Hard Murder 2

အဆိပ်ရှိသောလူ/အဆိပ္ရွိေသာသူ

(Uni) '' လူနာကို တစ်ချက်အောက်စီဂျင်ပေးမယ် ''

'' အခု သွေးပေါင်ချိန် ဘယ်လောက်လဲ ''

'' 50 37 ''

'' အခြေအနေမကောင်းဘူး သွေးသွင်းဖို့လိုလိမ့်မယ်။ ဟိုနာ့စ် သွေးသွင်းဖို့ချက်ချင်းပြင်ပါ ''

'' ဟုတ်ကဲ့ ဆရာ ''

အရေးပေါ်ခန်းတစ်ခုတွင် ဒဏ်ရာအပြင်းအထန်နှင့်ရောက်လာသောလူနာကြောင့် ဆရာ၀န်နှင့်သူနာပြုများ အသည်းအသန်အလုပ်ရှုပ်နေခဲ့ကြသည်။ ထို့နည်းတူ အရေးပေါ်ခန်း၏ပြင်ပ၌ လူနာ၏ရလဒ်ကို ရင်တမမနှင့်စောင့်ဆိုင်းနေသောအမျိုးသမီးကြီးတစ်ဦးလည်း ရှိနေပါ၏။

'' ဘုရားသခင် စောင့်ရှောက်ပေးတော်မူပါ သမီးမာဂရက် ဘာမှမဖြစ်ပါစေနဲ့ သမီးမာဂရက်ကို အသက်ရှင်ခွင့်ပေးသနားတော်မူပါ အို ဘုရားသခင် ''

မိမဲ့ဖမဲ့တစ်ယောက်တည်းဖြစ်နေသူမို့ လူနာရှင်အဖြစ် ယူရှရီ ခံယူထားပြီး မာဂရက်အတွက် ဆုတောင်းစာများရွတ်ဆိုပေးနေခဲ့မိသည်။ မာဂရက် ယခုလိုဖြစ်တာကိုတော့ သူ့ရဲ့သားဖြစ်သူ ဟာလေ့ဆီမှ သိခဲ့ရပြီး ဆေးရုံသို့‌ရောက်လာခဲ့ခြင်းဖြစ်သည်။ သို့သော် ဟာလေတော့ အတူတကွ ပါမလာခဲ့‌ပေ။

°° သားက ပြန်မလိုက်ဘူးလား °°°

°°° ကျွန်တော် မလိုက်တော့ဘူး။ အဲ့ဒီအစား အမေ့ကို တောင်းဆိုစရာရှိတယ် °°°

မျက်၀န်းထဲမှာလည်း ဆေးရုံအ၀င်၀သို့ သူရောက်ရောက်ချင်း သူ့ကိုလာကြိုပေးပြီး ထူးဆန်းစွာနှင့် သူ့လက်နှစ်ဖက်ကိုဆုပ်ကိုင်ကာ ကိစ္စတချို့တောင်းဆိုခဲ့သော ဟာလေ၏တည်ငြိမ်သောမျက်နှာသွင်ပြင်ကို အဖန်ဖန်မြင်ယောင်ရင်း သူ့ရဲ့ရင်က လေးလံသည်ထက်ပိုလေးလံနေခဲ့ရသည်။

°°° သားက ဘာတောင်းဆိုမှာလဲ °°°

°°° မာဂရက်ကို အမေနဲ့အတူ စိတ်ချထားခဲ့ချင်တယ် အဲ့ဒါ အမေလုပ်ပေးနိုင်မလား °°°

°°° မာဂရက်ဆိုတာ မင်းပြီးရင် အမေ့သမီးလေးလိုပါပဲ အမေစောင့်ရှောက်မှာပေါ့။ တောင်းဆိုစရာတောင် မလိုပါဘူး။ ဒါပေမယ့် သားက ဒီလိုတွေမှာနေတာ ဘယ်သွားမလို့လဲ °°°