Hard Murder 2

လောကအရှင်သခင် / ေလာကအရွင္သခင္

(Uni) အဟွတ်~ ~ အဟွတ်

ရင်ဘတ်သို့ အဆက်မပြတ်ဖိခြင်းခံရပြီးနောက် လည်မြိုဝမှ စပ်ဖျင်းဖျင်းဖြင့် ရေတချို့ အန်ထွက်လာပြီး ဟာလေ သတိပြန်လည်လာခဲ့၏။

" အစ်ကို အစ်ကို အဆင်ပြေရဲ့လား "

သတိရရချင်း ကြားလိုက်ရတဲ့အသံက အက်ဆစ်ရဲ့အသံလည်း မဟုတ်ပဲ မြင်လိုက်ရတဲ့ပုံရိပ်က ရေစိုရွှဲနေတဲ့ မာဂရက်သာ ဖြစ်နေခဲ့သည်။ ဧကန္တ ထိုကောင်မလေးက သူ့ကို ခုန်ဆင်းကယ်ခဲ့သည်လား။

" မာဂရက် မင်းက ဘယ်လို? "

တစ်ဖက်ကို လှည့်ကြည့်တော့ ရပ်နေဆဲနေရာမှာ ရပ်ကာ သူတို့ကိုစိုက်ကြည့်နေတဲ့အက်ဆစ်ကို တွေ့ရပြီး မာဂရက်ကတော့ သူ့အား စိတ်ပူတပြင်းဖြစ်နေခဲ့လေသည်။

" တော်သေးတာပေါ့ အစ်ကိုရယ်။ ညီမဖြင့် စိတ်ပူလွန်းလို့ ရင်တွေတုန်သွားတာပဲ။ အရမ်းချမ်းနေမှာပဲ အထဲကိုသွားရအောင်နော် "

သို့နှင့် မာဂရက် ခေါ်ဆောင်ရာနောက်သို့ ဟာလေ လိုက်ပါသွားခဲ့ရသည်။ ဒါပေမယ့် သူ့မျက်ဝန်းတွေကတော့ တစ်စက်ကလေးမှ ရေမစိုသော အက်ဆစ်ဆီကိုပင်။
သူ ရေနစ်မွန်းကြပ်သည်အထိ ပစ်ထားပြီးနောက် အက်ဆစ် သူ့ကိုပြန်လာကယ်လိမ့်မည်ဟု တွေးထားခဲ့ပေမယ့် . . . ထိုကောင်လေးက သူသေတဲ့အထိ စောင့်ကြည့်ချင်နေသည့်ပုံပေါ်၍ စိတ်ထဲ မသိုးမသန့်ဖြစ်လာခဲ့ရသည်။

တကယ်ပဲ အက်ဆစ် ပြောင်းလဲသွားခဲ့တာလား။
တကယ်ပဲ ကြောက်စရာကောင်းလာတာလား။

" ညီမလာတာကို အစ်ကိုမကြိုက်မှန်းသိပေမယ့် စုံစမ်းမှုအတွက် ပြောစရာလေးရှိလို့ဆိုပြီး ရဲစိတ်တင်လာခဲ့တာ။ ဒီရောက်တော့ အစ်ကို ဘယ်မှာလဲလို့ အက်ဆစ်ကို မေးတော့ ရေခဲပြင်ကြီးကို လက်ညှိုးထိုးပြတယ်လေ။ အဲ့ဒီထဲကို ကျသွားပြီတဲ့။ ညီမ အရမ်းစိတ်ပူပြီး မျက်လုံးတွေပြာသွားတာပဲ။ တော်သေးတာပေါ့ အစ်ကိုရယ်။ အစ်ကို တစ်ခုခုဖြစ်ရင် ညီမ ရင်ကျိုးမှာ "

မီးလင်းဖိုအား ထင်းတွေတစ်ချောင်းပြီးတစ်ချောင်းထည့်ကာ အနွေးဓါတ်ပေးရင်း မာဂရက်တစ်ယောက် စကားတွေ အဆက်မပြတ်ပြောနေခဲ့၏။ ဟာလေလည်း ချမ်းတုန်နေလွန်း၍ ကိုယ်ပေါ်၌ခြုံထားသောစောင်ထည်ထဲသို့ ကျုံ့နေမိပြီး မာဂရက်အား မေးခွန်းထုတ်လိုက်မိသည်။