Under the Sky

Part 43

" මටත් තියරි පොතක් ගෙනල්ලා දෙන්න."

අභිමාන් අයියා පවසත් ම මම නැවතත් නැඟී සිටියෙමි. ඔහු කොහෙත් ම මා හට නිදහසේ හිඳීමට ඉඩලබා නොදෙන අයුරකි. ඇතැම් විට මම විවේකීව පාඩම් කරනු දැක අභිමාන් අයියා ඒ කෙරෙහි ඊරිසියාවෙන් පසුවනවා ද වියහැක.

මම ඔහුට එය ගෙනැවිත් දී නැවතත් පාඩම කියවූයෙමි. ඒ අතරේ අභිමාන් අයියා තනිව ම පාඩම් කළේ මම රැගෙන ආ සිද්ධාලේප කුප්පියෙන් බිඳක් නළල දෙපස ආලේප කරගනිමිනි. මට ඔහුට උපකාර කිරීමට සිතුන ද එහි බොහෝ දෙනා සිටි නිසාවෙන් එම අදහස අත්හැර ගත්තෙමි. සැරයන්වරුන්ට පවතින්නේ වෙන ම පාඩමක් බැවින් ඔහුට එය තනිව ම පාඩම් කිරීමට සිදු වී ඇත.

" දැන් යන්න නිදාගන්න."

ඒ වදනත් සමඟ මම හා තවත් කිහිපදෙනෙක් ම පිටත ජල කරාම අසලට ගොස් දෑත්වල තිබූ තීන්ත පැල්ලම් සෝදාගෙන පිරිසිදු වූයෙමු. මම එහි පැමිණියේ හොඳින් ඇඟ සෝදාගෙන පිරිසිදු වන්නෙමැයි අදහස් කරගෙන වුව ද එම ජලය අයිස් මෙන් ශීතල විය. වෙවුලමින් තත්පර කිහිපයකින් ම අපි නැවතත් ශාලාව වෙත ම පැමිණියේ පිරිසිදුවීම උදෑසනට කල්දමා ය.

එක් අතකින් අපි තරමක් හොඳ තත්ත්වයක සිටියෙමු. යශේන් අයියා නම් තීන්ත භාජනය ඔහුගේ මුහුණ ආසන්නයෙන් ම තබාගෙන තීන්ත ආලේපකළ ස්ථානයේ ම වැතිරීගෙන නිදාසිටියේ ය. සසිරු අයියාත් ට්‍රන්ක පෙට්ටියක් බදාගෙන සිටි අතර ඔහු තීන්ත පිසදැමූ විශාල රෙද්දක් පොරවාගෙන සිටියේ ය. පියවි සිහියෙන් සිටියේ අභිමාන් අයියා පමණි. ඔහු ඛණ්ඩභාර ගුරුතුමා සමඟ සියලුදෙනා සිටීදැයි ගණන්කර බලා ද්වාරය ද අගුළු දැමුවේ ය. අපගේ ගුරුතුමාට නම් වෙන්කළ ඇඳක් තිබූ අතර සෙස්සන්ට උරුම වූයේ ශීතල පොළොවයි.

පසුදා උදෑසන වෙනදාටත් වඩා කාර්‍යබහුල විය. මම අපේක්ෂාකළ පරිදි සන්සුන් ව පිරිසිදු වීමට නම් කොහෙත් ම හැකියාවක් නොලැබිණි. එම නිසා මට දෑත්වල තීන්ත පැල්ලම් තවමත් තිබියදී ම නිළ ඇඳුම ඇඳගෙන සූදානම් වීමට සිදුවිය. එය ගැටලුවක් නොවූයේ අද දිනයේ නිළ ඇඳුමට ලකුණු ලබා නොදෙන බැවිනි.

" ඒයි කැඩෙට්... ඉක්මන් කරනවලා!!! අද යන්නේ නැත්ද???"

සම්පූර්ණ නිළ ඇඳුම හැඳ දිගු කෝට්ටක් වැනි යමක් අතේ තබාගෙන සිටි නිළධාරියෙක් තවත් එවැනිම වූ කිහිපදෙනෙක් සමඟ ශාලාවෙන් ශාලාවට ගමන්කරමින් බැණවදිමින් සිටියේ ය. ඔහු සැරයන්ට වඩා ඉහළ නිළයක් දරන පාසල් ශිෂ්‍යයෙකි. ඔවුන් ඛණ්ඩයට ඇතුළත් නොවන අතර කඳවුර පාලනයට උපකාරී වේ. අභිමාන් අයියාත් ලබන වසරේ මේ ආකාරයට සියල්ලන්ට ම බැණවදිමින් ගමන්කරනු මා හට මැවී පෙනෙන්නට විය.