ياديرةٍ ضمّت كل الأحباب

Part 3

# يا ديـرةٍ _ ضمّـت _ كل _ الأحبـاب #

•

بغرفة نايف دخلت هاجر وهي تشغل النور ؛ نااييف قم قم يلا راشد جا
نايف وهو باقي متغطي ؛ ههااه شوي شوي واقوم طفي المكيف
هاجر استغربت ؛ المكيف ولا اللمبات ؟؟
نايف وهو يشيل الفراش عن وجهه ؛ قلت المكيف تجمدت من البرد اخلصي
طفت هاجر المكيف ؛ طيب يلا قم
نايف ؛ راشد واهله جو ؟
هاجر ؛ لا راح يجيبهم يلا قم ماني راجعه مره ثانيه اصحيك ان رجعت بنثر عليك ماء
نايف وهو يكح ؛ روحي بس
طلعت هاجر وهي تروح للصاله ؛ يمه قومت نايف بس شكله تعبان
ام راشد وهي تو تجلس ؛ ليه وش فيه
هاجر رفعت كتوفها ؛ مدري قال طفي المكيف برد وصوته رايح
ام راشد ؛ الله يصلحكم ترفعون على المكيف لأخر شي وحنا بندخل الشتاء خلاص يجي الحين واشوفه
بعد دقايق طلع ابو راشد من الغرفه ؛ السلام عليكم
الكل ؛ وعليكم السلام
ابو راشد ؛ ماجا راشد ؟
ام راشد ؛ لا للحين
دخل تركي اللي كان جاي من البقاله ؛ مسهم بالخيير
الكل ؛ هلا ، مساء النور
تركي وهو ينزل الاكياس ؛ جبت حلاو لعيال راشد
اروى؛ بينسحب على كيكتك يا هاجر
هاجر ضحكت ؛ عادي اكلها انا
تركي وهو يطلع جريده بضحك ؛ كلي هذي انتي وياها ودوروا اساميكم نزلوا النتايج
اروى فزت ؛ في ذمتك عطني عطني
عطاها تركي واخذتها وهي تجلس عند هاجر وتدور اساميهم
ابو راشد ابتسم ؛ اذا انتوا ناجحات ابشروا بالهديه
اروى ؛ ان شاء الله
دخل نايف ؛ سلام
الكل ؛ وعليكم السلام
ام راشد ؛ نايف فيك شي ؟
نايف عقد حواجبه ؛ لا بس شوي مصدع ليه ؟
ام راشد وهي تلمس جبينه ؛ مصدع اجل الله يصلح قلبك وانا امك حرارتك مرتفعه وانت تقول بس مصدع
نايف وهو يلمس خده ؛ لا لا ان شاءالله مافيني شي صبوا لي قهوه الحين اصحصح
مدت له شريفه الفنجال ؛ سم
نايف ؛ سم الله عدوك
بهاللحضه دق الباب وكانو راشد ومنيره وعيالهم تركي وهو يقوم ؛ اكيد راشد جا
وطلع للحوش وفتح تركي الباب ؛ ههلااا والله يالله حيهم
راشد ابتسم ؛ الله يحييك
تركي وهو يسلم على ناصر ؛ حييه حبيب عمه شلونك نويصر
ناصر وهو يحضنه ؛ الحمدلله مشتاق لك
تركي وهو يشيل جوري ؛ جوجو يالله حيها
وكمل وهو يبوس التوأم اميره ومناير
تركي من بعيد ؛ يامرحبا يا ام ناصر حياك الله
منيره ؛ الله يحييك
تركي ؛ تفضلو يالله حيهم والله
دخلو واستقبلوهم هاجر واروى بالأحضان
ابو راشد ؛ ياامررحببا تو ما نور البيت
منيره وهي تبوس راسه ؛ منور بأهله ياعم
وكملت تسلم على ام راشد و شريفه ام راشد وهي تحضنها ؛ ياهلا يامنيره اشتقنا لك
منيره وهي تبوس راسها ؛ ياحبيبتي ياعمه وحنا اكثر والله
وكملت تسلم عليهم و على نايف من بعيد
وجلسو بعد ما سلموا على بعض
نايف وهو بحضنه التوأم ؛ اشقنا لكم ليه طولتوا الغيبه
تركي ؛ اي والله مابغيتوا
منيره ؛ والله عشان مدارسهم ودوام راشد وماقدرنا نجي
شريفه وهي تعدل شعر ناصر ؛ الله يانصور كيف المدرسه نجحت ؟
ناصر ؛ اي نجحت بكل المواد
تركي وهو يبوس جوري ؛ وانتي نجحتي ؟
جوري ؛ ايه وعطوني هدايا
ابو راشد ؛ شاطرين ابشروا بالهديه مني
هاجر وهي تمد لهم الكيك ؛ وهذي هديتي انا
نايف ؛ بخيله من يومك
هاجر ؛ انت ماتاخذ
..........••..........
بيت ابو هادي
طلع حمد من غرفته وهو اللي اخذ الجريده وجلس يدور اسمه وبعدها يعطيها شهد وركض ينادي ؛ ييمهه ييبه
جت ام هادي وهي خايفه ؛ هلا بسم الله شفيك
حمد وهو يحضنها ؛ باركي لي يمه نجحتت بالماده اللي حملتها ونجحت بكل المواد الباقيه
ام هادي وهي تضحك ؛ مبررروك مبروك مابغيت تتخرج وتفرحنا
حمد ضحك ؛ اي والله ماصدقت يوم شفت اسمي قعدت اقراه اكثر من مره
ام هادي ضحكت ؛ الحمدلله
طلعت شهد من المطبخ على اصواتهم ووراها هادي اللي معه الملعقه يسوي معها حلا
هادي ؛ وشش فيه
حمد وهو يطق اصبع ويرقص ؛ ونجحنا نجحنا
شهد انفجرت تضحك ؛ واخيييراً من يوم شفتك تأخرت قلت مالقى اسمه بيخيس هالترم
هادي وهو يخبط كتفه ؛ مبروك والله بهالمناسبه انقز جب لنا كيكه وحلا خلنا نحتفل فيك
شهد ؛ والحلا اللي قاعد تخبصه داخل مايكفي ؟
حمد ؛ المفروض العكس انا اللي نجحت والمفروض تجيبون لي هدايا بعد
شهد ؛ صح لازم تسوون لنا حفلة تخرج بعد
حمد ؛ اقول روحي دوري اسمك وبعدين نسوي لك حفله ان لقيتيه
شهد ؛ اصلاً حاسه اني ناجحه رح دوره انت بخلص الحلا
حمد ؛ يمه تراها عارفه انها ساقطه خليها تشوف
ام هادي ؛ لا لا شاطره شهد رح دور اسمها بتسوي حلاها
حمد ؛ هذا وجهي ان لقيته
شهد ؛ ايه رح بس
ام هادي ؛ ان نجحتي بسوي لكم حفله
حمد التفت لشهد ؛ ياويلك تخربين علي وماتسوي لي امي عشانك سقطتي
هادي ؛ لا لا ماعليك جنيه تاكل الكتب اكيد انها الاول على الدفعه مصطفى
حمد ؛ هههههههههههههههه والله انك صادق مصطفى الدفعه
شهد ؛ تشوفون ان ماتخرجت هالترم
بهاللحضه دخل ابو هادي من برا ؛ السلام عليكم
الكل ؛ وعليكم السلام
ابو هادي ؛ ماشاءالله متجمعين واصواتكم واصله لبرا وش صاير
حمد ؛ هات البشاره
ابو هادي ؛ ابشر بشر
حمد ؛ تخرجت ونجحت بكل المواد
ابو هادي؛ مبروك مبروك ابشر بالهديه وانتي ياشهد ان شاءالله نجحتي
شهد ؛ بدور اسمي يبه ان شاء الله اني ناجحه
ابو هادي ؛ ان شاءالله شوفي النتيجه وبشرينا
راحت شهد لغرفة حمد تاخذ الجريده ورجع هادي المطبخ وابو هادي وام هادي وحمد راحوا يجلسون بالصاله
حمد ؛ يبه وش بتجيب لي هدية تخرجي
ابو هادي ؛ اذا نجحت شهد اقولك وش بجيب لك
حمد ؛ واذا مانجحت
ابو هادي؛ مافيه هديه
حمد وهو يرفع صوته لشهد ؛ شههدووه خلك تسقطين بس
شهد من داخل الغرفه ؛ تعال تعال وين جامعتنا
فز حمد ؛ لو مارجعت اعرفو اننا مالقينا اسمها وذبحتها
ضحكوا ودخل حمد لغرفته ؛ اشوف عطيني
شهد وهي تمدها له ؛ خذ مالقيت الا المدينه
اخذها حمد يشوف خريجين جامعتها وكمل يشوف اسمها وشهد على اعصابها ومتوتره وشهق حمد ؛ يويلك قريت كل الاسامي اسمك مو موجود
شهد تجمعت دموعها ؛ لاتقولها والله اني ذاكرت
حمد وهو يكتم ابتسامته ؛ انا ادري انك ذاكرتي يالجنيه اسمك بأول صفه
شهد وهي تضربه على كتفه وتاخذ الجريده ؛ الله يقلعك يالوصخ كنت ببكي
ضحك حمد وهو يقوم ؛ الحمدلله ماتروح علي حفلة التخرج ولا الهديه قومي قومي نعلمهم
قامو وطلعو لهم بالصاله على طلعة هادي اللي ناظرهم ؛ بشروا سبع ولا ضبع
حمد ؛ لا كلب
شهد بشهقه ؛ كذاب انت الكلب وخر وخر بس
ودفته وهي تجلس عند ابوها ؛ شوف يبه نجحت هذا اسمي ولا مو اسمي؟!
ابو هادي ابتسم يقرا ؛ اسمك
ونطق هو وهادي وام هادي ؛ مبرووك
شهد بأبتسامه ؛ الله يبارك فيكم
ابو هادي ؛ ابشري والله بتجيك احلا هديه
حمد ؛ وانا يبه نسيتني
ابو هادي ضحك ؛ لا لا مانسيتك ابشر حتى انت
هادي قرب الحلا ؛ ششوفوا شوفوا هذي هديتي حلا الأوريوات
شهد ضحكت ؛ ياحبك لذا الحلا
ضحكوا وجلسو يتقهوون على حلا هادي وشهد وحمد يتحلطم يقول شروطه والهدايا اللي يبغاها والكل مطنشه
..........••.........
بيت ابو راشد
في الوقت نفسه
كانوا هاجر واروى بالمطبخ ويقرون بالجرايد
هاجر ؛ الله يشغلك انتي واسمك مالقيته
اروى ؛ دوري زين فيه مليون اروى
وتنهدت هاجر اللي لقت اسمها وكانت تدور اسم اروى وفزت على اروى اللي شهقت ؛ ياربيي واخيراً
هاجر ؛ وجع اذني وش فيك لقيتي اسمك ! كم جبتي ؟؟
اروى ضحكت وهي تاخذ الجريده ؛ كم تتوقعين
هاجر ؛ مدري اتوقع على وناستك ذي جبتي النسبه اللي تبينها وهي 98
اروى وهي تركض للصاله ؛ الحقيني الصاله ببشرهم
لحقتها هاجر وطلعو للصاله اروى وهي تجلس عند امها ؛ ابشركم نجحت
الكل ؛ مبروووكك
ابو راشد ؛ ما شاءالله كم جبتي
اروى بضحكه ؛ يبارك فيكم ، جبت النسبه اللي اتمناها كم تتوقعون ؟
نايف ؛ ١٠٠
اروى ؛ لا عاد تمنيت على قدي
تركي ؛ صفر
اروى طارت عيونها ؛ شقصدك
ام راشد ضحكت ؛ ماندري قولي
اروى وهي توريهم اسمها ؛ ثمانيه وتسسعين
هاجر ؛ قلت لك بالمطبخ يعني انا صح
تركي ؛ اي صح كيف درجاتك انتي
هاجر ؛ يعني نص ونص بس الحمدلله ماحملت مواد
" هاجر مو هالترم تخرجها بحكم تخصصها "
نايف بخبث ؛ اعترفي سقطتي ؟
شريفه بضحكه ؛ الله الله لا ياحبيبي خواتي طالعين علي كنت الاولى على دفعتي
ابو راشد ؛ صدقتي انتي اشطر وحده من اخوانك
ام راشد؛ اي والله ماشاءالله
اروى ؛ عاد لاتغيرون الموضوع بحتري هديتي
شريفه ؛ اببشري اول وحده بتعطيك انا
اروى ؛ ياعممري ياشروف " وناظرت بأخوانها " تعلموا تكفون
نايف بسخريه ؛ ابد اطلبي بس
اروى ؛ اصلاً امي وابوي يكفون بيجيبون لي هديتي
تركي بضحكه ؛ اللعببب يالمصلحه
الكل ؛ هههههههههههههههه
ابو راشد ؛ لاوالله يبشرون بناتي
تركي ؛ افا يبه بس البنات ؟
نايف ؛ نسانا ياتروك
راشد بضحكه ؛ ليه وش تبون تبشرون فيه
ابو راشد ؛ كلكم بتبشرون بهالعطله ان شاءالله
الكل بحماس ؛ كفو يبه!
" بكل عطله يستنونها اهل بيت ابو راشد ويجتمعون فيها يطلعون للمزرعتهم وينبسطون بالعطله اللي تجمعهم وكلهم انبسطوا من عرفوا ان هالعطله بتكون حلوه على كلمة ابوهم "
( وقت العطله مو نفس وقتنا خليته بنص السنه وتواريخ الدراسه من عندي تزامناً مع الاحداث اللي بتصير )
ومر الوقت وهم يسولفون ومستانسين ..
بالليل كانوا الكل بالصاله جلسو هاجر واروى مع الصغار وهم يضحكون
هاجر وهي تاخذ نفس ؛ خلاص تعبت وانا اركض
جوري ؛ اروى مامسكتني مسكت اموره وميمي
ناصر ؛ عشانها دبه ماقدرت تلحقنا
اروى شهقت وهي تشرق بالمويه ؛ يقلع بليسك يانويصر انت كنك وزغ ماتنمسك
الكل ؛ ههههههههههههههههههههههه
ام راشد ؛ الله يصلحكم خلاص لاتركضون تطيحون
منيره ؛ لا ان شاءالله مايصير لهم شي مشتاقين للعب
ناصر ؛ متى يجي عبود " ولد عبير " عشان العب معه
ام راشد ؛ ياحبيبي ان شاءالله بيجون قريب
اروى ؛ صدق يمه متى بتجي عبير ؟
ام راشد ؛ تقول بالأجازه يعني هاليومين بتجي
شريفه ؛ يا الله ليتها تجي قبل امشي عشان اسلم عليها من زمان عنها
ابو راشد ؛ ليه متى بتمشين ؟
شريفه ؛ بيجي عزام بكره بالليل ان شاءالله
منيره ؛ ليش ما بتولدين هنا
شريفه ؛ لا بولد بالجبيل وبرجع بعد الولاده هنا
مر الوقت وتعشوا ونامو كلهم الا البنات منيره وشريفه وهاجر واروى تجمعو بالحوش بالدكه
منيره وهي جايه من غرفتها ؛ يربي يالله نامت مناير
اروى ؛ ليه علامها
منيره ؛ مغص بس اشوا خف
شريفه ؛ والله حتى انا تصدقون احس بمغص من الصباح
هاجر وهي تفصفص ؛ عادي امي تقول الشهر التاسع كذا كله تعب
منيره ؛ يلا هانت الله يقومك بالسلامه
شريفه ؛ والله اني خايفه من الولاده يصير لي شي
منيره ؛ لا يابنت لاتوسوسين تقومين بالسلامه ان شاء الله
كملو سهرتهم وهم يسولفون لشريفه عن الولاده شوي يخوفونها وشوي يطمنونها ومر الوقت ودخلو ينامون الا شريفه اللي عجزت تنام من الألم اللي كل شوي يزيد ودقت على هاجر تجيها بغرفتها لكن هاجر نايمه ودقت على اروى اللي تو غفت وقامت على صوت الجوال وماشافت مين يدق ؛ ههااه مين
شريفه وهي تبكي ؛ اروى الححقيني تكفين بموت
فزت اروى وهو تقوم من السرير ؛ وشش فيك شريفه وينك
شريفه صرخت ؛ بالغغرفففه تعالي تكفينن شكلي بولددد
اروى وهي تفز للنور تشغله ؛ هاجر هاجر قوميي شريفه ولدت تعاليي
وطلعت لغرفة شريفه ولحقتها هاجر اللي ماتدري وش صاير
فتحت الباب اروى وهي تشهق من شافت شريفه تبكي ووجهها احمر ؛ يمه شريفه وش اسوي وش اسويي
شريفه وهي تبكي ؛ ودوني المستشفى ، يممممممههه
ركضت هاجر لبرا الغرفه تصحي امها وطلع بوجهها تركي اللي تو جا من برا ؛ بسم الله وش فيك تركضين وش صاير!
هاجر وهي تلقط نفس ؛ الحق شريفه بتولد تعال تعال خذها المستشفى
ركض تركي لغرفة شريفه ؛ نادي امي ناديها
راحت هاجر تصحي امها ودقت الباب بقوه ؛ يمه يمممه قوميييي شريفه تولد
ابو راشد فز ؛ ابك علامك علامها شريفه!!
هاجر بسرعه وهي تدخل ؛ يمه شريفه تولد خذي عباتك وروحي معها هي وتركي للمستشفى بسررعه تكفينن
ام راشد فزت وهي تاخذ عبايتها ؛ يساتر يلا يلا طلعت
طلع نايف على الصوت وصراخ شريفه ؛ بسم الله وش فيه شريفه وش صار لك!
تركي وهو يحذف عليه المفتاح ؛ انقز شغل السياره بسرعه بسرعه شريفه تولد
نايف برعب ؛ وشش فيييه
تركي بصراخ ؛ رح شغلل سيارتي بناخذذها المستشفى
ركض نايف للسياره يشغلها وتركي ساند شريفه اللي تبكي وام راشد لابسه نص عبايتها وتركض
ابو راشد وهو يلحقهم ؛ روحوا روحوا المستشفى وانا بلحقكم مع نايف
ركبو السياره وحرك تركي للمستشفى مع امه وشريفه ابو راشد وهو يلتفت لنايف ؛ يلا ياولد خلنا نلحقهم مشيناا
نايف ؛ يلا يبه اركب السياره وانا بروح اجيب جوالي والمفتاح
ابو راشد ؛ وهات جوالي وجوال امك الظاهر نسته هز نايف راسه بزين وركض داخل وشاف اروى وهاجر ؛ شوفو جوال ابوي وجوال امي اذا هي ناسيته هاتوه
راحت اروى تجيب جوالاتهم وراح نايف لغرفته ياخذ مفتاحه وجواله طلع واخذ الجوالات من اروى وقالت هاجر ؛ بتروحون للمستشفى ؟
نايف ؛ اي وانتو اجلسو اذا قام راشد علموه لاتصحونه اذا هو نايم
اروى ؛ خذنا معك طيب
نايف ؛ لا لا من يقعد بالبيت خلكم واذا ولدت شريفه ندق عليكم نعلمكم
هاجر ؛ لا تنسى امانه طمنا
نايف وهو يطلع ؛ طيب طيب تعالوا سكرو الباب 
طلع لسيارته وحركوا بس مو لمستشفى ديرتهم لأنه مستوصف وصغير ويدرون ان تركي مابيوديها له
..........••..........
بالمستشفى
تركي وهو رايح جاي للأستقبال يسألهم عن شريفه وام راشد جالسه وتناظره ؛ ياحبيبي اجلس بتطلع الدكتوره وتقول لنا اذا ولدت اجلس دوختني الله يصلحك
تركي وهو يمسح وجهه بكفه ويجلس ؛ مب بدري على ولادتها؟
ام راشد وهي تمسح على ظهره ؛ لا مب بدري دخلت شهرها الله يهديها قلت لها تحسب حساب تولد عندي وهي مجهزه بالجبيل ومادرت انها بتولد هنا
تركي ؛ ادق على عزام اقول له الحين ؟
ام راشد ؛ لا لا تخوفه يمكن نايم خلها الين تولد وندق عليه
بهاللحضه جو نايف و ابو راشد اللي جلس بتعب ؛ صار لنا ساعه ندور في ذا المستشفى ندوركم تركي مقفل جواله وانتي ناسيه جوالك
ام راشد وهي تاخذ جوالها من نايف اللي مده لها ؛ انا يالله لبست عباتي نسيت كل شي
تركي وهو يطلع جواله ويناظره ؛ وانا جوالي طافي
نايف ؛ وش صار
ام راشد ؛ للحين محد طلع
ابو راشد ؛ الله يسهل لها ويقومها بالسلامه
جلسوا وبعد انتظار طلعت الممرضه وهي تنادي ؛ شريفه عبدالله
قامت ام راشد ؛ ايه هنا ولدت ؟
الممرضه ؛ الف مبروك جابت بنت
ابو راشد ؛ الحمدلله الحمدلله
تركي ؛ وكيفها ؟
الممرضه ؛ الام والمولوده بخير والحين بتطلع للغرفه
ام راشد ؛ زين زين الله يعطيك العافيه
هزت راسها الممرضه ورجعت لداخل القسم
نايف ؛ كلمتوا عزام ؟
ام راشد ؛ لا للحين
تركي ؛ نكلمه الحين ولا يمكن نايم ؟
ابو راشد ؛ لا كلموه لازم يكون عنده خبر
نايف ؛ بكلمه انا
•••
" الجبيل "
صحى عزام بعد مده على صوت الجوال وفز من شافه نايف و رد بصوت نعسان ؛ هلا نايف!
نايف ابتسم ؛ سامحنا صحيناك يبو العنود
عزام ؛ لا عا.. وشو وش قلت ؟!
ضحك نايف ؛ مبرووك شريفه ولدت وجابت بنت
عزام بصدمه ؛ احللف
نايف ؛ والله تتربى بعزكم ان شاء الله
عزام ؛ كيف وش صار مو المفروض تولد بالجبيل ليكون فيها شي شريفه ؟
نايف ؛ لا لا والله مافيها شي قامت بالسلامه والحين بيطلعونها و عاد وش اللي صار لاجيت نعلمك
عزام ؛ خلاص استأذن من دوامي والعصر وانا عندكم ان شاءالله
نايف ؛ توصل بالسلامه ان شاء الله
وقفل ودق على هاجر اللي ردت بسرعه ؛ ها نايف وش صار
نايف ؛ شريفه ولدت والحمدلله بخير هي والبنت
اروى بفرحه ؛ الحممدلله ووينها الحينن ؟
نايف ؛ البنت ولا شريفه ؟
هاجر واروى بوقت واحد ؛ كلهم
ضحك نايف ؛ الحين بيطلعونهم وكلهم بخير الحمدلله ، ما قام راشد ؟
اروى ؛ لا اقومه ؟
نايف ؛ لا لا خلوه نعلمه لاصحى
هاجر ؛ طيب
وقفل نايف والتفت على امه اللي قالت ؛ قبل نرجع الديره بروح للسوق بشتري لشريفه وبنتها اغراضهم كلها بالجبيل
نايف ؛ يلا ابشري الحين نشوفهم ونروح
وطلعت بنت شريفه من الغرفه وكلهم تجمعوا عليها
تركي ابتسم ؛ ياربي ياصغرها بسم الله عليها
ابو راشد ؛ ماشاءالله الله يجعلها من البارين
ام راشد وهي تمسح على خدودها ؛ ياعمري الحمدلله يارب
اخذ جواله نايف يرسل لعيسى ولو انه مايدري صاحي او نايم بس اهم شي يبشره
تركي وهو يبوس خدودها ؛ والله انها تشبهني الله يحفظنا
ضحكوا وقالت الممرضه ؛ بناخذها الحين للحضانه ، والام صارت بالغرفه اسألو عن رقم غرفتها من الأستقبال
ومشت والتفت تركي وهو يضحك ؛ نسينا شروف تعالو تعالو نروح لها
راحو للأستقبال اخذو رقم الغرفه وطلعو لشريفه فوق
•
عند شريفه اللي تكلم عزام وهي تبكي من الفرحه ؛ صغيررره ياعزام لو تشوفها قد يدي
عزام وهو مبتسم والدموع بعيونه ؛ ياحبيبتي الحمدلله على السلامه ليتني موجود ولا كنتي عندي واشيلها اول واحد
شريفه وهي تضحك من بين دموعها ؛ بس والله ماتوقعت اني اولد بالرياض كلنا حاسبين حساب بالجبيل
عزام ؛ اي والله بس اهم شي جت بالسلامه
التفتت شريفه من دخلوا ابو راشد والعيال وام راشد اللي قربت تحضنها وتبارك لها وعزام من ورا الجوال يسمع فرحتهم ومباركاتهم
ام راشد ؛ مبروك ياحبيبتي الحمدلله على السلامه
ابو راشد ؛ مبروك ماجاك يابنيتي وتتربى بعزكم
تركي ؛ الحمدلله على سلامتكم ومبروك ماجاك
نايف ؛ مبروك ماجاك شروف عسى الله يرزقك برها
شريفه وهي تبكي وتضحك ؛ الله يبارك فيكم ويسلمكم يارب .. امين
عزام من ورا السماعه ؛ وانا باركو لي
ضحكت شريفه ومدت الجوال لأبوها اللي اشر لها تعطيه ؛ مبروك ماجاك وتتربى بعزكم
عزام ؛ الله يبارك بعمرك ياعمي
تركي ؛ الله يجعلها من الصالحين البارين
عزام ؛ امين امين يارب وعقبال مانشوفك ابو
الكل بضحكه ؛ اممييينن
قفل عزام بعد مابلغهم انه جاي العصر والتفتو على نايف اللي يقرا لهم رسالة عيسى اللي رد ؛ " الف الف مبروك الله يجعلها قرة عين والديها والحمدلله على سلامتكم "
ابتسمت شريفه بحب وقالت ام راشد ؛ ياحبيبي عقبال مانشوف عيال عيالكم
الكل ؛ امين يارب
ابو راشد ؛ يلا يبوك حنا بنطلع الحين نرجع البيت قبل الفجر والعصر نرجع لك ان شاءالله
هزت راسها شريفه وطلعو ابو راشد وعياله على اذان الفجر يصلون قريب بمصلى المستشفى وام راشد بقت شوي مع شريفه ودخلت الدكتوره ؛ السلام عليكم
ام راشد وشريفه ؛ وعليكم السلام
الدكتوره ؛ الحمدلله على السلامه شريفه
شريفه ؛ الله يسلمك
الدكتوره ؛ لازم ترتاحين الحين
والتفتت لأم راشد بأبتسامه ؛ والزياره بعد صلاة العصر تفتح وهي ماشاءالله صحتها كويسه ماتحتاج مرافق
ام راشد ؛ ان شاءالله يعطيك العافيه
ابتسمت الدكتوره وطلعت والتفتت ام راشد لشريفه ؛ بروح اسواق الرياض فاتحه بجيب لكم اغراض وش تبين اجيب
شريفه ابتسمت ؛ سلامتك بس جيبي لها كم لبسه وانا كلمت عزام يجيب اغراضها اللي جهزت
ام راشد ؛ طيب ياحبيبتي انا بروح الحين اجيبهم وارجع اذا مادخلوني بعطيهم اغراضك يوصلونها لك والعصر برجع لك انا والبنات
هزت راسها شريفه وطلعت ام راشد
صلت الفجر وراحت مع نايف للسوق وابو راشد وتركي رجعوا الديره
..........••..........
بيت ابو راشد
دخل تركي وابوه والبيت هدوء وكلهم نايمين
راح ابو راشد ينام شوي وتركي راح لغرفة البنات بيبشرهم ولقاهم نايمين وراح لغرفته ينام وبعد ساعه جت ام راشد ونايف بعد ماوصلوا لشريفه اغراضها ولحقوهم بالنومه من التعب .....

لاتنسون التصويت لطفاً 🤍. +
متى حابين انزل ، اي وقت يناسبكم ؟