Under the Sky

Part 41

" කවීන්!"

අභිමාන් අයියාගේ කෝපාන්විත හඬත් සමඟ මම වහා ම තින්තගෑම පසෙකලා පිටතට දිවගියෙමි. ඔහු සිටියේ කවීන් අයියාට මුහුණට මුහුණලා සිටගෙනයි.

" මේ ළමයි මෙච්චර නැහීගෙන වැඩකරනවා. තමුන් නිදාගත්තහම හරිද ඒ අතරේ! "

කවීන් අයියා කිසිවක් නොපවසා අභිමාන් අයියා දෙස ම බලාසිටියේ ය. ඔහු අඩුම තරමින් වරදකාරී හැඟීමකින්වත් නොසිටියේ ය.

" යශේන්! කොහෙ ද හිටියේ මෙච්චර වෙලා?"

"සොරි සාජන්... මම ඇතුලේ වැඩ කරන ගමන් හිටියේ. මම මෙයාලා ගාර්ඩ්න් එක හදනවා කිව්ව නිසා ආයෙත් බලන්න ආවේ නැහැ."

" හහ්! මරු සීනියර් කෝප්‍රල්. අනිත් එය මෙතන කට ඇරන් බලන් ඉන්නේ නැතුව යනවා තම තමන්ගේ වැඩවලට."

ද්වාරයෙන් හිස පොවමින් එම සිදුවීම නැරඹීමට උත්සහ කරමින් සිටි මම නැවතත් එතුළට දිවගියේ මා හටත් නැවත බැණුම් ඇසීමට ආශාවක් නොමැති නිසායි. අප දෙස අනෙක් පාසල්වල ළමුන් ද විමසිලිමත් දෑසින් බලනා කල මා හට කවීන් අයියා කෙරෙහි ඇතිවූයේ අසීමිත ආකාරයේ කෝපයකි. නමුත් එහි සිදුවූ සියල්ල මා නොදන්නා බැවින් නැවතත් තීන්ත ආලේප කරන අතරතුරේ දී මම මෙතුක අයියාගෙන් එහි කුමක් සිදුවුණේදැයි විමසුවෙමි.

" සසිරු අයියලා ඉස්සරහ කොටස සුද්ද කරන අතරේ කවීන් අයියා වතුර බහින්න කාණුවක් කපන්නම් කියලා තව පොඩි මල්ලිලා දෙන්නෙක් එක්ක ගිහින් අනිත් පැත්තට. ඊට පස්සේ කවීන් එතන වාඩිවෙලා ඉන්න අතරේ අර පොඩි එවුන් දෙන්නාට කියලා වැඩ කරන්න කියලා. සාජන් එද්දී කවීන් හොඳට නිදි බිත්තියටත් හේත්තුවෙලා. "

" මේ කවීන් අයියා නම්..."

මාගේ සිතට නැඟුනු සියල්ල ම මෙතුක අයියාට පැවසිය නොහැකි බැවින් මම නිහඬ වූයෙමි. නමුත් මම තරමට ම මෙතුක අයියාත් කෝපයට පත්වී සිටියේ ය.

" ඔය කවීන් අයියා කලින් ඉඳන් ම ඔහොමයි. මම නම් ආසම නැති කෙනෙක්."

" එයාව අයින් කළේ ඒක නිසා ද?"

" ඔව් ශේන්. එයා ගිය අවුරුද්දේ අපේ සීනියර් කෙනෙක්. පොඩි මල්ලී කෙනෙක්ව බුලී කළා කියලා එයාට ඒ මල්ලීගේ ගෙදරින් ලොකු කේස් එකක් දැම්මා. ඒත් ආයෙත් එයාට එන්න කියන්න වුණානේ.."