطلع ؛ اخلصي ماهو وقتك جو
وطلعت بسرعه وهاجر ترجف بتوتر وهي شوي وتبكي وركضت للحمام تتسبح وهي رغم برودة الجو والماء الا انها من توترها تحس انها بعز الصيف
اروى دخلت المطبخ ؛ يمه قلت لهاجر تتروش بساعدك انا وان خلصت تجي واذا امداني بتروش كلنا كاتمنا الشوي والنار
شهق نايف اللي كان يضبط غاز القدر بالمخزن ؛ يااااوه ابك كلنا يايمه
ام راشد ؛ تستااهلوون يومني اقول محد يطلع نعنبوا بليس وش موديكم احسن عشان ثاني مره تطعمون العلم صحيح
تركي بضيق ؛ يالله عساهم يتأخرون
وكملوا يجهزون والمطبخ منقلب ام راشد تجهز القهوه واروى ترش الصحون اللي طلعوها العيال وتركي ونايف بالمخزن يركبون الاسطوانه بالغاز
جا ابو راشد بعد دقايق وهو ينزل الاكياس ؛ هه حطوا حطوا الفواكه بصحون وهذي الاغراض اللي تبين يأم راشد
ام راشد ؛ خلاص ماعليك رح البس انت بيجون
وراح ابو راشد للغرفه وطلعت شريفه للمطبخ ؛ انتوا مابغيتوا تجون
ام راشد ؛ انتي علامك طلعتي والبخور بالصاله!
شريفه ؛ لا خفت ريحته بساعدكم
واخذت الصحون ترتب وتوديهم للمجلس ونايف وراشد اخذوا الصحون والصينيه للدوانيه وراحوا برا للمخزن جمعوا الحطب ورجعوا للدوانيه حطوه بالمشب وجلسوا يشبون النار بسرعه وجا ابو راشد ؛ بس بس خلوها خذوا المدخنه وجددوا الجمر وهاتوا عود بسرعه عن ريحة الدخان لايكتمنا
وفز نايف ياخذها للمطبخ ؛ يمه شبوا فحم وعطونا عود
ام راشد ؛ انا مبخره الدوانيه قبل شوي!
نايف ؛ لا شبينا نار عطونا سرعه
شريفه حطت الفخم على النار ؛ خلاص الحين ادخل غير ملابسك وتعال خذه وخل تركي يجي يغير ان جو ماتقدرون تدخلون
نايف وهو يطلع ؛ يلا يلا
اروى جت من المجلس ؛ خلاص يمه حطيته فيه كل شي جاهز
ام راشد ؛ روحي البسي اجل وشوفي هذي وين راحت خليها تطلع سرعه
هزت راسها اروى وركضت داخل وهي تدق باب الحمام ؛ هاجر اخلصي اطلعي
هاجر من داخل بعصبيه ؛ الحمام الثاني تروشي فيه
كان بجنبه حمام " الله يكرمكم " برضوا ونطقت اروى ؛ ماني متروشه انتي اخلصي عشان يمدي شعرك ينشف يالمصروعه اطلعي
هاجر تأففت بتوتر ؛ خخلاص اص الحين
ووقفت اروى بالسيب وفتحت المغسله وتغسل عند المرايه وبللت شعرها وهي تمسحه بالمويه على السريع وركضت للغرفه بدلت بسرعه بعد وتعطرت وعطرت شعرها وطلعت على طلعة نايف ؛ اروى اروى جابك الله هاك الشماغ متعفس اكوييه بسرعه
اروى ؛ يويل ويلي منك امي تبيني فاضيه لشماغك انا!
نايف وهو يدفها لطاولة الكوي ويشبك الكوايه ؛ انا اروح لها بس اكويه تكفين
وطلع مستعجل للمطبخ ودخل ؛ ها يمه وين الجمر
ام راشد كانت بالمخزن تصب مويه بالقدر وقالت شريفه اللي واقفه عند الفرن ؛ هذا هو هذا هو هاك
اخذه نايف ؛ والعود
شريفه طلعته من الدولاب ؛ هه
اخذه بسرعه وراح للدوانيه ؛ تركي رح البس انت
تركي ؛ شماغك وينه
نايف اللي كان لابس طاقيته والعقال معلقه بيده ويحط العود على الجمر ؛ تكويه اروى جبه معك وانت جاي
هز راسه تركي وراح داخل وجلس نايف يبخر ويتبخر هو وابوه
جا راشد بعد دقايق ونزل وهو ينادي ؛ نايف ترركي
طلع نايف ؛ هاه
راشد وهو يفتح الباب ؛ تعال تعال نزل معي اللحم
جا نايف وشال معه القدر ودخل للمطبخ هو وراشد ؛ يمه هذا اللحم مغسول وكل شي بس احذفوه بالقدر
ام راشد ؛ زين زين رح البس بيجون
وطلع راشد لقسمه وجا ابو راشد ؛ هاه اشوف اللحم ، لا اشوا واجد حطوه كله يلا تلقونهم جايين
داخل ..
طلعت هاجر وركضت للغرفه وهي تسمع اصواتهم بالمطبخ ودخلت للغرفه وهي تبدل بسرعه وفتحت الباب من دقت اروى ودخلت
اروى ؛ مابغيتي نشفي نشفي شعرك وتعطري وحطي مكياج خفيف ... اقولك خطبه يبنت واضح وضوح الشمس
هاجر وهي تنشف شعرها ؛ لو كشخت بتشك امي
اروى ؛ لا ماهي شاكه قولي كنا جايين من المزرعه وحالتنا حاله وكشخنا عيب مانكشخ وهم اول مره بيشوفونا بعدين ماهي قايله شي يوم جو اهل ابو هادي كشخنا بعد
هاجر اخذت الروج وهي تحط لأروى ويدها ترجف ؛ اجل حتى انتي حطي معي
اروى اخذته ؛ هاتيه احط انا وفكي شعرك انا وانا ريحته نار وشوي عطرته وفكيته
وكملت هاجر تتضبط واروى تساعدها
بالمطبخ دخل تركي وبنفس الوقت دخل راشد من الباب الثاني وكان متعطر وشهقت ام راشد ؛ شريفه نفاس منهو اللي جاي بالعطر!
شريفه طلعت بسرعه وضرب جبينه راشد ؛ والله ناسيها وهي الله يصلحها ليه داخله هنا البنات وين!
تركي ؛ بالغرفه خلاص امش خلصنا يمه روحي للمجلس خالصين من كل شي
وطلعت ام راشد وطلعوا راشد تركي للدوانيه ومد تركي لنايف شماغه ؛ هاك انت
اخذه نايف يلبسه وجلسوا ينتظرون ابو فارس واهله
داخل
مشت ام راشد للغرف ودخلت عند البنات ؛ انتوا وش تسوون وين رحتوا !
اروى ؛ اءء يمه اتجهز وهاجر تنشف شعرها
ام راشد ؛ باخين عطر وشريفه نفاس انتوا علامكم!
هاجر ؛ ايه يمه عن ريحة النار والشوي مانبيهم يقولون علينا وهم من سنين ماشافونا
ام راشد مسكت راسها وهي تطلع وتنادي ؛ ياعذابك ياشريفه حطي حطي من دوا الشمم عسى الله يعديها على خير
وراحت غرفتها بدلت ملابسها وطلعت
طلعت شريفه بعد دقايق وراها ومعها العنود وناظرتها ام راشد ؛ الله يستر من هالعطور والبخور لاتشمين انتي وبنتك
شريفه ؛ لا حطيت دوا الشمم قبل شوي ورجعت احط الحين ما اشم ريحه اشوا
ام راشد ؛ الحمدلله ، ماكنهم تأخروا ؟
شريفه وهي تشوف ساعتها ؛ اي والله جت ٦ غريبه
ام راشد ؛ تعالي تعالي للمجلس
وراحوا وجلسوا ينتظرونهم لدقايق وفزت ام راشد على صوت طق باب الحوش اللي كانوا فاتحينه وفاتحين باب الصاله اللي طلعت منه ام راشد وهي تمشي لهم ؛ ياهلا ياهلا
ام فارس رفعت كفها بأبتسامه ؛ سلام عليكم يأهل البييت
وجت ام راشد تسلم ؛ وعليكم السلام يالله حيهم
ام فارس وهي تسلم عليها ؛ الله يحييك وشلونك
ام راشد ؛ بخيير بخير شلونك انتي وش اخبارك
ام فارس ؛ والله بخير الحمدلله
وسلمت ام راشد على ساره ؛ ياهلا ياساره وش اخبارك
ساره ابتسمت ؛ بخير الحمدلله
وسلمت ام راشد على اللي بجنبها ؛ ياهلا ياهلا ماشاء الله انتي مرت فارس ان ماخاب ضني
ام فارس ضحكت ؛ اييه هذي اماني ، وهذي يارا بنتها
وسلمت عليها ام راشد ؛ وش اخبارك
اماني بأبتسامه ؛ بخير الحمدلله
وسلمت ام راشد على بنتها الصغيره يارا وابتسمت ؛ زارتنا البركه ياهلا تفضلوا تفضلوا
ام فارس بأبتسامه وهم يمشون معها لداخل ؛ زاد فضلك
دخلوا مع ام راشد للمجلس ووقفت شريفه تبتسم
وناظرتها ام فارس وابتسمت ؛ السلام عليكم ، ماشاء الله ماشاء الله الحمدلله على سلامتك
شريفه وهي تسلم عليها ؛ وعليكم السلام ، الله يسلمك
وسلمت عليها ساره وزوجة فارس ؛ مبروك ماجبتي
شريفه ابتسمت بأستغراب ؛ الله يبارك فيك تسلمين
ام راشد ؛ هذي زوجة فارس وبنتها
هزت راسها شريفه بأبتسامه وهي تسلم على بنتها
•
بغرفة هاجر واروى كانت هاجر تمشط شعرها اللي تو نشف واروى عند باب السيب توايق عليهم من لما دخلوا من باب الحوش اللي كان مقابل باب الصاله وباب سيب الغرف مقابلهم لحد مادخلوا للمجلس ورجعت للغرفه تركض ؛ هاجر جو جو
هاجر التفتت بخوف ؛ اححلفي
اروى ؛ والله مره كبيره اكيد امه ومعها ساره ووحده ثانيه ماعرفتها معها بنت صغيره سنتين ثلاث
هاجر ؛ والرجال شفتيهم؟
اروى ؛ لا كنت بروح المطبخ بس جو قبل اطلع
تنهدت هاجر بتوتر ووقفت اروى تناظرها ؛ اشوف اشوف .. خلاص قمر قمر بس نزلي الطرحه مب لازم بدونها ازين
جلست هاجر وهي حاطه يدها على قلبها ؛ اروى قسم بالله اني ببكي احس قلبي بيطلع من مكانه
اروى ضحكت ؛ والله مالومك ماتدرين تلقينها من الخبصه جايين من المزرعه طايرين ولا منهم
هاجر ؛ لاتذكريني اصص
وضحكت اروى وهي تلتفت للباب ؛ يلا امشي خلاص
هاجر ؛ ماني خلاص اروى تكفين والله اني اتراعد
اروى قومتها وهي تمشي معها ؛ يبنت الحلال يمكن ماهم جايين خطبه بعد تلقينهم بيشوفونك وبعدين يخطبون امشي ماعليك قولي بسم الله لاتوتريني معك خلاص
وقفوا عند باب السيب وعدلت اروى شكلها وهي تناظر مراية المغسله من بعيد ولفت تعدل شعر هاجر ؛ يلا انا وراك سلمي واجلسي عند امي وسوي نفسك ماتدرين وش السالفه استغبي يلا يلا
واخذت هاجر نفس تبعد التوتر وتنحنحت من صوتها اللي راح ومشت واروى وراها ودخلوا للمجلس وانربط لسان هاجر ويادوب طلع صوتها مع اروى اللي تداركت الوضع ونطقت ؛ السلام
الكل ؛ وعليكم السلام
وقفت ام فارس هي والبنات وابتسمت ام راشد ؛ هذولي هاجر واروى ، هذي هاجر
قربت هاجر تسلم على ام فارس اللي يمينها واللي ابتسمت بأعجاب وارتفع صوتها تهلي ؛ ياهلا ياهلا ماشاء الله تبارك الرحمن
مسكت وجه هاجر بكفوفها وهي تبوس خدودها بأبتسامه ؛ ياذكر ربي ماشاء الله
كانت اروى واقفه ورا هاجر تنتظر ام فارس اللي استلمت هاجر تبوسها وترحب تخلص وبرضوا ساره اللي ضحكت وهي تشوف حماس امها وترحيبها بهاجر وكانت هاجر واقفه ماسكتها ام فارس تسلم عليها وتمسح على شعرها وتناظرها بأعجاب واتسعت ابتسامتها من ناظرت وجه هاجر وحياها وكانت هاجر كاتمه نفسها لاتبكي من التوتر وترجف ورجعت تحضنها ام فارس اللي حست برجفتها وابتسمت بتعجب ؛ بسم الله عليها حياويه هالبنت!
ضحكت ام راشد وهي كانت مستغربه الوضع هي وشريفه وماصدقت هاجر تخلص ام فارس وسلمت على ساره وهي ترجف وابتسمت ساره ؛ شخبارك
هزت راسها هاجر ولا قدرت تتكلم وسلمت بعدها على زوجة فارس ؛ هلا هاجر ماشاء الله كيفك
نطقت هاجر بالغصب ؛ ببخير
وسلمت اروى على ام فارس اللي نطقت بأبتسامه ؛ ياهلا وغلا وشلونك ياحبيبتي
اروى ابتسمت وهي تحاول ماتكون اجرأ من هاجر بكثير عشان لايشكون ؛ بخير الحمدلله
وسلمت على ساره واماني وهي تبتسم وترد عليهم وجت بتجلس هاجر عند امها ونادت ام فارس ؛ لا لا والله ان تجلسين عندي تعالي
وسعت لها مكان وكتمت اروى ضحكتها على شكل هاجر ووجهها ومشت هاجر تجلس عند ام فارس وجلست اروى عند امها
ام فارس بأعجاب ؛ ماشاء الله يأم راشد على هالبنات كل وحده تقول انا ازين
ام راشد ضحكت ؛ تسلمين ياحبيبتي
كانت ام فارس تناظر هاجر وهي توقعتها حلوه لكن مو هالكثر ابد تناظر هدوءها وابتسامتها الخفيفه وخدودها اللي حمرت من توترها ورزتها وشعرها وملامحها بأعجاب ماخفى على احد ابد لدرجة ام راشد شكت وهي تناظر شريفه وتنحنحت اروى تناظر ساره بأبتسامه ؛ وين يزن ؟
ساره ابتسمت ؛ مع ابوه بالدوانيه
كانت اروى تحاول توخر الصمت اللي تعرف انه يوتر هاجر ولو استمر اكثر بتبكي وانتبهت لملامح هاجر وانقذها امها اللي تكلمت ؛ ماشاء الله يا اماني جبتي يارا بس اذكر قبلها جبتي ولد الظاهر
اماني هزت راسها بأبتسامه ؛ ايه غيث مع ابوه بالدوانيه عمره ٦ سنين اكبر من اخته بسنتين
ام راشد ؛ ايه والله تذكرت بعرس ساره كان كبر ولدها يزن الحين
ساره ؛ ايه وكانت حامل في يارا
ام راشد هزت راسها بأبتسامه وناظرت ام فارس ؛ ابطيتي عن ديرتك يأم فارس اخذتك الرياض عنها
انتبهت ام فارس وابتسمت ؛ والله ماودي بس تعبت ولا اقدر اجلس بالبيت عقب ماتزوجت ساره ورحت عند بنتي الثانيه اماني وولدي فارس وهالمره اي والله صدقتي ابطينا عن الديره لكن جينا الحمدلله
ام راشد ابتسمت ؛ الحمدلله نورتوها والله
ام فارس ؛ منوره بأهلها
التفتت ساره لصوت جوالها واخذته وهي تقرا الرساله وبجنبها اماني والتفتت ساره بأبتسامه لأماني اللي هزت راسها تبتسم ولفت ساره لأمها وغمزت لها بالخفى وفهمتها ام فارس وتنحنحت ..
•
قبل دقايق
في الدوانيه
دخل ابو فارس ومعه فارس ومشاري ونسيبهم ابو يزن زوج ساره وولده يزن وغيث ولد فارس وارتفع صوت ابو راشد بأبتسامه يرحب فيهم ويسلم على ابو فارس ؛ اررحبوا الله يحييكم والله انها نورت الديره
ابو فارس ابتسم وهو يبادله السلام بحراره ؛ الله يبقيك نورها انت يبو راشد
وسلموا العيال على بعض ونايف اللي سلم على مشاري وهو يدق كتفه بضحك ؛ ساحب اليوم ولا علمتني
مشاري ضحك بتوتر ؛ نفاجئك بجيتنا
ضحك نايف وسلموا العيال على ابو راشد وابتسم ؛ اقلطوا اقلطوا يالله انك تحييهم
الكل ؛ الله يبقيك
دخلوا وجلسوا واخذ تركي الدله يقهويهم ونايف يقرب لهم التمر والضيافه وسط سوالف ابو راشد وابو فارس اللي يسألون عن احوال بعض وابتسم ابو فارس ياخذ الفنجال من تركي ؛ سلمت
وحط فنجاله وناظر ابو راشد ؛ انا ادري والله مستغرب جيتنا وحنا تو جينا الديره لكن ماجابنا الا طلب غالي مثلك
ابو راشد عقد حواجبه ؛ تقهوو وابشروا جيتكم والله عزيزه وغاليه ماتنردون
ابو فارس ابتسم ؛ مانتقهوى الين توافق على طلبنا
مد تركي الفنجال واخذه ابو راشد يحطه وهو يناظر ابو فارس بأستغراب وبعدها جلسوا تركي ونايف وحتى هم مستغربين الجيه اللي مالحقوا يستوعبونها وحسوا ان وراها شي
ابو راشد هز راسه ؛ ابشروا
ابو فارس بأبتسامه ؛ جينا والله طمعانين في نسبكم اللي والله بأغلى الاثمان وينشرى بالذهب وانت اخو دنيا من سنين
والتفت يأشر على مشاري اللي مبتسم بتوتر ونايف اللي مصدوم ومن بعدها على يزن ؛ وهذولي بعد خوتهم من يوم انهم هالكبر ، ويشرفنا والله نخطب بنتكم المصونه هاجر لولدنا مشاري على سنة الله ورسوله ماحنا لاقين احسن منكم انت بحسبة اخو ومشاري ونايف اخويا واخوان من صغر .. وش قلت؟
سكت المجلس لثواني من ابو راشد وعياله المصدومين الى مشاري المتوتر وفارس اللي بجنبه يطبطب على كتفه بأبتسامه ولزوج ساره اللي ابتسم ياخذ جواله يرسل لساره يبلغها انهم خطبوا
ابو راشد ابتسم بذهول ؛ والله ماحسبتها يبو فارس! انتوا والله والنعم فيكم والكل يشهد ومشاري والله مثل نايف وولدنا من سنين وانها الساعه المباركه ، لكن بنشاور البنت وعسى الله يكتب الخير وانا من عندي والله ما اردكم رجال وكفو من اكبركم لأصغركم
ابو فارس زادت ابتسامته ؛ ماعليكم زود حقها وشاوروها وحنا هنا شهر الله يقدم اللي فيه الخير
كان نايف يناظر مشاري اللي يتصدد عنه بربكه وهو مصدوم وتركي مو اقل منه وراشد يناظرهم وهو مثلهم وكان المجلس مافيه الا صوت ابو راشد وابو فارس اللي دخلوا بسوالفهم عن الديره ووش صار فيها
•
نرجع داخل
الوقت الحالي
تنحنحت ام فارس وهي تلتفت لأم راشد بأبتسامه ؛ بطلبك طلب يخيتي وعساك ماترديني
ام راشد ابتسمت ؛ ماعاش من يردك آمري
ناظرت ام فارس اروى ونزلت انظارها لهاجر اللي بجنبها تفرك يدينها بتوتر ورجعت تناظر ام راشد اللي مسحت كتف اروى ؛ قومي قومي ياحبيبتي انتي وهاجر شوفوا العشاء
اروى هزت راسها ؛ ابشري
وفزت هاجر تطلع قبلها ماشيه للغرفه ولحقتها اروى ترد الباب وراها ووقفت يساره عند باب الصاله اللي يطلع ع الحوش وهي تتسمع
ام فارس ابتسمت ؛ جيتك وانا والله بخطب بنتك هاجر بسم الله عليها لمشاري ولدي ، والله ما القى احسن من هاجر ومشاري يبيها وهو من معزة نايف عنده يبي ياخذ اخته
اروى اللي كانت برا رجفت بتوتر وهي تستوعب جدية الوضع ولا قدرت توقف تتسمع اكثر وهي تمشي بسرعه للغرفه ودخلت وهي تسكر الباب ؛ هاجر هاجر ..
بالمجلس ابتسمت ام راشد بذهول وهي تلتفت لشريفه اللي مبتسمه وتمسح على راس العنود ورجعت ناظرت ام فارس اللي تناظر ساره واماني اللي يبتسمون وهزت راسها ؛ الساعه المباركه ومشاري غلاته من غلاة نايف وحنا وانتوا جيران من سنين واهل ، بس عاد اشوف ابوها ونشاور هاجر ومايصير خاطركم الا طيب
ام فارس ابتسمت وهي تكمل فنجالها وهي اللي صح كانت بتخطب هاجر لمشاري وهي ماشافتها لكن من شافت هاجر مابغتها تكون الا لمشاري
بالغرفه قالت اروى اللي سمعته لهاجر اللي شهقت وهي تبكي ؛ اسألك بالله!
اروى عقدت حواجبها ؛ والله علامك بسم الله
هاجر بخوف ؛ اخاف قايل لهم انه شايفني ارروى
وجلست تبكي وتوترت اروى وهي تجلس عندها وتمسح ظهرها ؛ يبنت لا ماعليك سلامات بيقول شفت بنتكم طلعت بوجهي وابيها! وقبل كل هذا وش بيقول لأهله بيقول والله درعمت ببيتهم وشفت بنتهم شوفي هم حتى لو انهم بالرياض ومتفتحين ماتوصل وصدقيني ماقال لهم تلقينه قايل بخطب اخت خويي مثل ماقالت امه ولا قال شي غيره وبعدين كم مره اقول لك اذا ابتلشتي اجحدي ماتعرفين تجحدين تراها سهله قولي ماقد شفته واذا هو شايفني مادريت عنه وبعدين وين شافني الا ان كانه متدعس ببيتنا ، ماعليك منه اجحدي اهله على طول جلستي تبكين!
هاجر مسحت دموعها ؛ ياربي ياربي ماعلمهم يويله قسم بالله ما اوافق عليه!!
اروى ناظرتها وضحكت ؛ اخصص ياهاجر يعني موافقه تاخذينه
هاجر ببكي ؛ ااء يعني ماعندي مشكله افكر بس لو قايل بتفل بوجهه وماراح اوافق
اروى دقتها بضحك ؛ تفكريين واضح موافقه من مبطي من يوم ماشفتوا بعض وانتي مسميه عيالكم بعد
هاجر ضربت فخذها ؛ انقلعي بس
ضحكت اروى وهي تلف وجه هاجر للمرايه ؛ شوفي شوفي وجهك شلون حمّر ... " ونزلت يدها وهي تضرب رجولها بحماس " يوووه فاتك شكلك قبيل نذر اني بغيت اموت من الضحك وجهك احمر وترجفيين بس والله مالومك امه ساعه تسلم وتمدح انا استحيت وانا مالي دخل ، شفتيها يوم تضمك وتقول حياااويه بس يازينها واضح حليله ومن يوم قالت رحت للرياض قالت بنتي الثانيه اماني وبعدين قالت وولدي فارس وانا اعرف انها طيبه
هاجر ضحكت من بين دموعها ؛ ااه والله اني بغيت ابكي قدامها وترتني ، تصدقين ماناظرتها اماني كيف شكلها ؟
اروى ؛ حلوه والله كاشفه هي وساره عساهم ينزلون عبيهم بشوف كشختهم ، اماني حاطه مكياج كاشخه حمره وكحل ومسكره حتى ساره بس اماني وجهها واضح حلو بدون المكياج وبنتها يارا ماسلمتي عليها يازينها مثل امها تهبل
هاجر ؛ اروى الصدق تشوفين من احلا انا ولا اماني ؟
اروى انفجرت تضحك ودقتها هاجر بقهر وهي تصد ونطقت اروى بضحك ؛ كلكم كلكم حلوات بس انتي احلا بشوي
هاجر ؛ لاتجاميلني قولي الصدق!
اروى ضحكت ؛ يبنت والله انتي صح كل وحده فيها شي زين الوجه هي لها خدود حلوه وملامحها سمحه بس انتي بالعيون والخشم والفم احلا وبالزول عاد لا والله انتي اطول ورزه هي قصيره شوي واسمن منك بس ترا انتي حتى لو تسمنين بعد بتصيرين احسن منها ومنهم كلهم
هاجر هزت راسها وسكتت لثواني وتنهدت ؛ لو انهم تكلموا قبل يروحون ازين الحين وشلون اقابلهم
اروى شهقت ؛ ابك يعننك ماتدرين وش السالفه ولا وشوله طلعونا عشان نرجع نجلس ولا نسمع شي علامك خبله يويلي بغيتي تفضحينا
هاجر ؛ اص عني انا من اول مستحيه منهم وانا بس شكيت كيف وانا ادري
اروى ؛ ابك ليتني ماعلمتك ، اسمعي شوي ونرجع ونجلس عاادي ولا كنا ندري عن شي
هاجر ؛ مقدرر مقدر
اروى وهي تقومها ؛ اش امشي المطبخ يعننا نشوف العشاء مثل ماقالت امي ونتوايق على اللي بالدوانيه
هاجر شهقت ؛ يويلي الله يعطيني قوة قلبك جنيه انتي جنيه تبين امي تدخل تشوفنا ولا العيال يجون
اروى وهي تمشيها معها ؛ نسكر الباب والعيال نشوفهم لاجو اخلصي
وسحبتها وراحوا للمطبخ وسكرت اروى الباب وهي تمشي لشباك المطبخ ؛ فيه ٦ نعول غير ابوي والعيال
هاجر ؛ ابو فارس وفارس ومشاري ونعلتين صغار حقات ورعان تلقينهم يزن وولد اماني وفارس غيث
اروى ؛ ونعول الثاني منهو ؟
هاجر ؛ يمكن رجال ساره
اروى ؛ اييه ناسينه شكله هو مافيه غيره
وشهقت من طلعوا من الدوانيه ورا بعض ؛ يمه يمه
هاجر ؛ امشي امشي لايجون العيال وحنا هنا
اروى سحبتها ؛ تعاالي مشاري شوفيه
وقفت هاجر تناظره وكان واقف على باب الشارع والكل معه ويتكلمون ؛ وين رايحين
اروى ؛ مدري ليكون مشوا ، يبنت شوفي مشاري يشبه نايف بسم الله من قوة صداقتهم صاروا نسخه
هاجر ؛ والله اني قد قلته يوم شفته بالبقاله نسسخته
اروى ضحكت ؛ بالببقاله اجل
هاجر دقتها ؛ وش اسوي عقب ماشافني صارت الانظار عليه
شهقت وهي تشوف نايف يمسك يد يزن وغيث ولد فارس وجاي ماشي للمطبخ ؛ يويلي يويلي
ولا لحقت اروى تستوعب وهي تناظر هاجر اللي ركضت للمخزن تتخبى فيه ووقفت اروى بصدمه من انفتح الباب وهي تلف للمغسله تفتح المويه على اساس تغسل ودخل نايف وهو يسكر الباب وراه ؛ اروى اروى
اروى لفت ؛ بسم الله هلا .. من ذول
نايف ؛ ولد فارس وولد اخته وديهم لأمهاتهم بنصلي ونرجع .. ادخلوا امهاتكم داخل شاطرين
وطلع وسكر وراه الباب ورجعت اروى تناظر من الشباك وماشافت احد الا نايف اللي طلع يلحقهم ورجعت تلتفت ؛ هيه اطلعي
وناظرت يزن وغيث وهي تبتسم بوهقه ؛ هلا هلا ياحلوين .. يزن عرفتني ؟
يزن هز راسه ؛ لا
اروى ؛ ول ... ماشاء الله غييث ولد فارس صح
غيث ناظر هاجر اللي وقفت عند اروى ؛ ايه
اروى ؛ وش يقولون بالدواني... دقتها هاجر بقوه ومسكت اروى جنبها وهمست وهي تشد على اسنانها بألم ؛ اههب ، انطمي خليني اتكلم ... ايه تعرف نايف انت
غيث ؛ وين امي
اروى ؛ ااء اصبر اوديك الحين ماعليك بس بسولف معك ، تعرف نايف اتحداك منهو اخوه شسمه ؟
غيث ؛ مدري
يزن كان ينقل انظاره من هاجر لأروى لغيث وعضت اروى شفايفها وهي تلعب بشعره وتمسك خدوده ؛ ياازقنك انت وش تعاين .. تعرف هذي منهي ؟
يزن ؛ لا
اروى ؛ هذا مغير يقول لا ، هذي هاجر
غيث ؛ هااجر؟!
اروى وهي تعمدت تقول اسمها وبتسحب منه ؛ ايه قد سمعت بأسمها صح ؟
غيث ؛ ايه توهم قالوه بالدوانيه
هاجر طارت عيونها تناظر اروى اللي كتمت ضحكتها ؛ وش قالوا وش سمعت
غيث رفع كتفه ؛ مدري بس ابوي بالبيت قال بنروح للناس اللي عندهم زوجة عمك مشاري
تمسكت هاجر بالمغسله وراها وهي بتدوخ من الارتباك وفتحت اروى درج وطلعت منه حلاو وهي تحط بجيبه وبجيب يزن ؛ ايه ووشو بعد وش كانوا يقولون بالدوانيه
غيث طلع وحده وفتحها ياكل ؛ مدري مافهمت كلامهم
اروى ؛ اتحداك تقول وش قالوا لو انك مافهمت
غيث وهو ياكل ؛ جدي اول شي قال نبي نخطب بنتكم الماصوره هاجر لولدنا مشاري
انفجرت اروى تضحك وهي تتمسك بهاجر اللي رجفت بتوتر واستوعبت والتفتت بأستغراب ؛ وش ماصورته!
اروى وهي منهار تضحك ؛ شكله يقصد موصونه
غيث عقد حواجبه ؛ ليه تضحكين !
اروى وهي تمسك نفسها وتهوي على وجهها ؛ لا لا اضحك من هاجر يازينها عسل اختي هذي احبها وانت تحب اختك يارا ؟
غيث تذكر ؛ ايه وينهم وينهم
اروى ؛ يلا تعال نوديكم لهم يزن امش ل.... وشهقت وهي تناظر يزن اللي فاتح الحلاو وحايس نفسه ووجهه بالشوكولاته ؛ يويلي هذا وش!
هاجر نزلت راسها تناظره بصدمه وهي تشيله ؛ كله منك لهينا ونسيناه
وجلسته على المغسله وهي تفتح المويه وتغسله والتفتت اروى لغيث ؛ حراام لاتعلم احد انه اكل شوكولاته ولا تعلم انكم جيتوا هنا عشان ماتعصب عليه امه
غيث ؛ اهو ورع ماتخليه عمتي ساره ياكل لحاله
اروى ؛ ايه ايه وانت رجال ماشاء الله عليك بس نسينا حنا لاتعلم احد يعصبون عليه حرام
غيث هز راسه وهو ينتظر يزن ونزلته هاجر وهي تمسح وجهه وابتسمت اروى تسمّع غيث ؛ ماشاء الله هاجر تحبين الصغار وطيبه
هاجر ناظرتها بحده وتأففت وهي تمسك يد يزن ؛ مشينا مشينا
اروى قربت وهي تهمس ؛ لاتبينين شي زين؟!
هاجر هزت راسها ونزلت اروى تشيل يزن وهي تبوس خدوده وتطلع للصاله وهاجر محاوطه بكفها كتف غيث وتمشي معهم
دخلوا المجلس وابتسمت اروى ؛ جابهم نايف تو عندنا بالمطبخ يقول بيروحون يصلون ويرجعون
ام راشد ابتسمت ؛ هلا هلا تعالوا سلموا يالله حيهم
ونزلت اروى يزن عند امها اللي تسلم عليه ومن بعدها هاجر اللي قدمت غيث وجلست عند امها وجلست بجنبها اروى
جلسوا غيث ويزن عند ام فارس اللي مسحت على شعورهم بأبتسامه وهي كل شوي تناظر هاجر وتنحنحت ام راشد ؛ ايه وش كنا نقول ، يمكن يسوون غداء بكره ولا عشاء لمعاريسهم
ام فارس ؛ والله يمكن بنروح نبارك لهم ان كانهم سووا اعتذر ابو فارس قايل لهم بيمشي للديره وان كانهم سووا بالديره عزيمه لا والله هذا حنا فيها ماعندنا عذر بنروح
ام راشد ؛ اي والله حتى ابو راشد قال بعيد وبرد بكره ان كان فيه عزيمه نروح نبارك لهم
ام فارس ؛ الا يختك يقولون حامل مرت لافي اللي طلق
ام راشد ؛ لا لا ماهي حامل يقولون ماتبيه هي من اول
ام فارس هزت راسها ؛ الله يعوضها ويبارك للافي بمرته
ام راشد ؛ امين
ام فارس ؛ وام عبدالرحمن وين راحت مرت ولدها
ام راشد ؛ والله مدري كم لها تقول بيجون ولا جو للحين بتخلص الاربعين شكلها بتجي بعده
ام فارس ؛ وعبدالرحمن عند مرته ؟
ام راشد ؛ ايه قعد بالشرقيه ورجعت ام عبدالرحمن وهيلا مع ولد اختها اخو زوجة عبدالرحمن جاي الرياض ووصلهم معه
ام فارس ؛ يوه علامه مخليهم الله يصلحه
ام راشد ضحكت ؛ ماعليها خوف ام عبدالرحمن عن عشر رجال ماشاء الله عليها وماودها تبطي عن الديره
ام فارس ضحكت ؛ اي والله الله يستر عليها ، وام رائد يقولون مسويه عمليه وشلونها .... وكملت تاخذ اخبار الديره ووش صار فيها
..........••..........
ديرة ابو صالح
قبل ساعات.. العصر
وقفت سيارة ابو هادي وسيارة حمد عند بيت راجح اللي كان جالس بحوشه وعنده محسن ابو طلال ويتقهوون والنار بالمنقل قدامهم ووقفوا من شافوا سيارة ابو هادي ومشوا للباب ونزل ابو هادي وجا يمشي بأبتسامه ؛ السسلام عليهم ، مسيهم بالخير يالله
الجد راجح ابتسم ؛ وعليكم السلام ارحب يالله انك تحييهم
ابتسم محسن وطلع وراه ؛ وعليكم السلام يامرحبا يامرحبا
قرب ابو هادي يحضن ابوه ويبوس راسه ويده ؛ وشلونك يالغالي بشرني عنك
راجح ؛ بخير بخير الحمدلله
وسلم ابو هادي على محسن اللي يرحب فيهم وابتسم ؛ وشلونه ابو طلال عساك بخير
محسن بأبتسامه ؛ الحمدلله وش اخبارك انت
ابو هادي هز راسه ؛ الحمدلله
ونزلوا هادي وحمد وشهد وام هادي اللي اشر لها ابو هادي تجي وعرفت ان سامي مو موجود ونزلت بسلة قهوتها
مشى هادي لجده راجح يسلم عليه وانتبهوا ليده وتنحنح هادي يتكلم قبل يتكلمون ؛ مسيهم بالخيير ، وش علومك
راجح هز راسه ؛ طيب طيب ، سلامات وش علمها يدك؟!
هادي تنهد وهو يسلم على محسن ؛ رضه بسيطه ، وشلونك ياجد
محسن ابتسم ؛ بخيير الحمدلله سلامتك والله يالرضي على قولة جدتك
هز راسه هادي بأبتسامه وجا حمد يسلم على جدانه ومن بعده شهد اللي شافتهم بجنب بعض وضحكت وقربت تحضنهم كلهم ؛ ياهلا والله
ضحك محسن وابتسم راجح وهو يسلم عليها ؛ هلا بالغاليه يالله حيها
شهد باست راسه وراس محسن اللي يرحب فيها وابتسمت ؛ الله يحييكم
وجت ام هادي وهي تسلم عليهم وهم يهلون فيها وقالت بأبتسامه ؛ الله يحييكم وشلون صحتكم عساكم بخير
محسن وراجح ؛ الحمدلله
ابو هادي ؛ انتوا جالسين برا بهالبرد ؟
راجح ؛ ادخلوا ادخلوا النار عندنا وحنا بالمظله ومتدفين
ابو هادي ؛ سامي ماهو هنا ؟
راجح ؛ لا والله اهله عند جدانهم وهو راح الظهر يقول عنده شغل يجي يجي
دخلوا ودخل هادي وهو يمسح على يده بقهر وناظره حمد وتنهد وجلسوا بالحوش على الكراسي الحديد والنار بالنص وطلعت قهوتها ام هادي تقهويهم وقالت من مدت لأبوها فنجال ؛ سم يبوي ، امي عندها احد ؟
راجح كان يناظر حمد وقال محسن ؛ سلمتي وانا ابوك ، لا والله عند الغنم تقول بتحلبهن وتسوي اقط
ابو هادي ابتسم ؛ اووه ماشاء الله عليها
شهد ؛ طيب خالاتي مو هنا ؟
محسن ابتسم ؛ لا والله
راجح ضحك والتفت لشهد اللي بينه وبين محسن ؛ افا ماتبين جدك
شهد ضحكت ؛ الا والله يازينه بس اخاف انك مشغول
راجح ابتسم ؛ لا ابد ولو اني مشغول ما انشغل عنك
شهد ابتسمت وناظر راجح هادي وحمد اللي ساكتين ويتقهوون بصمت ؛ الا ياهادي ماعلمتنا وش جاها يدك
هادي تنحنح ؛ حديد طاح عليها
محسن ؛ منين جاها الحديد؟
ابو هادي تنهد ؛ كانوا يشيلون عمدان من عند باب العماره يوخرونه عن الطريق وطاح واحد على كتفه
راجح ؛ اييه وعسى ماهي قويه
ابو هادي ؛ لا رضه امس امس طاح عليها كم يوم ويشيلها
محسن ؛ الحمدلله جت سليمه
راجح ؛ ومحلك وش نويت تبيع فيه
ابو هادي جلس يقول لهم وش بيبيع ووش سوى فيه ومن قال لهم كل شي ابتسم ؛ وعاد ان شاء الله قريب نفتحه والله كل مابغينا نفتحه يأخرنا شي
محسن ؛ عسى ماشر وش أخركم
ابو هادي ؛ اا الجو ولا العماره والمستأجرين
راجح ؛ عاد الجو لازم تعود عليه هذا جونا طول الشتاء وجب لك عمال يعاونونك
ابو هادي ؛ ايه لقيت ٢ يالله لقيتهم بعد
محسن ؛ والله صحيح العمال الحين ماتلقاهم حنا يالله لقينا اللي يسوون مجلسنا
ام هادي ؛ الا هو خلص يبه ؟
محسن ؛ ايه الحمدلله قضينا منه
راجح ؛ وانتوا صرتوا بالرياض علامكم ماتجون
ابو هادي ؛ والله يايبه اني اقوله لي مدري كم يوم وحنا بنجي بس المحل يالله خلصنا منه
راجح ؛ العمر يخلص والشغل مايخلص سيروا يوم مايضر
ام هادي ابتسمت ؛ سيرنا هالمره المره الجايه كلكم تجونا ان شاء الله
راجح ابتسم ؛ ان شاء الله ونشوف محلكم هاللي اشغلكم عنا ... وغير المحل ما اشغلكم شيٍ ثاني ؟
ابو هادي تنحنح يناظر هادي اللي اخذ نفس بتوتر ورجع ناظر ابوه ؛ وشو ؟
راجح ابتسم ؛ من يوم ماعاينت هادي وانت فاهمني
ابو هادي ضحك بأرتباك ؛ لا والله مافهمتك
راجح ضحك ؛ ماودكم تفرحونا فيه ؟!
ابو هادي تنهد براحه وقال بضحك ؛ والله عاد خلوه يقول تم وابشروا باللي يفرحكم
راجح ؛ انتوا دوروا له بنت الحلال واسألوه ان كانه موافق عليها ولا لا اما هاللون " كذا " تبونه يوافق وهو مايدري من ياخذ اكيد بيعيي
محسن ابتسم ؛ اي والله صدقت شوفو ان كانه يبي من قرايبنا ابد حاضرين وان كانه يبي من جيرانا ومعارفنا موجودين
راجح ؛ اي عزالله كلهم والنعم فيهم "والتفت يناظر هادي " ها ياهادي من تبي وانا جدك ؟
نطق هادي اللي حتى لو مافكر للحين بس اهم شي ماياخذون له من قرايبه وتكون بيان ؛ لا والله قرايبنا خلهم على ماهم عليه مانبي رسميات معهم
ابو هادي رفع حواجبه بذهول وناظر ام هادي اللي غمضت بخوف ان هادي يفضحهم وهز راسه راجح وهو كان وده هادي ياخذ بيان عشان يبعدها عن حركات امها وتتغير ؛ بكيفك اجل يأم هادي دوروا بنت الحلال وهو ان شاء الله ماهو معيي
ام هادي ؛ قريب ان شاء الله
ناظرها هادي وصد بضيق والتفت حمد على جده راجح اللي قال ؛ صب قهوه ياحمد
وقام حمد ياخذ الدله ويقهويه وابتسم راجح ؛ سم الله عدوك
وكمل يصب للباقين وجلس وتنحنحت ام هادي ؛ انا والله بروح اسلم على امي واشوفها بيوصلني حمد ، شهد تعالي سلمي على جدتك
شهد قامت وهي تعدل شرشفها وناظرت راجح اللي ابتسم ؛ وارجعي سولفي علي تراني مبطي عنك
شهد ابتسمت ؛ ابشر
ومشت مع امها وقام حمد وقال ابو هادي ؛ انا وهادي نجيكم شوي اسبقونا
ام هادي ؛ ان شاء الله
ومشت هي وشهد وحمد اللي فز ماصدق وطلعوا وقالت ام هادي ؛ حمد وش فيك منفس عيب!
حمد بقهر ؛ يمه والله اني احس انه مستقعد لي
شهد دقته ؛ سلامات ترا ماقال شي صب قهوه بس
حمد وهو يركب ؛ بالله وليه ماقال لك انتي اصغرنا
ام هادي سكرت بابها ؛ انت الرجال
شهد ضحكت ؛ وبعدين هو قال لك انت يبي يشوف سناعتك يانفسيه
حمد وهو يغير صوته لصوت بنت ؛ يشوف سناعتي .. ليه وش انا اص عني بس ترا راسي مصدع
وطنشته شهد وهي تضحك وتنهدت ام هادي وحرك حمد لبيت جده محسن وجدته مزنه واللي كان قريب من بيت راجح ونزلوا وكان ورا بيتها شبك صغير لغنم ويشوفونه وهم جايين ووقفوا عند الباب ونزلوا لورا البيت وشافوها بين الغنم تحلبهم وابتسم حمد يرفع صوته ؛ ياامزوونه
مزنه فزت وهي تبتسم ؛ ياهلا ياهلا
وطلعت من الشبك تمشي لهم وقربوا يسلمون عليها وهي تهلي فيهم وابتسم حمد ؛ يالله عاونها
ام هادي ؛ وش مطلعك بهالبرد يميمتي الظهر ازين
مزنه ؛ والله مافيه برد واجد متدفيه ماعلي خلاف
شهد ضحكت ؛ خلي خلي حمد يسوي عنك تراه يعرف
حمد ناظرها وضحك ؛ لا والله ماعرف وهه اقولها بس مزونه تمشيها لي ماهي مثل راجح
مزنه ؛ لييه وش مسوي ؟
ام هادي ؛ والله يمه ماسوى له شي بس قال له صب قهوه وزعل
حمد ؛ بس ياجده انا اعرفه يقول كذا عشان اذا غلطت ولا سويت شي يهاوشني يدورها من الله
مزنه ضحكت ؛ افا لا والله ابو سامي طيب ماعمره هاوش احد بس انت الظاهر زعول وانا جدتك
ضحك حمد بقهر وابتسمت مزنه وهي تمشي للبيت ؛ تعالوا خلونا نروح البيت نتقهووا وتصب لي ياحمد واشوف صبك
ضحكوا ومشوا معها للبيت وقالت شهد ؛ جده خالاتي ماهم جايين
مزنه ؛ لا والله ياعيني كلهم مشغولات وخوالك جونا امس
ام هادي ضحكت ؛ لها كم يوم وهي تقول نبي نروح لجدتي طفشانه
مزنه ؛ لا لا ماتطفشين الحين نسولف ونتونس ونشوف خوالك ان كانهم فاضين يجون ، الا هادي وينه
حمد ؛ مع ابوي ببيت جدي راجح وعندهم جدي محسن
هزت راسها مزنه ودخلوا للبيت ومشت للمجلس ؛ تعالوا بالمجلس تشوفونه عقب غيرناه
ودخلوا معها وابتسمت ام هادي ؛ ماشاء الله مبروك
حمد ؛ جده ليه ماشريتي من فرشات محلنا تكسبينا
مزنه ضحكت ؛ يبارك فيك ، ليه فتحتوا محلكم عشان نشتري منكم
شهد ؛ خلصناه يقول ابوي بنفتح قريب
مزنه ابتسمت ؛ ماشاء الله خلاص اجل كل مابغينا فرشات ماحنا ماخذين الا من عندكم
حمد ؛ ايه ونسوي لك خصم بعد
ضحكوا وجلست مزنه بضحك وهي تسحب صينية قهوتها ؛ اجلسوا اجلسوا تقهووا يالله حيهم هذي والله قهوتي انا وام عياد كانت عندي قبيل
وجلسوا واخذ حمد القهوه يصب وابتسمت وقالت ام هادي ؛ الا يمه انتي تعرفين وحده اسمها ام عبدالرحمن ؟
مزنه اخذت القهوه من حمد اللي مد لها الفنجال ؛ سمي يامزونه
مزنه ابتسمت ؛ سم الله اللي مايحبك ياعين جدتك عشت صب صب لأمك واختك
ابتسم حمد يصب لأمه وضحكت شهد ؛ انا شربت قهوه قبل شوي الحين ابي شاهي
حمد مد الفنجال لأمه وناظرها ؛ عشان مزونه ابسكت ولا تعرفين وش اسوي فيك
ضحكوا وصب لها وله شاهي وجلس والتفتت مزنه لأم هادي ؛ ايه وش تقولين ام عبدالرحمن ؟ لا والله ماعرف وحده من الديره بكرها عبدالرحمن
ام هادي ؛ لا تقول كانت تعرفك انتي وعمتي طرفه الله يرحمها وتعرف وحده اسمها سعديه من هنا
مزنه ؛ الله يرحمها ، ايه سعديه من ديرتنا بس انها تبيع عندكم بالمحاسن ماعمري شريت منها ولا شفتها اسمع عنها
ام هادي ؛ وام عبدالرحمن ؟ تقول تزوجت واحد من هنا وتطلقت وبعدين تزوجت واحد سكن فيها عندنا وجابت عبدالرحمن وهيلا
مزنه سرحت لثواني تتذكر ولفت ؛ يييوووه عساها رفعه؟
ام هادي ضحكت ؛ والله مدري وش اسمها بس ام عبدالرحمن وكبيره تقول تعرفكم بعدين انقطعت عنكم
مزنه ؛ ان كان ماني غلطانه انها اهي تزوجت واحد من ديرتنا وماجابت منه عيال وتطلقت وتزوجت واحد من ديرتكم جابت ولد وعقبه بنت بس اني مبطيه والله عنها
ام هادي ؛ ايه ايه هذي هي تسأل عنك
مزنه ؛ وين شفتيها
ام هادي ؛ سيرنا على جيرانا وهي جت عندهم وقعدنا نسولف ويوم درت اني من ديرة ابو صالح قالت من اهلك يمكن اعرف وعلمتها وعرفتكم
حمد ؛ الحين هذي منهي اللي تسولفون عنها
شهد ؛ سوالف حريم مالك دخل
حمد دقها ؛ اقول اشوفك اليوم قالبه علي اركدي لاتخليني اقلب وجهك
مزنه ضحكت ؛ وهي الصادقه سوالف حريم انت انت عطنا سوالفك ماسولفت علي مثل دايم
حمد ؛ سوالف رجال مالكم فيها
الكل ؛ هههههههههههه
ام هادي ؛ علمها علمها ان كان المحاسن جازت لك اكثر من الديره ، تراه بالغصب جا يايمه
مزنه ؛ افاا ديرة اهلك هذي اما محاسن الصدف ماتعرفون فيها احد
حمد ؛ اءء لا بس عشان جدي هنا يكرفني وان كانك تبين الصحيح الديره هناك حلوه وخضراء وكلها زرع اما هنا يابسه ولافيها شي زين الا انتوا
مزنه ضحكت ؛ يووه والله انك كذوب وانا جدتك
شهد ؛ الا صادق ياجده وعرفنا ترا ناس جيرانا بيتهم مقابل عمارتنا رحنا لهم قبل ٤ ايام
مزنه ؛ اي بس ماتاخذكم عنا الديره ولا اهلها هذي ديرتكم واهلكم هنا
ام هادي ؛ لا لا ماعليك بنجيكم كل شوي بس المره الجايه انتوا بتجون
مزنه هزت راسها واخذ حمد جواله ؛ هه هذا خالي محمد يدق شكله عندهم
شهد ؛ بروح معك
حمد ؛ وين تروحين يمكن طلال وعيالهم هناك
ام هادي ؛ لا خذها اذا هم هناك تجي مع هادي وابوك يسلمون
حمد قام ؛ يلا امشي
وفزت شهد معه وطلعوا وراحوا لدوانية راجح وتنهدت ام هادي وهي تلتفت لأمها ؛ ايه وشلونك يمه شلون صحتك
مزنه ؛ بخير الحمدلله بس انتي كن فيك شي ؟
ام هادي ابتسمت بتنهيده ؛ الله يجزاك الجنه وشلون ربيتينا كلنا والتربيه تتعب
مزنه ضحكت ؛ عيالك كبروا وتوك تشكين من تعب التربيه وانا امك خلاص التعب راح من غير شر
ام هادي هزت راسها وعقدت حواجبها مزنه ؛ والله ان فيك شي علامك وانا امك احد مزعلك منهم ولا حاتم مزعلك
ام هادي ترددت بس قالت بضيق ؛ هادي الله يصلحه
مزنه ؛ لا لا هذا الرضي لو كلهم يزعلونك هو ماضنتي يزعلك وش مسوي !
ام هادي بعد تردد بدت تقول لها كل شي عن هادي وبيان من لما دروا عن سالفته معها لطلعته من المستشفى الصباح ...
•
دوانية راجح
جاهم محمد وسلم وسأل هادي عن يده وقال لهم نفس ماقال لراجح ومحسن وجلسوا يسولفون ووقفت سيارة حمد ع الباب وابتسم ابو هادي ؛ هه هذا صوت سيارة حمد
ابتسم محمد ووقف يمشي لهم من دخلوا وقام ؛ يامررحبا
حمد ابتسم ؛ السلام عليكم .. شلونه خالي
محمد وهو يسلم عليه ؛ وعليكم السسلام بخير شلونك انت عساك طيب
حمد ؛ والله بخير الحمدلله
ومشى يجلس وتقدم محمد يسلم على شهد اللي ابتسمت ؛ هلا والله اخبارك ياخال
محمد ابتسم ؛ ارحبي ياخالي والله اني بخير عساك بخير
شهد ؛ بخير الحمدلله " وناظرت جلستهم والتفتت " خالي طلال وينه ؟
محمد ؛ والله راح البّر هو وعياله واخذ معه حسام واخوانه " عيال محمد "
شهد ؛ طيب جدتي ماعندها احد تقول خالاتي مشغولين اهلك هنا ؟
محمد ؛ ايه وان كانك تبين اوديك عند ايلاف وكيان ببيتنا وتراهم بيروحو لأمي بعد شوي ويمكن اهل طلال بعد يروحون معهم
" ايلاف بنت محمد وكيان بنت طلال وكبر بعضهم ودايم عند بعض "
شهد ؛ اجل بجلس شوي عند جدي واذا راحوا عند جدتي اروح لهم
محمد ؛ خلاص اجل تعالي
ومشى يجلس عندهم وحمد اللي اول ماجلس عند هادي همس ؛ سامي ماجا ؟
هادي وهو يحرك فنجاله على رجله ؛ لا
جلست شهد بين راجح ومحسن وابتسم راجح ؛ يالله حيها
شهد ابتسمت ؛ الله يحييك
راجح ؛ تروحين معنا النياق بعد شوي
شهد ضحكت ؛ لا ياجد فكني ماحبها
محسن ابتسم ؛ افا ترا غلا الشي من غلا راعيه وش لون ماتحبينها وهي نياق جدك
شهد ؛ والله اني اغليه هو ونياقه بس انه يدري اني اخاف منها
ضحكوا وابتسم راجح يمسح على راسها ؛ اي والله اني ادري وانتي بعد تدرين انك اغلى من النياق كلها
محمد ضحك ؛ واخوانها
راجح ؛ بعد اخوانها غالين بس اهي القعده عند اخوانها وعيال عمها بعد آخر الاحفاد هذي ومعروف القعده حبه رعده
ابو هادي ابتسم ؛ والبِكر حبه فكر
ابتسم هادي يناظر ابوه وناظرهم حمد ؛ والوسطاني ماله والي
ضحكوا وقال محسن بضحك ؛ عااد الوسطي حبه يسطي ، يسطي على القلب ويحتله
ابتسم حمد وهو يفز يحب راس محسن ؛ ياجعلك تسلم ياجد
ضحكوا وقام راجح ؛ هاه مشينا النياق
ابو هادي ؛ مشينا بس بنروح انا وهادي نسلم على ام طلال ونجي ، شهد ترجعين عند امك ولا تروحين معنا النياق ؟
شهد ؛ لا لا برجع واهل خالي شوي ويجون هناك بجلس مع البنات
محمد ؛ يلا اجل وانا بعد بسلم على ام هادي وارجع لكم
راجح التفت لشهد بضحك ؛ اجيب لك حليب نياق
شهد ضحكت ؛ لا والله ماذوقه اشربوه انتوا بالعافيه عليكم
ضحكوا وطلعت شهد مع ابوها وهادي لبيت مزنه
والتفت راجح لحمد ؛ هادي فيه شي ياحمد ؟
حمد ؛ هه لا لا ، ليه علامه
راجح ؛ مدري ماهو مثله دايم يسولف ويضحك ساكت وكنه تعبان
محسن ؛ من يده يمكن
حمد ؛ ايه ايه من يده يقول تعوره عشان كذا ساكت
هز راسه راجح وتنهد حمد بتوتر وهو يعرف انه فضيحه لو سألوه مره ثانيه احتمال يقول السالفه كلها
•