ياديرةٍ ضمّت كل الأحباب

Part 6

•
في الدوانيه
ابو راشد بأبتسامه ؛ اجل هذا اسمها خلاص
عزام ؛ الله الله خلاص ابو العنود
راشد ؛ الله يخليها لك يارب
عزام ؛ ويخلي لك عيالك
تركي بهمس يأشر لناصر ؛ نصور ولد تعال
ماشافه ناصر اللي كان يلعب بالجوال ومو منتبه لأحد
نايف ؛ وش فيك
تركي ؛ ذا الورع مايرد ابيه يودي لأروى مدري هاجر شاحنها
نايف ؛ خله هنا مايطير ومنها اشحن انا بعد
تركي ضحك ؛ ان قالت سرقتوا شاحني بقول نايف اخذه
نايف ؛ يوه عاد ان كانه لهاجر وش يفكنا
تركي ؛ اي على اساس اذا كان لأروى بتقول يفداك  اقول ماندخل للمطبخ نشوف وش صار على العشاء ؟
نايف ضحك ؛ وين تدخل اهل عزام هنا وبعدين امي والبنات يكفون
تركي بصدمه ؛ الحين مانقدر ندخل البيت وهم هنا؟
نايف ؛ تو تدري ايه ماتدخل الا للمطبخ من الباب اللي هنا ولا غرفتك والصاله ودعها
تركي ؛ وين انام واغراضي كلها بالغرفه
نايف ؛ تجيبهم لك اروى وهاجر وتنام بالدوانيه
تركي ؛ اهب راشد غرفته بقسم لحاله يقدر يروح لها ماعنده احد
راشد لف لهم وقال بهمس ؛ وش سمعت اسمي
نايف ؛ بسم الله اصواتنا واضحه ؟؟
راشد ؛ لا تو سمعتكم وش تقولون
تركي ؛ مانقول شي نبي ندخل بس مانقدر
راشد ؛ ليه وش تبي من داخل
تركي ؛ ابي غرفتي
نايف ؛ حتى انا
راشد ؛ عادي خلو الحريم يروحون للمجلس وادخلو مع الصاله مايكون فيها احد
تركي فز ؛ ايه قم قم نايف نروح المطبخ نقول لأمي
نايف ؛ اصبر الحين تلقاهم كلهم بالمطبخ مشغولين بتطردك امي
راشد ضحك ؛ اي والله اصبر شوي لبعد العشاء على الاقل عشان يكون عندك عذر انك بتاخذ فراشك ولا ملابسك
تركي رجع يجلس ؛ نصبر اجل وش ورانا
ابو راشد التفت لهم ؛ ياعيال واحد يقوم يشوف العشاء وش صار عليه
تركي بهمس ؛ عععززز الطلب ، ابشر يبه انا بقوم
نايف ضحك ؛ اذا فتحت لك امي علمني اجي اخذ اغراضي من الغرفه
تركي ؛ على مصخرتك هاذي ماني معلمك
نايف ؛ لا والله امزح خلاص علمني بس
تركي ؛ افكر
ضحكو راشد ونايف وطلع تركي للمطبخ
•
في المطبخ
ام راشد ؛ اروى قطعي السلطه
والتفتت على هاجر ؛ وانتي طلعي اللحم وحطيه بالصينيه بجيب الرز عشان نحطه
شموخ ابتسمت ؛ انا انا بجيبه ياخاله
ام راشد بأبتسامه ؛ طيب يا حبيبتي هذا هو صفي مويته وجيبيه
راحت شموخ بجهة المغسله واللي كان شباك المطبخ يطلع على باب الشارع والممر حق الدوانيه وكان الشباك مفتوح
دخلت منيره للمطبخ ؛ عمه شريفه تسأل عن الاغراض اللي نزلها عزام تبي ملابس بنتها
ام راشد ؛ دخلتهم غرفتها تعالي نجيبهم "والتفتت على البنات" شوي وجايه انتبهوا من النار
طلعت ام راشد ومنيره وقالت هاجر ؛ اروى بدليني وطلعي اللحم ثقيل والبخار احرق وجهي
اروى بعناد ؛ لا ما اعرف هذا شغلك
شموخ ضحكت ؛ اسهل شغله اخذتها انا
هاجر ؛ وانا اصعب شغله
اروى ؛ ترا انتي رفلا ولا الشغله مايبيلها
هاجر ؛ لا يالسنعه انتي قطعي لا احطك مكان اللي اطلعه
شموخ ؛ هههههههههههههه
•
تركي اللي كان جاي يدخل للمطبخ ومرّ من عند الشباك ، وقف بمكانه من لمح شموخ وهي لافه جهة المغسله وظهرها جهة الشباك وتضحك وتاركه شعرها البني براحته على ظهرها وطرحتها على كتفها وفستانها الأسود وسوالفها وصوت ضحكتها خلت تركي يوقف بمكانه ماقدر يتحرك ، لفت شموخ بعد ماصفت المويه وهي شايله مصفاية الرز وانتبهت للي واقف من بعيد ويناظر جهة الشباك شهقت ونزلت راسها لتحت وحطت المصفايه على الأرض وسكرت الشباك بسرعه والتفتت على اروى اللي قالت ؛ بسم الله شموخ وش فيك
شموخ ويدها على قلبها ؛ يمه بسم الله فيه احد
هاجر عقدت حواجبها ؛ مين ؟
شموخ ؛ مدري مدري سكرت الشباك بسرعه
قامت اروى وسحبت طرحة شموخ من على كتفها وحطتها على راسها وناظرت مع الشباك ؛ مافيه احد تتخيلين انتي ؟
شموخ تنهدت بخوف ؛ مدري يمكن
هاجر بملل ؛ اقول اخلصي انتي وياها تكفون مت حرّ
دخلت ام راشد ؛ خلاص وانا امك غطي اللحم وروحي ارتاحي
اروى ؛ وانا يمه ما ارتاح ؟
ام راشد ؛ قطعتي السلطه ؟
اروى ؛ لا ماخلصت
ام راشد ؛ خلصيها وروحي ارتاحي
شموخ ؛ هذا الرز
ام راشد ابتسمت ؛ عطيني احطه وروحي مع هاجر
ابتسمت شموخ وطلعت مع هاجر للصاله واروى تكمل تقطيع وام راشد تكمل طبخ
اما عند تركي اللي دخل للدوانيه ووجهه مقلوب ويتذكر شكلها ويسأل نفسه ؛ "هذي ليكون اخت عزام ؟" ويتذكر وجهها لما لفت عليه وطاحت عينها بعينه ومايدري ليش جالس يحاول يتذكر وجهها لاكن ما قدر يسترجع ملامحها لأنه راح بسرعه لما شافته و سكرت الشباك وما استوعب الا على صوت ابوه
ابو راشد ؛ وش صار على العشاء يا تركي
تركي فز ؛ هلا ايه ايه باقي له شوي
نايف اشر له " تعال"
تركي وهو يجلس بين نايف وراشد ؛ وش فيك
راشد ؛ انت اللي وش فيه وجهك
نايف ضحك ؛ اكيد بيدخل لغرفته وسفلت فيه امي
راشد ؛ ههههههههههههه
تركي ؛ اقول انطم مير ماقلت لها
نايف استغرب هدوءه ؛ وش صاير طيب
تركي ؛ مافيني شي كنت بدخل ورجعت عشان اهل عزام داخل
راشد ؛ يعني مارحت لهم ولا دخلت ؟
نايف ؛ اجل شلون تكذب على ابوي افرض العشاء جهز وينتظرونا ناخذه ؟
تركي ؛ انت ورا ماتنطم هامك بطنك بس تبيني اقول قدام عزام والله يايبه مادخلت عشان اهل عزام داخل ؟
نايف ؛ طيب ندري ان اهل عزام داخل دق الباب وبيطلعون اذا هم بالمطبخ
راشد ؛ يليل منك انت وياه انا بدق على امي اسألها
طلع راشد للحوش ودق على امه
ام راشد ؛ هلا
راشد ؛ يمه وش باقي للعشاء ؟
ام راشد ؛ باقي تو حطيت الرز
راشد ؛ واللحم استوى زين ؟
ام راشد ؛ اي ماباقي الا الرز ربع ساعه ويجهز العشاء
راشد ؛ طيب اذا خلص دقي علي
ام راشد ؛ طيب
وقفلت وراحت للصاله
ورجع راشد للدوانيه
..........••..........
بيت ابو هادي
نفس الوقت
كانو بالصاله ينتظرون امهم وشهد يحطون العشاء وحمد يصلي وابو هادي يقرا الأخبار
ابو هادي التفت لهادي اللي على جواله ؛ بكره الفجر بطلع للرياض وباخذ يومين ولا ثلاث انتبه للبيت
هادي اعتدل بجلسته ؛ ابشر وبلغنا وش يصير معك
حمد قام بعد ماسلم وقال وهو يطوي السجاده على الكنب ؛ يبه وش رايك تاخذني معك
ابو هادي ؛ انت تصلي واذنك معنا مافيك خشوع ؟
حمد جلس ؛ الا فيني الحمدلله بس سمعتكم بعد ماخلصت صلاه
هادي ؛ بيروح لحاله ولو بياخذك بياخذني
ابو هادي ؛ ماشاءالله والبيت من يقعد فيه
حمد وهو يتكي ؛ نروح كلنا وين المشكله
ام هادي سمعتهم وطلعت بالعشاء ووراها شهد ؛ لا وين نروح كلنا مره وحده اتركوا ابوكم يخلص شغله واذا ضبطت الأمور نروح
شهد جلست ؛ وانا مع امي
هادي؛ عاد انتي لو تقول امي بعد سنه نروح ماتقولين لا
حمد ؛ لا صدق والله خلونا نروح كلنا
ابو هادي ؛ اقربوا وسمّوا بس وبكره ماني رايح الا لحالي
..........••..........
بيت ابو راشد
ام عزام وشموخ عند شريفه بالصاله مع عيال راشد اللي ملتمين على العنود وفرحانين فيها
وفي المطبخ كانت ام راشد ومنيره وهاجر متقروشين يحطون العشاء ويجهزونه
دخلت اروى ؛ يمه نايف ابلشني صار له ساعه يرسل يقول وش صار على العشاء
ام راشد ؛ وانتي وينك طول الوقت
اروى ؛ كنت بالغرفه
ام راشد التفتت لمنيره ؛ ارسلي لراشد العشاء جهز
منيره ؛ ابشري
وطلعت للصاله ترسل لراشد
اروى تخصّرت ؛ ونايف اللي ازعجنا ، يجي هو وتركي ياخذونه
ام راشد ؛ راشد بيناديهم معه
هاجر ؛ ياكثر قرقرتك يا اروى خذي السفره والمويه للصاله
اروى خزتها واخذت الاغراض وطلعت
جا راشد ومعه تركي نايف ودق الباب ؛ يمه
هاجر ركضت تسكر الباب اللي ع الصاله
وام راشد راحت تفتح لهم ؛ يلا تعالو خذو الصحن
دخل نايف وشال الصحن مع راشد ولف لهاجر وهو يأشر بحاجبه على تركي ؛ عطي ذا المصروع السفره والحقني
تركي كان يناظر جهة المغسله والشباك وفز من سمع نايف وهو يبعده ويشيل الصحن مع راشد ؛ هات الصحن بس ما المصروع الا انت
واخذ الصحن مع راشد وراح
هاجر عقدت حواجبها بضحكه ؛ وش فيه منفس
نايف ؛ مدري صار له ساعه ذابحته الهواجيس
ام راشد ؛ طيب اطلع ورا اخوك تأخرت
نايف تذكر ؛ اي صح يمه تكفين بندخل غرفتنا
هاجر شهقت ؛ خيرر لا مافيه
نايف ؛ اسكتي انتي اغراضنا داخل
هاجر ؛ مب على كيفك ام عزام وبنتها هنا
ام راشد ؛ خلاص انت وياها رح للدوانيه وبعد العشاء نروح المجلس وادخلو خذو اغراضكم واطلعو بسرعه
نايف ناظر هاجر ويأشر لها يقهرها ؛ اببشري
وطلع للدوانيه وام راشد اشرت لهاجر ؛ خذي الصحن والحقيني يلا طلعنا
ولحقتها هاجر للصاله بقهر وتجمعو على العشاء بعد ماقلطتهم ام راشد وهي فرحانه فيهم وفي لمتهم
ونفس الحال في الدوانيه
بعد العشاء جو تركي ونايف يدخلونه للمطبخ اللي مافيه احد والباب اللي على الصاله مقفول
نايف ؛ ييوه امي مب فيه بدخل لغرفتي انا
تركي وهو خايف يدخل احد ؛ اصبر تلقاهم بالصاله خلنا نرجع بس وبعد شوي اكلم هاجر ولا اروى يدخلونا
نايف وهو يتجه لباب المطبخ اللي على الصاله ؛ اقول بس والله طفشت اصبر بطق الباب وتجي وحده من البنات
تركي وهو يسحبه ؛ امسك ارضك بس وخلنا نطلع
وسحبه بالقوه وطلعو للدوانيه ونايف يتحلطم يبي يدخل وتركي يسكته شافوا راشد وهو طالع مع ناصر ولده ومر من قدامهم ؛ بروح غغرفتي وانتو اخمدوا هنا بالأرض اللي تكسر ظهوركم
نايف بقهر ؛ توكل بس
راشد رفع حاجبه وهو يأشر لولده ناصر ؛ اقول بس لاتخليني افك عليك ولدي يسطرك
تركي ؛ لا تكفى زين انه مربوط ولا ماخلا احد
نايف ؛ هههههههههههه
راشد وهو ماسك يد ناصر اللي نعسان ؛ امش يابابا ننام بس وانتو نامو بدري وراكم كرف من الفجر وضحك عليهم ومشى
نايف ضحك بقهر ؛ ياخي يقهر يقهر ودي اصفقه هو وولده
تركي ضحك ودخلو لداخل
ابو راشد التفت لهم ؛ خلوهم يجهزون لنا الفرش وهاتوهم
تركي ؛ هذي جيتنا من داخل مافيه احد خلهم يتعشون ونرجع لهم
عزام ضحك ؛ والله بخاطري اقولكم اني ودي بنومة الحوش
نايف التفت له ؛ عز الله انك جبتها ، وش رايكم ننام بالدكه والجو هالأيام زين وبراد على بداية الشتاء
ابو راشد ؛ تم والله ان تبشر
نايف بضحكه ؛ انا ولا عزام
ابو راشد ضحك ؛ كلكم تبشرون جهز انت وتركي الدكه وحطو الفرش فيها
طلع نايف وتركي وقال تركي وهو يضرب ظهر نايف بخفه ؛ انت جبت فكرة نومة الدكه انت جهزها يالورع
نايف دفه ؛ اقول لايكثر بس ماودك ننام هنا ؟
تركي ؛ الا زين الجو بس مافيني حيل اشيل الفرشه واحط فرشنا
نايف ؛ انا اسويه كله بس بشرط
تركي ارتكز ع الجدار ؛ تم بس وش
نايف رفع حاجبه بخبث ؛ بكره دوري اعزل المحل وانت عزله بدا... قاطعه تركي وهو يشيل الفرش ؛ والله لو تعض الأرض ماعزلته بدالك انا ماشلت الفرشه اللي تحتها غبرتين بعزل محل بكبره
نايف ضحك وهو يشيل معه ؛ اجل اشتغل وانت ساكت
شالو الفرشات والوسايد عشان يحطون مكانها فرش نومهم ووقف نايف وهو ماسك ظهره ؛ اووهه يربي
تركي نفض ثوبه ؛ دق دق على امي بندخل ولا بدق انا
نايف وهو يسحب جواله من جيبه ؛ لا بدق اصبر
بالصاله بعد ماخلصو العشاء ومتجمعين على العنود وهي تتنقل من حضن لحضن دق جوال ام راشد وردت اروى من شافت الرقم ؛ ننعم
نايف ؛ خير انتي اذا دقيت عليكم ماتردون واذا دقينا على امي تلقفتو
اروى ؛ انتو الملاقيف وش تبون تدقون
نايف وهو يفتح سبيكر بعد ما أشر له تركي ؛ عطيني امي ولا مافيه عنب من المزرعه
اروى ؛ خلاص خذ هذي امي
ومدت الجوال لأمها اللي ردت ؛ هلا نايف
نايف ؛ يمه بننام بالحوش بالدكه وبندخل انا وتركي ناخذ الفرش جهزو فرش لأبوي وعزام
ام راشد ؛ كلكم بتنامون بالحوش ولا بس انت وتركي ؟
نايف ؛ كلنا وبندخل ناخذ اغراضنا خلي اهل عزام بالمجلس
ام راشد ؛ طيب
قفلت وقامت وهي تقول لأم عزام بأبتسامه ؛ هنوف تركي ونايف بيدخلون الغرفه ياخذون اغراضهم تعالو للمجلس
ام عزام وهي تحط العنود بحضن شريفه ؛ ابشري يلا ياشموخ تعالي معي ندخل
قامت شموخ وراحت ورا امها ومنيره اللي قامت معهم توديهم
واروى وهاجر بقوا عند شريفه اللي مع جوري تلاعب العنود بالصاله وبنات راشد مناير واميره اللي نايمين على طرف
ام راشد وهي تفتح الباب اللي ع الصاله ووراه تركي ونايف ؛ ادخلو مافيه احد
نايف وهو يشوف شريفه وبنتها العنود ؛ اوووه من الحلوه اللي معها بنتها هذي
تركي اللي كان يناظر العبايه والجوال على طرف الكنب والتفت على شريفه ؛ هللا والله بأم العنود
شريفه ؛ هلا هلا والله وينكم طول اليوم ماشفتكم
تركي وهو يسلم عليها ؛ والله تو فضينا يا شروف
نايف بعد ماسلم ؛ خلاص ما عادت شروف صارت ام العنود
وجلسو والتفت نايف للعنود اللي بحضن هاجر وهو يأشر لها تعطيه
هاجر ؛ لا وهي معي
نايف ؛ هاتيها بس طول الوقت معك
هاجر وهي تبعد يده ؛ لا لا امانه والله تو مسكتها طول الوقت مع اروى
تركي ؛ يا ذا الجنيه لو دورها الحين اكلتنا
شريفه ضحكت ؛ الله الله دورها صار فيه ادوار على بنتي اجل على كذا بفلوس تشيلونها
اروى ؛ يلا ياتركي انت ونايف هاتو فلوسكم
هاجر ؛ وانا اشيلهم عندي
شريفه ؛ تسرقينها انتي
نايف ؛ حاميها حراميها هاتي هالنتفه بس
هاجر شهقت ؛ بالله يانايف ؟ انا حراميه هه.....
قطع كلامها نايف اللي اخذ العنود منها وشالها وهو يبوسها ويغني لها ؛ عنوده بنت ابوها عشرةٍ خطبوها
الكل ؛ ههههههههههههههه
ام راشد ضحكت وهي تصفق من شافت جوري جلست بحضنها ومبين زعلت ؛ وجوجو بنت ابوها وغارت بنت ابوها
نايف وهو يحط العنود بحضن تركي اللي اشر له يعطيه ؛ والله ياجوجو انك احسن من ابوك الجاحد
تركي ضحك ؛ ااص اسكت الحين تعلم ابوها
شريفه ؛ ليه وش صاير
نايف ؛ جحدنا وراح ينام وخلا الكرف علينا
هاجر ؛ ويين الكرف يالحبيب كله علينا
نايف ؛ ايي وحنا اللي ساعه ننفض الغبره من الفرش برا ما انكرفنا
ام راشد شهقت وفزت تاخذ العنود من حضن تركي ؛ نعنبوا بليسكم مغبرين وشايلين الورع تبون تكتمونها بالغبار انتوا
تركي خبط كتف نايف ؛ ياقليل الخاتمه ماعلمت الا وهي معي ما مداني اعلم العنود عن حياة خالها الفارس
اروى ؛ الفارس من انت ؟ والله مفارقك
شريفه بضحك ؛ لاوالله حرام عليك يا اروى محظوظه العنود يوم خالها تركي
نايف ؛ ونايف ماله حض
هاجر بنفس الوقت ؛ وخالاتها مالها حض فيهم ؟
شريفه ضحكت ؛ بسم الله اكلتوني الا محظوظه فيكم كلكم
تركي بأستيعاب ؛ نايف ماكنا نسينا شي
نايف بهدوء ؛ الا
وهجوا يركضون لداخل الغرف ياخذون الفرش واغراضهم ويطلعون وسط ضحك ام راشد وبناتها عليهم
اروى ؛ والله الحين اكتشفت ان عندي اخوان مب صاحين
هاجر ؛ صدقتي
شريفه تضحك ؛ والله يونسون حرام عليكم
اروى ؛ ادري يختي يزينهم بس فيهم طفاقه
هاجر ؛ نمزح اكيد والله اني احبهم
شريفه ؛ اووهه يمه تصريحات نادي لأخواني يسمعون
ام راشد ضحكت وقامت تبلغ ام عزام ومنيره وشموخ انهم طلعو
منيره وهي متجهه للصاله وتشوف بناتها نايمين وحتى جوري اللي كانت صاحيه غفت عفست ملامحها بضيق وتنهدت ؛ ييوه كلهم ناموا تكفون هاجر انتي واروى شيلو اميره ومناير وانا باخذ جوري وصلوهم معي للغرفه
ام راشد ؛ يلا فزو وخذو طرحاتكم احتياط
اروى وهاجر ؛ ابشري
قامو اخذو طرحاتهم وكل وحده شالت وحده
منيره ؛ يلا تصبحون على خير
الكل ؛ وانتي من اهله
طلعت منيره وهي تمشي جوري ورا هاجر واروى اللي طلعوا قبلها
شموخ وهي تنسدح على رجول امها ؛ يمه بنام
شريفه سمعتها وابتسمت والتفتت لأمها ؛ شموخ دوّخت يايمه
ام راشد ضحكت ؛ ياحبيبتي الحين بنحط الفرش وننام عاد الله يعينكم راجعين من السفر اليوم ولا ارتحتوا
ام عزام ؛ والله نسينا التعب يوم شفناكم
ابتسمت ام راشد ودخلو اروى وهاجر وقبل لايجلسون قالت ام راشد ؛ يابنات جهزوا الغرفه بينامون الحين
وقاموا هاجر واروى وجهزوا غرفة ام عزام وشموخ ورجعوا الصاله
ام راشد وهي تشيل العنود ؛ قومي ياشروف وانا امك لغرفتك اسندي ظهرك من هالكنب
هزت راسها شريفه و قامت لغرفتها وامها معها شايله العنود واغراضها وقالت وهي تأشر على الغرفه ؛ وهذي غرفتك يأم عزام
والتفتت على شموخ بأبتسامه ؛ عاد انتي ياشموخ اروى وهاجر جهزوا فراشك معهم بالغرفه
شموخ ابتسمت وقالت اروى ؛ يلا يلا قومي معنا
قامت شموخ وهاجر واروى للغرفه
ام عزام ضحكت وهي تقوم ؛ اجل تصبحين على خير ي أم راشد والله اني تعبت بعد بنام
ام راشد ابتسمت ؛ وانتي من اهله نوم العافيه
ابتسمت ام عزام وراحت تنام وراحت ام راشد لغرفتها بعد ماجهزت كل شي لشريفه وبنتها
" بالحوش"
عند تركي اللي ناظر عزام وابو راشد حوله بسابع نومه همس لنايف اللي بجنبه ؛ نايف ابروح امشي بالديره قم معي
ماجاه رد من نايف اللي تو غفى
تركي حذف عليه المخده وفز نايف وشال اللحاف عن وجهه ؛ وجع وش فيك
تركي ضحك ؛ بطلع اتمشى قم معي
نايف ؛ اقول والله ان صفقتك لا اخليك تنام نومه ابديه نم بس ترا راسي مصدع وماصدقت انام وخربت علي
تركي اشر لنايف من شاف ابوه تحرك ؛ اصصص فضحتنا ابوي لايصحى اصفقك انا
نايف ؛ اجل اخمد عشان لا اعلمه
تأفف تركي بقهر ورجع يتغطى وهو مو متعود ينام هالوقت لاكن يحاول ينام لأنه يدري مابينام للظهر بكره..

.. تفاعلوا ❤